Ya Oasr Lalalfongi Lom Na Paye Ke Peng Mwo?
“Togusrai lun God apkurun me. Komwos auliyuk, a lalalfongi mwosasu.”—MARK 1:15.
1, 2. Fuka kom ku in aketeye Mark 1:14, 15?
IN YIU 30 C.E. Jisus Kraist el mutamwauk ke sie orekma in luti yok in an Galili. El luti ke “mwosasu lun God” a met Galili puspis elos mokleyuk ke kas lal inge: “Pal fwalnu, a togusrai lun God apkurun me. Komwos auliyuk, a lalalfongi mwosasu.”—Mark 1:14, 15.
2 “Pal fwalnu” el tuku tari sel Jisus in mutamwauk ke orekma lal a in sang pal mwo nu sin metu in oru sulela lalos su ku in kasrelos in eis insemwomwo lun God. (Luk 12:54-56) ‘Togusrai lun God apkurun me’ meyen Jisus el oasr tari oanu sie Togusra su Pakiyuki. Orekma in luti lal purakak met puspis in auliyuk. Tusruktu, fuka elos oru ou inge meet—a fuka kut ku in—akkalemye lalalfongi ke “peng mwo?”
3. Metu elos enenu in oru mea fwin elos lungse in akkalemye lalalfongi ke peng mwo?
3 Oanu Jisus, met sap Piter el kaifwe pa nu sin met nu kemwa in auliyuk. Ke pal se el sramsram nu sin met Ju in an Jerusalem in Pentecost 33 C.E., Piter el fwak: “Komwos in auliyuk, a komwos nu kemwa in baptaisla in en Jisus Kraist nu ke ela ma koluk lomwos, a komwos fwa eis me sang lun ngun mutal.” Tausen puspis sin met elos auliyuk, baptaisla, a ekla met tuma lutlut lun Jisus. (Orekma 2:38, 41; 4:4) In yiu 36 C.E., met Pegan elos oru pa ou inge. (Orekma 10:1-48) In len lasr misenge, lalalfongi ke peng mwo purakak tausen puspis sin met in auliyuk ke ma koluk lalos, mwolela moul lalos nu sin God, a in baptaisla. Elos eis peng mwo lun molela a akkalemye lalalfongi ke me kise lango lun Jisus. Sayen ma inge, elos inge oru orekma sumwos a elos tu leyen Togusrai lun God.
4. Mea se inge lalalfongi?
4 Tusruktu mea se inge lalalfongi? Met sap poul el simusla: “Inge, lalalfongi el me etauk lun ma su a fwinsrak ka, a me eyeinse lun ma su tia liyeyuk.” (Hibru 11:1) Lalalfongi lasr kasru kut in fwinsrak na paye la ma nu kemwa God el mwolela ke Kas Lal el e fwa akpayeye ku oanu akpayeyuk tari. Ma inge oanu sie pepu ke an ku title se su akpayeye la oasr an sesr. Lalalfongi el ouyepa “me eyeinse,” ku me akpayeye ke kaifweung lasr, ke ma su tia liyeyuk. Ku lasr in akilen a insemwomwo lasr mokle kut in lalalfongi la ma inge nu kemwa paye, fwinne kut tia liyeyuk.—2 Korint 5:7; Efesus 1:18.
Kut Enenu Lalalfongi!
