Lainul Setan, A El Fwa Kaengla!

Komwos akfulpapye komwos . . . nu sin God; a komwos in lain Devil a el fwa kaengla liki komwos.”​—JEMES 4:7.

1, 2. (a) Oiya fuka lun Devil akkalemyeyuk ke sie me akkalemye su simusyukla in Isaia sapta 14? (b) Kusensiyuk puspus fuka kut fwa aketeye?

DEVIL el sie me srikasrak koluk emeet ke oiyen insefulat. Oiyen insefulat lal akkalemyeyuk ke kas su simusyukla sin met palu Isaia. Pus liki yea 100 meet liki an Babulon ekla mutanfwal ku emeet fwin fwalu, met kulansap nukemwa lun Jeova elos akkalemyeyuk oana ma akkalemyeyuk ke kas inge in lain “togusra lun an Babulon”: “A kom fwak insiom, ‘Nga fwa utyuk nu in kosrao. A nga fwa akfulatye tron luk yetunyuk itu puspus lun God [togusra puspus ke sruf lal Devid] . . . Nga fwa sifwana ore yu oana El su Fulat liki nu kemwa.’” (Isaia 14:3, 4, 12-15; Oekyuk 24:17) Oiyen insefulat lun “togusra lun an Babulon” el oana sie nu ke oiya lal Setan, “god lun fwalu.” (2 Korint 4:4) Tusruktu insefulat lal Setan fwa sun safla upa, oana kolyuk lun togusra puspus lun an Babulon sun safla upa a oru me akmwekin nu selos.

² Tusruktu, ke Devil el srakna oasr, kut ku in nunku yok ke kusensiyuk puspus su oana: Ya kut enenu in sangeng sel Setan? Efu ku el akkeye met puspus in oru me kalyai nu sin met Kristian? Fuka kut ku in fwasr liki in tia akkolukyeyuk sin Devil?

Ya Kut Enenu in Sangeng sin Devil?

3, 4. Efu ku met Kristian akmusrala nukemwa a met nukemwa su welulos elos tia sangeng sin Devil?

³ Kas lun Jisus Kraist inge el sie me akkeye na paye nu sin met Kristian akmusrala: “Nik kom fosnga ke ma kom fwa keok ka. Liye! Devil el fwa sisla kutu sumwos nu in prison, tu lan srike komwos; a komwos fwa asor len siengoul. Kom in oaru nu ke mise, a Nga fwa sot nu sum tefuro lun moul.” (Fwakyuk 2:10) Met akmusrala nukemwa a met nukemwa su welulos su oasr fwinsrak in moul ma patpat fwin fwalu elos tia sangeng sin Devil. Pulakin lalos inge ke wangin sangeng tia ke sripen elos sifwana pulaik ke mutamwauk me. Ma inge sikyak meyen oasr sangeng mwomwo lalos nu sin God a elos ‘eis nien moul lalos ye lulin po soksok Lal.’​—Sam 34:9; 36:7.

⁴ Met tuma lutlut puspus lun Jisus Kraist su tia sangeng elos akpayeye oiyen oaru lalos nu ke mise fwinne elos sun me keok puspus. Elos tia fuleak ke sripen sangeng ke ma Setan el ku in oru, meyen elos etu la Jeova el fwa tiana som liki met nukemwa su akpayeye la elos oaru nu Sel. Ke inkanek oapana inge, fwinne elos sun me kalyai upa ke pal inge, met Kristian akmusrala nukemwa a met nukemwa su welulos su orala mwulela lalos elos srunga in kunausla oiyen oaru a paye lalos nu sin God. Tusruktu, met sap Poul el akkalemye la Devil el ku in oru in oasr mise sikyak. Ya ma inge oru kut in sangeng?

5. Mea kut ku in lotela ke Hibru 2:14, 15?

⁵ Poul el fwak la Jisus el ‘met ipeis in ikwe a sra’ tu “ke mise El fwa kunausla Devil, el su ku lun mise ma lal; a tu El fwa fulelosla nu kemwa su sruo ke sangeng lun mise pal e nu kemwa in moul lalos.” (Hibru 2:14, 15) Oana “el su ku lun mise ma lal,” Setan el akkolukyel Judas Iscariot a el orekmakin met kol puspus lun met Ju a met Rom in unilye Jisus. (Luk 22:3; Jon 13:26, 27) Tusruktu, ke inkanek in mise lal oana me kise, Jisus el aksukosokyela met koluk ku sesumwos nukemwa liki ku lun Setan a ma inge oru inkanek nu sesr tu kut in eis moul ma patpat.​—Jon 3:16.

