Kaifweung In Kulansap Nu Sin Jeova Ke Sie Inse Sumwos
“Insiyuk tu ku, O God, insiuk tu ku.”—SAM 57:7.
1. Efu ku oasr lalalfongi lasr oanu Devid?
JEOVA el ku in kasre kut in tu ku ke moul in lalalfongi lasr, tu kut fwa ku in srukye ku moul in Kristian paye oanu sie met kulansap lal su mwolela tari. (Rom 14:4) Ke ma inge, kut ku in filiye lalalfongi lasr oanu Devid su wi pa simusla Sam, el on ou inge: “Insiuk oakiyuki ku, O God.” (Sam 108:1) Fwin insiesr ku a paye, kut fwa ku in akpayeye mwolela lasr nu sin God in paye. A ke kut suk kasru a ku lal pal nu kemwa, kut fwa ku in tu ku in lalalfongi lasr oanu sie met oaru su, “orekma nu sin Leum pal nu kemwa.”—1 Korint 15:58.
2, 3. Mea ma yok sripe ke kas in kasru lal Poul su simusyukla in 1 Korint 16:13?
2 Ke kas in akkeye su orek nu sin met nu kemwa su fwasr tokin Jisus in an Korint in pal meeta a ouyepa nu sin met Kristian in pal inge, met sap Poul el fwak: “Komwos in sano, tu ku in lalalfongi, komwos in watwen oanu met mokul, komwos in ku.” (1 Korint 16:13) In kas Greek kais sie ma sap inge orekmakinyuk in pal inge (present tense), paenang enenu in orekmakinyuk kas inge pal nu kemwa. Mea ma yok sripe ke kas inge?
3 Kut ku in “sano” ke moul in ngun fwin kut lain Devil a suk in futoto nu sin God pal nu kemwa. (Jemes 4:7, 8) Tupan lasr nu sin Jeova ku in kasre kut ke kunokon in kulansap lasr in tia fuleak a in ‘tu ku in lalalfongi Kristian.’ Kut—wekunang pa mutan su muta inmaslosr—elos “watwen oanu sie mokul” ke moniyuk in oru kulansap lalos oanu sie met su fwakelik peng mwo lun Togusrai. (Sam 68:11) Kut “ku in oru ma nu kemwa” fwin kut kaifweung na in suk kasru sin Papa tumasr su in kosrao ke ku in oru ma nu kemwa el lungse.—Filippai 4:13.
4. Mea paenang kut in baptaisla oanu sie met Kristian?
4 kut tu ku ke lalalfongi paye ke pal se kut orala mwolela lasr nu sin Jeova a eis baptais ke kof. Tusruktu, mea ma inge su ku in kol nu ke baptais lasr? Ma se meet kut eis etauk paye lasr ke Kas lun God. (Jon 17:3) Sripe inge sang kasru yok nu ke lalalfongi a mokle kut in auliyuk a forla, enenu in oasr pulakin lun auli yok ke ma koluk su orekla in pal meeta. (Orekma 3:19; Hibru 11:6) Tokin ma inge kut forla, meyen kut forla liki inkanek koluk nu kemwa tu kut in ku in suk moul su fwal nu ke lungse lun God. (Rom 12:2; Efesus 4:23, 24) Tokin ma inge pa, mwolela su kut oru ke insiesr kemwa nu sin Jeova ke inkanek lun pre. (Mattu 16:24; 1 Piter 2:21) Kut orala ngusr lasr ke ella mwo nu sin God a kut baptaisla in sang akul ke mwolela lasr nu sel. (1 Piter 3:21) Fwin ma inge esamyuk mwo na e fwa ku in kasre kut in loang akmwoye nu ke me enenu su fwal in orek in sang kasru mwolela lasr a in kafweung na in kulansap nu sin Jeova a in srukye sie inse paye nu sin Jeova wikin inse sumwos.
