“Aunsifomwos Nukemwa” Oekyukla sin Jeova

“A wangin sie selos [mwon sparro] fwa putati nu in foko, a Papa tumomwos tia liye. A aunsifomwos nu kemwa oekyukla.”​—MATTU 10:29, 30.

1, 2. (a) Efu ku Job el nunku mu God el som lukel? (b) Ya kas lal Job akkalemye mu el forla liki God? Aketeye.

“NGA wowoyuk nu sum, a kom tia topuk yu, Nga tuyuk a kom suiyuwi. Kom ekla sulallel nu sik; ke ku lun poum kom kolyai yu.” Mokul se su fwak kas inge el pulakin me keok upa, paenang tia me lut se fwin el pulakin asor yok! Tula ma saok nukemwa lal, ma upa sikyak kunausla ku uniye tulik natul nukemwa, a inge el keok ke mas upa. In en mokul se inge pa Job, a ma upa sikyak nu sel inge simusyukla in Baibel in kasre kut in eis me insemwomwo ka.​—Job 30:20, 21

² Kas lal Job inge oral in ekla oana sie met su lain God, tusruktu tia oinge. Job el akkalemye mukena ke asor yok su el pulakin ke insiel. (Job 6:2, 3) El nukin la Setan pa oru me srifwe puspus lal inge, ke ma inge el fwak mu God el som lukel. Oasr sie pal, Job el fwak nu sin Jeova: “Efu Kom ku mwukunla mutom, a filiyuwi met lokwalok Lom?”a​—Job 13:24.

3. Ke pal in me keok puspus sun kut, mea ku in sikyak ke nunak lasr?

³ Ke pal inge, pus sin met kulansap lun Jeova elos sun me keok puspus pal nukemwa su tuku ke sripen meun, orekma in lain lun met puspus ke akwuk lun politic, ke paka fukoko wi kusrusr a tsunami, munasla ke sripen matou, mas a oiyen sekasrup upa, a masap upa lun guferment in tia oru orekma lalos in alu nu sin God. Saap kom pulakin pa kutu me srifwe ku ma upa saye. Kutupal saap kom nunku mu Jeova el mwukla a som liki kom. Kom arulanu etu ke ma simusla in Jon 3:16: “Tu God El lungse fwalu oinge, tu El ase Mwen sefwanna isusla natul.” Ne oinge, kom fwin pulakin keok a wangin me kasru ka, saap kom nunku: ‘Ya God el lungse nga na paye? Ya el etu na paye me keok su sikyak nu sik? Ya el karungin a nunku keik oana met se?’

4. Ma upa fuka Poul el enenu in mongfusesr ka pal nukemwa, a ke inkanek puspus fuka ma sikyak nu sel inge ku in kasre kut?

⁴ Nunku ke ma sikyak nu sin met sap Poul. El simusla: “Etuku nu sik sie otunmu in ikuk, sie met sap lun Setan tu lan pouk yu, Nga siyuk sin Leum pal tolu ke ma inge, tu in wanginla liki yu.” Jeova el long me siyuk lal. Tusruktu, el fwak nu sel Poul la el fwa tia akkeyela mas lal Poul ke inkanek lun mwenmwen. A, Poul el enenu in suk ku lun God in kasrel in kutangla “otunmu ke ikwel.”b (2 Korint 12:7-9) Oana Poul, saap kom pulakin pa sie ma upa su koflana wanginla. Saap kom nunku, ‘Ke sripen Jeova el tia ase kasru nu sik nu ke ma upa sa ya kalmeyen ma inge pa el tia etu ma sikyuk nu sik ku el tia karungin yu?’ Me top nu ka pa mo! Pulakin a nunak paye lun Jeova nu sin kais sie met kulansap oaru nukemwa lal akkalemyeyuk yok ke ma Jisus el fwak nu sin met sap puspus lal tia pat tokin el sulelosla. Lela kut in liye la fuka kas lal ku in akkeye kut ke pal inge.