6, 7. Lupa ka ku lun Setan in oru mise lun met puspus su kulansap nu sin God?

⁶ Lupa ka ku lun Devil in oru mise lun met puspus? Paye, ke mutaweyen orekma lun Setan in oru ma koluk, kas kikiap lal a kolyuk lal orala mise nu sin met puspus. Ma inge sikyak ke sripen Adam el oru ma koluk a ke ma inge el sang ma koluk a mise nu sin met nukemwa. (Rom 5:12) Sayen ma inge, met kulansap lun Setan fwin fwalu elos oru me kalyai nu sin met kulansap puspus lun Jeova, kutu pal orek nu selos ne ke na elos mise, oana ma elos oru ke elos unilye Jisus.

⁷ Tusruktu, kut tia enenu in nunku mu Devil el ku in oru mise lun kutena met su el lungse in uniye. God el karungin met nukemwa Lal a el fwa tiana lela Setan el an kunauselosla ke inkanek nukemwa nu sin met kulansap paye nukemwa lal fwin fwalu. (Rom 14:8) Paye la, Jeova el lela me kalyai in orek nu sin met kulansap nukemwa lal, a el lela kutu sesr in mise ke sripen orekma lal Setan in akkolukye kut. Ne oinge, ma Simusla el akkalemye ke fwinsrak mwolana ke sifwil moulyuk nu sin met nukemwa su oasr ke “buk in esmakin” lun God​—a wangin kutena ma su Devil el ku in oru in kosrala orekma in sifwil moulyuk inge!​—Malakai 3:16; Jon 5:28, 29; Orekma 24:15.

Efu ku Setan el Oru Me Kalyai Nu Sesr?

8. Efu ku Devil el oru me kalyai nu sin met kulansap nukemwa lun God?

⁸ Kut fwin met kulansap paye a oaru lun God, oasr sie sripe yok la efu ku Devil el oru me kalyai nu sesr. Niyen sun lal pa in oru kut in fuleak lulalfongi lasr. Oasr oiyen futoto mwomwo lasr nu sin Papa tumasr in kosrao, a Setan el lungse na paye in kunausla ma inge. Ma inge tia enenu in aklutye kut. In Eden, Jeova el palye tari la e fwa oasr lokwalok inmasrlon “mutan” sa a nu sin “serpent soko” a inmasrlon ‘fute’ lalos. (Genesis 3:14, 15) Ma Simusla el akkalemyel Devil oana “serpent matu” a akkalemye kel la pal lal arlana futotoeni in pal inge a mulat lun Devil arulanu upa. (Fwakyuk 12:9, 12) Ke orekma in lain inmasrlon ‘fute’ luo inge tia tui, paenang elos nukemwa su kulansapu Jeova elos ku in sun me kalyai. (2 Timote 3:12) Ya kom etu la sripe fuka Setan el oru me kalyai inge?

9, 10. Kusensiyuk fuka Devil el akkalemye, a fuka oiya lun metu kupasr nu ka?

⁹ Devil el akkalemye kusensiyuk ke sumwos in kol in kosrao a fwalu. In wekunang nu ke kusensiyuk inge, el kusensiyukkin pa ke oiyen sumwos a paye lun metu nu sin Met Oralosla. Setan el oru me kalyai nu sin met sumwos inge su pangpang Job. Efu el oru ma inge? In kunausla oiyen sumwos a paye lal Job nu sin Jeova. Mutan kiyel Job a “met akpar koluk” tolu lal elos oru ma lungse lal Setan in pal sa. In oana ma akkalemyeyuk ke buk lal Job, Devil el lain God, el fwak mu wangin met fwa sruokye oaru la nu Sel fwin God el lela Setan el an srife met san. Tusruktu Job el sruokye na oaru lal, paenang el akpayeye la Setan el kikiap. (Job 1:8–2:9; 16:2; 27:5; 31:6) Devil el oru me kalyai nu sin Met Lo lun Jeova nukemwa ke pal inge ke kaifweang lal in kunausla oiyen oaru a paye lalos a el lungse in akpayeye la ma el fwak inge paye.

