Mea Pre Lom Akkalemye Keim?
“O Kom su long pre, nu sum ikwe nu kemwa fwa tuku.”—SAM 65:2.
1, 2. Efu ku met kulansap lun Jeova elos ku in lulalfongi la pre lalos fwa topukyuk?
JEOVA el loang pal nukewa ke me siyuk nukewa lun met kulansap oaru nukewa lal. Kut ku in lulalfongi la el long kut. Oasr million puspus sin Met Lo elos pre nu sin God ke pal sepana, ne ouinge Jeova el ku in long pre lun kais sie selos.
2 Devid el lulalfongi la God el long ma nukewa el fwak nu sel ke pre, paenang el simusla kas inge: “O Kom su long pre, nu sum ikwe nu kemwa fwa tuku.” (Sam 65:2) Pre nukewa lal Devid topukyuk meyen el sie met kulansap oaru lun Jeova. Kut enenu in siyuk sesr sifwana: ‘Ya pre luk el akkalemye la nga lulalfongi Jeova a la nga nunku yok ke alu paye? Mea pre luk akkalemye keik?’
Pre nu sin Jeova Wi Inse Pusisel
3, 4. (a) Ke kut pre, oiya fuka kut enenu in akkalemye? (b) Mea kut enenu in oru kut fwin asor yok ke sripen ‘fosrnga yok ke nunak’ lasr ke ma koluk upa?
3 Kut fwin lungse pre lasr in topukyuk, kut enenu in akkalemye inse pusisel ke kut pre nu sin God. (Sam 138:6) Kut enenu in siyuk sin Jeova in tuni kut, oana Devid el oru ke el fwak kas inge: “Kom suiyuwi, O God, a etu insiuk. Kom srike yu a etu nunak luk, a liye fwin oasr kutena innek koluk yuruk, a kol yu innek kamwil nu tok.” (Sam 139:23, 24) Lela kut in pre a akpusiselye kut ke God el tuni kut a ke kas in kai lun Kas lal. Jeova el ku in kol kut nu ke “innek kamwil nu tok,” a kasre kut in fwasr ke inkanek su kol nu ke moul ma patpat.
4 Na mea kut fwin toasr ke sripen ‘fosrnga yok ke nunak’ lasr ke sripen kut orala sie ma koluk upa? (Ridi Sam 32:1-5.) Kut fwin srike in akkalemye mu conscience lasr el tia toasr ke sripen ma koluk lasr, oiya inge ku in akmunasye kut oana ke soko sak el ku in paola a masla ke fol upa. Ke sripen ma koluk lal Devid, paenang tula insemwomwo lal a saap pulakin lal arlana koluk pa paenang el maskunak. Tusruktu ke pal se el fwakak ma inge nu sin God, el sifwilpa eis me akkeye yok! Nunku akmwoye ke engun yok lal Devid ke pal se el pulakin la Jeova el nunak munas nu sel ke ‘ma koluk lal.’ Orekma mwo lasr in fwakak nu sin God ma koluk lasr ku in oru kut in engun, a me kasru lun met Kristian elder ku in kasru sie met su oru ma koluk in sifwilpa akmwoye fototo lal nu sin God.—Soakas 28:13; Jemes 5:13-16.
Kaifwe in Pre nu sin God a Sang Kulo Nu Sel
5. Mea kalmen in kaifwe in siyuk sin Jeova?
5 Kut fwin arlana fosrnga ke kutena sripe, kut enenu in orekmakin kas in kasru lal Poul inge: “Nik komwos nununkala in kutena ma, a in ma nu kemwa ke pre a kaifwe wi sang kulo, komwos in fwakak me siyuk lomwos nu sin God.” (Filippai 4:6) Yokna ke pal su oasr me sensen ku me kalyai kut enenu in kaifwe in pre nu sin Jeova a siyuk ke kasru a me kolyuk.
6, 7. Ke sripe puspus fuka kut enenu in sang kulo ke kut pre?
