“Me Sang Nu Sin Metu” In Kurungin Sip Nutin Jeova
“Ke el somwak nu lung, el akkosye me kos, a sang me sang nu sin metu.”—EFESUS 4:8.
“KULO ke kurungin yok lom nu sesr. Isrusr lom, pulakin lom, a nunuk yok lom nu sesr arulanu paye. Kom muta yurosr pal nu kemwa in long a in aketeye kas su tuku ke Baibel su purakak ngunasr. Nga pre tu Ngan tia pilesre komwos ke kutena pal.” Pa inge ma sie sister el simusla nu sin met elder ke congregation lal. Arulanu kalem, lungse su met Kristian seperd elos akkalemye in purakak insiel.—1 Piter 5:2, 3.
2 Met elder nu kemwa elos me sang su tuku sin Jeova in kurunganang sip nutul. (Luk 12:32; Jon 10:16) Sip lun Jeova arulanu saok yurol—saok na paye, paenang el molela ma inge ke sra saok lun Jisus. Ke ma inge, tia me lut, fwin Jeova el arulanu insemwomwo ke pal se met elder elos kurunganang sip nutul. (Orekma 20:28, 29) Tuni kas in palu su orekla nu sin met elder, ku “met fwisrak” inge: “A sie met fwa oanu nien mwukla liki engu, a sie me loeyuk liki paka, oanu infwal in kof in sie an pao, oanu lulin sie eot lulap in fwal in totola.” (Isaia 32:1, 2) Aok, elos enenu in liaung, in sang mongle, a akpwarye sip. Ke ma inge, met elder nu kemwa su pakoten in liaung un sip elos enenu in kaifweung in moul fwal nu ke ma God el siyuk selos.
3 Kain in met elder inge Baibel el pangnolos “me sang nu sin metu.” (Efesus 4:8) Kom fwin nunku ke sie me sang, kom nunku ke sie ma su akfwalye me enenu ku ke sie me sang su akinsemwomwoye met su eis ma inge. Sie met elder ku in pangpang sie me sang el fwin orekmakin ku lal in sang kasru el su oasr enenu la a in sang kasru ke me insemwomwo lun sip. Fuka el ku in oru ou inge? Top ke ma se inge ku in konoiyukyuk ke kas lal Poul in Efesus 4:7-16, su akkalemye lungkulang lun Jeova nu sin sip nutul.
“Me Sang Nu Sin Metu”—Tuku Ya Me?
4 Ke pal se ma Poul el orekmakin kas inge “me sang nu sin metu,” el fwak kas lal Togusra Devid, su fwakak kel Jeova: “Kom fwanyuk nu lung; kom kol met tu in met kos; kom eis me sang sin met.” (Sam 68:18) Tokin met Israel elos muta ke Fwal in Mwolela ke lusen kutu yiu, in kas pupulyuk fwak Jeova el “fwanyuk” nu fwin Eol Saion a orala Jerusalem in pa capital lun togusrai lun Israel ye koko lal Devid oanu sie togusra nu ka. Tusruktu, su “me sang sin met”? Elos inge pa met su ekla met kos lalos ke lusen pal in meun lalos fwin an we. Tok kutu sin met kos inge etukyung nu sin met Livai in sang kasru nu ke orekma lun loom alu.—Ezra 8:20.
5 Ke leta lal nu sin met Efesus, Poul el akkalemye la oasr akpayeye lulap lun kas lun met on ke congregation lun met Kristian. Ke pal se ma el sramsramkin ke Sam 68:18, Poul el simusla: “A nu sin kais sie sesr etuku tari kulang fwal nu ke lupan me sang lun Kraist. Ke ma inge el fwak: ‘Ke el somwak nu lung el akkosye me kos; a sang me sang nu sin metu.’ ” (Efesus 4:7, 8) Kas inge in Sam Poul el orekmakin Jisus oanu met tutafpo lun God. Jisus el “kutangla fwalu” ke inkanek sumwosmwos lal. (Jon 16:33) El ouyepa kutangla mise a Setan ke sripen God el akmoulyelak liki mise. (Orekma 2:24; Hibru 2:14) In yiu 33 C.E., Jisus el sifwil moulyuk a el somwak “fulat liki ma in kosrao”—fulat liki ma orekla nu kemwa in kosrao. (Efesus 4:9, 10; Filippai 2:9-11) Oanu sie met su eis kutangla, Jisus el eis “met kos” ke met lokwalok lal. Fuka oreye?
