Lalalfongi Ke Kas Lun Jeova
“Nga lalalfongi kas lom.” —SAM 119:42.
1. Mea kom etu ke met sim lun Sam 119 a mea kom etu ke oiye lal?
KAS lun Jeova el aksaokyeyuk sin met su simusla Sam 119. Saap met sim inge pa Hezekaia sie met fwisrak lun an Juda. Ke oiyen pulakin su akkalemyeyuk ke on inge el fwal nu ke nunak a oiya lal Hezekaia, el su “fulyung nu sin Jeova” ke el kulansap oana togusra lun an Juda. (2 Togusra 18:3-7) Oasr sie me akpayeye la: Met sim inge el nunku ke me enenu lal in ngun.—Mattu 5:3.
2. Mea sifwin Sam 119, a ke inkanek fuka on inge orekla ku takinyukla?
2 Sie me lutlut yok ke Sam 119 pa ke saokiyen Kas lun God, ku peng su oasr ka.a In oana me kasru lun me akesmakin, met sim inge el simusla on inge ke inkanek sumwos mwo su pangpang on lun alphabetic ku acrostic. Fus nukemwa oasr ke fus 176 su fwal nu ke akwuk mwo ke leta lun alphabet lun kas Hibru. On inge ke kas Hibru in pal meeta, oasr stanza 22 a kais sie stanza oasr line 8 ka su leta in mutamwauk ka el oana sie. Sam inge el sramsramkin Kas lun God, masap, me esmakin puspus, inkanek puspus, akwuk puspus, me siyuk puspus, masap fulat, inkanek sumwos nu ke nununku, me fwakak puspus, a ke akwuk lun masap. Ke me lutlut inge a me lutlut toko, Sam 119 el aketeyuki fwal nu ke leng sumwos lun Baibel ke kas Hibru. In sifwilpa nunku ke ma sikyuk puspus ke met kulansap nukemwa lun Jeova in pal meeta a in pal inge fwa akyokye etauk lasr ku kalem lasr nu ke on inge su oasr kasru lun God ka a akyokye pa kulo lasr nu ke Kas lun God, Baibel su simusyukla.
Kut Fwin Akos Kas lun God Kut fwa Pulakin Insemwomwo
3. Aketeye a sang me pupulyuk nu ka mea kalmeyen in wangin meta.
3 Insemwomwo paye el tuku ke orekma lasr in fwasr fwal nu ke masap lun God. (Sam 119:1-8) Kut fwin akos masap lun God, Jeova el fwa nunku kesr mu ‘sumwosmwos inkanek lasr.’ (Sam 119:1) In oana sie met sumwos su wangin meta tia kalme pa kut sumwosmwos, tusruktu ma inge akkalemye la kut enenu in kaifweang in oru ma lungse lun God. Noa “el met mwo a sumwosmwos in fwil lal” oana sie mokul su “fwafwasryesr yurin God paye.” Met patriark sumwos se inge a sou lal elos moliyukla liki Sronot lulap sa meyen el fwasr tokin inkanek in moul su Jeova el oakiya. (Genesis 6:9; 1 Piter 3:20) In oapana, ke molela lasr ke saflaiyen akwuk lun fwal se inge fwa orek fwal nu ke oiye lasr in ‘arulanu liaung kas in kai lun God,’ fwin oinge kut oru ma lungse lal.—Sam 119:4.
4. Insemwomwo a kutangla lasr el fwal nu ke mea?
4 Jeova el fwa tia som liki kut fwin kut ‘sang kulo nu sel ke inse sumwos a tafwela in akos masap lal.’ (Sam 119:7, 8) God el tia som lukel Josua met kol lun an Israel, su orekmakin kas in kai in ‘rid buk in masap len a fong tu el fwa ku in liaung in oru fwal nu ke ma nukemwa su simla lu.’ Ma inge orel in kutangla a kasrel in orekmakin inkanek lalmetmet. (Josua 1:8) Apkurun nu ke saflaiyen moul lal, Josua el srakna kaksakin God a ku in akesmakinye met Israel: “Komwos etu in insiomwos kemwa a in ngunumwos kemwa tu wangin ma tula liki ma mwo nu kemwa su Jeova God lomwos el fwak keyumwos.” (Josua 23:14) In oana Josua a met sim lun Sam 119, kut ku in koneak insemwomwo a kutangla ke inkanek in kaksakin Jeova a lalalfongi ke kas lal.
