Me Siyuk Sin Met Rid

Ya moul sesumwos lun mutan virgin Meri akkolukye awowo Jisus ke pal se el srakna muta ke insiel?

Fwin ke “isusla lun Jisus,” record ke ma simusla el fwak: “Ke Meri nine kiel a Josef eltal akeni, meet liki eltal tukeni, elos konoielak el la putete ke ngun mutal.” (Mattu 1:18) Paye, ngun mutal lun God pa oasr kunokon yok ke pal se Mari el puteteyuk.

A fuka, kel Mari? Ya egg cell, ku ovum lal, oasr ip lalos ke pal se el puteteyuk? In nunku ke mwolela lun God nu sel Ebream, Isaak, Jekob, Juda, a Togusra Devid​—papa matu tumal Mari nu kemwa—​oasr sou a papa matu na paye lun awowo se inge su e fwa isusla. (Genesis 22:18; 26:24; 28:10-14; 49:10; 2 Samuel 7:16) Fuka tulik se inge su Mari el e fwa isusla ku in oasr sumwos oanu met usru nu ke mwolela mutal inge? Tulik se inge enenu in ma nutul Mari na paye.​—Luk 3:23-34.

Lipufon lun Jeova el sikme nu sel Mari mutan virgin se, a fwak: “Mari, nik kom sangeng, kom konoiyuk kulang sin God me; a liye kom tufwa putete, a oswela sie mwen, a fwa pangon el Jisus.” (Luk 1:30, 31) Enenu egg cell ku ovum in fertile ku akola meet liki sie mutan el ku in putete. Arulanu kalem, Jeova God el oru egg cell ku ovum ke insiel Meri in fertile ku akola, el oru ou inge ke pal se el filiye moul in ngun lun Mwen kulu nutul in kosrao nu fwalu.​—Galetia 4:4.

Ya sie awowo el ku sumwosmwos a sukosokla liki ma koluk ke manol el fwinne muta ke insien mutan sesumwos se? Fuka ma sap ke heredity ku me usru orekma fwin oasr toeni lun moul sumwosmwos a moul sesumwos? Esam la ngun mutal pa orekmakinyuk ke pal se moul sumwosmwos lun Mwen nutin God filiyuki nu ke insiel Mari paenang el putete. Ma inge etukla kutena ma sesumwos su oasr ke egg cell ku ovum lal Mary, paenang ma inge orala sie genetic pattern su sumwosmwos ke mutamwauk me.

Ke kutena ma sikyuk ke egg cell ku ovum lal Mary, kut ku in lalalfongi la mokuikui lun ngun mutal lun God in pal ingo akkeye kapkapek lun akmwuk lun God. Lipufon Gebriel el fwak nu sel Mari: “Ngun mutal a fwa tuku nu fwom, a ku lun El su Fulat Liki Nu Kemwa a fwa lulikomi. Ke ma inge ma mutal se su tufwa isusla fwa pangpang Mwen nutin God.” (Luk 1:35) Aok, ke kas pupulyuk, ngun mutal lun God el oru sie luma, oanu sie kalkal su kurungin ma se, tu in wangin kutena ma koluk su ku in akkolukye ku akfokfokye awowo su oasr ke inse ke mutamwauk me nu ke pal in isusla.

Arulanu kalem, moul sumwosmwos lal Jisus tuku sin Papa tumal in kosrao, a tia nu sin kutena met. Jeova el “akola sie mano” nu sel, a Jisus​—ke mutamwauk me nu ke pal in isusla—​el “nasnas na nasnas, srela liki met koluk.”​—Hibru 7:26; 10:5.

[Picture on page 31]

“Kom tufwa putete, a oswela sie mwen”