5. Efu ku lalalfongi arulanu yok sripe?
5 Oasr enenu lasr ke ma lun ngun ke mutamweyen moul lasr, tusruktu wangin lalalfongi lasr ke pal in isusla me. Aok, “tia met e nu kemwa lalalfongi.” (2 Tessalonika 3:2) Tusruktu, met Kristian nu kemwa enenu in oasr lalalfongi elos fwin lungse in usrui ma God el mwolela. (Hibru 6:12) Tokin el srukak me pupulyuk puspis ke lalalfongi, met sap Poul el simusla: “Ke ma inge, tu oasr pukunyen lulap lun met lo su apunkutla, lela kut in ouyepa sisla ma toasr nu kemwa, a ma koluk su apkurun in kuluskuti, a lela kut in moniyuk in kasrusr lun akutun, su filiyuki tari ye mutusr, ngetuk nu sin Jisus, Met Kol a Met Aksumwosye Lalalfongi lasr.” (Hibru 12:1, 2) Mea se inge “ma koluk su apkurun in kuluskuti”? Silalalfongi, a tula lun lalalfongi lun sie met su oasr yurol meet. In oasr lalalfongi fukoko lasr, kut enenu in ‘ngetuk nu sin Jisus’ a fwasr tokin me srikasrak lal. Kut enenu pa in fwasr liki orekma lun kosro, in lain orekma lun ikwe, in fwasr liki lungse ke ma lun fwalu, lalmetmet kutasrik lun fwalu, a me sramsram matu ku fasin su lain ma simusla. (Galetia 5:19-21; Kolosse 2:8; 1 Timote 6:9, 10; Jud 3, 4) Sayen ma inge, kut enenu in lalalfongi la God el wi kut a kas in kai nu kemwa su tuku ke Kas Lal arulanu fukoko.
6, 7. Efu arulanu yok sripe in pre ke lalalfongi?
6 Kut tia ku in orala lalalfongi lasr ke ku lasr sifwanu. Lalalfongi el sie fwako lun Ngun Mutal lun God, ku ku lal. (Galetia 5:22, 23) Ke ma inge, a fuka fwin lalalfongi lasr enenu in akkeyeyuk? Jisus el fwak: “Na komwos . . . fwin etu fuka in sang me sang mwo nu sin tulik nutumwos, fuka yokiyen Papa tumomwos su in kosrao el fwa sang ngun mutal nu selos su siyuk sel!” (Luk 11:13) Aok, lela kut in pre ke ngun mutal, meyen ma inge ku in oswela nu sesr lalalfongi su eneneyuk in oru ma lungse lun God fwinne kut sun ma upa yok.—Efesus 3:20.
7 Aok fwal nu sesr in pre ke lalalfongi yok. Ke pal se Jisus el apkurun in sisla demon liki tulik mokul se, papa tumun tulik srisrik se inge el fwak: “Nga lalalfongi! Kasru yu ke an se ma Nga enenu lalalfongi!” (Mark 9:24, New World Translation.) “Akyokye lalalfongi lasr,” met tuma lutlut lun Jisus elos siyuk. (Luk 17:5) Ke ma inge, lela kut in pre ke lalalfongi, a lalalfongi la God el topuk ke ma kut siyuk inge ke pre lasr.—1 Jon 5:14.
Lalalfongi Ke Kas lun God Arulanu Yok Sripe
8. Fuka lalalfongi ke Kas lun God ku in kasre kut?
8 Ke lusen pal srisrik lula lal meet liki el mise oanu sie me kise, Jisus el fwak nu sin met tuma lutlut lal: “Nikmet lela insiomwos in toasr. Komwos lalalfongi God, komwos in ouyepa lalalfongi yu.” (Jon 14:1) Oanu met Kristian, kut lalalfongi God a Mwen nutul. A fuka ke Kas lun God? Ma inge sie me purakak ku nu ke ma mwo ke moul lasr kut fwin lutlut a orekmakin ma inge wikin lalalfongi yok la el ase nu sesr me kai a kolyuk mwomwo su kut ku in eis.—Hibru 4:12.
9, 10. Fuka kom ku in aketeye ma akkalemyeyuk ke lalalfongi in Jemes 1:5-8?
