Ya Kom Arulanu Lungse Kas In Luti Lun Jeova Su Akismakinye Kut?
“Ngunik akos kas in luti lom, a Nga arulanu lungse ma inge.”—SAM 119:167.
1. Oiye kut ku in konaok kas in luti puspis lun Jeova su akismakinye kut pal nu kemwa?
JEOVA el lungse met lal in engun. Tusruktu in engunkin insemwomwo na paye, kut enenu in akos ma sap lun God a loang nu ke kas lal. El akismakinye kut tu kut in oru ou inge. Ma inge sramsramkinyuk pal nu kemwa in Ma Simusla, yokna in Sam 119, su orekla sin met Fwisrak fwusr inge Hezekaia. On kato inge mutamwauk ke kas inge: “Insemwomwo elos su sumwosna inkaneku, su fwasr in manu lun Jeova. Insemwomwo elos su liaung kas lal, su sukol ke inse nu fon.”—Sam 119:1, 2.
2. Fuka kas in luti lun Jeova su akismakinye kut kapsreni nu ke insemwomwo?
2 Kut ‘fwasr ke ma sap lun Jeova’ ke kut eis etauk sumwos ke Kas lal a ke kut orekmakin ma inge ke moul lasr. Tusruktu, ke sripen kut sesumwos, kut enenu in akismakinyeyuk pal nu kemwa. Kas Hibru inge “akismakin” akkalemye la God el akismakinye kut ke ma sap lal, akmwuk lal, a inkanek lal nu kemwa. (Mattu 10:18-20) Kut ku in insemwomwo pal nu kemwa fwin kut tafwela in liaung kas in luti inge nu kemwa su akismakinye kut, meyen ma inge nu kemwa ku in kasru kut in fwasr liki me sruf in ngun su ku in kol nu ke ongoiye a me asor.
Fulyung nu ke Kas in Luti lun Jeova Su Akismakinye Kut
3. Fwal nu ke Sam 119:60, 61, kain in lalalfongi fuka oasr yurosr?
3 Kas in luti lun Jeova su akismakinye kut arulanu yok sripe nu sin met sim lun sam su on: “Nga silaklak, a tia patla, in akos ma sap lom. Sul lun met koluk kapriyuwi. A Nga tia mulkunla ma sap lom.” (Sam 119:60, 61) Kas in luti lun Jeova su akismakinye kut kasru kut in muteng ke kolyai meyen kut lalalfongi la Papa tumasr in kosrao el ku in otela sul lun met lokwalok lasr su elos kapri kuti ka. Ke pal pakiyuki lal, el aksukosokye kut liki me kutong nu kemwa tu kut fwa ku in tafwela ke orekma in luti lasr ke Togusrai.—Mark 13:10.
4. Fuka kut akos kas in luti lun Jeova su akismakinye kut?
4 Kutupal, kut nu kemwa aksumwosyeyuk ke kas in luti lun Jeova su akismakinye kut. Lela kut in akkalemye insemwomwo pal nu kemwa ke me aksumwos inge, oanu met sim in pal meeta oru. El fwak nu sin God ke pre: “Kas in luti lom elos ouyepa me insemwomwo yurok . . . Nga lungse kas lom.” (Sam 119:24, 119) Oasr yurosr kas in luti su tuku sin God pus liki kas in luti su oasr yurin met sim lun Sam. Me sramsram puspis su tuku ke Ma Simusla lun Hibru su kut ku in liye ke Ma Simusla lun Greek akismakinye kut tia ke kas in luti mukena lun Jeova nu sin met lal su muta ye Ma Sap, a ouyepa ke akmwuk lal ke congregation lun met Kristian. Ke pal se God el liye la fwal in akismakinye kut ke ma puspis ke ma sap lal, kut arulanu insemwomwo ke ma el oru inge. A ke kut ‘fulyung nu ke kas in luti lun Jeova su akismakinye kut,’ ma inge kasru kut in fwasr liki me purakak koluk su aksupwarye Met Orekutla a kunausla insemwomwo lasr.—Sam 119:31.
5. Fuka kut ku in arulanu lungse kas in luti lun Jeova su akismakinye kut?
5 Fuka lupan lungse lasr ke me esmakin lun Jeova? “Ngunik akos kas in luti lom, a Nga arulanu lungse ma inge. (Sam 119:167) Kut fwa arulanu lungse na paye kas in luti lun Jeova kut fwin nunku a eis ma inge oanu kas in akismakinye kut su tuku sin sie Papa su lungse na paye kut. (1 Piter 5:6, 7) Kut enenu kas in luti lal su akismakinye kut, a lungse lasr nu sel fwa kapkapek ke kut liye fuka ma inge nu kemwa ase nu sesr ma lane.
