“Tu Na Kuh in Luhlahlfongi”

1. (a) Meac sikyak nuh sel Peter ke pacl se eltahl muhta in Meoa Galilee ac eng upac sac sikyak? (Liye petsac se meet ke mwe lutlut inge.) (b) Meac srihpac se pwacnacng Peter el muhtwacwack in tili?

KE SIE fong ah, mwet sap Peter ac kuhtuh sin mwet tuhma lutlut ah kwacfeacng in kal ut ke Meoa Galilee ke sie puhlan pacl ma engyeng na upac. Eltahl liyaclack Jesus ke el fahsr fin kof uh. Ac Peter el pahnglol ac siyuck lah el fin kuh in fahsracng nuh yohrohl. Ke Jesus el fahk elan fahsr fahlac nuh yohrohl, Peter el srolah liki oak soko ah ac muhtwacwack in fahsr nuh yohrohl. Tuhsruhktuh, kihtin pacl na tohkoh, Peter el muhtwacwack in tili. Efuh? Mweyen el ngwetack ac liye eng upac sac ac el liye pac noa ah na el muhtwacwack in sahngweng. Peter el pahng ke kahsruh na Jesus el sa na sruokilyac ac fahk nuh sel: “Kom suc srihklac luhlahlfongi la! Efuh kom kuh ahlohloh?”​—Matthew 14:24-32.

2. Meac kuht ac tuni ingena uh?

² Kuht fin tuni ma sikyak nuh sel Peter inge, ma tolu kuht ac kuh in etwaclah ke luhlahlfongi lal: (1) inkacnek ma Peter el ahkkahlwemye lah el luhlahlfongi muh Jeova el kuh in kahsrel, (2) srihpac ma pwacnacng muhnahslah luhlahlfongi lal Peter ac (3) ma kahsrel Peter elan sifwil luhlahlfongi. Ke kuht nuhnkuh yohk ke ip tolu inge, pa inge ma ac kahsre kuht in liye lah kuht ac oruh fuhkah kuht in “tu na kuh in luhlahlfongi.”​—Sie Corinth 16:13.

LUHLAHLFONGI LAH GOD EL AC FAH KAHSRE KUHT

3. Efuh kuh Peter el srolah liki oak soko ah? Ac meac kuht oruh tari ma oacpacna kuh apkuhran nuh kac?

³ Arlacna yohk luhlahlfongi lal Peter. Efuh kuht kuh in fahk ohinge? Ke pacl se ma Jesus el pahnglol ah, Peter el srolah liki oak soko ah ac fahsr fin kof uh. El luhlahlfongi lah kuh luhn God uh ac kuh pac in sang nuh sel kuh se sel Jesus inge. In oacpacna, ke pacl se Jesus el suli kuht in fahsr tohkohl, kuht wuhlelah moul lasr uh nuh sin Jeova ac bacptaislac. Efuh? Ke srihpen luhlahlfongi lasr nuh sin Jeova ac Jesus. Oacyacpac ke srihpen kuht luhlahlfongi muh eltahl ac fah kahsre kuht.​—John 14:1; riti Sie Peter 2:21.

4, 5. Efuh kuh luhlahlfongi lasr uh sie ma sacohk?

⁴ Luhlahlfongi uh sie ma na sacohk. Luhlahlfongi lal Peter uh pa sang kuh nuh sel elan fahsr fin kof uh, sie orekma ma tiac kuh in orek sin kuhtwena mwet. Luhlahlfongi uh kuh pac in kahsre kuht in oruh ma kuht nuhnkuh muh kuht ac koflah na oruh uh. (Matthew 21:21, 22) Kuhtuh sesr arlacna eklac ke ohiyac ac elah lasr meet ah pwacnacng mwet ma etwe kuht meet ah tiacna akihlen kuht. Kuht oruh eklac inge ke srihpen kuht luhngse Jeova ac el kahsre kuht in oruh. (Riti Colossae 3:5-10.) Luhlahlfongi lasr uh pa mokle kuht in wuhlelah moul lasr nuh sin Jeova ac in eklac kawuck lal, sie ma wacngihn sie sesr kuh in sifacna oruh fin tiac ke kahsruh lal.​—Ephesus 2:8.

