Kolak Po Oaru In Pre
“Nga lungse tu met elos in pre yen nu kemwa, in kolak po mutal, a wangin mulat ku akukuin.”—1 TIMOTE 2:8.
JEOVA el lungse met kulansap lal in oaru nu sel a nu sin sie sin sie. Met sap Poul el kapsreni oaru ke pre ke pal se el simusla: “Nga lungse tu met elos in pre yen nu kemwa, in kolak po, a wangin mulat ku akukuin.” (1 Timote 2:8) Kalem la, Poul el sramsram ke pre ye mutun metu, “yen nu kemwa” met Kristian elos tukeni nu sie. Su ku in aoliyen met lun God ke pal in pre ke toeni lun met Kristian? Elos mukena su mutal, sumwos, mokul su sangeng sin God a arulanu liaung kunokon su tuku ke Ma Simusla ye mutun God. (Ekklisiastis 12:13, 14) Elos enenu in nasnas in ikwe a ngun a el mwolela na paye moul lal nu sin Jeova God.
2 Yokna nu sin met elder lun congregation elos fwin ‘kolak po mutal lalos ke pre.’ Pre lalos su tuku ke insielos ke inkanek lal Kraist akkalemye oaru nu sin God a ma inge kasrelos in fwasr liki ‘mulat a akukuin.’ Ke ma paye, kutena mokul su oasr pal mwo in aoliyen Congregation lun met Kristian ye mutun metu ke pre enenu in sukosok liki mulat, fwal, tia suoaru nu sin Jeova a ke u lal. (Jemes 1:19, 20) Mea pa kutu akmwuk lun Baibel su eneneyuk nu selos su oasr pal mwo in aoliyen kutu met ke pre ye mutun metu? A mea kutu akmwuk ke Ma Simusla su kut nu kemwa enenu in orekmakin ke pre lasr sifwanu a ke pre lun sou?
Nunku Meet ke Ma Kom Akola in Pre
3 Fwin kutu met elos siyuk sesr in pre ye mutun metu, wangin alollo kut akola a nunku ke pre lasr ke pal sa. Meyen kut etu la kut fwin oru ou inge, ma inge ku in kasru kut in srukak ke pre lasr ma saok puspis fwinne kut tia kaskas pal loes ku orekmakin kas pukanten. Paye, pre lasr fwinne kut mukena ku in ouyepa oasr pusra. El ku in loes ku futoto. Jisus el orekmakin fong fon se ke pre meet liki el sulela met sap 12 lal. Tusruktu, ke pal se ma el oakiye Memorial ke mise lal, pre lal ke bred a wain tianu arle loes. (Mark 14:22-24; Luk 6:12-16) A kut etu la fwinne futoto pre lal Jisus ma inge akinsemwomwoye God.
4 Ke sie me pupulyuk oasr pal mwo lasr in aoliyen sie sou ke pre meet liki pal in mongo. Kain in pre inge tianu loes—tusruktu koanon pre inge pa kas in sang kulo ke mongo. Kut fwin pre ye mutun met meet liki ku tokin meeting lun met Kristian, kut tia enenu in orala sie pre loeloes su sramsramkin ma puspis. Jisus el selngawi met sim su lungse in ‘pre loes tu in orek luma.’ (Luk 20:46, 47) Sie met su futoto nu sin God el tia lungse in oru ou inge ke kutena pal. Tusruktu, kutupal, sie pre loes ye mutun metu saap fwal. Ke sie me pupulyuk, sie elder su pakiyuki in aksafyela sie assembly ke pre, el enenu in nunku meet ke ma el akola in fwak a saap el ku sramsramkin kutu kas fulat. Tusruktu, kain in pre inge tia enenu pa in loes alukela ma fwal.
