“Komwos in Sunakinelos su Orekma Inmasrlomwos”
“Komwos in sunakinelos su orekma inmasrlomwos, a liyekomwosyung in Leum, a kaifwe komwos.”—1 TESSALONIKA 5:12, NW.
1, 2. (a) Oiya fuka sikyak ke congregation lun Tessalonika ke pal se Poul el simusla leta se meet lal nu selos? (b) Poul el akkeye met Kristian in an Tessalonika in oru mea?
SRIKE lumala ke nunak lom la kom wi ke congregation su oasr fwin an Tessalonika in century se meet, sie ke congregation puspus su oakiyuki in an Europe in pal san. Met sap Poul el orekmakin pal yok in akkeye met lili we. Saap el srusrngiye met elder puspus in kol congregation, oana ke ma el oru ke congregation puspus saye. (Orekma 14:23) Tusruktu tokin congregation se inge oakiyuki tari, oasr met Ju puspus su orala sie u in sisella Poul a Sailas liki siti se inge. Met Kristian su oasr ke siti se inge saap elos pulakin asor ke sripen met lili luo inge elos wanginla yurolos, a saap elos sangeng pa.
2 Aok, tokin el som liki an Tessalonika, Poul el nunku yok ke congregation sasu se inge. El srike in folokla nu we, tusruktu ‘Setan el igolye’ inkanek lal. Ke ma inge el supwela Timote in akkeye congregation. (1 Tessalonika 2:18; 3:2) Ke pal se Timote el us sie peng na mwomwo, Poul el akkeyeyuk in simusla leta nu sin met Kristian in an Tessalonika. Poul el simusla ma puspus nu selos, a el akkeyelos in ‘sunakinelos su liyelosyung.’—Ridi 1 Tessalonika 5:12, 13.
3. Sripe puspus fuka oasr yurin met Kristian in an Tessalonika in arulana akfulatye met elder lalos?
3 Met lili su kol met Kristian in an Tessalonika soenna oasr experience yok lalos oana Poul a met lili puspus su welul fwufwasryesr; a tia oana sie nu sin met lili fwin an Jerusalem su wi oana met Kristian ke lusen pal loeloes. Aok, congregation se inge el tufwana oakiyuki, oasr na ke lusen pal srik liki yea se! Ne ouinge, met lili nukewa ke congregation oasr sripe lalos in sang kulo a engun ke met elder lalos, su kafweang in “orekma” a “liyelosyung” met nukewa su oasr ke congregation, a elos ‘kaifwe’ met lili nukewa. Aok, oasr sripe mwomwo lalos in “arulana akfulatyelos in lungse.” Tokin el fwak me kaifwe se inge Poul el akkalemye pa kas in kaifwe inge “in misla sie sin sie.” Fwin kom oasr in an Tessalonika in pal san, ya kom fwa akkalemye pa kulo yok lom nu ke orekma lun met elder nukewa inge? Nunak fuka kom akkalemye ke “me sang nu sin metu” su God, ke inkanek lun Kraist, el sang nu ke congregation lom?—Efesus 4:8.
‘Alken ke Orekma’
4, 5. Efu ku sie orekma upa nu sin met elder in len lal Poul in luti congregation, a efu oiya inge paye pa ke pal inge?
4 Tokin Poul a Sailas elos supeyukla nu an Beroea, ke inkanek fuka met elder in an Tessalonika elos ‘alken ke orekma’? Wangin alolo ka la elos etawi Poul a elos orekmakin ma Simusla in luti congregation. ‘Ya met Kristian in an Tessalonika elos aksaokye Kas lun God?’ saap kom siyuk. Paye la, Baibel el akkalemye la met Beroea elos “mwo liki met in Tessalonika, . . . suk in ma Simusla len nukewa.” (Orekma 17:11) Tusruktu, oiya se inge su tia oana sie el ma nu sin met puspus fwin an Tessalonika su tia eis ma paye, a tia nu selos su met Kristian. Met nukewa su ekla met Kristian elos ‘eis kas lun God, tia oana kas lun met, a oana kas lun God.’ (1 Tessalonika 2:13) Met elder inge elos alken ke orekma lalos in luti congregation.
5 Ke pal inge, met kulansap oaru a lalmetmet elos sang pa nu sin u lun God “me mongo ke pal fwal.” (Mattu 24:45) Ke kolyuk lun met kulansap oaru inge, met elder elos alken ke orekma lalos in luti met lili wiyelos ke congregation. Met lili ke congregation saap oasr me rid puspus nutulos su tuku ke Baibel, a ke kutu kas oasr kain in kofwen me lutlut inge su pangpang Watch Tower Publications Index and Watchtower Library on CD-ROM. Met elder elos lungse in akfwalye ma enenu lun congregation in akkeye lulalfongi lalos, ke ma inge elos orekmakin pal yok in akola ke me sramsram ke meeting tu elos in ku in akkalemye ma inge ke inkanek mwomwo. Ya kom nunku ke lupan pal su met elder elos orekmakin in akola me sramsram lalos nu ke meeting, assembly, a toeni lulap?