⁵ Luhlahlfongi lasr uh oruh kuht in tu na kuh. Ke sie mwe puhpuhlyuck, pa inge ma kahsre kuht in lain orekma kuluk lal Devil, mwet lokoalok na kuh se lasr inge. (Ephesus 6:16) Oacyacpac, ke srihpen kuht luhlahlfongel Jeova, kuht tiac enenuh in elyahlac ke pacl ma kuht sun ma upac. Jeova el wuhlelah lah el ac fah use ma kuht enenuh uh kuht fin luhlahlfongel ac fihliyac Tohkohsrahi lal uh in pa ma se meet ke moul lasr uh. (Matthew 6:30-34) Yohk liki ma inge, ke srihpen luhlahlfongi lasr uh, Jeova el ac fah use sie mwe sang pa ke moul ma pahtpaht.

KUHT FIN TIAC LOHACNG, LUHLAHLFONGI LASR UH KUH IN TULAC

6, 7. (a) Meac eng ac noa ma Peter el tuh sahngweng kac ah kuh in luhmweyuck nuh kac? (b) Efuh kuh kuht enenuh in kahlwem kac lah kuht kuh pac in muhnahslah ke luhlahlfongi lasr uh?

⁶ Ke Peter el fahsr fin kof in Meoa Galilee, el muhtwacwack in sahngweng. Efuh? Ma ke srihpen eng ac noa uh. Ma inge kuh in luhmweyuck nuh ke ma upac ac mwe sruhf pucspucs ma mwet Christian ke pacl inge uh puhla. Finne kuhtuh sin ma upac inge arlacna upac, kuht kuh in tu na kuh ke kahsruh luhn Jeova. Tuhsruhktuh, esam ke ma sikyak nuh sel Peter inge. El tiac tili ke srihpen eng kuh noa inge, tuhsruhktuh Bible uh fahk lah “ke el liye upac luhn eng uh, el sahngweng.” (Matthew 14:30) Ke pacl se Peter el tilac lohacng nuh sel Jesus inge, el muhtwacwack in liye kuhiyacn eng upac sac. Na luhlahlfongi lal uh muhtwacwack in muhnahslah. Ke inkacnek se pacna inge, kuht fin arlacna lohacng na nuh ke ma upac lasr uh, kuht ac kuh pac in muhtwacwack ahlohloh ke kahsruh luhn Jeova nuh sesr uh.

⁷ Kuht enenuh in kahlwem kac lah kuht kuh pac in muhnahslah ke luhlahlfongi lasr uh. Efuh? Mweyen Bible uh fahk lah luhlahlfongi lasr uh kuh pac in tuhlac ke “ma kuluk ma lihksreni na sruokkuhti.” (Hebrew 12:1) In oacpacna Peter, kuht fin lohacng nuh ke ma tiac fal kuht in lohacng nuh kac, luhlahlfongi lasr uh ac arlacna sa in muhnahslah. Pwacnacng kuht ac etuh fuhkah lah luhlahlfongi lasr uh oasr ke mwe sensen? Kihsen siyuck ekahsr tohkoh inge ac fah kahsre kuht in tuni kuht sifacna.