“Nik Komwos Sangeng”​—Efu?

5, 6. (a) Fuka Jisus el kasru met sap puspus lal in tia sangeng ke ma su fwa sikyak ke pal fwasru? (b) Fuka Poul el akkalemye lalalfongi lal nu ke karunginyuk lun Jeova nu sel?

⁵ Jisus el sang ku nu sin met sap puspus lal, wekunang “ku fwin ngun fokfok, in siselosla, a in akkeyela kain in mas nukemwa a kain munas nukemwa.” Fwinne oinge, ma inge tia kalmekin mu elos sukosokla liki kutena kain in me srifwe ku ma upa. Ke kalme saye, Jisus el akkalemye ke kutu ma su fwa sikyak nu selos. Tusruktu, el kaifwelos: “Nik komwos sangeng selos su uniye mano, a koflanu uniye ngun: a mwo tu komwos in sangeng Sel; su ku in kunausla ngun a mano pa in Gehenna.”​—Mattu 10:1, 16-22, 28, New World Translation.

⁶ In kasru met sap puspus lal in kalem ka la efu ku elos tia enenu in sangeng, Jisus el akkalemye ke me pupulyuk luo. El fwak nu selos: “Ya elos tia kukakunla luo mwon ke sie penni? A wangin sie selos fwa putati nu in foko, a Papa tumomwos tia liye. A aunsifomwos nu kemwa oekyukla. Ke ma inge nik komwos sangeng: komwos saok yok liki mwon sparro puspus.” (Mattu 10:29-31) Loang akmwoye nu ka la Jisus el orani in sramsramkin in tia sangeng fwin sun kutena ma upa a akkalemye lalalfongi nu sin Jeova la el fwa karungin kut. Kalem la, oasr yurol Poul kain in lalalfongi inge. El simusla: “God el fwin wi kut, su ku in lain kut? El su tia sruokye Mwen natul a el esalmu kesr nu kemwa, fuka el fwa tia oayepa ase nu sesr ma nukemwa yurol, tia mol?” (Rom 8:31, 32) Kom fwin sun ma upa puspus, kom ku in lalalfongi pa la Jeova el karungin kom ke kom akkalemye la kom oaru nu sel pal nukemwa. Oiya inge ku in akilenyuk kalem ke kut nunku yok ke kas in akkeye lal Jisus nu sin met sap puspus lal.

Saokiyen sie Mwon Sparro

7, 8. (a) Fuka nunak lun met puspus ke mwon sparro in len lal Jisus? (b) Efu ku Mattu 10:29 el orekmakin kas Grik ke mwon sparro su oasr kalmeye nu ke mwon sparro srisrik?

⁷ Me pupulyuk puspus lal Jisus akkalemye ke inkanek mwo ke lungse a karungin lun Jeova nu sin kais sie met kulansap Lal. Nunku meet ke me pupulyuk lun mwon sparro. In len lal Jisus, mwon sparro el orekmakinyuk oana me mongo, tusruktu ke sripen elos kunausla fwokin witu, mwon sparro el nunkeyuk mu me sensen se nu ke sak in imau. Arulanu pukanten mwon sparro in pal ingo a fusrasr molo, molin mwon luo oasr na ke cent limekosr kut fwin orekmakin mani Merika ke pal inge. Cent sengoul el fwal in molela tia mwon sparro akosr a mwon limekosr, oasr mwon se toeni nu ka meyen wangin na paye lupan moul yok ke mwon inge!​—Luk 12:6.

⁸ Nunku pa ke lupan mwon inge. Fwin srikeyuk nu ke kutupa mwon, mwon inge arulanu srikla. Kas Grik su lungasyukla oana “mwon sparro” in Mattu 10:29 el sramsramkin ke mwon sparro srisrik. Kalem la Jisus el lungse met sap nukemwa lal in petsaela ke nunak lalos sie mwon su srik liki nukemwa in masrlon mwon nukemwa. Oana ke sie buk su fwak, “Jisus el orekmakin ke me sramsram lal sie mwon su arulanu srikla a el orekmakin kas inge ‘arulanu srik’ in akkalemye lupan mwon inge!”

