“God El Lung”

“El su tia lungse, el tia etu God, tu God el lung.”​—1 JON 4:8.

1-3. (a) Kain in me sramsram fuka Baibel el akkalemye ke oiye fulat lun Jeova pangpang lungse, a efu ku kas inge nu kemwa siena liki? (b) Efu ku Baibel el fwak la “God el lung”?

OIYE fulat nu kemwa lun Jeova tia ku in srikeyuk nu ke kutena ma, ma inge nu kemwa sumwosmwos, a me purakak na paye ke nunuk a inse. Tusruktu, ma mwolanu emeet inmaslon oiye mwolanu nu kemwa lun Jeova pa lungse. Wangin me purakak saye su yok liki lungse su ku in kasru kut in futoto nu sin Jeova. Sie me insemwomwo meyen lungse el sie sin oiye fulat emeet lun God. A fuka kut ku in etu ou inge?

² Oasr ma Baibel el fwak a aketeye ke lungse su el tia oru ou inge ke kutu oiye fulat lun Jeova. Ma Simusla el tia fwak la God el ku, ku God el nununku sumwos, ku God el lalmetmet. Oasr yurol ma tulo inge, a el pa sropon ma inge. Tusruktu, kut fwin sramsram ke lungse, sie ma yok pa akkalemyeyuk in 1 Jon 4:8: “God el lung.” Aok, Jeova el sesesla ke lungse. Pa inge ma yok emeet in El. Ke sie me sramsram yok, kut ku in nunku ke inkanek se inge: Ku lun Jeova oru El an orekma. Nununku sumwos a lalmetmet lal sie me kasru ke orekma lal. Tusruktu, lungse lun Jeova moklel in orekma. A pal nu kemwa lungse ku in akilenyuk ke pal se el orekmakin oiye fulat saye nu kemwa lal.

³ Pal nu kemwa akkalemyeyuk pa la Jeova el pa sropon lungse. Ke ma inge, kut fwin insemwomwo in lutlut ke lungse, kut enenu in lutlut kel Jeova. Ke ma inge, lela kut in tuni kutu orekma su tuku ke lungse lun Jeova su wangin ma oanu.

Sie Orekma Yok Emeet ke Lungse

4, 5. (a) Mea orekma yok emeet ke lungse ke me sramsram nu kemwa? (b) Efu kut ku in fwak la Jeova a Mwen nutul elos inse siefwunnu ke me kapur fukoko emeet lun lungse?

⁴ Jeova el akkalemye lungse ke inkanek puspis, tusruktu oasr ma se su el oru su yok liki nu kemwa. Mea se inge? Ke pal se el supwemu Mwen nutul in mise kasr. Kut ku in fwak ke sumwos la pa inge lungse yok emeet ke me sramsram nu kemwa. Efu kut ku in fwak ou inge?

⁵ Baibel el pangon Jisus “mwuonsien ma orekla nu kemwa.” (Kolosse 1:15) Nunku ke ma se inge​—Mwen nutin Jeova el oasr tari meet liki El orala ma nu kemwa su ku in liyeyuk ke mutasr. Ke ma inge luseka Papa a Mwen elos tukeni muta? Kutu scientists elos orala estimate a akkalemye la kosrao a fwalu oasr tari ke ke lusen yiu 13 billion. Aok, fwinne paye ku tia estimate se inge, tusruktu ma inge srakna sufwal in fwak la pa inge lusen moul tari lun Mwen siefwunnu isusla nutin God! Mea el oru ke lusen yiu puspis inge? Mwen el insemwomwo in kulansap nu sin Papa tumal oanu sie “met orekma usrnguk.” (Soakas 8:30; Jon 1:3) Jeova a Mwen nutul elos akesrui in orala ma nu kemwa. Sie pal na mwomwo pa oasr yurolos meet! Ke ma inge, su inmaslosr ku in kalem na paye ke futoto lalos sie sin sie ke lusen pal loeloes inge? Arulanu kalem, Jeova God a Mwen nutul elos inse siefwunnu a tukeni nu sie ke sripen me kapur fukoko lun lungse.

