‘Lipufan Elos Supweyukme In Sang Kasru’

“Ya elos nukewa tia met orekma su ngun, su supeyukot in orekma nu selos, su fwa met usru lun lango?”​—HIBRU 1:14.

1. Me akkeye fuka kut ku in eis ke Mattu 18:10 a Hibru 1:14?

JISUS KRAIST el sang me sensen nu sin kutena met su ku in aktukulkulye met tuma lutlut puspus lal: “Sismouk tu komwos in tia pilesru sie selos inge su srik; tu Nga fwak nu sumwos, tu in kosrao lipufan lalos liye mutun Papa tumuk su in kosrao pal e nukewa.” (Mattu 18:10) Ke el sramsramkin lipufan sumwosmwos nukewa, met sap Poul el simusla: “Ya elos nukewa tia met orekma su ngun, su supeyukot in orekma nu selos, su fwa met usru lun lango?” (Hibru 1:14) Kas inge el me akkeye yok in etu la God el orekmakin lipufan puspus in kasru metu. Mea Baibel el akkalemye nu sesr ke lipufan puspus? Elos ku in kasre kut fuka? Mea kut ku in lotela kelos?

2, 3. Mea kutu kunokon lun lipufan puspus in kosrao?

² Oasr million puspus sin lipufan in kosrao su oaru nu sin God. Elos nukewa “kui in ku, su akpayeye kas lal.” (Sam 103:20; ridi Fwakyuk 5:11.) Tulik nukewa nutin God inge oasr oiya lalos su tia oana sie, oasr oiya mwomwo lalos su oana sie nu ke oiya lun God, a oasr sukosok lalos in oru sulela lalos sifwana. Oasr orekma mwomwo a mwal fulat lalos nu ke akwuk lun God, a leum lalos el akkalemyeyuk pa ke e se inge Maikael (inen Jisus in kosrao) su kalme pa leum lun lipufan. (Daniel 10:13; Jud 9) Lipufan se inge su “mwuonsien ma orekla nukewa” pa “Kas,” ku Met Kaskas lun God a orekmakinyuk sin Jeova in orala ma nukewa saye.​—Kolosse 1:15-17; Jon 1:1-3.

³ Oasr ye kolyuk lun leum lun lipufan pa seraf puspus, su fwakak ke mutaliyen God a sang kasru in karungin met kulansap nukewa lal in moulkin moul fwal nu ke masap sumwosmwos lal. Oasr pa kerubim puspus, su kulansap in sang kasru yok nu ke sumwos lal in kol. (Genesis 3:24; Isaia 6:1-3, 6, 7) Lipufan saye puspus, ku met tutafpo, elos akpayeye ma lungse lun God ke kain in inkanek puspus.​—Hibru 12:22, 23.

4. Oiya fuka lipufan elos akkalemye ke fwalu el orekla? A mea ku in sikyak nu sin metu fwin elos orekmakin inkanek sumwos a sukosok lalos in oru sulela?

⁴ Lipufan nukewa elos insemwomwo yok ke ‘foundeson lun fwalu’ oakiyuki a elos engan in oru kunokon lalos ke fwalu el orekla oana loom sin met nukewa. (Job 38:4, 7) Jeova el orala metu in “pusisel kutu liki lipufan,” tusruktu el oralos in oana ke “lumal.” Ke ma inge metu elos ku in akkalemye pa oiya mwomwo puspus lun God su Orala ma nukewa. (Hibru 2:7; Genesis 1:26) Fwin Adam a If elos orekmakin me sang su oasr yurolos in oru sulela ke inkanek fwal a sumwos, elos a tulik nukewa nutalos ku in engankin moul ke paredais nu ke pal inge oana ma orekla su wi ke sou lun Jeova fwin fwalu a kosrao.

5, 6. Orekma in lain fuka sikyak in kosrao, a mea God el oru ka?