9 Moul lasr oanu sie met sesumwos arulanu nenela ke ma upa a me keok. Tusruktu, lalalfongi ke Kas lun God ku in kasre kut na paye. (Job 14:1) Ke sie me pupulyuk, lela kut in lumala la kut tia etu in aksumwosye sie me srifwe. Kas lun God el kai kut: “A kutena sumwos fwin enenu in lalmetmet, lela lan siyuk sin God ka, el su ase nu sin met nu kemwa yokna, a el tia mulat; a a fwa sang nu sel. A lela lan siyuk ke lalalfongi a tia alollo, tu el su alollo el oanu noa mwea unana a palela ke eng. A met sa lan tia nunku tu el a fwa eis kutena ma sin Jeova; El met inse luo a siokak oiyel in ma nu kemwa.”—Jemes 1:5-8.
10 Jeova God el tia mulat kut fwin siyuk ke pre ke lalalfongi fwin wangin ma inge nu sesr. A el e fwa kasre kut in srukye nunuk sumwos ke me srifwe su sun kut. Fus puspis in Baibel ku in akkalemyeyuk nu sesr sin met lili wiesr in lalalfongi, ku ma inge kut ku in liye ke pal se kut lutlut Baibel. Ku, ngun mutal lun Jeova ku in kol kut ke kutu inkanek. Papa tumasr in kosrao el e fwa ase nu sesr lalmetmet tu kut in ku in muteng ke me srifwe kut fwin “kaifweung in siyuk ke lalalfongi a tia alollo.” Kut fwin oanu noa mwea unana a palela ke eng, kut tia ku in lalalfongi in eis kutena ma sin God. Efu? Meyen ma inge ku in kalmekin la kut met inse luo a siokak oiyesr in ma nu kemwa, wikin pre—aok fwinne ke lalalfongi lasr nu sin God. Ke ma inge, kut enenu in srukye lalalfongi ku ke Kas lun God a ke me kasru lal nu kemwa su el ase nu sesr. Lela kut in loang akmwoye nu ke me srikasrak puspis fuka ma inge el kasru kut a kol kut.
Lalalfongi a Me Kasru
11. Lalalfongi ke Kas lun God ase nu sesr kas in akkeye fuka ke me enenu lasr ke len nu kemwa?
11 A fuka kut fwin keok misenge ke sripen wangin mongo a nien muta lasr ku kut sikasrup? Lalalfongi ke Kas lun God ase nu sesr me akpayeye la Jeova el e fwa ase nu sesr me enenu lasr ke len nu kemwa a ke akmwuk sasu lal el e fwa sang nu sin met nu kemwa su lungse el me enenu lalos nu kemwa. (Sam 72:16; Luk 11:2, 3) Saap kut ku in koneak la sie me insemwomwo na paye in sifwil kalweni ke nunuk lasr inkanek lun Jeova fuka el kitel met palu Elaija ke lusen pal in sral. Tia pat toko, God el oru flau a oil in tia wanginla ke inkanek lun menmen, ke ma inge el kasru mutan se, mwen nutul, a Elaija in tia mise. (1 Togusra 17:2-16) Jeova el sang pa me enenu lal met palu Jeremaia ke lusen pal in meun lun Babulon lain Jerusalem. (Jeremaia 37:21) Fwinne arulanu srik me mongo nel Jeremia a Elaija, tusruktu Jeova el kurunginelos. El e oru pa ou inge nu sin met nu kemwa su akkalemye nu sel lalalfongi ke pal inge.—Mattu 6:11, 25-34.
12. Fuka lalalfongi ku in kasru kut in eis me enenu lasr?
12 Lalalfongi wikin orekmakinyen ma sap lun Baibel ke moul lasr tia ku in kasru kut in kasrup ke ma lun ikwe, tusruktu, ma inge ku in kasre kut in eis me enenu lasr. Ke sie me pupulyuk: Baibel el kai kut in oaru, mwo, a met orekma mwo. (Soakas 22:29; Ekklisiastis 5:18, 19; 2 Korint 8:21) In eteyuk oanu sie met orekma mwo tia ku in pilesreyuk ke kutena pal. Pal mwo in koneak orekma lun met oaru, mwo, a moniyuk, yok liki kutena met fwinne nu ke an puspis su arulanu upa in koneak orekma. Fwinne arulanu srik ma lun met orekma inge, tusruktu pal nu kemwa oasr me enenu lalos a elos insemwomwo in kang me mongo su elos sifwanu koneak.—2 Tessalonika 3:11, 12.