Osun nu Sin God ke Sunak
5 Ke pal se ma kut pre ye mutun metu kut enenu in esam la kut tia sramsram nu sin met su oanu kut. A, kut sramsram oanu ma orekla sesumwos nu sin Leum Ku Liki Ku Jeova. (Sam 8:3-5, 9; 73:28) Ke ma inge kut enenu in akkalemye sunak wikin sangeng in aksapwaryel ke ma kut fwak a fuka kut fwak ma inge. (Soakas 1:7) Met sim lun Sam pangpang Devid el on: “A fono keik, in pusien lungkulang lom Nga fwa utyuk nu in loom sum, in sangeng sum Nga fwa alu ye mutun tempel mutal sum. (Sam 5:7) Kut fwin srukye kain in oiye se inge, fuka kut kaskas ke pre fwin elos siyuk kut in aol ke pre ye mutun met puspis ke pal in meeting lun Met Lo lun Jeova? Aok, kut fwin sramsram nu sin sie togusra fwin fwalu, kut akola in oru ou inge ke sunak a akfulat. Fwin ou inge, na pre lasr enenu in oasr sunak a akfulat su yok liki nu kemwa, meyen kut sramsram nu sin Jeova, “Togusra ma patpat.” (Fwakyuk 15:3) Ke ma inge, kut fwin pre, kut fwasr liki kain in kas oanu, “Tu mwo Jeova,” “Kut supwela nu sum lungse lasr,” ku “Fwasr.” Ma Simusla el akkalemye la Mwen siefwunnu isusla nutin God, Jisus Kraist, el tia oru kain in kas inge nu sin Papa tumal in kosrao ke kutena pal.
6 Poul el fwak: “Lela kut . . . in kalukyung ke sukosok in kaskas nu ke tron lun kulang.” (Hibru 4:16, New World Translation) Kut ku in osun ke “sukosok in kaskas” nu sin Jeova fwinne kut met sesumwos ke sripen lalalfongi lasr ke me kise lal Jisus Kraist. (Orekma 10:42, 43; 20:20, 21) Aok, kain in “sukosok in kaskas” inge tia akkalemye la kut sramsram nu sin God ke kain in inkanek nu kemwa, ku kut sramsram nu sel ke wangin sunak. Kut fwin lungse pre lasr ye mutun met in akinsemwomwoye Jeova, kut enenu in oru ou inge ke sunak a akfulat, a arulanu sufwal in orekmakin pre in orala me fwakak, in kai kutu met, ku sramsram nu sin met su long ke pal in pre.
Pre ke Sie Inse Pusisel
7 Fwinne kut pre ye mutun metu ku fwinne kut mukena pre, akmwuk saok su tuku ke Ma Simusla su kut enenu in esam pa, kut enenu in akkalemye inse pusisel ke pre lasr. (2 Kronikel 7:13, 14) Togusra Solomon el akkalemye inse pusisel ke pre lal ye mutun metu ke pal in kise ke tempel fwin an Jerusalem. Solomon el aksafyela sie loom su mwolanu liki kutena loom su musaiyuk fwin fwalu. Tusruktu, el inse pusisel in pre: “Ya paye God el a fwa muta fwin fwalu? Liye! Kosrao a kosrao lun kosraou koflanu fwal nu sum; fuka lupan srik loom se inge, su Nga musaela nu sum!”—1 Togusra 8:27.
8 Oanu Solomon, kut enenu in akkalemye inse pusisel kut fwin aoliyen kutu met ke pre ye mutun metu. Fwinne kut tia enenu in orekmakin kain in kas su akkalemye la kut arulanu mutal, tusruktu, inse pusisel ku in akkalemyeyuk ke pusra lasr. Pre ke inse pusisel tia orekmakin pusra lulap alukela ma fwal, ku sie kain in kas mulala alukela ma fwal. Pre enenu in purakak nunuk lun met sin God a tia nu sin met su kol ke pre. (Mattu 6:5) Inse pusisel ku in ouyepa akkalemyeyuk ke inkanek lun kas su kut orekmakin ke pre. Kut fwin pre ke inse pusisel, pusra su kut orekmakin tia oanu kut siyuk nu sin God ke ku tu lan oru ma se fwal nu ke inkanek lasr. A, kut akola in siyuk sin Jeova in oru ma se fwal nu ke inkanek mutal lal. Met sim lun Sam el akkalemye oiye fwal ke pal se ma el siyuk: “Langokutla inge, kut siyuk sum, O Jeova, nunuk munas! O Jeova, kut siyuk sum, supamu kapkapek inge, nunuk munas!”—Sam 118:25; Luk 18:9-14, NW.
Pre ke Insiom
9 Kut fwin lungse pre lasr ye mutun metu a pre lasr sifwanu in akinsemwomwoye Jeova, ma inge enenu in tuku ke insiesr. Ke ma inge, kut tia kalweni na sie pre pal nu kemwa a tia nunku ma kut fwak. Ke Sramsram lal Fwin Eol, Jisus el sang kai: “A ke komwos pre, nik komwos kalweni na kas pal nu kemwa, oanu met Pegan elos oru, tu elos [tafongla] in nunku mu elos fwa longyuk ke kas puspis lalos.” Ke kutu kas, Jisus el fwak: “Nik komwos kalweni kas; nik komwos fwak a kalweni kas su wangin sripe.”—Mattu 6:7; footnote.