6, 7. (a) Me srikasrak mwomwo fuka Poul el akkalemye nu sin met elder in an Tessalonika? (b) Efu ku upa nu sin met elder ke pal inge in etawel Poul?
6 Met elder in an Tessalonika elos esam ke me srikasrak mwomwo su Poul el akkalemye in liaung a akkeye congregation. Orekma se inge enenu in orek ke inkanek mwo a kulang su oasr lungse yok, a tia ke sripen ma eneneyuk in orek meyen kunokon lun sie met elder. Oana ke ma akuteyuki tari ke me lutlut se meeta, Poul el “kulang . . . , oana sie mutan to ke el karunganang tulik natul sifwana.” (Ridi 1 Tessalonika 2:7, 8.) Oayepa el inse mulala in ‘sang’ moul lal sifwana! Ke pal se met elder elos oru orekma lalos in liaung a akkeye met lili, elos enenu in etawel.
7 Met Kristian elder ke pal inge elos etawel Poul ke elos aksaokye met nukewa ke congregation. Paye la, kutu sin met Kristian inge su oana sip elos tia kulang a tia lungse in orek kawuk. Ne ouinge met elder elos srike in akkalemye lalmetmet a kafweang in “liye ma mwo” kelos. (Soakas 16:20) Aok, ke sripen elos sesumwos pa, saap upa nu sin sie met elder in oasr nunak mwomwo nu sin kais sie selos. Tusruktu, ke el oru ke ku lal kewa in kulang nu sin met nukewa, paye la arlana fwal elan kaksakinyuk ke kafweang lal in oana sie met liaung mwomwo ye kolyuk lun Kraist.
8, 9. Mea kutu inkanek su met elder ke pal inge elos ‘karungin moul lasr’?
8 Kut nukewa oasr sripe mwomwo lasr in ‘pusisel’ nu sin met elder nukewa. Oana ke ma Poul el simusla, elos liaung moul lasr. (Hibru 13:17) Kas inge akesmakinye kut ke sie met seperd paye su tia motul elan ku in loangela un sip natul. Oapana ke pal inge, met elder elos tia motul ke pal se elos sang kasru nu selos su munas ke mano a mas, ku oasr ma upa in orekmakin akwuk mwomwo lun Baibel. Ke sie me pupulyuk, brother puspus su orekma ke Hospital Liaison Committees elos kafweang in tia motul tu elos in sang kasru nu sin met lili su oasr ma enenu ke akwuk lun ono. Ne ouinge, kut fwin sun kain in ma sikyuk inge, kut arlana engun a sang kulo ke orekma mwomwo lalos inge!
9 Met elder su wi ke Kingdom Hall Construction Groups a relief committees elos alken in kasru met lili puspus. Arlana fwal kut in aksaokye a kasrelos! Nunku ke orekma in sang kasru tokin paka upa se inge Nargis su sikyak fwin an Myanmar in yea 2008. Un met lili su sang kasru elos kasrusr ke ma okwelos nu ke inkanek loeloes su oasr met mise puspus oan ka meet liki elos sun Bothingone Congregation in an Irrawaddy Delta su musalsalla ke sripen paka upa se inge. Ke pal se met lili su muta we elos liye un met kasru inge sun an Bothingone wi circuit overseer lalos su kulansap pa nu ke congregation lalos in pal somla, elos tung a fwak: “Liye! Circuit overseer lasr ela inge! Jeova el molikutla!” Ya kom aksaokye a sang kulo ke orekma upa su met elder elos oru len a fong? Kutu sin met elder elos srusrngiyuki in kulansap oana special committee in sang kasru in aksumwosye sie ma upa su sikyak ke congregation. Met elder inge elos tia konkun ke ma elos akpayeye; ne ouinge met lili nukewa su eis kasru ke ma elos oru arlana engun in sang kulo.—Mattu 6:2-4.
10. Orekma fuka su tia arlana eteyuk met elder elos oru?
10 Met elder ke pal inge oasr orekma puspus su elos enenu in oru. Ke sie me pupulyuk, coordinator lun un met elder el orala schedule puspus ke meeting wik nukewa. Secretary lun congregation el orani report lun met lili ke orekma in sulkakin peng mwo malem nukewa a report nu ke kais sie yea. Met elder su liaung Theocratic Ministry School el nunku akmwoye ke schedule ke lutlut. Ke kais tolu malem, account lun congregation enenu in audit. Met elder elos rid leta su tuku ke branch ofus a orekmakin kas in kasru su sang kasru in oasr “lulalfongi siefwanna.” (Efesus 4:3, 13) Ke sripen kafweang lun met elder nukewa inge, “ma nu kemwa orek in oiye fwal, a in takla.”—1 Korint 14:40.