⁵ Paye la lipufan mutal nukewa elos arlana lut ke pal se elos liye ke mutaweyen orekma in lain ke sou lun God in kosrao. Sie selos tila insemwomwo in kaksakin Jeova, a el lungse ma orekla nukewa saye in alu nu sel. El sifwana oral oana Setan (kalmen “met Lain”) ke el lain sumwosiyen kolyuk lun Jeova a ke pal se el srike in oru kolyuk lal sifwana in lain kolyuk lun God. Ke pal se el kaskaskin kas kikiap, Setan el arlana sulallel a kutasrik ke pal se el kiapela siyanyen se meet in welul in lain Met Oralosla su kulang.​—Genesis 3:4, 5; Jon 8:44.

⁶ Jeova el sa na in nununkel Setan, a ma inge kalem ke kas palu se meet su oasr in Baibel: “A nga fwa filiye srunga inmasrlom a mutan se inge, a inmasrlon fute lom a fute lal. El fwa kunausla sifwom, a kom fwa kunausla kapinniel.” (Genesis 3:15) Lokwalok a srunga sikyak inmasrlon Setan a u lun God in kosrao su pupulyukkinyuk oana “mutan” kiyel. Aok, Jeova el liye u lal in kosrao su lipufan oaru nukewa oasr ka oana sie mutan su el aksaokye na paye a el pa Mokul tuma. Kas palu se inge el akkalemye ke fwinsrak paye, fwinne ma puspus ka el oasr in “lukma” ke lusen pal loeloes, tusruktu akkalemyeyuk kais kutu srisrik ke pal pakiyuki. God el orala tari akwuk lal la sie sin u lal in kosrao el fwa kunausla met lain nukewa. A ke inkanek lun lipufan se inge “ma on lung, a ma on fwalu” fwa esani nu sie.​—Efesus 1:8-10.

7. Mea lipufan puspus in len lal Noa elos oru? A mea Jeova el oru nu selos?

⁷ In len lal Noa, oasr lipufan puspus elos som liki ‘an selos’ a elos ekulla manolos nu ke ikwe tu elos in ku in oru lungse koluk lalos fwin fwalu. (Jud 6; Genesis 6:1-4) Jeova el sisla lipufan nukewa inge su lainul nu ke sie an su akkalemyeyuk mu losr upa. Ke ma inge, elos welul Setan in oana “un ngun koluk” a elos ekla met lokwalok upa lun met kulansap nukewa lun God.​—Efesus 6:11-13; 2 Piter 2:4.

Lipufan Elos Kasre Kut Fuka?

8, 9. Fuka Jeova el orekmakin lipufan puspus lal in kasru metu?

⁸ Ebream, Jekob, Moses, Josua, Isaia, Daniel, Jisus, Piter, Jon, a Poul pa met puspus su eis kasru sin lipufan puspus. Lipufan sumwosmwos puspus elos akpayeye nununku lun God a akkalemye nu sin met kas palu puspus a masap lun God, wekunang Masap lal Moses. (2 Togusra 19:35; Daniel 10:5, 11, 14; Orekma 7:53; Fwakyuk 1:1) Ke sripen oasr tari yurosr Kas lun God kemwa, wanginla ma eneneyuk nu sin lipufan elos in akkalemye kas lun God nu sesr ke pal inge. (2 Timote 3:16, 17) Ne ouinge, lipufan elos moniyuk in akpayeye ma lungse lun God a sang kasru nu sin met kulansap puspus lal fwinne ma inge tia liyeyuk sin metu.

⁹ Baibel el akkalemye nu sesr: “Lipufan lun Jeova el muta in kalselosyuk su sangeng sel, a molelosla.” (Sam 34:7; 91:11) Ke sripen Setan el kusensiyukkin fwin metu elos ku in tu na ku fwin oasr me srufwe nu selos, paenang Jeova el lela Setan in oru kain in me srufwe puspus nu sesr. (Luk 21:16-19) Tusruktu, God el etu la piya ka me srufwe su met kulansap lal ku in muteng a in akpayeye oaru lal. El etu ke ma upa su met kulansap puspus lal tia ku in muteng ka. (Ridi 1 Korint 10:13.) Lipufan elos akola pal nukewa in kasru metu in akpayeye ma lungse lun God. Elos molella Shadrak, Misak, Abednigo, Daniel, a Piter tusruktu elos tia kosrala met lokwalok in uniye Stefen a Jemes. (Daniel 3:17, 18, 28; 6:22; Orekma 7:59, 60; 12:1-3, 7, 11) Oiya a ma sikyak kelos tia oana sie. Ke inkanek ouinge, kutu sin brother wiyesr ke niyen prison lun met Nazi in an Germany elos anwuki, tusruktu pus selos Jeova el molela ke an se inge.

