Moulkihn Moul Lom Fal nuh ke Puhruhe luhn Leum​—Ip Se Meet

“Em in ahkmuhtahlyeyuck.”—MATTHEW 6:9, BMK.

YAC KOM ESAM?

Meac kuht lotwelah ke pohloh kahs inge “Pahpah tuhmwacsr”?

Efuh kuh kuht enenuh in puhruhe ke inen God in ahkmuhtahlyeyuck?

Meac pac kuht enenuh in oruh sahyacn puhruhe ke ma luhngse luhn God in orek fin facluh? Ahkuhtweyac.

1. Kuht orekmakihn puhruhe se ma sihmlac in Matthew 6:9-13 inge fuhkah ke orekma in luti lasr uh?

PUHS mwet ma etuh kahs ke puhruhe se ma sihmlac ke Matthew 6:9-13 (BMK). Ke pacl se kuht oruh orekma in luti uh, kuht orekmakihn kahs ke puhruhe se inge in luti mwet uh lah Tohkohsrahi uh government na pwacye se sin God me. Tohkohsrahi se inge ac fah ahkwoyelah facluh nuh ke sie paradise. Kuht orekmakihn pac pohloh kahs inge, “em in ahkmuhtahlyeyuck” in ahkkahlwemye lah oasr inen God ac kuht enenuh in suhnakihn pac inel.​—Matthew 6:9, BMK.

2. Kuht etuh fuhkah lah Jesus el tiac luhngse kuht in kalweni na kahs lasr uh ke pacl nuhkewa ma kuht puhruhe?

² Yac Jesus el ke kuht in kalweni kahs ma el orekmakihn inge ke pacl nuhkewa ma kuht puhruhe, in oacna ke mwet pucspucs eltahl oruh? Moh. Jesus el fahk: “Ke kowos puhruhe, nimet orekmakihn [“kalweni,” NW] kahs pucspucs suc wacngihn kalmac.” (Matthew 6:7) Sie pac pacl ah, ke el luti mwet tuhma lutlut lal ah in puhruhe, el kalweni puhruhe se inge tuhsruhktuh kahs ma el orekmakihn ah tiac oacna sie. (Luke 11:1-4) Pwacnacng Jesus el oraclah mwe srihkasrak na wowo se ke puhruhe inge in luti kuht ke kain in ma kuht enenuh in puhruhe kac.

3. Kihsen siyuck fuhkah kom kuh in siyuck sum sifacna ke kom lutlutkihn mwe srihkasrak na wowo ke puhruhe se inge?

³ Ke mwe lutlut se inge ac mwe lutlut se tok uh, kuht ac fah lutlutkihn mwe srihkasrak na wowo ke puhruhe se inge. Ke kom oruh ma inge, siyuck sum sifacna, ‘Puhruhe se inge ac kahsreyuc fuhkah in ahkwoye puhruhe luhk uh? Ac yohk liki na, ‘Yac nga moulkihn moul luhk uh fal nuh ke puhruhe luhn Leum?’

“PAHPAH TUHMWACSR SUC INKUHSRAO”

4. Meac kahs inge “Pahpah tuhmwacsr” ahkacsmakihnye kuht kac, ac Jeova el Pahpah se tuhmwacsr ke inkacnek fuhkah?

⁴ Jesus el ikacslah puhruhe lal uh ac fahk, “Pahpah tuhmwacsr.” Ma inge ahkacsmakihnye kuht lah Jeova el Pahpah tuhmwacn mwet lili nuhkewa wiyacsr fin facluh nohfohn. (Sie Peter 2:17) Mwet ma suleyucklac sin Jeova in muhta inkuhsrao uh nuhtlac oacna wen nahtuhl, pwacnacng el Pahpah se tuhmwacltahl ke sie inkacnek na sacohk. (Rome 8:15-17) Mwet ma ac fah muhta fin facluh ma pahtpaht uh eltahl ac kuh pac in pahnglol “Pahpah.” Jeova el sang moul nuh seltahl ac ke srihpen luhngse lal, el sang pac mwe enenuh laltahl uh. Eltahl ac fah pahngpahng “tuhlihk nuhtin God” ke pacl se eltahl eklac suwohswohs ac ahkkahlwemye oaru laltahl nuh sin Jeova tukun mwe srihfe sahflah uh.​—Rome 8:21; Fwackyuk 20:7, 8.

