Fuka Lupan Ku Lun Lalalfongi Lom?
“Tu ke lalalfongi komwos tu ku.”—2 KORINT 1:24.
1, 2. Efu ku enenu in oasr lalalfongi lasr, a fuka ma inge in ku in fukoko?
MET kulansap lun Jeova elos etu la enenu in oasr lalalfongi lalos. Paye, ‘fwin wangin lalalfongi met elos koflanu akinsemwomwoye God.’ (Hibru 11:6) Ke ma inge, ke inkanek lalmetmet kut pre a siyuk ke ngun mutal a lalalfongi, pa inge sie ipen fwako lal su arulanu mwo. (Luk 11:13; Galetia 5:22, 23) In etawi lalalfongi lun met lili wiesr ku in akkeye pa oiye mwomwo inge su oasr yurosr.—2 Timote 1:5; Hibru 13:7.
2 Lalalfongi lasr ku in arulanu fukoko kut fwin kaifweung in fwasr tokin inkanek su Kas lun God el oakiye nu sin met Kristian nu kemwa. Lalalfongi yok ku in tuku ke ridi Baibel a lutlut mwo ke Ma Simusla len nu kemwa ke kasru lun me rid puspis su tuku sin “met kulansap oaru.” (Luk 12:42-44; Josua 1:7, 8) Kut nu kemwa akkeyeyuk ke lalalfongi lun kais sie sesr ke inkanek in wi pal nu kemwa ke meeting lun met Kristian, assembly, a toeni lulap puspis. (Rom 1:11, 12; Hibru 10:24, 25) A lalalfongi lasr akkeyeyuk ke pal se kut sramsram nu sin kutu met ke pal in orekma lun forfor.—Sam 145:10-13; Rom 10:11-15.
3. Kut fwin sramsram ke lalalfongi, kain in kasru fuka kut ku in eis sin met Kristian elder?
3 Ke inkanek in sramsram lalos, ke kas in kai a kas in akkeye su tuku ke Ma Simusla, met Kristian elder nu kemwa su lungse elos ku in kasre kut in musaiyuk lalalfongi lasr. Oasr kain in lalalfongi lalos oanu ma oasr yurol met sap Poul, su kaskas nu sin met Korint: “Kut met kasru in engun lomwos, tu ke lalalfongi komwos tu ku.” (2 Korint 1:23, 24) Sie leng el fwak pa: “Kut met orekma yurolos in akinsemwomwoye komwos, meyen ku lalalfongi lomwos.” (Contemporary English Version) Met sumwosmwos elos moul ke lalalfongi. Paye, wangin kutena met ku in akkalemye lalalfongi kasr a wangin kutena met ku in srukye ku oaru kasr. Ke sripe se inge, ‘kut sifwanu wis me toasr lasr.’—Galetia 3:11; 6:5.
4. Fuka me sramsram in Baibel ke met kulansap oaru lun God kasre kut in akkeye lalalfongi lasr?
4 Ma Simusla el nenela na paye ke me sramsram ke met su akkalemye lalalfongi. Saap kut etu tari orekma mwo puspis lalos in pal meeta, tusruktu, ya kut etu pa lalalfongi su elos akkalemye ke len nu kemwa, saap ke lusen moul lalos nu fon? In nunku ke inkanek fuka elos akkalemye oiye se inge ke ma sikyuk nu selos meet su oapanu ma sikyuk nu sesr ke pal inge ku in akkeye na paye lalalfongi.