10 Paye, saap kut enenu in pre a siyuk ke ma se pal puspis. Tia sito pa inge meyen Jisus el kaifwe: “Siyuk a a fwa etukot nu sumwos; suk, a komwos fwa konoiyuk; tomwolak, a a fwa ikasla nu sumwos.” (Mattu 7:7) Saap oasr enenu ke sie Kingdom Hall sasu meyen Jeova el akkapye orekma in luti ke an sum. (Isaia 60:22) Arulanu fwal in tafwela in sramsramkin ma enenu se inge ke pre lom sifwanu ku ke pre ye mutun met nu kemwa ke pal in meeting lun met lun Jeova. Kut fwin oru ou inge, tia kalme la kut ‘kalweni na pal nu kemwa ma wangin sripe.’
Esam Sang Kulo a Kas in Kaksak
11 Met puspis elos pre mukena elos fwin siyuk ke ma se, tusruktu lungse lasr nu sin Jeova enenu in mokle kut in sang kulo nu sel a kaksak ke pre lasr sifwanu a ke pre lasr ye mutun metu. “Nik komwos nunukala in kutena ma,” Poul el simusla, “a in ma nu kemwa ke pre a kaifwe wi sang kulo, komwos in fwakak me siyuk lomwos nu sin God; a misla lun God, su alukela liki ma eteyuk nu kemwa, fwa liaung insiomwos a nunkomwos in Kraist Jisus.” (Filippai 4:6, 7) Aok, sayen kas in kaifwe a me siyuk, kut enenu in akkalemye kulo nu sin Jeova ke ma lun ngun a ke ma lun ikwe su el ase nu sesr. (Soakas 10:22) Met sim lun Sam el on: Sang nu sin God me kise kulo, a moli mwoleung lom nu Sel su Fulatlanu.” (Sam 50:14) A toeni nu ke on in pre lal Devid pa kas mwo inge: “Nga fwa kaksakin en God ke on, a Nga fwa akfulatyel ke sang kulo.” (Sam 69:30) Ya kut tia enenu in oru pa ou inge ke pre lasr sifwanu a ke pre lasr ye mutun metu?
12 Fwin ke God, met sim lun Sam el on: “Utyuk nu in mutonoaoa sel ke kulo, a nu in kalkal lal ke kaksak, sang kulo nu sel, a kaksakin el. Tu Jeova el mwo, lungkulang lal on ma patpat a oaru lal nu sin fwil nu kemwa.” (Sam 100:4, 5) Ke len inge, kain in met nu kemwa ke mutanfwal nu kemwa elos ilyuk nu ke kalkal lun loom sin Jeova, a ke ma inge kut ku in kaksakunal a sang kulo. Ya kom akkalemye kulo nu sin God ke sripen oasr Kingdom Hall ke an sum a kom akkalemye kulo lom ke pal se kom wi ke meeting pal nu kemwa lun met su lungse el? Ke pal se kom muta we, ya kom srukak pusrem ke insiom ke on in kaksak a sang kulo nu sin Papa tumasr in kosrao?
Lela Kom in Tia Mwekin in Pre ke Kutena Pal
13 Fwinne kut pulakin la kut sufwal ke sripen ma kut oru, lela kut in forla nu sin God akkalemye me siyuk lom ke pre. Ke pal se met Ju elos oru ma koluk ke sripen payuk lalos nu sin mutan saye, Ezra el epasr, kolak po oaru lal nu sin God, a el pre ke inse pusisel: “O God luk, Nga mwekin a srusrala in ngetuk nu sum, God luk, tu ma koluk lasr fulat liki sifwusr, a metasr kapek nu in kosrao. Ke len lun papa tumasr me arulanu yok metasr nu misinge . . . A tokin ma inge su tuku nu fwesr ke ma koluk lasr, a ke metasr—tu Kom God lasr kai kut srik liki ma fwal ke ma koluk lasr, a ase nu sesr sie un met lula inge—ya kut fwa sifwil kunausla ma sap lom, a payuk yurin mutanfwal su oru me srungeyuk inge? Ya kom fwa tia mulat nu sesr nu ke pal kom kunauskutla? O Jeova God lun Israel, kom sumwosmwos, tu kut sie un met lula su kaengla, oanu misinge. Kut muta ye mutom in metasr, tu wangin sie ku in tu ye mutom meyen ma se inge.”—Ezra 9:1-15; Duteronomi 7:3, 4.
