Engunkin “Me Sang Nu Sin Metu”
“Komwos in etalos su orekma in maslomwos . . . a arulanu akfulatyelos in lungse ke orekma lalos.”—1 TESSALONIKA 5:12, 13.
“INSEWOMWO in sang yok liki insemwomwo in eis.” (Orekma 20:35) Ya kom esam nge pal safla kom pulakin na paye ke kalmen kas lun Jisus inge? Saap sie me sang su kom sang nu sin sie met su kom lungse. Kom sulela mwo na paye ma inge, meyen kom lungse ma inge in aksaokyeyuk sin met su kom lungse. Oasr insemwomwo yok ke mutun met su kom lungse—arulanu akinsemwomwoye insiom! Fwin mokleyuk na paye ke inkanek sumwos, orekma in sang sie inkanek in akkalemye lungse, a lungse su akkalemyeyuk oasr ku lal in akinsemwomwoye kut.
2 Ke ma inge, ya oasr met su ku in insemwomwo yok liki Jeova, el su Met Kite “mwo a fwal”? (Jemes 1:17; 1 Timote 1:11) Me sang nu kemwa su el sang tuku ke lungse. (1 Jon 4:8) Ma inge arulanu paye ke me sang su God el sang nu ke congregation ke inkanek lun Kraist—“me sang nu sin metu.” (Efesus 4:8) Me sang ke met elder in liaung un sip pa sie inkanek lun God in akkalemye lungse yok nu sin met lal. Suleyen met nu kemwa inge arulanu ituftuf—elos enenu in sun ma enenu su oasr ke Ma Simusla. (1 Timote 3:1-7; Taitus 1:5-9) Elos etu la elos enenu in “kurunganang u sa,” ke ma inge oasr sripe lun un sip in akkalemye insemwomwo yok ke seperd kulang inge. (Orekma 20:29; Sam 100:3) Fwin Jeova el liye la insien un sip lal arulanu nenela ke kain in insemwomwo inge, na insiel arulanu engun na paye!—Soakas 27:11.
3 Paye kut srunga in aksrikye lupan me sang lun God; ku kut pilesru me sang lal. Oasr kusensiyuk luo su touyuk: Nunuk fuka met elder elos enenu in akkalemye ke kunokon lalos in congregation? A fuka un sip nu kemwa elos akkalemye insemwomwo lalos nu ke “me sang nu sin metu”?
‘Kut Met Orekma Yurom’
4 Jeova el sang kunokon nu ke “me sang nu sin metu” in congregation. Paye, met elder elos srunga in orekmakin kunokon lalos ke inkanek sesumwos, tusruktu elos etu la met nu kemwa sesumwos arulanu fwusesr in oru ou inge. Ke ma inge, nunuk fuka elos enenu in akkalemye nu selos sifwanu ke orekma lalos nu sin un sip? Tuni akmwoye me pupulyuk su met sap Poul el orekmakin. Tokin el aketeye la efu “me sang nu sin metu” etuku nu sesr, Poul el simusla: “A ke kut kaskas paye in lung, kut fwa kapek in ma nu kemwa in el su sifwe, aok, Kraist. Ke su mano nu kemwa musa fwal a toeni nu sie, ke ma orala ke kupas nu kemwa, fwal nu ke srikasrak mwo in orekma in kais sie ip, fwa yokelik mano nu ke musaiyuk lal sifwanu in lung.” (Efesus 4:15, 16) Ke ma inge, Poul el pupulyukin congregation, wekunang met elder a kutupa met in congregation, nu ke sie mano. Efu me pupulyuk inge arulanu fwal?
