Efu Ku Kom Enenu in Mwulela Moul Lom nu sin Jeova?

“Sie lipufon lun God, su nga ma lal, a su nga orekma pa nu sel, el tu siskuk in fong se inge.”—OREKMA 27:23.

1. Inkanek puspus fuka orek tari sin met nukewa su lungse in eis baptais? A kusensiyuk puspus fuka enenu in siyukyuk sesr?

“IN FWAL nu ke me kise lun Jisus Kraist, ya kom auliyuk tari liki ma koluk lom a mwulela moul lom sifwana nu sin Jeova in oru ma lungse lal?” Pa inge sie ke kusensiyuk luo nu sin met nukewa su fwal in eis baptais ke saflaiyen me sramsram ke baptais. Efu ku met Kristian nukewa elos enenu in mwulela moul lalos nu sin Jeova? Fuka mwulela lasr nu sin Jeova ku in akinsemwomwoye kut? Efu ku orekma in alu lun sie met el tia ku in akinsemwomwoye God fwin el tia mwulela moul lal nu sel? Tu kut in eis etauk a kalem ke me top ka, kut enenu in akuteye meet la mea kalmen mwulela.

2. Mea kalmen orekma lun sie met in mwulela moul lal nu sin Jeova?

² Mea kalmen mwulela lun sie met nu sin God? Loang akmwoye ke ma Poul el akkalemye ke fototo lal nu sin God. Ye mutun met puspus su oasr ke soko oak su musalla, el pangon Jeova “God su nga ma lal.” (Ridi Orekma 27:22-24.) Met Kristian paye nukewa elos ma lun Jeova. Tusruktu, met puspus lun fwalu, elos ‘oan ye ku lun met koluklana.’ (1 Jon 5:19) Met Kristian elos mutawauk in ma lun Jeova, ke pal se elos mwulela moul lalos nu sel ke pre. Kain in mwulela inge el enenu in orek sin met se su lungse in mwulela moul lal nu sin God a tia nu sin met saye. Tokin ma inge el eis baptais lal ke kof.

3. Mea kalmen baptais lal Jisus? A ke inkanek fuka met nukewa su fwasr tokol elos etawi me srikasrak lal?

³ Jisus el akkalemye me srikasrak mwomwo nu sesr ke pal se el oru sulela lal sifwana in oru ma lungse lun God. Meyen el isusla nu ke mutunfwal Israel su mwuleyukla tari nu sin God, paenang Jisus el mwuleyukla pa nu sel. Tusruktu, ke pal in baptais lal, el oru ma se su yok sripe liki ma sapkinyuk ke Masap. Kas lun God el akkalemye la el fwak: “Liye! Nga tuku tari . . . in oru lungse lom, O God.” (Hibru 10:7; Luk 3:21) Baptais lal Jisus el me akul mwomwo ke orekma lal in mwulela moul lal sifwana nu sin God, a in oru ma lungse lun Papa tumal. Met nukewa su fwasr tokol elos etawi me srikasrak lal ke elos akkalemyelos in eis baptais lalos. Tusruktu, kalmen baptais lalos ke kof pa in akkalemye nu sin met nukewa la elos orala tari mwulela lalos sifwana nu sin God ke inkanek lun pre.