Lalalfongi Kasre Kut in Mongfwusesr ke Asor
13, 14. Fuka lalalfongi ku in kasru kut in muteng ke me asor?
13 Kas lun God el akkalemye na paye la tia koluk in asor fwin sie met su kut lungse el mise. Met patriarch Ebream su oaru el tung asor ke pal se Serah mutan kiel su el arulanu lungse el mise. (Genesis 23:2) Devid el tung ke asor ke pal se el long la mwen nutul inge Absalom el mise. (2 Samuel 18:33) Fwinne met sumwosmwos Jisus el tung ke pal se Lazarus met kamwuk lal el mise. (Jon 11:35, 36) Ke pal se met su kut lungse el mise, saap kut e pulakin na paye asor lulap, tusruktu, lalalfongi lasr ke mwolela su oasr ke Kas lun God ku in kasre kut in mongfwusesr ke kain in me asor inge.
14 ‘A oasr fwinsrak luk in God,’ Poul el fwak, ‘tu a fwa oasr sifwil moulyuk nu sin met sumwos a met sesumwos.’ (Orekma 24:15) Enenu in oasr lalalfongi lasr ke akmwuk lun God in akmoulyeak met mise puspis nu ke moul. (Jon 5:28, 29) Kutu nu sin met inge pa Ebream, Serah, Isaak a Rebeka, Jekob a Lea—elos inge nu kemwa mutol in mise a sano ke sifwil moulyuk ke sie fwalu sasu lun God. (Genesis 49:29-32) Sie me insemwomwo na paye in liye ke sie pal la met nu kemwa su kut lungse elos e fwa sifwil tukakek ke mutol lalos in mise a moul fwin fwalu se inge! (Fwakyuk 20:11-15) Ke pal inge, lalalfongi el tia ku in eisla me asor nu kemwa, tusruktu el ku in kasre kut in mongfwusesr ke me asor.—Sam 121:1-3; 2 Korint 1:3.
Lalalfongi El Akkeye Met Asor
15, 16. (a) Efu kut ku in fwak la me asor el tia sikyuk mukena nu sin kutu met su lalalfongi? (b) Mea kut enenu in oru in aksumwosye me asor?
15 Kas lun God el akkalemye pa la met nu kemwa su lalalfongi elos ku pa in sun me asor. Ke lusen me srifwe upa lal, Job el pulakin la God el som tari lukel. (Job 29:2-5) Luma koluk lun Jerusalem a pot lal su musalla oru Niemaia in arulanu asor. (Niemaia 2:1-3) Piter el arulanu asor tokin el lafwekin Jisus paenang el “tung ma lulap.” (Luk 22:62) A Poul el kaifwe nu sin met lalalfongi ke congregation lun Tessalonika in “akpulaikyelos su munas inse.” (1 Tessalonika 5:14) Ke ma inge, me asor nu sin met nu kemwa su akkalemye lalalfongi ke len inge tia ma sasu. Ke ma inge, mea kut enenu in oru tu kut in ku in muteng ke me asor?
16 Saap kut arulanu asor meyen kut sun ma upa puspis. Lela kut in tia nunku ma upa puspis inge in oanu ma siefwunnu su arulanu yok, a lela kut in aksumwosye kais sie selos ke kut orekmakin ma sap a akmwuk lun Baibel. Ma inge ku in kasru in aksrikye me asor lasr. Sie orekma a mongle fwal ku in kasru pa. Kut ku in lalalfongi na paye ke ma se inge: Lalalfongi nu sin God a ke Kas lal purakak me insemwomwo in ngun meyen ma inge ku in akkeye kaifweung lasr in lalalfongi la el kurungin kut.