6 Ke pal se el muta fwin fwalu, Jisus el akkalemye ku lal lukel Setan ke pal se ma el aksukosokyelos su met kos lun Demon. Ou inge lumeyuk oanu Jisus el kutangla loom sel Setan a kapriyel, a wapi ma lal. (Mattu 12:22-29) Nunku, tokin el sifwil moulyuk a etukyung nu sel ‘ku nu kemwa in kosrao a fwalu,’ kain in wapi fuka Jisus el oru! (Mattu 28:18) Mutamwauk ke Pentecost 33 C.E., Jisus su somwak nu lung, oanu met tutafpo lun God, el mutamwauk in eisla ma lal Setan in loom sel ke pal se ma ‘el wis met kos’—met su muta ye koko lun ma koluk a mise a muta ye koko lun Setan ke lusen yiu puspis. “Met kos” inge elos insemwomwo in ekla “met kulansap lal Kraist, in oru lungse lun God ke insielos.” (Efesus 6:6) Ke ma inge, Jisus, el aksukosokyelos liki ku lal Setan a, ke sripel Jeova, el sang met inge nu ke congregation oanu “me sang nu sin metu.” Nunku ke koskosrok lun Setan meyen wangin ma el ku in oru a met inge nu kemwa etukla liki ye mutal!
7 Ya kut ku in konaok “me sang nu sin metu” inge ke congregation in len lasr? Aok, kut ku! Kut ku in konalosyuk la elos orekma oanu met elder, elos oru orekma yok oanu ‘met sulkakin mwosasu, met sropu, a met luti’ ke congregation lun met lun God fwin fwalu nu fon su oasr ke 87,000 kutu. (Efesus 4:11) Setan el arulanu lungse met elder inge in oru orekma silolel nu ke sip. Tusruktu tia pa inge sripe su paenang God kel Kraist el oakiye met inge nu ke congregation. A, Jeova oakiye met inge in kurungin congregation, a elos inge fwa tu ye mutul ke sripen el oakiye nu selos kunokon in kurunganang un sip lal. (Hibru 13:17) Kom fwin orekma oanu sie met elder, Jeova el sot nu sum sie pal mwo in akpayeye la kom eis sie me sang, ku me insemwomwo nu sin met lili wiom. Kom ku in oru ou inge ke pal se kom akpayeye kunokon saok akosr lom.
Fwin Oasr Sie Ma Enenu in “Aksumwosyeyuk”
8 Ma se meet pa, “me sang nu sin metu” etukyung “tu in aksumwosyeyuk met mwo,” Poul el fwak. (Efesus 4:12) In kas Greek orekmakinyuk kas se inge “aksumwosye” fwal nu ke ma se su eneneyuk nu “ke inkanek sumwos.” In oanu ke met nu kemwa sesumwos, paenang kut nu kemwa enenu in aksumwosyeyuk ke kais kutu pal—in orala nunuk lasr, oiyesr, ku orekma nu kemwa lasr ke “inkanek sumwos” fwal nu ke nunuk a ma lungse lun God. Jeova el ase nu sesr ke sripen lungse lal “me sang nu sin metu” in kasru kut in aksumwosye ma eneneyuk. Fuka oreye selos ma inge?