Lalalfongi Akkeye Kut in Pulaik
5. Mea me akpayeye in Ma Simusla su akkalemye la lalalfongi akkeye kut in sulkakin Kas lun God ke pulaik?
5 Lalalfongi akkeye kut in sulkakin Kas lun God ke pulaik. Inuk el sulkakin nununku mutal lun God ke pulaik. “Liye!” el fwak, “Jeova el tuku wi siengoul tausen met mutal lal, in oru nununku ke met nu kemwa, a in sang metin met koluk nu kemwa ke orekma koluk lalos nu kemwa, su elos oru in koluk, a ke ma upa nu kemwa su met koluk elos kaskas lainul.” (Jud 14, 15) Tokin elos long kain in kas inge, wangin alollo la met lokwalok nu kemwa lal Inuk elos fwa suk inkanek in unilye. Fwinne ou inge, el akkalemye ou inge ke pulaik, a God el “wisella,” el oru el an motul in mise, kalem la el srunga el an sun keok ke paon met lokwalok lal. (Genesis 5:24; Hibru 11:5) Kut tia experience kain in menmen inge, tusruktu Jeova el akola in sang topuk nu ke pre lasr tu kut in ku in sulkakin kas lal ke lalalfongi a pulaik.—Orekma 4:24-31.
6. Fuka lalalfongi su God el sang nu sel a pulaik kasrel Noa?
6 Ke lalalfongi Noa “el akoela soko oak nu ke molela lun sou lal.” (Hibru 11:7; Genesis 6:13-22) Noa el ouyepa “sie met luti lun sumwosmwos” su arulanu pulaik in sulkakin kas in sensen lun God nu sin met nu kemwa in len lal. (2 Piter 2:5) Saap elos isrunul ke me sramsram lal ke Sronot lulap su apkurun in tuku, oanu kutu met elos oru ke pal se kut akkalemye ke Ma Simusla la akmwuk koluk inge ke pal lasr apkurun in musalla. (2 Piter 3:3-12) Tusruktu, oanu Inuk a Noa, kut ku in sulkakin kain in kas inge nu sin met nu kemwa meyen God el ase nu sesr lalalfongi a pulaik.
Lalalfongi Oru Kut in Mongfwusesr
7. Fuka Ebream a kutupa met elos akkalemye lalalfongi a mongfwusesr?
7 Kut enenu lalalfongi a mongfwusesr, yokna ke kut sano saflaiyen akmwuk koluk inge. Kutu selos ‘su ke lalalfongi a mongfwusesr, usrui ma mwulela’ pa met patriarch Ebream su sangeng sin God. (Hibru 6:11, 12) Ke lalalfongi el som liki siti lun Ur, fwinne oasr ma mwomwo puspis we, a el ekla met fwafwasyesr ke sie an su mwoleyukla nu sel sin God. Isaak a Jekob elos met usrui ke mwolela siefwunnu inge. Tusruktu, “elos inge nu kemwa mise in lalalfongi, ke elos sumwenu eis mwoleaung.” Ke lalalfongi elos ‘kena sun sie fwal mwo liki, aok togusrai in kosrao.’ Aok, God lalos “el akoe tari an selos.” (Hibru 11:8-16) Aok, Ebream, Isaak, a Jekob—a mutan kielos nu kemwa su sangeng sin God—elos mongfwusesr in sano togusrai lun God in kosrao, ye koko lun togusrai inge elos e fwa sifwil moulyuk fwin fwalu.
8. Ye kain in ma sikyuk fuka su wangin ku lalos Ebream, Isaak, a Jekob elos akkalemye lalalfongi?
8 Ebream, Isaak, a Jekob elos tia munasla in lalalfongi lalos. Fwal Mwolela el tia tuku fwal nu ke lungse lalos sifwanu, a elos tia liye mutanfwal nu kemwa su akinsemwomwoyelos sifwanu ke inkanek lun futen Ebream. (Genesis 15:5-7; 22:15-18) Fwinne ‘siti se inge su God el orala’ el tia tuku tokin century puspis toko, tusruktu, mokul inge nu kemwa elos tafwela in akkalemye lalalfongi a mongfwusesr ke lusen moul lalos nu fon. Paye kut enenu pa in oru ou inge, yokna misenge meyen Togusrai lun God ye koko lun Messaia el mutamwauk tari in kol in kosrao.—Sam 42:5, 11; 43:5.