Kas lun Jeova Oru Kut in Nasnas Pal Nukemwa
5. (a) Aketeye la fuka in sruokye oiyen nasnas in ngun pal nukemwa. (b) Me kasru fuka oasr yurin sie met fwusr su orala ma koluk upa?
5 Kut ku in nasnas in ngun kut fwin karunganang moul lasr pal nukemwa fwal nu ke kas lun God. (Sam 119:9-16) Pa inge oiye mwo fwinne papa a nina kiyesr elos tia oakiye me srikasrak mwomwo. Fwinne papa tumal Hezekaia el sie met su alu nu ke ma srulela, Hezekaia el ‘aknasnasye inkanek lal,’ ke me akkoluk puspus lun met pegan. Mea fwa sikyuk fwin sie met fwusr su kulansap nu sin God ke pal inge el orala ma koluk upa. Auliyuk, pre, me kasru lun papa a nina kiyel, a me kasru lun met Kristian elder puspus ku in kasrel in ekla oana Hezekaia a ‘aknasnasye inkanek lal a liaung pal nukemwa.’—Jemes 5:13-15.
6. Mutan fuka ‘aknasnasye tari inkanek lalos a in karungin oiya lalos pal nukemwa fwal nu ke kas lun God’?
6 Fwinne Rehab a Rut elos moul meet liki pal Sam 119 el simusyukla, elos ‘aknasnasye inkanek lalos.’ Rehab el sie mutan kosro in an Kenan, tusruktu el ekla mutan su eteyuk ke sripen lalalfongi lal oana sie met su alu nu sin Jeova. (Hibru 11:30, 31) Rut el mutan Moab se el sisla kain in god puspus lal sifwana, el kulansap nu sin Jeova, a akos Masap lal nu sin met Israel. (Rut 1:14-17; 4:9-13) Mutan luo inge kemwa elos ‘liaung pal nukemwa fwal nu ke kas lun God’ a oasr me insemwomwo lalos in ekla nina matou kiyen Jisus Kraist.—Mattu 1:1, 4-6.
7. Fuka Daniel a met fwusr Hibru tolu elos oakiye sie me srikasrak mwomwo in sruokye oiya nasnas in ngun?
7 “Kena lun insiyen met el koluk mutamwauk ke el tulik me,” turuktu met fwusr puspus elos ku in fwasr tokin inkanek nasnas, fwinne ke fwal koluk se inge su on ye ku lun Setan. (Genesis 8:21; 1 Jon 5:19) In oana met su sruo in an Babulon, Daniel a met fwusr Hibru tolu elos ‘liaung pal nukemwa in fwal nu ke kas lun God.’ Ke sie me pupulyuk, elos tia akkolukyelos sifwana “ke me mongo eueu lun togusra.” (Daniel 1:6-10) Met Babulon elos mongo kosro su tia nasnas, su Masap lal Moses el sapkin met Israel in tia kang. (Livitikus 11:1-31; 20:24-26) Pal nukemwa met Babulon elos tia aksuroryela sran kosro su anwuki, a elos kang ikwen kosro su tia aksuroryeyukla sra ka paenang elos kunausla masap lun God ke sra. (Genesis 9:3, 4) Tia me lut ke met fwusr Hibru akosr inge elos tia wi kang mongo yuyu nen togusra! Met fwusr inge elos sruokye na oiye nasnas lalos in ngun a ke ma inge elos me srikasrak mwomwo.
