Fuka Kom Ku in Akkalemye Inse Pusisel Na Paye?
INSE pusisel na paye arulanu yok sripe ye mutun God. Jemes el simusla: “God el lainelos su fulang, a el esung lung nu selos su fwolpap.” (Jemes 4:6) Ke fus inge Jemes el srukak kas puspis su akkalemyeyuk ke Ma Simusla lun Hibru. “Tu Jeova el fwinne fulat, a el liye met inse pusisel; a met fulang el etu yen loesla me.” “Nget fulat lun metu fwa akpusisilyeyuk, a fwulang lun met fwa sumwoli’ a Jeova mukena fwa akfulatyeyuk in len sa.” “Paye el [God] aksruksruke met aksruksruk; a el sang kulang nu sin met fwokpap.”—Sam 138:6; Isaia 2:11; Soakas 3:34.
Met sap Piter el ouyepa kaifwe nu sesr in akkalemye inse pusisel. El simusla: “Komwos nu kemwa in loseni kapinsiomwos ke fwulpap, in kulansap sie sin sie, tu God el sinukin met su fulang, a el sang lungkulang nu sin met fwokpap.”—1 Piter 5:5.
Me Srikasrak lal Kraist ke Inse Pusisel
Saap kom ku in siyuk, kain in ma lane fuka ku in tuku ke inse pusisel? Nu sin sie met su kaifweung in ekla met Kristian topuk ke kusensiyuk inge pa yok emeet—meyen fwin sie met el lungse in oanu Kraist el enenu in fwokpap. Jisus el akkalemye fwokpap lal ke pal se el eis kunokon lal in tuku nu fwalu in ekla sie met su pusisel liki lipufon, el fwinne muta meet in kosrao. (Hibru 2:7) El fwinne Mwen nutin God, el mongfwusesr ke me mwekin lulap su met lokwalok lal ke alu elos oru nu sel. El srukye inse misla ke pal se el muta ye mutaltal in nununkel, el fwinne ku in siyuk legion puspis lun lipufon in kasrel.—Mattu 26:53.
Ke saflaiye, elos srupusrak el oanu sie me srungeyuk ke sak soko, fwinne ou inge, el muta na oaru sin Papa tumal. Ke ma inge Poul el ku in sim leta kel: “Nunuk se inge on in komwos, su ouyepa on in Kraist Jisus, su ke el muta in luman God, tia nunku tu ma lal oanu God sie ma in sukok, a el sifwanu akpusiselyel, a nukomang luman sie met kulansap, tu el orekla in luman met. A ke konoiyukyuk el oanu sie met, el sifwanu akpusiselyel, a el akos nu ke mise, aok, mise lun sak soko.”—Filippai 2:5-8.
Ke ma inge fuka kut ku in akkalemye inse pusisel na paye? Ke kutu luma a ma sikyuk, fuka kut ku in topuk ke inse pusisel a tia ke inse fulat?
Fuka Sie Met Inse Pusisel El Topuk
Lela kut in tuni inse pusisel ke sie luma, ke nien orekma ku ke orekma lun met Kristian. In aksafyela sie orekma saap oasr enenu ke met liaung, manager, a supervisor. Sie met el enenu in oru sulela. Oiye fuka kom akkalemye? Ya kom fwak, “Mea sumwos lal in fwakak nu sik ma Nga enenu in oru? Nga muta ke orekma se inge yiu puspis loes liki pal in muta lal.” Aok, kom fwin inse fulat, kom tia pwar ye koko lun kutu met. Ke inkanek saye, sie met inse pusisel el kaifweung in “tia oru kutena ma ke akukuin ku ke kunkun losrongten, a ke inse pusisel lela kais sie in nunku tu elos ngia mwo lukel.”—Filippai 2:3.
Oiye fuka kom akkalemye fwin sie kas in kaifwe nu sum el tuku sin met fwusr ku sie mutan? Kom fwin inse pusisel, kom akola in tuni ma inge. Kom fwin inse fulat, kom mulat ke kas in kaifwe lalos inge ku kom sa na in akkalemye srunga lom nu ka. Ya kom lungse in sulela kas in kaksak a kas in akkeye su ku in kol kom nu ke ongoiye ku sie kas in kai mwo su ku in akkeye kom piye ka?—Soakas 27:9; 29:5.