14 In eis nunuk munas lun God, fwakak ma koluk wikin auliyuk eneneyuk a “fwako fwal nu ke auliyuk.” (Luk 3:8; Job 42:1-6; Isaia 66:2) In len lal Ezra, toeni nu ke oiyen auliyuk pa kaifweung in aksumwosye ma sito ke inkanek in som liki mutan saye lalos inge. (Ezra 10:44; srike liye 2 Korint 7:8-13.) Kut fwin lungse nunuk munas lun God ke ma koluk upa su kut oru, na lela kut in fwakak ma inge nu sel ke pre ke inse fwokpap a oswela fwako fwal nu ke auliyuk. Sie oiyen auliyuk a kena in aksumwosye ma sito ku in ouyepa mokle kut in suk kasru in ngun lun met Kristian elder.—Jemes 5:13-15.
Eis Me Me Pwarak ke Pre
15 Fwin inseisr keok ke kutu sripe, kut ku in eis me pwarak ke pre. (Sam 51:17; Soakas 15:13) Hanna su oaru el etu ou inge. El moul ke sie pal su sou lulap puspis fwin an Israel arulanu pengpeng, tusruktu wangin tulik nutul. Oasr tulik mukol a tulik mutan lun mokul tumal inge Elkena nu sin mutan saye kiel, Penina, su akmulatye Hanna ke sripen talap lal. Hanna el sekalani in pre a el mwolela la el fwin eis insemwomwo ke sie tulik mokul ‘el sang tulik inge nu sin Jeova ke lusen moul lal nu fon.’ Meyen el akpwaryeyuk ke pre lal sifwanu a ke kas lun Met Tol Fulat Elai, “Hanna el tia sifwil toasr.” El isusla sie tulik mokul el pangon el Samuel. Tok, el esalang nu ke orekma in loom sin Jeova. (1 Samuel 1:9-28) Meyen el insemwomwo ke kulang lun Jeova nu sel paenang el pre in sang kulo—el kaksakin Jeova, wangin siena oanu el. (1 Samuel 2:1-10) Oanu Hanna, kut ku in eis me pwarak ke pre, a lalalfongi la God el sang topuk ke me siyuk lasr nu kemwa su fwal nu ke ma lungse lal. Kut fwin ikasla insiesr nu sel, kut tia “sifwil toasr,” meyen el e fwa eisla liki kut me toasr lasr ku el kasru kut tu kut in ku in muteng nu ka.—Sam 55:22.
16 Fwin luma a ma sikyuk purakak sangeng, toasr, ku fosrnga, lela kut tia mulkunla in forla nu sin God ke me pwarak ke inkanek lun pre. (Sam 55:1-4) Jekob el arulanu sangeng ke pal se el apkurun in osun nu sel Iso, ma wiel. Tusruktu, Jekob el pre: “O God lal Ebream, papa tumuk, a God lal Isaak, papa tumuk, O Jeova, su fwak nu sik, ‘Foloko nu in fwal sum, a nu yurin sou lom, a Nga fwa oru ma mwo nu sum,’ Nga kupansumwol nu ke ma srik ke kulang nu kemwa, a paye nu kemwa, su kom fwakak nu sin met kulansap lom, tu Nga fwasr alukela Jordan se inge ke sikal luk, a inge Nga ekla luo u. Moliyula, Nga siyuk sum, liki poun ma lik, liki paul Iso, tu Nga sangeng sel, saap el tuku, uniyuwi, nine wi tulik. A kom fwak, ‘Paye Nga fwa oru ma mwo nu sum, a oru fute lom in oanu puk mweanu, su tia ku in oekyukla tu pus.’ ” (Genesis 32:9-12) Iso el tia oru ma koluk nu sel Jekob a nu sin met nu kemwa su wilul. Aok, Jeova el “oru mwo” nu sel Jekob ke pal inge.
17 Ke pal in me siyuk lasr, saap kut ku in akkeye kut sifwanu kut fwin esam ma puspis su oasr ke Kas lun God. Ke Sam su loes emeet—sie pre mwo orekla nu ke on—saap met Fwisrak inge Hezekaia pa on: “Nga esam nununku lom pal omeeta, O Jeova, a akpwarye yu.” (Sam 119:52) Ke sie pre fwokpap kut fwin sun me srifwe yok, saap kut ku in esam sie akmwuk lun Baibel ku sie ma sap su ku in kasru kut in oru sie orekma su ku in akkeye kut in etu la kut akinsemwomwoye Papa tumasr in kosrao.
