Me Insemwomwo Puspis Su Tuku Ke Peng Mwo
“Jeova el mosweyula tu Nga in fwakak kas mwo nu sin met fulpap. El supeyula tu Nga in pela met su musalla inse, . . . in akpwaryelos nu kemwa su asor.”—ISAIA 61:1, 2.
1, 2. (a) Mea Jisus el akkalemye ke ma el enenu in oru, a fuka? (b) Kain in me insemwomwo fuka tuku ke peng mwo su Jisus el sulkakin?
KE SIE len in Sabat ke mutamweyen orekma lun forfor lal, Jisus el oasr ke imwen lolngok in an Nazarit. Fwal nu ke ma simusla su fwak, “elos sang nu sel buk lal Isaia, a el ikasla buk sa, a konoiyuk yen el simusla we: ‘Ngun lun Jeova on fwuk, tu el mosweyula in luti mwosasu.’ ” Jisus el tafwela in rid kas palu inge. Tokin ma inge el muta a fwak: “Misinge kas in ma simusla inge akpayeyuk in sremwos.”—Luk 4:16-21.
2 Ke inkanek inge, Jisus el akkalemyel sifwanu la el pa met luti ke kas palu, met sulkakin peng mwo a met wis me insemwomwo. (Mattu 4:23) A kain in peng mwo su Jisus el sulkakin arulanu mwo! El fwak nu sin met su longol: “Nga kalem lun fwalu. El su fwasr tukuk fwa tia fwasr in losu, a kalem lun moul fwa on yurol.” (Jon 8:12) El ouyepa fwak: “Komwos fwin muta na in kas luk, na komwos met tumuk lutlut paye, a komwos fwa etu ma paye, a ma paye fwa aksukosokye komwos.” (Jon 8:31, 32) Oasr yurol Jisus “kas lun moul ma patpat.” (Jon 6:68, 69) Kalem, moul, sukosok—paye me insemwomwo puspis pa inge su enenu in aksaokyeyuk!
3. Kain in peng mwo fuka met tuma lutlut lal Jisus elos luti?
3 Tokin Pentecost 33 C.E., met tuma lutlut elos tafwela na orekma in luti lun Jisus. Elos luti ke “peng mwo lun togusrai” nu sin met Israel a nu sin met in mutanfwal nu kemwa. (Mattu 24:14; Orekma 15:7; Rom 1:16) Elos nu kemwa su akos elos mutamwauk in etu ke Jeova God. Elos aksukosokyeyukla liki kos lun alu a elos ekla ipen mutanfwal sasu in ngun, “Israel lun God,” su met nu kemwa wi ka oasr fwinsrak lalos in kol in kosrao yurin Leum lalos Jisus Kraist. (Galetia 5:1; 6:16; Efesus 3:5-7; Kolosse 1:4, 5; Fwakyuk 22:5) Me insemwomwo yok na paye pa inge!
Orekma in Luti ke Pal Inge
4. Ke inkanek fuka kunokon in luti ke peng mwo akpayeye ke pal inge?
4 Ke len inge, met Kristian akmusrala, elos kasreyuk ke “u lulap” lun “sip ngie” su yokyokelik, elos tafwela in akpayeye kunokon lun kas palu su etukyung nu sel Jisus meet. (Fwakyuk 7:9; Jon 10:16) Fwokin ma inge pa, peng mwo se inge lutiyuk ke sie inkanek yok su sonna liyeyuk ke mutamwauk me. In an a territory 235, Met Lo lun Jeova elos som nu we “in fwakak kas mwo nu sin met fulpap . . . , in pela met su musalla inse, in fwakak sukosok nu sin met kos, a ikasla prison nu selos su kapuri; in fwakak yiu in oi lun Jeova, a len in foloksak lun God lasr; in akpwaryelos nu kemwa su asor.” (Isaia 61:1, 2) Ke ma inge, orekma in luti lun met Kristian fwa tutafla in sang me insemwomwo nu sin met puspis a sang me insemwomwo paye nu sin met nu kemwa “su muta in kutena keok.”—2 Korint 1:3, 4.