Lalalfongi Wise nu Sesr Nien Sun Mwo Emeet
9. Fuka lalalfongi el orekma ke nien sun lasr a ke ma kut lungse in oru?
9 Met patriarch oaru inge nu kemwa elos tia moulkin moul lun met Kenan, meyen nien sun lalos in moul fulat liki nien sun lun met ngie. In oupanu, lalalfongi ku in ase nu sesr nien sun ke ma lun ngun su kasre kut in tia fwasr tokin akmwuk lun fwal koluk se inge su oan ye koko lun met koluk se inge, Setan su Devil.—1 Jon 2:15-17; 5:19.
10. Efu kut ku in etu la Josef el suk sie nien sun su yok liki pengpeng lun fwalu?
10 Ke kasru lun God, mwen nutul Jekob su pangpang Josef el eis kunokon in an Ijipt oanu met liaung lun me mongo, aok wangin nien sun lal in ekla sie met lulap fwin fwalu se inge. Ke lalalfongi lal ke mwolela lun Jeova su e fwa akpayeye, Josef su yiu 110-matwe el fwak nu sin brother wiel: “Nga mise; a paye God el e fwa tuku nu yurumwos, a wiskomwosla liki fwal se inge nu ke fwal se su el fulak ka nu sel Ebream, nu sel Isaak, a nu sel Jekob.” Josef el siyuk selos el an pakpuki nu ke fwal mwolela. Ke pal se el mise, elos sang ono nu ke manol tu in tia kolukla a filiye manol nu ke sie pok in mise in an Ijipt. Aok, ke pal se met Israel nu kemwa aksukosokyeyuk liki sruo lalos in an Ijipt, met palu Moses el eis sri lal Josef oelul a el pakpuki nu ke Fwal Mwolela. (Genesis 50:22-26; Exodus 13:19) Lalalfongi lal Josef enenu in mokle kut in suk nien sun su fulat liki nien sun lun fwal se inge.—1 Korint 7:29-31.
11. Ke inkanek fuka Moses el akkalemye la oasr yurol nien sun in ngun?
11 Moses ‘el sulela in keok yurin met lun God mwo liki engun ke ma koluk’ a lutlut fulat yurin sou lun met fwisrak in an Ijipt. (Hibru 11:23-26; Orekma 7:20-22) Ke ma inge, el sisla a pilesru moul pengpeng lun fwalu a sie pok in mise mwomwo a an in pakpuk mwolanu lun met mise in an Ijipt. Tusruktu, mea sripen ma inge nu kemwa kut fwin srikeye nu ke me sang fulat nu sel in ekla sie “met lun God paye,” met iumwe ke Mwoleaung ke Ma Sap, met palu lun Jeova, a sie met sim lun Baibel? (Ezra 3:2) Ya kom lungse in kilukyuk ke orekma, ku lalalfongi lom sot nu sum sie nien sun fulat ke ma lun ngun, piye ka?
Lalafongi Kol Nu Ke Sie Moul Mwomwo
12. Mea lalalfongi el oru ke moul lal Rehab?
12 Lalalfongi el tia sang nien sun fulat mukena nu sin met, a el ouyepa sang sie kain in moul mwomwo. Saap Rehab lun an Jeriko el nunku la moul lal wanginla sripe meyen el sie mutan kosro. Tusruktu, el akinsemwomwoyeyuk na paye ke pal se el akkalemye lalalfongi! El “aksumwosyeyuk ke orekma lal [ke lalalfongi], ke el eis met sap [met Israel] a supalosla ke siena inkanek,” ke ma inge elos tia osun nu sin met Kenan su met lokwalok lalos. (Jemes 2:24-26) Meyen el akilen Jeova pa God paye, paenang Rehab el akkalemye pa lalalfongi ke pal se el fwasr liki moul koluk lal oanu sie mutan kosro. (Josua 2:9-11; Hibru 11:30, 31) El payuk nu sin met kulansap lun Jeova, a tia nu sin met Kenan su tia lalalfongi. (Duteronomi 7:3, 4; 1 Korint 7:39) Sie me sang lulap nu sel Rehab pa in ekla nine matu kien Messaia. (1 Kronikel 2:3-15; Rut 4:20-22; Mattu 1:5, 6) Oanu kutu met, su som liki moul fokfok lalos, el e fwa eis siepa me sang lulap—sifwil moulyuk ke sie paredais fwin fwalu.