Met Oaru nu Kemwa Elos Kaifweung in Pre
18 Elos nu kemwa su oaru nu sin Jeova God elos “sekalani in pre.” (Rom 12:12) In Sam ak32, su saap orekla tokin Devid el oru ma koluk nu sel Bath-sheba, el akkalemye keok lal ke sripen el tia siyuk ke nunuk munas paenang el tia eis mongle su tuku ke fwakak a auliyuk su God el ku in sang nu sel. A Devid el on: “Lela met sumwosmwos in pre nu sum ke ma se inge in pal se ke kom ku in konoiyukyuk.”—Sam 32:6.
19 Kut fwin arulanu aksaokye futoto lasr nu sin Jeova God, kut e fwa pre ke pakoten lal ke inkanek lun me kise lal Kraist oanu lango. Ke lalalfongi, kut ku in kalukyung nu ke tron lun kulang ke pulaik tu kut in ku in eis pakoten a kasru su fwal nu ke pal. (Hibru 4:16) Tusruktu oasr sripe puspis paenang kut pre! Ke ma inge lela kut in “sekalani in pre”—kas in kaksak su tuku ke insiesr a sang kulo nu sin God. (1 Tessalonika 5:17) Len a fong, lela kut in kolak po oaru lasr ke pre.
Fuka Kom Ku in Topuk?
◻ Ma lane fuka kut ku in eis kut fwin akola a nunku ke pal sa ke pre lasr ye mutun metu?
◻ Efu kut enenu in pre ke inkanek sunak a akfulat?
◻ Kain in ngun fuka kut enenu in akkalemye ke pal in pre lasr?
◻ Ke pal in pre, efu kut tia enenu in mulkunla in sang kulo a kaksak?
◻ Fuka Baibel el akkalemye la kut ku in eis me pwarak ke pre?
[Study Questions]
1, 2. (a) Fuka 1 Timote 2:8 ku in orekmakin ke pre lun met kulansap lun Jeova? (b) Mea kut akola in tuni ingenu?
3, 4. (a) Efu arulanu yok sripe in nunku a akola ke pre ye mutun metu? (b) Mea Ma Simusla el akkalemye fwin ke lusen pre?
5. (a) Mea kut enenu in srukye ke nunuk lasr kut fwin pre ye mutun metu? (b) Efu kut enenu in pre ke inkanek sunak a akfulat?
6. Mea kut enenu in srukye ke nunuk lasr kut fwin ‘tuku ke tron lun kulang’?
7. Fuka Solomon el akkalemye inse pusisel ke pal se ma el pre ke pal in kise ke tempel lun Jeova?
8. Mea kutu inkanek su inse pusisel ku in akkalemye ke pal in pre ye mutun metu?
9. Kain in kai fuka su Jisus el sang ku in konoiyukyuk in Mattu 6:7, a fuka ma inge ku in orekmakin?
10. Efu sie inkanek fwal in pre ke ma se alukela pal se?
11. Fuka Filippai 4:6, 7 ku in orekmakin ke pre ye mutun metu a ke pre lom sifwanu?
12. Fuka Sam 100:4, 5 akpayeye ke len lasr, ke ma inge kut ku in sang kulo a kaksak nu sin God ke mea?
13. Kain in me pupulyuk fuka ke Ma Simusla akkalemye la kut enenu in akalemye me siyuk lasr nu sin Jeova fwinne kut pulakin la kut sufwal ke sripen ma sito su kut oru?
14. Oanu ma akkalemyeyuk in len lal Ezra, mea ma enenu kut fwin lungse in eis nunuk munas lun God?
15. Fuka experience lal Hanna akkalemye la kut ku in eis me pwarak ke pre?
16. Oanu ma akkalemyeyuk ke ma sikyuk sel Jekob, efu kut enenu in pre kut fwin pulakin sangeng ku fosrnga?
17. Fwal nu ke ma simusla in Sam 119:52, fuka pre el ku in wise nu sesr me pwarak kut fwin arulanu srifweyuk?
18. Efu kut ku in fwak la ‘met oaru nu kemwa elos fwa pre nu sin God’?
19. Efu kut enenu in kolak po oaru lasr ke pre?
[Picture on page 15]
Togusra Solomon el akkalemye inse pusisel ke pre lal ye mutun metu ke pal in kise ke tempel lun Jeova
[Pictures on page 16]
Oanu Hanna, kom ku in eis me pwarak ke pre