Efu Kut Enenu Kas in Luti lun Jeova Su Akismakinye Kut
6. Mea sie sripe efu kut enenu kas in luti lun Jeova su akismakinye kut, a mea ma inge su ku in kasru kut in esam ma inge?
6 Sie sripe efu kut enenu kas in luti lun Jeova su akismakinye kut pa meyen kut sa in mulkunla ma inge. Pa inge ma The World Book Encyclopedia el fwak: “Ke inkanek yok, metu elos mulkunla ma puspis tokin sie pal . . . saap oasr pal kom pula tu kom mulkunla a tia esam enen sie met ku kutu me lutlut su oasr na ke oalum tusruktu kom tia ku in fwak . . . . Kain in oiyen mulyula inge, su pal nu kemwa sikyuk, pangpang retrieval failure ku kofla in esamak. Scientist elos pupulyukin ma inge ke kaifweung lun sie met in suk ma tula ke sie infwokil su arulanu okarkar. . . . Sie inkanek in esam ipen me lutlut se pa in lutlut ke ma inge tokin kom nunku la kom etala ma inge.” Lutlut mwo a kalweni fwa kasru kut in esam kas in luti lun God su akismakinye kut a in orekmakin ma inge ke insemwomwo lasr.
7. Efu kas in luti lun God su akismakinye kut arulanu enenu ke len inge yok liki meet?
7 Kut enenu kas in luti lun Jeova su akismakinye kut ke len inge yok liki meet meyen ma koluk ke pal inge yok liki me sramsram nu kemwa lun met in pal meeta. Kut fwin loang nu ke kas in luti lun God su akismakinye kut, kut eis etauk su eneneyuk tu kut in tia sremla ke inkanek koluk lun fwal se inge. “Nga etu liki met luti luk nu kemwa,” met sim lun sam el fwak, “tu kas in luti lom me nunkauk luk. Nga etu liki met matu, meyen Nga liaung kas in luti lom. Nga srukye niuk liki inkanek koluk nu kemwa, tu Nga fwa ku in akos kas lom.” (Sam 119:99-101) Ke inkanek in akos kas in luti lun God su akismakinye kut, kut fwa tia “fwasr inkanek koluk” a kut fwa fwasr liki oiye lun fwal se inge su “etu lalos losla, musalelik liki moul lun God.”—Efesus 4:17-19.
8. Fuka kut ku in ekla sie met su akola na paye in sun me srifwe ke lalalfongi a kutangla?
8 Kas in luti lun God su akismakinye kut arulanu yok enene ya nu sesr meyen ma inge akkeye kut in muteng ke me srifwe puspis su sun kut ke “len safla se inge.” (Daniel 12:4) Fwin wangin kas in luti inge su akismakinye kut, na kut ekla sie met su ‘mulkunla ma kut long.’ (Jemes 1:25) Tusruktu kaifweung in lutlut a lutlut lun congregation ke Ma Simusla ke kasru lun me rid in Baibel su tuku sin “met kulansap oaru a lalmetmet” fwa ku in kasru kut in kutangla fwin kut sun me srifwe inge ke lalalfongi lasr. (Mattu 24:45-47) Kain in me kasru inge in ngun ku in akkeye kut in liye mea kut enenu in oru in akinsemwomwoye Jeova kut fwin sun me srifwe.
Orekma Saok lun Meeting Lasr
9. Su “me sang nu sin met,” a fuka elos kasru met lili wielos in lalalfongi?
9 Kutu enenu lasr ke kas in luti lun God su akismakinye kut ku in eis ke meeting lun met Kristian, pa inge an su kas in luti etuku nu sesr ke inkanek lun met lili mokul su pakiyuki. Met sap Poul el simusla la ke pal se ma Jisus el “somwak nu lung, el akkosye me kos; a sang me sang nu sin metu.” Poul el toeni kas inge: “[Kraist] el esung nu sin kutu tu elos in met sap; a kutu met palu, kutu met sulkakin mwosasu; a kutu met sropu a met luti; tu in aksumwosye met mwo nu ke orekma in kulansap nu ke musaiyuk in monin Kraist.” (Efesus 4:8, 11, 12) Kut arulanu sang kulo na paye meyen “me sang nu sin met inge”—met elder nu kemwa su pakiyuki—elos kolla nunuk lasr nu ke kas in luti lun Jeova su akismakinye kut ke pal se kut tukeni nu sie in alu!
