Jeova El Akkalemye Nu Sesr Inkanek In Oekla Len Lasr
“Ou inge kom luti nu sesr pisen len lasr tu kut fwa inse lalmetmet.”—SAM 90:12.
1. Efu ku arulanu fwal in siyuk sin Jeova in akkalemye nu sesr ke inkanek “in oekla len lasr”?
JEOVA GOD el pa Met Orekutla a Sropon Moul lasr. (Sam 36:9; Fwakyuk 4:11) Ke ma inge wangin kutena met su mwo lukel su ku in akkalemye nu sesr ke inkanek sumwos in oekla yiu nu kemwa lun moul lasr. Ke ma inge, arulanu fwal, met sim lun Sam elan kaifwe nu sin God: “Ou inge kom luti nu sesr pisen len lasr tu kut fwa inse lalmetmet.” (Sam 90:12) In Sam ak90, su kut ku in koneak me siyuk inge, paenang arulanu mwo kut in tuni akmwoye ma inge. Tusruktu, ma se meet, lela kut in tuni meet in mwo ke on inge su etuku ke ngun lun God.
2. (a) Su met simusla Sam 90, a nge ma inge simusyukla? (b) Fuka Sam ak90 el purakak nunuk lasr nu ke moul?
2 Yoklanu me kasru mwo tuku ke Sam 90 paenang pangpang “pre lal Moses, sie met lun God paye.” Ke sripen Sam el akkalemye lusen moul lun met, paenang ma inge orekla tokin met Israel elos aksukosokyeyuk liki sruo lalos in an Ijipt a ke lusen yiu 40 ke fwafwasyesr lalos yen mwesis, ke pal se tausen puspis sin met elos mise ke sripen silalalfongi lalos. (Oekyuk 32:9-13) Ke kutena luma a ma sikyuk, Sam 90 akkalemye la moul lun met sesumwos arulanu futoto. Ke ma inge, arulanu kalem la, kut enenu in orekmakin len saok lasr ke lalmetmet.
3. Mea koanon Sam 90?
3 In Sam 90, fus 1 nu ke 6 el akkalemye la Jeova el oanu nien molela lasr in fwil nu kemwa. Fus 7 nu ke 12 akkalemye ke ma kut enenu in oru tu kut fwa ku in orekmakin yiu futoto lun moul lasr ke inkanek su fwa akinsemwomwoyel. A in oanu ke ma akkalemyeyuk in fus 13 nu ke 17, kut enenu na paye in eis me insemwomwo a lungkulang lun Jeova. Payela, Sam se inge tia akkalemye ke experience lun kais sie sesr ke pal fwasru oanu met kulansap lun Jeova. Fwinne ou inge, kut enenu in loang akmwoye a etawi orekma mutal nu kemwa su akkalemyeyuk in Sam ke inkanek lun pre. Ke ma inge, lela kut in loang akmwoye nu ke Sam 90 in ku in kasru fwal nu ke kalem lun met nu kemwa su moliyukla tari sin God.
Jeova—“El Nien Muta” Lasr”
4-6. Fuka Jeova el “nien muta na paye” lasr?
4 Met su simusla Sam el mutamwauk ke kas inge: “O Jeova, kom nien muta lasr; in fwil nu kemwa. Meet liki eolu sikyuk, ku ke kom orala fwal a fwalu, kom God omeet me nu tok ma patpat.”—Sam 90:1, 2, footnote.
5 Nu sesr “God ma patpat,” Jeova, el “sie nien molela paye”—a nien molela lun ngun. (Rom 16:26) Kut pulakin inse misla, meyen kut etu la pal nu kemwa el oasr a akola in kasru ku oanu “Met su long pre.” (Sam 65:2) Ke sripen kut sang me fosrnga lasr nu sin Papa tumasr su in kosrao ke inkanek lun Mwen kulu nutul, paenang ‘misla lun God, su alukela ma eteyuk nu kemwa, fwa liaung insiesr a nunkasr.’—Filippai 4:6, 7; Mattu 6:9; Jon 14:6, 14.
6 Kut engunkin inse misla in ngun, meyen ke kas in pupulyuk, Jeova el “sie nien molela paye” nu sesr. El ouyepa akola “infwokil puspis”—su ma inge el aoliyen congregation nu kemwa lun met lal—oanu sie nien mongle lun ngun, su met seperd mwolanu puspis elos akola me kasru yok nu ke inse misla lasr. (Isaia 26:20; 32:1, 2; Orekma 20:28, 29) Sayen ma inge, kutu sin met inmaslosr tuku ke sou su muta pat ke orekma in kulansap lalos nu sin God a elos koneak na paye la el ‘sie nien molela paye nu sin fwil nu kemwa.’
