Ya God el Nunku Keik a Karungin Yu?
Me top lun met puspus nu ka:
▪ “God el fulatlana in nunku ke me keok puspus luk.”
▪ “Nga tia nunku mu God el pakomutuk.”
Mea Jisus el fwak?
▪ “Ya tia kukakinyuk sparro limekosr ke penni luo? A wangin sie selos mulkinyula ye mutun God. A aunsifwomwos nukewa oaoala. Nik komwos sangeng, komwos mwo liki sparro puspus.” (Luk 12:6, 7) Wangin me alolo ka, meyen Jisus el fwakak la God el pakomutasr.
▪ “Nik komwos nununkala a fwak, ‘Mea kut fwa mongo?’ ku, ‘Mea kut fwa nim?’ ku, ‘Piya ma kut fwa nukum?’ Tu met pegan elos sukok ma inge nukewa. Tu Papa tumomwos su in kosrao el etu tu komwos enenu ma inge nukewa.” (Mattu 6:31, 32) Jisus el lulalfongi la God el etu me enenu nukewa lun kais sie sesr.
BAIBEL el fwakak arlana kalem la God el pakomutasr. (Sam 55:22; 1 Piter 5:7) Fwin paye el pakomutasr, efu ku kut pulakin kain in me keok puspus misenge? Fwin oasr lungse yurin God a wi kain in ku nukewa, efu ku el koflana oru kutena ma in sang aksafyela me keok nukewa?
Oasr me top mwomwo nu ka la—Setan su Devil pa met kol nu ke akwuk koluk lun fwal se inge. Paenang ke pal se srifweyuk Jisus, Setan el fwakak kalem la el fwa sang togusrai nukewa lun fwalu nu sel, a el fwakak ouinge: “Nga fwa sot mwal inge nukewa nu sum, a mwolana lalos, tu ma inge etuku nu sik tari, a nga sang nu sin kutena su nga lungsik.”—Luk 4:5-7.
Su sang nu sin Setan lan met kol lun fwalu? Ke pal se Adam a If, su papa matu a nine matu se meet kiyesr, elos sulela in akos Setan a elos srunga in akos God, ouinge, elos sulela Setan elan met kol lalos. Mutamwauk ke pal se elos seakos a lain akwuk nu selos, Jeova God el mongfusrasr wi pakoten in sang pal yok nu ke kolyuk lun Setan in akpayeye la kolyuk lal tia sumwos a mwo. Jeova el tia patok metu in kulansap nu sel, tusruktu el ase inkanek mwomwo nu sesr in forla nu sel.—Rom 5:10.
Meyen God el nunku kesr a karungin kut, paenang el ase nu sesr inkanek mwomwo kel Jisus elan tulekutla liki kolyuk lun Setan. Ke pal fototo, Jisus el fwa “kunausla Devil, el su ku lun mise ma lal.” (Hibru 2:14) In oru ouinge, el fwa “kunausla orekma lun Devil.”—1 Jon 3:8.
Paredais fwa sifwil akwuki fwin fwalu. Ke pal se inge, God el “fwa ela sroninmutalos nukewa, a efwa wangin pa mise, a elos fwa tia sifwil asor, ku tung, ku ngal. Tu ma meeta wanginla.”—Fwakyuk 21:4, 5.a
[Footnote]
a In eis kutu pa me lutlut yok la efu ku God el lela me keok, srike liye sapta 11 ke buk inge Mea Baibel el Luti Na Paye? ke kas English. Orekla sin Met Lo lun Jeova.
[Blurb on page 8]
Paredais fwa sifwil akwuki fwin fwalu