Kuht ac Ahkkahlwemye Fuhkah Lah Kuht Luhngse Jeova?

1, 2. Jeova el luti kuht in luhngse el fuhkah?

INKACNEK se ma wo emeet sie pahpah in luti tuhlihk nahtuhl uh kac pa ke mwe srihkasrak lal. Ke pacl se el ahkkahlwemye luhngse nuh sin tuhlihk nahtuhl uh, el lotweltahl in luhngse. Wacngihn kuhtwena mwet luhngse kuht oacna Pahpah tuhmwacsr Jeova. Pwacnacng kuht etuh in luhngse mweyen “el luhngse kuht meet.”​—Sie John 4:19.

² Ke inkacnek fuhkah Jeova el ahkkahlwemye lah “el luhngse kuht meet”? Bible uh fahk: “Ke pacl se kuht srackna mwet kuluk, Christ el misac kacsr.” (Rome 5:8) Jeova, suc Pahpah na luhngse se tuhmwacsr inge el use Wen nahtuhl oacna sie mwe molwelah in molikuhtlac liki ma kuluk ac misac. Mwe sang na sacohk se inge oruh kuht kuh in fototo nuh sin Jeova ac in ahkkahlwemye luhngse lasr nuh sel. Ke mwe kihsac na yohk se inge, Jeova el oakiyac sie mwe srihkasrak. El luti kuht lah kuht enenuh in luhngse ke kuht tiac nuhnkuh kacsr sifacna ac ke kuht engan in sang pacl nuhkewa.​—Sie John 4:10.

3, 4. Kuht ac ahkkahlwemye fuhkah lah kuht luhngse God?

³ Luhngse pa ohiyac se ma yohk emeet sin Jeova. Pwacnacng kuht kuh in kahlwem kac lah efuh Jesus el fahk masap na yohk srihpac se inge: “Ac kom fah luhngse Leum God lom ke insiom kewa, ac ke nguhnum kewa, ac ke nuhnkom kewa, ac ke kuh lom kewa.” (Mark 12:30) Jeova el ke kuht in luhngse el ke ‘insiacsr kewa.’ Jeova el ac arlacna toasr, kuht fin luhngse kuhtwena mwet kuh kuhtwena ma yohk luhkel. Kuht in tiac tahfuh luo ke luhngse lasr nuh sel uh. Tuhsruhktuh, kuht in luhngse el ke ‘nuhnkacsr kewa’ ac ke ‘kuh lasr kewa.’ Kalmen ma inge pa luhngse lasr nuh sin Jeova uh liyeyuck pac ke ma kuht nuhnkuh ac ma kuht oruh uh.

⁴ Kuht ac ahkkahlwemye fuhkah lah kuht luhngse na pwacye Pahpah tuhmwacsr in kuhsrao? Pa ke kuht tiac ahlohloh in ahkkahlwemye luhngse lasr nuh sel uh. Ke kuht oruh in el pa ma se emeet ke moul lasr uh, kuht ahkkahlwemye nuh sel lah kuht luhngse el na pwacye. Ke mwe lutlut se tari ah, kuht sramsramkihn inkacnek ahkosr ma Jeova el ahkkahlwemye luhngse lal nuh sin tuhlihk nahtuhl uh. Kuht kuh in liye ingena lah kuht ac ahkyohkye ac ahkkahlwemye fuhkah luhngse lasr nuh sin Jeova.

AHKKALWEMYE SRUI LOM NUH SIN JEOVA

5. Meac kuht ke oruh ke pacl se kuht nuhnkuh ke ma nuhkewa ma Jeova el oruh nuh sesr uh?

⁵ Mwet se fin usot nuh sum sie mwe sang, kahlwem lah kom ac ahkkahlwemye srui yohk lom kac. Ac ke srihpen kom ahksacohkye mwe sang se ingacn, kom ac oacyacpac orekmakihn. James el suhmuhslah ma inge: “Mwe kihte wo ac fal nuhkewa, tuhkuh lucng me; ma inge tuhkuh sin God me suc oraclah kahlwem nuhkewa inkuhsrao, ac suc tiacna ekyek pwacnacng lohsr uh tiacna sikyak.” (James 1:17) Kuht arlacna srui ke srihpen Jeova el use ma nuhkewa ma kuht enenuh tuh kuht in moul ac engan. Kuht akihlen na pwacye luhpan luhngse lal nuh sesr ac kuht ke ahkkahlwemye pac lah kuht luhngse el. Yac kom puhla ma inge?