5. Fwin ke orekma in luti ke peng mwo, ke inkanek fuka Met Lo lun Jeova elos siena liki alu puspis lun Kristendom?
5 Paye, alu puspis lun Kristendom elos sponsor nu ke kain in orekma in luti puspis. Pus selos supwela missionary lalos nu in an puspis in oru kutu met in forla. Ke sie me pupulyuk, The Orthodox Christian Mission Center Magazine el orala report ke orekma lun Orthodox missionary in an Madagascar, southern Africa, Tanzania, a Zimbabwe. Tusruktu, ke alu lun Orthodox, oupanu kutu alu lun Kristendom, pus sin met lalos tia wi ke orekma inge. Tia oanu ma inge, su Met Lo lun Jeova nu kemwa elos kaifweung in oru ke orekma in luti. Elos akilen la orekma in sulkakin peng mwo pa sie me akpayeye nu ke lalalfongi paye lalos. Poul el fwak: “Tu ke inse sie met el lalalfongi nu ke sumwosmwos, a ke oalu el fwakak nu ke moul.” Kain in lalalfongi su tia mokle sie met in oru orekma, mise.—Rom 10:10; Jemes 2:17.
Peng Mwo Su Wise Me Insemwomwo Ma Patpat
6. Kain in peng mwo fuka lutiyuk ke pal inge?
6 Met Lo lun Jeova elos luti ke peng mwo su mwo emeet. Elos ikasla Baibel nutulos a akkalemye nu sin met su insemwomwo in lutlut la moul lal Jisus el kisekinla in ikasla nu sin met in tuku nu yurin God, in siyuk nunuk munas ke ma koluk, a in oasr fwinsrak nu ke moul ma patpat. (Jon 3:16; 2 Korint 5:18, 19) Elos sulkakin la Togusrai lun God oakiyuki tari in kosrao ye koko lun Togusra Jisus Kraist su akmusrala tari, a kitin pal lula el fwa kunausla ma koluk nu kemwa fwin fwalu a sifwil oakiye Paredais. (Fwakyuk 11:15; 21:3, 4) In akpayeye kas palu lal Isaia, elos akkalemye nu sin met tulan lalos la pa inge “yiu in oi lun Jeova” su srakna oasr pal mwo lun met nu kemwa in lutlut ke peng mwo. Elos ouyepa sang kas in sensen la e tia pat “len in foloksak lun God lasr” fwa tuku, ke pal se su Jeova el fwa kunausla met koluk nu kemwa su srunga in auliyuk.—Sam 37:9-11.
7. Kain in experience fuka akkalemye inse siefwunnu lun Met Lo lun Jeova, a efu elos engunkin kain in inse siefwunnu inge?
7 Nu ke sie fwal su nenela ke ongoiye a me keok, peng mwo siefwunnu inge pa ku in wise ma lane ma patpat. Elos nu kemwa su lalalfongi ma inge elos ekla in wi un met lili Kristian fwin fwalu nu fon su inse siefwunnu a tia lela mutanfwal selos, sruf lalos, ku me kasrup lalos in sreluloselik. Elos ‘nukomang lungse, su me kapur lun sumwosna.’ (Kolosse 3:14; Jon 15:12) Ma inge ku in liyeyuk ke sie an fwin an Africa ke yiu taria. Oasr sie lututeng su capital city lun an inge sun me fosrnga yok ke pusren likisrik. Oasr sie coup d’état ku sie un met elos srike in eisla an inge. Ke pal se sikyuk ma inge, oasr sie sou lun Met Lo akkolukyeyuk ke sripen elos lela kutu Met Lo in sruf saye in muta in loom selos. Sou se inge fwak: “Kut lela Met Lo lun Jeova in muta in loom sesr.” Nu selos, tia sruf lun sie met pa yok; a lungse lun met Kristian pa yok—in kasrelos su oasr enenu. Sie sou su tia Met Lo el fwak: “Met puspis ke alu nu kemwa elos lungse in tukakunak met su wi ke lalalfongi lalos sifwanu. Met Lo lun Jeova mukena pa tia oru ou inge.” Oasr pa ma puspis sikyuk in an puspis su akkolukyeyuk ke sripen meun su akkalemye la Met Lo lun Jeova elos orekmakin “lungse met lili” na paye.”—1 Piter 2:17.
