“Oru Orekma Lun Sie Met Fwakak Lun Peng Mwo”
“A kom in efwal in ma nu kemwa, . . . oru orekma lun met fwakak.”—2 TIMOTE 4:5.
1. Kain in kunokon fuka Jisus el sang nu sin met kulansap puspus lal?
SULKAKINELIK fwin fwalu nu fon en Jeova a akwuk mwolanu lal. Ke sripen met kulansap lun God su mwolela moul lalos nu sel ke lungse paye in akos kunokon su Jisus el sapkin nu selos oana ke el fwak: “Komwos som . . . a oru met in mutanfwal nu kemwa tu elos in met tumuk lutlut, baptaiselosla in en Papa, a Mwen, a ngun mutal, luti nu selos in liaung ma nu kemwa Nga sapkin nu sumwos.”—Mattu 28:19, 20.
2. Timote su oana sie met liyeang el eis me kasru fuka, a mea sie inkanek nu sin Met Kristian puspus su oana met liyeang in oru orekma in luti lalos?
2 Met tuma lutlut nukemwa lun Jisus ke century se meet elos nunku yok ke kunokon lalos. Ke me pupulyuk, fwal nu ke kas lal Poul met sap su el kaifwe nu sin sie met Kristian overseer su pangpang Timote: “Oru orekma lun sie met fwakak, aksafye orekma in luti lom.” (2 Timote 4:5) Misenge, sie inkanek su met liaung oana overseer el ku in oru ke orekma in luti lal pa in moniyuk ke sulkakinyen peng mwo lun Togusrai, oana sie met orekma su wi pal nu kemwa ke orekma lun forfor. Ke me pupulyuk, met kol ke Lutlut lun Congregation Buk study oasr kunokon mwomwo lal in kol u lal ke orekma in luti a in sang akpa nu sin kutu pa met orekma. Poul el akpayeye kunokon inge nu sel sifwana in sulkakin peng mwo, a el sang kasru in akpaye kutu pa met ke orekma in luti.—Orekma 20:20; 1 Korint 9:16, 17.
Met Fwakak Puspus su Moniyuk in pal Somla
3, 4. Kain in experience puspus fuka Filip el sun oana sie met fwakak ke peng mwo?
3 Met Kristian puspus in pal meeta eteyukla elos oana met fwakak peng mwo su arlana moniyuk. Esam sie sin met fwakak inge su pangpang Filip. El sie sin “met itkosr su peng mwo . . . su tingtingi ke ngun a lalmetmet” su fwal in suleyukla in oru orekma in kite me mongo in ngun pinganu len nu sin mutan Kristian katinmas puspus lun met Grik a met Ju su muta fwin an Jerusalem. (Orekma 6:1-6) Tokin kunokon mwomwo inge orekla tari a me kolyai upa sikyuk su oru met tuma lutlut puspus in fwasrelik som nu in an puspis, a met sap puspus tia wi som, Filip el som nu Samaria. In an ingo el sulkakin peng mwo a ngun mutal akkeyel in sisla dimon puspus a akkeyela met ul a met mas matoltol puspus. Met Samaria puspus elos eis peng mwo lun Togusrai a elos baptaisla. Ke elos long ma inge, met sap puspus su muta in Jerusalem elos supwella met sap Piter a met sap Jon nu Samaria in akkeye met puspus su tufwana eis baptais lalos tu elos in eis ngun mutal.—Orekma 8:4-17.
4 Tokin ma inge ngun mutal el kolulla Filip nu yurin sie met Itiopia su met yunuk ke inkanek su som nu Gaza. Tokin me aketeye mwomwo lal Filip ke kas in palu lal Isaia, met inge su “leum a fulat yel Kandese kasra lun met Itiopia” el lalalfongi in Kraist a baptaisla. (Orekma 8:26-38) Tokin ma inge Filip el som nu Azotus a tuku nu Sesaria, “fwakak mwosasu in siti nu kemwa.” (Orekma 8:39, 40) El oakiya sie me srikasrak mwo nu ke orekma lun sie met fwakelik peng mwo!
5. Tulik mutan akosr natul Filip elos eteyukla ke orekma fuka?
5 Filip el srakna moniyuk ke orekma in luti in an Sesaria tokin yea 20 kutu. Ke pal se Poul a Luk elos muta in loom sel, oasr “tulik mutan akosr natul, mutan virgin, su palye.” (Orekma 21:8-10) Arlana kalem la elos eis akpa ke ma lun ngun ke inkanek mwo, oasr moniyuk lalos ke orekma in luti, a elos eis pa kunokon mwomwo in sramsramkin kas palu. Moniyuk lun papa a nina puspus ke orekma in luti ku in sang kasru mwomwo nu sin tulik mokul a mutan puspus in pal inge, su moklelos in moniyuk ke orekma in luti ke lusen moul lalos nu fon.