Kaifweung In Suk Etauk Paye Nu Sum
5. Efu ku kut enenu in tafwela lutlut in eis etauk ke Ma Simusla?
5 In moul fwal nu ke mwolela lasr nu sin God, kut enenu in tafwela in eis etauk paye lun Baibel su ku in akkeye kut. Fuka lupan engun mwomwo lasr ke pal se meet su kut eis me mongo lun ngun su ikasla arulanu kalem ke ma paye lun God! (Mattu 24:45-47) Kain in “me mongo” inge arulanu eu emem—a ma inge nu kemwa arulanu mwo in sang kasru moul in ngun lasr. Ke pal inge arulanu mwo in kaifweung in eis mongo lun ngun inge in sang kasre kut in tu ku oanu sie met kulansap lun Jeova su mwolela tari.
6. Fuka oreye kom in ku in eis kasru nu ke etauk ke ma paye lun Baibel?
6 Kaifweung eneneyuk in akyokye etauk lasr ke Ma Simusla. Sukyen etauk se inge ku in lumeyuk oanu sukyen sie ma saok lukma—kaifweung na paye eneneyuk in oru ou inge. Tusruktu, nu ke “etauk lun God” e fuka mwolanu oiye fwin sie met el koneak”! (Soakas 2:1-6) Ke pal se sie met orekma lun Togusrai su oru orekma in forfor lal el sun kom ke pal se meet a srike in mutamwauk ke sie lutlut lun Baibel nu sum, fwin el mokul se ku mutan se, saap el orekmakin buk inge Etauk Su Ku In Kol Nu Ke Moul Ma Patpat. Na srike nunku ke lusen pal se su orekmakinyukla nu ke kais sie sapter, su saap ku in yok liki pal se sisila ke sapter sen. Oasr ma yok kom koneak ke pal se ridiyuk kais sie Ma Simusla su oasr ke me rid a sramsramkinyuk nu sum. Fwin oasr pa sie ip ka su tia arulanu kalem sum a aketeyuki pa nu sum kom in kalem ka. El su luti kom ke Baibel el akola na paye, el pre ke ngun mutal lun God, a srike in kasre kom tu kom in ku in koneak etauk lun ma paye ke insiom nu fon.
7. Mea e ku in sang kasru sie met el an ku in oru luti lal nu sin kutupa met?
7 Kain in kasru inge mwo, oanu Poul el simusla: “Lela el su lutlut in kas in kasrel su luti in ma nu kemwa su mwo.” (Galetia 6:6) In kas Greek ke fus se inge akkalemye la luti ke Kas lun God in ma nu kemwa mwo in sang kasrel su “lutlut kas.” Paenang inkanek su lutiyuk kom ka ku in kasru kom in luti pa kutu met saye. (Orekma 18:25) In kasre kom in tu ku ke mwolela lom, kom enenu in kurunganang akmwoye moul in ngun lom a tu ku ke lalalfongi lom fwin kom kaifweung na in lutlut ke Kas lun God pal nu kemwa.—1 Timote 4:13; Taitus 1:13; 2:2.
Esam Auliyuk a Forla Lom
8. Fuka oreye sie met in ku in sroukye na sie moul sumwos lun God?
8 Ku kom esamak kain in engun a insemwomwo su kom pulakin ke pal se kom lotela ma paye, auliyuk forla liki ma koluk, a tok oasr pulakin lom la paye God el nunuk munas nu sum ke sripen lalalfongi paye lom nu ke me kise lango lun Jisus? (Sam 32:1-5; Rom 5:8; 1 Piter 3:18) Ma na paye se la kom tia lungse in sifwil folokla nu ke kain in oiyen moul koluk se lom meeta. (2 Piter 2:20-22) Inmaslon ma puspis su eneneyuk, pre nu sin Jeova pal nu kemwa fwa kasre kom in srukye oiye mwo, in moul fwal nu ke mwolela lom, a kom fwa ku in oru kulansap lom nu sin Jeova ke paye.—2 Piter 3:11, 12.