5 Sie mano orekla ke kain in laa puspis tusruktu oasr sifwe sifwunnu—ikwe, alko—ma inge nu kemwa oasr sripe. Kais sie laa arulanu yok sripe a sang kasru nu ke ku a kato lun mano. In oupanu, ke luman kain in met puspis in congregation, tusruktu kais sie selos—elos fwinne matu ku fwusr, fukoko ku munas—elos nu kemwa ku in sang kasru nu ke ku in ngun a kato lun congregation. (1 Korint 12:14-26) Wangin kutena met inmasrlolos su ku in fwak la wangin sripe lalos. A ke kutu luma, wangin kutena met inmasrlolos ku in fwak la elos fulat liki kutu met, meyen kut nu kemwa—met seperd ku un sip oanu sie—ipen mano siefwunnu, a oasr sifwe siefwunnu lasr, pa Kraist. Ke ma inge, Poul el akkalemye sie pitse mwomwo ke lungse, kurunganang, a akfulat su kut enenu in oru nu sie sin sie. Akilenyen ma inge ku in kasru met elder in akkalemye inse pusisel, a nunuk sumwos ke kunokon lalos in congregation.
6 “Me sang nu sin metu” se inge tia ma in suk in kurungin moul ku lalalfongi lun met lili wielos inge in lalalfongi. Poul, el fwinne oasr mwal lulap lal oanu sie met sap, tusruktu el pusisel in sramsram lal nu sin met Korint: “Tia tu kut leum fwin lalalfongi lomwos, a kut met kasru in engun lomwos, tu ke lalalfongi komwos tu ku.” (2 Korint 1:24) Poul el tia lungse kol lalalfongi a inkanek in moul lun met lili wiel. Paye, el liye la el tia enenu in oru ou inge, el lalalfongi la elos mokul a mutan oaru tari in lalalfongi su muta ke u lun Jeova meyen elos lungse in oru ma sumwos. Ke ma inge, oasr pal se ma el sramsam kel sifwanu a ke met su welul fwafwasyesr pangpang Timote, Poul el fwak: ‘Kunokon lasr in wi komwos orekma in kulansap nu sin God ke insemwomwo.’ (2 Korint 1:1) Sie ngun lun inse pusisel na paye!
7 “Me sang nu sin metu” ke len inge akmwuk oupanu ke inkanek siefwunnu. Elos “met orekma yurosr ke me insemwomwo lasr.’ Met elder fwokpap elos akilen la tia ma lalos in oru sulela nu ke lupan orekma lun kutu met su elos oru nu sin God. Elos etu la fwinne elos ku in akkeye kutu met in akyokye ku akkapye orekma lun forfor lalos, tusruktu, kulansap lalos nu sin God enenu in tuku ke inse paye. (Srike liye 2 Korint 9:7.) Elos lalalfongi la fwin met orekma wielos elos insemwomwo, elos e fwa ku in oru ma nu kemwa ke ku lalos. Ke ma inge elos lungse na paye in kasru met lili wielos in “kulansap nu sin Jeova ke engun.”—Sam 100:2.
Kasru Met Nu Kemwa in Kulansap Wi Engun
8 Met elder, fuka komwos ku in kasru met lili wiom in kulansap ke engun? Kom ku in akkeyelos ke inkanek lun me srikasrak. (1 Piter 5:3) Lela in kalem moniyuk a insemwomwo lom ke orekma lun forfor, a saap ma inge ku in mokleyuk kutu met in etawi me srikasrak lom. Sang kas in kaksak nu sin kutu met ke kaifweung lalos. (Efesus 4:29) Sie kas in kaksak ke paye ku in kasru sie met in pulakin la oasr sripel a el eneneyuk. Ma inge akkeye un sip in sang ku lalos nu kemwa nu ke kulansap lalos nu sin God. Lela kom in tia srikeye orekma lun met lili wiom nu sin siepa met lili. (Galetia 6:4) Kain in orekma koluk inge me akasorye met a tia me akkeye nu sel tu lan kapkapek. Sayen ma inge, sip nutin Jeova elos met pa—wikin luma a ma sikyuk ke moul a ku lalos tia oanu sie. Oanu Poul, srike in akkalemye lalalfongi nu sin met lili wiom. Lungse “el lalalfongi ma nu kemwa” paenang arulanu mwo kut in lalalfongi la met lili wiesr elos lungse Jeova a lungse in akinsemwowoyel. (1 Korint 13:7) Kom fwin akkalemye ‘akfulat nu sin kutu met,’ kom eis ma mwo emeet yurolos. (Rom 12:10) Kom enenu in lalalfongi na paye la fwin un sip elos akkeyeyuk a oasr mongle lalos, na elos fwa oru ma nu kemwa ke ku lalos in kulansap nu sin God, a elos fwa konaok insemwomwo ke orekma lalos inge.—Mattu 11:28-30.