Peng Mwo El Ekulla Met
8, 9. (a) Kain in ekla fuka met nu kemwa su eis peng mwo elos oru? (b) Kain in me pupulyuk puspis fuka akkalemye ku lun peng mwo?
8 Peng mwo el orekmakinyuk fwal nu ke ma Poul el fwak ke pangpang “moul se inge a ke moul se su e fwa tuku.” (1 Timote 4:8) Ma inge tia orala me fwinsrak mwo se na nu ke pal fwasru, a el ouyepa sang me kasru yok nu ke “moul ke pal inge.” Kais sie, Met Lo lun Jeova elos sang Kas lun God, Baibel, in kol moul lalos, elos akfwalye moul lalos nu ke ma lungse lun God. (Sam 119:101) Oiye lalos aksasuyeyukla ke pal se elos ekulla moul lalos nu ke oiye mwo fwal nu ke moul sumwosmwos a oaru.—Efesus 4:24.
9 Loang akmwoye nu ke me srikasrak lal Franco. Oasr ma upa nu sel pa ke mulat. Fwin oasr kutena ma sikyuk su el nunku mu tia sumwos, na el a arulanu kosrkosrok a kunausla kain in ma puspis. Mutan kiel mutamwauk in lutlut ke Baibel yurin Met Lo lun Jeova, a ke me srikasrak lun moul in Kristian lalos paenang Franco el liye a akilen la el enenu in ekla. Na el mutamwauk in lutlut Baibel yurolos a ke saflaiye el ku in akkalemye fwako lun ngun mutal ke misla a sifwanu leumi. (Galetia 5:22, 23) El sie sin met 492 su baptaisla in an Belgium ke yiu 2001 ke yiu lun orekma. Loang akmwoye pa, nu kel Alejandro. Sie mokul fwusr su lungse na paye in orekmakin ono koluk paenang ke saflaiye el som muta ke nien sisi kutkut a srike in suk kutena ma su el ku in koneak in kukakinyukla elan ku in moli ono koluk su el orekmakin. Ke pal se el yiu 22 matwe, oasr Met Lo lun Jeova siyuk sel Alejandro in lutlut ke Baibel, a el insese nu ka. El mutamwauk in rid Baibel len nu kemwa a wi meeting nu kemwa lun met Kristian. El sa na in aknasnasye moul lal, paenang ke lusen malem limekosr kutu, el ku in wi ke orekma lun forfor—el sie sin 10,115 met su oru ou inge ke yiu tari’a in an Panama.
Peng Mwo—Sie Me Insemwomwo Nu Sin Met Fulpap
10. Su porongo peng mwo, a fuka nunuk lalos ke ma puspis ekla?
10 Isaia el palye la peng mwo se inge fwa lutiyuk nu sin met fulpap. Su met fulpap inge? Elos inge pa met nu kemwa su akkalemyeyuk in buk lun Orekma, elos su “pakiyuki nu ke moul ma patpat.” (Orekma 13:48) Elos met inse pusisel su tuku ke kain in met nu kemwa su ikasla insielos nu ke peng mwo. Kain in met inge elos lotela la in oru ma lungse lun God ku in ase me insemwomwo su yok liki kutena ma su fwal se inge ku in oru. (1 Jon 2:15-17) Ke ma inge, Met Lo lun Jeova elos sun insien metu fuka ke orekma in luti lalos?
