Lela Kas Lun God In Sang Kalem Nu Ke Inkanek Lom
“Kas lom . . . kalem nu ke inkanek luk.”—SAM 119:105.
1, 2. Ke ma sikyuk puspus fuka kas lun Jeova el fwa sang kalem nu ke inkanek lasr?
KAS lun Jeova sang kalem nu ke inkanek lasr kut fwin lela ma inge in sikyuk. In insemwomwokin kain in kalem in ngun inge, kut enenu in met lutlut moniyuk ke Kas lun God a orekmakin kas in kasru lal. Tokin kut oru ma inge kut ku in pulakin pa nunak lun met sim lun sam: “Kas lom lamp nu ke niuk, a kalem nu ke inkanek luk.”—Sam 119:105.
2 Inge lela kut in aketeye Sam 119:89-176. Arulanu pukanten etauk mwomwo oasr ke fus inge nukemwa, akwuki ke stanza 11! Fus nukemwa inge ku in kasre kut in fwasr pal nukemwa ke inkanek nu ke moul ma patpat.—Mattu 7:13, 14.
Efu ku in Insemwomwo Yok ke Kas lun God?
3. Fuka Sam 119:89, 90 akkalemye la kut ku in tupan ke kas lun God?
3 Insemwomwo yok ke kas lun Jeova tuku ke ku lun ngun. (Sam 119:89-96) Met sim lun sam el fwak: “Kas lom oakiyuki in kosrao, O Jeova, ma patpat. . . . Kom oakiye fwalu, a na onnu.” (Sam 119:89, 90) In fwal nu ke kas lun God—“akwuk lal in kosrao”—ke fwatu, malem, itue nukemwa elos mukuikui ke inkanek mwomwo fwal nu ke innek lalos a fwalu el oakiyuki nu tok ma patpat. (Job 38:31-33; Sam 104:5) Kut ku in lalalfongi ke kas nukemwa su fwala liki oalin Jeova; la ma God el fwak e fwa “kapkapek” in akpayeye akwuk lal.—Isaia 55:8-11.
4. Mea oiyen insemwomwo yok ke kas lun God el oru nu sin met kulansap puspus lal su pulakin me asor?
4 Met sim lun sam el ku in ‘wanginla ke ongoiye lal fwin el tia engankin yok masap lun God.’ (Sam 119:92) El tia kalyeiyuk sin metsa puspus; met Israel puspus su lungse in kunausla masap elos srungel. (Livitikus 19:17) Tusruktu ma inge tia akmunasyel, meyen el lungse masap lun God su sang me akkeye nu sel. In an Korint, met sap Poul el “oasr ke me sensen inmasrlon met lili kikiap puspus,” saap wekunang “met sap fulatlanu puspus” su suk inkanek in orekmakin kas kikiap lainul. (2 Korint 11:5, 12-14, 26) Fwinne oinge, Poul el tia munasla a el tu na ku in ngun meyen el insemwomwokin yok kas lun God. Ke sripen kut insemwomwo yok ke Kas lun God su simusyukla tari a kut orekmakin ma el fwak, paenang kut lungse met lili wiyesr. (1 Jon 3:15) Fwinne ke srunga lun met fwalu nu sesr ma inge tia oru kut in mulkunla masap nukemwa lun God. Kut oru ma lungse lun God pal nukemwa ke kut engankin inse sefwanna lasr yurin met lili wiyesr ke kut sano pal fwasru in engankin orekma in kulansap nu sin Jeova ma patpat.—Sam 119:93.
