Efu Ku In Baptaisla?

“Komwos som . . . a oru met in mutanfwal nu kemwa tu elos in met tumuk lutlut, baptaiselosla.”​—MATTU 28:19.

1, 2. (a) Ke kutu oiye fuka baptais el orek? (b) Kain in kusensiyuk fuka touyuk siyukyuk ke oreyen baptais?

Frankish Togusra Charlemagne el sapkin ke ku nu sin met Saxon su el sroukye elos nu kemwa in baptaisla nu fon in pal siefwunnu in yiu 775-77 C.E. “El sapkin ke ku met nu kemwa in ekulla lalalfongi lalos nu ke Christianity,” John Lord sie met sim lun sramsram matu el simusla. In oupanu tokin el payuk nu sin sie princess lun Greek Orthodox in yiu 987 C.E., Vladimir I met kol lun Russia el sapkin nu sin met lal nu kemwa in ekla nu ke “met Kristian.” El sapkin pa nu sin met nu kemwa lal in baptaisla in pal siefwunnu​—fwin oasr met srunga in baptais el fwa anwuki ke kutlas!

² Ya kain in baptais inge sumwos? Ya oasr kalme paye nu ka? Ya fwal nu sin oanu sie met in eis baptais?

Baptais​—Fuka Oreye?

3, 4. Efu ku baptais orek ke tultul lun kof ku okoela kof nu insifwe tia sumwos nu ke baptais lun met Kristian?

³ Ke pal se Charlemagne a Vladimir I elos sapkin ke ku nu sin met nu kemwa lalos in baptaisla, ma inge elos sapkin tia fwal nu ke Kas lun God. Paye, wangin ma mwo ku in sikyuk fwin baptais el orek ke tultul lun kof nu insifwe, ku fwinne kom uki kof nu fwin sifwe, ku mano nu fon tili nu in kof u tusruktu wangin kutena kain in lutlut orek nu sin met sen ke kas paye lun Baibel.

⁴ Loang akmwoye nu ke ma sikyuk in pal se Jisus lun Nazareth el som nu yurol Jon baptais in yiu 29 C.E. ke Jon el baptaisela met puspis ke Infwal Jordan. Met inge sifwanu lungse in eis baptais. Ya el sapkin nu selos in tu ke infwal Jordan ke el tultuli kof ku uki kof nu fwin sifwelos? Mea sikyuk in pal se Jon el baptaisella Jisus? Mattu el reporti la tokin el baptais la tari, “Jisus el fwasyuk kitenmisenge liki in kofu.” (Mattu 3:16) El on in kofu, tili nu fon manol nu infwal Jordan. Oupanu ke met Ethiopia eunuch se ke el baptaisla ke “sie nien kof.” Enenu kofu in loal meyen baptais lun Jisus a met tuma lutlut lal enenu mano nu fon in tili.​—Orekma 8:36.

5. Fuka baptais lun met Kristian orek in pal meeta nu sin metu?

⁵ In kas Greek lungasyukla “baptais,” “oreyen baptais,” a kutupa oiye lun baptais, kalme pa mano nu fon in tili nu in kof u. Smith’s Bible Dictionary akkalemye la: “Oreyen Baptais paye a sumwos pa in tulmakinye mano nu fon.” Paenang oasr kutu lungasyen Baibel akkalemye in fwak oanu “Jon Baptais.” (Mattu 3:1, Rotherham; Diaglott interlinear) History of the Christian Religion and Church, During the Three First Centuries su ma lal Augustus Neander el fwak: “Baptais ke mutamwauk in orek enenu in mano nu fon se tili nu in kofu.” Sie me rid lun met French pangpang Larousse du XX^e Siècle (Paris, 1928) el fwak: “Met Kristian in pal meeta elos oru baptais lalos ke tili lun manolos nu kemwa ke yen su oasr kof loal we.” A New Catholic Encyclopedia el akkalemye la: “Ma na paye se la Baptais ke surs in pal meeta orek ke mano nu fon se tili nu in kofu.” (1967, Volume II, sra 56) Ke ma inge, misenge, baptais el orek oanu sie me akul lun Met Lo lun Jeova ke mwolela a sulela lal sifwanu in baptais lun manol nu fon tili nu in kofu.