Met Fwakelik Peng Mwo Moniyuk in Pal Inge
6. Kain in me insemwomwo fuka met luti puspus ke peng mwo in century-se meet elos sun?
6 Arlana pengpeng kas palu lal su akkalemyeyuk ke akul puspus e sikyuk in len lasr a ke len safla, su Jisus Kraist el fwak: “A mwosasu fwa lutiyuk meet nu sin mutanfwal nu kemwa.” (Mark 13:10) Safla fwa tuku tokin mwosasu inge sulkakinyukelik “fwin fwalu nu fon.” (Mattu 24:14) Ke pal se Poul a kutupa met in century se meet elos sulkakinelik peng mwo, oasr met puspus selos su long elos ekla met lalalfongi, a congregation puspus oakiyuki in an puspus su on ye kolyuk lun Roman Empire nu fon. Met elder puspus su pakiyuki in oru kulansap lalos ke congregation puspus inge elos wi brother a sister puspus wiyelos in oru orekma in luti a in akyokyelik orekma in luti in an puspus. Kas lun God yokyokelik a fwasrelik in an puspus in len ingo, oana ma sikyuk in pal inge meyen million sin Met Lo lun Jeova elos oru orekma lun met fwakelik peng mwo. (Orekma 19:20) Ya kom sie sin met puspus inge su sang kaksak nu sin Jeova God?
7. Mea met fwakak puspus lun Togusrai elos oru ke pal inge?
7 Pus sin met su sulkakin peng mwo lun Togusrai ke pal inge elos kaifweang na paye in akyokye pal lalos in wi ke orekma in luti. Tausen puspus selos sroang nu ke orekma lun missionary, foko foko tausen wi ke orekma in luti pal nu kemwa oana regular a auxillary pioneer. A pa inge sie orekma mwomwo nu sin mokul, mutan, a tulik puspus in kafofo ke orekma lun Togusrai! Paye, met kulansap nu kemwa lun Jeova elos engunkin me insemwomwo puspus ke elos kulansupal ke inse sefwunna oana met Kristian su oru orekma lun met fwakelik peng mwo.—Zefenia 3:9.
8. Orekma in sang akul fuka orek in pal inge, a su oru?
8 God el sang nu sin met kulansap akmusrala nukemwa lun Jisus sie kunokon in sulkakin peng mwo fwin fwalu nufon. “Sip ngie” lun Kraist su piselos yokyokelik sang kasru yok nu selos in oru orekma in luti inge. (Jon 10:16) In oana kas palu, orekma se inge me molela moul lun met su ku in pupulyukinyuk nu ke orekma in sang akul nu fwin mutonsron met nukemwa su mongi a su tung ke me srungeyuk nukemwa su sikyuk in pal inge. Pal futoto apkuran, ke met koluk nukemwa e fwa kunausyukla. Ke pal inge, oasr sie kunokon mwomwo in luti ma paye su me molela moul nu sin met nukemwa fwin fwalu!—Ezikiel 9:4-6, 11.
9. Ke inkanek fuka met orekma sasu ku in kasreyuk ke orekma lun forfor lalos?
9 Kut fwin wi orekma in luti ke lusen pal loeloes, kut ku in sang me kasru mwomwo nu sin met orekma sasu ke congegation. Kutu pal, kut ku in siyuk sin met orekma sasu inge in wi kut ke orekma lun forfor. Nu selos su kulansap oana met elder e mwo elos in oakiye me srikasrak mwomwo in oiya nukemwa in sang akkeye met nukemwa su wi ke lalalfongi. Kaifweung mwo lun met liaung ke inkanek pusisel ku in sang me kasru mwo nu sin kutu pa met tu elos in ekla moniyuk a in oswela fwako mwo oana met fwakak peng mwo.—2 Piter 1:5-8.