9. Fwin kut forla liki kain in orekma koluk nu kemwa, piye inkanek se ma mwo kut in orekmakin?
9 Fwin kom forla tari, a forla liki kain in orekma fokfok nu kemwa lom meet, na kom enenu in kaifweung suk kasru sin God tu kom fwa ku in sroukye ku a paye insiom. Fwin lumeyuk, a oupanu ke kom kasrusr fwin soko sitosa a koneak la kom kasrusr ke soko inkanek su tia paye na kom srike in suk sie map su ku in akkalemye inkanek sumwos su fwal kom in kasrusr ka paenang kom mutamwauk in kasrusr ke inkanek sumwos. Nikmwet fuleak ke inkanek sumwos su komwos kasrusr ka tari ke pal inge. Kaifweung in filiye lalalfongi lom nu ke inkanek in kasru lun God, a sroukye na ku sulela lom in fwasr ke inkanek su kol nu ke moul.—Isaia 30:20, 21; Mattu 7:13, 14.
Nikmwet Mulkunla Mwolela a Baptais Lom
10. Piye ip se ma kut enenu in kurunganang ke oiyen mwolela lasr nu sin God?
10 Nikmwet mulkunla la kom orala sie mwolela nu sin Jeova ke pre, wikin lalalfongi paye lom in oru kulansap ma patpat. (Jud 20, 21) Mwolela el sie akul in sifwanu srela, mukelanu, in ku in kulansap nu ke moul mwolanu. (Livitikus 15:31; 22:2) Mwolela lom tia ma nu ke kitin pal na ku oanu kunokon lom nu sin sie met paenang kom enenu in oru. Akmwuk lun mwolela se inge ma nu tok ma patpat nu sin Leum Ku Liki Ku in kosrao a fwalu, a in paye nu ke akmwuk mwolanu lun God ma patpat. Aok, ‘mise ku moul, kut ma lun Jeova.’ (Rom 14:7, 8) Engun a insemwomwo lasr tuku ke moul sumwos a paye lasr in akos ma lungse lal a kaifweung in kulansap nu sel ke ku a paye.
11. Efu ku kom enenu in esam baptaisla lom a ma yok su tuku ka?
11 Pal nu kemwa srike in esam baptais lom ke kom orala mwolela lom ke sumwos a paye nu sin God. Baptais inge tia orekla ke inkanek lun eye inse ku orekmakinyuk ku nu sin sie met in baptaisla, meyen kom sifwanu orala sulela lom. Ya kom orala sulela lom ingenu in fwal nu ke lungse lal ke lusen moul lom nu fon? Kom orala tari siyuk lom nu sin God in kasru kom in oasr ella nasnas a baptaisla in akkalemye mwolela lom nu sel. Srike in srukye na ella nasnas se inge ke kom akpayeye mwolela lom, a Jeova el e fwa akinsemwomwoye kom.—Soakas 10:22.
Lungse Lom Oasr Ip Yok ka
12, 13. Fuka sulela lasr sifwanu ku in kasru mwolela a baptais lasr?
12 Aok, paye la, mwolela a baptais el orala me insemwomwo yok nu sin million puspis ke met fwin fwalu nu fon. Ke pal se kut orala mwolela lasr ke inkanek lun baptais nu sin God, kut oanu mise nu ke ma koluk su kut oru in pal meeta ke oiyen moul lasr, tusruktu sumwos lasr in oru sulela srakna on yurosr. Oanu sie met lalalfongi su eis lutlut, kut sifwanu oru sulela lasr ke pal se kut mwolela moul lasr nu sin God ke inkanek lun pre a baptaisla. In mwolela moul lasr nu sin God a in baptais el siyuk sesr in akilen ma lungse lun God a kut sulela ke nunuk paye in oru ou inge. (Efesus 5:17) Ou inge kut etawi Jisus, ke el sifwanu sulela in likiye me kamtu lal nu kemwa, baptaisla, a sang moul lal nu kemwa in oru ma nu kemwa su Papa tumal in kosrao lungse.—Sam 40:7, 8; Jon 6:38-40.