17. Fuka kut ku in etu la Jeova el kurungin kut?
17 Piter el ase nu sesr kas in akkeye inge: “Akfulpapye komwos . . . ye po ku lun God, tu el fwa akfulatye komwos in pal fwal; a komwos in likiye nu kemwa sensen lomwos nu fwel, tu el kurungin komwos.” (1 Piter 5:6, 7) Met sim lun Sam el on: “Jeova el tulokunlosyuk nu kemwa su ikori, a sruklulosyuk nu kemwa su sumwoli.” (Sam 145:14) Kut enenu in lalalfongi ke kas in akkeye inge, meyen ma inge kut ku in koneak ke Kas lun God. Fwinne me asor el ku in tafwela na, tusruktu sie me akkeye na paye ke lalalfongi in etu la kut ku in likiye sensen nu kemwa lasr nu sin Papa tumasr in kosrao su lungse!
Lalalfongi a Kutu Me Srifwe
18, 19. Fuka lalalfongi ku in kasre kut in mongfwusesr ke mas lasr a in akpwarye met lili wiesr su mas?
18 Saap kut e fwa sun me srifwe yok emeet ke lalalfongi lasr ke pal se kut sun mas upa ku met su kut lungse el sun ou inge. Fwinne Baibel el tia sramsram ke menmen in akkeye mas lun met Kristian inge pangpang Epafrodaitus, Timote, a Trofimus, tusruktu, wangin alollo la Jeova el kasrelos in muteng. (Filippai 2:25-30; 1 Timote 5:23; 2 Timote 4:20) Sayen ma inge, nu selos nu kemwa su “nunku ke met sikasrup,” met sim lun Sam el on: “Jeova el e fwa kurungnalang ke el munas a on fwin me on kiel; El oru me on kiel nu kemwa in pal in mas lal.” (Sam 41:1-3) Fuka kas lun met sim lun Sam kasru kut in akkeye met lili wiesr nu kemwa su mas?
19 Sie inkanek in kasrelos ke inkanek in ngun pa in pre kelos su mas. Fwinne kut tia siyuk ke menmen in akkeye met mas ke pal inge, tusruktu, kut ku in siyuk sin God in kasrelos in tu ku a in mongfwusesr ke mas lalos a sang nu selos me akkeye in ngun tu elos in ku in muteng ke pal in munas lalos. Jeova el e fwa kasrelos, a lalalfongi lalos fwa akkeyeyuk in ngetuk nu ke sie pal su “met su muta we fwa tia fwak: ‘Nga mas.’ ” (Isaia 33:24) Sie me pwarak na paye in etu la ke inkanek lun Jisus Kraist su sifwil moulyuk a ke inkanek lun Togusrai lun God, met nu kemwa su pusisel in akos elos e fwa sukosokla liki ma koluk, mas, a mise! Kut sang kulo nu sin Jeova ke fwinsrak mwolanu inge, el “su akkeyela mas nu kemwa lasr.’—Sam 103:1-3; Fwakyuk 21:1-5.
20. Efu kut ku in fwak la lalalfongi el kasru kut nu ke “len koluk” lun matuo?
20 Lalalfongi el ku in kasru kut pa in mongfwusesr ke “len koluk” ke pal in matuo, ke pal se ku lun manosr wanginla. (Ekklisiastis 12:1-7) Ke ma inge met matu nu kemwa elos ku in pre oanu met sim lun Sam el oru ke pal se ma el on: “Tu kom fwinsrak luk, O Leum Jeova . . . Nik kom sisyula in pal Nga matuo; nik kom filiyuwi ke Nga munasla.” (Sam 71:5, 9) Met sim lun Sam el pulakin enenu lal ke kasru lun Jeova, oanu pulakin lun met lili Kristian wiesr su matuo tari ke orekma in kulansap lalos nu sin God. Ke sripen lalalfongi lalos, elos etu la Jeova el kasrelos ke po lal su oan nu tok ma patpat.—Duteronomi 33:27.