10. Sayen me kasru su tuku sin lipufan, me kasru fuka kut ku in eis?

¹⁰ Ma simusla el tia luti a akkalemye la kais sie met oasr sie lipufan su karunginelos pal nukewa. Kut pre ke lulalfongi la “kut fwin siyuk ke kutena ma su fwal nu ke ma lungse lal, [God] el long kut.” (1 Jon 5:14) Aok, Jeova el ku in supwema sie lipufan in kasre kut, tusruktu me kasru el ku in tuku ke oiya saye. Saap met Kristian wiyesr elos mokleyuk in sang kasru a in akkeye kut. God el ku in ase nu sesr lalmetmet a ku su eneneyuk tu kut in muteng ke “otunmu in ikwe” su akkeokye kut su ku in pupulyukkin mu ‘sie sin lipufan lun Setan’ el puok kut.​—2 Korint 12:7-10; 1 Tessalonika 5:14.

Etawi Jisus

11. Ke inkanek fuka God el orekmakin lipufan puspus in kasrel Jisus? A mea Jisus el akpayeye ke el sruokye oaru lal nu sin God?

¹¹ Nunku ke inkanek su Jeova el orekmakin lipufan puspus kel Jisus. Elos akkalemye isusla a sifwil moulyuk lal a elos kasrel ke pal se el oasr fwin fwalu. Lipufan inge elos ku in kosrala met puspus su lungse in sruokilye a oru inkanek koluk nu ke oiyen mise lal. Tusruktu, ma inge tia sikyak, a God el supwema sie lipufan in akkeyel. (Mattu 28:5, 6; Luk 2:8-11; 22:43) In fwal nu ke akwuk lun Jeova, Jisus el mise fwin sak soko a ma inge sang me akpayeye nu ka la sie met sumwosmwos el ku in sruokye oaru lal nu sin God fwinne el sun me srufwe upa puspus. Ke ma inge Jeova el akmoulyelak Jisus nu in kosrao a sang moul ma patpat nu sel, a el sang “ku nukewa” nu sel a oru lipufan nukewa in on ye kolyuk lal. (Mattu 28:18; Orekma 2:32; 1 Piter 3:22) Jisus el akpayeye la el pa “fute” se meet ke “mutan” lun God.​—Genesis 3:15; Galetia 3:16.

12. Ke inkanek fuka kut in etawi me srikasrak mwomwo lun Jisus?

¹² Jisus el etu la tia mwo fwin el srike Jeova ke inkanek su el tupan lipufan ka in molella fwin el oru ma se su ku in aksensenye moul lal. (Ridi Mattu 4:5-7.) Ke ma inge lela kut in etawi me srikasrak lun Jisus ke kut akpayeye moul lasr la kut orekmakin ‘nunak mwomwo,’ a in tia aksensenye moul lasr, tusruktu kut tu na ku ke me kalyai nukewa.​—Taitus 2:12.

Mea Kut Ku in Lotela Ke Lipufan Oaru Nukewa

13. Mea kut ku in lotela ke me srikasrak mwomwo lun lipufan sumwosmwos puspus su akkalemyeyuk in 2 Piter 2:9-11?

¹³ Ke pal se met sap Piter el aksumwosye met lili puspus su “kaskou” ke met kulansap akmusrala lun Jeova, el orekmakin me srikasrak mwo lun lipufan sumwomswos puspus. Fwinne oasr ku yok lalos, lipufan elos akkalemye inse pusisel ke elos tia kaskas koluk kelos ke sripen ‘elos akfulatye Jeova.’ (Ridi 2 Piter 2:9-11.) Lela kut in tia orek nununku pa, ku kaskas koluk ke met lili puspus su kol congregation, a kut in akkalemye sunak nu selos, a filiye ma puspus nu ke paun Jeova, su Met Nununku Fulatlana.​—Rom 12:18, 19; Hibru 13:17.