9. Me lutlut fuka Jisus el akkalemye ke me pupulyuk lal ke mwon sparro puspus?

⁹ Me pupulyuk lal Jisus ke mwon sparro el akkalemye sie me lutlut yok: Me lutlut yok inge pa ma su wangin sripe nu sin metu el yok sripe nu sin Jeova God. Jisus el akyokye ma paye inge ke el fwak la sie mwon sparro fwa tia “putatla nu in foko” su Jeova el tia liye.c Arulanu kalem me lutlut inge. Fwin Jeova God el loang mwo nu ke mwon su srik emeet a tia yok sripe, paye la Jeova el arulanu loang yok pa nu ke ma sikyak nu sin sie met su oru sulela lal in kulansapul!

10. Mea kalmeyen kas inge: “Aunsifomwos nukemwa oekyukla”?

¹⁰ In wekunang me pupulyuk lal ke mwon sparro, Jisus el fwak: “A aunsifomwos nu kemwa oekyukla.” (Mattu 10:30) In kas futoto tusruktu yok kalmeye nu ke me lutlut ke pupulyuk lal Jisus ke mwon sparro puspus. Nunku ka: Pusiyen aunsifen met el oasr ke 100,000. Aunsuf nukemwa lun sie met el oana sie, a wangin soko aunsuf luman fwal kut in loang yok nu ka. Tusruktu, kais soko aunsuf el liyeyuk a oekyukla sin Jeova God. Ke sripe se inge, ya oasr ma sikyuk ke moul lasr Jeova el nukin? Paye, Jeova el arulanu etu ma nukemwa ke kais sie met kulansap lal. Aok, el “liye inse.”​—1 Samuel 16:7.

11. Fuka Devid el akkalemye lulalfongi lal la Jeova el nunku kel a karunganul?

¹¹ Devid, su pulakin tari me keok puspus, el lulalfongi la Jeova el karunganul. El simusla: “O Jeova, kom suiyuwi a ete yu. Kom etu mutenguk a tu luk; Kom etu nunkuk omeet me.” (Sam 139:1, 2) Kom ku pa in lulalfongi la Jeova el arulanu ete kom. (Jeremaia 17:10) Nikmet sa in nunku mu Jeova el tia ete kom ku loang nu sum ke sripen kom arulanu srikla ku tia saok!

“Kom Likiye Sroninmutuk nu in Sufwa Lom”

12. Kut etu fuka la Jeova el arulanu etu me keok puspus su pulakinyuk sin met kulansap nukemwa lal?

¹² Jeova el tia etu mukena kais sie met kulansap lal a el etu pa me keok nukemwa su pulakinyuk sin kais sie selos. Ke sie me pupulyuk, ke pal se met Israel elos akkolukyeyuk oana met sruo, Jeova el fwak nu sel Moses: “A Jeova el fwak, Paye Nga liye keok lun met srak, su muta in Ijipt, a Nga long tung lalos meyen met kol lalos: tu nga etu asor lalos.” (Exodus 3:7) Sie me akkeye in etu la ke kut muteng ke sie ma upa, Jeova el liye ma sikyak inge a el long pulakin upa lasr ke kut pre nu sel! Paye la el etu a loang mwo nu ke me keok lasr.

13. Mea akkalemye la Jeova el pula pa me keok lun met kulansap nukemwa lal?

¹³ Orekma in karungin lun Jeova nu selos su esalosyang tari in kulansupal ku in liyeyuk yok ke pulakin lal nu sin met Israel nukemwa. Ke pal puspus met Israel elos sun me keok ke sripen elos srunga in long pusren God, ne oinge Isaia el simusla kel Jeova: “In keok lalos nu kemwa El keok.” (Isaia 63:9) Ke ma inge, in oana sie met kulansap oaru lun Jeova, kom ku in lulalfongi la fwin kom pulakin ngal, Jeova el pula pa ma kom pula inge. Ya ma inge tia akkeye kom in tu na ku a tia sangeng ke ma upa a in tafwela na in oru ke ku lom kemwa in kulansapul?​—1 Piter 5:6, 7.

