Ke Pal Kom Fwusr, Oru Sulela Lom in Kulansapu Jeova
“Kafweang in orekmakin ma nukewa su kom lotela tari a oru kom in lulalfongi ka.”—2 TIMOTE 3:14, NW.
1. Mea nunak lun Jeova nu ke orekma in kulansap lun Met Lo fwusr puspus lal?
OREKMA in kulansap lun met fwusr nukewa el yok sripe nu sin Jeova paenang el akkalemye sie kas palu ka. “Met sram elos insemwomwo in esaloswot sifwana in len in ku lom,” met sim lun sam el simusla. “In oasku lun mutal, liki insien lututang, oasr yurum len in met fwusr lom oana aunfong.” (Sam 110:3) Aok, Jeova el aksaokye na paye met fwusr su lungse na paye in kulansap nu sel.
2. Met fwusr ke pal inge elos sun me kutong ku akkolukye nunak lun met puspus in kufusla nunak lalos ke pal fwasru?
2 Komwos met fwusr ke congregation lun met Kristian, ya komwos mwulela tari moul lomwos nu sin Jeova? Oasr met fwusr puspus su upa nu selos in oru sulela lalos fwin elos fwa kulansap nu sin Jeova ku tia. Met kol ke business, met luti puspus, a ke kutupal met in sou a met kawuk elos akkeye met fwusr elos in oru niyen sun lalos in suk ma puspus lun fwalu. Fwin met fwusr elos kafweang in akpayeye akwuk lalos in kulansap nu sin God, met puspus lun fwalu elos mulat a tia insese nu selos. Tusruktu esam la payaiye pa orekma in kulansap nu sin God pa inkanek mwo emeet kom ku in oru. (Sam 27:4) Ke ma inge, nunku ke kusensiyuk tolu inge: Efu ku kom enenu in kulansap nu sin God? Fuka kom ku in kutangla oana sie met su mwulela tari moul lal nu sin God fwinne oasr ma puspus metu elos fwak a oru nu sum? Kain in pal mwomwo fuka ke orekma in kulansap nu sin God kom ku in oru?
Orekma in Kulansapu Jeova Pa Ma Sumwos in Orek
3. Fuka ma orekla lun Jeova fwa akkeye kut in kulansupal?
3 Efu ku kom enenu in kulansap nu sin God paye a moul? Fwakyuk 4:11 el akkalemye ke sripe se emeet: “Fwal nu sum, Leum lasr a God lasr, tu kom in eis mwolanu a kaksak a ku, tu kom orala ma nukewa, a ke lungse lom elos on, a orekla tari.” Jeova pa Met Orala ma nukewa su oasr yen nukewa. Fwalu el arulana kato! Sak, ros, ma orakrak, mwea, eolu, a waterfalls—Jeova el orala ma nukewa inge. “Fwalu el sesesla ke me kasrup lom,” Sam 104:24 el akkalemye. Kut lungse na paye in sang kulo meyen Jeova el kulang na paye in ase nu sesr sie mano a nunak su oru kut in engankin fwalu a ma mwomwo nukewa su oasr fwin fwalu! Ya kulo paye wi kas in kaksak lasr tia oru kut in lungse na paye in kulansap nu sel?
4, 5. Kain in orekma puspus fuka lun Jeova kasrel Josua in fototo nu sel?
4 Siepa sripe in kulansap nu sin Jeova ku in koneyukyak ke kas lal Josua met kol lun met Israel. Ke saflaiyen moul lal, Josua el fwak nu sin met Israel: “Komwos etu in insiomwos kemwa a in ngunumwos kemwa tu wangin ma tula liki ma mwo nu kemwa su Jeova God lomwos el fwak keyumwos. Ma nu kemwa akpayeyuk tari nu sumwos.” Efu ku Josua el ku in fwak inge?—Josua 23:14.