7. Ke inkanek fuka eol nu kemwa kalmekin nu ke “isusla” a fwalu orekla oanu “keok in pal in isusla”?
7 Jeova el oasr meet liki eol nu kemwa “sikyuk” ku ke pal se fwalu orekla oanu “me keok ke pal in isus.” Ye mutun met, in orala fwal se inge wekunang ma nu kemwa su oasr ka, in lumala, a oru mokuikui sakuruk nu kemwa lal, enenu in oasr orekma yok nu ka. A ke pal se akkalemyeyuk la eol nu kemwa “orekla” a fwalu orekla oanu “me keok ke pal in isus,” met simusla Sam el akkalemye ke oiyen akfulat yok ke lupan orekma su Jeova el oru ke pal se el orala ma nu kemwa. Ya kut tia enenu in akkalemye kain in akfulat a kaksak nu ke orekma lun Met su Orekutla?
Jeova El Akola in Kasru Kut Pal Nu Kemwa
8. Mea kalmen kas inge su fwak la Jeova el God “omeet me ma patpat”?
8 “Kom God omeet me nu tok ma patpat,” pa inge on lun met sim lun Sam. “Nu tok ma patpat” ku in kalmekin nu ke ma puspis su oasr saflaiye tusruktu lusen ma inge tia akkalemyeyuk. (Exodus 31:16, 17; Hibru 9:15) Tusruktu, in Sam 90:2 a ke kutupa fus in Ma Simusla lun Hibru, “nu tok ma patpat” kalmekin “ma patpat.” (Ekklisiastis 1:4) Nunuk lasr tia ku in kalem ka la efu ku God el oasr pal nu kemwa. Aok, wangin mutamwauk lun Jeova a wangin pa safla lal. (Hebakkuk 1:12) El moul pal nu kemwa a el akola in kasru kut.
9. Met simusla Sam el aketeye la lusen sie tausen yiu ke lusen moul lun met el oanu mea?
9 Met simusla Sam el eis kasre sin ngun mutal in srikeye la sie tausen yiu ke lusen moul lun metu el oanu lusen sie pal na futoto ye mutun Met Orekutla su ku in moul ma patpat. Ke pal se el sramsram ke God, el simusla: “Kom aola met nu ke fok, a fwak: ‘foloko, komwos tulik nutin met.’ Tu sie tausen yiu ye mutom oanu yukea ke somla, a oupanu sie pal in san ke fong.”—Sam 90:3, 4.
10. Fuka God el oru met “in aolla nu ke fok”?
10 Met nu kemwa ku in mise, a God el ku pa in “aolla met nu ke fok.” Kalmen ma inge pa, met elos folokla nu ke “kutkut,” oanu ma kulamwi, ku kutkut lun fwalu. Ke ma inge, Jeova el fwak: ‘Kom folokla nu in foko, tu kom etukla liki foko.’ (Genesis 2:7; 3:19) Ma inge sikyuk nu sin met nu kemwa—nu sin met fukoko ku met munas, met kasrup ku met sikasrup—meyen wangin kutena met sesumwos ‘ku in molela met lel ke kutena ma lal, ku in sang nu sin God kutena me mol kel tu lan ku in moul ma patpat.’ (Sam 49:6-9) Tusruktu lela kut in arulanu sang kulo ke sripen ‘God el ase nu sesr Mwen siefwunnu isusla nutul, tu el su lalalfongel fwa tia tula, a el fwa eis moul ma patpat’!—Jon 3:16; Rom 6:23.
11. Efu ku kut ku in fwak la sie pal loeloes nu sesr arulanu futoto nu sin Goda?
11 Nu ke liye lun Jeova, fwinne Metusela el fwinne moul sun lusen yiu 969 matwe, moul lal tia na sun lusen len se lal. (Genesis 5:27) Nu sin God, oanu sie tausen yiu—sie len su oasr aur 24 ka—fwin sun tari. Met simusla Sam el ouyepa akilen la nu sin God sie tausen yiu el oupanu sie nien san ke fong ke lusen aur akosr ke sie nien aktuktuk. (Met Nununku 7:19) Ke ma inge, arulanu kalem la, lusen pal loeloes nu sesr, arulanu futoto nu sin God su ku in moul ma patpat, Jeova.