“Liyekomwosyung”
11, 12. Su liaung congregation, a mea ma eneneyuk in oru orekma inge?
11 Poul el akkalemye ke met elder su alken fwin an Tessalonika la elos ‘liaung’ congregation. Kas su orekmakinyuk in pal meeta ka kalmekin pa oana in “tu ye mutun met puspus” a ku pa in lungasla oana “in sap; a in kol met puspus.” (1 Tessalonika 5:12) Poul el sramsramkin pa ke met elder inge su alken in “orekma.” El sramsramkin ke met elder nukewa ke congregation. Ke pal inge, apkuran met elder nukewa elos tu ye mutun congregation a kol ke meeting puspus. Me aksumwos nu ke inen kunokon lun met elder su orek oana “coordinator lun un met elder” kasre kut in nunku ke met elder nukewa oana sie u su oasr inse sefwanna.
12 Orekma in ‘liaung’ congregation tia kalmekin nu ke orekma in luti met lili mukena, a oasr pa ma eneneyuk saye. In 1 Timote 3:4, Poul el akkalemye la sie met liaung el enenu pa in “sie su leum mwo fwin met in loom sel sifwana, a oru tu tulik natul in aksol wi oawi nukewa.” Ke fus se inge, kas inge “leum mwo” arlana kalem la el enenu in luti tulik natul a el enenu pa in kol sou lal a oru tu “tulik natul in aksol.” Aok met elder elos kol congregation, a kasru met lili nukewa in akpusiselyelos nu sin Jeova.—1 Timote 3:5.
13. Efu ku pal yok eneneyuk in orala sie sulela mwo ke sie meeting lun met elder?
13 Tu elos in liaung congregation ke inkanek mwo, met elder elos sramsramkin inmasrlolos ma enenu lun congregation a ke inkanek mwo in kasru met lili nukewa ke congregation. Saap mwo a tia enenu pal yok fwin met elder sefwanna pa orala sulela nukewa. Tusruktu, met elder elos fwasr tokin me srikasrak lun governing body in century se meet, a met elder ke pal inge elos tukeni sramsramkin ma puspus, a elos suk me kasru su tuku ke ma Simusla. Akwuk mwo su elos lungse in akpayeye pa in orekmakin me luti yok sripe lun ma Simusla nu ke ma enenu lun congregation. Fwin kais sie met elder elos akola nu ke meeting lalos, nunku yok ke ma Simusla a ke kas in kasru lun met kulansap oaru a lalmetmet, paye la e fwa oasr me akkeye nu sin met lili nukewa. Paye la, ma inge ku in eis pal yok. Ke pal se oasr nunak tia oana sie, oana ke ma sikyak ke pal se governing body elos tukeni sramsramkin ma ke kosroila, pal yok a lutlut yok ka eneneyuk tu elos in ku in oru sulela su fwal nu ke ma Simusla.—Orekma 15:2, 6, 7, 12-14, 28.
14. Ya kom insemwomwo ke sripen met elder elos tukeni orekma ke inse sefwanna? Efu ku kom pulakin ouinge?
14 Mea ku in sikyak fwin oasr sie met elder su liksreni in fwak mu inkanek a nunak lal pa mwo in orekmakinyuk? Ku, na fuka fwin oasr sie met, su oana Diotrefis in century se meet, el orala ma in kunausla inse sefwanna? (3 Jon 9, 10) Met nukewa ke congregation elos fwa keok. Fwin Setan el srike in aktoasrye congregation in century se meet, kut etu pa la el lungse in kunausla misla lun congregation ke pal inge. El ku in purakak met in akkalemye kena koluk, oana ke oiyen pengpeng. Ke ma inge, met elder elos enenu in akkeye inse pusisel lalos a tukeni orekma oana sie u su oasr inse sefwanna. Kut insemwomwo na paye ke inse pusisel lun met elder nukewa su akesrui oana sie u!
“Kaifwe Komwos”
15. Nunak fuka oasr yurin met elder ke pal se elos kaifwe sie met lili?
15 Poul el akkalemye pa ke sie kunokon upa lun met elder tusruktu arlana yok sripe: in kaifwe met nukewa ke congregation. Mutawauk ke buk lun Mattu nu ke Fwakyuk, Poul mukena orekmakin kas Grik se su lungusyukla oana ‘kaifwe.’ Kas inge ku in kalmekin nu ke kas in kai upa, tusruktu tia kalmekin nu ke kas upa a mulat. (Orekma 20:31; 2 Tessalonika 3:15, NW) Ke sie me pupulyuk, Poul el simusla nu sin met Kristian in an Korint: “Nga tia simus ma inge in akmekinye komwos, a in kaifwe komwos oana tulik kulu nutik.” (1 Korint 4:14) Sripe mwomwo paenang el sang kas in kaifwe inge pa nunak mwomwo lal nu sin met puspus.
