Insemwomwo Ma Patpat In Kosrao Ku Fwin Fwalu?

YA insemwomwo lom oasr nu ke an se su kom muta we? Apkurun met nu kemwa e sa in fwak la insemwomwo lun sie met tuku ke ma puspis oanu mano fukoko, sie nien sun ke moul, a asrouki futoto nu sin met saye. Soakas lun Baibel el fwak ou inge: “Me mongo ke maasrik, yen lungse on we, mwo liki soko kao fat wi srunga.”​—Soakas 15:17.

Tusruktu, sie me asor, fwal se lasr inge nenela ke sramsram loeloes ke srunga, orekma silolel, a kutupa orekma koluk saye. A fuka kosrao, ku an lun ngun, an se su met puspis elos fwinsrak in som nu we tokin elos mise? Ya an se inge sie an in engun ma patpat a misla, a wangin kutena me lokwalok we, oanu met puspis elos nunku?

Baibel el luti la God el muta in kosrao wekunang million puspis lun ma orekla in ngun su pangpang lipufon. (Mattu 18:10; Fwakyuk 5:11) Ma inge akkalemyeyuk oanu “mwen nutin God.” (Job 38:4, 7) Oanu met, lipufon nu kemwa oasr sukosok in oru sulela lalos; elos tia oanu robot. Ke ma inge elos ku in sulela in oru ma mwo ku in oru ma koluk. Ya lipufon inge ku in sulela in oru ma koluk? Saap sie me lut nu sin met puspis in etu la ke lusen tausen yiu puspis somla, oasr sie pise lulap sin lipufon su elos oru ou inge, aok, elos oru ma koluk lain God​—elos lainul!​—Jud 6.

Orekma in Lain in Kosrao

Ma koluk sikyuk in an lun ngun ma ke sripen orekma in lain lun sie lipufon, su tok pangpang el Setan, (met lain) a Devil (Met kikiap). Lipufon se inge su lungse in akos God ke pal meeta el sulela in oru ma koluk ke lungse lal sifwanu. Ke ma inge, el ekla me purakak koluk nu sin kutupa ma orekla in ngun, paenang in len lal Noa, meet liki sronot, sie pise yok selos akesrui nu sel Setan ke orekma lal in lain God.​—Genesis 6:2, footnote; 2 Piter 2:4.

Lipufon seakos inge tia sa sisyukla liki in kosrao. A, oasr lela nu selos in srakna wi muta we​—fwinne elos tia ku in oru kutu orekma—​ke lusen tausen yiu puspis. Tusruktu, ke pal se mongfwusesr lun God nu sin lipufon koluk inge wanginla, elos nu kemwa “sisila” liki in kosrao, in tufa kunausyukla elos tok. Ke ma inge sie pusra in kosrao fwak: “Ke ma inge, komwos in engunak, O kosrao, a komwos su muta lu.!” (Fwakyuk 12:7-12) Arulanu kalem la, lipufon nu kemwa su oaru elos arulanu engun, meyen ke saflaiye, wanginla in kosrao lipufon inge nu kemwa su orek lokwalok nu selos!

In nunku nu ke ma sikyuk inge su tia eteyuk, arulanu kalem la wangin misla na paye ke kutena pal fwin ma lalmetmet su God el orala kena kunaus ma sap a akmwuk Lal. (Isaia 57:20, 21; Jeremaia 14:19, 20) Tusruktu, funo elos nu kemwa akos ma sap lun God, misla a insemwomwo e arulanu yok. (Sam 119:165; Isaia 48:17, 18) Ke ma inge, fwin met nu kemwa lungse a akos God a ouyepa lungse sie sin sie, ya fwalu se inge e tia sie nien muta mwolanu, a insemwomwo? Topuk lun Baibel fwak mu aok!

Tusruktu, fuka nu ke met puspis su arulanu srunga in ekulla inkanek in moul koluk lalos? Ya elos tafwela in akkolukye misla lun met nu kemwa su lungse in oru ma lungse lun God? Mo, God el aksumwosye tari orekma koluk lun lipufon in kosrao meet, a el fwa ouyepa oru ou inge nu sin met koluk nu kemwa su muta fwin fwalu.

