“Komwos Tafwela In Eis Ku In Leum”
“Komwos tafwela in eis ku in Leum a in ku lun ku lal.”—EFESUS 6:10.
1. (a) Kain in meun sakuruk fuka sikyuk ke yea 3,000 kutu somla? (b) Efu ku Devid el kutangla?
YEA 3,000 kutu somla, met meun luo elos lain sie sin sie pal se meun orek inmasrlon un met meun luo su alein sie sin sie ke niyen meun. Tulik mokul se ma fwusr a el sie met liaung sip pangpang Devid. Golaiat el tu ye mutal, sie mokul su oasr ku sakuruk lal a el fulat. Paun ke nuknuk in meun lal oasr ke paun 125, a el us sie me pusr yok a toasr a sie kutlas lulap. Devid el tia orekmakin kofwen me meun, a kofwen me meun lal pa fwut se. Met fulat a yok filistia se inge Golaiat el kasrkusrak ke sripen met Israel su tuku in lainul el sufwal srikla tufwana met fwusr yak. (1 Samuel 17:42-44) Nu sin met Israel a met Filistia su liye ma sikyuk inge, elos etu tari saflaiya. Tusruktu met ku el tia ku in kutangla ke meun pal nukemwa. (Ekklisiastis 9:11) Devid el kutangla meyen el meun ke ku lun Jeova. “Meun se inge ma lun Jeova,” el fwak. Ma simusla in Baibel el fwak la “Devid, ke sie fwut a sie eot, el akpayeye la el ku liki met Filistia.”—1 Samuel 17:47, 50.
2. Kain in meun fuka met Kristian elos wi?
2 Met Kristian tia enenu in wi ke meun. Fwinne elos akkalemye misla nu sin met nukemwa, oasr pa sie meun lalos nu ke ma lun ngun in lain met lokwalok fokoko puspus. (Rom 12:18) Ke sapta safla ke leta lal nu sin met Efesus, Poul el akkalemye ke sie meun su met Kristian nukemwa elos wi ka. El simusla: “Tu asruoki lasr tia lain ikwe a sra, a lain togusrai, lain met ku, lain leum in losr lun fwalu se inge, lain un ngun koluk yen engyengu.”—Efesus 6:12.
3. In fwal nu ke Efesus 6:10, mea kut enenu tu kut in lalalfongi la kut fwa eis kutangla?
3 “Un ngun koluk” inge pa Setan a dimon puspus lal, su lungse in kunausla futoto lasr nu sin Jeova God. Ke sripen elos ku liki kut, paenang kut ete kut sifwana in oana ke ma sikyuk nu sel Devid, a kut tia ku in kutangla kut fwin tia fototo nu sin God in eis kasru ke ku. Paye, Poul el kaifwe kut in “kaifweang pal nukemwa in eis ku in Leum a in ku lun ku lal.” (Efesus 6:10) Tokin el sang me kai inge, met sap inge el akkalemye ke me kasru in ngun a ke oiya puspus lun met Kristian su ku in kasre kut in eis kutangla.—Efesus 6:11-17.
4. Me lutlut yok fuka luo kut fwa aketeye ke me lutlut inge?
4 Lela kut in tuni mea Ma Simusla el fwak ke ku a inkanek lun met lokwalok lasr. Tokin ma inge kut e fwa nunku ke inkanek in karungin kut sifwana. Kut fwin fwasr tokin kas in kasru lun Jeova, kut ku in lalalfongi la met lokwalok lasr elos tia ku in kutangkutla.
Apurak Lain Un Ngun Koluk
5. In orekmakin kas inge “apurak” in Efesus 6:12 (NW), fuka ma inge ku in kasre kut in etu ke inkanek kutasrik lal Setan?
5 Poul el aketeye la kut “apurak . . . lain un ngun koluk yen engyengu.” Ngun koluk se meet inge pa, Setan su Devil.” (Mattu 12:24-26) Baibel el akkalemye ke meun lasr oana “sie apurak,” ku orekmakin pao lain pao in amei. Ke akutun lun apurak su orek in an Greece in pal meeta, kais sie met su wi ka el srike in purakinya met lokwalok lal in putatla nu in foku. Ke inkanek se pa na inge, Devil el lungse kut in putatla liki oiya mwo lasr ke ma lun ngun. El ku in oru fuka kut in oru ma inge?
6. In orekmakin Ma Simusla in akkalemye la fuka Devil el ku in orekmakin orekma kutasrik su tia oana sie in sang akmunasye lalalfongi lasr.