13. Kain in ma koluk fuka Devid el oru nu sel Bat-seba, tusruktu, kain in oiye fuka el akkalemye?
13 Tokin el som liki moul fokfok lal, arulanu kalem la Rehab el srukye na sie kain in moul sumwos a nasnas. Tusruktu, oasr kutu met su oru ma koluk upa elos fwinne mwolela tari moul lalos nu sin God ke lusen pal loes. Togusra Devid el kosro nu sel Bat-seba, el oru mukol tumal in mise ke meun, a ke saflaiye el esel oanu mutan kiel. (2 Samuel 11:1-27) Ke sripen el auliyuk na paye ke ma el oru, paenang Devid el siyuk sin Jeova: “Kom tia eisla ngun mutal lom liki yu.” Devid el tia tula ngun mutal lun God. El lalalfongi la Jeova, ke pakoten lal, el e tia pilesru “sie inse musalla” ke sripen ma koluk. (Sam 51:11, 17; 103:10-14) Ke sripen lalalfongi lalos, Devid a Bat-seba elos engunkin sie me sang in ekla papa a nine matu kien Messaia.—1 Kronikel 3:5; Mattu 1:6, 16; Luk 3:23, 31.
Lalalfongi Akkeyeyuk ke Kasru lun God
14. Kain in me akpayeye fuka Gideon el eis, a fuka me sramsram inge akkeye lalalfongi lasr?
14 Fwinne kut fwafwasyesr in lalalfongi, saap kutupal kut enenu me akpayeye mutal. Ma inge sikyuk na paye sel Met Nununku Gideon, el sie selos “su ke lalalfongi elos kutangla Togusrai.” (Hibru 11:32, 33) Ke pal se met Midian a mutanfwal saye su kamwuk lal elos tuku in kunausla Israel, ngun mutal lun Jeova tuku nu fwel Gideon. Meyen el lungse in etu fwin Jeova el welul na paye ku tia, paenang Gideon el srikel Jeova ke inkanek lun unen soko sip su el filiye fwin an in sisla kulin wit we ke fong fon se. Ma se meet su el siyuk sin God in sikyuk pa, in oasr aunfong fwin unae mukena, a foko na fon pao. Ma se akluo su el siyuk pa unae mukena in pao, a aunfong on fwin foko nu fon. Meyen ma inge sikyuk na paye, paenang Gideon su lalmetmet el orekma in lalalfongi a kutangla met lokwalok nu kemwa lun Israel. (Met Nununku 6:33-40; 7:19-25) Kut fwin suk me kasru mutal ke pal se kut oru sie sulela, tia kalme la wangin lalalfongi lasr. Kut akkalemye na paye lalalfongi kut fwin tuni Baibel a kutupa me rid Kristian wikin pre in siyuk ke kasru lun ngun mutal ke pal se kut oru sulela.—Rom 8:26, 27.