Sie Fwalu Su Aknasnasyeyukla

“Kosrao tron luk, a fwalu ma loangeyen niuk,” God el fwak. (Isaia 66:1) Meyen el mutal liki nu kemwa, paenang God el tia lela “ma loangeyen niel” in akfokfokyeyuk ma patpat. (Isaia 6:1-3; Fwakyuk 4:8) In oanu pal se ke el akwanginyela ngun koluk, liki in kosrao e fwa orek ou inge fwin fwalu nu sin met koluk nu kemwa, oanu kutu fus in Baibel toko el akkalemye:

“Tu met orekma koluk fwa mwotla, a elos su tupan Jeova, elos fwa usru fwalu.”​—Sam 37:9.

“Tu met sumwos fwa muta in fwalu, a met sumwosna fwa mutana we. A met koluk fwa mwotla liki fwalu, a met kutasrik fwa fufyuk liki.”​—Soakas 2:21, 22.

“A fwalu wanginla [met koluk], a lung kolukla, a el su oru ma lungse lun God fwa muta ma patpat.”​—1 Jon 2:17.

Ya Misla Fwin Fwalu Fwa On Nu Tok?

Fwinne Ma Simusla akkalemye la mongfwusesr lun God ke ma koluk oasr saflaiye, fuka kut ku in etu la tokin el kunausla ma kulok, e tia sifwil sikyuk? Aok, tokin Sronot lulap in len lal Noa, ma koluk sulpa sikyuk paenang ma inge mokle God in ekulla kas lun met nu kemwa in akfosyelos.​—Genesis 11:1-8.

Fwalu fwa tia sifwil muta ye koko lun met tia oanu ma sikyuk tokin Sronot in len lal Noa, pa inge sripe yok ke lalalfongi lasr la ma koluk fwa tia sifwil sikyuk. Fwalu fwa on el muta ye koko lun Togusrai lun God. (Daniel 2:44; 7:13, 14) El fwa in aksumwosye kutena met su srike in purakak ma koluk. (Isaia 65:20) Ke ma paye, ke saflaiyen fwalu el fwa kunausla sropon ma koluk nu kemwa​—Setan su Devil—​wikin demon lal nu kemwa, ku lipufon koluk nu kemwa su fwasr tokol.​—Rom 16:20.

Efu Kutu Met Som nu In Kosrao

Pukanten met su ridi Baibel, ouyepa etu ke kas lal Jisus su fwak: “In loom sin Papa tumuk oasr nien muta puspis. . . . Tu Nga fwa som in ako an sumwos.” (Jon 14:2, 3) Ya kas inge tia lain ma fwakak ke moul ma patpat ke sie Paredais fwin fwalu?

Me luti se inge el tia oru ou inge. Ke ma paye, el akkeye me luti ngie. Tu in kalem ka na paye, Baibel el akkalemye la inmaslon met Kristian oaru nu kemwa oasr na pise se​—su oasr ke 144,000 inmalolos—​fwa akmoulyeyukyuk in ngun in wi moul in kosrao. Efu ku elos eis me sang mwolanu inge? Meyen elos wi ke u se su Jon el liye ke sie arurumu su e fwa “moul a togusra yurin Kraist ke sie tausen yiu.” (Fwakyuk 14:1, 3; 20:4-6) Kut fwin srikeye piselos nu ke billion puspis lun met fwin fwalu, kut ku in fwak la 144,000 sie “u na srisrik.”​—Luk 12:32.

Sulela Lasr​—Moul ku Mise

Mea kut enenu in oru in eis me insemwomwo ke moul ma patpat ke Paredais fwin fwalu? Step se meet pa kut enenu in lutlut ke Kas lun God, Baibel Mutal. “A pa inge moul ma patpat, tu elos fwa etu kom God paye mukefwunnu, a Jisus Kraist su kom supalmu.”​—Jon 17:3.

Oiye saye in wi eis insemwomwomwo ma patpat pa orekmakin etauk inge. (Jemes 1:22-24) Elos nu kemwa su moulkin Kas lun God, oasr fwinsrak lalos in liye fwalu se inge ke el ekla nu ke sie Paredais, oanu Baibel el mwolela.