¹⁰ In etu ke orekma lun Devil la efu ku el kalyai kut meyen el lungse na paye in kunausla oiyen oaru a paye lasr nu sin God fwa ku in kasre kut in pulaik a ku. (Duteronomi 31:6) God lasr el Fulatlanu in Kosrao a Fwalu, a el fwa kasre kut in sruokye oiyen oaru a paye lasr. Lela kut in suk pal nukemwa in oru insien Jeova in engan ke inkanek in sruokye oaru lasr pal nukemwa, sang me top nu sin met lokwalok sa, Setan su Devil.​—Soakas 27:11.

“Molikutla Liki Met Koluk Sa”

11. Mea kalmen me siyuk inge, “Tia kol kut in mel”?

¹¹ In sruokye oiyen oaru a paye el tia ma fusrasr se; orekma in sikalani in pre eneneyuk nu ka. Kas ke pre lun leum yok me kasru ka. Jisus el fwak: “A tia kol kut in mel, a molikutla liki met koluk sa.” (Mattu 6:13, NW) Jeova el tia srife kut in oru ma koluk. (Jemes 1:13) Tusruktu, kutupal Ma Simusla el sramsramkin la el oru ma puspus in sikyak, payeiya pa ke el lela in akpayeyuk ma inge in sikyak. (Rut 1:20, 21) Ke ma inge, in pre oana ma Jisus el akkalemye, kut enenu in siyuk sin Jeova in tia lela kut in putatla ke me srife. Paye la Jeova el long pre lasr, meyen el akkalemye nu sesr ke mwulela inge in ma Simusla: “God El oaru, su fwa tia liki komwos in srifweyuk yok liki ku lomwos; a in me srifwe El fwa oru inkanek in kaengla tu komwos in ku ka.”​—1 Korint 10:13.

12. Efu kut pre siyuk in: “Molikutla liki met koluk sa”?

¹² Tokin el sramsramkin me srife ke pre lun leum, Jisus el fwak: “Molikutla liki met koluk sa.” [New World Translation] Kutu leng lun Baibel el akkalemye: “Molikutla liki ma koluk” (King James Version; Baibel Mutal ke Kas Kosrae) ku “Karungin kut liki ma koluk.” (Contemporary English Version) Tusruktu ke ma Simusla, ke kas inge ‘molikutla liki’ el orekmakinyuk yok ke metu, a gospel lal Mattu el sramsramkin Devil oana “Met sruf,” sie met na paye. (Mattu 4:3, 11) Ke ma inge arulanu yok sripe in pre siyuk ke molela liki “met koluk sa,” Setan su Devil. El srike in kufwuskutla in oru ma koluk lain God. (1 Tessalonika 3:5) Ke kut siyuk ke pre in “Molikutla liki met koluk sa,” kut siyuk Papa tumasr in kosrao in kol a kasre kut tu kut in tia akkolukyeyuk sin Devil.

In Tia Akkolukyeyuk sin Devil

13, 14. Efu ku met Korint elos enenu in ekulla inkanek su elos akkalemye nu sin sie met ke congregation su oru orekma lun kosro?

¹³ Ke Poul el kaifwe met Kristian in an Korint elos in sang nunak munas, el simusla: “A kutena, su komwos nunak munas nu selos, nga ouyepa. Tu ma su nunak munas yuruk tari, nga fwin nunak munas ke sie ma, nga nunak munas keyumwos ye mutun Kraist; tu Setan lan tia akkolukye kut; tu kut etu oiyen nunkal.” (2 Korint 2:10, 11) Devil el ku in akkolukye kut ke inkanek puspus, tusruktu efu ku Poul el simusla kas inge su tufwana akkalemyeyuk?