9 Oasr kutu pal, sie met elder el ku in pangonyuk in sang kasru nu sin sie met su tafongla, saap el ‘tafongla in kutu oiye meet liki el akilenak ma inge.’ Fuka met elder se el ku in kasru? “Aksumwosye el su ou inge in ngun lun fwokpap,” Galetia 6:1 el fwak. Ke ma inge, fwin pal in kai orek, met elder enenu in tia mulat nu sin met tafongla, ku orekmakin kas upa. Kai enenu in me akkeye, a tia “me aksangeng,” nu sin met su eis me kai inge. (2 Korint 10:9; srike liye Job 33:7.) Saap met se su tafongla el mwekinla tari, ke ma inge met seperd se su moulkin lungse fwa tia srike in akngalye ngunin pulakin lun met inge. Pal in kai, ku fwinne kai upa, enenu in orek a akkalemyeyuk ke inkanek lun lungse, na kai fwa ku in aksumwosye nunuk ku oiye lun sie met su tafongla, ke ma inge el fwa ku in aksumwosyeyukla.—2 Timote 4:2.
10 Ke oasr yurosr “me sang nu sin metu” in aksumwosye kut, Jeova el etula la met elder nu kemwa elos sang mongle in ngun a in me srikasrsak nu sin met lal. (1 Korint 16:17, 18; Filippai 3:17) Tia fwal in aksumwosyelos su oru ma tafongla mukena, a in sang pa kasru nu selos su srakna sroukye lalalfongi lalos in kaifweung nu ke inkanek sumwos su elos oasr ka.a In len inge, oasr ma upa puspis su kol nu ke me asor yok, met puspis enenu kas in akkeyelos in tia munasla. Oasr kutu met enenu kasru in sang aksumwosyela nunuk lalos in fwal nu ke lungse lun God. Fwin pupulyukiyuk e ou inge, oasr kutu met Kristian su oaru a elos kaifweung in kutangla kain nunuk puspis lalos la elos sufwal ku tia ku in oru ma puspis. Kain in “inse munas” inge saap sikyuk ke elos pulakin mu Jeova el e fwa tia ku in egunkin orekma lalos ke kutena pal a kaifweung paye lalos in kulansapu God tia ku in akinsemwomwoyel. (1 Tessalonika 5:14) Tusruktu, kain in nunuk inge tia fwal nu ke pula lun God nu sin met kulansap lal.
11 Met elder, mea kom enenu in oru in sang kasru kain in met inge? Akkalemye kulang nu selos wikin me akpayeye in Baibel la Jeova el nunku yok ke kais sie met kulansap lal a aketeye pa nu selos la fus in Baibel inge fwal nu selos na paye. (Luk 12:6, 7, 24) Kasrelos in kalem ka la Jeova el esalos tari in kulansapul, ke ma inge el etu na paye la oasr ma saok yurolos (Jon 6:44) Akkalemye nu selos la tia elos mukena pulakin ou inge—Oasr met kulansap oaru puspis lun Jeova pulakin pa ou inge. Oasr sie pal, met palu Elaija el arulanu asor yok paenang el lungse elan mise. (1 Togusra 19:1-4) Kutu sin met Kristian akmusrala ke century se meet elos pulakin insielos ke ma ‘akkolukyelos’ sifwanu. (1 Jon 3:20) Oasr me akengun su fwal in eteyuk la met kulansap oaru puspis in Baibel oasr pa pulakin lalos “oupanu kut.” (Jemes 5:17) Kom ku pa in wi kalweni me akkeye na mwomwo puspis ke Tauer In San a Awake! nu sin met asor. Lungse a kaifweung lom in sifwil akkeye lalalfongi lun kain in met inge fwa tia ku in pilesreyuk sin God su oru kom in oanu “me sang nu sin metu.”—Hibru 6:10.
“Musaiyuk” Un Sip
12 Ma se akluo, “me sang nu sin metu” etukyung nu sin met in “musaiyuk monin Kraist.” (Efesus 4:12) Ke fus inge Poul el orekmakin sie me pupulyuk. Pa ke kas se inge “musaiyuk” su akismakinye kut ke sie akmwuk lun musa, a “monin Kraist” inge el lumeyuk nu ke met—met nu kemwa su wi ke congregation lun met Kristian akmusrala. (1 Korint 12:27; Efesus 5:23, 29, 30) Met elder nu kemwa enenu in kasru met lili wielos in kapek kui ke ma lun ngun. Nien sun lalos pa in ‘musaiyuk a tia akmunasye’ un sip. (2 Korint 10:8) Key nu ke musaiyuk un sip pa lungse, meyen “lungse pa me musai.”—1 Korint 8:1.