5, 6. Meac mwe sang se ma wo emeet ma pahpah ac ninac uh kuh in sang nuh sin tuhlihk nahtuhltahl, ac meac kais sie tuhlihk enenuh in oruh ke mwe sang se inge? (Liye petsac se meet ke mwe lutlut inge.)

⁵ Pahpah ac ninac uh sang ma sacohk nuh sin tuhlihk nahtuhltahl uh ke pacl se eltahl kahsreltahl in kahlwem kac lah Jeova pa Pahpah tuhmwacltahl inkuhsrao ac ke eltahl lotweltahl in puhruhe nuh sel. Sie mwet ma fuhfahsryacsr nuh ke congregation pucspucs fin acn South Africa el fahk: “Muhtwacwack ke na lwen se ma tuhlihk muhtwacn nahtuhsr inge isuslac ah, nga weluhltahl puhruhe ke fong nuhkewa, sahyacn na pacl ma nga muhta loeslac liki lohm ah. Tuhlihk muhtwacn luo nahtuhsr inge kwacna fahk lah eltahl tiac esam kahs nuhkewa ke puhruhe lasr ah. Tuhsruhktuh eltahl esam ma eltahl puhla ke sacohkiyacn sramsram lasr nuh sin Pahpah tuhmwacsr, Jeova ac ke mislac ac karihngihnyuck wowo ma eltahl puhla ah. Ke pacl eltahl kuh, nga ahkkweyacltahl in lihksreni puhruhe nga in lohng ke eltahl fahkwack ma eltahl nuhnkuh ac puhla kacl Jeova uh. Pacl na wowo se pa inge in etuh lah meac oan ke insiacltahl. Na tohkoh nga kais kuhtuh na lotweltahl in orekmakihn kuhtuh ip ke puhruhe se inge tuh eltahl in oraclah sie pweluhng wo ke puhruhe laltahl uh in oasr kalmac.”

⁶ Tuhlihk muhtwacn nahtuhl inge tahfwelah na in fototo nuh sin Jeova finne eltahl mahtuhlah. Ke pacl inge, eltahl pahyuckyak ac orekmakihn inkaiyen pacl ac kuh laltahl wi mukul tuhmwacltahl uh in kuhlwacnsuhpuh Jeova. Mwe sang wo se emeet ma pahpah ac ninac uh kuh in sang nuh sin tuhlihk nahtuhltahl uh pa in kahsreltahl in ahkkapye fototo laltahl nuh sin Jeova. Tuhsruhktuh, kais sie tuhlihk enenuh in sifacna karihngihn fototo wo laltahl nuh sin Jeova uh.​—Psalm 5:11, 12; 91:14.

“EM IN AHKMUHTAHLYEYUCK”

7. Meac kuht arlacna engan kac, ac meac kuht enenuh in oruh?

⁷ Kuht arlacna engan in etuh ke inen God ac in ekihn “mwet lal” suc pahngonyuck ke inel. (Orekma 15:14; Isaiah 43:10) Kuht puhruhe, “Em in ahkmuhtahlyeyuck,” tuh in suhnakihnyuck ac ahkfuhlwactyeyuck inel. Kuht oacyacpac siyuck tuh Jeova elan kahsre kuht in tiac oruh kuh fahk kuhtwena ma ma ac ahkkulukye inel. Kuht enenuh in tiac oacna kuhtuh sin mwet in pacl meet ah suc tiac oruh ma eltahl luti nuh sin mwet sahyac uh in oruh. Paul el sihm nuh seltahl ac fahk: “Mwet in muhtuhnfacl sahyac elos kahskahs kuhpahtol ke En God, ke srihpowos.”​—Rome 2:21-24.