6. Meac mwet Israel ah enenuh in oruh eltahl fin ke Jeova elan tahfwelah na ahkinsewowoyacltahl?

⁶ Puhs mwe sang na wowo ma Jeova el sang nuh sin mwet Israel. Ke lusen yac pucspucs, el kohluhltahl ke inkacnek luhn masap lal ac el sang ma nuhkewa ma eltahl enenuh in moul kac. (Deuteronomy 4:7, 8) Ac mwet Israel inge kuh in ahkkahlwemye srui laltahl nuh sin Jeova ke eltahl ahkos masap lal inge. Ke sie mwe puhpuhlyuck, ke pacl se ma eltahl orek mwe kihsac nuh sin Jeova, eltahl enenuh in sang nuh sel “fahko ma wo emeet” ke facl seltahl uh. (Exodus 23:19) Mwet Israel inge etuh lah eltahl fin sang kuhiyacltahl ac ahkos ma Jeova el fahk, el ac tahfwelah na ahkinsewowoyacltahl.​—Riti Deuteronomy 8:7-11.

7. Kuht ac orekmakihn fuhkah ma sacohk lasr in ahkkahlwemye nuh sin Jeova lah kuht luhngse el?

⁷ Kuht kuh pac in ahkkahlwemye luhngse lasr nuh sin Jeova ke pacl se kuht sang ma sacohk lasr uh nuh sel. (Soakas 3:9) Kuht oruh ma inge ke kuht orekmakihn ma oasr yohrohsr in sang kaksak nuh sel. Ke sie mwe puhpuhlyuck, kuht kuh in sang mwe kahsruh ke mani nuh ke orekma pucspucs luhn Tohkohsrahi ke congregation lasr uh ac fin facluh nohfohn. Finne yohk kuh srihk, kuht nuhkewa kuh in sang ma oasr yohrohsr in ahkkahlwemye luhngse lasr nuh sin Jeova. (Luo Corinth 8:12) Tuhsruhktuh, oasr pac inkacnek sahyac ma kuht kuh in ahkkahlwemye lah kuht luhngse el.

8, 9. Meac sie pac inkacnek ma kuht ahkkahlwemye nuh sin Jeova lah kuht luhngse el? Meac Mike ac sucu lal ah oruh?

⁸ Jesus el luti kuht in suk meet Tohkohsrahi ac in tiac elyahlac ke mwe mongo nwacsr ac nuknuk lasr. Pahpah tuhmwacsr el wuhlelah muh el ac fah use ma kuht enenuh uh. (Matthew 6:31-33) Kuht luhlahlfongi Jeova ac etuh lah el ac sruokyacna wuhlelah lal inge. Ke kom luhngse na pwacye sie mwet, kom oacyacpac luhlahlfongel. Kalmac pa luhlahlfongi lasr nuh sin Jeova fin yohk, na ac yohk pac inkacnek ma kuht ahkkahlwemye luhngse lasr nuh sel uh. (Psalm 143:8) Pwacnacng sahp kuht kuh in siyuck sesr sifacna: ‘Yac oakwuck ac inkacnek ma nga orekmakihn pacl ac kuh luhk inge ahkkahlwemye lah nga luhngse na pwacye Jeova? Ke kais sie lwen, yac nga luhlahlfongi kacl Jeova lah el ac fah karihngihn mwe enenuh luhk uh?’

⁹ Mike ac sucu lal ah luhlahlfongi Jeova. Ke Mike el srackna fuhsr, el ke oruh orekma in fahkwack pweng wo ke sie muhtuhnfacl sahyac ah. Tukun el pahyuckyak ac oasr tari tuhlihk luo nahtuhltahl, el srackna ke oruh ma inge. Pwacnacng ke pacl se Mike ac sucu lal uh riti ke mukul lili sahyac suc kuhlwacnsap ke acn ma yohk enenuh nuh ke mwet in fahkwack, eltahl sulaclah in ahkfihsracsrye moul laltahl. Eltahl kuhkwackuhnlah lohm seltahl ah ac muhta ke apartment se. Mike el ahksrihkyelah pac pihsen mwet suc el orekma la ke business in ahknwacsnwacs se lal ac el konwacack inkacnek ma el kuh in karihngihn business lal el finne muhta ke acn sahyac, ke el orekmakihn internet uh. Sahflahiyac ah, Mike ac sucu lal ah som nuh ke sie pacna muhtuhnfacl ac engankihn orekma in luti pweng wo laltahl ke acn inge. Mike el fahk: “Kuht puhlakihn pac pwacyeiyen kahs lal Jesus ma sihmihsyucklac in Matthew 6:33.”