13 Sie ipen lungse su ku in kasru met elder in musaiyuk un sip pa ke ma elos pulakin oanu ma kutu met elos pula. Tu in ou inge, met se enenu in nunku ke kutu met—elos enenu in akilen oanu ma elos nunku a pula, a in nunku ke ku a munas lalos. (1 Piter 3:8) Efu ku arulanu yok sripe nu sin met elder in oasr yuro kain in oiye inge? Yok liki nu kemwa meyen Jeova—el ase “me sang nu sin metu”—el sie God su akkalemye kain in oiye se inge. Ke pal se met kulansap lal keok a ngal, el pulakin oupanu elos. (Exodus 3:7; Isaia 63:9) El nunku yok ke ku a munas lalos. (Sam 103:14) Ke ma inge, fuka met elder elos ku in akkalemye kain in pakoten inge?
14 Ke pal sie met toasr el tuku nu yurolos, elos porongo, elos tuni pulakin lun met inge. Elos kaifweung in suk ke ma sikyuk na paye, oiye, luma a ma sikyuk nu sin met lili wielos. Tokin ma inge, met elder elos sang kas in akkeye ke ma lun ngun su tuku ke Ma Simusla, na e fwa arulanu fwusesr nu sin met in eis ma inge meyen ma inge tuku sin met seperd su kalem na paye ke ma sikyuk nu selos. (Soakas 16:23) Oiye in oanu pulakin ma kutu met elos pula ku in ouyepa mokle met elder in nunku yok ke lupan ku a munas lun met se a ke pulakin lal. Ke sie me pupulyuk, oasr sie met Kristian su nunku yok ke kunokon lal su el pulakin asor ka ke sripen el tia ku in oru orekma yok ke kulansap lal nu sin God, saap meyen el matuo ku munas in mano. Nu sin kutu met, saap elos enenu kas in akkeye in sang akkapye orekma lun forfor lalos. (Hibru 5:12; 6:1) Oiye in oanu pulakin ma kutu met elos pula ku in mokle met elder in suk “kas mwo” su ku in musaiyuk kutu met. (Ekklisiastis 12:10) Ke pal se met lun Jeova elos akkeyeyuk a mokleyuk, na lungse lalos nu sin God fwal in moklelos in oru ma nu kemwa elos in mu in kulansap nu sel!
Met Su Orani Inse Siefwunnu
15 Ma se aktulo pa, “me sang nu sin metu” etuku nu sesr “tu kut nu kemwa in sun lalalfongi siefwunnu, a etu ke Mwen nutin God.” (Efesus 4:13) Kas se inge “lalalfongi siefwunnu” kalmekinyuk nu ke ma siefwunnu tia ke ma kut lalalalfongi mukena a ouyepa inmaslon met lalalfongi. Ke ma inge, fwal in oasr siepa sripe su paenang God el oakiye “me sang nu sin metu”—in akkeye orani inse siefwunnu inmaslon met lal. Fuka elos oru ou inge?
16 In sramteak mwo, elos enenu meet in srukye inse siefwunnu inmaslolos. Fwin met sropu elos kitakatelik, na sip elos ku in sun me keok ke sripen wangin kurunginelos pal saok su orekmakin nu ke muteta yurin un sip puspis saap orekmakinyukla nu ke meeting puspis su wangin sripe a nu sramsram losrongten ke ma na srisrik. (1 Timote 2:8) Kais sie met elder tia ku in insese ke ma nu kemwa su elos sramsramkin, meyen oasr kain in oiye puspis lalos su tia oanu sie. Inse siefwunnu tia kalme pa wangin sukosok lalos fwin oasr kain in nunuk puspis lalos ku fwin elos akkalemye ma elos nunku ke inkanek sumwos lalos ke pal in meeting su oasr sukosok lun kais sie in fwak ma elos nunku. Met elder nu kemwa elos srukye inse siefwunnu lalos ke pal se ma elos akfulatye in porongo sie sin sie a tia suk in oru nununku lalos meet liki pal in sramsram inmaslolos. A fwin wangin ma sap lun Baibel kunausyukla, kais sie selos insemwomwo in patok a akkeye sulela safla lun un met elder. Sie oiyen ngun in fulela akkalemye la elos nu kemwa muta ye koko “lalmetmet lung me,” su “misla, fwusesr in siyukyuk.”—Jemes 3:17, 18.