Mwulela El Kasre Kut Fuka

4. Mea oiyen kawuk lun Devid a Jonetan el akkalemye nu sesr ke kunokon lalos nu sin sie sin sie?

⁴ Mwulela lasr nu sin God oana met Kristian el arlana yok sripe. Ma inge el yok sripe liki kunokon lasr. Ke ma inge, fuka orekma lasr in oru sie mwulela el ku in kasre kut? Ke inkanek lun me pupulyuk lela kut in akuteye ke kain in insese lun met luo su sang ma lane nu selos. Sie me pupulyuk pa ke oiyen kawuk lun met luo. In insemwomwokin asrouki lom yurin met kawuk, kom enenu pa in oru kunokon lom nu sin kawuk lom. Oasr ma eneneyuk nu ka in oru ma kunom nu sel a kom pulakin pa la kom enenu in nunku a karungin met kawuk lom. Sie oiyen kawuk na mwomwo su akkalemyeyuk in Baibel pa kel Devid a Jonetan. Aok elos orala mwuleang ke kawuk lalos nu sin sie sin sie. (Ridi 1 Samuel 17:57; 18:1, 3.) Kain in kawuk inge tia arlana ku in liyeyuk, tusruktu fwin met kawuk elos nunku yok in akpayeye kunokon lalos nu sin sie sin sie, oiyen kawuk lalos fwa eis me akkeye yok.—Soakas 17:17; 18:24.

5. Mea sie met kulansap el enenu in oru fwin el lungse in kulansap nu sin leum mwomwo lal nu tok?

⁵ Masap su God el sang nu sin met Israel el akkalemye ke sie pa oiya su metu elos ku in eis ma lane ke elos akpayeye kunokon lalos. Fwin sie met kulansap el lungse in muta na yurin leum lal ke lusen moul lal nufon, el ku in orala sie mwuleang nu sin leum lal la el lungse in muta yurol pal nukewa. Masap el akkalemye: “A met kulansap se inge fwin fwakak lemtulaiuk, ‘Nga lungsik leum luk, mutan kiuk, a tulik; nga fwa tia illa in sukosok,’ na leum lal a fwa wisel nu sin God, a fwa wisel nu ke mutunoaoa, ku nu ke sru in mutunoaoa; a leum lal fwa sokla srel ke sie me ol, a el fwa orekma nu sel nu tok.”—Exodus 21:5, 6.

6, 7. (a) Fuka mwuleang sang kasru mwo nu sin met puspus? (b) Mea ma inge akkalemye ke fototo lasr nu sin Jeova?

⁶ Akwuk ke payuk el sie pa oiya su enenu in oasr mwuleang a insese lun met luo. Ma inge el sie mwuleang tia ke sie ma simusla ke pwepu, tusruktu nu sin sie met. Mokul a mutan su tukeni muta tusruktu tia payuk elos tia ku in pulakin moul engun a insemwomwo; wekunang tulik nutulos. Tusruktu mokul a mutan su payuk elos insese in akpayeye kunokon lalos nu sin sie sin sie, a ke sripe inge oasr sripe mwomwo lalos fwal nu ke akwuk lun ma Simusla in kafweang in aksumwosye ma upa nukewa lalos ke inkanek lun lungse.—Mattu 19:5, 6; 1 Korint 13:7, 8; Hibru 13:4.

⁷ In pal meeta, oasr ma lane mwomwo nu sin met nukewa su oru contract ku ma simusla ke business a ke orekma lalos. (Mattu 20:1, 2, 8) Ke pal inge, kain in akwuk inge srakna mwo a sang kasru. Ke sie me pupulyuk, kut eis me kasru yok fwin oasr sie contract ku ma simusla, meet liki kut mutawauk in oru sie business, ku meet liki sie met orekma el wi ke sie company. Ke ma inge, fwin mwuleang ku insese lun met luo ku in akkeye oiyen kawuk lalos, ke akwuk lun payuk, a ke business a orekma, paye la mwulela lom nu sin Jeova ku in akinsemwomwoye kom ke inkanek yok meyen ma inge ku in akkeye fototo lom nu sel! Lela kut in lutlutkin ingena ke me insemwomwo puspus su metu in pal meeta elos pulakin ke sripen elos mwulela moul lalos nu sin Jeova God a la fuka ma inge el yok sripe liki mwulela lun met luo nu sin sie sin sie su elos insese in akpayeye.