8, 9. Sang sie mwe puhpuhlyuck an nuh kac lah Jeova el kahsruh fuhkah mwet ma luhngse in ahkmuhtahlye inel.

⁸ Kuht sang kuhiyacsr kewa nuh ke ma nuhkewa kuht oruh in ahkmuhtahlye inen Jeova. Sie muhtwacn lili fin acn Norway ac tuhlihk mukul se nahtuhl suc yac luo eltahl muhkwelacna tukun mukul tuhmwacl ah misac, el fahk: “Pa inge sie puhlan pacl na upac ke moul luhk uh. Apkuhran in ao nuhkewa nga puhruhe in eis kuh tuh nga in tiac lwelah Satan elan ahkkulukyacl Jeova, ke srihpen sulaclah ma nga oraclah ma tiac wo kuh ke srihpen nga tiacna oaru. Nga ke ahkmuhtahlye inen Jeova, ac nga ke tuhlihk mukul se nuhtihk inge elan sifwil pac liye pahpah tuhmwacl ah ke Paradise.”​—Soakas 27:11.

⁹ Yac Jeova el tohpohklah puhruhe lal uh? Ahok. Ahkkweyeyuck el ke el wi mwet lili uh pacl nuhkewa. Tukun yac lihmekohsr el pahyuckyak sin sie mwet elder. Tuhlihk mukul se nahtuhl ah el ingena yac 20 ac el bacptaislac. El fahk: “Nga arlacna engan lah mukul tuhmuhk uh kahsreyuc in tuhfahllah.”

10. Jeova el ac ahkmuhtahlye inel fuhkah?

¹⁰ Jeova el ac fah ahkmuhtahlye inel na pwacye ke pacl se el ahkwacngihnyelah mwet ma ahkkulukye inel ac sruhnga elan oacna Mwet Kol laltahl. (Riti Ezekiel 38:22, 23.) Ke pacl sacn, mwet uh ac fah eklac suwohswohs, ac lipufacn nuhkewa wi mwet nuhkewa ac fah ahkmuhtahlye inen Jeova. Ac ke sahflahiyac uh, Pahpah na luhngse se tuhmwacsr inge el ac fah “Leum fin ma nuhkewa.”​—Sie Corinth 15:28.

“TOHKOHSRAHI LOM IN TUHKUH”

11, 12. Ke yac 1876, meac Jeova el sang kahsruh mwet lal uh in etuh kuh kahlwem kac?

¹¹ Meet liki na Jesus el ac fohlohkyak nuh inkuhsrao, mwet tuhma lutlut lal ah siyuck sel: “Leum, yac kom ac fohlohkuhnack tohkohsrahi luhn mwet Israel ke pacl se inge?” Jesus el tohpohkuhltahl muh soenna pacl laltahl in etuh lah ngac Tohkohsrahi luhn God uh ac fah muhtwacwack in kol. El fahk nuh sin mwet tuhma lutlut lal ah in lohacng nuh ke orekma na yohk srihpac se inge in luti mwet uh. (Riti Orekma 1:6-8.) Tuhsruhktuh, el oacyacpac lotweltahl in puhruhe ke Tohkohsrahi luhn God in tuhkuh ac in sano nuh ke pacl sacn. Pa inge srihpac pwacnacng kuht puhruhe siyuck ke Tohkohsrahi luhn God uh in tuhkuh.