5 Ke el tulik srisrik su kapkapek in an Ijipt, Josua el lotela ke mwulela lun Jeova in sang nu sin met Israel sie an nu selos sifwana. (Genesis 12:7; 50:24, 25; Exodus 3:8) A Josua el liye akmwoye nu ke pal se Jeova el akpayeye mwulela lal ke el oru Me Akkeok Sengoul nu sin met Ijipt a oru Fero su arulana likkeke in fulela tulik nutin Israel in som. Josua el sie sin met puspus su moliyukla liki Mwea Srusra a el liye ke pal se mwea el afwunulla Fero a met meun nukewa lal. Ke fwufwasryesr lalos ke lusen pal loeloes “yen mesis lulap a me aksangeng” su oasr me aksangeng ka ke Yen Mesis in an Sainai, Josua el liye ke inkanek su Jeova el sang ma nukewa su met Israel elos enenu. Wangin kutena selos mise ke sripen malu ke kof a musrinsral. (Duteronomi 8:3-5, 14-16; Josua 24:5-7) Ke sun tari pal lun met Israel elos in sruokye an puspus fwin an Kenan in muta we oana Fwal Mwulela nu selos, Josua el liye ke inkanek mwomwo fuka God su el a met Israel puspus elos alu nu se el kasrelos ka.—Josua 10:14, 42.
6. Mea fwa kasre kom in akkeye lungse yok lom in kulansap nu sin God?
6 Josua el etu la Jeova el tia ku in mulkunla a el akpayeye mwulela nukewa Lal. Ke ma inge, Josua el fwak: “A fono keik a loom sik, kut fwa orekma nu sin Jeova.” (Josua 24:15) A mea nu sum? Fwin kom nunku ke mwulela nukewa su God paye el akpayeye tari ka a ke mwulela puspus lal su el fwa akpayeye, ya ma inge ku in kasre kom in oasr lungse yok lom in kulansapul oana ma Josua el oru?
7. Efu ku baptais ke kof el sie inkanek yok sripe in orek?
7 Kom fwin nunku akmwoye ke ma nukewa su Jeova el orala a in nunku yok ke mwulela mwomwo nukewa lal su kom ku in lulalfongi yok, fwa ku in akkeye kom in tia orala mwulela lun moul lom nu sin Jeova mukena a ma inge ku in kasre kom pa in eis baptais in akpayeye mwulela loom. Baptais el sie inkanek yok sripe su enenu in orek sin met nukewa su lungse in kulansap nu sin God. Jisus su Me Srikasrak mwomwo emeet lasr el akkalemye ma inge. Meet liki el mutamwauk in oru orekma lal oana Messaia, el akkalemyel sifwana nu sel Jon Baptais in eis baptais. Efu ku Jisus el oru inkanek inge? El fwak, “Nga oatui in kosrao me, tia in oru ma lungse luk, a ma lungse lal su supeyume.” (Jon 6:38) In akkalemye la el sifwana kisekinulla in oru a in akpayeye ma lungse lun Papa tumal, Jisus el eis baptais lal.—Mattu 3:13-17.
8. Efu ku Timote el oru sulela lal in kulansap a alu nu sin God, a mea kom enenu in oru?
8 Nunku pa kel Timote, sie met Kristian fwusr su Jeova el sang orekma puspus a kunokon yok sripe puspus nu sel tokin kutu pal. Efu ku Timote el oru sulela lal in kulansap a alu nu sin God paye? Baibel el akkalemye nu sesr la ‘el lotela ke ma puspus su oru elan lulalfongi ka.’ (2 Timote 3:14, NW) Kom fwin lutlutkin kas lun God a oasr ma puspus su kom lotela su oru kom in lulalfongi ka la me luti nukewa su oasr ka el paye, oasr pal mwomwo lom in oru oana Timote. Ingena kom enenu in oru sulela lom. Efu ku kom tia sramsram nu sin papa a nine kiyom ke ma kom lungse in oru? Papa a nine kiyom a met elder ke congregation ku in kasre kom in eis kalem yok ke ma eneneyuk nu ke baptais su akkalemyeyuk in ma Simusla.—Ridi Orekma 8:12.
9. Ke pal se kom eis baptais lom mea ma inge ku in oru nu sin met puspus?
9 Orekma in eis baptais pa mutamweyen orekma mwomwo nu ke inkanek in kulansap nu sin God paye. In eis inkanek oinge, ke kas pupulyuk oana kom ilyuk nu ke sie akutun loeloes su oasr me insemwomwo yok lun moul ma patpat ka a ke me akengan su kom ku in pulakin ke pal inge ke orekma in oru ma lungse lun God. (Hibru 12:2, 3) Kom ku in akinsemwomwoye pa met in sou lom su oasr tari ke kain in akutun inge a met kawuk lom su wi ke congregation lun met Kristian. Yok liki nukewa, kom ku in akinsemwomwoye insien Jeova. (Ridi Soakas 23:15.) Aok, oasr met puspus su fwa tia eis kalem mwomwo ka la efu ku kom oru sulela lom in alu nu sin Jeova, a elos fwa ku in nunku mu tia sumwos sulela su kom oru. Elos ku pa in lain kom. Tusruktu kom ku in eis kutangla ke ma upa nukewa inge.