Sie Sripe Sasu lun Baptais

6, 7. (a) Ke sripe fuka Jon el oru baptais? (b) Mea ma sasu ke baptais lun met tuma lutlut lun Jisus?

⁶ Baptais su Jon el oru el sie liki na akmwuk lun baptais su met tuma lutlut lal Jisus elos oru. (Jon 4:1, 2) Baptais lal Jon nu sin met nu kemwa in pal meeta akkalemye nu sin met nu kemwa elos in auliyuk liki ma koluk nu kemwa lalos in lain akmwuk lun Ma Sap.a (Luk 3:3) Tusruktu oasr sie ma sasu su sikyuk ke baptaisla lun met tuma lutlut nu kemwa lun Jisus. Ke len in Pentecost 33 C.E., met sap Piter el sapkin nu sin met nu kemw su long sramsram lal: “Komwos in auliyuk, a komwos nu kemwa in baptaisla in en Jisus Kraist nu ke ela ma koluk lomwos.” (Orekma 2:37-41) Paye la el sramsram nu sin met Ju a met saye su asrouki nu sin met Ju, tusruktu Piter el tia sramsram ke baptais in ela ma koluk su lain su lain Ma Sap; ku in kalmekin mu in baptaisla in en Jisus pa inkanek in ela ma koluk nu kemwa.​—Orekma 2:10.

⁷ Ke pal se inge, Piter el orekmakin ke pal se meet “key lun togusrai.” Ke sripe fuka? In ikasla nu sin met nu kemwa su porongel in eis pal mwo lalos nu ke etauk in ku in ilyuk nu ke Togusrai in kosrao. (Mattu 16:19) Ke sripen met Ju elos srunga in akilen mu Jisus pa Messaia, paenang in auliyuk forla a lalalfongi in el sie ma sasu a yok sripe a elos ku in eis nunuk munas lun God. Elos ku in akkalemye kain in lalalfongi ke pal se elos eis baptais lalos in kof ke en Jisus Kraist. Ke oiye se inge elos akkalemye mwolela lalos nu sin God ke elos eis baptais lalos in en Jisus Kraist. Met nu kemwa su lungse in eis insemwomwo lun God misenge enenu pa in orekmakin kain in lalalfongi inge, in akkalemye mwolela lalos nu sin Jeova God, a in eis akmwuk in baptais lun sie met Kristian in sang akul ke mwolela lal nu sin God su Fulat Liki nu Kemwa.

Etauk Sumwos Yok Sripe

8. Efu ku baptais lun met Kristian tia fwal nu sin met nu kemwa?

⁸ Baptais lun sie met Kristian tia orek nu sin met nu kemwa. Meyen Jisus el sapkin nu sin met tuma lutlut lal: “Komwos som . . . a oru met in mutanfwal nu kemwa tu elos in met tumuk lutlut, baptaiselosla in en Papa a Mwen, a ngun mutal, luti nu selos in liaung ma nu kemwa Nga sapkin nu sumwos.” (Mattu 28:19, 20) Meet liki in eis baptais, met nu kemwa enenu in ‘lutiyuk in eis etauk a orekmakin ma nu kemwa su Jisus el sapkin nu sin met tuma lutlut lal in oru.’ Ke ma inge, baptais ke ku nu selos nu kemwa su wangin lalalfongi su tuku ke etauk sumwos ke Kas lun God wangin sripe a ma inge tia fwal nu ke kunokon su Jisus el sang nu sin met tuma lutlut paye lal.​—Hibru 11:6.