¹² Ke apkuhranyang nuh ke pacl lal Jesus in kol inkuhsrao, Jeova el ac kahsruh mwet lal uh in etuh lah piyac kac yac se ma ma inge ac fah sikyak uh. Ke yac 1876, Charles Taze Russell el suhmuhslah sie mwe lutlut ke mwe rit se (“Gentile Times: When Do They End?”) ma ahkuhtweyac ke “lusen yac itkohsr.” Lusen pacl se inge ma ke kahs pahluh lal Daniel ah ac pa inge ma Jesus el sramsramkihn pac ke kahs pahluh lal ke el tuh fahk, “pacl lalos [mwet ma tiac kuhlwacnsuhpuh Jeova] sahflah.” Mwe lutlut sac ahkuhtweyac lah lusen pacl sac ac fah sahflah ke yac 1914.a (Liye footnote.)​—Daniel 4:16; Luke 21:24.

13. Meac sikyak ke yac 1914, ac meac ahkpwacyeye ma sikyak fin facluh ke yac se inge fahfahsruh nuh mihsenge?

¹³ Ke yac 1914 fin acn Europe, mweun uh muhtwacwack ac ke na kihtin pacl ah na ma inge fahsrelihk nuh fin facluh nohfohn. Ke srihpen mweun se inge, acn pucspucs eltahl sun sracl upac. Ac ke sahflah mweun uh ke yac 1918, sie mas na upac sikyak ac uniyac mwet pucspucs, suc tuh puhs liki na pihsen mwet ma misac ke mweun sac. Ma inge nuhkewa kuhpahsr nuh ke mwe akucl ma Jesus el fahk ah. Mwe akucl inge ahkpwacyeye lah ke yac 1914 Jesus el Tohkohsrahlac inkuhsrao. (Matthew 24:3-8; Luke 21:10, 11) Ke yac sac, el “kahsruhsr som, oacna sie mwet suc eis kuhtanglah ac el ac sifwil pac kuhtanglah.” (Fwackyuk 6:2) Jesus el sisuhllah Satan ac demon lal uh liki inkuhsrao ac sisuhltahllah nuh facluh. Tukun ma inge, kahs pahluh inge muhtwacwack in ahkpwacyeyuck: “We nuh sin facluh ac meoa; tuh Devil el oactuwot tari ac el arlacna kasrkuhsrak, mweyen el etuh lah fototo pacl luhlah lal.”​—Fwackyuk 12:7-12.

14. (a) Efuh kuh kuht srackna puhruhe siyuck ke Tohkohsrahi luhn God in tuhkuh? (b) Orekma yohk srihpac fuhkah se kuht enenuh in oruh ke pacl inge?

¹⁴ Kahs pahluh ke Fwackyuk sapta 12 inge kahsre kuht in kahlwem kac lah efuh kuh ma upac pucspucs inge muhtwacwack in sikyak fin facluh ke puhlan pacl se ma Jesus el ac eklac Tohkohsrah ke Tohkohsrahi luhn God. Jesus el finne kol inkuhsrao, Satan el srackna kol facluh. Tuhsruhktuh, ke pacl na sa ke Jesus el ac tuhkuh, el ac fah “sifwil pac kuhtanglah” ke el ac ahkwacngihnyelah ma kuluk nuhkewa fin facluh. Nwe ke pacl sacn, kuht in puhruhe pacl nuhkewa ke Tohkohsrahi luhn God in tuhkuh, ac kuht in kahfofo pacl nuhkewa in fahkwack ke Tohkohsrahi se inge. Orekma lasr uh ac fah ahkpwacyeye kahs pahluh lal Jesus inge: “Ac wosasuc inge luhn tohkohsrahi fah sulkackihnelihk fin facluh nohfohn tuh in ma loh nuh sin muhtuhnfacl nuhkewa; ac na sahflah ac fah tuhkuh.”​—Matthew 24:14, BMK.

“MA LUHNGSE LOM IN OREK . . . FIN FACLUH”

15, 16. Meac pac kuht enenuh in oruh sahyacn puhruhe ac siyuck ke ma luhngse luhn God in orek fin facluh? Ahkuhtweyac.