Fwin Met Puspus Elos Lain Kom
10, 11. (a) Kain in kusensiyuk puspus fuka saap metu elos suk in siyuk ke sulela lom in kulansap nu sin God? (b) Mea kom ku in lotela ke inkanek lun Jisus in sang me top nu ke kusensiyuk puspus ke alu paye?
10 Sulela lom in kulansap nu sin Jeova ku in oru tulik lutlut puspus, met atulani, a sou lom in fosak ka. Elos ku in siyuk sum la efu ku kom sulela in oru inkanek inge a siyuk kusensiyuk nu sum ke oiyen lulalfongi lom. Oiya fuka kom fwa akkalemye ka? Paye, kom enenu in tuni akmwoye nunak a pulakin lom in kasre kom ke akuteye su kom oru nu ke sripe puspus su paenang sulela lom inge. A ke pal se kom oru me top lom nu ke kusensiyuk puspus lun met ke oiyen lulalfongi lom, ya oasr me srikasrak su mwo liki me srikasrak lun Jisus su kom ku in etawi?
11 Ke pal se met kol puspus ke alu lun met Ju elos siyuk kusensiyuk puspus nu sel Jisus ke sifwil moulyuk, el akkalemye nu selos sie ma simusla su elos tia nunku ka. (Exodus 3:6; Mattu 22:23, 31-33) Ke pal se oasr sie met sim siyuk sel la piye masap se ma yok emeet, Jisus el orekmakin nu sel fus puspus ke Baibel su fwal nu ke kusensiyuk lal. Met se inge el insemwomwo a sang kulo nu sel Jisus ke me top lal. (Livitikus 19:18; Duteronomi 6:5; Mark 12:28-34) Inkanek mwo lal Jisus in orekmakin ma Simusla a ke inkanek lal in sramsram el oru “metu srisrielik kel,” a met lokwalok lal tia ku in akkolukyel. (Jon 7:32-46) Fwin kom sang me top nu ke kusensiyuk puspus ke lulalfongi lom, orekmakin Baibel a sramsram nu sin metu “ke fulpap a sunak paye.” (1 Piter 3:15, NW) Kom fwin tia etu me top nu ke sie kusensiyuk, fwak nu sin met an la kom nukin me top ka a akkalemye la kom fwa srike in lutlut a suk me top nu ka. Tokin ma inge, kom liye me lutlut nu ka a kom orekmakin Watch Tower Publications Index ku Watchtower Library on CD-ROM ke kas su kom kalem ka. Fwin kom akola mwo, kom fwa “ku in etu fuka fwal in topuk nu sin kais sie met.”—Kolosse 4:6.
12. Efu ku kom tia enenu in lela me kalyai in akmunasye kom?
12 Saap oasr pa ma saye su kom ku in sun sayen kusensiyuk puspus lun met nu ke sulela lom in kulansap nu sin God a ke lulalfongi lom. Paye la, met lokwalok lun God, Setan su Devil, el sruokye fwalu. (Ridi 1 Jon 5:19.) Kom tia ku in tupan mu met nukewa elos ku in kaksakin ku insemwomwokin sulela lom, a kom ku pa in sun me lain. Kutu sin met elos fwa ‘kaskas koluk lain kom,’ a elos ku in oru pa ma inge pal nukewa. (1 Piter 4:4) Tusruktu, esam pal nukewa la tia kom mukena pa sun kain in me lain inge. Jisus Kraist el sun pa me keok ke sripen me kalyai. Met sap Piter el pulakin pa ma inge, a el simusla: “Met kulo, nik komwos nunkuke me srike oana e in masrlomwos, su tuku nu fwomwos in akpayeye komwos, oana me lut su sikyuk nu sumwos. Ke ma inge, komwos in engun tu komwos met ipeis wi Kraist ke keok lal.”—1 Piter 4:12, 13.