Fuka Mwulela nu sin God Sang Kasru nu sin Met Israel

8. Nu sin met Israel, mea kalmen mwulela nu sin God?

⁸ Met Israel nukewa oana sie mutunfwal elos mwulela moul lalos nu sin Jeova ke elos orala mwuleang nu sin God. Jeova el esalosani apkuran nu ke Eol Sainai, a el fwak nu selos: “Komwos fwin akos pusrek inge, a liaung mwuleang luk, na komwos fwa ma saok luk sin mutanfwal nu kemwa.” Met e nukewa elos tukeni topuk a fwak: “Ma nu kemwa Jeova el fwak kut fwa oru.” (Exodus 19:4-8) Mwulela lun met Israel nu sin God el yok liki sulela lalos in akpayeye kunokon lalos nu sel. Mwulela lalos el kalmekin la elos ma lun Jeova, a Jeova God el nunku kelos oana “ma saok” lal.

9. Fuka met Israel elos eis ma lane ke elos mwulela moul lalos nu sin God?

⁹ Met Israel elos eis ma lane yok ke sripen elos ma lun Jeova. El paye nu selos a karunginelos oana sie papa kulang nu sin tulik natul. God el fwak nu sin met Israel: “Ya sie mutan el ku in mulkunla tulik titi natul, tu el fwa tia pakomuta mwen nutin insiel? Aok, elos ku in mulkunla, tusruktu Nga fwa tia mulkinkomla.” (Isaia 49:15) Jeova el sang nu selos me kasru su tuku ke Masap, kas in akkeye lun met palu nukewa, a me karungin lun lipufan puspus. A met sim lun Sam el simusla: “El fwakak kas lal nu sel Jekob, masap lal a nununku lal nu sin Israel. El tia oru ouinge nu sin kutena mutanfwal.” (Sam 147:19, 20; ridi Sam 34:7, 19; 48:14.) In oana ke Jeova el karungin mutunfwal se inge su ma lal in pal meeta, el fwa karunginelos nukewa su mwulela moul lalos nu sel ke pal inge.

Efu ku Kut Enenu in Mwulela Moul Lasr nu sin God

10, 11. Ya kut isusla nu ke sou lun God? Akuteye.

¹⁰ Kutu met elos nunku fwin elos fwa mwulela moul lalos a eis baptais, elos nunku pa ke kusensiyuk inge, ‘Efu ku nga tia ku in alu nu sin God fwin nga tia mwulela moul luk nu sel?’ Me top nu ka kalem kut fwin nunku ke ma paye ke oiyesr ye mutun God. Esam la, ke sripen ma koluk lal Adam, ke pal se kut isusla kut tia wi ke sou lun God. (Rom. 3:23; 5:12) Orekma lasr in mwulela moul lasr nu sin God el ma eneneyuk yok sripe tu kut in ku in wi ke u lal su oana sie sou. Lela kut in liye la efu.

¹¹ Wangin papa tumasr fwin fwalu su ku in ase nu sesr moul ma patpat, oana ke akwuk lun God ke mutawauk me. (1 Timote 6:19) Kut tia isusla oana tulik nutin God meyen ke pal se Adam a If elos orala ma koluk, met nukewa elos srelosla liki Papa tumalos su kulang a Met Oralosla. (Srike liye Duteronomi 32:5.) Mutawauk in pal se inge fwasru, met nukewa fwalu elos moul tusruk tia wi ke sou lun Jeova, aok elos srela liki God.

12. (a) Fuka met sesumwos elos ku in wi ke u lun God oana sou lal? (b) Inkanek puspus fuka kut enenu in oru meet liki baptais?

¹² Ne ouinge, oana met se met se kut ku in siyuk sin God in eis kut nu ke u lun met kulansap nukewa lal su oana sou lal.a Ma inge a ku fuka nu sin met sesumwos nukewa oana kut? Met sap Poul el simusla: “Kut . . . iumweyukla nu sin God ke mise lun Mwen natul, in pal kut met lokwalok.” (Rom 5:10) Ke pal in baptais kut siyuk sin God ke sie ella a nunak mwomwo tu kut in me akinsemwomwoye nu sel. (1 Piter 3:21) Tusruktu meet liki baptais, oasr step puspus su kut enenu in oru. Kut enenu in eis etauk ke God, in lutlut in lulalfongi nu sel, auliyuk, a in ekulla inkanek koluk lasr. (Jon 17:3; Orekma 3:19; Hibru 11:6) A oasr pa ma se saye su kut enenu in oru meet liki God el eis kut nu ke sou lal. Mea se inge?