5. Fuka Togusra Esa el suk Jeova?
5 In akkalemye lungse paye lasr nu sin Jeova, kut ku in pre oana met sim lun sam: “Nga ma lom. Moliyula, tu nga suk kas in luti lom.” (Sam 119:94) Togusra Esa el suk God a el kunausla a akwanginyela alu kikiap in an Juda. Ke sie toeni lulap in yea ak 15 ke kolyuk lal Esa (963 B.C.E.), Met puspus su muta in an Juda elos “oru sie mwuleang in suk Jeova.” God “el koneyukyak yurolos” a “sang mongle nu selos yen nu kemwa.” (2 Kronikel 15:10-15) Me srikasrak inge ku in akkeye kutena met su patla liki congregation lun met Kristian in sifwilpa suk God. El fwa akinsemwomwoyelos a karunginelos su sifwilpa mutamwauk in asrouki nu sin met kulansap lal.
6. Kain in inkanek fuka fwa karungin kut liki me sensen lun ngun?
6 Kas lun Jeova el ase etauk su ku in karungin kut liki me sensen lun ngun. (Sam 119:97-104) Masap lun God el oru kut in lalmetmet liki met lokwalok lasr. In porongo kas in akesmakin nukemwa lal ma inge ku in ase liyaten nu sesr, a ‘in liaung masap lal kut ku in orekmakin etauk yok liki met matou puspus.’ (Sam 119:98-100) Fwin kas lun Jeoava el ‘emwem liki unni in oalik,’ kut fwa srunga a fwasr liki “inkanek kikiap nu kemwa.” (Sam 119:103, 104) Ma inge fwa karungin kut liki me sensen in ngun ke kut sun met puspus su insefulat, sulallel, tia akos God in len safla inge.—2 Timote 3:1-5.
Sie Lamp nu ke Niesr
7, 8. In akfwalye oiya lasr nu ke Sam 119:105, mea kut enenu in oru?
7 Kas lun God el sie sropon kalem lun ngun pal nukemwa. (Sam 119:105-112) Fwinne kut met Kristian akmusrala ku kut met asrouki lalos su wi ke u lun “sip ngie,” kut fwak: “Kas lom lamp nu ke niuk, a kalem nu ke inkanek luk.” (Jon 10:16; Sam 119:105) Kas lun God el oana lamp su sang kalem nu ke inkanek lasr, tu kut in tia aktukalkalyeyuk a ikori ke moul in ngun. (Soakas 6:23) Fwinne oinge, kut sifwana enenu in kaifweang in lela kas lun Jeova in orekma oana lamp nu ke niesr.
8 Kut enenu in eis ku oana met sim lun Sam 119. El lungse na paye in tia tafongla liki masap nukemwa lun God. “Nga fulak,” el fwak, “a nga fwa akpayeye, tu nga fwa liaung nununku sumwos lom [Jeova].” (Sam 119:106) Lela kut in tia na aksrikyela lupan orekma saok lun Baibel a in wi a in sang me top nu ke meeting nukemwa lun met Kristian.
9, 10. Kut etu fuka la met puspus su mwoleyukla tari sin Jeova elos ku in ‘tafongla liki kas in luti lun Jeova,’ tusruktu ke inkanek fuka in fwasr liki ma inge?
9 Met sim lun Sam el tia ‘tafongla liki kas in luti lun God,’ tusruktu ma inge ku in sikyuk nu sin sie met su orala tari mwolela lal nu sin Jeova. (Sam 119:110) Togusra Solomon el tafongla ku kunausla masap , fwinne el sie met su wi ke sie mutanfwal su orala mwolela lalos nu sin Jeova a ke mutamweyen kolyuk lal oana sie togusra el orekma fwal nu ke lalmetmet su el eis sin God. “Mutan kiyel elos akkolukyel elan oru ma koluk” ke inkanek koluk su elos oru in kufwusla insiel in alu nu sin god kikiap puspus.—1 Togusra 11:1-6.
