Efu Kom Kulansap nu Sin God?
Sie togusra su sangeng sin God sie pal el sang kai inge nu sin mwen nutul: “Kom in etu God lun papa tumom a orekma nu sel ke inse sumwos a ngun in lungse.” (1 Kronikel 28:9) Arulanu kalem, la Jeova el lungse met kulansap lal in kulansapul ke insemwomwo a inse sumwos.
OANU Met Lo lun Jeova, kut arulanu insese nu ka la in pal se mwolela lun Baibel aketeye nu sesr ke pal se meet, insiesr arulanu tingtingi ke kulo. Len nu kemwa, oasr ma sasu kut lotela ke akmwuk lun God. Paenang ke pal se yokyokelik etauk lasr nu sin Jeova, yokyokelik pa kena lasr in kulansap nu sel “ke inse sumwos a ngun in lungse.”
Met puspis su ekla Met Lo lun Jeova elos tafwela in kulansap nu sin Jeova ke insemwomwo lulap ke lusen moul lalos nu fon. Tusruktu, kutu sin met Kristian elos arulanu mwo ke mutamwauk, tokin kutu pal, elos mulkunla sripe puspis yok su purakak insiesr in kulansap nu sin God. Ya ma inge sikyuk nu sum? Fwin aok, lela kom in tia asor. Kom ku in sifwil eis insemwomwo su tula liki kom?
Loang Akmwoye ke Me Insemwomwo Puspis Su Oasr Yurom
Ma se meet, kalweni ke nunuk lom me insemwomwo puspis su kom eis sin God ke len nu kemwa. Nunku ke me sang mwomwo lun God: kain in orekma puspis lal ke ma orekla—kain in met nu kemwa su ku in eis fwinne elos sikasrup ku kasrup—me sang lal inge pa ke me mongo a me nimnim, ku lun mano su kom engunkin, ouyepa etauk lom ke ma paye lun Baibel, a yok liki nu kemwa, me sang nu sesr ke tulik nutul. Mise lal ikasla inkanek nu sesr in kulansap nu sin God ke sie ela nasnas. (Jon 3:16; Jemes 1:17) Kom fwin tuni pal nu kemwa ke nunuk lom orekma mwo lun God, na insemwomwo lom sel a fwa kapkapek. Insiom fwa mokle kom in kulansap nu sel ke insemwomwo ke ma nu kemwa el oru. Wangin alollo la kom ku in sifwil pulakin ma met sim lun Sam el pula paenang el simusla: “O Jeova God luk, pukanten orekma sakuruk lom su kom orala, a nunuk lom nu sesr; ma inge koflanu takunyukla nu sum . . . Elos pus liki ku in oekyukla.”—Sam 40:5.
Devid el simusla kas inge, sie mokul su moul lal tia sukosok ke ma upa. Oanu sie mokul fwusr Devid el orekmakin pal yok ke moul lal oanu sie met kaeng meyen Togusra Soul su arulanu koluk a met solse lal elos lungse in unilye. (1 Samuel 23:7, 8, 19-23) Oasr pa munas sifwanu lal Devid su el enenu in meun ka. El akilen ma inge ke Sam ak 40: “Tu ma koluk puspis apunyula, ma sito luk sun yu, a Nga tia ku in ngetuk; elos pus liki aunsifwuk, a insiyuk sisyula.” (Sam 40:12) Aok, oasr ma upa lal Devid, Tusruktu el tia munasla ke ma inge, El loang yok ke inkanek puspis su Jeova el akinsemwomwoyel, fwinne oasr ma upa lal, ma inge tia yok liki me insemwomwo su el eis.
Kom fwin pulakin la ma upa apunkomla ku kom pulakin la kom met sufwal se, arulanu mwo kom fwin tui meet a tuni me insemwomwo nu kemwa su oasr yurom, oanu Devid el oru meet. Wangin alollo, la insemwomwo lom ke me insemwomwo inge nu kemwa mokle kom in mwolela moul lom nu sin Jeova; kain in nunuk inge ku in kasru kom in sifwilpa srukye insemwomwo su kom tula a ku in kasru kom in kulansap nu sin God ke insemwomwo.