9 Kom fwin pusisel in nunku moul lom oanu ‘sie met orekma wielos’ na ma inge fwa kasru kom in kulansap ke insemwomwo a in engunkin kutu me sang su tuku sin kutu met elder wiom. Oasr kain in lalmetmet a ku lun kais sie elder su elos ku in orekmakin in akinsemwomwoye congregation. (1 Piter 4:10) Saap sie met elder el sumat in luti. Sie el sumat in orala ma nu kemwa in sumwos a takla. Saap met lili elos arulanu fwusesr in osun nu sin sie met elder meyen el kulang a pakoten. Ma paye’u pa, wangin kutena met elder oasr yurol me sang inge nu kemwa ke lupa siefwunnu. Ya sie me sang fwin oasr yurin sie met elder—oanu me sang lun luti ke inkanek mwo—ku in oru lan fulat liki kutu met elder? Mo! (1 Korint 4:7) Aok, kut tia enenu in fos ke me sang su oasr yurin kutu met elder ku kut in pulakin mu sufwal fwin inkanek mwo lun kutu met elder oasr kas in kaksak su tuku sin kutu met kelos. Esam, oasr me sang su Jeova el liye yurom. A el ku in kasre kom in akkapye me sang inge a in orekmakin ma inge ke insemwomwo lun met lili wiom.—Filippai 4:13.
‘Akkalemye Akos a Pusisel’
10 Ke pal se ma kut eis me sang, arulanu fwal in akkalemye kulo. “Komwos in sang kulo,” Kolosse 3:15 el fwak. A fuka “me sang nu sin metu,” a ke me sang saok saok su Jeova el ase nu sesr? Aok, kut sang kulo yok nu sin Jeova, el su Srupon me sang kulang. Tusruktu, fuka “me sang nu sin metu? Fuka kut akkalemye la kut insemwomwo kalos?
11 Kut ku in akkalemye kulo lasr ke “me sang nu sin metu” kut fwin sa in porongo kas in kai lalos su tuku ke Baibel. Baibel el kai kut: “Komwos in akos met kol lomwos, a akpusisilye komwos nu selos, tu elos sano nu ke ngunumwos, oanu elos su fwa fwakak orekma lalos; tu elos fwa ku in fwakak ke engun, a tia ke asor, tu ma inge tia mwo nu sumwos.” (Hibru 13:17) Tuni akmwoye meyen kut tia enenu in “akos” mukena a kut enenu pa in “akpusisilye kut sifwanu” nu selos su kol kut. Kas Greek ke “akpusisilye kut sifwanu” ku in kalmekin mu “kom pusisel ye koko.” Ke pal se el sramsram ke kas inge “akos” a “akpusisilye kut sifwanu,” Scholar lun Baibel pangpang R. C. H. Lenski el fwak: “Sie met el akos ke pal se ma el insese ke ma sapkinyuk nu sel lan oru, el inge mokleyuk ke sumwosmwos a ma lane su tuku ka; sie met el akpusisilyel sifwanu fwin oasr ma se su el oru fwinne ma inge tia fwal nu ke ma el nunku. Ke pal se kut kalem a insese ke sie inkanek in kol lun met su kol kut, akos arulanu fwusesr. Tusruktu, fuka kut fwin tia kalem ke sripe lun akmwuk su orekla?