17 Met elder elos ouyepa akola in akkeye inse siefwunnu lun congregation. Fwin oasr me purakak in oasr srisri—oanu lisrek, pa sie inkanek in purakak nunuk koluk, ku lungse suk inkanek in akukuin—akkolukye misla, in pal ou inge nu kemwa, na elos akola in sang kasru ke inkanek lun kai. (Filippai 2:2, 3) Ke sie me pupulyuk, saap met elder elos etu ke sie met su lungse in suk ma tafongla lun sie met ku sie met su lungse in tuntun a utuk in masrol, a lisreki met. (1 Timote 5:13; 1 Piter 4:15) Met elder elos srike in sang kasru nu sin kain in met inge in ku in akilen la inkanek inge tia fwal nu ke luti lun God nu sesr a kais sie met enenu in “sifwanu wis me toasr lal.” (Galetia 6:5, 7; 1 Tessalonika 4:9-12) Orekmakin Ma Simusla, met elder elos aketeye la Jeova el filiye ma puspis nu sesr in oru sulela lasr fwal nu ke ella lasr sifwanu, a fwa wangin kutena met inmaslosr ku in oru nununku nu sin kutena met ke oiye inge. (Mattu 7:1, 2; Jemes 4:10-12) In kulansap ke inse siefwunnu, enenu in oasr lalalfongi a sunak in congregation. Ke inkanek in orekmakin kai su tuku ke Ma Simusla fwin eneneyuk, “me sang nu sin metu” inge elos kasre kut in srukye misla a inse siefwunnu.—Rom 14:19.
Kurunganang Un Sip
18 Ma se akakosr, Jeova el wise “me sang nu sin metu” in kurungin kut liki “mokuikui lun eng in lutlut nu kemwa, ke sruf lun met, in kutusrik, kolla nu ke me kikiap lun ma koluk.” (Efesus 4:14) Kas Greek na paye su orekmakinyuk nu ke “kutasrik” ku in kalmekinyuk nu ke “orekma kutusrik ke dice” ku “usrnguk in orek kutusrik ke dice.” Ya ma inge tia akismakinye kut in liksreni tuni lupan sumat lun met luti kikiap inge in oru orekma lalos? Ke inkanek lun me sramsram su naweyukla mwo, elos orekmakin Ma Simusla ke inkanek kutasrik in keapela met Kristian in som liki lalalfongi lalos. Met elder nu kemwa elos enenu in loang akmwoye nu ke kain in met inge su oanu “kosro wolf silolel”!—Orekma 20:29, 30.
19 Un sip lun Jeova enenu in kurunginyuk liki kutupa me sensen. Met seperd Devid in pal meeta el arulanu pulaik in kurunganang sip lun papa tumal liki kosro lemnak su lungse in uniye sip nutul. (1 Samuel 17:34-36) Ouyepa, ke len inge, oasr kutupal met Kristian seperd elos enenu in akkalemye pulaik lalos in kurunganang sip liki kutena met su lungse in oru ma koluk ku akkeokye un sip lun Jeova, yokna nu selos su munas. Met elder nu kemwa fwa sa akola in sisla liki congregation kutena met koluk su srunga in auliyuk a oru na orekma kulok ke lungse lalos na paye, a orekmakin kutasrik in oru ma koluk upa.b—1 Korint 5:9-13; srike liye Sam 101:7.