14. Mea kut ku in lotela ke lipufan puspus ke oiyen inse pusisel?

¹⁴ Lipufan puspus lun Jeova elos akkalemye nu sesr me srikasrak puspus ke oiyen inse pusisel ke elos oru orekma in kulansap lalos. Oasr lipufan puspus su tia akkalemyelos nu sin metu. (Genesis 32:29; Met Nununku 13:17, 18) Fwinne oasr million puspus sin lipufan in kosrao, Baibel el akkalemye na inen lipufan Maikael a Gebriel. Ma inge kasre kut in tia alu a akfulatye lipufan. (Luk 1:26; Fwakyuk 12:7) Ke pal se met sap Jon el putati in orek alu nu sin sie lipufan, lipufan sa fwak nu sel: “Nikmet oru! Nga met kulansap wiyom a wiyen met lim.” (Fwakyuk 22:8, 9) Kut enenu in alu a pre mukena nu sin God.​—Ridi Mattu 4:8-10.

15. Fuka lipufan elos akkalemye me srikasrak nu sesr ke oiyen mongfusrasr?

¹⁵ Lipufan elos akkalemye pa me srikasrak mwo ke mongfusrasr. Fwinne elos lungse na paye in etu ke ma lukma mutal lun God, tusruktu elos tia etu ma nukewa ka. “Ma lipufan elos kena intein,” Baibel el akkalemye. (1 Piter 1:12) Ke ma inge, mea elos oru? Elos mongfusrasr in sano nu ke pal pakiyuki lun God ke “lalmetmet” lal in ‘akkalemye ke inkanek lun congregation.’​—Efesus 3:10, 11.

16. Mea oiya mwomwo lasr ku in oru nu sin lipufan puspus?

¹⁶ Met Kristian puspus su sun me srufwe elos ‘me intoe nu fwalu, nu sin lipufan.’ (1 Korint 4:9) Lipufan elos insemwomwo na paye in liye oiyen oaru lasr a elos engan pa ke sie met orekma koluk el auliyuk. (Luk 15:10) Oiya mwomwo lun mutan Kristian puspus liyeyuk sin lipufan puspus. Baibel el akkalemye la “mwo in oasr akul in ku fwin sifwen mutan ke lipufan.” (1 Korint 11:3, 10) Aok, lipufan elos insemwomwo in liye mutan Kristian puspus a met kulansap nukewa in akos akwuk nukewa a kolyuk lun God. Orekma in akos inge el me esmakin mwomwo pa nu sin tulik nukewa nutin God inge in kosrao.

Lipufan Elos Sang Kasru nu ke Orekma in Sulkakin Peng Mwo

17, 18. Efu ku kut ku in fwak mu lipufan elos sang kasru nu ke orekma lasr in sulkakin peng mwo?

¹⁷ Lipufan elos sang kasru yok nu ke ma mwomwo puspus su sikyak ke “len lun Leum.” Wekunang isusla lun Togusrai in yea 1914 a ke pal in sisila lal Setan a dimon nukewa lal liki in kosrao sel ‘Maikael a lipufan nukewa lal.’ (Fwakyuk 1:10; 11:15; 12:5-9) Met sap Jon el liye sie “lipufan el soksok yen engyengu, a yurol mwosasu ma patpat tu el fwa fwakak nu selos su muta fwin fwalu.” Lipufan se inge el fwak: “Komwos in sangeng sin God, a sang mwolanu nu sel, tu aur in nununku lal summu, a komwos in alu nu sel su orala kosrao a fwalu a mwea a unon in kof.” (Fwakyuk 14:6, 7) Ke ma inge met kulansap nukewa lun Jeova elos ku in lulalfongi la lipufan elos sang kasru nu selos ke elos sulkakin peng mwo lun Togusrai su oakiyuki tari fwinne oasr me lain upa lun Devil.​—Fwakyuk 12:13, 17.