9. Mea kalmen baptais in “en Papa”?

⁹ Mea kalmen in eis baptais “in en Papa”? Kalme pa met nu kemwa su su lungse in eis baptais elos enenu in akilen mwal fulat lun Papa tumasr in kosrao. Ke ma inge, Jeova God el fwa akilenyuk oanu Met Orekutla, “el su Fulat Liki Nu Kemwa fwin fwalu nu fon,” a Leum Ku Liki Ku.​—Sam 83:18; Isaia 40:28; Orekma 4:24.

10. In eis baptais in ‘en mwen’ kalmekin nu ke mea?

¹⁰ Mea kalmen in baptaisla ‘in en Mwen’ kalme pa in akilen mwal lal Jisus a ku lal oanu Mwen siefwunnu isusla nutin God. (1 Jon 4:9) Met nu kemwa su fwal in eis baptais enenu in lalalfongi la Jisus mukefwunnu pa God el ase nu sesr in oanu “sie met lango in moli met puspis.” (Mattu 20:28; 1 Timote 2:5, 6) Met nu kemwa su lungse in eis baptais enenu pa in akilen “sie e fulat liki nu kemwa” su God el sang nu sin Mwen nutul.​—Filippai 2:8-11; Fwakyuk 19:16.

11. Mea kalmen baptais in ‘en ngun mutal’?

¹¹ Mea kalmen in baptais ke ‘en ngun mutal’? Kalme pa met nu kemwa su lungse in eis baptais elos enenu in akilen la ngun mutal el ku lun Jeova, su orekmakinyuk ke ke kain in inkanek puspis fwal nu ke akmwuk lal. (Genesis 1:2; 2 Samuel 23:1, 2; 2 Piter 1:21) Met nu kemwa su lungse in eis baptais enenu in akilen la ngun mutal pa kasrel in eis etauk ke “ma loal loal lun God,” in ku in aketeye ke pal in oru orekma lun fwakak peng mwo lun-Togusrai, a in orekmakin fwako lun ngun su “lungse, engun, misla, mongfwusesr, kulang, inse mwo, lalalfongi, fwokpap, sifwanu leum fwom.”​—1 Korint 2:10; Galetia 5:22, 23, NW; Joel 2:28, 29.

Ma Yok Sripe Su Tuku ke Auliyuk a Forla

12. Fuka baptais lun met Kristian el kupasr nu ke auliyuk?

¹² Sayen moul lun Jisus su wangin ma koluk ka, akmwuk lun baptais el sie inkanek su God-el insese ka mu in pa me akpayeye nu ke akmwuk lun auliyuk. In pal se ke kut fwin auliyuk, oasr me pula yok lun auli, ku nunuk in asor keok ke luma su kut orala ku kofla in orala ke ma su kut fwakla in oru. Met Ju in century se meet su suk in akinsemwomwoye God enenu in auliyuk ke ma koluk su elos oru in sang lain Kraist. (Orekma 3:11-19) Kutu sin met Pegan su forla met lalalfongi fwin an Korint enenu elos in auliyuk ke ma koluk su elos oru ke moul in kosro, alu nu ke me srulela, pusrapasr, a ke kutupa ma koluk lalos. Ke sripen elos auliyuk, paenang ma koluk lalos nu kemwa “aknasnasyeyukla” ke sran Jisus; a “akmutalyeyukla,” ku srella nu ke orekma in kulansap lun God; a elos akkalemyeyuk “nasnas” ke en Kraist a ke ngun lun God. (1 Korint 6:9-11) Auliyuk el sie inkanek yok sripe in eis nunuk sumwos a in eis nunuk munas sin God ke kain in ma koluk nu kemwa.​—1 Piter 3:21.