10 Setan, el oana “met srumwon,” el orekmakin me sruf puspus. (Sam 91:3) Ke sie me pupulyuk, fwin oasr sie met su wi alu nu sin God meet ne tui el ku in srifwe kut in som liki inkanek lun ma paye ke kas lun God nu ke inkanek losr lun me luti kikiap. Inmasrlon met Kristian puspus in an Tiatira, oasr “mutan se su pangpang Jesebel,” su saap sramsramkinyuk ke u lun mutan puspus su elos luti met puspus in alu nu ke ma srolela a oru orekma lun kosro. Jisus el tia lela kain in ma koluk puspus inge, a kut tia pana lela ma inge. (Fwakyuk 2:18-22; Jud 3, 4) Ke ma inge lela kut in pre ke kasru lun Jeova tu kut in tia som liki kas in luti lal a kut in mutana ke kalem lun kas lun God.—Sam 119:111, 112.
Kasreyuk ke Kas lun God
11. In fwal nu ke Sam 119:119, fuka God el liye met koluk?
11 Kut fwin tia som liki masap lun God, God el fwa kasre kut. (Sam 119:113-120) Kut tia insemwomwokin “met su inse luo,” in oana Jisus su tia insemwomwokin met puspus su fwak mu elos met Kristian tusruk elos tia musrisr ku fwol ke pal inge. (Sam 119:113; Fwakyuk 3:16) Ke sripen kut kulansupal Jeova ke insiesr kemwa, paenang el pa ‘nien mwukla a me loeyuk lasr’ a el fwa kasre kut. El fwa ‘pilesrelos nukemwa su tafongla liki masap lal’ ke elos orekmakin nunak kutasrik a kas kikiap. (Sam 119:114, 117, 118; Soakas 3:32) El liye met koluk oinge oana “kutkut”—kutkut su sisila liki mwusra saok oana silfer a gold. (Sam 119:119, NW; Soakas 17:3) Kut enenu in akkalemye lungse pal nukemwa nu ke kas in akesmakin lun God, ke sripen kut srunga na paye in weang met koluk su oana kutkut nukemwa su srisrila in kunausyukla!
12. Efu ku sangeng sin Jeova yok sripe?
12 “Ikuk rarrar ke sangeng sum [Jeova],” met sim lun sam el fwak. (Sam 119:120) Sangeng mwomwo lasr nu sin God, su akkalemyeyuk ke inkanek in fwasr liki ma nukemwa su el tia insemwomwo ka, orekla lasr inge el arulanu yok sripe fwin God el fwa kasru kut oana met kulansap lal. Sangeng sin Jeova oru Job elan moulkin sie moul sumwos. (Job 1:1; 23:15) Sangeng sin God ku in kasre kut in muteng ke inkanek su oasr me insemwomwo lun God ka fwinne kut enenu in muteng ke ma puspus. Tusruktu, in muteng, enenu pre su oasr lalalfongi paye ka.—Jemes 5:15.
Pre Ke Lalalfongi
13-15. (a) Efu kut ku in lalalfongi la pre lasr fwa topukyuk? (b) Ma fuka ku in sikyuk kut fwin nukin ma kut fwa fwak ke pre? (c) Sang me pupulyuk la fuka Sam 119:121-128 ku in kupasr nu ke ‘sasao lasr koflanu kaskas ka’ ke pre.
13 Kut ku in pre wi lalalfongi la God el fwa kasre kut. (Sam 119:121-128) In oana met sim lun sam, kut pulakin na paye la pre lasr fwa topukyuk. Efu? Meyen kut lungse a akos masap nukemwa lun God “yok liki gold, aok, yok liki gold arulanu mwo.” Sayen ma inge, ‘kut nunku ke kas in luti lun God ke ma nu kemwa su sumwos.’—Sam 119:127, 128.
14 Jeova el long me siyuk nukemwa lasr ke sripen kut pre ke lalalfongi a oayepa kut akos masap nukemwa lal. (Sam 65:2) Tusruktu fuka fwin oasr pal oasr ma upa su akfosyeak nunak lasr paenang kut nukin ma kut in fwak ke pre? Ke ma inge “ngun el sifwana kaifwe kesr ke sasao su koflanu kaskas ka.” (Rom 8:26, 27) Ke pal in ma upa oinge, God el lungse in long kas in siyuk nukemwa su koneyukyak ke Kas lal ke me enenu lasr.