6 Devil el ku in oru elan ekla oana serpent soko, oana soko laion ngutngut, ku sie lipufon lun kalem. (2 Korint 11:3, 14; 1 Piter 5:8) El ku in orekmakin met puspus in oru me kolyai ku in akmunasye kut. (Fwakyuk 2:10) Ke sripen ku lun fwalu nu fon oasr sin Setan, paenang el ku in orekmakin fwalu nufon nu ke ma lungse lal a ma mwolana lal nukemwa in sang akkolukye kut. (2 Timote 2:26; 1 Jon 2:16; 5:19) El ku in orekmakin nunak lun fwalu ku me luti kikiap in sang kiapekutla, in oana ke el kiapella If.—1 Timote 2:14.
7. Mea dimon puspus elos tia ku in oru, a ma mwomwo fuka kut engankin?
7 Fwinne kofwen me meun a ku lal Setan a lun dimon nukemwa lal arulanu fokoko, tusruktu oasr saflaiyen ku lalos. Ngun koluk puspus inge elos koflana forci kut in oru ma koluk puspus su akasorye Papa tumasr in kosrao. Oasr sukosok lasr in oru sulela, a oasr ku lasr in kutongye nunak a orekma lasr. Yok liki nukemwa, tia kut mukena pa oru meun inge. Me akpayeye in len lal Elisha pa akpayeyuk pa in len lasr: “Tu elos su muta yurosr pus lukelos su muta yurolos.” (2 Togusra 6:16) Baibel el mwolela nu sesr la kut fwin akfulpapye kut sifwana nu sin God a lain Devil, el fwa kaengla liki kut.—Jemes 4:7.
Kut Etu Orekma Kutasrik lal Setan
8, 9. Me srike puspus fuka Setan el oru nu sel Job in kunausla oaru lal, a me sensen puspus fuka in ngun kut pula in pal inge?
8 Kut tia nikun orekma kutasrik lal Setan ke sripen Ma Simusla el akkalemye ke inkanek usrnguk puspus lal. (2 Korint 2:11) In lain met sumwos inge Job, Devil el orekmakin kain in ma upa ke me enenu lun moul, mise lun met puspus su el lungse, oiya in lain lun sou, me keok ke mano, a kas in akkoluk su tia paye sin met kawuk kikiap puspus lal. Job el sun me asor upa a nunku mu God el som lukel. (Job 10:1, 2) Fwinne Setan el tia oru ma inge ke inkanek sumwos ke pal inge, oasr ma upa puspus akkolukye met Kristian nukemwa, a Devil el ku in orekmakin ma upa nukemwa inge nu ke ma lane lal.
9 Arulanu pisrpisr yokelik lun me sensen in ngun ke len safla inge. Kut muta ke sie fwal su suk ma lun fwalu el eisla nien sun ke ma lun ngun. Media el akkalemye pal nukemwa ke orekma lun kosro la el pa sie sropon me insemwomwo a tia me asor upa. A pus sin met elos ekla nu ke “met su lungse me akengun yok liki lungse lun God.” (2 Timote 3:1-5) Inkanek in nunak oinge ku in akkolukye oiya mwomwo lasr in ngun fwin kut tia “srukye ku lalalfongi” lasr.—Jud 3.
10-12. (a) Ke me pupulyuk lal ke met taknelik, me sensen fuka Jisus el sang? (b) Aketeye la fuka orekma puspus in ngun ku in kutongyuki ku kupowiyuki.
10 Sie inkanek mwo emeet lun Setan pa in oru kut in wi nunku a oru kutena kain in kaifweang lun fwalu in suk ke ma puspus a me kasrup lal. Ke me pupulyuk lun Jisus ke met taknelik fute, el sang kas in sensen la ke kutu pal “nunkalanu fwalu a kutusrik lun me kasrup kupowiye kas [lun Togusrai].” (Mattu 13:18, 22) Kas Grik inge su lungasyukla nu ke “kupowiye” el kalme nu ke “kupowiye ke inkanek nukemwa.”
11 Sak soko inge su pangpang konya ku strangler fig el ku in koneakyuk ke insaku ke an tropical. El kapek kakasrisrik in raunela soko sak. Kais kutu srisrik, sak soko inge el kapek afwunye soko sak su okan sak orak soko inge el ekla oka fokoko soko. Oka nukemwa ke konya el eis me mongo nukemwa nel ke sropon sak, a kalem lun fwatu tille sun saku ke sripen lulin konya el afwunye ma inge. Ke saflaiye, sak soko ma konya el kapek ka el masla
12 Ke inkanek se pa na inge, ku in lumeyuk nu ke nunkala lun akwuk lun fwal se inge a ke kaifweang yok in suk me kasrup a sie moul mwomwo ku in eis pal a ku lasr kais kutusrisrik. Ke sripen nunak lasr pula tari in nunku ke ma puspus lun fwalu, paenang fusresr kut in mwulkunla lutlut lasr sifwana ke Baibel a in wi ke meeting nukemwa lun met Kristian, ke sripe se inge kut tille eis me mongo lun ngun. Nien sun ke ma lun fwalu kosrala orekma mwo nukemwa ke ma lun ngun, a ke saflaiye kut munasla in lain me srifwe lun Setan.