13 Jeova God el oakiye tu Mwen nutul fwa “aksumwosyeyukla ke me keok.” Ke ma inge Jisus el enenu in orekmakin sumwos lal in oru sulela in oaru a in muteng nu ke me keok su e fwa sikyuk nu sel. Ke sripe se inge, el kisekin “pre a kaifwe . . . ke tung ma lulap a sroninmet, a longyuk tari el ke sangeng sin God lal.” (Hibru 2:10, 18; 5:7, 8) Kut fwin akkalemye kain in sangeng inge pa nu sin God, kut ku pa in akpayeye la kut “longyuk tari,” a kut ku oanu Met Lo oaru lal.—Isaia 43:10.
Kom Ku In Eis Sie Inse Fukoko
14. Efu ku kut enenu in rid Baibel len nu kemwa?
14 Mea ku in kasre kom in eis sie inse fukoko tu in ku in kasru mwolela lom nu sin God? Ke sripen nien sun lom in akyokye etauk lom ke Kas lun God, paenang rid Baibel eneneyuk in orek ke len nu kemwa. Pa inge akmwuk su “met kulansap oaru a lalmetmet” elos kaifwe kut in oru pal nu kemwa. Kain in akmwuk inge sapkinyuk meyen in orala fwal nu ke mwolela lasr enenu kut in fwafwasyesr ke ma paye lun God pal nu kemwa. Fwin u lun Jeova eteyuk paye mu elos orekmakin me luti kikiap, na e wangin sripe in sapkinyuk in rid Baibel nu sin Met Lo lun Jeova a nu selos su lutlut yurolos.
15. (a) Mea mwo in nunkeyuk ke pal in oru sulela? (b) Efu ku in fwak mu orekma lun fwalu el tia orekma yok emeet lun sie met Kristian?
15 Ke pal in orek sulela, srike in nunkela meet pal nu kemwa la mea e sikyuk nu ke mwolela lom nu sin Jeova. Kutu sin sulela su kom e fwa oru pa ke sulela lun orekma lom. Ya kom suk kain in orekma ma e ku in kasre kom in akkeye alu paye? Met puspis misenge su oasr nien orekma a met orekma puspis elos koneak la met Kristian su mwolela tari fwal in lalalfongiyuk a alken ke orekma, elos ouyepa akilen la Met Lo lun Jeova elos mwo ke orekma a tia suk in sroukye orekma fulat pengpeng lun fwalu a elos tia suk in alein nu sin kutu met in sroukye kunokon lun mwal fulat. Sripe yok lalos su paenang elos tia oru ou inge pa ke sripen elos tia oru nien sun lalos in kasrup, fulat, pengpeng, a in eis ku lun mwal fulat. Nu selos nu kemwa su moul fwal nu ke mwolela lalos, elos suk in oru orekma su ma yok sripe emeet pa in oru ma lungse lun God pal nu kemwa. A ma se akluo pa in oru orekma lun fwalu su ku in sang kasru me enenu lalos in ikwe a kutupa enenu saye. In oanu met sap Poul, orekma nu kemwa su elos oru, elos sulela orekma in kulansap lun met Kristian pa yok emeet nu selos. (Orekma 18:3, 4; 2 Tessalonika 3:7, 8; 1 Timote 5:8) Ya kom oru pa mu orekma in kulansap nu ke Togusrai pa ma se ma yok eripe emeet in moul lom?—Mattu 6:25-33.