13. In fwalnu ke akmwuk lun baptais, mea enenu in orek in sang furokla?

¹³ In forla liki, enenu in orek meet liki kut baptaisla in oanu sie Met Lo lun Jeova. In forla liki enenu in ma tuku sin met se fwin el sulela paye ke insiel el an etawi Jisus Kraist in ma nu kemwa. Kain in met ou inge enenu in akkalemye la el tia sifwil oru kain in orekma koluk nu kemwa su el muta oru meet a inge el sulela ke paye in oru ke moul lal ma sumwos pal nu kemwa nu sin God. Ke Ma Simusla, kas Hibru a kas Greek se inge forla in akmwuk lun verb ku in kalmekin oanu sisla liki, ku forla liki. Oiye se inge orek oanu in forla nu sin God a tia sifwil oru kutena kain in inkanek koluk. (1 Togusra 8:33, 34) Forla liki eneneyuk in “oru ma fwal nu ke auliyuk.” (Orekma 26:20) Enenu kut in fwasr liki alu kikiap nu kemwa, in orekma fwal nu ke ma sap lun God, a in kulansap nu sin Jeova mukefwunnu. (Duteronomi 30:2, 8-10; 1 Samuel 7:3) In forla liki ku in akilenyuk ke ekla lun nunuk lasr, ke nien sun lasr, a ke oiye lasr. (Ezekiel 18:31) Kut “forla” tia sifwil oru kutena ma koluk a moulkin moul sasu ke moul lasr.​—Orekma 3:19; Efesus 4:20-24; Kolosse 3:5-14.

Mwolela Su Tuku ke Inse Arulanu Yok Sripe

14. Mea mwolela lun met su fwasr tokin Jisus kalmekin?

¹⁴ Baptaisla lun met nu kemwa su etawi Jisus enenu in orek tokin mwolela lalos nu sin God ke inse paye. Mwolela lasr ku in kalmekin la kut pakiyuki nu ke sie orekma mutal. Step se inge arulanu yok sripe paenang kut enenu in akkalemye nu sin Jeova ke pre la sulela lun mwolela lasr nu sel ma nu tok ma patpat. (Duteronomi 5:9) Aok, kut tia mwolela moul lasr nu ke orekma ku nu sin met, a ma nu sin God paye mukena.

15. Efu ku met ma lungse in eis baptais enenu in tili in kof ke pal in baptais?

¹⁵ Ke kut mwolela nu sin God kel Kraist, kut akkalemye sie sulela paye in orekmakin moul lasr nu ke ma lungse lun God su on in Baibel. In akkalemye ke me akul paye lun mwolela, paenang met nu kemwa su lungse in eis baptais enenu in oru baptais lalos ke mano nu fon tili nu in kofu, fwin kel Jisus el oru baptais lal pe ke Infwal Jordan in akkalemyel sifwanu nu sin God. (Mattu 3:13) Arulanu kalem la Jisus el pre pe ke pal na saok se inge.​—Luk 3:21, 22.

16. Fuka engun lasr ku in akkalemyeyuk ke pal se met se fwin baptaisla?

¹⁶ Baptais lal Jisus sie ma yok sripe a me insemwomwo. Misenge e fwa oupanu nu ke baptais lun met Kristian. Ke pal se kut liye ke metu elos orala akul lun mwolela lalos nu sin God, engun insemwomwo lasr akkalemyeyuk pusren engun wi kaksak. Tusruktu, wowon, os, a kutupanu oiye saye mwo in sensenkinyuk meyen oiye inge ma in fwakak nasnas sumwos wikin paye lun lalalfongi. Engun insemwomwo lasr akpayeyuk ke inkanek sumwos a paye ou inge.

17, 18. Mea ku in kasru kut in akilen fwin met se el fwal in eis baptais?

¹⁷ Tia oanu met inge su baptaisla awowo ke inkanek in tultul in kof ku elos su baptaisla met pukanten ke ku ke pal siefwunnu su tia fwal nu ke Ma Simusla, Met Lo lun Jeova elos tia baptaisla kutena met ke ku. Ke akmwuk paye elos tia wi muta baptaisla kutena met su soenna fwal sumwos nu ke nu ke moul in ngun lal. Met liki panu met se fwin lungse in wi fwakak ke peng mwo el fwinne sonna baptais, met elder Kristian nu kemwa enenu in akpayeye kelos fwin elos sumwos fwal nu ke me luti lun Baibel, a in moul fwal nu ka, a etu in sang me top nu ke me siyuk inge, “Ya kom lunge na paye in ekla sie Met Lo lun Jeova?”