NUHNKUH YOHK KE MA JEOVA EL LUTI NUH SUM

10. In oacna Tohkohsra David, efuh kuh wo kuht in nuhnkuh ke ma kuht lotwelah kacl Jeova uh?

¹⁰ Tohkohsrah David el suhmuhslah: “Kuhsrao fahkwack ke wolacna luhn God; ac yen engyeng uh fahkwack ke orekma luhn pahol.” El fahk pac: “Masap lun Leum God suwohs na, pa sang kuh sasuc nuh sin mwet. Sap luhn Leum God pwacye na, pa sang lahlmwetmwet nuh sin mwet nihkihn.” Ke David el nuhnkuh yohk ke masap ac ma oreklac luhn Jeova uh, el fototoyang nuh sel ac ma inge moklacl in ahkkahlwemye luhngse lal nuh sin Jeova. David el fahk: “Lwelah kahs in oalihk, ac nuhnak insiuck in wo ye motom, O LEUM GOD, eot kuh luhk ac Mwet Lahngo luhk.”​—Psalm 19:1, 7, 14.

11. Kuht ac orekmakihn fuhkah etwacack ma Jeova el use nuh sesr uh in ahkkahlwemye luhngse lasr nuh sel? (Liye petsac se meet ke mwe lutlut inge.)

¹¹ Ke pacl inge, Jeova el luti kuht ke ma pucspucs kacl, ke oakwuck lal, ke ma oreklac nuhkewa ac ke Kahs lal uh. Mwet luhn facluh ahkkweye mwet uh in som suk lutlut fuhlwact ac etwacack yohk. Tuhsruhktuh, lutlut fuhlwact uh kwacna oruh in wacngihnlac luhngse kuh luhlahlfongi luhn mwet uh nuh sin God. Jeova el arlacna ke in yohk etwacack lasr ac kuht in oacyacpac lahlmwetmwet. El ke kuht in orekmakihn ma kuht lotwelah uh nuh ke ma ac wo nuh sesr ac in kahsruh mwet sahyac. (Soakas 4:5-7) Ke sie mwe puhpuhlyuck, el ke kuht in sruhmuhn tuh mwet sahyac in wi “etuh ke ma pwacye” ac kahsreltahl in wi moullac. (Sie Timothy 2:4) Kuht ahkkahlwemye luhngse lasr nuh sin Jeova ac nuh sin mwet uh ke kuht luti mwet nuhkewa ma kuht kuh in luti ke Tohkohsrahi luhn God ac ke ma Tohkohsrahi se inge ac fah oruh nuh sin mwet uh.​—Riti Psalm 66:16, 17.

12. Meac sie muhtwacn lili fuhsr el fahk ke sie mwe sang ma el eis sin Jeova?

¹² Mwet fuhsr uh kuh pac in nuhnkuh yohk ke ma nuhkewa ma Jeova el sang nuh seltahl ac lotweltahl kac uh. Shannon el srackna esam ma el puhla ke sie toeni luhlahp ma el tuh wi ke el yac 11 ac tuhlihk muhtwacn srihsrihk se wiyacl ah yac 10. Sifac ke toeni luhlahp se inge pa “Godly Devotion.” Ke sie ip kac, siyuckyuck tuhlihk srihsrihk nuhkewa, weluhlacng Shannon ac tuhlihk muhtwacn se wiyacl inge in som muhta ke acn se. Ke muhtwacwackiyac ah el luhman tuhfal. Tuhsruhktuh, ke pacl se ma ituckyang nuh sin kais sie tuhlihk puk se inge Questions Young People Ask​—Answers That Work el arlacna lut. Meac mwe sang na wowo se inge oruh el in puhla sin Jeova? El fahk: “Pa inge pacl se nga akihlenack lah Jeova el pwacye ac lah el arlacna luhngse nga. Kuht arlacna engan lah Jeova, God na wowo se lasr inge el use mwe sang na wo ac kahto ma wacngihn molo!”