10. Mea me lutlut yok lun Hibru 10:24, 25?
10 Insemwomwo lasr ke me sang mutal mokle kut in wi ke meeting limekosr nu kemwa lun congregation ke wik nu kemwa. Ma enenu in tukeni nu sie Poul el akkalemye. El simusla: “A lela kut in nunku ke sie sin sie in akkeye kut nu ke lungse a orekma mwo, a kut in tia likiye tukeni nu sie lasr in alu, oanu lia lun kutena, a kut in kaifwe sie sin sie, a akyokye, oanu komwos liye tu len apkurun me.”—Hibru 10:24, 25.
11. Fuka kais sie meeting lasr sang ma lane nu sesr?
11 Ya kom engunkin akmwuk lun meeting nu sesr? Lutlut ke Tauer In San akkeye lalalfongi lasr, kasru kut in akos kas in luti lun Jeova su akismakinye kut, a akkeye kut in lain “ngun lun fwal se inge.” (1 Korint 2:12; Orekma 15:31) Ke Public Meeting, met sramsram elos akkalemye kas in luti su tuku ke Kas lun God, wekunang kas in luti lun Jeova su akismakinye kut a kas mwolanu lun Jisus “moul ma patpat.” (Jon 6:68; 7:46; Mattu 5:1–7:29) Etauk lasr in luti akkeyeyuk ke Theocratic Ministry School. Yok kasru lun Service Meeting in akkapye inkanek in sramsram lasr ke peng mwo sie loom nu ke sie loom, ke pal in return visit, Baibel study, a ke kutupa ipen orekma lun forfor lasr. U srisrik lun met ke Buk Study lun Congregation ase nu sesr pal mwo in fwakak a ke sramsram su pal nu kemwa ipen kas in luti lun God su akismakinye kut.
12, 13. Fuka met lun God ke sie an fwin Asia elos akkalemye insemwomwo lalos ke meeting lun met Kristian?
12 Akesrui lasr pal nu kemwa in wi meeting lun congregation akismakinye kut ke ma sap lun God a kasru kut in fukoko in ngun ke pal in meun, ma upa ke mani, a kutupa me srifwe ke lalalfongi lasr. Ma saok su tuku ke meeting pulakinyuk na paye sin met Kristian 70 ke sie an fwin Asia su som liki loom selos a ekla met kaeng a muta ke insak. Meyen elos kaifweung in tafwela ke meeting lalos pal nu kemwa, paenang elos folokla nu ke mura lalos su kunausyukla ke meun, eisla kutu ipen sak a tin ke Kingdom Hall su musalla, a sifwil musaiyuk ma inge ke insak.
13 Tokin elos muteng ke meun ke lusen yiu puspis ke an saye ke mutanfwal sepanu inge, met lun Jeova elos srakna moniyuk ke alu. Elos siyuk kusensiyuk nu sin sie elder ke an inge: “Mea ma inge su sang kasru yok in oru met lili in tukeni muta pal nu kemwa a tia fwasrelik?” Top lal? “Ke lusen yiu 19 kut tia fuleak kutena meeting. Kutupal ke sripen elos sisla bakudang a kutu ma upa, kutu sin met lili elos kofla in tuku nu ke an in meeting, tusruktu kut tia fuleak kutena meeting.” Arulanu kalem la brother a sister kulu inge nu kemwa elos aksaokye na paye in ‘tia likiye tukeni nu sie lalos in alu.’
14. Mea kut ku in lotela ke fasin lal Anna su matou tari?
14 Mutan katinmas Anna su yiu 84 matwe el “tia som liki in tempel.” Ke sripe se inge, el muta ke pal se awowo Jisus elos wisla nu ke tempel tia pat tokin isusla lal. (Luk 2:36-38) Ya kom kaifweung in wi meeting pal nu kemwa? Ya kom oru ma nu kemwa ke ku lom in wi ke kais sie session lun toeni lulap a convention? Ma lane in ngun su kut ku in eis ke toeni inge wise nu sesr me akpayeye la Papa tumasr in kosrao el kurungin na paye met lal. (Isaia 40:11) Kain in toeni inge akkeye insemwomwo, a akesrui lasr in wi akkalemye insemwomwo lasr ke kas in luti lun Jeova su akismakinye kut.—Niemaia 8:5-8, 12.