¹⁸ Pal nu kemwa, ke pal se metu su wi tari ke orekma in fwakelik ke peng mwo lun Togusrai el akkalemye lungse lal in eis baptais, met elder Kristian elos fwa akola inkanek lalos in ku in osun alolngoki yurolos in koneak la elos lalalfongi na paye a orala tari mwolela lalos nu sin Jeova, a sun tari kain in akmwuk nu kemwa lun God ke baptais. (Orekma 4:4; 18:8) Kain in me top su pus liki kusensiyuk 100 ke me luti lun Baibel sang kasru mwomwo nu sin met elder nu kemwa elos in koneak la met su lungse in eis baptais el sun tari ma enenu nu kemwa su oasr ke Ma Simusla ke baptais. Oasr kutu pal konoiyukyuk la met se el tia fwal in eis baptais fwal nu ke baptais Kristian.

Ya Oasr Kutena Ma Su Kutongkowi?

19. In fwal nu ke Jon 6:44, su akola in welul Kraist oanu met usru?

¹⁹ Met nu kemwa su eis baptais la ke ku akkalemyeyuk nu selos mu elos fwin mise elos e fwa som nu in kosrao. Tusruktu, in fwal nu ke kas in kasru nu sin met su lalalfongel, Jisus el fwak: “Wangin sie met ku in fwasru nu yurok, Papa su supeyume el fwin tia amekunul.” (Jon 6:44) Jeova el amekin nu yurin Kraist 144,000 met su e fwa wi Jisus usrui Togusrai lun God in kosrao. Baptais ke ku tia ku in akmutalyela sie met in wi eis usrui ke akmwuk mwolanu lun God.​—Rom 8:14-17; 2 Tessalonika 2:13; Fwakyuk 14:1.

20. Mea ku in kasru sie met su soennu baptais in eis baptais?

²⁰ Yokna in 1930 fwasru, arulanu puseni met su filiye fwinsrak lalos mu elos e fwa wi moulla ke “len in ongoiye” a muta ma patpat fwin fwalu in welulos su Jisus el pangon “sip ngie.” (Fwakyuk 7:9, 14; Jon 10:16) Met inge fwal in eis baptais meyen elos aksumwosye moul lalos fwal nu ke Kas lun God a elos lungse el ke paye lun ‘insielos kemwa, ke ngunalos kemwa, ke ku lalos kemwa, a ke nunkelos kemwa.’ (Luk 10:25-28) Fwinne met puspis elos koneak la Met Lo lun Jeova elos elos ‘alu nu sin God in ngun a paye,’ tusruktu pukanten selos soenna fwasr tokin me srikasrak lal Jisus a soenna sang me akpayeye ke lungse paye lalos nu sin God ye mutun metu a ke alu lalos nu sin Jeova mukefwunnu ke inkanek in eis baptais. (Jon 4:23, 24; Duteronomi 4:24; Mark 1:9-11) Kaifweung a siyuk ke paye lun pre in eis akmwuk mwolanu inge ku in sang kasru mwomwo a in sang kasru in ku in ekulla oiyen sie moul in sumwos fwal nu ke Kas lun God, in orala sie mwolela fukoko a paye nu sin Jeova God, a baptaisla.

21, 22. Mea kutu sripe paenang kutu met elos kofla orala mwolela a baptais lalos?

²¹ Oasr kutu met elos alollo in orala mwolela a baptais lalos ke sripen elos arulanu kafofo ke akmwuk lun fwalu a in suk in oasr me kasrup puspis lalos su paenang in wanginla sukyen ma lun ngun nu selos. (Mattu 13:22; 1 Jon 2:15-17) Fuka yokiyen me insemwomwo lalos fwin elos ekulla oiyen kena a nien sun lalos! Suk in futoto nu sin Jeova fwa ku in akkeyelos ke moul in ngun, a fwa kasru in eisla kena losrongten lun moul, a fwa ku in orala misla paye a me insemwomwo puspis su tuku ke akmwuk mwolanu lun God.​—Sam 16:11; 40:8; Soakas 10:22; Filippai 4:6, 7.