12. Fuka met nu kemwa elos ‘wiselosla’ liki God?
12 Tia oanu God su ku in moul ma patpat, moul lun met ke pal inge arulanu futoto. Pa inge ma met simusla Sam el fwak: “Kom wiselosla oanu ke sie sronot lulap, elos oanu motul, a ke lutuwe elos oanu maa in su kapek. Ke lutuwe el kapek, a yokelik ke ekela elos kosrani a na elos uli.” (Sam 90:5, 6) Moses el liye tausen puspis sin met Israel ke pal se elos mise yen mwesis, God el ‘wiselosla’ oanu ke sie sronot. Ip se inge buk lun Sam el akkalemye meet ou inge: “Kom wiselosla ke motul in mise.” (New International Version) Nu ke kalme saye pa, lusen moul lun met sesumwos el oanu “sie pal in motul” ke lusen pal na futoto—ku in srikeyuk nu ke motul in fong.
13. Fuka kut nu kemwa “oanu maa folfol,” a fuka ma inge purakak nunuk lasr?
13 Kut oanu ‘maa su kapek lutuwe’ tusruktu ke eku la elos uli ke sripen fol lun fwat. Aok, moul lasr arulanu futoto oanu maa su ku in uli ke len se na. Ke ma inge, lela kut in tia pilesru ma saok lasr inge. A, kut enenu in suk kolyuk lun God la efuka kut in ku in orekmakin yiu na futoto lula lasr nu ke akmwuk koluk inge.
Jeova El Kasru Kut “in Oekla Len Lasr”
14, 15. Sam 90:7-9 el akpayeye fuka nu sin met Israel?
14 Nu sin God, met simusla Sam el fwak: “Tu kut akwanginyukla ke silung lom, a kut langungngung ke koskusrok lom. Kom likiye koluk lasr ye mutom, a koluk lukma lasr ye kalmen mutom. Tu len nu kemwa lasr elos somla in in silung lom; kut aksafyela yiu lasr oanu sie srumsrum ke tari fwakye.”—Sam 90:7-9.
15 Met Israel su tia lalalfongi ‘elos tuku ke saflaiyelos nu ke mulat lun God.’ Elos ‘langungngung ke koskusrok lal,’ ku ‘sangeng lulap ke mulat lal.’ (New International Version) Met puspis “kunausyukla yen mwesis” ke sripen nununku mutal. (1 Korint 10:5) Jeova ‘el likiye ma koluk lalos ye mutal.’ El sang nu selos meta ke ma koluk su elos oru ye mutun met nu kemwa, tusruktu, fwinne ma koluk “lukma” ku ma koluk su elos okanla, ma inge ‘oasr ye mutun Jeova.’ (Soakas 15:3) Oanu nien sun nu ke koskusok lun God, met Israel su srunga in auliyuk elos ‘aksafyela yiu lalos oanu srumunyuk tari fwakye.’ Ke sripe se inge, lusen moul futoto lasr oanu sie momong su som liki oalusr, oanu sie srumsrum.
16. Fwin kutu met elos oru orekma koluk in lukma, mea elos enenu in oru?
16 Fwin kutena met inmaslosr oru ma koluk in lukma, saap kut ku in okanla kain in oiye se inge nu sin kutu met ke lusen sie pal. Tusruktu, ma koluk lukma lasr ‘oasr ye mutun Jeova,’ a ma kut oru inge kunausla futoto lasr nu sel. In sifwil eis futoto nu sin Jeova, kut enenu in pre a siyuk nunuk munas lal, likiye ma koluk lasr, a eis kasru in ngun su tuku sin met Kristian elder. (Soakas 28:13; Jemes 5:14, 15) Arulanu mwo in oru ou inge liki na in ‘aksafyela yiu lasr oanu me srumsrum,’ a in filiye fwinsrak lasr ke moul ma patpat ke me sensen!