13. Efu ku arlana fwal nu sin sie met in oru mwulela nu sin God tu elan ku in wi ke sou lun met kulansap nukewa Lal?

¹³ Meet liki sie met su sriyukla liki God el fwal in wi ke u lun met kulansap lun God su pupulyukkinyuk oana sou lal, el enenu in oru sie mwulela paye nu sin Jeova. In kalem ka, srike nunku ke sie papa su akkalemye kulang nu sin sie tulik fwusr su wangin papa a nine, a papa se inge el lungse in nutella oana sie met in sou lal. Papa se inge el eteyuk sin met nukewa mu el sie met mwo. Tusruktu, meet liki el eis tulik mokul se inge in oana mwen natul, mokul se inge el lungse tulik se inge in orala sie mwulela nu sel. Ke ma inge mokul se inge el fwak nu sin tulik se, “Meet liki nga eis kom oana tulik mokul nutik, nga lungse in etu fwin kom e fwa akkalemye lungse a sunak nu sik oana papa tumom.” Fwin tulik mokul se inge el lungse in orala mwulela paye lal, na papa se inge su kulang el fwa eisel oana sie met in sou lal. Aok akwuk se inge el arlana mwo a fwal. Ke inkanek ouinge, Jeova el eis met nukewa su lungse na paye in mwulela moul lalos nu sel. Baibel el akkalemye: “Sang monumwos nu sel: me kise moul, mwuleyukla a me akinsemwomwoye nu sel.”—Rom 12:1, The New English Bible.

Mwulela el sie Orekma su Akkalemye Lungse a Lulalfongi

14. Ke inkanek fuka mwulela lasr el me akkalemyeyen lungse nu sin God?

¹⁴ Orekma lasr in oru mwulela nu sin God el me akpayeyen lungse paye lasr nu sin Jeova God. Ke kutu oiya el oana sie nu ke sie kas in mwulela ke pal in payuk. Sie mokul Kristian el akkalemye lungse lal ke el akkalemye kas in fulak ku mwulela la el fwa oaru nu sin mutan su el fwa payukyuk nu se, ke kain in ma sikyak nukewa. Ma inge el sie mwulela nu sin sie met a tia kas in fulak in oru ma se. Sie mokul Kristian el kalem ka la el tia ku in muta yurin mutan su el fwa payukyuk nu se fwin el tia na oru sie mwulela ke payuk. Ke inkanek ouinge, kut tia ku in engunkin na paye me insemwomwo puspus oana sie met ke sou lun Jeova fwin kut tia oru kas in mwulela nu sel. Ke ma inge kut mwulela moul lasr nu sin God meyen kut lungse in ma lal, a kut orala tari sulela lasr in paye a oaru nu sel, ke kain in ma sikyak nukewa.—Mattu 22:37.

15. Fuka mwulela el sie inkanek in akkalemye lulalfongi lasr?

¹⁵ Orekma in mwulela moul lasr nu sin God el sie inkanek in akkalemye lulalfongi lasr nu sel. Efu ku ouinge? Lulalfongi lasr nu sin Jeova oru kut in lulalfongi la kafweang in akfototoye kut nu sin God el arlana mwo nu sesr. (Sam 73:28) Kut etu la tia fusrasr in fwasr wi God pal nukewa ke kut srakna moul inmasrlon “sie fwil su ku a likkeke,” ne ouinge kut lulalfongi ke mwulela lun God la el fwa kasre kut ke kafweang nukewa lasr. (Filippai 2:15; 4:13) Kut etu la kut met sesumwos, tusruktu kut lulalfongi la Jeova el fwa pakomutasr yokna ke pal se kut orala ma koluk. (Ridi Sam 103:13, 14; Rom 7:21-25.) Oasr lulalfongi lasr la Jeova el fwa akinsemwomwoye sulela mwomwo lasr in sruokye oiyen oaru lasr nu sel.—Job 27:5.