13. Efu ku met Kristian elos ku in insemwomwo fwin elos kalyaiyuk?
13 Kom fwin muteng ke me kalyai ku me lain meyen kom sie met Kristian oiya inge el sie sripe mwomwo in engankinyuk. Efu? Meyen fwin met nukewa elos insese nu ke inkanek in moul lom, ma inge ku in akkalemye la kom moulkin moul fwal nu ke akwuk lal Setan—a tia ke akwuk lun God. Jisus el sang kas in sensen: “We nu sumwos, ke met e nukewa elos kaskas mwo keyumwos, tu ou inge papa tumalos elos oru nu sin met palu kikiap meet.” (Luk 6:26) Me kalyai el akkalemye la Setan a met puspus lal elos mulat nu sum meyen kom lungse Jeova. (Ridi Mattu 5:11, 12.) A “fwin akkolukyeyuk . . . ke en Kraist” el sie sripe in pulakin insemwomwo yok.—1 Piter 4:14.
14. Kain in ma mwomwo puspus fuka ku in sikyak fwin sie met el sruokye oaru lal nu sin Jeova fwinne oasr me kalyai?
14 Kom fwin sruokye oaru lom nu sin Jeova fwinne oasr me lain, oasr fwako mwomwo akosr su ma inge ku in oru. Kom oru sie ma lo ke God a ke Mwen natul. Oiyen oaru lom in muteng ku in akkeye met lili Kristian nukewa wiyom. Kutu sin met su tia etu ke Jeova fwin liye oiyen muteng lom elos ku in mokleyuk in suk inkanek in eis etauk kel. (Ridi Filippai 1:12-14.) A ke kom liye inkanek mwomwo su Jeova el orekmakin nu ke oiyen muteng ke ma upa puspus, lungse lom nu sel fwa yokyokelik.
“Sie Srungul Lulap” El Ikakla Nu Sum
15. Kain in “srungul lulap” fuka ikakla nu sin met sap Poul?
15 Ke orekma in luti lal fwin an Efesus, met sap Poul el simusla: “Tu ikakla tari nu sik sie srungul lulap.” (1 Korint 16:8, 9) Srungul lulap se inge el lumeyuk nu ke pal mwomwo su kol nu ke orekma yok in luti peng mwo a in orala met tuma lutlut ke siti se inge. In orekmakin pal mwomwo inge Poul el sang me kasru yok nu sin met puspus in lotela kel Jeova a elos in alu nu Sel.
16. Fuka met lula sin met Kristian akmusrala elos ilyuk nu ke “sie srungul su ikakla” in yea 1919?
16 In yea 1919 Jisus Kraist su akmutalyeyuk tari el filiye “sie srungul su ikakla” nu sin met akmusrala su lula fwin fwalu. (Fwakyuk 3:8) Elos ilyuk nu ke srungul se inge a elos mutamwauk in oru orekma in sulkakin peng mwo a in luti met puspus ke ma paye lun Baibel ke inkanek moniyuk yok liki meeta. Mea fwako lun orekma in luti lalos inge? Ke pal inge peng mwo el sun an loesilanu fwin fwalu, a oasr apkuran million itkosr sin met su oasr fwinsrak lalos in eis moul ma patpat ke fwal sasu lun God.
17. Fuka kom ku in ilyuk nu ke “sie srungul lulap su kol nu ke orekma”?
17 “Sie srungul lulap su kol nu ke orekma mwomwo” el srakna ikak nu sin met kulansap nukewa lun Jeova. Elos nukewa su ilyuk nu ka elos koneak me engan a me akinsemwomwo yok ke pal se elos moniyuk in wi pal nukewa ke orekma in sulkakin peng mwo pal nukewa. Komwos met kulansap fwusr lun Jeova, fuka kom aksaokye kunokon mwomwo se inge su wangin ma oana in kasru met puspus tu elos in “oasr lulalfongi ke mwosasu”? (Mark 1:14, 15) Ya kom nunku tari in sroang nu ke orekma lun regular ku auxiliary pioneer? Orekma in musai Kingdom Hall, orekma in kulansap ke Bethel, a ke orekma lun missionary in pa kutupa pal mwomwo su ku in ikasla nu sin met fwusr oana kom. Ke sripen arulana srikeni pal lula nu ke fwal koluk lal Setan inge, paenang kafweang in wi oru kain in orekma inge in sang kasru nu ke Togusrai el arulana salkeyuk yok liki meeta ke len nukewa. Ya kom fwa ilyuk nu ke “srungul lulap” se inge ke srakna oasr pal lula meet liki safla?