¹⁵ Apkuhran nuh ke yac 6,000 somlah, ma luhngse luhn God orek fin facluh. Pa inge srihpac pwacnacng Jeova el fahk muh ma nuhkewa ‘arlacna wo.’ (Genesis 1:31) Tohkoh, Satan el lain ac ke pacl sac fahsruh inkaiyen mwet uh tiacna oruh ma luhngse luhn God. Tuhsruhktuh mihsenge puhs liki million oalkosr sin mwet eltahl kuhlwacnsuhpuh Jeova. Eltahl puhruhe tuh ma luhngse luhn God in orek fin facluh, ac eltahl oacyacpac oruh ma luhngse luhn God. Eltahl moulkihn moul laltahl ke inkacnek ma ahkinsewowoye God ac moniyuck in luti mwet sahyac uh ke Tohkohsrahi lal.

¹⁶ Ke sie mwe puhpuhlyuck, oasr muhtwacn lili se suc yac 80, el bacptaislac ke yac 1948 ac el sie missionary fin acn Africa meet. Pa inge ma el fahk: “Nga kwacna puhruhe tuh mwet inse puhsisacl nuhkewa suc luhngse in lohng pweng wo uh in konweyuckyak ac kahsreyuck in etuh kacl Jeova meet liki pahtlac. Oacyacpac, ke nga ac sang ma loh nuh sin sie mwet, nga puhruhe ac siyuck ke lahlmwetmwet tuh nga in sun insiacn mwet uh. Ac ke sie mwet puhsisacl suc luhngse in lohng pweng wo uh konweyuckyak, nga puhruhe tuh Jeova elan ahkinsewowoye orekma in luti lasr uh ac in karuhnguhnuhltahl.” Muhtwacn lili se inge suc mahtuhoh tari el kahsruh mwet pucspucs in lutlut kacl Jeova. Sahp kom kuh in esam kuhtuh pac mwe srihkasrak wowo luhn mwet lili ma mahtuhoh tari suc srackna moniyuck in oruh ma luhngse luhn Jeova.​—Riti Philippi 2:17.

17. Meac puhlakihn lom ke ma Jeova el ac fah oruh nuh sin mwet ac nuh ke facluh ke pacl fahsruh uh?

¹⁷ Kuht ac tahfwelah na in puhruhe ke ma luhngse luhn Jeova in orek nuh ke pacl se el ac kuhnahoslah mwet lokoalok nuhkewa lal fin facluh. Na facluh ac fah sie paradise, ac billion pucspucs sin mwet ac fah ahkmoulyeyuckyak. Jesus el fahk lah “pacl se ac tuhkuh ke mwet misac nuhkewa fah lohng puhsracl, ac ilme liki kuclyuck lalos.” (John 5:28, 29) Srihke luhmahlah ke nuhnak lom luhpan engan yohk kom ac puhla ke pacl se kom paing mwet lom suc kom luhngse. Ahok, God ‘El ac fah elah sronin muhtahsr.’ (Fwackyuk 21:4) Inkaiyen mwet ma ac fah ahkmoulyeyuckyak uh eltahl “mwet sesuwohs,” suc tiacna lotelah ma pwacye kacl Jeova ac Jesus. Kuht ac engan in lotweltahl ke ma luhngse luhn God tuh eltahl in kuh in eis “moul ma pahtpaht.”​—Orekma 24:15; John 17:3.

18. Meac mwet uh enenuh na pwacye uh?

¹⁸ Ke pacl se Tohkohsrahi luhn God uh tuhkuh, ma inge ac fah ahkmuhtahlye inel. Lipufacn nuhkewa inkuhsrao ac mwet nuhkewa fin facluh ac fah inse sefanna in alu nuh sin Jeova. Ahok, God el ac fah sang nuh sin mwet uh ma eltahl enenuh na pwacye ac El fah ahkpwacyeye mwe siyuck tolu emeet ke Puhruhe luhn Leum uh. Ke mwe lutlut tohkoh, kuht ac fah lutlutkihn kuhtuh pac ma yohk srihpac ma Jesus el luti nuh sesr in siyuck ke puhruhe lasr uh.

[Sihm srihsrihk e ten]