Sang Ma Lo ke Loom nu ke Loom
10. Kraist a met tuma lutlut puspus lal in pal meet elos akkalemye me srikasrak fuka ke orekma in luti peng mwo?
10 Jisus Kraist el akkalemye me srikasrak mwomwo oana sie met fwakak peng mwo. In sramsramkin orekma in luti lun Kraist a lun met sap puspus lal, Kas lun God el akkalemye: “El fwasr sasla in siti lulap a siti srisrik, luti a fwakak mwosasu lun togusrai lun God. A met siengoul luo oelul.” (Luk 8:1) Mea met sap siengoul luo elos oru? Tokin ngun mutal putati nu fwelos in len in Pentecost lun 33 C.E., “len nukemwa in tempel a yen selos elos tia tari in luti a fwakulak Jisus tu el Kraist.”—Orekma 5:42.
11. Fwal nu ke Orekma 20:20, 21, mea Poul el oru ke orekma in luti lal?
11 Ke sripen moniyuk lal ke orekma in luti, met sap Poul el fwakak nu sin met Kristian puspus su oana met elder in Efesus: “Fuka Nga tia srungesr in fwakak kutena ma mwo nu sumwos a Nga luti nu sumwos lemtalaik a liki sie loom nu ke sie loom.” Ke pal se Poul el ‘luti liki sie loom nu ke sie loom,’ ya el oru muteta lal nu yurin met lili wiyel su lalalfongi pa Jeova, oru shepherding ku akkeye met puspus su lalalfongi? Mo, meyen el tafwela in aketeye: “A Nga fwakak nu sin met Ju a met Grik ke auliyuk nu sin God a lalafongi nu sin Jisus Kraist Leum lasr.” (Orekma 20:20, 21) Ke ma inge, met puspus su mwolela tari moul lalos nu sin Jeova tia enenu in sifwilpa lutiyuk ke oiyen “auliyuk nu sin God a lalalfongi nu sin Leum Jisus.” Poul el sang akpa nu sin met Kristian elder puspus in an Efesus ke orekma in luti ke sie loom nu ke sie loom a el luti met selalalfongi ke oiyen auliyuk a lalalfongi. In oru oinge, Poul el etawi inkanek su Jisus el sapkin.
12, 13. In fwal nu ke Filippai 1:7, mea met kulansap puspus lun Jeova elos oru ke sumwos lalos in luti?
12 Orekma in luti ke sie loom nu ke sie loom ku in paenang ma upa. Ke me pupulyuk, kutu metu elos ku in mulat kut fwin som nu in loom selos in luti ke peng mwo lun Baibel. Tia lungse lasr in oru metu in mulat. Tusruktu, orekma in luti ke sie loom nu ke sie loom oasr sapkinya in ma Simusla, a in lungse God a met tulan su mokle kut in sang ma lo ke inkanek inge. (Mark 12:18-31) In ‘kasru a oakiye ke ma sap’ sumwos lasr in luti ke sie loom nu ke sie loom, kut akkalemye tari ke cases puspus lasr ke court in an puspus, wekunang Supreme Court lun an Merika. (Filippai 1:7) Apkuran in pal nukemwa court inge orala sulela lalos in wi kut ke orekma lasr. Pa inge kutu akwuk su court sulela.
13 “Orekma in kitelik me rid lun alu su pangpang tracts pa sie inkanek in orekma in luti—su orekmakinyuk tari in pal meeta a akwuk inge mutamwauk ke pal se printing presses ku engine in orek buk orekla in pal meeta. Pa inge inkanek fokoko su alu puspus elos orekmakin in yea puspus somla. Inkanek in orekma in luti inge orekmakinyuk pa in pal inge ke alu puspus yok na nu sin met kulansap nu yen puspus oana colporteur su us Gospel nu ke tausen pal tausen puspus lun loom a in suk inkanek in akyokye lalalfongi lalos. . . . Kain in akwuk in orekma lun alu inge yok akfulatyeya fwal nu ke ‘Amendment Se-meet’ [ke Constitution lun an Merika] in oana karunginyeyen orekma in alu ke loom alu a ke orekma in luti su orek in loom alu.”—Murdock v. Pennsylvania, 1943.
Efu Ku Orekma In Luti Enenu in Orek Pal nu Kemwa?
14. Kain in fwako mwo fuka ku in liyeyuk yokyokelik ke orekma in luti lasr?
14 Oasr sripe mwo puspus in sang ma lo ke sie loom nu ke sie loom. Pal nukemwa kut som nu yurin met in loomu, kut srike in aketeye ke ma paye lun ma Simusla. In oru return visits, kut lungse in akyokye etauk lun ma paye inge. Kais kutu srisrik ma inge ku in sang kasru nu sin met in loomu in akyokye lalalfongi lalos, oana Poul el simusla: “Nga eokiye, Apollus el aksroksrokye, a God el akkapye.” (1 Korint 3:6) Paeneng lela kut in ‘eokiye a aksrosrokye,’ lalalfongi la Jeova “el fwa akkapye ma inge.’