Meeting lun Congregation Ku in Kasru Kom
In toeni nu ke kalweni ke nunuk lom ma mwo nu kemwa lun Jeova, kom enenu in asrouki nu sin met lili Kristian wiesr. Sie me insemwomwo na paye in osun nu sin mokul, mutan, a met fwusr su lungse God a kaifweung in kulansap nu sel. Me srikasrak lalos ku in purakak insiesr in oru orekma ke insiesr kemwa nu ke orekma lun Jeova. Tuku lasr nu ke Kingdom Hall pal nu kemwa ku in akkeyelos pa.
Paye, kut fwin tuku in loom sesr tokin sie len in orekma upa ku kut fwin asor ke sripen kutu ma upa ku munas lasr sifwanu, saap kut nunku la tia fwusesr in wi ke meeting in Kingdom Hall. Ke kain in pal se inge, saap kut enenu in kai kut sifwanu, oanu kut ‘uni manosr,’ tu kut in akos ma sap in wi tukeni yurin met lili Kristian wiesr.—1 Korint 9:26, 27; Hibru 10:23-25.
Fwin oasr pal la kut enenu in oru ou inge, ya kut ku in fwak mu kut tia lungse na paye Jeova? Mo. Met Kristian in pal meeta su matu in ngun su lungse nu sin Jeova arulanu kalem elos enenu pa in kaifweung in oru ma lungse lun God. (Luk 13:24) Met sap Poul pa sie sin met Kristian inge. El akkalemye pulakin lal ke inkanek se nge: “Tu Nga etu tu in Nga, in ikuk, ma mwo tia muta lu; tu lungse on yurok, a in oru ma mwo tia on yurok. Tu ma mwo su Nga lungse Nga tia oru; a ma koluk su Nga tia lungse, ma inge Nga oru.” (Rom 7:18, 19) A el fwak nu sin met Korint: “Tu Nga fwin fwakak mwosasu, wangin konkun yurok ka, tu Nga tia ku in tia fwakak. . . . Tu Nga fwin oru ma inge ke lungse luk sifwanu oasr ma lane nu sik; a fwin tia ke lungse luk sifwanu, na orekma lun sie met tutafpo etuku nu sik.”—1 Korint 9:16, 17.
Oanu met puspis inmaslosr, oasr pa ma koluk in ikwel Poul su kosroila kena lal in oru ma sumwos. Tusruktu, el meuni meun mwo lain ma koluk inge, a pal nu kemwa el kutangla. Paye, Poul el tia oru ou inge ke ku lal sifwanu. El simusla: “Nga ku in oru ma nu kemwa in el su akkeyeyu.” (Filippai 4:13) Jeova, el su sang ku nu sel Poul, el ku in ouyepa akkeye kom in oru ma sumwos kom fwin siyuk sel ke kasru. (Filippai 4:6, 7) Ke ma inge kaifweung in “akkeye kom in srukye ku lalalfongi,” a Jeova el fwa akinsemwomwoye kom.—Jud 3.
Kom tia enenu in meuni meun inge ke ku lom sifwanu. In congregation nu kemwa lun Met Lo lun Jeova, oasr met Kristian elder su matu in ngun, su kaifweung in “srukye ku lalalfongi” lalos, elos insemwomwo in kasru kom. Kom fwin osun nu sin elder ke kasru, el engun in “akpulaikye” kom. (1 Tessalonika 5:14) Nien sun lal pa in orekma oanu “nien mwukla liki engu, a sie me loeyuk liki paka.”—Isaia 32:2.
“God el lung,” a el lungse met kulansap lal nu kemwa in kulansap nu sel ke lungse. (1 Jon 4:8) Fwin lungse lom nu sin God enenu in sifwil musaiyuk, suk inkanek fwal in oru ou inge, oanu ma akkalemyeyuk lung’u. Kom e fwa insemwomwo meyen kom oru ou inge.