12 Pa inge an se ma kut enenu in akpusisilye kut sifwanu ka, ku pusisel, efu? Ke sie sripe, kut enenu in lalalfongi la met inge fwal ke moul in ngun in oru orekma ke insielos nu fon in me insemwomwo nu sesr. Aok, elos etu na paye la elos enenu in tu ye mutun Jeova ke sripen el filiye un sip lal ye kurunginyuk lalos. (Jemes 3:1) In wekunang ma inge, kut enenu in esam la kut tia etu nu fon ma paye in me sramsram su elos mukena etu in orekmakin fwal nu ke sie me sulela.—Soakas 18:13.
13 A fuka oiyen akpusisilye kut sifwanu nu ke sulela lun un met elder ke pal elos aksumwosye sie met su tafongla? Paye, ma inge tianu fwusesr, yokna fwin sulela su elos oru pa in sisla met su kut lungse—sie sou ku sie kamwuk futoto. Ke ma sikyuk inge, arulanu mwo kut fwin akpusisilye kut sifwanu ke nununku lun “me sang nu sin metu” inge. Yok kaifweung lalos liki kut, a yok etu lalos ke ma sikyuk na paye. Pal nu kemwa brother inge elos arulanu asor pa ke kain in sulela inge su elos oru; sie kunokon yok na paye in oru nununku ‘ke Jeova.’ (2 Kronikel 19:6) Elos oru ma nu kemwa in akkalemye pakoten, meyen elos etu la God el “akola in nunuk munas.” (Sam 86:5) Tusruktu elos enenu pa in orala congregation in nasnas, a Baibel el sapkin nu selos la elos enenu in sisla kutena met koluk su srunga in auliyuk. (1 Korint 5:11-13) Ke luma a ma sikyuk puspis, met su oru ma koluk el insese ke sulela lalos. Saap kai inge fwal elan mu ku in aksumwosye moul lal. Kut nu kemwa, su el lungse, kut fwin akpusisilye kut sifwanu ke sulela su orek, kut kasrel in eis ma lane yok su tuku ke kai su el eis.—Hibru 12:11.
“Arulanu Akfulatyelos in Lungse”
14 Kut ku in akkalemye pa insemwomwo lasr ke “me sang nu sin metu” ke pal se ma kut akfulatyelos. Ke pal se el sim leta nu ke congregation fwin an Tessalonika, Poul el kaifwe nu sin met lili fwin an we: “Komwos in etalos su orekma in maslomwos, a liyekomwosyung in Leum, a kai komwos . . . a arulanu akfulatyelos in lungse ke orekma lalos.” (1 Tessalonika 5:12, 13) “Orekma yok”—ya tia pa inge kas sumwos in akkalemye ke met elder nu kemwa su oaru tia rapku in kisekin moul lalos nu ke orekma su me insemwomwo lasr? Nunku kitin pal, ke orekma yok su met lili kulu inge elos oru.
15 Ke oiye puspis su kalem ke mokul inge la oasr pa sou lalos in kurungin ke me enenu lalos. (1 Timote 5:8) Fwin oasr tulik nutin met elder, tulik fwusr inge nu kemwa enenu pa pal a kurunginyuk lun papa tumalos. Saap el enenu in kasrelos ke kunokon lalos in loom lutlut a pakiye pal in asrouki nu selos tu elos in ku in orekmakin pal in fwusr lalos ke me akengun mwo. (Ekklisiastis 3:1, 4) Yok liki nu kemwa, el kurungin ma enenu lun sou lal ke ma lun ngun, el kol pal nu kemwa ke lutlut lun sou ke Baibel, welulos ke orekma lun forfor, a wiselosla nu ke meeting lun met Kristian. (Duteronomi 6:4-7; Efesus 6:4) Lela kut in tia mulkunla la sayen kunokon inge nu kemwa su yok eteye tari sesr kemwa, oasr pa kunokon saye lun met elder: akola ke kunokon lal ke meeting, muteta nu yurin met lili in akkeyelos, orekma in kurungin ku lun congregation ke ma lun ngun a fwin eneneyuk elos aksumwosye met su oru ma tafongla. Kutu selos oasr kunokon ke pal in toeni lulap lun circuit, toeni lulap lun district, orekma in musa ke Kingdom Hall, a ke Hospital Liaison Committee. Paye, brother inge nu kemwa “oru orekma yok”!