16. Mea kut ku in oru fwin lungse lun fwalu akkafofoye kut la liki mwolela in kulansap lasr nu sin God?
16 Oasr kutu met su arulanu kafofo ke kain in ma upa puspis meet liki elos koneak lalalfongi paye. Tusruktu, tokin elos koneak fwinsrak ke Togusrai wangin kutena ma elos ku in luma nu ke engun, insemwomwo, a lungse paye nu sin God! Nu ke me insemwomwo su elos pulakin tari ku in kasrelos mwo nu ke mwolela lalos nu sin Jeova. Tusruktu, efuka, fwin ke kutena sripe oasr ma upa sikyuk ke sripen akmwuk lun fwal se inge in sang akfosyeak “kas lun God,” in oanu otunmu su akkeokye soko sak in tia kapek a isus fwako? (Luk 8:7, 11, 14; Mattu 13:22; Mark 4:18, 19) Fwin kom pulakin mu oasr kain in luma inge akola in sikyuk nu sum ku sou lom an, lela kom in esam in sang me enenu nu kemwa lom nu sin Jeova a pre tu el fwa kasre kom in kapkapek in lungse a insemwomwo. Fwin kom sang ma toasr nu kemwa lom nu sel, el e fwa kasre kom a akkeye kom in engunkin orekma in kulansap nu sel a in tu ku ke insiom kemwa.—Sam 55:22; Filippai 4:6, 7; Fwakyuk 2:4.
17. Fuka oreye in ku in tu lain me sruf upa?
17 Kaifweung in pre nu sin Jeova God pal nu kemwa, in oupanu ke kom pre in pal se kom orala mwolela lom nu sel. (Sam 65:2) In pal se kom fwin sun me sruf ku sun me keok, esam in suk kolyuk lun God a ke kasru lal. Nikmwet mulkunla ma enenu ke lalalfongi, meyen met tuma lutlut Jemes el simusla: “Kutena sumwos fwin enenu in lalmetmet, lela lan siyuk sin God ka, el su ase nu sin met nu kemwa yokna, a el tia mulat; a e fwa sang nu sel. A lela lan siyuk ke lalalfongi a tia alollo tu el su alollo el oanu noa mwea unana a palela ke eng. A met se lan tia nunku tu el fwa eis kutena ma sin Jeova; El met inse luo a seokak oiyel in ma nu kemwa.” (Jemes 1:5-8) Fwin oasr me sruf upa, lela kut in esam ma inge la: “Wangin me sruf nu sumwos, a me sruf na su met elos ku ka. A God el oaru, su fwa tia liki komwos in srifweyuk yok liki ku lomwos, a in me srifwe el fwa oru inkanek in kaengla tu komwos in ku ka.”—1 Korint 10:13.
18. Mea kut ku in oru fwin ma koluk yok el akmunasyela kaifweung lasr nu ke mwolela lasr nu sin Jeova?
18 Fuka fwin oasr ma koluk yok lukma su kom orala su akkolukye ella lom a akmunasye kaifweung lom in akpayeye mwolela lom nu sin God? Kom fwin auliyuk, kom ku in koneak me pwarak in etu la Jeova el ‘tia pilesru sie inse musalla a toasr ke ma koluk la.’ (Sam 51:17) Suk kasru pa sin met Kristian elder nu kemwa su pakoten, in etu la—etawi lalos nu sin Jeova—fwa tia pilesru kena lom in sifwil futoto nu sin Papa tumom in kosrao. (Sam 103:10-14; Jemes 5:13-15) Na fwin oasr akmwuk lun aksasuye ku lun moul in ngun lom a in srukye inse paye, kom fwa ku in oru fwafwasryesr lom in sumwos a kom ku in koneak la kom ku in moul fwal nu ke mwolela lom nu sin God.—Hibru 12:12, 13.
Kaifweung in Kulansap Wi Sie Inse Paye a Ku
19, 20. Efu ku yok sripe kut in moul fwal nu ke mwolela lasr?