15, 16. Efu ku kut som ke pal puspus nu in loom sin metu?
15 Kut oru orekma lun met fwakak peng mwo ke sripen moul puspus oasr ke me sensen. Ke inkanek lun orekma in luti kut ku in molikutla sifwana a elos su long kut. (1 Timote 4:16) Kut fwin etu la moul lun sie met oasr ke me sensen, ya kut kasrel ke pal sefwanna? Lela in tia oinge! Ke sripen molela lun moul lal oasr in me sensen, paeneng kut lungse in som nu in loom sin met puspus pal nukemwa. Luma a ma sikyuk ekyek pal nu kemwa. Sie met saap el kofla long ke sripen el kafofo ke pal se meet tusruktu tok saap el ku in lungse long. Saap met sayen sou lal ku in ikasla srungal, su ma inge ku in kol nu ke sie me sramsram mwomwo ke ma simusla.
16 Tia luma a ma sikyuk mukena ekyek a ella ku oiya lun met in loomu ku in ekla pa. Ke me pupulyuk, mise lun sie met su el lungse na paye ku in mokle met inge in long ke peng mwo lun togusrai. Kut fwinsrak in akkeye met inge, kasrel in nunku ke ma enenu lun ngun, a akkalemye fuka ma inge ku in insemwomwo.—Mattu:3, 4.
17. Mea sripe se ma yok emeet ke orekma in forfor lasr?
17 Sripe se ma yok emeet ke orekma in luti ke peng mwo ke sie loom nu ke sie loom ku in ikasla kutu pa inkanek ke orekma in luti lun met Kristian in oru en Jeova in eteyuk fwin fwalu nu fon. (Exodus 9:16; Sam 83:18) Sie me insemwomwo yok fwin orekma in luti lasr ke peng mwo kasru met puspus su lungse ma paye a ma sumwosmwos in ekla met sang kaksak nu sin Jeova! “Mokul fwusr a mutun fwusr, met matou a tulik,” onkin on lun met on in sam. “Lela elos in kaksakin en Jeova, tu el mukena akfulatyeyuk. Mwolena lal on yetun fwalu a kosrao.”—Sam 148:12, 13.
Orekma in Luti Peng mwo Akinsemwomwoye Kut Sifwana
18. Fuka kut akinsemwomwoyeyuk ke kut oru orekma in luti lun peng mwo lasr?
18 In oru orekma lun met luti ke peng mwo me akinsemwomwoye kut sifwana ke inkanek puspus. In som nu ke sie loom nu ke sie loom in luti ke peng mwo ku in kasre kut in orekmakin inse pusisel, yokna fwin met in loomu tia eis kut ke inkanek kulang. In ekla sie met luti mwomwo, kut enenu in etawi Poul, su ‘ekla ma nukemwa nu sin met nukemwa tu elan molela kutu.’ (1 Korint 9:19-23) Experience lasr ke orekma lun forfor ku in kasre kut in sang me top mwomwo ke inkanek mwo. In sulela kas fwal a in lalalfongi Jeova, kut ku in orekmakin me kai lal Poul: “Lela kas lomwos in kulang pal e nukemwa, solela ke sol, tu komwos fwa ku in etu fuka fwal in topuk nu sin kais sie met.”—Kolosse 4:6.
19. Fuka met fwakak puspus lun peng mwo kasreyuk sin ngun mutal?
19 Orekma in luti ke peng mwo enenu kut in siyuk kasru ke ngun mutal lun God. (Zekaraia 4:6) Fwako mwo lun ma inge—“lungse, engun, misla, mongfusresr, kulang, inse mwo, oaru, fwokpap, sifwana leum fwom”—ku in liyeyuk ke orekma lun forfor lasr. (Galetia 5:22, 23) Su kasre kut in akkalemye oiya mwo nu sin met puspus, paenang in akos kolyuk lun ngun mutal kut ku in akkalemye lungse, engun a misla, in mongfusresr a kulang, in akkalemye insemwomwo a lalalfongi, a in akkalemye pa fwokpap a sifwana leum fwom ke kut sulkakin peng mwo.
20, 21. Kut fwin kafofo in oru orekma in luti oana met fwakak mea kut eis in me insemwomwo a ma lane fuka kut e fwa pulakin?