15 Ma simusla el nenela ke pre puspus a ke nunak puspus su ku in sang kasru ‘sasao su koflana kaskas ka.’ Ke sie me pupulyuk, fwin nunkeyuk ke Sam 119:121-128. Inkanek lun ma puspus su akkalemyeyuk ke fus inge ku in fwal nu ke ma sikyuk nu sesr. Ke sie me pupulyuk, kut fwin sangeng in kalyaiyuk ku akkolukyeyuk, kut ku in siyuk ke kasru lun God in oana ke inkanek su met sim lun sam el oru. (Fus 121-123) In oana ke me pupulyuk nu ke pal kut fwin oru sie sulela su arulanu upa. Kut ku in pre siyuk ke ngun lun Jeova in kasre kut in esam a orekmakin kas in akesmakin puspus lal. (Fus 124, 125) Fwinne kut ‘srunga inkanek kikiap nukemwa,’ kut enenu in siyuk sin God in kasre kut in tia srifweyukla in oru ma koluk in sang kunausla masap lal. (Fus 126-128) Kut fwin rid kas lun God pal nukemwa, ma simusla inge ku in akesmakinye kut ke kut pre nu sin Jeova.
Kasreyuk ke Kas in Esmakin lun God
16, 17. (a) Efu kut enenu kas in akesmakin lun God, a fuka kut enenu in liye ku nunku ke ma inge? (b) Fuka met puspus elos nunku kesr, tusruktu mea ma yok sripe?
16 Kut fwin lungse God in long pre lasr a kut fwin lungse in engankin me insemwomwo lun God, kut enenu in porongo kas in akesmakin lun God. (Sam 119:129-136) Ke sripen kut mulyela, kut enenu kas in akesmakin mwolena lun Jeova su kasre kut in esam kas in kasru lal a masap lal. Aok, kut enenu in sang kulo nu ke kalem lun ngun su tuku ke etauk lasr ke kas lun God. (Sam 119:129, 130) Kut akkalemye pa me kaksak yok ke sripen Jeova el ‘oru mutal in kalem nu fwesr’ ke me insemwomwo lal, fwinne ‘mutasr surorla oana ke infwal lun kof’ meyen kutu met elos kunausla masap lal.—Sam 119:135, 136; Oekyuk 6:25.
17 Kut ku in pulakin na paye me insemwomwo lun God pal nukemwa kut fwin akos kas in akesmakin sumwos lal. (Sam 119:137-144) Oana met kulansap lun Jeova, kut akilen a insese ka la oasr sumwos lal in akesmakinye kut ke kas in akesmakin lal a el lungse kut in akos masap nukemwa inge. (Sam 119:138) Fwinne met sim lun sam el akos masap lun God, efu ku el fwak: “Nga srik a piles”? (Sam 119:141) Kalem la, el sramsramkin inkanek lun met lokwalok lal su elos nunku kel. Kut fwin tia fuleak oiya mwo lasr in oru ma sumwosmwos, kutu met elos fwa akkolukye kut. Tusruktu, ma yok sripe nu sesr pa Jeova el insemwomwo kesr meyen kut moulkin moul fwal nu ke kas in akesmakinye sumwosmwos lal.
Pulakin Oiyen Insemwomwo a Misla
18, 19. Fwako puspus fuka tuku ke oiyen liaung lasr nu ke kas in akesmakin lun God?