16. Mea met elder elos enenu in esam ke pal se elos kaifwe met lili puspus?
16 Met elder elos esam pal nukewa ke yok sripaiyen inkanek mwomwo in kaifwe met lili puspus. Elos kafweang in etawel Poul ke kulang, lungse, a sang kasru pal nukewa. (Ridi 1 Tessalonika 2:11, 12.) Aok, met elder elos ‘sruokye kas paye . . . tu elos fwa ku in kaifwe in ma luti su akmwoye.’—Taitus 1:5-9.
17, 18. Mea kom enenu in esam fwin kom eis kas in kaifwe nu sin sie met elder?
17 Paye la, met elder elos sesumwos pa a ku in fwak ma puspus su tok elos auli ka. (1 Togusra 8:46; Jemes 3:8) Oayepa, met elder elos etu la fwin met lili elos eis me kai ma inge el tia ‘oana ma in akinsemwomwoye a me akasorye.’ (Hibru 12:11) Ke ma inge fwin sie met elder el tuku nu yurin sie met lili a sang kas in kaifwe, saap el fwa oru ma inge tokin el pre a nunku yok ka. Kom fwin eis kas in kai, ya kom aksaokye a kulo ke nunak mwomwo lun met elder inge keim?
18 Fwin kom pulakin sie mas su upa in eteyuk sripe. Tokin kutu pal, oasr sie taktu su koneak sripen mas lom, tusruktu upa nu sum in lulalfongi ke ma el fwak nu sum ka. Ya kom e fwa toasr nu sin taktu se inge? Mo! Fwinne el fwak mu oasr ma eneneyuk in laslas, saap kom fwa insese ke inkanek in ono inge, meyen kom lulalfongi la ma inge ku in unwela mas lom. Ke oiya su fwak nu sum ma ke mas lom saap oru kom in asor ku toasr kutu srisrik, tusruktu ya kom lela ma inge in kufusla sulela lom? Paye la kom fwa tia lela ma inge. Ke inkanek oapana, nikmet lela inkanek su kom eis kas in kai in igolkomi in porongo pusran met nukewa su Jeova a Jisus elos orekmakin in akkalemye nu sum la fuka kom ku in kasre kom sifwana in oru kapkapek ke ma paye a in karungin fototo lom nu sin Jeova.
Aksaokye Akwuk lun Jeova in Orekmakin Met Elder
19, 20. Fuka kom ku in akkalemye kulo lom ke “me sang nu sin metu” inge?
19 Mea kom e fwa oru kom fwin eis sie me sang su orekla nu sum sifwana? Ya kom akkalemye kulo lom ke kom orekmakin ma inge? Met elder su oana “me sang nu sin metu” pa ma Jeova ke inkanek lun Kraist el usot nu sum. Sie inkanek su kom ku in akkalemye kulo yok lom nu ke me sang inge pa ke kom loang akmwoye ke me sramsram nukewa su met elder elos oru a in orekmakin me lutlut mwomwo su elos akkalemye. Kom ku pa in akkalemye kulo lom ke kom sang me top mwomwo ke pal in meeeting. Sang kasru nu ke orekma su met elder elos kol ka, oana ke orekma in luti peng mwo. Kom fwin eis me kasru yok ke sie kas in kasru su kom eis sin sie met elder, efu ku tia fwak nu sel? Sayen ma inge, efu ku kom tia akkalemye kulo lom nu sin sou lun met elder? Esam la, ke pal su sie met elder su orekma upa ke congregation, met in sou lal elos insese pa elan ku in orekmakin pal inge in akpayeye orekma lal.
20 Aok, oasr sripe mwomwo puspus lasr in akkalemye kulo nu sin met elder nukewa, su alken in orekma inmasrlosr, liyekutyang, a kaifwe kut. Met elder inge su oana “me sang nu sin metu” elos sie me sang mwomwo su tuku sin Jeova!
Ya Kom Esam?
• Sripe puspus fuka oasr yurin met Kristian in an Tessalonika in sang kulo nu selos su liyelosyung?
• Fuka met elder ke congregation lom elos orekma upa in kasre kom?
• Fuka orekma lun met elder in liyekomwosyung akinsemwomwoye kom?
• Fwin sie met elder el kaifwe kom, mea kom enenu in esam?
[Petsac ke sra 19]
Ya kom aksaokye a sang kulo ke inkanek puspus su met elder elos karungin congregation?