¹⁴ Poul el sang kai nu sin met Korint meyen elos lela sie mokul kosro in wi orekma ke congregation a tia sisila. Oiya inge akinsemwomwoye Setan, meyen congregation el akkolukyeyuk ke elos lela “orekma lun kosro inge su tia sikyak inmasrlon met pegan.” Ke saflaiye, met orekma koluk sa el sisila. (1 Korint 5:1-5, 1113) Tok mokul se inge el auliyuk. Tusruktu fwin met Korint inge elos srunga in akkalemye nunak munas a srunga mokul se inge in sifwilpa wi ke congregation, Devil el fwa akkolukyelos ke inkanek saye. Ke inkanek fuka? Elos fwa orekmakin inkanek sulallel a wangin pakomuta lalos, oana Setan el sifwana oru. Fwin met inge su auliyuk el “fwa okomla ke asor lulap lal” a el fuleak in alu nu sin God ke inkanek nukemwa, met elder elos fwa eis meta ka ye mutun God su yoklana pakomuta lal, Jeova. (2 Korint 2:7; Jemes 2:13; 3:1) Aok, wangin met Kristian lungse in etawi Setan in akkalemye oiya sekulang, sulallel, a wangin pakomuta.

Karunginyuk ke Me Meun Nukemwa su Tuku sin God

15. Kut enenu in lain me akkoluk lun su, a kutangla lasr el fwal nu ke mea?

¹⁵ Kut fwin moliyukla liki Devil, kut enenu in lain me akkoluk lun u lun ngun fokfok. Kutangla lasr in lain u lun ngun fokfok inge el fwal nu ke orekma lasr in nukomang “me meun nukemwa lun God.” (Efesus 6:11-18) Wekunang me meun inge pa “me loeyuk in ium lun sumwosmwos.” (Efesus 6:14) Togusra Soul lun an Israel in pal meeta el seakos God a ngun mutal tula lukel. (1 Samuel 15:22, 23) Tusruktu kut fwin oru ma sumwosmwos a nukomang me meun nukemwa in ngun, kut fwa eis ngun mutal lun God a me karungin su eneneyuk in lain Setan a lipufon koluk nukemwa lal, ku dimon nukemwa.​—Soakas 18:10.

16. Fuka kut ku in eis me karungin ke pal nukemwa liki un ngun fokfok?

¹⁶ In oasr me karungin pal nukemwa liki u lun ngun fokfok, in wekunang pa ke ma puspus, kut enenu in rid a lutlutkin Kas lun God pal nukemwa, orekmakin mwo me rid nukemwa su orekla sin “met kulansap oaru.” (Luk 12:42) Ke ma inge kut fwa nekla nunak lasr ke ma mwomwo puspus, in fwal nu ke kas in kai lal Poul: “Ma tok, met lili, kutena ma su paye, kutena ma su sumwos, kutena ma su sumwosmwos, kutena ma su nasnas, kutena ma su mwo oiye, kutena ma su pengpeng mwo; fwin oasr kutena ma mwo, a fwin oasr kutena me kaksak, komwos in nunku ke ma inge.”​—Filippai 4:8.

17. Mea fwa kasre kut in sulkakin peng mwo ke inkanek mwo?

¹⁷ Jeova el sapkin kut in “fwalkeung niesr ke me ako lun mwosasu lun misla.” (Efesus 6:15) Orekma in wi pal nukemwa ke meeting kasre kut in sulkakin peng mwo lun Togusrai lun God. Oasr me insemwomwo yok kut pulakin ke kut kasru met puspus in lotela ma paye lun God a engankin oiyen sukosok in ngun! (Jon 8:32) “Kutlas lun ngun, su kas lun God,” el arulanu yok sripe in karungin kut sifwana liki me luti kikiap a in “sukela lulalfongi ku fasin ku.” (Efesus 6:17; 2 Korint 10:4, 5, NW) Orekmakinyen Kas lun God, Baibel ke inkanek ituftuf, kasre kut in luti ma paye nu sin met a karungin kut in tia akkolukyeyuk ke orekma kutasrik lun Devil.