11. Fwal nu ke kas lal Poul, fuka in lutiyuk peng mwo?
11 Loang akmwoye nu ke me srikasrak lal met sap Poul, su simusla leta lal nu sin met Korint: “A Nga met lili, ke Nga tuku nu yuromwos, Nga tia tuku ke kaskas lalmetmet, arulanu mwo, in luti nu sumwos ma lukma lun God. Tu Nga nunku tari tu Nga in tia etu sie ma yuromwos, a Jisus Kraist mukena, a el anwuki ke sak soko.” (1 Korint 2:1, 2, NW) Poul el tia srike in purakak insien met su longol ke ma el etu. El tia luti ke ma saye, a el luti ke ma paye mukena su tuku sin God, ma paye puspis su ku in liyeyuk in Baibel ke len inge. Loang akmwoye pa, ke kas in akkeye lal Poul nu sin met luti wiel inge Timote: “Kom in luti kas, moniyuk in oru ou inge pal nu kemwa.” (2 Timote 4:2, NW) Timote el enenu in luti “kas,” ke me sramsram lun God. Poul el ouyepa sim leta nu sel Timote: “Kom in akkeye kom tu God lan liye kom mwo, sie met orekma su tia enenu in mekin, su orekmakin sumwosna kas lun God.”—2 Timote 2:15.
12. Fuka Met Lo lun Jeova ke len inge elos loang ke me pupulyuk a kas lal Poul?
12 Met Lo lun Jeova elos loang nu ke me srikasrak lal Poul, a ke kas lal nu sel Timote. Elos akilen ku lun Kas lun God a in orekmakin ma inge ke elos suk inkanek in akkalemye nu sin met tulan lalos kas paye nu ke fwinsrak a me insemwomwo. (Sam 119:52; 2 Timote 3:16, 17; Hibru 4:12) Paye, elos orekmakin me rid su tuku ke Baibel in kasru met su insemwomwo in akyokye etauk lalos ke Baibel a in eis insemwomwo lalos sifwanu. Tusruktu, elos suk pal nu kemwa ke inkanek in akkalemye nu sin met ke kas lun Ma Simusla. Elos etu la Kas lun God su etuku ke ngun ku in mokle insien met fwokpap. A ke pal se elos orekmakin ma inge ke inkanek inge ma inge ku in ouyepa akkeye lalalfongi lalos.
“Me Pwarak Nu Sin Met nu Kemwa Su Asor”
13. In yiu 2001, kain in ma sikyuk puspis fuka purakak me enenu in sang me pwarak nu sin met asor?
13 Oasr ongoiye puspis sikyuk ke yiu 2001, a ke sripe se inge, met puspis elos enenu me kasru. Ke September tari’a oasr sie me srikasrak na mwomwo nu ke ma inge sikyuk in an United States, ke pal se World Trade Center in an New York a Pentagon su futoto nu Washington, D.C. kunausyukla sin met terrorist. Sie me lut na paye nu ke orekma silolel sun mutanfwal sa! Ne yok sikyuk inge, Met Lo lun Jeova elos kaifweung na in oru kunokon lalos in ‘akpwaryelos nu kemwa su asor.’ Kutu experience inge akkalemye ke oiyen orekma lalos.
14, 15. Fuka Met Lo lun Jeova ke ma sikyuk luo elos orekmakin mwo Ma Simusla in akpwarye met asor?
14 Sie Met Lo su wi orekma lun forfor in luti pal nu kemwa el sun sie mutan su tu sisken inkanek a siyuk sel ke ma el nunku ke orekma silolel lun terrorist inge. Mutan se inge el mutamwauk in tung. El fwak la el pulakin asor a el lungse in sang kasru el fwin ku. Met Lo se inge el akkalemye nu sel la God el arulanu nunke kut, a el rid Isaia 61:1, 2. Kas inge su tuku sin God arulanu purakak nunuk lun mutan se inge, su fwak la met nu kemwa asor. El eis sie tract a el siyuk sin Met Lo se inge in som muteta nu yurol nu in loom sel.
15 Met Lo luo su oru orekma lun forfor in luti elos sun sie mokul su oru orekma ke shed lal. Elos siyuk sel fwin elos ku in sramsram nu sel ke kas in kasru su tuku ke Ma Simusla ke sripen ongoiye su sikyuk nu ke World Trade Center. Ke insese lal, elos rid 2 Korint 1:3-7, su ku in liyeyuk ke kas inge: “Parak . . . puselik ke Kraist.” Mokul se inge el arulanu engun meyen ke met tulan lal su Met Lo el sramsramkin ke kas in akengunye kutu met, a el fwak: “Lela God in akinsemwomwoye orekma mwolanu inge su komwos oru.”