16 Fuka kut ku in akfulatyelos? Soakas se in Baibel el fwak: “A sie kas in pal fwal, fuka mwo la!” (Soakas 15:23; 25:11) Ke ma inge sie kas in akkalemye kulo a kas in akkeye ku in akkalemye la kut tia pilesru orekma yok lalos. Ouyepa kut enenu in akkalemye nunuk sumwos ke ma kut siyuk selos. Aok, kut enenu in pulakin sukosok in osun nu selos kut fwin enenu kasru. Saap oasr pal ‘insiesr arulanu toasr’ a kut enenu kas in akkeye su tuku ke Ma Simusla, kas in kol, a kas in kai su tuku selos su “etauk in luti” ke Kas lun God. (Sam 55:4; 1 Timote 3:2) In pal se na, kut enenu pa in esam la oasr na lupan pal su met elder elos ku in ase nu sesr, meyen el tia ku in pilesru ma enenu lun sou lal sifwanu a kutupa met in congregation. “Nunuk pakoten” lasr nu sin brother inge su oru orekma yok, mokle kut in tia suk a siyuk ma tia fwal nu selos. (1 Piter 3:8) A, lela kut in akkalemye kulo ke kutena pal su elos ku in ase nu sesr ke inkanek mwo.—Filippai 4:5.
17 A fuka mutan kien met elder? Ya elos tia fwal pa in eis kas in kaksak lasr? Aok, elos akesrui nu sin mokul tumalos in congregation. Pal nu kemwa ma inge siyuk selos in kisekin pa moul lalos ke orekma. Kais kutu pal, met elder elos enenu in orekmakin aur puspis ke eku in kurunganang orekma in congregation fwinne pal inge elos ku in orekmakin ke sou lalos. In congregation puspis mutan Kristian oaru elos insemwomwo in mongfwusesr fwin ma inge sikyuk paenang mokul tumalos ku in kurunganang sip lun Jeova.—Srike liye 2 Korint 12:15.
18 Fuka kut ku in akkalemye la kut tia pilesru mutan Kristian oaru inge? Aok kut ku in oru ou inge kut fwin tia siyuk ma puspis arulanu alukela ma fwal nu sin mokul tumalos. Lela kut in tia mulkunla pa ku su tuku ke kas srisrik in akkalemye kulo. Soakas 16:24 el fwak: “Kas kulang oanu nien unni, emem nu ke ngun, a me mol nu ke sri.” Tuni akmwoye experience se inge. Tokin sie meeting lun met Kristian, seanyen se el osun nu sin sie met elder a siyuk sel elos fwin ku in sramsram nu sel ke tulik mukol fwusr se nutulos. Ke pal se met elder el sramsram nu sin seanyen se, mutan kiel el mongfwusesr in sano. Tokin sramsram lalos nine kien tulik mokul fwusr se el som nu yurin mutan kien met elder a fwak: “Nga lungse in fwak kulo nu sum ke sripen mokul tumom el kasru sou luk.” Kain in kas in sang kulo mwo inge arulanu mokleyuk insien mutan kien met elder sa.
19 Me sang ke met elder in kurunganang un sip pa ‘sie me sang mwo’ lun Jeova. (Jemes 1:17) Aok, mokul inge nu kemwa tia sumwos; oanu kut, elos ku pa in oru ma tafongla. (1 Togusra 8:46) Fwinne ou inge, oanu sie u, met elder nu kemwa in congregation fwin fwalu nu fon elos oaru in akpayeye ma Jeova el lungse elos in oru—pa inge, in aksumwosye, musaiyuk, purakak inse siefwunnu, a in kurunganang un sip. Lela kais sie elder in kaifweung in tafwela na in kurunganang un sip lun Jeova ke inkanek mwo, ke ma inge elos akkalemye la elos sie me sang na paye, ku me insemwomwo, nu sin met lili wiel. A lela kut nu kemwa in kaifweung in akkalemye insemwomwo lasr ke “me sang nu sin metu” ke kut akos a akpusisilye kut sifwanu nu selos a ke kut akkalemye akfulatyeyen orekma yok lalos. Arulanu yok kulo kaksak paye lasr ke sripen lungkulang lun Jeova el ase nu sesr mokul inge, su ku in fwak nu ke un sip lal: ‘Kunokon lasr in kasru kom in kulansap nu sin God ke insemwomwo!