Kas lun God el sie Me Kasru nu ke Oiyen Oaru Paye
8. Kain in oiye a etauk fuka kut enenu kut fwin lungse in lotela a orekmakin masap lun God?
8 Insemwomwo yok ke kas lun God pa sie me kasru yok sripe in oru kut in oaru nu sin Jeova pal nukemwa. (Sam 119:17-24) Fwin kut oana met sim lun Sam, kut fwa pulakin kena yok in eis etauk ke “ma sakuruk puspus” ke masap lun God. Kut fwa akkalemye ‘lungse nu ke nununku lun Jeova’ a akkalemye ‘insemwomwo yok nu ke kas in esmakin lal.’ (Sam 119:18, 20, 24, NW) Kut fwin eiskutyang tari nu sin Jeova fwinne ke pal na fototo, ya kut ‘akkeye lungse nu ke titi lun ngun su tia oasr kutasrik ka’? (1 Piter 2:1, 2) Kut enenu in etu me luti sramtauk lun Baibel su kut ku in kalem mwo ka a in orekmakin nu ke masap lun God.
9. Oiye fuka kut enenu in akkalemye fwin masap lun met el lain masap lun God?
9 Kut ku in insemwomwokin me esmakin lun God, tusruktu fuka fwin “met fwisrak” elos kaskas in lain kut ke kutu sripe? (Sam 119:23, 24) Ke pal inge, met puspus su oasr ku lalos elos srike pal nukemwa in kaifwe kut ke inkanek yok in oru masap lun met yok liki ma sap lun God. Fwin ma lungse puspus lun met el lain ma lungse lun God, mea kut fwa oru? Insemwomwo yok lasr ke kas lun God fwa kasru kut in sruokye oaru ku lalalfongi paye pal nukemwa nu sin Jeova. In oana met sap puspus lun Kraist su kalyaiyuk, kut fwa fwak: “Mwo tu kut akos God yok liki metu.”—Orekma 5:29.
10, 11. Sang me pupulyuk la fuka kut ku in sruokye paye lasr nu sin Jeova fwin ma upa sikyuk.
10 Kut ku in sruokye oaru ku lulalfongi paye pal nukemwa nu sin Jeova fwinne ke ma sikyuk el upalanu. (Sam 119:25-32) Kut fwin lungse in kutangla a sruokye lulalfongi paye ku oaru lasr nu sin God pal nukemwa, kut enenu in akos kas in luti nu sesr a kaifweang in pre siyuk ke masap lal. Kut enenu pa in sulela “inkanek in oaru.”—Sam 119:26, 30.
11 Hezekaia, su saap simusla Sam 119, el sulela “inkanek in oaru.” El oru ma inge fwinne el rauniyukla ke kain in met puspus su alu nu sin God ke inkanek kikiap a akkolukyeyuk ke kaskas koluk lun met puspus su wi orekma ke u lun met nununku fulat ku court. Arulanu kalem la, ‘ngunal el tia ku in motul ke asor yok’ ke sripen oiye puspus inge. (Sam 119:28, NW) Tusruktu Hezekaia el lalalfongi God, el sie togusra mwomwo, a oru “ma mwo ye mutun Jeova.” (2 Togusra 18:1-5) In tupan ke me kasru lun God, kut enenu in muteng pa ke me keok puspus a sruokye oaru ku lalalfongi lasr nu sin God.—Jemes 1:5-8.
Kas lun Jeova el Me Akpulaikye
12. Fuka kut sifwana ku in orekmakin Sam 119:36, 37?
12 In akos inkanek in kolyuk ke kas lun God wise nu sesr me akpulaik ku me akkeye su eneneyuk in sang kutangla kain in me sruf puspus lun moul. (Sam 119:33-40) Lela kut in inse pusisel nu ke kas in kasru lun Jeova tu kut fwa ku in liaung masap lal “ke insiesr na fon.” (Sam 119:33, 34) In oana met sim lun sam, kut enenu in siyuk sin God: “Ekulang insiuk nu ke kas in luti lom, a tia nu ke rapku,” kalme pa, tia ke ma lane sesumwos. (Sam 119:36) In oana met sap Poul, kut “kena tu orekma lasr in sumwos in ma nukemwa.” (Hibru 13:18) Fwin sie employer ku sie met su la sie company el lungse kut in oru kutena ma sesumwos, kut enenu in akkalemye inkanek pulaik in fwasr tokin masap lun God—a pal nukemwa Jeova el akinsemwomwoye inkanek paye inge. Paye, el kasre kut in kutongye oiye ku kena koluk nukemwa. Ke ma inge lela kut in pre: “Forokla mutuk tu in tia ngetang nu ke ma lusrongten.” (Sam 119:37) Kutena ma lusrongten ku me srungeyuk ye mutan God lela kut in tiana nunku mu mwo kut in oru. (Sam 97:10) Sayen ma inge nukemwa, oasr ma luo su pre inge fwa kasre kut in fwasr liki pa ke pornography ku me rid fokfok a petsa mukuikui fokfok, a orekma lun inutnut.—1 Korint 6:9, 10; Fwakyuk 21:8.