6. Ke pal se Jisus el baptaisla, fuka Jeova el akkalemye pulakin lal nu sin Mwen nutul?

⁶ Fwinne ou inge, Jeova el supwemu Mwen nutul nu fwalu a isusla oanu sie awowo. Ke pal se el oru ou inge, ma inge ku in kalmekin la Jeova el tia ku in asrouki nu sin Mwen kulu nutul in kosrao ke lusen yiu puspis. Meyen el arulanu pwar ke ma el oru inge, paenang in kosrao me el liye ke pal se Jisus el kapek oanu sie met sumwosmwos. Apkurun nu ke yiu 30 matwe, Jisus el baptaisla. Ke pal inge Papa el sramsram nu sel in kosrao me: “El inge Mwen kulu nutik, su Nga insemwomwo kel.” (Mattu 3:17) Meyen el liye la Jisus el oaru in akpayeye kas palu nu kemwa kel, ma nu kemwa su God el siyuk sel, paenang Papa tumal el arulanu engun!​—Jon 5:36; 17:4.

7, 8. (a) Kain in ma upa fuka Jisus el enenu in muteng in Nisan 14, 33 C.E., a mea ma inge el oru nu sin Papa tumal in kosrao? (b) Efu ku Jeova el lela Mwen nutul in keok a mise?

⁷ Tusruktu, mea pulakin lun Jeova in Nisan 14, 33 C.E., ke pal se un met koluk su arulanu mulat elos tukakin a sroukilyel Jisus, aniye mutal, a fuskel? Ke pal se elos srunglal Jisus, a fwintokol arulanu kinet? Ke pal se elos patikye paol a niel ke sak a srupusrak ke sa a met nu kemwa akkolukyel? Mea pulakin lun Papa ke pal se el long Mwen kulu nutul tung ke sripen keok upa? Mea pulakin lun Jeova ke pal se Jisus el aksafyela momong lal a ke pal se meet, ke mutamweyen ma orekla lal nu kemwa, Mwen kulu nutul wanginla?​—Mattu 26:14-16, 46, 47, 56, 59, 67; 27:26, 38-44, 46; Jon 19:1.

⁸ Ke sripen oasr pulakin lun Jeova, paenang ngal upa su el pula ke mise lun Mwen nutul kut tia ku in aketeye na paye. Ma su ku in akkalemyeyuk mukena pa akmwuk lun Jeova efu el lela ma inge in sikyuk. Efu ku Papa el lela el an pulakin ngal inge? Jeova el akkalemye ma mwolanu nu sesr in Jon 3:16—sie fus in Baibel su arulanu yok sripe paenang elos pangpang Gospel srisrik. El fwak: “Tu God el lungsel fwalu ou inge, tu el ase Mwen siefwunnu isusla nutul, tu el su lalalfongel fwa tia tula, a el fwa eis moul ma patpat.” Ke ma inge, nien sun lun God pa lungse. Wangin lungse su akkalemyeyuk yok liki ma inge.

Fuka Jeova El Sang Me Akpayeye ke Lungse Lal

9. Mea Setan el lungse kut in lalalfongi ke nunuk lun Jeova nu sesr, tusruktu mea me akpayeye su Jeova el ase nu sesr?

⁹ Tusruktu, sie kusensiyuk yok sikyuk: Ya God el lungse kais sie sesr? Saap kutu met elos insese la God el lungse met nu kemwa oanu sie u, fwal nu ke ma Jon 3:16 el fwak. Tusruktu, elos pulakin oanu, ‘God el tia ku in lungse Nga.’ Aok, Setan su Devil el arulanu pwar in purakak nunuk lasr in lalalfongi la Jeova el tia lungse kut ku aksaokye kut. Ke inkanek saye, fwinne kut nunku la wangin kutena met su ku in lungse kut, ku kut fwinne pulakin la wangin sripen moul lasr, tusruktu, Jeova el sang me akpayeye nu sesr la kais sie sin met kulansap oaru lal elos arulanu saok sel.