Kut Enenu in Tu Ku
13, 14. Me akkeye fuka kut enenu in orekmakin fwin kut lainyuk sel Setan?
13 Poul el kaifwe met lili elos in “tu ku in lain orekma kutasrik lun Devil.” (Efesus 6:11, New World Translation) Paye la, kut kofla in kutangulla Setan a dimon nukemwa lal. God el sang kunokon inge nu sin Jisus Kraist. (Fwakyuk 20:1, 2) Tusruktu, nu ke pal se Setan el fwa wanginla, kut nu kemwa enenu in “tu ku” tu kut in tia akmunasyeyuk ke orekma koluk lal.
14 Met sap Piter el akkalemye yok ke me enenu in tu ku in lain Setan. “Komwos in efwal, komwos in sano,” Piter el simusla. “Met lokwalok lomwos, Devil, el oana soko laion ngutngut, el fwafwasryesr in suk su el fwa kangla. Komwos in tu ku a sinukunul in lalalfongi lomwos, tu komwos etu tu keok sana oreyuk tari in met limwos su in fwalu.” (1 Piter 5:8, 9) Paye la, kasru lun met lili nukemwa arulanu yok sripe nu ke oiya lasr in tu ku ke Devil el fwin akkolukye kut oana soko laion ngutngut.
15, 16. Sang sie me pupulyuk ke Ma Simusla in akkalemye ke inkanek in kasru lun met lili puspus ku in kasre kut in tu ku.
15 Fwin soko laion su muta yen mesis in an Africa el ngutngut, kosro soko inge su pangpang antelope el ku in kaeng arulanu mui nu ke el ku in sun sie an su wangin me sensen we. Tusruktu, elephant puspus, elos akkalemye me srikasrak lun akesrui sie sin sie. Buk inge pangpang Elephants—Gentle Giants of Africa and Asia el aketeye: “Sie inkanek lun un elephant in loangellosla pa in tu raunla sie sin sie, su elephant matu el ngetla liye met lokwalok a elephant fwusr elos tu oasr luen raun san.” Ke sripen laion el akilen akwuk ku a me kasru inge, paenang arulanu supus pal laion el akkolukye elephant fwinne ke elephant fwusr puspus.
16 Ke Setan a dimon puspus lal akkolukye kut, kut enenu pa in tukeni nu sie muta, inse sefwanna yurin met lili wiyesr su fukoko ke lalalfongi. Poul el akilen la kutu sin met Kristian elos “me akkeye” nu sel ke lusen pal in prison lal in an Rom. (Kolosse 4:10, 11) Kas Grik su lungasyukla oana “me akkeye” simusyukla pal sefwanna ke Ma simusla lun Grik ku buk fwusr lun Baibel. Fwal nu ke Vine’s Expository Dictionary of New Testament Words, “kas inge ku in akkalemye ono su ku in akwanginyela ngal.” In oana ke ono in akmusra su aksrikyela ngal, kasru lun met matou in ngun su alu nu sin Jeova ku in aksrikyela ngal ke pulakin ku me keok ke mano.
17. Mea ku in kasru in oaru nu sin God?
17 Me akkeye su tuku sin met lili Kristian wiyesr ke pal inge ku in akkeye lungse lasr in oaru nu ke kulansap lasr nu sin God. Yokna met Kristian elder nukemwa elos lungse in sang me kasru lun ngun. (Jemes 5:13-15) Me kasru nu ke oaru lasr el wekunang in lutlut ke Baibel a wi meeting nukemwa, assembly nukemwa a toeni lulap nukemwa. Futoto lasr sifwana nu sin God kasre kut in oaru nu sel pal nukemwa. Paye, fwinne kut mongo, nim, ku oru kutena ma, kut enenu in oru ma nukemwa nu ke mwolena lun God. (1 Korint 10:31) Aok, lalalfongi Jeova wi pre el yok sripe in tafwela ke sie inkanek su akinsemwomwoyel.—Sam 37:5.
