Efu Arulanu Srikla PAL?

PAL. Saap kut ku in konaok la arulanu upa in aketeye kas se inge, tusruktu kut etu na paye la arulanu srikla pal lasr. Kut etu pa la ma inge arulanu sa in wanginla. Paye, pal puspis kut e loang tu, “pal u som tari meet liki kut akilen.”

Fwine ou inge, arulanu kalem la met English Poet se inge Austin Dobson el sumwos ke pal se ma el fwak in 1877: “Kom fwak mu, pal u kaengla? Mo! Alas, Pal u tia kaengla, kut pa kaengla.” Mutamwauk ke mise lal in yiu 1921, Dobson el wanginla tari apkurun in yiu 80 la; a pal u fwafwa lana.

Pal Yok

Nu sin Met Se Su Orekutla, Baibel el fwak nu sesr la: “Meet liki ke eola sikyuk, ku ke kom orala fwal a fwalu, kom God omeet me ma patpat.” (Sam 90:2) Ku in oanu ke The New Jerusalem Bible el fwak, “mutamwauk omeet me ma patpat kom God.” Ke ma inge pal u ku in on nu tok ma patpat oanu God​—ma patpat!

Fwin liksreni lumeyuk nu sin God, su ku in on nu tok ma patpat, kut ku in ridi ou inge ke metu: “Tu len nu kemwa lasr elos somla in silung lom; kut aksafyela yiu lasr oanu sie srumsrum ke tari fwakye. Len in yiu lasr itngoul yiu a fwin ku oalngoul yiu; tusruktu mwan lalos orekma na a asor; tu a sa wanginla, a kut sokla.”​—Sam 90:9, 10.

Efu ku moul misinge u arulanu futoto, fwinne Baibel el luti la akmwuk lun God nu sin met u pa in moul ma patpat? (Genesis 1:27, 28; Sam 37:29) Efu ku lusen moul lun met se ke average mwo, el srik liki na 30,000 len, a tia moul ma patpat oanu ma God el oakiye? Efu ku arulanu srikla pal lun metu? Su paenang ku eis mwaten ma upa inge? Baibel el aketeye arulanu mwo a kalem.a

Wanginla Pal Yokelik

Met matu elos ku in sang me akpayeye la ke yiu ekasr somla mokuikui lun moul arulanu mui. Sie journalist, Dr. Sybille Fritsch, el akkalemye la ke lusen yiu 200 somla, orekma ke lusen wik se putati liki aur 80 nu ke aur 38, “fwinne ou inge torkaskas yok lasr ke sriksrikeni lun pal tia tui.” El fwak: “Wangin pal u; pal arulanu yok sripe oanu mani; enenu yok nu ke pal u ku in pupulyukinyuk nu ke eneneyen momong; ke sie oiyen moul su arulanu salkeyuk.”

Ma sasu puspis ikasla pal mwo a inkanek mwo su tia oan in nunuk lun fwil puspis meeta. Tusruktu ke pal se yokelik pal mwo in kafofo ke orekma puspis inge, na yokelik pa me asor puspis ke sripen srikeni pal in oru me enenu inge. In an puspis fwin fwalu misinge, metu elos moul fwal nu ke akmwuk lun aur, arulanu silaklak nu ke sie orekma nu ke siepa orekma su enenu in aksafyeyukla. Papa el enenu in som nu ke orekma ke aur 7:00 a.m., Nine el enenu in akola tulik nu ke loom lutlut ke aur 8:30 a.m., oasr appointment lun Papa matu nu yurin taktu ke aur 9:40 a.m., a kut nu kemwa enenu in akola nu ke meeting na saok ke aur 7:30 p.m. Ke sripen kafofo in oru sie orekma nu ke siepa orekma, paenang wanginla pal lula nu ke ma srisrik lun me akengun ku mongle. A kut torkaskas ke orekma kafofo ke len nu kemwa, oanu yuwot yume lun kisrikinpot u.

Tia Kut Mukena Pulakin Sriksrikeni lun Pal

Met lokwalok lun God, Setan su Devil, el su oru ma koluk in kol metu nu ke sie moul futoto, el sremla ke ma koluk lal sifwanu. (Srike liye Galetia 6:7, 8.) In sramsramkin isusla lun Togusrai lun Messaia in kosrao, Fwakyuk 12:12 el kasru kut nu ke fwinsrak lun pal fwasru su el fwak: “Ke ma inge, komwos in engunak, o kosrao a komwos su muta lu! We nu sin fwalu a mwea, tu Devil el oatuwot nu yuromwos, a el mulat ma lulap, tu el etu tu pal lal futoto.”

Fwal nu ke oaoa sumwos lun Baibel a ke kas palu lal su akpayeyuk tari, kut moul misinge ke saflaiyen “pal futoto” inge.” Sie me insemwomwo paye in etu la pal in sukosok lal Setan apkurun in wanginla! Tokin el wanginla (Fwakyuk 20:1-3), met nu kemwa su oaru in akos elos fwa folokla nu ke moul sumwosmwos, a elos ku pa in eis moul ma patpat su Jeova el oakiye nu selos ke mutamwauk me. (Fwakyuk 21:1-4) Ma upa ke sripen srikla pal fwa wanginla.

Ya kom ku in kalmekin la mea kalmen in oasr moul ma patpat​—in moul ma patpat? Kom tia sifwil akkolukyeyuk ke ma puspis su kom pulakin meet a fwinne kom soenna aksafyela. Kom fwin enenu in yok pal, e fwa oasr lutu, ku wik lutu, ku yiu fwasru​—aok, e fwa sie pal su wangin saflaiye ye mutom!

Orekmakin Inkanek Lalmetmet ke Pal Su Oasr Yurosr Ingenu

Meyen el akilen la pal lal in srufwala metu arulanu futotoeni, paenang Setan el kaifweung in akkafofoye metu in wanginla pal lalos in porongo peng mwo lun Togusrai lun God su oakiyuki tari. Ke ma inge, arulanu mwo kut in loang nu ke kai mutal inge: “Ke ma inge komwos in arulanu liaung oiyen fwafwasyesr lomwos, tia oanu met nukin, a oanu met lalmetmet, molela pal tu len koluk. Tu ou inge, komwos in tia lalfon, a komwos in etu mea lungse lun Jeova.”​—Efesus 5:15-17.

Arulanu yok sripe na paye in orekmakin pal lasr ke inkanek lalmetmet nu ke ma saok a tia nu ke ma wangin sripe su tia ku in ase ma lane ma patpat! Kut enenu in akkapye oiye su oasr yurol Moses ke pal se ma el siyuk sin Jeova ke kas inge su tuku ke insiel: “Ou inge kom luti nu sesr pisen len lasr, tu kut fwa eis insien lalmetmet.”​—Sam 90:12.

Paye, la ke fwal se inge met nu kemwa kafofo. Fwinne ou inge, Met Lo lun Jeova elos kaifwe kom in orekmakin kutu pal saok lom an in lutlut ke ma God el siyuk sum in oru in eis moul ma patpat ye koko lun Togusrai lal. Aur se ke wik nu kemwa ku in orekmakinyuk nu ke lutlut Baibel “in etu mea ma lungse lun Jeova,” ku in oru kom in pulakin na paye akpayeyen kas inge: “Fwasr liki ma koluk a oru ma mwo; a muta na tok ma patpat. Met sumwosmwos elos fwa usru fwalu, a muta we ma patpat.”​—Sam 37:27, 29.

[Footnote]