8. Luhlahlfongi lasr nuh ke wuhlelah pucspucs luhn God uh ac muhnahslah fuhkah?

⁸ Yac srackna fokoko luhlahlfongi luhk ke wuhlelah nuhkewa luhn God uh? Ke sie mwe puhpuhlyuck, God el wuhlelah muh el ac kuhnahoslah oakwuck kuluk se lal Satan inge. Yac kuht lohsrlah ke kain in mwe sritacl kuh mwe pwacr luhn facl se lal inge? Fin ohinge, sahp kuht ac kuh in ahlohloh ac fin pwacye sahflah uh apkuhran me. (Habakkuk 2:3) Nuhnkuh ke sie pac mwe puhpuhlyuck, Jeova el oraclah oakwuck ke mwe molwelah ac el wuhlelah muh el ac nuhnak muhnahs nuh sesr ke ma kuluk lasr uh. Tuhsruhktuh, kuht fin nuhnkuh na ke ma tahfonglac lasr ke pacl somlah ah, kuht ac kuh in ahlohloh in nuhnkuh fin pwacye lah Jeova el nuhnak muhnahs nuh sesr. (Orekma 3:19) Ke sahflahiyac uh, ac kuh na in tuhlac engan lasr ke orekma in kuhlwacnsap lasr nuh sin God uh ac kuht tilac pac som fahkwack ac luti nuh sin mwet sahyac.

9. Meac ac kuh in sikyak kuht fin nuhnkuh na ke ma kuht ke ac luhngse?

⁹ Yac nga srackna kwacfeacng in sang kuhiyuck kewa nuh sin Jeova? Ke pacl se kuht kwacfeacng in orekma upac nuh sin Jeova, pa inge ma kahsre kuht in lohacng kuh nuhnkuh ke finsrak lasr ke pacl fahsruh uh. Tuhsruhktuh, ac fuhkah kuht fin muhtwacwack in nuhnkuh na ke ma kuht ke kuh luhngse? Ke sie mwe puhpuhlyuck, sahp kuht sroacng nuh ke sie orekma na yohk molo tuhsruhktuh ma inge ahksrihkyelah pacl lasr nuh ke orekma in kuhlwacnsap lasr nuh sin Jeova. Ma inge ac kuh in ahkmuhnahsye luhlahlfongi lasr uh ac kuh in oruh kuht “alsruhngesr,” srihkeni pacl ac orekma lasr nuh sin Jeova liki na ma kuht kuh in oruh na pwacye.​—Hebrew 6:10-12.

10. Ke pacl se kuht nuhnak muhnahs nuh sin mwet sahyac uh, ma inge ahkkahlwemye fuhkah luhlahlfongi lasr nuh sin Jeova uh?

¹⁰ Yac upac nuh sihk in nuhnak muhnahs nuh sin mwet sahyac? Ke pacl se ma mwet sahyac uh ahktoasrye kuh ahkngalye kuht, yac kuht ac sa in foloyak seltahl kuh tui ac tilac sramsram nuh seltahl? Fin ohinge, sahp kuht nuhnkuh na ke puhlakihn lasr uh. Kuht ahkkahlwemye luhlahlfongi lasr nuh sin Jeova ke pacl se kuht nuhnak muhnahs nuh sin mwet sahyac uh. Fuhkah? Mwet se fin oruh sie ma kuluk ah nuh sesr, el soemoul. Ke pacl se kuht oruh sie ma kuluk lain Jeova, kuht soemoul nuh sel. (Luke 11:4) Pwacnacng ke pacl se kuht nuhnak muhnahs nuh sin mwet sahyac, kuht luhlahlfongi kacl Jeova. Kuht luhlahlfongi muh el ac fah ahkinsewowoye ohiyac wo lasr ac mwe insewowo lal uh sacohk nuh sesr liki na in oruh sie mwet elan moli ma kuluk el oruh nuh sesr uh. Mwet tuhma lutlut lal Jesus uh lotwelah lah luhlahlfongi uh enenweyuck tuh sie mwet in nuhnak muhnahs nuh sin mwet sahyac. Ke pacl se Jesus el fahk nuh seltahl in nuhnak muhnahs pac nuh sin mwet ma oruh ma kuluk pucspucs nuh seltahl, mwet tuhma lutlut lal uh fahk nuh sel: “Ahkyohkye luhlahlfongi lasr.”​—Luke 17:1-5.