10, 11. Fuka me pupulyuk lun Jisus ke mwon sparro el akkalemye la kut yok sripe ye mutun Jeova?

¹⁰ Ke sie me pupulyuk, loang akmwoye ke kas lun Jisus su simusyukla in Mattu 10:29-31. In akkalemye la arulanu saok met tuma lutlut lal, Jisus el fwak: “Ya elos tia kukakunla luo mwon sparro ke sie penni? A wangin sie selos fwa putati nu in foko, a papa tumomwos tia liye. A aunsifomwos nu kemwa oekyukla. Ke ma inge, nik komwos sangeng: komwos saok liki mwon sparro puspis.” Nunku ke lupan saok lun kas inge nu sin met nu kemwa su longol Jisus in century se meet.

¹¹ In len lun Jisus mwon sparro pa fwusesr molo emeet ke mwon nu kemwa su kukakunla oanu me mongo. Ke sie penni srisrik, met su moli el ku in eis sparro luo. Tusruktu, Jisus el akkalemyeyuk tok, fwal nu ke Luk 12:6, 7, fwin sie met el orekmakin penni srisrik luo, el tia eis sparro akosr, a ma limekosr. Elos sang mwon se oanu present a wangin molo. Saap kain in mwon inge tia arulanu yok sripe ye mutun met, tusruktu mea nunuk lun Met Oralosla? Jisus el fwak: “A wangin sie selos [fwinne ma se su wangin molo] mulkunla ye mutun God.” Etauk lasr ke ma se inge kasre kut in kalem ke ma Jisus el lungse in akkalemye. Ke sripen Jeova el arulanu aksaokye fwinne sparro siefwunnu, paenang ma inge akkalemye la metu elos saok liki! Oanu ma Jisus el fwak, Jeova el etu ma nu kemwa sesr. Aok, aunsifwesr nu kemwa oaoala!

12. Efu ku kut ku in lalalfongi na paye la Jisus el kaskas paye ke pal se el sramsram ke aunsifwesr su oaoala tari?

¹² Saap kutu met elos fwak la Jisus el sramsram alukela ma fwal ke ma se inge. Tusruktu, lela kut in nunku ke sifwil moulyuk. Jeova el etu na paye ma nu kemwa kasr paenang el ku in sifwil orekutla! El arulanu aksaokye kut paenang el ku in esam ma nu kemwa kasr, wekunang genetic code lasr a ma nu kemwa su kut filiye ke nunuk lasr, wekunang experience lasr ke lusen yiu puspis. Oaoala aunsifwesr​—su apkurun nu ke 100,000, oanu average ke sifwen met se—​ma inge tia upa nu sel in oru. Kas mwomwo inge lun Jisus sang me akpayeye na paye sesr la Jeova el nunku kais sie sesr!

13. Fuka ma sikyuk nu sel Togusra Jiosafat akkalemye la Jeova el liye ma mwo in kut fwinne kut met sesumwos?

¹³ Baibel el akkalemye pa ma saye su sang me akpayeye ke lungse lun Jeova. El liye a aksaokye ma mwomwo su oasr yurosr. Ke sie me pupulyuk, lela kut in orekmakin Togusra mwomwo inge Jiosafat. Ke pal se Togusra se inge el oru ma lalfon, met palu lun Jeova el fwak nu sel: “Ke ma inge, mulat on fwom liki ye mutun Jeova.” Sie kas upa pa inge! Tusruktu, kas lun Jeova el tia safla ka. El tafwela: “Tusruktu oasr ma mwo konoiyukyuk in kom.” (2 Kronikel 19:1-3) Ke ma inge, mulat sumwosmwos lun Jeova tia akkunye mutal in tia liye “ma mwo” kel Jiosafat. Ya tia me akkeye pa inge in etu la God lasr el liye ma mwo in kut fwinne kut met sesumwos?