15. Kain in me kasru fuka kut ku in eis kut fwin nunku ke lalalfongi lal Berak?
15 Lalalfongi lun Met Nununku Berak arulanu akkeyeyuk ke inkanek in kas in akkeye. Mutan palu Debora el akkeyel in orekmakin lalmetmet in aksukosokye met Israel liki orekma koluk lal Togusra Jabin lun an Kenan. Ke lalalfongi a ke kasru lun God, Berak el kol 10,000 met su arulanu munas kofwen me meun nu ke kutangla lain un met meun lal Jabin su arulanu fukoko a muta ye koko lal Sisera. Kutangla lalos inge akfulatyeyuk ke inkanek lun on mwomwo lal Debora a Berak. (Met Nununku 4:1–5:31) Debora el akkeyel Berak in orekma oanu sie met kol su God el pakiye, a el sie sin met kulansap lun Jeova su ke inkanek lun lalalfongi “elos ukweuk un met meun lun kutena fwal.” (Hibru 11:34) In nunku ke inkanek lun God fuka el akinsemwomwoyel Berak ke sripen lalalfongi lal enenu in mokle kut in akpayeye orekma in kulansap yok lasr nu sin Jeova fwinne kut luman alollo.
Lalalfongi Akkeye Misla
16. Kain in me srikasrak fuka Ebream el oakiye ke inkanek lal in suk misla nu sel Lot?
16 Fwin lalalfongi el ku in kasre kut in akpayeye kunokon yok lasr nu sin God, el ku in akkeye pa misla a futoto lasr nu sin kutu met. Ebream su matuo el lela nephew se lal inge pangpang Lot in sulela an mwomwo ke kosro nutul ke pal se met liaung kosro nutulos elos fos a elos enenu in fwasrelik. (Genesis 13:7-12) Kut ku in lalalfongi la Ebream el pre nu sin God ke kasru fuka in akmsumwosye ma upa inge. El tia nunku ke ma lal sifwanu, a el aksumwosye ma inge ke inkanek lun misla. Kut fwin koneak la oasr fos lasr nu sin met lili Kristian wiesr, lela kut in pre ke lalalfongi a “suk misla,” a esam me srikasrak lal Ebream ke lungkulang.—1 Piter 3:10-12.
17. Efu kut ku in fwak la ma upa inmaslon Paul, Barnabas, a Mark aksumwosyeyuk ke inkanek lun misla?
17 Loang akmwoye fuka orekmakinyen akmwuk lun met Kristian in lalalfongi ku in kasre kut in akkeye misla. Ke pal se Poul el apkurun in mutamwauk ke orekma lal oanu sie missionary ke pal akluo, Barnabas el insese nu sel in sifwil oru muteta nu ke congregation puspis in an Cyprus a Asia Minor. Tusruktu, Barnabas el lungse in esal Mark cousin se lal. Poul el tia insese ke ma el lungse in oru meyen Mark el som lukeltal in an Pamphylia meet. “A sie akukuin lulap” sikyuk inmasloltal, a ou inge eltal fwasr liki sie sin sie. A Barnabas el esal Mark yurol a som nu Saiprus, a Poul el sulela Sailas a som, a fwasr sasla Siria a Silisia, a akkeye met in congregation.” (Orekma 15:36-41) Ke sie pal tok, fos inge aksumwosyeyuk a wanginla, Mark el welul Poul in Rom a met sap inge el kaskas mwo kel. (Kolosse 4:10; Failimon 23, 24) Ke pal se Poul el muta in kalpous in an Rom in yiu 65 C.E., el fwak nu sel Timote: “Kom solol Mark lan wi kom, tu oasr sripel nu sik in kasre yu.” (2 Timote 4:11) Wangin alollo, wikin pre lal Poul in lalalfongi pa futoto lal nu sel Barnabas a Mark, a ma inge kol nu ke inse misla su kupasr nu ke “misla lun God.”—Filippai 4:6, 7.
18. Mea luman ma sikyuk inmaslon Euodia a Sintike?
18 Paye, meyen kut sesumwos paenang “in ma puspis kut nu kemwa tukulkul.” (Jemes 3:2) Ma upa sikyuk nu sin mutan Kristian luo, su Poul el simusla ke leta lal: “Nga kaifwe nu sel Euodia, a Nga kaifwe nu sel Sintike tu eltal in nunuk siefwunnu in Leum. . . . Tu kom in kasru mutan inge, tu elos wi yu orekma in mwosasu.” (Filippai 4:1-3) Wangin alollo la mutan luo inge su sangeng sin God elos aksumwosye ma upa inmaslalos ke inkanek lun misla a ke inkanek in orekmakinyen kas in kai su simusyukla in Mattu 5:23, 24. Orekmakinyen ma sap lun Baibel in lalalfongi ku in akkeye misla ke len inge.