11. Meac srihpac ma kuh in pwacnacng kuht in tiac lotwelah kuhtwena ma ke kahs in kai ma ituckuh nuh sesr uh?

¹¹ Yac nga inse toasr ke pacl se nga eis kahs in kai? Suk inkacnek ma kom kuh in eis kahs in kahsruh kac liki na kom in suk ma tahfonglac kac kuh mwe muhnahs luhn mwet ma usot kahs in kahsruh inge. (Soakas 19:20) Nik kom pihlesruh sie sin pacl wowo lom inge in eis etwacack lah fuhkah nuhnak lom uh kuh in oacna Jeova!

12. Meac kalmac mwet se fin tohrkahskahs pacl nuhkewa ke mwet suc Jeova el srihsrngiyac in kol uh?

¹² Yac nga tohrkahskahs ke mwet ma kol congregation uh? Ke pacl se ma mwet Israel nuhnkuh na ke riport kuluk luhn mwet kalngeyuck singucul ah, eltahl muhtwacwack in tohrkahskahs kacl Moses ac Aaron. Na Jeova el siyuck sel Moses: “Puhtahkah elos ac srahngesr luhlahlfongi yuc?” (Oekyuk 14:2-4, 11) Pwacye, Jeova el etuh lah mwet Israel inge tiac luhlahlfongel mweyen eltahl tohrkahskahs lainuhl Moses ac Aaron, suc el srihsrngiyac. Ke inkacnek se pacna inge, kuht fin tohrkahskahs pacl nuhkewa ke mwet ma Jeova el srihsrngiyac in kol mwet lal mihsenge uh, sahp kalmac pa luhlahlfongi lasr nuh sin God uh muhnahslah.

13. Efuh kuh kuht tiac enenuh in toasrlah kuht fin puhla muh muhnahslah luhlahlfongi lasr uh?

¹³ Tukun kom nuhnkuh ke kihsen siyuck inge nuhkewa, kom tiac enenuh in toasrlah kac kom fin akihlen muh luhlahlfongi lom uh muhnahslah. Esam lah mwet sap Peter el tuh muhtwacwack in sahngweng ac ahlohloh pac. Tuh oasr pac pacl Jesus el sang kahs in kai nuh sin mwet sap nuhkewa lal ah ke srihpen “srihklac luhlahlfongi” laltahl. (Matthew 16:8) Tuhsruhktuh, mwe lutlut na yohk srihpac se pa kuht kuh in lotwelah ke ma sikyak nuh sel Peter inge. Lohacng nuh kac lah meac el oruh tukun el muhtwacwack in ahlohloh ac tili inkof uh.

NUHNKUH YOHK AC ETAHI MWE SRIHKASRAK LAL JESUS TUH LUHLAHLFONGI LOM AN IN YOHKWELIHK

14, 15. (a) Meac Peter el oruh ke pacl se el muhtwacwack in tili? (b) Kuht ac “suilyac na Jesus” fuhkah?

¹⁴ Meac Peter el suhlahklahk in oruh ke pacl se el muhtwacwack in tili ah? Peter el arlacna suhmaht ke kofkof uh, pwacnacng el kuh na in kofyang nuh ke oak soko ah. (John 21:7) Tuhsruhktuh, efuh kuh el tiac oruh? Mweyen el tiac fihliyac luhlahlfongi lal in el sifacna muh pa ac kahsrellah uh. El sifwil lohacng nuh sel Jesus ac eis kahsruh sel. Kuht fin puhla muh luhlahlfongi lasr uh muhnahslah, kuht enenuh na in etahel Peter. Kuht ac oruh ma inge fuhkah?