Sie God Su “Lungse In Nunuk Munas

14. Ke pal se kut oru ma koluk, kain in me toasr fuka kut pula, tusruktu, fuka kut ku in eis me insemwomwo ke nunuk munas lun Jeova?

¹⁴ Ke pal se kut oru ma koluk, me asor, me mwekin, su kut pula ku in mokle kut in nunku la kut tia ku in sifwil fwal ke kutena pal in kulansap nu sin Jeova. Tusruktu, lela kut in esam la Jeova el “lungse in nunuk munas.” (Sam 86:5) Aok, kut fwin auliyuk ke ma koluk lasr a kaifweung in tia sifwil oru ma inge, kut ku in eis ma lane su tuku ke nunuk munas lun Jeova. Loang akmwoye fuka Baibel el akkalemye ma mwolanu se inge su tuku ke lungse lun Jeova.

15. Jeova el filiye in an loes fuka ma koluk lasr?

¹⁵ Met sim Devid el orekmakin sie kas mwomwo in akkalemye inkanek lun Jeova in sang nunuk munas: “Oanu lusen an kutulap nu roto, ou inge El wisla ma koluk lasr loes liki kut.” (Ma lasr pa Italics; Sam 103:12, The Amplified Bible) Luseka kutulap nu roto? Pal nu kemwa kut fwin nunku, kutulap el loes pal nu kemwa fwin an roto; an luo inge tia ku in osun sie sin sie. Sie scholar el akkalemye la kas se inge ku in kalmekin “loes liki kut; loes liki ma kut nunku.” Kas lal Devid su tuku sin God el lungse in akkalemye nu sesr la ke pal se Jeova el sang nunuk munas, el filiye ma koluk lasr ke sie an su loes liki ma kut nunku.

16. Ke pal se Jeova el nunuk munas ke ma koluk lasr, efu kut ku in lalalfongi la kut nasnas tari ye mutal?

¹⁶ Ya oasr pal kom srike tari in eisla fokfok ke sie nuknuk fwosrfwosr? Saap, fwinne kom arulanu kaifweung, fokfok se inge srakna ku in liyeyuk. Loang akmwoye fuka Jeova el akkalemye ku lal in sang nunuk munas: “Ma koluk lomwos fwinne oanu ma srusra, a fwa fwosrfwosr oanu sno; fwinne srusra oanu srusra fokfok, a fwa oanu unin sip.” (Isaia 1:18) Kas se inge “srusra” ku in kalmekin bright-red color se.a “Srusra fokfok” pa sie kain in nuknuk deep colors pa tun ka. Kut tia ku in eisla liki kut fokfok su tuku ke ma koluk ke kaifweung lasr sifwanu. Aok, Jeova el ku in eisla liki kut ma koluk su oanu srusra a srusra fokfok a el oru ma inge in fwosrfwosr oanu sno ku undyed wool se. Ke ma inge, ke pal se Jeova el sang nunuk munas ke ma koluk, kut tia enenu in sifwil pulakin la srakna oasr fokfok inge yurosr su tuku ke ma koluk ke lusen moul lasr nu fon.

17. Mea kalmen Jeova el sisla ma koluk lasr fwintukol?

¹⁷ Ke sie on mwomwo in sang kulo su Hezekaia el orala tokin el moleyukla liki mas upa, el fwak ou inge kel Jeova: “Kom sisla tari ma koluk luk nu kemwa fwintukum.” (Isaia 38:17) Fus inge el akkalemye la Jeova el eisla ma koluk lun sie met su auliyuk a el sisla ma inge fwintukol, ke an se ma el tia ku in sifwil liye ku loang nu ka. Fwal nu ke sie reference work, ma inge akkalemyeyuk oanu: “Kom oru [ma koluk luk] in oanu tia sikyuk.” Ya tia sie me insemwomwo pa inge?