13. Fuka met tuma lutlut puspus lun Jisus su kalyaiyuk elos eis ku su eneneyuk in sang ma lo ke inkanek pulaik?
13 Etauk sumwos ke kas lun God kasre kut in sang ma lo ke inkanek pulaik. (Sam 119:41-48) A kut enenu in pulaik in ‘topuk nu sel su kaskou kesr.’ (Sam 119:42) Oasr pal, saap kut oana met tuma lutlut lun Jisus su kalyaiyuk, elos pre: “Jeova, . . . sang nu sin met kulansap lom in fwak kas lom ke pulaik nu kemwa.” Mea fwokin pre inge? “Elos nu kemwa tingtinginu ke ngun mutal a elos pulaik in fwak kas lun God.” Leum fulatlanu in kosrao a fwin fwalu el use pa nu sesr pulaik in kaskaskin kas lal ke inkanek pulaik.—Orekma 4:24-31.
14. Mea ku in kasre kut in sang ma lo ke inkanek pulaik, oana Poul el oru?
14 Kut enenu in pulaik in sang ma lo ke inkanek su wangin sangeng tupek ka kut fwin aksaokye ku lungse “kas paye” a ‘liaung masap lun God pal e nu kemwa.’ (Sam 119:43, 44) Lutlut pal nukemwa ke Kas lun God su simusyukla tari fwa kasre kut in ‘kaskas ke kas in luti lal ye mutun togusra.’ (Sam 119:46) Pre a ngun mutal lun Jeova fwa kasre kut pa in fwakak ma paye ke inkanek sumwos. (Mattu 10:16-20; Kolosse 4:6) Poul el sramsram ke inkanek pulaik in sang kas in akesmakin lun God nu sin met kol puspus in century se meet. Ke sie me pupulyuk, el sang ma lo nu sel Governor Felix lun an Rom, su “longol ke lalalfongi su in Kraist Jisus.” (Orekma 24:24, 25) Poul el oayepa sang ma lo ye mutal Governor Festus a Togusra Agrippa. (Orekma 25:22–26:32) Ke kasru lun Jeova, kut ku pa in ekla met lo pulaik, su tiana “mwekin ke mwosasu.”—Rom 1:16.
Kas lun God el Wise nu Sesr Me Pwarak
15. Fuka Kas lun God el ku in me pwarak ku me akengan nu sesr fwin kutu met elos akkolukye kut ke inkanek in kaskas koluk lalos?
15 Kas lun Jeova el me akpwar mwomwo su tia ekyek. (Sam 119:49-56) Oasr pal puspus oasr ma enenu yok kut in akpwaryeyuk. Fwinne kut kaskas ke inkanek pulaik oana Met Lo lun Jeova, “met fulang puspus”—elos su lungse in akkalemye oiye lun nunak fulang nu sin God—kutupal elos ‘kaskas koluk arulanu upa nu sesr.’ (Sam 119:51) Tusruktu, ke kut pre, oasr me akesmakin mwomwo puspus ku in akkalemyeyuk ke Kas lun God, ke inkanek inge kut fwa ‘koneak me akpwarye nu sesr sifwana.’ (Sam 119:52, NW) Ke kut akkalemye me siyuk puspus lasr, kut ku in esamek sie masap ku akwuk saok su oasr ke Ma simusla su ku in kasre kut in eis me akkeye a pulaik su eneneyuk fwin oasr ma upa sikyuk.