Srukye Lalalfongi Ke Kas lun God
21, 22. Fwin oasr lalalfongi lasr, fuka ma inge el orekma nu ke futoto lasr nu sin God?
21 Lalalfongi ke peng mwo a ke Kas lun God nu kemwa ku in kasre kut in futoto nu sin Jeova. (Jemes 4:8) Paye, el pa Leum Kulanu lasr, a el Met Orekutla pa a Papa Tumasr. (Isaia 64:8; Mattu 6:9; Orekma 4:24) “Kom Papa tumuk, God luk, a eot ku lun lango luk,” pa inge ma met sim lun Sam el fwak ke on lal. (Sam 89:26) Kut fwin akkalemye lalalfongi nu sin Jeova a ke Kas Lal, kut ku in ouyepa pangnol “eot ku lun lango lasr.’ Sie me sang mwolanu na paye pa inge nu sesr!
22 Jeova el Papa tuman met Kristian akmusrala nu kemwa ke ngun mutal a lun met nu kemwa su welulos su oasr fwinsrak in moul fwin fwalu. (Rom 8:15) A lalalfongi lasr nu sin Papa tumasr in kosrao tia ku in kol nu ke wangin. Devid el fwak: “Ke papa tumuk a nine kiuk elos fwasr liki yu, na Jeova el e fwa srukyuyuk.” (Sam 27:10) Sayen ma inge, oasr kas paye su kut ku in lalalfongi na paye: “Tu Jeova el fwa tia som liki met sral meyen El fulat.”—1 Samuel 12:22.
23. Mea eneneyuk nu sesr kut fwin lungse in engunkin futoto ma patpat lasr nu sin Jeova?
23 Paye, In engunkin sie moul futoto nu sin Jeova su oan nu tok, kut enenu in lalalfongi ke peng mwo a eis Ma Simusla—oanu Kas lun God. (1 Tessalonika 2:13) Kut enenu in lalalfongi na paye Jeova in ma nu kemwa a kut lela Kas Lal in oanu kalem nu ke inkanek lasr. (Sam 119:105; Soakas 3:5, 6) Lalalfongi lasr e fwa kapkapek ke kut pre nu sel a lalalfongi ke pakomuta lal, pakoten, a kasru.
24. Kain in kas in pwarak fuka akkalemyeyuk in Rom 14:8?
24 Lalalfongi mokle kut in mwolela moul lasr nu sin God ke lusen pal su wangin saflaiye. Meyen oasr lalalfongi fukoko lasr, kut fwinne mise, kut met kulansap lal su mwolela tari nu sel su oasr fwinsrak ke sifwil moulyuk. Aok, “ke ma inge kut fwin moul, ku mise, kut ma lun Jeova.” (Rom 14:8) Lela kut in srukye ke insiesr kas in akkeye inge ke kut srukye lalalfongi lasr ke Kas lun God a ke kut tafwela in lalalfongi ke peng mwo.
Fuka Kom Topuk?
• Mea se inge lalalfongi, a efu kut enenu oiye mwomwo se inge?
• Efu arulanu yok sripe in oasr lalalfongi lasr ke peng mwo a ke Kas lun God nu kemwa?
• Fuka lalalfongi ku in kasru kut in aksumwosye kain in me srifwe puspis?
• Mea ma inge su kasre kut in srukye lalalfongi lasr?
[Pictures on page 10]
Jeova el akkeye Jeremaia a Elaija meyen oasr lalalfongi lalos
[Pictures on page 11]
Oasr lalalfongi fukoko lal Job, Piter, a Niemaia
[Pictures on page 13]
In engunkin sie moul futoto nu sin Jeova su oan nu tok ma patpat, kut enenu in akkalemye lalalfongi ke peng mwo