18. Fuka met palu Maika el akkalemye la ke pal se Jeova el nunuk munas, El ela na paye ma koluk lasr ma patpat?

¹⁸ Ke mwolela lal ke sifwil akmwoyeyuk, met palu Maika el akkalemye lalalfongi lal la Jeova el sang nunuk munas nu sin met nu kemwa lal su auliyuk: “Su sie God oanu kom, . . . su alukela ma sito lun met lula sin me usru lal? . . . A kom fwa sisye ma koluk lalos nu kemwa nu yen loal mwea.” (Maika 7:18, 19) Nunku ke kalmen kas inge nu sin met nu kemwa su moul in pal meeta. Ya oasr kutena inkanek tu kom ku in sifwil eisla ma sisila tari nu “yen loal mwea”? Ke ma inge, kas lal Maika akkalemye la, Jeova el fwin sang nunuk munas, el eisla ma koluk lasr ma patpat.

“Pakoten Lulap lun God Lasr”

19, 20. (a) Mea kalmen kas Hibru verb inge “akkalemye pakoten” ku “in oasr pakomuta”? (b) Fuka Baibel el orekmakin kain in pulakin su oasr yurin nine nu sin awowo nutul in luti kut ke pakoten lun Jeova?

¹⁹ Siepa ipen lungse lun Jeova pa pakoten. Mea se inge pakoten? In Baibel, pakoten a pakomuta arulanu futoto sie sin sie. Kas puspis lun Hibru a Greek akkalemye oiye mwo inge pakoten. Ke sie me pupulyuk, kas Hibru verb inge ra·chamʹ pal nu kemwa ku in kalmekin “akkalemye pakomuta” ku “akkalemye pakoten.” Kas Hibru inge, su Jeova el orekmakin nu sel sifwanu, el futoto nu ke kas inge “inse” a ku in kalmekin “pakoten lun nine.”

²⁰ Baibel el orekmakin pulakin lun nine nu sin awowo nutul in luti kut ke pakoten lun Jeova. Isaia 49:15 el fwak: “Ya sie mutan el ku in mulkunla tulik titi nutul, tu el fwa tia pakomuta [ra·chamʹ] mwen nutin insiel? Aok, elos ku in mulkunla, tusruktu, Nga fwa tia mulkunkomla.” (The Amplified Bible) Arulanu upa in nunku la sie nine el mulkunla in kite a in liaung tulik titi nutul. Aok, sie awowo el tia ku in oru kutena ma; len a fong awowo el enenu kurungin lun nine kiel. Tusruktu, sie me asor in fwak la, pilesru lun nine nu sin tulik nutul arulanu pengpeng ke “pal in ma upa lasr inge.” (2 Timote 3:1, 3) “Aok,” Jeova el fwak, “Nga fwa tia mulkunkomla.” Pakoten lulap su Jeova el akkalemye nu sin met kulansap lal arulanu fukoko liki kutena pulakin futoto lun sie met su kut etu​—fwinne pakoten lun nine nu sin tulik titi nutul.

21, 22. Mea experience lun met Israel in an Ijipt in pal meeta, a mea Jeova el oru ke pal se el long tung lalos?

²¹ Fuka Jeova, su oanu sie papa ku nine su lungse, el akkalemye pakoten lal? Oiye se inge lal ku in liyeyuk na paye ke orekma lal nu sin met Israel in pal meeta. Ke saflaiyen century ak16 B.C.E., million puspis lun met Israel elos muta sruo in an Ijipt, ke an se inge elos arulanu akkeokyeyuk. (Exodus 1:11, 14) Ke pal in ongoiye lalos, met Israel elos tung a siyuk kasru lun Jeova. Fuka God pakoten inge el sang topuk lal?