14. Mea ma puspus su sikyuk ke pal se Sam ak 56 simusyukla?

¹⁴ Lulalfongi yok lal Togusra Devid akkalemyeyuk in Sam 56 su Devid el simusla ke el kaengla lukel Togusra Soul su lungse in unilye, Jeova el karunganul a pulakin ngal ke Devid el pulakin ngal. Devid el kaengla nu in sie an pangpang Gat, a el sangeng in sruu el sin met Filistia fwin elos akilenulak. El simusla: “Met lokwalok luk elos lungse okomyula in len fon: tu elos pus su fulang in meun lain yu.” Ke sripen ma upa inge sikyak nu sel, Devid el forla nu sin Jeova. “In len fon elos akkuye kas luk,” el fwak. “Nunkalos nu kemwa koluk nu sik.”​—Sam 56:2, 5.

¹⁵ In oana ma simusla in Sam 56:8, Devid el akkalemye kas mwomwo inge: “Kom oekla tafongla luk. Kom likiye sroninmutuk nu in sufwa Lom. Ya elos tia on in buk Nutum?” Kas inge akkalemye nunak mwo a karunginyuk mwomwo lun Jeova! Ke kut pulakin toasr, kut ku in tung a akkalemye pulakin upa lasr nu sin Jeova. Jisus el oru pa ma inge. (Hibru 5:7) Yok lulalfongi lal Devid mu Jeova el liyel a el esam me keok lal, in oana God el filiye sroninmutal nu ke sufwa ku simusla ma inge ke sie buk.d Saap kom ku in pulakin mu sroninmutum yokla in nekla sufwa soko ku in simusyukla ke sra puspus ke buk se. Fwin ma inge sikyuk nu sum, kom ku in eis me akkeye. Baibel el fwak nu sesr: “Jeova el muta apkuran nu selos su inse musalla, a molelosla su toasr in ngun ke ma koluk lalos.”​—Sam 34:18.

Ekla Oana sie Met Kawuk Futoto lun God

16, 17. (a) Kut etu fuka la Jeova el etu a pula pa ma upa nukemwa su pulakinyuk sin met kulansap nu kemwa lal? (b) Mea Jeova el orala tari nu sin met kulansap lal in engankin futoto lalos nu sel?

¹⁶ Ke sripen Jeova el oekla ‘aunsifesr’ orekma lal inge orala kalem mwo nu sesr ke oiya mwo lun God su kut lungse in alu nu se a lungse in karungin kut. Fwinne kut enenu in sano nu ke fwal sasu su ngal a me keok nukemwa fwa wanginla, Jeova el oru ma mwomwo nu sin met kulansap nukemwa lal ke pal inge. Devid el simusla: “Kawuk lun Jeova oasr yurolos su sangeng Sel; a El a fwa fwakak nu selos mwuleang Lal.”​—Sam 25:14.

¹⁷ “Metu ku in kawuk nu sin Jeova.” Oiya ku nunak inge upa nu sin met sesumwos nukemwa! Ne oinge, Jeova el suli met nukemwa su sangeng sel in muta in loom nuknuk sel. (Sam 15:1-5) A mea Jeova el oru nu sin met ma muta in loom sel? El kasrelos in etu mwuleang lal, Devid el fwak. Jeova el sramsram nu selos, el akkalemye “ma lukma lal” nu sin met palu, tu elos in ku in etu mea akwuk lal a mea elos enenu in oru in akfwalye moul lalos nu ke mwuleang a akwuk lal.​—Emos 3:7.