17. Kain in lusen pal fuka in moul arulanu pengpeng nu sin met nu kemwa, a yiu lasr nenela ke mea?
17 Fwin lusen moul lun met sesumwos, oanu met simusla Sam el fwak: “Len in yiu lasr itngoul yiu a fwin ku oalngoul yiu; tusruktu mwan lalos orekma na a asor, tu a sa wanginla, a kut sokla.” (Sam 90:10) Fwin oasr sie met moul ke lusen yiu 70 e arulanu pengpeng nu sin metu, a ke lusen yiu 85, Caleb el akkalemye ke sie ku sakuruk lal. Oasr kutu met su lusen moul lalos loes liki, oanu Aaron (123), Moses (120), a Josua (110). (Oekyuk 33:39; Duteronomi 34:7; Josua 14:6, 10, 11; 24:29) Tusruktu, nu ke fwil silalalfongi se su som liki an Ijipt, met nu kemwa su registered mutamwauk ke yiu 20 matwe nu lung elos mise ke lusen yiu 40. (Oekyuk 14:29-34) Ke len inge, in an puspis apkurun moul nu kemwa lun metu oasr na ke lusen yiu puspis su met simusla Sam el akkalemye. Yiu lasr nenela ke “orekma a asor.” Sa na in wanginla, “a kut sokla.”—Job 14:1, 2.
18, 19. (a) Mea kalmen “oekla len lasr tu kut fwa eis inse lalmetmet”? (b) Orekmakinyen lalmetmet lasr ku in mokle kut in oru mea?
18 Tok met simusla lun sam el on: “Su etu kuiyen selung lom, a koskusrok lom oanu sangeng se su fwal nu sum? Ou inge kom luti nu sesr pisen len lasr, tu kut fwa eis inse lalmetmet.” (Sam 90:11, 12) Wangin kutena met inmaslosr ku in etu na paye ku lun koskusrok lun God ku lupan mulat lal, a ma inge enenu in akyokye fosrnga lasr nu sin Jeova. In aketeye ma inge enenu in mokle kut in siyuk sel “fuka kut [ku in] oekla len lasr tu kut fwa eis inse lalmetmet.”
19 Kas lun met simusla Sam pa sie pre su siyuk sin Jeova in luti met lal ke inkanek in orekmakin lalmetmet a in orekmakin len lula lalos ke inkanek su akinsemwomwoye God. Moul ke lusen yiu 70 ku in oasr fwinsrak lom in moul ke lusen 25,500 len. Tusruktu, ke kutena matwe lasr, ‘kut tia etu mea moul lasr lutu, meyen kut oanu sie ok su sikyuk on ke kitin pal a na sarla.’ (Jemes 4:13-15) Ke sripen ‘luma a ma sikyuk sun met nu kemwa,” paenang kut tia ku in fwak lusen moul su ku in moul. Ke ma inge, lela kut in pre siyuk ke lalmetmet fwin kut sun me srifwe puspis, in oru mwo nu sin kutu met, a in oru ma nu kemwa ke ku lasr ke orekma lun Jeova ingenu—ke len inge! (Ekklisiastis 9:11; Jemes 1:5-8) Jeova el kol kut ke inkanek lun Kas lal, ngun mutal lal, a u lal. (Mattu 24:45-47; 1 Korint 2:10; 2 Timote 3:16, 17) Orekmakinyen lalmetmet ku in mokle kut in ‘suk meet Togusrai lun God’ a in orekmakin len lasr ke inkanek su fwakak mwolanu nu sin God a in oru insiel in engun. (Mattu 6:25-33; Soakas 27:11) Paye, alu nu sel ke insiesr kemwa tia ku in eisla ma upa lasr nu kemwa, tusruktu ma inge ku in kol nu ke me insemwomwo lulap.
Me Insemwomwo lun Jeova Wise Nu Sesr Engun
20. (a) Ke inkanek fuka God el “pulakin auli”? (b) Oiye fuka Jeova el akkalemye nu sesr kut fwin oru ma koluk tusruktu kut auliyuk na paye?
20 Arulanu mwo kut fwin ku in insemwomwo pal nu kemwa ke lusen moul lasr nu fon. Ke ma inge, Moses el siyuk: “Kom in foloko, O Jeova! Putaka? A lela kom in auliyuk sum ke met kulansap lom. Kom in akkupye kut lutue ke pakoten lom [ku, “lung kulang lom”], tu kut fwa engun a insemwomwo len nu kemwa lasr.” (Sam 90:13, 14; footnote) God el tia ku in tafongla. Fwinne ou inge, el “pulakin auliyuk” a el ‘forla’ liki mulat lal a nununku lal in sang kai fwin kas in sensen lal ke ma inge purakak sie met koluk in ekulla oiyen moul koluk lal a auliyuk. (Duteronomi 13:17) Ke ma inge, kut fwinne oru ma koluk upa kut fwin auliyuk paye, Jeova el ‘akkupye kut ke lungkulang lal,’ a oasr sripe lasr in “tung ke insemwomwo.” (Sam 32:1-5) A ke inkanek in suk ma sumwos in moul, kut fwa ku in akilen lungkulang lun God nu sesr a kut fwa ku in “insemwomwo len nu kemwa lasr”—aok, ke lusen moul lasr nu fon.