¹⁵ In oacna ke Peter el sifwil ngwetacng nuh sel Jesus ke kahsruh lal, kuht enenuh pac in “suilyac na Jesus.” (Riti Hebrew 12:2, 3.) Tuhsruhktuh, kuht tiac kuh in liyacl ke muhtahsr oacna Peter. Pwacnacng kuht ac “suilyac na Jesus” fuhkah? Ke kuht lutlutkihn ma el luti ac oruh, ac kuht oacyacpac fahsr in falkacl. Ke kuht oruh ma inge, kuht ac kuh in eis kahsruh ma kuht enenuh tuh in yohkwelihk luhlahlfongi lasr uh. Lwelah kuht in nuhnkuh ke kuhtuh inkacnek ma kuht kuh in etahel Jesus kac.

16. Bible uh kahsre kuht in ahkyohkye luhlahlfongi lasr uh fuhkah?

¹⁶ Ahkyohkye luhlahlfongi lom ke Bible uh. Jesus el luhlahlfongi na pwacye lah Bible uh pa Kahs luhn God ac kuht eis kahs in kahsruh ma wo emeet uh kac. (John 17:17) In etahel Jesus, kuht enenuh in riti Bible uh ke lwen nuhkewa, lutlutkihn ac nuhnkuh yohk ke mwe lutlut ma kuht lotwelah kac uh. Kuht enenuh pac in suk top nuh ke kuhtwena kihsen siyuck lasr. Ke sie mwe puhpuhlyuck, yac kom luhlahlfongi na pwacye lah kuht muhta ke lwen sahflah? Ahkyohkye luhlahlfongi lom kac uh ke kom lutlutkihn kahs pahluh in Bible ma ahkpwacyeye lah kuht muhta ke lwen sahflah. Yac kom luhngse in ahkyohkye luhlahlfongi lom ke wuhlelah pucspucs luhn God ke pacl fahsruh uh? Kom enenuh in lutlutkihn kahs pahluh in Bible ma ahkpwacyeyuck tari. Yac kom luhlahlfongi na pwacye lah Bible uh fal nuh ke pacl inge? Kom kuh in riti ma sikyak nuh sin mwet lili wiyacsr ma ekuhllah ohiyen moul laltahl meet ah nuh ke sie moul wo ke srihpen kahsruh luhn Bible uh.a (Liye footnote.)​—Sie Thessalonica 2:13.

17. Efuh kuh Jesus el kuh in muhtwacnglah mwe srihfe na upac? Kom ac etahel fuhkah?

¹⁷ Lohacng nuh ke mwe insewowo ma Jeova el wuhlelah kac uh. Jesus el nuhnkuh yohk ke mwe insewowo ke pacl fahsruh uh, ac ma inge kahsrel in muhtwacnglah mwe srihfe na upac. (Hebrew 12:2) Wacngihn sie pacl el lohsrlah ke ma luhn facluh. (Matthew 4:8-10) Kuht ac etahi mwe srihkasrak lal Jesus inge fuhkah? Nuhnkuh yohk ke mwe insewowo pucspucs ma Jeova el wuhlelah uh. Petsacelah muh kom oasr ke facl sasuc uh. Kom kuh in sruhloaclah kuh suhmuhslah ke sie pwepuh ma kom ac oruh ke Paradise. Kuh sahp suhmuhslah inen mwet ma ac sifwil moulyak ma kom ke sramsram nuh se ac ma kom ke fahk nuh seltahl uh. Pwacye lah wuhlelah pucspucs inge ma nuh sin mwet uh. Tuhsruhktuh in oacna Jesus, nuhnkuh ke ma inge oacna wuhlelah pucspucs luhn God nuh sum.