Fuka Kom Topuk?
◻ Efu ku fwal in srikeye congregation nu ke sie mano?
◻ Fuka met elder elos ku in kasru met lili wielos in kulansap nu sin Jeova ke insemwomwo?
◻ Efu kut tia enenu in akos mukena a kut enenu pa in akpusisilye kut sifwanu nu selos su kol kut?
◻ Ke inkanek puspis fuka kut ku in akkalemye akfulat nu sin met elder?
[Study Questions]
1. Fwal nu ke orekma 20:35, kain in ku fuka ku in tuku ke orekma in sang? Sang me pupulyuk.
2, 3. (a) Efu kut ku in fwak la wangin kutena met su insemwomwo lalos yok liki insemwomwo lun Jeova, a fuka me sang lal ke “me sang nu sin metu” arulanu akinsemwomwoye na paye insiel. (b) Mea ma inge su kut srunga in oru nu ke sie me sang lun God?
4, 5. (a) Poul el pupulyukin congregation nu ke mea, a efu ku ma inge sie me pupulyuk fwal? (b) Mea me pupulyuk lal Poul el akkalemye nu sesr fwin ke inkanek a nunuk su kut enenu in akkalemye nu sin sie sin sie?
6. Fwinne oasr mwal lal oanu sie met sap, fuka Poul el akkalemye sie inse pusisel?
7. Mea met elder fwokpap elos akilen ke kunokon lalos in congregation, a kain in lalalfongi fuka oasr yurolos nu sin met orekma wielos?
8. Mea kutu inkanek su met elder elos ku in orekmakin in kasru met lili wielos in kulansap nu sin Jeova ke insemwomwo?
9. Kain in nunuk fuka nu sin met elder wielos ku in kasru kais sie met elder in kulansap ke insemwomwo?
10. Efu arulanu fwal sesr in akkalemye insemwomwo ke “me sang nu sin metu”?
11. (a) Fuka kut ku in akkalemye insemwomwo lasr ke “me sang nu sin metu”? (b) Mea ma yok ke kas inge “akos” a “akpusisilye kut sifwanu”?
12. Efu kut enenu in akpusisilye kut sifwanu, ku sang fulela, fwinne kut tianu arle kalem ke sie sripen sulela?
13. Mea ma inge su ku in kasru kut in akpusisilye kut sifwanu fwin ke sulela lun un met elder ke pal in aksmwosye met tafongla?
14, 15. (a) Fwal nu ke 1 Tessalonika 5:12, 13, efu met elder elos fwal nu ke akfulat lasr? (b) Efu kut ku in fwak la met elder elos ‘oru orekma yok inmaslosr’?
16. Aketeye inkanek puspis su kut ku in orekmakin in akkalemye akfulat nu sin met elder.
17, 18. Kain in orekma fuka in akmwesasyelos sifwanu mutan puspis su payuk nu sin met elder elos oru, a fuka kut ku in akkalemye la kut tia pilesru mutan oaru inge nu kemwa?
19. (a) Met elder nu kemwa, oanu sie u, elos oaru in akpayeye nien sun fuka? (b) Mea kut nu kemwa enenu in kaifweung in oru?
[Picture on page 14]
Met elder, elos sang kas in kaksak sie sin sie ke sripen orekma lalos ke insielos kemwa
[Picture on page 15]
Ke me srikasrak moniyuk lalos ke orekma lun forfor, met elder elos ku in kasru met in sou lalos sifwanu a kutupa met in kulansap ke insemwomwo
[Pictures on page 16]
Kut akkalemye insemwomwo lasr nu sin met elder su oru orekma yok