Ya kom ku in muteng nu ke ma kom tia lungse? Inse pusisel el kasru kom in osun nu ke ma upa a in muteng, oanu Job el oru meet. Kom fwin inse fulat, kom fwusesr in pulakin asor a saap kom koskosrok ke kutena ma upa yok su sikyuk a fwinne ke ma srisrik.—Job 1:22; 2:10; 27:2-5.
Inse Pusisel El Sie Inkanek in Akkalemye Lungse a Akola in Sang Nunuk Munas
Kutu sin met elos arulanu upa in fwak, “Sisla koluk. Nga tafongla. Paye ma kom fwak.” Efu elos ou inge? Inse fulat upa! Aok, pal nu kemwa sie sisla koluk paye ku in fwusesr in aksafyela mulat inmaslon seanyen payuk.
Ya kom akola in sang nunuk munas fwin sie met el oru ma koluk nu sum? Ku, ke sripen inse fulat lom, kom srukye mulat ke insiom, saap kom oru ou inge ke lusen len puspis a malem puspis, a kom srunga in sramsram nu sin met su oru ma koluk nu sum? Ya kom akola in suk foloksak tu kom in oru nu sel ma el oru nu sum? Met puspis elos anwuki ke sripen foloksak. Nu sin kutu met, akmwuk lalos pa in kunausla enen met. Sie met inse pusisel el tia ou inge, a el akkalemye lungse a akola in sang nunuk munas. Efu? El tia oekla ma koluk. Jeova el engun in sang nunuk munas nu sin met Israel elos fwin sisla inse fulat lalos. Met tumal lutlut fwokpap lal Jisus elos akola in sang nunuk munas, fwinne pal puspis!—Joel 2:12-14; Mattu 18:21, 22; 1 Korint 13:5.
Sie met inse pusisel el ‘kol in akfulatye sie sin sie.’ (Rom 12:10) Ke New International Version kut ku in ridi: “Akfulatye sie sin sie a nunku tu elos fulat liki kom.” Ya kon kaksakin kutu met a akkalemye insemwomwo ke ku a lalmetmet lalos? Ku kom suk ma tafongla pal nu kemwa in akkolukye elos? Aok, ya kom ku in akfulatye na paye kutu met? Fwin oasr ma upa lom in oru ou inge, saap sensen a inse fulat pa oasr yurom.
Sie met inse fulat el tia mongfwusesr. Sie met inse pusisel el muteng a mongfwusesr. A fuka kom? Ya kom sa in pulakin ngal ke kutena luma a ma sikyuk koluk? Kain in oiye se inge siena liki mongfwusesr. Kom fwin sie met inse pusisel, kom tia nunku moul lom alukela ma fwal. Esam ke pal se ma met tumal lutlut lal Jisus elos nunku yok ke moul lalos sifwanu—elos sremla ke akukuin lulap ke su fulat emeet inmaslolosr. Elos mulkunla la elos nu kemwa “met kulansap su wangin sripe”!—Luk 17:10; 22:24; Mark 10:35-37, 41.
Met sim French pangpang Voltaire el aketeye la inse pusisel el oanu “kulang lun mano . . . sie ono lain inse fulat.” Aok, inse pusisel el fwokpap lun nunuk. Sie met inse pusisel el fwokpap in ngun, tia konkun. El lungse in akfulatye a sunakin kutu met.
Ke ma inge, efu kut enenu in kaifweung in akkalemye inse pusisel? Meyen God el insemwomwo nu sin met inse pusisel a el ouyepa kasru kut in eis kolyuk mutal. Ke sripen inse pusisel lal Daniel, Jeova el nunku la met palu se inge el “arulanu kulu” sel paenang el supwela lipufon nu sel in wis sie arurumu! (Daniel 9:23; 10:11, 19) Inse pusisel el wise me insemwomwo puspis. El wise kamwuk na paye su lungse kom. Yok liki ma inge, el wise me insemwomwo lun Jeova. “Molin fwokpap a sangeng sin Jeova, me kasrup, a sunak, a moul.”—Soakas 22:4.
[Picture on page 7]
Sie nunuk munas ke kas fwokpap el ku in akmwoye moul