16. Mea met kulansap lun God elos tia oru fwinne oasr me kalyai?
16 Met fulang puspus su kaskaskou nu sin met sim lun sam elos met Israel—elos su wi ke sie mutanfwal su mwoleyukla nu sin God. Sie me akmwekin yok! Tusruktu, in tia oana elos, lela kut in tiana fwasr liki masap lun God. (Sam 119:51) Oasr pal met kulansap puspus lun God elos sun me kalyai upa lun met Nazi a ke kutupa ma su sikyuk ke lusen yea puspus, elos tia lela in fwasr liki masap a akwuk mwomwo su koneyukyak ke Kas lun God. (Jon 15:18-21) Tia me aktoasr in akos Jeova, meyen masap nukemwa lal el oana on kato su use me pwarak ku me akengan nu sesr.—Sam 119:54; 1 Jon 5:3.
Akkalemye Kulo nu ke Kas lun Jeova
17. Kulo lasr nu ke kas lun God mokle kut in oru ma fuka?
17 Kut akpayeye kulo lasr nu ke kas lun God ke kut akos ku moulkin ma inge. (Sam 119:57-64) Met sim lun sam ‘el mwolela in karunganang kas lun Jeova,’ a fwinne ke ‘infulwen fong el fwa tukakek in sang kulo nu sin God ke nununku sumwos Lal.’ Kut fwin tukakek ke infwulen fong, pa inge pal mwomwo lasr in akkalemye kulo lasr nu sin God ke pre! (Sam 119:57, 62) Oiye mwomwo lasr in aksaokye kas lun God mokle kut in suk me luti mwolanu lal a oru kut in insemwomwokin in wi ‘met wiyelos nu kemwa su sangeng sin Jeova’—met puspus su oasr sangeng paye lalos nu sin God. (Sam 119:63, 64) Su ku in koneak met asrouki mwolanu inge fwin fwalu?
18. Fuka Jeova el sang me top nu ke pre fwin ‘sul lun met koluk kaprikuti’?
18 Ke kut pre ke insiesr kemwa a inse pusisel in siyuk sin Jeova in luti kut, kut ‘akfusesrye mutal’ kalme pa in engankin insemwomwo lal. Oasr me enenu yok lasr in pre ke pal se ‘sul lun met koluk kaprikuti.’ (Sam 119:58, 61) Jeova el ku in otela sul su kaprikuti sin met lokwalok a in aksukosokye kut la kut in ku in tafwela in oru orekma in luti ke peng mwo lun Togusrai a orekma in oru met tuma lutlut. (Mattu 24:14; 28:19, 20) Ma inge akkalemyeyuk ke pal puspus in an puspus su orekma lasr wangin sukosok we.
Lalalfongi Kas lun God
19, 20. Fuka tu in pulakin mwo ke ongoiye ku me keok?
19 Lalalfongi nu sin God a ke kas lal kasre kut in muteng ke me keok puspus a tafwela in oru ma lungse lal. (Sam 119:65-72) Fwinne met fulang puspus elos ‘kine kas kikiap lain yu,’ met sim lun sam el fwak: “Mwo nu sik tu nga ongoiye tari.” (Sam 119:66, 69, 71) Fuka tu in mwo nu sin kutena met kulansap lun Jeova in muteng ke me keok?
20 Kut fwin muteng ke me keok, kut pre siyuk ke inkanek paye nu sin Jeova, a ma inge ku in oru kut in futoto na paye nu sel. Kut ku in orekmakin pal yok in lutlutkin Kas lun God a ku pa in suk in kaifweang yok in orekmakin ma inge. Ma inge fwa kol nu ke moul su oasr me insemwomwo yok ka liki meeta. Tusruktu fuka fwin kut sun me keok a kut akkalemye oiye koluk, oana mongsa a inse fulat? Ke inkanek lun pre ke inse kemwa lasr a ke kasru lun Kas lun God a ngun mutal lal, kut ku in kutongye me munas inge a yokna kut ku in ‘nukomang met sasu’ ke inkanek nukemwa. (Kolosse 3:9-14) Oayepa, lalalfongi lasr el akkeyeyuk ke kut muteng ke me keok a ma upa puspus. (1 Piter 1:6, 7) Poul el eis ma lane ke me keok puspus su el sun meyen ma inge nukemwa orel in fototo yok nu sin Jeova. (2 Korint 1:8-10) Ya kut lela me keok puspus in oasr fwako mwo ku me insemwomwo nu sesr ka?