16, 17. Kain in experience luo fuka akkalemye ku lun Baibel in kasru met su aksupwaryeyuk ku muta in fos ke sripen ongoiye?
16 Sie Met Lo el sifwil foloko nu yurin met su insemwomwo in lutlut a el osun nu sin sie tulik mokul nutin mutan se su akkalemye insemwomwo lal ke muteta se meet lal el aketeye nu sel ke nunuk yok lal ke oiyen met tulan lal tokin ongoiye se inge sikyuk. Mokul se inge el arulanu lut meyen Met Lo se inge el orekmakin pal lal in som nu yurin met a liye la mea sikyuk nu selos. Mokul se inge aketeye la el oru orekma lal arulanu futoto nu ke World Trade Center ke pal se na tauer luo musalla a el liye na paye ma sikyuk nu kemwa. Ke pal se el siyuk la efu ku God el lela me keok, Met Lo lun Jeova el srukak kutu fus in Baibel in ridi, wekunang Sam 37:39, su fwak: “A lango lun met sumwosmwos ma sin Jeova me; el nien ku lalos in pal in ongoiye. Mokul se inge siyuk la Met Lo se inge weang sou lal la eltal fuka, a el siyuk el an sifwil foloko, a el akkalemye engun lal in lutlut.
17 Siepa met inmaslon tausen puspis su Met Lo lun Jeova elos kasru ke kutu len tokin ongoiye lulap su orek sin terrorist pa mutan se su elos osun ke elos oru orekma lun forfor in luti nu sin met tulan lalos. El arulanu kosrkosrok ke ma sikyuk a el srike in porongo ke pal se Met Lo el rid Sam 72:12-14: “Tu el e fwa molela met enenu ke el wowoyuk, a met sikasrup, su wangin met kasreyel. El e fwa pakomuta met sikasrup a met enenu, a el e fwa molela ngunin met enenu. El e fwa molela ngunalos liki kemkatu a silolel; a a fwa saok sralos ye mutul.” Yok na paye kalmen kas inge! Mutan se inge el siyuk sin Met Lo inge in sifwil ridi fus inge a el suleltal in utyuk nu in loom sel in tafwela sramsram lalos. Ke saflaiyen sramsram lalos, oasr sie lutlut lun Baibel oakiyuki.
18. Fuka sie Met Lo el kasru met tulan lal ke pal se el eis me solsol in aol ke pre?
18 Oasr sie Met Lo el orekma ke sie restaurant ke sie an kasrup su met puspis elos tia akkalemye lungse lalos nu ke peng mwo lun Togusrai in pal meeta. Tokin ongoiye lulap orekla sin terrorist met puspis ke an inge elos sangeng. Ke ekun Friday tokin ongoiye se inge, manager ke restaurant el siyuk sin met nu kemwa ke restaurant in tofwoki nu likinuma a srukye candle, in akmisyelosla nu ke sie me eismakin nu sin met nu kemwa su sun ongoiye se inge. Meyen el akfulatyelos, paenang Met Lo se inge el tofwoki pa a som nu likinum a in tu misla ke sidewalk. Mutan manager el etu la el sie sin Met Lo lun Jeova, paenang tokin pal in misla a nunuk inge, el siyuk sin Met Lo inge in aolla met nu kemwa ke pre. Met Lo se inge el insese. Ke pre lal, el sramsramkin ke asor yok lun met in an nu kemwa tusruktu el tafwela fwak pa la elos tia enenu in asorkin mu wanginla fwinsrak lalos. El sramsramkin ke sie pal su fwa wanginla kain in ma upa inge nu kemwa a el fwak pa la met nu kemwa enenu in futoto nu sin God lun lungse ke inkanek lun etauk sumwos su tuku ke Baibel. Tokin el fwak “Amen,” manager lal—a met nu kemwa su oasr likinum ke restaurant su piselos pus liki met 60—elos som nu yurin Met Lo se inge, a sang kulo nu sel, sroukilya, a fwak nu sel la pa inge pre se ma mwo emeet su elos long.