20 Siepa me insemwomwo su kut ku in pulakin oana sie met fwakak peng mwo pa kut in ekla oana sie met su ku in pulakin pa ma upa lun kutu met.(Sympathetic) Ke pal se metu srumon ma upa puspus lalos—oana mas, wangin orekma, me srifwe puspus su pulakinyuk ke sou—lela kut in tia ore kut oana sie met su sang kai nu selos, a kut in akkalemye nu selos ke ma simusla puspus su ku in akkeyelos a akpwaryelos. Lela kut in akkalemye pakoten na paye nu sin met su wanginla moul in ngun yuro tusruktu oasr lungse lalos nu ke ma sumwosmwos. (2 Korint 4:4) A pa inge me insemwomwo in sang me kasru in ngun nu selos su “pakiyuki nu ke moul ma patpat”!—Orekma 13:48.
21 In wi pal nukemwa ke orekma in luti lun peng mwo ku in kasre kut in nunku pal nukemwa ke ma puspus lun ngun. (Luk 11:34) Oiya inge ku in orala ma lane yok, tusruktu kut fwin tia oru oinge saap kut ku in srifweyuk in suk me kasrup puspus su pengpeng fwin fwalu. Met sap Jon el kaifwe nu sin met Kristian nu kemwa: “Komwos in tia lungse fwalu ku ma su on in fwalu. Kutena met fwin lungse fwalu, lungse lun God tia on in el; tu ma nukemwa su on in fwalu—lung lun ikwe, a lung lun muta a mwolanu lusrongten lun moul—tia ma sin Papa me, a ma sin fwalu me. A fwalu wanginla, a lung koluk la, a el su oru ma lungse lun God fwa muta ma patpat.” (1 Jon 2:15-17) In kafofo pal nukemwa oana met fwakak ke peng mwo su oru orekma puspus ke orekma lun Leum kasre kut in tia lungse fwalu.—1 Korint 15:58.
Elosak Ma Saok in Kosrao
22, 23. (a) Kain in ma saok fuka mwo nu sin met Kristian puspus in elosak oana met luti? (b) Fuka me lutlut toko’u ku in kasru kut?
22 Orekma in luti ke peng mwo lun Togusrai ke inkanek moniyuk ku in orala me insemwomwo puspus. Jisus el akkalemye ma inge ke el fwak: “Nik komwos elosak ma saok nu sumwos fwin fwalu, yen mwotil a ras kangla, a yen met pusrapasr kunauselik a pusre. A elosak ma saok nu sumwos in kosrao, yen mwotil a ras tia kangla, a yen met pusrapasr tia kunauselik a pusre. Tu yen ma saok lomwos on we, insiomwos pa on we pa.”—Mattu 6:19-21.
23 Lela kut nukemwa in elosak ma saok puspus in kosrao, ke sripen kut etu la wangin kutena kain in kunokon saye yok liki kunokon inge in kulansap nu sin Leum Jeova su fulat liki nukemwa oana Met Lo lal. (Isaia 43:10-12) Ke kut oru kunokon lasr oana met kulansap lun God, kut ku in pula pa oana pulakin lun sie mutan Kristian su matwel oasr ke yea 90 kutu su fwak ma inge ke orekma in kulansap lal nu sin God ke lusen moul lal: “Ke ma nukemwa Nga ku in sang kulo nu sin Jeova ke el akkalemye mongfusresr lal nu sik in yea puspus somla, a Nga pre ke inse kemwa luk a siyuk tu el fwa Papa tumuk ma patpat.” Kut fwin aksaokye pa futoto lasr nu sin God, kut akpayeye lungse lasr in oru orekma lun met luti ke peng mwo ke inkanek nukemwa. Me lutlut tokou fwa kasre kut in liye la mea kut ku in oru ke orekma in luti lasr ke inkanek nukemwa.
Kom e topuk fuka?
• Efu kut enenu in oru orekma lun met fwakak ke peng mwo?
• Mea kom ku in fwak ke orekma in luti peng mwo in pal somla a in pal inge?
• Efu ku kut sang ma lo ke sie loom nu ke sie loom?
• Fuka kom ku in eis ma lane ke orekma in luti lun met fwakak peng mwo?
[Pictures on page 18]
Met fwakak lun peng mwo oana Filip a tulik mutan akosr natul wekunang pa met puspus su insemwomwo in oru orekma in luti lalos oana elos in pal inge
[Picture on page 22]
Fuka kom sifwana akinsemwomwoyeyuk ke kom fwakak peng mwo nu sin kutu pa met?