LOHNG KAHS IN KAI LUHN JEOVA

13, 14. Meac kuht enenuh in oruh ke pacl ma Jeova el kai kuht uh, ac efuh?

¹³ Bible uh ahkacsmakihnye kuht: “LEUM GOD el kaelos suc el luhngse, oana ke sie pahpah kai tuhlihk suc el insewowo kac.” (Soakas 3:12) Ke pacl se kuht lohng kahs in kai luhn Jeova ac kuht lwelah elan ahkpahye kuht, kuht etwaclah in oruh ma wo ac kuht puhla inse mislac. Pwacye lah, “ke pacl ma kaiyuck kuht uh, kuht ac liye oacna in ma ahksuhpwacrye kuht ke pacl sac, ac tiac ma in ahkenganye kuht.” (Hebrew 12:11) Tuh finne ohinge, meac kuht enenuh in oruh ke pacl ma Jeova el kai kuht uh? Kuht enenuh in tiac pihlesruh kahs in kai luhn Jeova kuh in sruokyac na kasrkuhsrak lasr ke srihpen kuht sruhnga lohng ma fwack nuh sesr uh. Kuht luhngse Jeova, pwacnacng kuht lohngohl ac ahksuwohsye ma enenuh in eklac sesr uh.

¹⁴ Ke pacl lal Malachi, puhs mwet Jew ma tiac lohnguhl Jeova. Eltahl tiac elyah kac lah mwe kihsac ma eltahl kihsackihn inge tiac ahkinsewowoye Jeova. Pwacnacng, Jeova el sang kahs in kai na upac nuh seltahl ke ma inge. (Riti Malachi 1:12, 13.) Puhs pacl ma Jeova el sang kahs in kai nuh seltahl, tuhsruhktuh eltahl sruhnga in lohng. Pwacnacng el fahk nuh seltahl: “Nga ac selngawi kowos, ac nga fah oacyacpac selngawi mwe insewowo nuh suwohs.” (Malachi 2:1, 2) Arlacna kahlwem lah fototo lasr nuh sin Jeova uh ac fah wacngihnlac kuht fin sruhnga lohng kahs in kai lal uh pacl nuhkewa ac kuht puhla muh tiac na yohk srihpac.

15. Kain in nuhnak fuhkah kuht enenuh in fahsr liki?

¹⁵ Facl lal Satan uh ahkkweye mwet pucspucs in ahkkahlwemye ohiyen inse fuhlwact ac nuhnkuh kac sifacna. Mwet pucspucs sruhnga ke pacl ma ahksuwohsyeyuck eltahl uh kuh in fwack ma eltahl in oruh. Kuhtuh mwet uh lohng kahs in kahsruh ma ituckyang nuh seltahl uh, tuhsruhktuh eltahl oruh ke na srihpen enenuh se. Enenuh kuht in tiac oacna kain in mwet inge. Bible uh fahk nuh sesr kuht in “tiac etahi luhman moul luhn mwet facluh.” A kuht enenuh in etuh ma Jeova el siyuck sesr uh ac oruh ma ac ahkinsewowoyacl. (Rome 12:2) El orekmakihn u lal uh in use nuh sesr kahs in kahsruh ke pacl fal. Ke sie mwe puhpuhlyuck, ahkacsmakihnyeyuck kuht ke ohiyac fal mukul ac muhtwacn in ahkkahlwemye nuh sin sie sin sie, in sulaclah ahkwoyac kawuck lasr ac ma kuht oruh ke pacl ma kuht monglac kuh sritacl. Kuht fin porongo kahs in kai luhn Jeova ac oruh mwe ahksuwohs nuh ke moul lasr uh tuh kuht in ahkinsewowoyacl, kuht ahkkahlwemye lah kuht srui na pwacye ke kolyuck lal ac kuht luhngse el na pwacye.​—John 14:31; Rome 6:17.