18. Efu kut tia enenu in fuleak fwinne me keok upa el akmunasyela ku lasr?
18 Kutu pal, Setan el akkolukye kut fwin kut pula la kut tia fokoko in ngun. Soko laion el ku in ngalisye soko kosro su munas. Ke ma upa puspus in sou, me keok nu ke me enenu lun moul, ku mas ku in akmunasye ku lasr in ngun. Tusruktu lela kut in tia fuleak in oru me akinsemwomwoye God, meyen Poul el fwak: “Tu ke nga munas, na nga ku.” (2 Korint 12:10; Galetia 6:9; 2 Tessalonika 3:13) Mea kalmen ma inge? El lungse in akkalemye la ku lun God el ku in sang kasru nu ke me munas lasr, kut fwin forla nu sin Jeova in siyuk ke ku. Kutangla lal Devid lukel Golaiat el akkalemye la God el ku a el akkeye met kulansap lal. Met Lo lun Jeova ke pal inge elos ku in akpayeye la ke pal in me keok upa, elos pulakin me akkeye lun God.—Daniel 10:19.
19. Sang me pupulyuk in akkalemye la fuka Jeova el ku in akkeye met kulansap nukemwa lal.
19 Ke me kasru su God el sang nu selos, paenang sie seanyen elos simusla: “Ke lusen yea puspus, kut kulansapul Jeova oana mokul tuma a mutan kie a engankin me insemwomwo puspus a kut eis etauk sin met mwomwo puspus. Kut oayepa eis akpa a akkeyeyuk sin Jeova in muteng ke ma upa puspus. In oana Job, kut tia etu ke pal puspus la efu ku ma inge sikyuk ke luma puspus, tusruktu kut ku in etu la Jeova el akola pal nukemwa in kasre kut.”
20. Me akpayeye fuka lun Ma Simusla akkalemye la Jeova el kasru pal nukemwa met lal?
20 Poun Jeova tia akfutotoyeyuk in sang kasru a in akkeye met oaru nukemwa lal. (Isaia 59:1) Devid el on: “Jeova el tulokunlosyuk elos nukemwa su ikori, a sruklulosyuk nu kemwa su sumwoli.” (Sam 145:14) Paye la, Papa tumasr in kosrao el “wis me utuk lasr len nukemwa” a kasre kut ke me enenu nukemwa lasr.—Sam 68:19.
Kut Enenu “in Nukomang Me Meun Nukemwa lun God”
21. Fuka Poul el akkalemye yok me enenu nu ke me meun lun ngun?
21 Kut aketeye tari kutu inkanek lun Setan a kut liye me enenu lasr in tu ku fwinne oasr orekma in akkoluk lal. Inge kut fwa aketeye sie pa me kasru yok sripe in sang karungin lalalfongi lasr. Pal luo ke leta lal Poul nu sin met Efesus, met sap Poul el sramsrakin sie me kasru yok sripe in tu ku in lain inkanek koluk lun Setan a in akkeye ku lasr in lain ku lun un ngun koluk puspus. Poul el simusla: “Komwos in nukomang me meun nukemwa lun God tu komwos in ku in tu lain kutasrik lun Devil . . . Ke ma inge komwos in eis nu sumwos me meun nukemwa lun God tu komwos in ku in tu lain len koluk a, tokin orekma nukemwa, tuyuk.”—Efesus 6:11, 13.
22, 23. (a) Mea weang nu ke me meun in ngun lasr? (b) Mea fwa aketeyuki ke me lutlut toku?
22 Aok, kut enenu in nukomang “me meun nukemwa lun God.” Ke pal se Poul el simusla leta lal inge nu sin met Efesus, el karunginyuk sin sie met meun lun an Rom, kutu pal el nukomang me meun nukemwa. Tusruktu, God pa kasrel Poul in aketeye me meun in ngun su arulanu eneneyuk nu sin kais sie met kulansap lun Jeova.
23 In wekunang nu ke me meun su tuku sin God pa ke oiya mwo puspus su enenu in oasr yurin sie met Kristian, oayepa akwuk puspus in ngun su orekla sin Jeova. Ke me lutlut toku, kut fwa tuni kais sie ip in me meun lun ngun inge. Ma inge ku in kasre kut in etu ke oiya fuka kut enenu in nukom me meun nukemwa lasr in ngun. Ke pal sepana inge, kut fwa liye la fuka me srikasrak mwolana lun Jisus Kraist el ku in kasre kut in lain Setan su Devil.
Kom E Topuk Fuka?
• Kain in meun fuka oasr yurin met Kristian nukemwa?
• Aketeye kutu inkanek kutasrik lal Setan.
• Fuka kasru lun met lili puspus ku in akkeye kut?
• Ke ku lun su kut enenu in tupan, a efu?
[Pictures on page 7]
Met Kristian elos ‘enenu in oru apurak lain ku lun un ngun fokfok’
[Picture on page 8]
Nunkula yok ke akwuk lun fwalu ku in kupowiye kas lun Togusrai
[Picture on page 9]
Met Kristian wiyesr elos ku in sropon “me akkeye”
[Picture on page 10]
Ya kom pre nu sin God siyuk ke ku?