21. Ke kas puspis su simusyukla in Sam 90:15, 16, mea Moses el siyuk?
21 Met simusla Sam el pre ke insiel kemwa: “Kom in akengunye kut oanu len su kom akngalye kut, a yiu su kut liye koluk ka. Kom in lela orekma lom in sikyuk nu sin met kulansap lom, a ma mwomwo lom nu fwin tulik nutulos.” (Sam 90:15, 16) Saap Moses el siyuk sin God in akinsemwomwoye met Israel ke lusen me insemwomwo su fwal nu ke enenu ke lusen pal, ku lusen len in keok lalos a lusen yiu in ongoiye puspis lalos. El siyuk sin God in oru “orekma” lal in akinsemwomwoye met Israel in kalem nu sin met kulansap Lal, a mwolanu lal in kalem nu sin tulik nutulos nu kemwa. Kut ku in pre siyuk ke me insemwomwo nu kemwa in tuku nu fwin met nu kemwa su akos in akola nu ke fwal sasu lun God su el mwolela ka.—2 Piter 3:13.
22. Fwal nu ke Sam 90:17, mea kut ku in pre sumwos ka?
22 Sam 90 el aksafyela ke me siyuk inge: “A lela kulang lun Jeova God lasr in on fwes, a kom oakiye ku orekma lun paus su fwes. Aok orekma lun paus kom oakiye ku.” (Sam 90:17) Kas se inge akkalemye la kut ku in pre nu sin God in akinsemwomwoye kaifweung lasr nu ke orekma lal. Oanu met Kristian akmusrala ku met su asrouki nu sel “sip ngie,” kut arulanu engun meyen “kulang lun Jeova” oan fwesr. (Jon 10:16) Kut arulanu engun meyen God el ‘oakiye orekma lun paosr’ oanu met sulkakin Togusrai a ke kutupa inkanek!
Lela Kut in Tafwela in Oekla Len Lasr
23, 24. Fuka kut ku in eis ma lane su tuku ke kalweni ke nunuk lasr ke ma simusla in Sam ak90?
23 Nunuk lasr pal nu kemwa nu ke ma simusla in Sam 90 ku in akyokye lalalfongi lasr nu sin Jeova oanu “nien muta paye” lasr. Ke kut nunku ke kas nu kemwa lal ke lusen pal futoto lun moul, kut enenu in loang mwo nu ke ma enenu nu sesr ke kolyuk mutal in oekla len lasr. A kut fwin kaifweung in suk a orekmakin lalmetmet lun God, kut ku in lalalfongi na paye la kut fwa eis lungkulang a me insemwomwo lun Jeova.
24 Jeova el a fwa tafwela in akkalemye nu sesr ke inkanek in oekla len lasr. A kut fwin pusisel nu ke kas in luti lal, kut fwa ku in tafwela in oekla len lasr ma patpat. (Jon 17:3) Tusruktu, kut fwin lungse na paye moul ma patpat, kut enenu in oru Jeova in oanu nien moul lasr. (Jud 20, 21) Oanu ma kut ku in liye ke me lutlut toko, ma inge arulanu kalem ke kas in akkeye lun Sam 91.
Fuka Kom Ku In Topuk?
• Fuka Jeova el “sie nien muta na paye” sesr?
• Efu kut ku in fwak la Jeova el akola pal nu kemwa in kasre kut?
• Fuka Jeova el kasru kut in “oekla len lasr”?
• Mea ma inge su kasru kut in “insemwomwo ke lusen moul lasr nu fon”?
[Picture on page 8]
Jeova el oasr “meet liki sikyuk lun eol nu kemwa”
[Picture on page 10]
Ye mutun Jeova, Metusela su yiu 969 matwe el moul na srik liki len se
[Pictures on page 12]
Jeova el “oakiye ku orekma lun paosr’