Siena Liki ke Sripen Kas in Luti lun Jeova
15, 16. Fuka akos lasr ke kas in luti lun Jeova su akismakinye kut orekma nu sesr?
15 Loang nu ke kas in luti lun God su akismakinye kut oru kut in siena liki fwal koluk se inge. Ke sie me pupulyuk, kas in luti lun God su akismakinye kut kasru kut in fwasr liki a tia sremla ke orekma lun kosro. (Duteronomi 5:18; Soakas 6:29-35; Hibru 13:4) Akos ke kas in luti mutal su akismakinye kut ku in kutongye me srifwe lun kikiap, lun sesumwos, ku lun pusrapasr. (Exodus 20:15, 16; Livitikus 19:11; Soakas 30:7-9; Efesus 4:25, 28; Hibru 13:18) Akos kas in luti lun Jeova su akismakinye kut ku in kutongkuti in tia suk foloksak, srukye mulat, ku in sromon ma kikiap lain kutu met.—Livitikus 19:16, 18; Sam 15:1, 3.
16 Akos kas in luti lun God ku in kasru kut in mutal pal nu kemwa, in kulansap nu sel. A fwuk mwoiya in siena liki fwal se inge! Ke pre lal nu sin Jeova ke fong safla lal fwin fwalu, Jisus el siyuk sin God ke met tuma lutlut lal: “Nga sang tari nu selos kas lom, a fwalu srungalosla, meyen elos tia ma lun fwalu, aok oanu Nga tia ma lun fwalu. Nga tia pre tu kom fwa eselosla liki fwalu, a tu kom fwa liyelosyung liki ma koluk. Elos tia ma lun fwalu, aok oanu Nga tia ma lun fwalu. Akmutalyelos in ma paye; kas lom ma paye.” (Jon 17:14-17) Lela kut in tafwela in aksaokye Kas lun God, su srikutla nu ke orekma mutal lal.
17. Mea ku in sikyuk kut fwin pilesru kas in luti lun Jeova su akismakinye kut. ke ma inge mea kut enenu in oru?
17 Oanu met kulansap lun Jeova, kut enenu in fwal nu ke orekma lal. Tusruktu, kut fwin pilesru kas in luti lun God su akismakinye kut, na ngun lun fwal se inge ku in kutangkutla, kain in ngun su arulanu akkeyeyuk ke inkanek lun kas lal, me rid, me akengun, a oiye. Ma paye se la kut tia lungse in ekla sie met su lungse mani, met konkun, fulang, wenties, met tia sang kulo, tia mutal, met silolel, met likkeke, insefulat, lungse me akengun yok liki lungse God—pa inge kutu orekma su akkalemyeyuk sin met nu kemwa su tia futoto nu sin God. (2 Timote 3:1-5) Ke sripen kut moul misinge ke saflaiyen len safla lun akmwuk koluk inge, lela kut in sekalani in pre ke me kasru mutal tu kut in ku in tafwela in liaung kas in luti lun Jeova su akismakinye kut a ‘in arulanu liaung inkanek lal fwal nu ke kas lal.’—Sam 119:9.
18. Akos ke kas in luti lun God su akismakinye kut mokle kut in oru orekma mwo fuka?
18 Kas in luti lun Jeova su akismakinye kut el tia kasru kut mukena in pulakin sensen ke ma su kut tia enenu in oru. Akos lasr ke kas in luti lal su akismakinye kut mokle kut in oru orekma mwo, kasru kut in lalalfongi Jeova ke ku lasr kemwa a in lungse el ke insiesr kemwa, ngunasr kemwa, a ku lasr kemwa. (Duteronomi 6:5; Sam 4:5; Soakas 3:5, 6; Mattu 22:37; Mark 12:30) Kas in luti lun Jeova su akismakinye kut mokle kut in lungse met tulan lasr. (Livitikus 19:18; Mattu 22:39) Yokna, kut akkalemye lungse nu sin God a nu sin met tulan lasr ke kut oru orekma mutal a kasru kutu met in eis “etauk lun God” su ku in molelosla.”—Soakas 2:1-5.
Akos Kas in Luti lun Jeova Ku in Kalmekin Moul!
19. Fuka kut ku in akkalemye nu sin kutu met la arulanu mwo a yok sripe in akos kas in luti lun Jeova su akismakinye kut?