20 Arulanu yok kulo lasr na paye nu ke “me sang nu sin metu”! Ke inkanek in kurungin mwo lalos, kut ku in inse misla, meyen elos aksumwosye kut ke inkanek kulang, ke lungse elos musaiyuk kais sie sesr, elos akola in kurunganang inse siefwunnu lasr, a elos pulaik in kurungin kut. Tusruktu nunuk fuka “me sang nu sin metu” enenu in akkalemyeyuk ke orekma lalos in congregation? A fuka kut ku in akkalemye la kut insemwomwo kalos? Kusensiyuk inge e fwa sramsramkinyuk ke me lutlut toko.
[Footnotes]
a Ke Greek Septuagint version, kas se inge “aksumwos” orekmakinyuk in Sam 17[16]:5, su Devid met kulansap oaru el pre ka in mu orala inkanek in fwasr lal in sumwos nu ke inkanek lun Jeova.
b Ke sie me pupulyuk, srike liye “Kusensiyuk Su Tuku Sin Met Rid” ke November 15, 1979, issue lun The Watchtower, sra 31-2, a “Lela Kut In Srunga Ma Koluk” ke January 1, 1997, issue, sra 26-9.
Ya Kom Esam?
◻ Su “me sang nu sin metu,” a efu God ke inkanek lal Kraist el sang met inge in congregation?
◻ Fuka met elder elos akpayeye kunokon lalos in aksumwosye sip?
◻ Mea met elder elos ku in oru in musaiyuk met lili wielos in lalalfongi?
◻ Fuka met elder elos ku in oru inse siefwunnu in congregation in ona?
[Study Questions]
1. Mea sister Kristian se el fwak ke met elder in congregation lal?
2, 3. (a) Fwal nu ke Isaia 32:1, 2, fuka met elder kulang elos kurunganang un sip lun Jeova? (b) Nge met elder elos fwal in nunkeyuk oanu sie me sang?
4. In akpayeye ke ma simusla in Sam 68:18, inkanek fuka Jeova el ‘somwak nu lung,’ a su “me sang inge nu sin metu”?
5. (a) Fuka Poul el akkalemye la oasr akpayeye lun Sam 68:18 ke congregation lun met Kristian? (b) Ke inkanek fuka Jisus el ‘somwak nu lung’?
6. Mutamwauk ke Pentecost 33 C.E., fuka Jisus su somwak nu lung el mutamwauk in akkolukye loom sin Setan, a mea el oru nu sin “met kos”?
7. (a) Kain in orekma fuka “me sang nu sin metu” elos kulansapu in congregation? (b) Kain in pal mwo fuka Jeova el sang nu sin kais sie met su kulansap oanu sie met elder?
8. Ke kain in inkanek mwo puspis fuka kut nu kemwa enenu in aksumwosyeyuk nu ka ke kutu pal?
9. Fuka sie met elder el ku in kasru aksumwoye sie sip su oru ma koluk?
10. Mea kutu luma eneneyuk nu ke aksumwosyeyuk lun kutu met?
11. Mea met elder enenu in oru in sang kasrelos su pulakin mu elos sufwal a wangin ma elos ku in oru?
12. Mea kalmen kas se inge “in musaiyuk monin Kraist,” a mea key in musaiyuk sip?
13. Mea kalmen pulakin ma kutu met elos pula, a efu arulanu yok sripe nu sin met elder in pulakin kain in oiye se inge?
14. Ke inkanek puspis fuka met elder elos ku in akkalemye la elos pulakin ma kutu met elos pula?
15. Mea kas se inge “inse siefwunnu in lalalfongi” lungse in akkalemye”?
16. Efu arulanu yok sripe nu sin met elder in srukye inse siefwunnu insmaslolos?
17. Fuka met elder elos ku in kasru in oasr inse siefwunnu in congregation pal nu kemwa?
18, 19. (a) “Mea me sang nu sin metu” el kurungin kut ka? (b) Ke kutupa me sensen fuka sip nu kemwa elos enenu in oasr me liaung, a fuka met elder elos orekma in kurunganang sip?
20. Efu kut ku in pulakin inse misla ye kurunginyuk lun “me sang nu sin metu”?
[Picture on page 10]
In pulakin ma kutu met elos pula ku in kasru met elder in akkeyelos su asor
[Picture on page 10]
Inse siefwunnu inmaslon met elder purakak inse siefwunnu in congregation