²² Met puspis fwal mu elos lungse Jeova tusruktu, elos tia orala mwolela a baptais lalos ke sripen elos srunga in oasr kunokon lalos nu sin God. Tusruktu, kais sie sesr fwa fwakak kel sifwanu nu sin God. Oasr kunokon yok nu sesr in orala ke pal se kut long lutlut ke kas lun Jeova. (Ezekiel 33:7-9; Rom 14:12) In oanu ‘met sulosolla,’ met Israel in pal meeta elos isusla ke sie mutanfwal su orala mwolela nu sin Jeova, ke ma inge oasr kunokon lalos in kulansap nu sel ke oaru fwal nu ke akmwuk nu kemwa lal. (Duteronomi 7:6, 11) Misenge wangin met isusla ke kain in mutanfwal inge, tusruktu, kut fwin eis etauk paye ke inkanek in lutlut ke Ma Simusla, kut enenu in oru orekma lasr fwal nu ke lalalfongi su tuku ka.

23, 24. Mea kutu me aksangeng su tia enenu in oru kutu met elos kofla baptaisla?

²³ Oasr pa kutu met elos sangeng in eis baptais lalos meyen elos nunku mu srikla etauk lalos. Tusruktu, lela in kalem la srakna oasr lutlut pukanten su kut enenu in oru meyen ‘metu koflanu koneak orekma su God el orala ke mutamwauk, aok nu ke safla.’ (Ekklisiastis 3:11) Esam pa met Ethiopia eunuch se. Oanu sie met proselyte ku met saye su wi ke alu lun met Ju, oasr tari etauk lal ke Ma Simusla, tusruktu el tia ku in topuk me siyuk nu kemwa ke akmwuk lun God. Paenang tokin el eis etauk paye ke akmwuk lun Jeova ke molela ke inkanek lun me kise lun Jisus, met eunuch sa tia alollo in eis baptais lal.​—Orekma 8:26-38.

²⁴ Oasr kutupa met su sangeng in mwolela nu sin God ke sripen elos sangeng fwin elos tafongla ku tia akpayeye mwolela lalos. Oasr sie tulik mutan su matwe oasr yiu 17 pangpang Monique, el fwak: “Nga arulanu alollo in eis baptais ke sripen sangeng luk mu Nga tia ku in moul fwal nu ke mwolela luk.” Tusruktu, kut fwin filiye lalalfongi paye lasr nu sin Jeova ke insiesr kemwa, ‘el fwa akkalemye inkanek lasr.’ El fwak kasre kut in “fwafwasryesr in ma paye” oanu met kulansap paye lal.​—Soakas 3:5, 6; 3 Jon 4.

25. Kain in kusensiyuk fuka enenu in loang nu ka?

²⁵ Ke sripen lalalfongi yok nu sin Jeova, a lungse paye nu sel, paenang oasr ke kais sie yiu tausen puspis sin met elos orala mwolela lalos a baptaisla. Paye, et kulansap nu kemwa lun God su mwolela tari elos lungse in oaru nu sel. Aok, misenge kut muta ke sie pal su ma koluk arulanu yokyokelik liki meeta, a oasr me lain puspis ke lalalfongi lasr. (2 Timote 3:1-5) Mea kut ku in oru in fwal nu ke mwolela lasr nu sin Jeova? Ma ingekut fwa lutlut ka ke me lutlut tok u.

[Footnote]

Ya Kom Esam?

• Fuka oreyen baptais lun met Kristian?

• Etauk fuka eneneyuk nu sin sie met el an ku in eis baptais?

• Mea step puspis su ku in kol nu ke baptais lun met Kristian paye?

• Efu ku kutu metu alollo in eis baptais, a fuka elos ku in kasreyuk?

[Pictures on page 24]

Ya kom etu la mea kalmen baptais ‘in en Papa, Mwen, a ngun mutal’?