19 Kut fwin liaung kas in luti lun Jeova su me akismakinye a kasru kutu met in oru ou inge, kut molela moul lasr sifwanu a elos nu kemwa su long kut. (1 Timote 4:16) Fuka kut ku in akkalemye nu sin kutu met la porongo ke kas in luti lun Jeova su akismakinye kut arulanu mwo a ku in kasru kut na paye? Kut ku in oru oiye inge kut fwin orekmakin ke moul lasr ma sap lun Baibel. Ke ma inge, elos nu kemwa su “pakiyuki nu ke moul ma patpat” elos fwa liye la inkanek in moul su simusyukla ke Kas lun God pa mwo emeet in akos. (Orekma 13:48) Elos ku in ouyepa liye la ‘God el muta inmaslosr’ a elos fwa mokleyuk in wi kut ke alu lasr nu sin Leum Ku Liki Ku Jeova.—1 Korint 14:24, 25.
20, 21. Kas in luti lun God su akismakinye kut a ngun mutal ku in kasru kut in oru mea?
20 Ke inkanek in lutlut pal nu kemwa ke Ma Simusla, orekmakinyen ma kut lotela tari, a in eis pal nu kemwa me sang lun God ke ma lun ngun, kut e fwa arulanu lungse na paye kas in luti lal su akismakinye kut. Kut fwin akos, kas in luti inge su akismakinye kut, ma inge ku in kasru kut in “nukomang met sasu, su fwal nu sin God orekla tari, in sumwosmwos, a mutal lun paye.” (Efesus 4:20-24) Kas in luti lun Jeova su akismakinye kut a ngun mutal ku in kasru kut in akkalemye lungse, engun, misla, mongfwusesr, kulang, inse mwo, lalalfongi, sifwanu leum fwom—oiye puspis su tia oanu oiye lun fwal se inge su muta ye koko lal Setan! (Galetia 5:22, 23; 1 Jon 5:19) Ke ma inge, kut ku in sang kulo ke pal se kas in luti lun Jeova akismakinye kut ke lusen pal in lutlut lasr ke Baibel, sin met elder su pakiyuki, a ke meeting nu kemwa lasr, toeni lulap, a convention nu kemwa.
21 Meyen kut akos kas in luti lun Jeova su akismakinye kut, paenang kut ku in insemwomwo fwinne kut keok ke sripen ma sumwos. (Luk 6:22, 23) Kut ngetuk nu sin God in molikutla ke pal in ma upa a me sensen yok. Ma inge arulanu yok sripe ke pal inge meyen mutanfwal nu kemwa elos esane nu sie tari nu ke “meun lulap lun God Ku Liki Ku” ke Armagedun.—Fwakyuk 16:14-16.
22. Kaifweung fuka kut enenu in oru ke kas in luti lun Jeova su akismakinye kut?
22 Kut fwin lungse in eis me kulang ke moul ma patpat, kut enenu in arulanu lungse kas in luti lun Jeova su akismakinye kut a liaung ma inge ke insiesr kemwa. Lela kut in srukye sie ngun su oasr yurin met sim lun sam su on: “Kas in luti lom sumwosmwos ma patpat. Se nu sik etauk a Nga fwa moul.” (Sam 119:144) A lela kut in akkalemye kaifweung su arulanu kalem ke kas lun met sim lun Sam: “Nga pang nu sum [Jeova]. Moliyula, a Nga fwa akos kas lom.” (Sam 119:146) Aok, ke kas a orekma, lela kut in sang me akpayeye la kut arulanu lungse na paye kas in luti lun Jeova.
Fuka Kom Topuk?
• Fuka nunuk lun met sim lun sam ke kas in luti lun Jeova su akismakinye kut?
• Efu kut enenu kas in luti lun God su akismakinye kut?
• Mea ip lun meeting nu kemwa lasr ke kas in luti lun Jeova su akismakinye kut?
• Fuka kas in luti lun Jeova su akismakinye kut oru kut in siena liki fwal se inge?
[Picture on page 27]
Met sim lun sam el arulanu lungse kas in luti lun Jeova su akismakinyel
[Picture on page 28, 29]
In fwasr tokin me srikasrak lal Anna, ya kom kaifweung na paye in wi meeting pal nu kemwa?
[Picture on page 30]
Akos kas in luti lun Jeova su akismakinye kut oru kut in siena liki, sie met nasnas a fwal nu ke orekma lal