LUHLAHLFONGI JEOVA ELAN KAHSRE KOM AC KARIHNGIHN KOM

16, 17. (a) Efuh kuh kuht enenuh in etuh nuhnak luhn Jeova meet liki kuht oruh kuhtwena sulaclah? (b) Mwet Israel eltahl ahkkahlwemye fuhkah lah srihklac luhngse ac luhlahlfongi laltahl nuh sin Jeova?

¹⁶ Tuhlihk srihsrihk uh luhlahlfongi pahpah ac ninac kiyacltahl uh in kahsreltahl ac karuhnguhnuhltahlwacng. Oasr pac mwet mahtuh suc srackna suk kahsruh sin pahpah ac ninac kiyacltahl. Eltahl akihlen lah, eltahl finne sifacna kuh in oruh sulaclah pucspucs, pahpah ac ninac kiyacltahl uh pa ac kuh in sang kahs in kahsruh ma ac wo nuh seltahl uh. In oacpacna, Jeova suc Pahpah tuhmwacsr el lwelah kuht in sifacna oruh sulaclah lasr. Tuhsruhktuh ke srihpen kuht arlacna luhlahlfongel ac luhngse el, kuht siyuck ke kahsruh lal pacl nuhkewa ac kwacfeacng in etuh nuhnak lal kac meet liki na kuht oruh kuhtwena sulaclah. Kuht fin luhlahlfongi Jeova, el ac fah use nguhn muhtahl lal nuh sesr in kahsre kuht in oruh ma wo.​—Philippi 2:13.

¹⁷ Ke pacl lal Samuel ah, mwet Israel eltahl kuf ke sie mweun laltahl nuh sin mwet Philistia. Eltahl tiac siyuck sin Jeova ma wo eltahl in oruh, a eltahl fahk: “Wona kuht in som use Tucptucp in Wuhleacng luhn LEUM GOD Shiloh me, tuh Elan kahsre kuht ac molikuhtlac liki mwet lokoalok lasr.” Meac sahflahiyac? “Mwet pucspucs acnwucki. Oasr tausin tolngoul mwet mweun luhn Israel misac. Tucptucp in Wuhleacng luhn LEUM GOD sruhuh.” (Sie Samuel 4:2-4, 10, 11) Mwet Israel ah nuhnkuh na muh eltahl fin us weluhltahl tucptucp in wuhleacng, na Jeova el ac fah kahsreltahl ac karuhnguhnuhltahl. Tuhsruhktuh, eltahl tiac na siyuck kahsruh sin Jeova kuh suk in etuh nuhnak lal kac. Eltahl oruh na ma eltahl nuhnkuh muh ac wo ac eltahl sun mwe kweok yohk kac.​—Riti Soakas 14:12.

18. Meac Bible uh luti kom ke luhlahlfongi lom nuh sin Jeova?

¹⁸ Mwet sihm luhn psalm el luhngse ac luhlahlfongi na pwacye Jeova ac el suhmuhslah ma inge: “Finsrak luhk in God, ac nga fah sifwilpac kaksakuhnuhl, Mwet Lango luhk ac God luhk. Nguhnihk arlacna toasr. Ke ma inge nga esamkomyak.” (Psalm 42:5, 6) Yac pa pac inge puhlakihn lom sin Jeova uh? Yac kom puhla muh kom fototo nuh sel ac luhlahlfongel? Sahp kom kuh in kapkapack ke luhlahlfongi lom nuh sel liki na meet ah. Bible uh fahk: “Luhlahlfongi LEUM GOD ke insiom kewa. Nimet luhlahlfongi etuh lom sifacna. Esam LEUM GOD in ma nuhkewa kom oruh, ac El ac fah ahkkahlwemye inkacnek suwohs nuh sum.”​—Soakas 3:5, 6.

19. Kom ac ahkkahlwemye fuhkah nuh sin Jeova lah kom luhngse el?

¹⁹ Ke Jeova el luhngse kuht meet, el luti kuht in luhngse el. Lwelah kuht in nuhnkuh ke luhpan ma el oruh nuh sesr ac luhpan luhngse lal nuh sesr. Ac kuht in ahkkahlwemye pac lah kuht luhngse el ke insiacsr kewa, nguhnasr kewa, nuhnkacsr kewa, ac kuh lasr kewa.​—Mark 12:30.