18 In orekmakin kas in akesmakin lun God oru kut in futoto nu sel pal nukemwa. (Sam 119:145-152) Ke sripen kut loang akmwoye nu ke kas in akesmakin nukemwa lun Jeova, kut etu la kut ku in pang nu sel ke insiesr kemwa, a kut lalalfongi la kut fwa longyuk. Kut ku in ngetalik “meet liki lenelik” a tung siyuk ke me kasru. Pal inge pa pal mwomwo in pre! (Sam 119:145-147) God el oayepa apkurun nu sesr meyen kut fwasr liki oiye koluk nukemwa a liye kas lal oana ma paye, oana ma Jisus el oru. (Sam 119:150, 151; Jon 17:17) Futoto lasr nu sin Jeova kasre kut ke fwal inge su tingtingi ke ma koluk a futoto inge fwa kasre kut pa nu ke meun lulap lal ke Armagedun.—Fwakyuk 7:9, 14; 16:13-16.
19 Ke sripen sunak ku akfulat paye lasr nu ke kas lun God, paenang kut engankin oiyen moul in insemwomwo paye. (Sam 119:153-160) Tia oana met koluk, kut ‘tia kufla liki kas in luti lun Jeova.’ Kut lungse masap nukemwa lun God a pa inge sripe paenang kut pulakin moul insemwomwo ke lung-kulang lal. (Sam 119:157-159) Kas in akesmakin lun Jeova purakak me esmakin lasr ku nunak lasr tu kut in tia mulkunla ma el siyuk sesr fwin oasr kutena ma sikyuk. Ke oiya saye, masap lun God, pa kas in kolyuk mwomwo, a kut arulanu akilen sumwos lun Met Orekutla in kol kut. Ke sripen kut etu la ‘kas nukemwa lun God el paye’ a kut tia ku in aksumwosye fwalkesr sifwana, paenang kut insemwomwo in eis ku orekmakin kas in kolyuk lun God.—Sam 119:160; Jeremaia 10:23.
20. Efu ku oasr yurosr “misla lulap”?
20 Lungse lasr ke masap lun God use nu sesr misla lulap. (Sam 119:161-168) Me kalyai tia ku in eisla liki kut “misla lun God” su wangin ma oana. (Filippai 4:6, 7) Kut aksaokye na paye nununku nukemwa lun Jeova paenang kut kaksakunal ke ma inge nukemwa pal nukemwa—“pal itkosr in len se.” (Sam 119:161-164) Oasr “misla lulap yurolos su lungse masap lom,” pa inge on lun met sim lun sam, “a wangin sripen tukulkul yurolos.” (Sam 119:165) Fwin kais sie sesr lungse masap lun Jeova a liaung ma inge, kut fwa tia aktukulkulyeyuk ke ma kutu met elos oru ku ke kutena ma.
21. Me pupulyuk puspus fuka ke Ma simusla akkalemye la kut tia enenu in tukulkul fwin ma upa puspus sikyuk ke congregation?
21 Met puspus su sramsramkinyuk in Baibel elos tia lela kutena ma in oana me aktukulkul pal nukemwa nu selos. Ke sie me pupulyuk, met Kristian inge su pangpang Gaius el tia aktukulkulyeyuk a el ‘fwufwasryesr in ma paye’ fwinne Diotrephes el akkalemye oiya koluk su tia fwal nu ke ma lungse lun God. (3 Jon 1-3, 9, 10) Poul e kaifwe mutan Kristian luo inge su pangpang Euodia a Sintike “in nunak siefwanna in Leum,” ke sripen oasr ma upa sikyuk inmasrloltal. Kalem la, elos eis kasru in aksumwosye ma upa lalos, a elos tafwela in kulansapu Jeova ke inkanek oaru. (Filippai 4:2, 3) Kut tia enenu in aktukulkulyeyuk fwin oasr ma upa puspus ke kutu sripe sikyuk nu ke congregation. Lela kut in nunku yok in liaung masap lun Jeova, esam la ‘innek lasr nu kemwa on ye mutal.’ (Sam 119:168; Soakas 15:3) Ke ma inge wangin kutena ma el fwa eisla liki “misla lulap” lasr pal nukemwa.
22. (a) Kut fwin akos Jeova, kunokon fuka kut ku in engankin? (b) Kut fwa akkalemye nunak fuka ke met puspus su som liki congregation lun met Kristian?