18. Kut etu fuka la Jeova el lungse kut in futoto nu sel?

¹⁸ Paye la, kut fwin etu la met sesumwos elos ku in futoto nu sin God Fulatlanu, Jeova, ma inge me akkeye insiesr. Aok, el kaifwe kut in oru ma inge. Baibel el fwak: “Komwos in kalukyung nu yurin God, a el a fwa kalukot nu yurumwos.” (Jemes 4:8) Jeova el lungse kut in engankin futoto paye nu sel. Oana sie me akpayeye, el orala tari inkanek puspus tu kut in ku in engankin oiyen futoto inge. Me kise ke lango lun Jisus el orala inkanek tu kut in ku in futoto nu sin God Kulanu. Baibel el fwak: “Kut lungse, meyen el lungse kut meet.”​—1 Jon 4:19.

19. Fuka mongfusesr lasr ku in akkeye futoto lasr nu sin Jeova?

¹⁹ Oiyen futoto inge el akkeyeyuk ke kut muteng ke ma upa puspus. Met tuma lutlut Jemes el simusla: “A lela orekma lun mongfusesr in fwal, tu komwos fwa fwalna a fon a wangin ma komwos enenu.” (Jemes 1:4 NW) Kain in “orekma” fuka ku in orekla fwin sie met el mongfusesr ke ma upa? Esam “otunmu in ikwe” lal Poul. Mea sikyuk ke oiyen mongfusesr inge? Poul el fwakak ke ma upa puspus lal: “Ke ma inge, nga fwa arulanu engan in konkun in munas luk, tu ku lun Kraist fwa on fwuk. Ke ma inge, nga engun in munas, in lal, in enenu, in kolyai, in keok ke Kraist. Tu ke nga munas, na nga ku.” (2 Korint 12:9, 10) Poul el akkalemye pulakin lal la Jeova el sang ku su eneneyuk, tu yoklanu lun ku su eneneyuk, tu Poul el fwa ku in muteng. Tu, ke ma inge, el fwa ku in futoto nu sin Kraist a nu sin Jeova God.​—2 Korint 4:7; Filippai 4:11-13.

20. Kut etu fuka la Jeova el fwa kasre kut a akkeye kut ke kut sun ma upa?

²⁰ Saap Jeova el lela ma upa lom in fwasr na tia tui. Fwin oinge, mwo in esam mwolela lal nu selos su sangeng sel. “Nga tiana filikomla, a Nga tiana som liki kom.” (Hibru 13:5) Kom ku in pulakin kain in me kasru a me akkeye inge. Jeova el oekla “aunsifom nukemwa.” El liye mongfusesr lom. El pula pa pulakin upa lom. El karungin kom na paye. A el fwa tiana “mwulkunla orekma mwo lom a lungse su kom fwakak nu ke el.”​—Hibru 6:10.

[Footnotes]

Ya Kom Esam?

• Kain in ma puspus fuka oru sie met in pulakin mu God el som lukel?

• Me lutlut fuka kut lotela ke me pupulyuk lal Jisus ke mwon sparro a ke aunsifesr su oekyukla sin God?

• Mea kalmen in sang nu ke “sufwa” lun Jeova sroninmutun sie met ku nu ke “buk” natul?

• Fuka kut ku in engankin “futoto nu sin Jeova”?

15. (a) Mea kalmeyen kas lal Devid ke el siyuk sin Jeova in filiye sroninmutal ke sufwa ku ke sie buk? (b) Ke kut muteng ke sie ma upa su srike lulalfongi lasr, kut ku in lulalfongi ke mea?

[Picture on page 4]

Efu ku Jeova el tia eisla “otunmu in ikwe” lal Poul?

[Picture on page 5]

Mea kut ku in lotela ke me pupulyuk lal Jisus ke mwon sparro puspus?

[Credit Line]

© J. Heidecker/VIREO

[Picture on page 7]

Ke inkanek in ridi Baibel len nukemwa, kut ku in eis me akkeye la Jeova el karungin a lungse kut