Mwulela nu sin God Kol nu ke Me Insemwomwo

16, 17. Efu ku mwulela lasr nu sin Jeova kol nu ke me insemwomwo yok?

¹⁶ Kut fwin mwulela tari moul lasr nu sin Jeova, ma inge oru kut in insemwomwo yok meyen kut orekmakin a sang moul lasr nu sel. Jisus el fwak kas paye inge: “Insemwomwo in sang yok liki insemwomwo in eis.” (Orekma 20:35) Jisus el pulakin na paye insemwomwo yok su tuku ke orekma lal in sang ke pal in orekma in luti lal fwin fwalu. Fwin eneneyuk, el kafweang in luti a el tia mongla, tia mongo, meyen el lungse in kasru met puspus in koneak inkanek nu ke moul. (Jon 4:34) Jisus el insemwomwo yok in oru insien Papa tumal in engun. Jisus el fwak: “Nga oru pal e nu kemwa ma in akinsemwomwoyel.”—Jon 8:29; Soakas 27:11.

¹⁷ Ke ma inge, Jisus el kol met tuma lutlut nukewa lal nu ke sie inkanek mwomwo lun moul ke pal se el fwak: “Kutena met fwin lungsel in tuku fwasr tukuk, lela lan sifwana lafwekunal.” (Mattu 16:24) In oru ouinge, kut ku in akfototoye kut na paye nu sin Jeova. Ya oasr kutena met sayen Jisus su kut ku in lulalfongi mu ku in karungin kut ke inkanek kulang a mwo?

18. Efu ku in moulkin moul fwal nu ke mwulela lasr nu sin Jeova el oru kut in insemwomwo yok liki na kut fwin mwulela moul lasr nu ke kutena ma ku nu sin kutena met?

¹⁸ Orekma in mwulela moul lasr nu sin Jeova a in moulkin moul fwal nu ke mwulela se inge ke kut oru ma lungse lal fwa ase insemwomwo yok liki na kut fwin mwulela moul lasr nu ke kutena ma ku nu sin kutena met. Ke sie me pupulyuk, oasr met puspus su orekmakin moul lalos in suk me kasrup tusruktu elos tia pulakin insemwomwo paye a moul mwomwo. Tusruktu, elos nukewa su mwulela moul lalos nu sin Jeova elos koneak engun a insemwomwo paye su oasr pal nukewa. (Mattu 6:24) Elos insemwomwo ke sripen elos “met orekma yurin God,” a mwulela lalos el tia na ke kutena orekma, tusruktu elos mwulela moul lalos nu sin God. (1 Korint 3:9) Jeova el aksaokye na paye orekma lalos in kisekinelos nu sel. El fwa oru met kulansap oaru nukewa lal in sifwilpa engankin mano fokoko oana sie met fwusr tu elos in eis me insemwomwo yok a in engunkin me karungin mwomwo lal nu tok ma patpat.—Job 33:25; ridi Hibru 6:10.

19. Kain in kunokon fuka engankinyuk sin met nukewa su mwulela moul lalos nu sin Jeova?

¹⁹ Orekma lom in mwulela moul lom nu sin Jeova el sang kasru yok in akfototoye kom nu sel. Baibel el akkalemye: “Komwos in kalukyung nu yurin God, a el a fwa kalukot nu yurumwos.” (Jemes 4:8; Sam 25:14) Ke me lutlut toku, kut fwa lutlutkin la efu ku kut ku in lulalfongi ke sulela lasr tu kut in ma lun Jeova.

[Footnote]

Kom E Topuk Fuka?

• Mea kalmen orekma lun sie met in mwulela moul lal nu sin God?

• Ke inkanek fuka mwulela lasr nu sin God ku in akinsemwomwoye kut?

• Efu ku met Kristian enenu in mwulela moul lalos nu sin Jeova?

[Petsac ke sra 12]

Kafweang lasr in moulkin moul fwal nu ke mwulela lasr el kol nu ke me insemwomwo ma patpat lasr