Pre lun Leum Mea Kalmeyen Ma Inge nu Sum

PRE lun Leum, su Jisus el akkalemye ke Me Sramsram lal ke fwin Eol, oasr in Baibel in Mattu sapte 6, fus 9 nu ke 13. Efu ku Pre lun Leum simusyukla in Baibel? Ke inkanek lun me srikasrak inge, Jisus el luti kut ke inkanek fuka pre lasr ku in me akinsemwomwoye God. Ke pre inge, kut koneak pa me top puspus nu ke kutu kusensiyuk su oasr ke moul lasr. Ke ma inge lela kut in nunku yok ke kais sie ip ke Pre lun Leum.

Su Inen God?

“Papa tumasr in kosrao, em in akmutalyeyuk.” (Mattu 6:9) Kas in mutamwauk inge ke pre lun leum kasre kut in futoto nu sin God ke inkanek in pang lasr nu sel oana “Papa Tumasr.” In oana sie tulik, su futoto paye nu sin sie papa a nine su akkalemye lungse a kulang, paenang kut ku in sramsram nu sin Papa Tumasr in kosrao a lalalfongi la el lungse in long kut.

Jisus el luti kut in pre ke inkanek in akmutalye en God. Tusruktu su inen God? Baibel el topuk ke kas inge: “Kom mukena, su em pangpang Jeova, kom su Fulatlanu fwin fwlu nu fon.” (Sam 83:18) Ya kom rid tari in Baibel en Jeova?”

Paye pa, la inen God, Jeova, sikyuk in Baibel apkurun pal 7,000 in ma simusla in Baibel in pal meeta. Tusruktu, kutu sin met leng elos eisla e se inge liki version puspus lalos ke Baibel. Ke sripe se inge, arulana sumwos kut in pre nu sin Met Orekutla in akmutalye inel, ku oru ma inge in mutal. (Ezikiel 36:23) Sie inkanek in orekma fwal nu ke pre oinge pa in orekmakin en Jeova ke kut pre nu sin God.

Ma Lungse lun God in Orek fwin fwalu

“Togusrai lom in tuku. Ma lungse lom in orek, oana in kosrao, oinge fwin fwalu.” (Mattu 6:10) Fuka ip se Jisus el fwak ke pre lun leum inge fwa akpayeyuk? Met puspus elos nunku ke an kosrao oana sie an in misla. Ma simusla el akkalemye ke an in kosrao oana “niyen muta mutal a mwolena” lun Jeova.” (Isaia 63:15) Paenang kut pre ke lungse lun God in orek fwin fwalu “oana in kosrao”! Tusruktu ya ma inge fwa sikyuk na paye?

Daniel el sie met palu lun Jeova el palye: “God in kosrao fwa tulokunak sie togusrai su fwa tiana kunausyukla. Ku filiye mwal ka nu sin siepa mutanfwal. A a fwa musalsallu a kunausla togusrai inge nukemwa, a e fwa tu ma patpat.” (Daniel 2:44) Togusrai in kosrao inge, ku guferment, tia pat fwa akwuki in orala misla paye nu fwin fwalu nu fon ke inkanek in kolyuk mwomwo.​—2 Piter 3:13.

Pre a Me Enenu Lasr in Ikwe

Jisus el fwak akwuk nu ke pre lun leum, la me enenu yok se meet su oasr ke nunuk lasr ke kut pre pa ma puspus su kupasr nu ke en God a ke ma lungse lal. Tusruktu, me srikasrak mwo fwal pa nu ke pre ku in siyuk ke me enenu lasr sifwana in fwal nu ke lungse lun Jeova.

Ma se meet ke ma inge pa: “Kite kut len se inge ma kut mongo misenge.” (Mattu 6:11) Ma inge tia siyuk ke me kasrup. Jisus el kaifwe kut in pre ke “bread nesr pinanu len fwal nu ke ma enenu ke len se.” (Luk 11:3) In fwal nu ke Pre lun Leum, kut ku in pre wi lalalfongi la God el fwa kasru ke me enenu lasr len nukemwa kut fwin lungsel a aksol.

In nunku yok ke ma upa puspus ke me enenu in ikwe ku in oru kut in mwulkunla me enenu lasr in ngun a paenang in tia oru ma God el sapkin nu sesr. Tusruktu kut fwin oru alu lasr nu sin God in pa ma se meet ke moul lasr, kut ku in lalalfongi la me siyuk lasr ke me enenu nukemwa, oana me mongo a nuknuk, paye God el long. Jisus el fwak: “A komwos suk meet Togusrai lal a sumwosmwos lal [lun God], a ma inge nu kemwa fwa etukot pa nu sumwos.”​—Mattu 6:26-33.

Pre Lasr a Nunak munas

“Nunak munas nu sesr ke ma koluk lasr, oana kut nunak munas nu sin met su orek ma koluk.” (Mattu 6:12; Luk 11:4) Papa tumasr in kosrao el “akola in nunak munas” ke ma koluk lun met puspus su pang nu sel ke oiya lun auliyuk. In oana inkanek lun sowemol ku mise su ku in iyukla, Jeova God el ku in nunak munas ma koluk nukemwa lasr.

Tusruktu, Jisus el fwak ke me enenu su fwal in orek in eis nunukmunas lun God: In eis nunak munas lun God, kut enenu in nunukmunas nu sin met puspus. (Mattu 6:14, 15) Kut fwin nunak munas nu selos su oru ma koluk nu sesr, kut fwa akinsemwomwoye God a oasr pal mwo lasr in eis me insemwomwo ke pakoten lal.

In Pre Siyuk ke Kasru in Fwasr Tokin Inkanek Sumwos

“A tia kol kut in mel, a eiskutla liki ma koluk.” (Mattu 6:13) Jeova el tia som liki kut ke pal kut lain me srifwe ku oru kut in putatyung nu ke ma koluk. Kas lal el fwak: “Tu God el tia srifweyuk ke ma koluk a oayepa El tia srifwe kutena met.” (Jemes 1:13) God el lela tu kut in srifweyuk, tusruktu el ku in molikutla liki Met Srifwe Lulap​—“met koluk sa” su eteyuk oana Setan su Devil.

Inkanek lun fwalu oasr ye ku lal, Devil el ku in srifwekut in wi ke orekma puspus su God el tia insemwomwo ka. (1 Jon 5:19) Paenang yok sripe kut in forla nu sin God ke kasru pal nukemwa, yokna fwin kut sun sie me srifwe upa. A kut fwin alu nu sin Jeova fwal nu ke Kas lal, Baibel, el fwa molikutla ke el kasre kut in lain Devil. “God el oaru,” Baibel el fwak nu sesr, “a el fwa tia lela komwos in srifweyuk yok liki ku lomwos.”​—1 Korint 10:13.

Lalalfongi Ke God Yok Sripe

Sie me insemwomwo yok in etu la Papa Tumasr in kosrao el insemwomwo nu sin kais sie sesr! El orala akwuk lal tu mwen natul, Jisus Kraist, in luti kut ke oiyen pre. Paye ma inge oru kut in lungse in akinsemwomwoye Jeova. Fuka kut ku in oru oinge?

Oasr fwinsrak yok ke me luti ke Pre lun Leum in akloalye ku akyokye etauk lom nu ke kalmeyen ma inge. Ke inkanek in eis kutupa etauk kel Jeova a me sang lal nu “selos su sukol,” kom ku in akkeye lalalfongi lom nu sin God. Fwinsrak tu kom in lotela ma puspus ke God a ke akwuk lal tu kom in ku in engankin futoto paye lom nu sin Papa tumom in kosrao ma patpat​—Jon 17:3.