Sie Me Insemwomwo Nu ke An
19. Kain in experience fuka akkalemye la kutu met elos akilen akmwuk fulat lun Met Lo lun Jeova?
19 Ke len inge, yokna, in an puspis su Met Lo lun Jeova elos kafofo ke orekma lalos we met puspis elos eis ma lane ke tuku lalos—pa inge met puspis elos fwak. Fuka un met se su akkeye moul misla, sumwosmwos, a oiyen moul nasnas tia ku in me srikaksrak paye nu ke ma mwo. Oasr an se ke an Central Asia, Met Lo lun Jeova elos sun sie met kol su retired tari liki state security agency. El akkalemye la el tu srusrngiyuki meet in oru investigation ke kain in u puspis lun alu. Ke pal se ma el tuni mokuikui lun Met Lo lun Jeova, el arulanu lut ke oaru lalos a oiye mwo su elos akkalemye. El kaksakin lalalfongi fukoko lalos a me akpayeye ke me luti lalos su tuku ke Ma Simusla. Mokul se inge el insese ka in lutlut Baibel.
20. (a) Mea orekma lun Met Lo lun Jeova su reportiyuk ke yiu taria akkalemye? (b) Mea ma inge su akkalemye la srakna oasr orekma yok su enenu in orek, a oiye fuka kut akkalemye ke pal mwo lasr in luti?
20 Ke kutu experience su akkalemyeyuk ke me lutlut inge, oasr tausen puspis kut ku in sromon, su akkalemyeyuk arulanu kalem la Met Lo lun Jeova elos arulanu kafofo ke 2001 yiu lun orekma.a Elos sramsram nu sin million puspis sin met, elos akengunye met puspis su asor, a orekma in luti lalos arulanu akinsemwomwoyeyuk. Oasr 263,431 met su orala mwolela lalos nu sin God ke inkanek lun Baptais. Fwin fwalu nu fon, pisen met luti puseni nu ke percent 1.7. A ke sripen oasr 15,374,986 mwet su wi ke akfulat lun Memorial ke mise lun Jisus ke yiu nu kemwa, paenang ma inge akkalemye la srakna oasr orekma yok su eneneyuk in orek. (1 Korint 11:23-26) Lela kut in kaifweung in suk met fwokpap su akola in porongo ke peng mwo. A fwa ou inge ke lusen yiu in oi lun Jeova tia wanginla, lela kut in kaifweung pa in kasru met su “inse musalla.” Fuka mwolanu lun orekma se inge nu sesr! Paye, kut nu kemwa kalweni akkalemye kas lal Isaia: “Nga fwa arulanu engun in Jeova. Ngunik fwa engun in God luk.” (Isaia 61:10) Lela tu God el fwa tia tui in orekmakin kut in akpayeye kas palu lal inge: “Ou inge Leum Jeova el fwa oru tu sumwosmwos a kaksak fwa kapek ye mutun mutunfwal nu kemwa.”—Isaia 61:11.
[Footnotes]
a Chart ke sra 17 nu ke 20 akkalemye report ke orekma lun Met Lo lun Jeova ke lusen 2001 yiu lun orekma.
Ya Kom Esam?
• Fuka met fwokpap elos eie ma lane ke peng mwo su Jisus el luti?
• Kain in me insemwomwo puspis fuka tuku nu sin met nu kemwa su porongo ke orekma in luti lun met tuma lutlut lal Jisus ke century se meet?
• Fuka met su porongo ke pal inge elos akinsemwomwoyeyuk ke peng mwo?
• Oiye fuka kut akkalemye ke kunokon saok lasr in luti?
[Chart on page 17-20]
2001 SERVICEYEAR REPORT OF JEHOVAH’S WITNESSES WORLDWIDE
(See bound volume)
[Pictures on page 13]
Met Lo lun Jeova elos esam pal nu kemwa konokon lalos in luti
[Pictures on page 15]
Elos nu kemwa su porongo ke peng mwo elos ekla ipen un met lili fwin fwalu nu fon su srukye inse siefwunnu