Lalalfongi ku in Kasru Kut In Muteng
19. Kain in ma upa fuka tia kunausla lalalfongi lal Isaak a Rebeka?
19 Ke inkanek lun lalalfongi kut ku in muteng pa ke ma upa. Saap kut arulanu asor meyen sie met in sou lasr su baptais tari el payuk nu sin met silalalfongi. (1 Korint 7:39) Isaak a Rebeka elos arulanu asor meyen mwen nutulos inge Iso el payuk nu sin mutan silalalfongi. Mutan Het puspis kiel Iso “eltal me akasoryel” Isaak a Rebeka—upa ma elos oru paenang Rebeka el fwak: “Nga totola in moul luk meyen an nutul Het. Jekob el fwin eis mutan kiel sin an nutul Het, oanu mutan inge, piye sripen moul luk nu sik?” (Genesis 26:34, 35; 27:46) Aok, kain in ma upa inge tia kunausla lalalfongi lal Isaak a Rebeka ke kutena pal. Lela kut nu kemwa in srukye ku lalalfongi lasr fwin oasr ma upa yok su sun kut.
20. Kain in me srikasrak puspis fuka ke lalalfongi kut ku in liye nu sel Naomi a Rut?
20 Mutan katinmas matuo pangpang Naomi el sie met Judea a el etu la sie mutan fwin an Juda el e fwa isusla mwen puspis su e fwa ekla papa matu tumun Messaia. Meyen el etu la mwen nutul nu kemwa elos mise tari a el matuo paenang wanginla pal mwo lal in ekla nine matu kien Messaia. Fwinne ou inge, daughter-in-law se lal pangpang Rut el payuk nu sel Boaz su matuo, el isusla sie mwen, a el ekla nine matu kien Jisus, el su Messaia! (Genesis 49:10, 33; Rut 1:3-5; 4:13-22; Mattu 1:1, 5) Lalalfongi lal Naomi a Rut el ku liki me asor a ma inge sang nu selos me insemwomwo. Kut ku in eis pa me insemwomwo lulap, kut fwin srukye na lalalfongi fwinne kut sun me asor yok.
21. Mea lalalfongi el ku in oru nu sesr, a kut kaifweung in oru mea?
21 Fwinne kais sie sesr tia ku in etu ma e sikyuk lutu, tusruktu, ke lalalfongi kut ku in tu ku ke kutena ma upa. Lalalfongi kasre kut in pulaik a mongfwusesr. El ase nu sesr nien sun fulat a sie kain in moul mwomwo. Lalalfongi kasre kut in futoto nu sin kutu met a el ku liki me asor. Ke ma inge, lela kut in “sie selos su lalalfongi nu ke molela lun ngun.” (Hibru 10:39) Ke ku lun God lungkulang lasr, Jeova, a ke mwolanu lal, lela kut in tafwela in akkalemye lalalfongi fukoko.
Fuka Kom Topuk?
• Kain in me akpayeye fuka su tuku ke Ma Simusla akkalemye la lalalfongi ku in oru kut in pulaik?
• Efu kut ku in fwak la lalalfongi ku in ase nu sesr sie kain in moul mwomwo?
• Fuka lalalfongi akkeye misla?
• Mea me akpayeye su akkalemye la lalalfongi ku in kasru kut in muteng ke me asor yok?
[Pictures on page 14]
Lalafongi sang nu sel Noa a Inuk pulaik in sulkakin kas lun Jeova
[Pictures on page 15]
Lalalfongi lal Moses mokle kut in suk nien sun ke ma lun ngun
[Pictures on page 16]
Me akpayeye ke kasru lun God akkeye lalalfongi lal Berak, Debora, a Gideon