Lalalfongi Jeova Pal Nukemwa
21. Mea sikyuk ke pal se God el akmwekinye met fulang puspus?
21 Kas lun God el wise nu sesr sripe mwomwo in lalalfongi Jeova. (Sam 119:73-80) Kut fwin lalalfongi na paye nu sin Met Orekutla, kut tia enenu in pulakin mwekin. Tusruktu, ke sripen oasr kutu ma metu elos oru, paenang kut enenu me akkeye ku me kasru a in siyuk ke pre oinge: “Lela met fulang in mekin.” (Sam 119:76-78) Fwin Jeova el oru kain in met inge in mwekin, el akkalemye nu selos ke inkanek koluk lalos a in akmutalye e mutal lal. Kut ku in akpayeye la met su oru me kalyai nu sin met kulansap lun God elos tia eis kutena ma mwo. Ke sie me pupulyuk, elos tiana tia—a elos tia ku—in akwanginyela ku kunausla Met Lo lun Jeova, su lalalfongi God ke insielos kemwa.—Soakas 3:5, 6.
22. Ke oiye fuka met sim lun sam el “oana sie sufa in kulas”?
22 Kas lun God el akkeye lalalfongi lasr nu sel ke kut sun me kalyai. (Sam 119:81-88) Ke sripen met fulang elos kalyai met sim lun sam, el pula mu el “oana sie sufwa in kulas.” (Sam 119:83, 86) In pal lun Baibel, sufa su orekla ke kolin kosro el orekmakinyuk in sang sruokye kof, wain, a kutupa liquids. Fwin tia orekmakinyuk, sufa inge ku in lupolupu a kurula fwin sripsripyuk ke sie infwokil su fwol upa a nenela ke kulas. Ya ma upa ku me kalyai el oru kom in pula mu kom “oana soko sufwa in kulas”? Fwin aok, kom lalalfongi Jeova, a pre: “Moliyula in lungkulang lom, oinge nga fwa akos kas in luti lun oalum.”—Sam 119:88.
23. Mea kut aketeye tari le sramsramkinyuk Sam 119:1-88, a mea kut ku in siyuk sesr sifwana ke kut ngetla nu ke pal fwasru in lutlutkin Sam 119:89-176?
23 Ma kut aketeye inge ke ip se meet lun Sam 119 el akkalemye la Jeova el akkalemye lung-kulang nu sin met kulansap puspus lal meyen elos lalalfongi ke kas lal a elos insemwomwokin akwuk lal, kas in esmakin lal, a masap nukemwa lal. (Sam 119:16, 47, 64, 70, 77, 88) El insemwomwo ke sripen met puspus su oru orekma in kulansap lalos ke oaru a paye nu sel elos karunganang moul lalos fwal nu ke kas lun God. (Sam 119:9, 17, 41, 42) Ke kom ngetla nu ke pal fwasru su oasr ke me lutlut ke ip lula lun sam inge, kom ku in siyuk sum sifwana, ‘Ya Nga lela na paye kas lun Jeova in sang kalem ku tolak inkanek luk?’
[Footnote]
a Me kasru inge orekla fwal nu ke me fwakak lun Jeova, tia nu ke koanon Baibel nu fon—su Kas lun God.
Kom E Topuk fuka?
• Nu ke me insemwomwo paye fuka tupanyuk?
• Fuka kas lun God el oru kut in nasnas in ngun pal nukemwa?
• Ke inkanek puspus fuka kas lun God el me akpulaikye a me pwarak?
• Efu ku kut enenu in lalalfongi Jeova a kas lal?
[Pictures on page 22]
Rut, Rehab, a met fwusr Hibru tolu su muta in sruo in an Babulon elos ‘karungin oiye lalos pal nukemwa in fwal nu ke kas lun God’
[Picture on page 23]
Poul el pulaik in ‘sramsram ke kas in akesmakin lun God ye mutun tokusra puspus’