²² Insien Jeova mokleyuk. El fwak: “Paye Nga liye keok lun met srak, su muta in Ijipt, a Nga long tung lalos . . . Tu Nga etu asor lalos.” (Exodus 3:7) Jeova el tia ku in muteng in liye keok lun met kulansap lal ku long tung lalos. Jeova el sie God su akkalemye kain in pakoten inge empathy. A empathy​—el sie kain in pakoten pa inge su oanu kom pula pa keok lun kutu met—​arulanu futoto pa inge nu ke pakomuta. Tusruktu, Jeova el tia pulakin mukena ma met kulansap lal elos pula; a el mokleyuk in kasrelos. Isaia 63:9 el fwak: “In lungse lal a in pakoten lal el molelosla.” Ke “sie po ku,” el molela met Israel liki Ijipt. (Duteronom 4:34) Tokin ma inge, el sang nu selos me mongo ke inkanek lun menmen a el molelosla a wiselosla nu ke sie fwal mwomwo tu in ma lalos.

23. (a) Fuka kas lun met on ase nu sesr me akpayeye la Jeova el nunke kut na paye oanu met se met se? (b) Ke inkanek puspis fuka Jeova el kasre kut?

²³ Jeova el tia akkalemye mukena pakoten nu sin met kulansap lal oanu sie u. God lasr su lungse el nunku na paye kais sie sesr. El arulanu etu kutena me keok su akkeokye kut. Met sim lun Sam el simusla: “Mutun Jeova on nu sin met sumwosmwos, a srel ikakla nu ke pang lalos. Jeova el muta apkurun nu selos su inse musalla; a molelosla su toasr in ngun ke ma koluk lalos.” (Sam 34:15, 18) Fuka Jeova el kasru kais sie sesr? El tia enenu in eisla sropon me keok lasr. Tusruktu, el orala a sang me kasru puspis nu selos nu kemwa su tung a siyuk ke kasru lal. Kas lal ase nu sesr kas in kai mwomwo su ku in kasru kut na paye. Ke inkanek lun congregation, el ase nu sesr met sropu fwal, su kaifweung in akkalemye pakoten lal ke inkanek in kasru lalos nu sin kutu met. (Jemes 5:14, 15) Oanu sie “Met su long pre,” Jeova el sang “ngun mutal nu kemwa su siyuk sel.” (Sam 65:2; Luk 11:13) Kain in me kasru inge nu kemwa sie inkanek in akkalemye “pakoten lulap lun God lasr.”​—Luk 1:78.

24. Fuka kom topuk ke lungse lun Jeova?

²⁴ Ya tia sie me insemwomwo in nunku ke lungse lun Papa tumasr in kosrao? Ke me lutlut tari’a, kut nu kemwa akismakinyeyuk la Jeova el akkalemye ku lal, nununku sumwos lal, a lalmetmet lal in akinsemwomwoye kut. A ke me lutlut inge, kut liye la Jeova el akkalemye na paye lungse lal nu sin metu​—a nu sin kais sie sesr—​ke inkanek sakuruk. Inge, kais sie sesr enenu in siyuk, Fuka Nga ku in topuk ke lungse lun Jeova?’ Lela kom in sang topuk ke kom akkalemye lungse lom nu sel ke insiom kemwa, ngunom kemwa, a ku lom kemwa. (Mark 12:29, 30) Lela inkanek in moul lom ke kais sie len in akkalemye insemwomwo lom in futoto nu sin Jeova. A lela Jeova, su God lun lungse, fwa kalukyung nu sum​—ma patpat!​—Jemes 4:8.

[Footnote]

Ya Kom Esam?

• Fuka kut ku in etu la lungse pa oiye mwo emeet lun Jeova?

• Efu kut ku in fwak la orekma lun Jeova in supwemu Mwen nutul in keok a in mise kasr pa lungse yok emeet?

• Fuka Jeova el sang me akpayeye nu sesr la el lungse kais sie sesr?

• Ke inkanek mwo puspis fuka Baibel el akkalemye nunuk munas lun Jeova?

[Picture on page 15]

“God . . . el ase Mwen siefwunnu nutul”

[Picture on page 16, 17]

“Kom saok liki mwon sparro puspis”

[Credit Line]

© J. Heidecker/VIREO

[Picture on page 18]

Pulakin lun nine nu sin awowo nutul ku in luti kut ke pakoten lun Jeova