19 Ke pal inge su arulanu koluk, kut enenu in arulanu kaifweung in tu ku ke mwolela lasr a tia munasla in oru kulansap lasr nu sin God wikin inse paye. Jisus el fwak: “El su muteng nu ke safla el na fwa moul.” (Mattu 24:13) Ke sripen kut muta in “len safla,” paenang safla lun akmwuk inge ku in sikyuk ke pal oanu sie. (2 Timote 3:1) Yok liki nu kemwa, wangin sie sesr ku in etu la el ku in moul sun len lutu. (Jemes 4:13, 14) Ke ma inge arulanu yok sripe kut in moul fwal nu ke mwolela lasr in pal inge!
20 Met sap Piter el akkalemye ma inge ke leta akluo lal. El akkalemye la e fwa oanu met koluk su mise ke Sronot Lulap se in pal meeta, akmwuk lun fwal se inge wi met koluk nu kemwa, fwa kunausyukla ke “len lun Jeova.” Ou inge Piter el fwak: “Yen met su fwa fwal nu sumwos in muta in moul mutal a sumwosmwos”! El ouyepa tafwela in akkeyelos: “Tu ou inge met kulu, meyen komwos etu ma inge meet, liyekomwosyung tu komwos in tia sremla [ke srifwe lun met koluk] a komwos putatla liki ku lomwos.” (2 Piter 3:5-17) Oasr me fosrnga lulap nu sin sie met su baptaisla el fwin sremla a putatla liki ku lalos a sun saflaiyen moul lalos.
21, 22. Fuka kas in Sam 57:7 akpayeye nu sel Devid a ke kutu pa met Kristian?
21 Sulela lom in akkeye mwolela su kom orala nu sin God ku in tia munasla fwin kom sroukye na engun lom in oanu ke pal se kom tufwanu eis baptais lom a suk kasru sin God tu kas a orekma lom fwa me akinsemwomwoye insiel. (Soakas 27:11) Jeova el tia wi aktoasrye met lal, paenang kut enenu in oaru nu sel pal e nu kemwa. (Sam 94:14) El akkalemye pakoten a lungse in kunausla akmwuk lun met lokwalok lal a sang kasru nu sel Devid. Yoklanu me insenmwomwo lal ka, paenang Devid el akkalemye lalalfongi paye lal, tia alollo in munasla, a akkalemye lungse yok lal nu sin Met su Molella. Ke yoklanu kaksak lal, el on: “Insiuk tu ku, O God, insiuk tu ku Nga fwa on in kaksak.”—Sam 57:7.
22 In oanu Devid, met Kristian paye elos tia fwuleak ke kulansap lalos nu sin God. Ke sripen sulela ku lun insielos, paenang elos ku in tupan molela lalos a in sang ma nu kemwa nu sin Jeova, su elos lungse in on a kaksakin. Fwin nunuk lom ku a paye, el lalalfongi pal nu kemwa nu sin God, a ke kasru lal kom fwa ku pa in akpayeye mwolela lom. Aok, kom ku pa in oanu sie “met sumwosmwos” su met lun Sam el onkin: “El efwa tia sangeng ke peng koluk. Insiel oakiyuki in lalalfongi Jeova.” (Sam 112:6, 7) Ke lalalfongi nu sin God a me fwinsrak nu kemwa on in el, kom ku in moul fwal nu ke mwolela lom a kaifweung in oru kulansap nu sin Jeova ke ku paye lun insiom.
Ya Kom Esam?
• Efu ku eneneyuk kut in tafwela na in eis etauk paye lun Baibel?
• Efu kut enenu in esam pal in auliyuk a forla lasr?
• Kut eis fuka me insemwomwo kut fwin esam len in mwolela lasr a baptais?
• Mea e fwa ku in kasre kut in srukye na orekma in kulansap lasr nu sin Jeova a in wi pa sulela paye lun insiesr?
[Pictures on page 28]
Kafofo ke orekma in luti lun met Kristian pa orekma yok emeet lasr in kasre kut in kafweung na kulansap lasr nu sin Jeova wi sulela ku lun insiesr
[Picture on page 28]
Ya kom srukye na ku moul in ngun lom ke kom ridi Kas lun God len nu kemwa?