¹⁸ Ke pal inge, lipufan elos tia sramsram nu sesr in kol kut nu sin met puspus su paye insielos oana ke sie lipufan el sramsram nu sel Filip a kolol nu sin met Itiopia se. (Orekma 8:26-29) Tusruktu, oasr ma puspus sikyak ke pal inge su sang me akpayeye la lipufan elos sang kasru nu ke orekma in sulkakin peng mwo lun Togusrai fwinne kut tia liyelos a elos kol kut nu selos su ‘paye insielos nu ke moul ma patpat.’a (Orekma 13:48) Aok arlana yok sripe kut in wi pal nukewa ke orekma in sulkakin peng mwo, tu kut in oru ma kunesr in suk ke met puspus su lungse in “alu nu sin Papa in ngun a paye”!​—Jon 4:23, 24.

19, 20. Kunokon fuka lipufan elos oru ke ‘saflaiyen akwuk puspus lun fwalu?’

¹⁹ Ke pal se Jisus el sramsramkin ma puspus su sikyak in len lasr, el fwak la ‘ke saflaiyen akwuk puspus lun fwalu,’ lipufan elos fwa “srela met koluk liki met sumwosmwos.” (Mattu 13:37-43, 49) Lipufan elos oru kunokon lalos ke orekma safla in esani a siliye met kulansap akmusrala nukewa. (Ridi Mattu 24:31; Fwakyuk 7:1-3) Sayen ma inge, oasr lipufan puspus welul Jisus ke pal se el “srela sipu liki goat.”​—Mattu 25:31-33, 46.

²⁰ ‘Ke Leum Jisus el fwa sikme in kosrao me wi lipufan ku puspus lal’ met nukewa su “tia etu God, a nu selos su tia akos mwosasu lun Leum Jisus” fwa kunausyukla. (2 Tessalonika 1:6-10) Ke pal se Jon el liye oiya sepana inge ke arurruma, el akkalemyel Jisus a un lipufan puspus in kosrao elos kasrusr fwin ors fasrfasr in akpayeye meun lun sumwosmwos.​—Fwakyuk 19:11-14.

21. Mea lipufan se su sruokye “ki lun abyss a sein lulap in paul” fwa oru nu sel Setan a dimon nukewa lal?

²¹ Jon el oayepa “liye sie lipufan el oatui in kosrao me, a ki lun abyss on sel a sein lulap in paul.” Lipufan se inge pa Maikael su leum lun lipufan, su fwa sruokilye Devil a sisella, wi dimon nukewa lal, nu in abyss. Tokin ma inge elos taltalla ke kitin pal ke saflaiyen Kolyuk lun Kraist ke Sie Tausan Yea ke pal se met sumwomwos nukewa fwa sun me srufwe safla. Tokin ma inge, Setan a dimon a met nukewa su welul in lain God fwa kunausyukla. (Fwakyuk 20:1-3, 7-10; 1 Jon 3:8) Orekma in lain God nukewa fwa wanginla.

22. Kunokon fuka lipufan elos oru ke ma puspus su apkuran in sikyak? A oiya fuka kut enenu in akkalemye ke kunokon lalos?

²² Molela liki akwuk koluk lal Setan el apkuran me. Lipufan fwa oru kunokon lalos ke ma puspus su fwa sikyak su fwa akmutalye sumwos lun Jeova in kol a in akpayeye akwuk lal ke fwalu a nu sin metu ke inkanek yok. Paye la lipufan sumwosmwos nukewa elos “met orekma in ngun, su supeyukot in orekma nu selos, su fwa met usru lun lango.” Ke ma inge, lela kut in sang kulo nu sin Jeova God ke inkanek mwomwo su el orekmakin lipufan puspus in kasre kut in oru ma lungse lun God a in eis moul ma patpat.

[Footnote]

Kom E Topuk Fuka?

• Akwuk fuka ku kunokon fuka oasr yurin lipufan puspus in kosrao?

• Mea kutu sin lipufan elos oru in len lal Noa?

• God el orekmakin fuka lipufan puspus in kasre kut?

• Kunokon fuka lipufan elos oru ke pal lasr inge?

[Picture on page 21]

Lipufan elos engan in akpayeye ma lungse lun God

[Picture on page 23]

In oana ke ma sikyak nu sel Daniel, lipufan elos akola pal nukewa in sang kasru nu sin metu fwal nu ke ma lungse lun God

[Pictures on page 24]

Lela kut in pulaik, meyen lipufan elos sang kasru nu ke orekma in luti Togusrai!

[Credit Line]

Globe: NASA photo