18. Puhruhe uh ahkkweye luhlahlfongi lom uh fuhkah?

¹⁸ Puhruhe siyuck in yohkwelihk luhlahlfongi lom. Jesus el luti mwet tuhma lutlut lal ah in puhruhe siyuck sin Jeova ke ngun muhtahl. (Luke 11:9, 13) Ke kom puhruhe siyuck ke ngun muhtahl, siyuck pac luhlahlfongi lom an in yohkwelihk. Pa inge sie ip ke fahko luhn nguhn. Kom kuh in fahk in arlac kahlwem puhruhe lom uh. Ke sie mwe puhpuhlyuck, kom fin akihlen lah upac nuh sum in nuhnak muhnahs nuh sin mwet sahyac, siyuck sin Jeova elan ahkkweye luhlahlfongi lom an in tu na kuh ac kahsre kom in nuhnak muhnahs nuh sin mwet sahyac.

19. Kuht ac sulaclah fuhkah kawuck na wowo?

¹⁹ Sulaclah kain in kawuck ma yohk luhlahlfongi la. Jesus el sulaclah ahkwoyac kawuck lal uh. Mwet sap lal pa kawuck fototo emeet lal uh. Yohk luhlahlfongi laltahl, eltahl oaru ac ahkos puhsracl. (Riti John 15:14, 15.) Etahel Jesus ac sulaclah ahkwoyac kawuck lom uh. Enenuh in mwet ma yohk luhlahlfongi la suc ahkos Jesus. Kawuck pwacye uh kuh in fahk ma na pwacye uh nuh sin sie sin sie, finne ke pacl ma eltahl enenuh in sang kuh eis kahs in kahsruh.​—Soakas 27:9.

20. Meac ac sikyak kuht fin kahsruh mwet sahyac in ahkkweye luhlahlfongi laltahl uh?

²⁰ Kahsruh mwet sahyac in muhsaheack luhlahlfongi laltahl uh. Ke sramsram ac orekma lal Jesus, el kahsruh mwet tuhma lutlut lal uh in ahkyohkye luhlahlfongi laltahl. (Mark 11:20-24) Kuht enenuh in etahi mwe srihkasrak lal Jesus uh. Ke kuht oruh ma inge, kuht ac ahkyohkye luhlahlfongi lasr ac luhlahlfongi luhn mwet sahyac pac. (Soakas 11:25) Kom ac kahsruh fuhkah mwet ke acn in forfor lom an? Ke kom luti mwet sahyac ke Bible uh, lihksreni ahkkahlwemye mwe ahkpwacyeye kac lah oasr na pwacye God, el nuhnkuh kacsr, ac lah Bible uh pa Kahs luhn God. Kom ac kahsruh fuhkah mwet lili wiyom uh in ahkyohkye luhlahlfongi laltahl? Kom fin akihlen lah mwet se tohrkahskahs ke mukul lili ma kol kuht uh, nik kom sa na forlah luhkel. Orekmakihn nuhnak wo lom in kahsrel elan sifwil ahkyohkye luhlahlfongi lal uh. (Jude 22, 23) Kom fin srackna wi lutlut ke lohm lutlut ac mwet luti lom uh sramsram ke luhlahlfongi luhn mwet pucspucs muh mwet uh tuhkuh ke ma orahkrahk (evolution), ahkkahlwemye puhlaik ac kwacfeacng in ahkuhtweyac luhlahlfongi lom ke ma oreklac nuhkewa uh. Kom ac kuh in lut ke nuhnak kuh kahs luhn mwet luti lom ac tuhlihk lutlut wiyom uh.

21. Meac Jeova el wuhlelah nuh sin kais sie sesr?

²¹ Jeova ac Jesus kahsrel Peter elan kuhtanglah kuhtwena ahlohloh kuh sahngweng lal. Tok kuhtuh ke moul lal Peter, el eklac mwe srihkasrak na wo se nuh sin mwet sahyac ke luhlahlfongi yohk lal. Ke inkacnek se pacna inge, Jeova el kahsruh kais sie sesr in tu na kuh ke luhlahlfongi uh. (Riti Sie Peter 5:9, 10.) Yohk orekma ma enenweyuck in muhsaheack sie luhlahlfongi na kuh, tuhsruhktuh kuht fin kwacfeacng na Jeova el ac fah ahkinsewowoye kuht.