“Pulakin a Liye Tu Jeova El Mwo”
18, 19. (a) Mea kasrel Devid in oasr lungse yok lal in kulansap nu sin Jeova? (b) Mea akkalemye la Devid el tia auli ke kulansap lal nu sin God?
18 Met sim lun sam el suli met puspus in “pulakin a liye tu Jeova el mwo.” (Sam 34:8) Ke pal se Togusra Devid lun met Israel in pal meeta el srakna fwusr a liaung un kosro, Jeova el molella liki me akkolukye a fosrnga lun kosro lemnak puspus. God el kasrel ke orekma lal in lainul Golaiat a el molella liki ma upa puspus. (1 Samuel 17:32-51; Sam 18, superscription, NW) Ke sripen lung kulang yok lun God, paenang Devid el akkeyeyuk in simusla: “O Jeova God luk, pukanten orekma sakuruk lom su kom orala, a nunak lom nu sin met; ma inge koflana takunyukla nu sum.”—Sam 40:5.
19 Lungse lal Devid nu sin Jeova el yokelik na paye a el lungse in kaksakinul ke inse a nunak kewa lal. (Ridi Sam 40:8-10.) Ke yea puspus somla, Devid el tia auli ke sulela lal in orekmakin moul lal in alu nu sin God paye. In moulkin moul su oasr lungse yok ka nu sin God pa ma saok yok nu ke moul lal—su sie sropon me insemwomwo yok su wangin ma oana. Ke el matou tari, Devid el fwak: “Tu kom fwinsrak luk, O Leum God, Kom me lalalfongi luk ke nga tulik me. Aok, in pal nga matu a fiyaea, O God, nik kom som liki yu.” (Sam 71:5, 18) Lulalfongi lal Devid nu sin Jeova a oiyen kawuk lal nu Sel el arulana fukoko, fwinne kuiyen manol munasla.
20. Efu ku orekma in kulansapu God pa inkanek se ma mwo emeet in orekmakin moul lom?
20 Moul lal Josua, Devid, a Timote sang me akpayeye nu ke orekma in kulansap nu sin Jeova la pa inge inkanek se su mwo emeet in orekmakin ke moul lom. Me insemwomwo su sie met el ku in eis ke orekma puspus lun fwalu el ma na nu ke kitin pal a tia ku in srikeyuk nu ke me insemwomwo puspus su ku in on ke lusen pal loeloes su kom ku in eis ke ‘orekma in kulansap lom nu sin Jeova ke inse a ngunum kewa.’ (Josua 22:5) Kom fwin tia orala akwuk nu ke oiyen mwulela lun moul lom nu sin Jeova ke inkanek lun pre, srike in siyuk sum sifwana, ‘Mea ikolyuwi in ekla sie sin Met Lo lun Jeova?’ Fwin kom sie met su alu nu sin Jeova su baptaisla tari, ya kom lungse in akyokye me insemwomwo lom ke moul? Ke ma inge kom ku in orekmakin ku a pal yok lom nu ke orekma lom in kulansap nu sin God, a kafweang in kapkapek oana sie met Kristian. Me lutlut toko fwa akkalemye nu sum la fuka kom ku in kapkapek ke oiya nukewa ke inkanek in etawi me srikasrak lun met sap Poul.
Kom E Topuk Fuka?
• Sang sripe luo la efu ku kut enenu in kulansap nu sin God.
• Mea kasrel Timote in oru sulela lal in kulansap nu sin God?
• Efu ku kom enenu in sruokye oaru lom fwin kom sun me kalyai?
• Kain in pal mwomwo fuka ke orekma in kulansap ku in ikakla nu sum?
[Picture on page 22]
Inkanek mwo emeet lun moul pa in oru orekma in kulansap nu sin Jeova
[Picture on page 23]
Ya kom ku in sang me top nu ke kusensiyuk puspus ke lulalfongi lom?