18. Fuka kut ku in “tu ku in lain orekma kutasrik lun Devil”?

¹⁸ Poul el sramtauk me aketeye lal ke me meun in ngun lasr ke el fwak: “Komwos in ku in Leum, a in ku lun ku Lal. Komwos in nukomang me meun nu kemwa lun God, tu komwos in ku in tu [ku, NW] lain kutasrik lun Devil.” (Efesus 6:10, 11) Kas Grik su lungasyukla nu ke “tu ku” el sramsramkin ke oiyen orekma lun sie met meun ke el tia som liki an lal. Kut tu na ku ke meun in ngun, fwinne Setan el orekmakin orekma kutasrik puspus ke kaifweang lal in kunausla inse sefwanna lasr, in akkolukye me luti lasr, ku in kunausla oiyen oaru lasr nu sin God. Paye la, orekma koluk lun Devil el akkolukye kut tusruktu el tia kutangla ne ke pal inge​—a orekma lal fwa tiana kutangla!a

Lain Devil, a El Fwa Kaengla

19. Mea sie inkanek in akkalemye na paye la kut lainul Devil?

¹⁹ Kut ku in kutangla ke meun in ngun lasr in lainul Devil a un ngun fokfok ye koko lal. Wangin kutena sripe kut ku in rarrar ka in sangeng sin Setan, meyen met tuma lutlut Jemes el fwak: “Ke ma inge komwos in akfulpapye komwos nu sin God; a komwos in lain devil a el fwa kaengla liki komwos.” (Jemes 4:7) Sie inkanek in akkalemye na paye la kut lainul Setan a un ngun fokfok su welul pa in tia wi ku oru kutena orekma lun inutnut ku orekma lun magic a in tia asrouki nu sin kutena met su insemwomwokin in oru ma inge. Ma Simusla el akkalemye la met kulansap lun Jeova elos enenu in fwasr liki in orekmakin ku in eis kasru ke omens, ku ke astrology, susfwe, a orekma lun inutnut. Kut fwin kafofo pal nukemwa ke orekma nukemwa lun met Kristian a fukoko ke lulalfongi, kut tia enenu in sangeng fwin sie met el akkolukye kut ke inkanek lun susfwe ku orekma lun inutnut.​—Oekyuk 23:23; Duteronomi 18:10-12; Isaia 47:12-15; Orekma 19:18-20.

20. Fuka kut ku in lain Devil?

²⁰ Kut “lain Devil” ke kut orekmakin ke moul lasr masap sumwos a ma paye lun Baibel a ke kut tu ku in lainul. Fwal se inge el insese nu sel Setan meyen el pa god lun ma inge. (2 Korint 4:4) Ke ma inge kut pilesru ku srunga oiya su akkalemyeyuk sin met puspus lun fwalu, oana inse fulat, nunku kelos sifwana, orekma lun kosro, akmas, a lungse ke ma puspus. Kut etu la Devil el kaengla ke Jisus el lain orekma kutasrik lal Setan ke el orekmakin ma Simusla ke lusen pal su me srife orek yen mesis. (Mattu 4:4, 7, 10, 11) Ke inkanek oapana inge, Setan el fwa ‘kaengla liki kut’ meyen el lip fwin kut akpusiselye kut ke inkanek nukemwa ye mutun Jeova a fungfung nu Sel ke pre. (Efesus 6:18) Ke me kasru lun Jeova God a lun Wen kulo natul, wangin kutena met ku in oru ma upa nu sesr pal nukemwa​—wangin, fwinne Devil el tia ku in akkolukye kut pal nukemwa!​—Sam 91:9-11.

[Footnote]

Mea Me Top Lom?

• Ya kut enenu in sangeng sel Setan su Devil?

• Efu ku Setan el oru me kalyai nu sin met Kristian nukemwa?

• Efu ku kut pre tu kut in moliyukla liki “met koluk sa”?

• Fuka kut ku in kutangla ke meun in ngun?

[Petsa ke sra 8]

Met tuma lutlut lun Kraist su wangin sangeng in pal meeta elos akpayeye oiyen oaru lalos nu ke mise

[Petsa ke sra 9]

Devil el tia ku in kutongye sifwil moulyuk lun met puspus su oasr ke esmakin lun Jeova

[Petsa ke sra 10]

Ya kom pre in molikomla liki “met koluk sa”

[Petsa ke sra 11]

Ya kom nukomyang “me meun nukemwa lun God”