22 Kut fwin akos Jeova pal nukemwa, sie kunokon mwomwo fwa utuku nu sesr in kaksakinul pal nukemwa. (Sam 119:169-176) Ke inkanek in moulkin moul fwal nu ke masap nukemwa lun God, kut fwa tia engankin moul insemwomwo in ngun mukena a ‘ngoasrosr tafwela in fwakak kaksak lun Jeova.’ (Sam 119:169-171, 174) Pa inge me insemwomwo yok emeet kut ku in insemwomwokin ke len safla inge. Met sim lun Sam el lungse in moul pal nukemwa in kaksakin Jeova, tusruktu ke kutu inkanek su tia akkalemyeyuk, el oru ma ‘tafongla oana soko sip tula.’ (Sam 119:175, 176) Kutu met su som liki congregation lun met Kristian saap elos srakna lungse Jeova a lungse in kaksakinul. Ke ma inge lela kut in oru ma nukemwa kut ku in oru in kasrelos tu elos fwa ku in sifwil suk moul insemwomwo in ngun a pulakin engun in kaksakin Jeova yurin met kulansap puspus lal.—Hibru 13:15; 1 Piter 5:6, 7.
Kalem ke Inkanek Lasr Pal Nukemwa
23, 24. Ma lane puspus fuka kom eis ke Sam 119?
23 Sam 119 ku in akinsemwomwoye kut ke inkanek puspus. Ke sie me pupulyuk, ma inge ku in kasre kut in lalalfongi yok ke God, meyen ma inge akkalemye la insemwomwo paye el tuku ke oiyen moul in “fwasr in masap lun Jeova.” (Sam 119:1) Met sim lun sam el akesmakinye kut la ‘kas nukemwa lun Jeova el paye.’ (Sam 119:160) Ma inge fwa akyokye kulo lasr nu ke Kas nukemwa lun God su simusyukla tari. In sifwilpa nunku ke Sam 119 fwa mokle kut in lutlutkin Ma simusla ke inkanek moniyuk. Met sim lun sam el siyuk sin God pal puspus: “Luti yu masap lom.” (Sam 119:12, 68, 135) El oayepa siyuk: “Luti yu ke ma mwomwo, nunak sumwos a etauk, ke masap lom nga lalalfongi.” (Sam 119:66, NW) Kut enenu pa in pre ke inkanek oinge.
24 Me luti lun Jeova ku in oru in oasr inkanek futoto paye nu sel. Met sim lun sam el panglol sifwana oana met kulansap lun God pal puspus. Paye la, el fwak nu sin Jeova ke kas mwomwo inge: “Nga ma lom.” (Sam 119:17, 65, 94, 122, 125; Rom 14:8) Sie kunokon mwomwo pa in oru orekma in kulansap a kaksakin Jeova oana sie sin Met Lo lal! (Sam 119:7) Ya kom kulansapu God ke engan wi insemwomwo oana sie met fwakak peng mwo lun Togusrai? Fwin aok, kom ku in pulakin na paye la Jeova el fwa tafwela in kasru a akkeye kom ke orekma mwomwo inge kom fwin lalalfongi ke kas lal pal nukemwa a kom lela ma inge in sang kalem nu ke inkanek lom.
Kom E Topuk Fuka?
• Efu kut enenu in insemwomwokin yok kas lun God?
• Fuka kas lun God kasru a akkeye kut?
• Ke inkanek puspus fuka kut kasreyuk ke kas in akesmakin nukemwa lun Jeova?
• Efu ku met kulansap lun God elos engankin oiyen insemwomwo a misla?
[Picture on page 27]
Kas lun God el sie sropon kalem lun ngun
[Picture on page 28]
Kut fwin lungse Jeova, el fwa tia nunku kesr oana “kutkut su fwulfwul nu ke ma saok se”
[Pictures on page 29]
Kut fwin rid Baibel len nukemwa, fus nukemwa su sang kasru ku in esamyuk ke pal kut pre