6 Kut fwin pre na ke pal se oasr ma enenu lasr, mea ma inge akkalemye ke fototo lasr nu sin Jeova? Poul el fwak la kut enenu in fwakak me siyuk lasr nu sin God “wi sang kulo.” Paye la oasr pa sripe mwo lasr in sang kulo oana Devid ke el fwak ouinge: “Ma lom, O Jeova, pengpeng, a ku, a mwolanu, a kutangla, a fulat; tu ma lom ma nu kemwa in kosrao a fwalu. Togusrai ma lom, O Jeova, a kom akfulatyeyuk oana sifwe fwin ma nu kemwa. . . . God lasr, kut sot kulo nu sum, a kaksakin em in mwolana.”—1 Kronikel 29:11-13.
7 Jisus el sang kulo nu sin God ke mongo a ke bread a wain su orekmakinyuk ke Mongo in Eku lun Leum. (Mattu 15:36; Mark 14:22, 23) Sayen ma inge, kut enenu pa in “sang kulo nu sin Jeova” ke sripen “orekma sakuruk lal nu sin tulik nutin met,” ke “nununku sumwos lal,” a ke kas in luti lal su oasr in Baibel.—Sam 107:15; 119:62, 105.
Pre Ke Met Puspus Saye
8, 9. Efu ku kut enenu in pre ke met Kristian puspus wiyesr?
8 Wangin alolo ka la kut pre kesr sifwana, tusruktu kut enenu pa in pre ke met saye, fwinne ke met Kristian puspus su kut nukin inelos. Saap met sap Poul el tia etu met Kristian nukewa su oasr in an Kolosse, ne ouinge el simusla kas inge nu selos: “Kut sang kulo nu sin God, Papa tumun Leum lasr Jisus Kraist, a pre keyumwos pal e nukewa, ke kut long ke lulalfongi lomwos in Kraist Jisus, a lungse lomwos nu sin met mwo nukewa.” (Kolosse 1:3, 4) Poul el pre pa ke met Kristian su oasr in an Tessalonika. (2 Tessalonika 1:11, 12) Kut fwin pre ke met lili wiyesr ma inge ku in akkalemye ke oiya a nunak mwomwo nu selos.
9 Pre lasr ke met Kristian akmusrala a ke “sip ngie” sang me akpayeye ke nunak mwomwo ke u lun God. (Jon 10:16) Poul el siyuk sin met lili puspus wiyel in pre kel in kasrel tu ‘lan pulaik in fwakak ma lukma in mwosasu.’ (Efesus 6:17-20) Ya kut pre ke met Kristian puspus ke oiya inge?
10. Orekma lasr in pre ke met lili puspus saye ku in orala fwako mwo fuka nu sesr?
10 Orekma lasr in pre ke met lili puspus saye ku in ekulla nunak lasr nu selos. Kut fwin pre ke sie met lili su kut tia arlana lungse, ma inge ku in ekulla nunak lasr nu sel. (1 Jon 4:20, 21) Kain in pre inge ku in akkeye inse sefwanna yurin met lili wiyesr. Sayen ma inge, kain in pre inge akkalemye la oasr yurosr lungse oana lungse lun Kraist. (Jon 13:34, 35) Kain in oiya mwomwo inge el sie fwako lun ngun lun God. Ya kais sie sesr pre ke ngun mutal, a siyuk sin Jeova in kasre kut in akkalemye fwako mwomwo oana lungse, engun, misla, mongfusrasr, kulang, lulalfongi, fwokpap a sifwana leum fwom? (Luk 11:13; Galetia 5:22, 23) Fwin kut oru, kas a orekma lasr fwa akkalemye la kut fwufwasryesr ke ngun.—Ridi Galetia 5:16, 25.
11. Efu ku kom ku in fwak mu fwal in siyuk sin met lili elos in pre kesr?
11 Kut fwin long la tulik nutusr elos srufweyuk in kikiap a kutasrik ke tests lalos ke loom lutlut, kut enenu in pre kelos. A kut enenu in orekmakin ma Simusla in kasrelos tu elos in akkalemye oaru lalos a in tia oru kutena ma koluk. Poul el fwak nu sin met Kristian in an Korint: “Kut pre nu sin God tu komwos in tia orekma koluk.” (2 Korint 13:7) Kain in pre inge ke inse pusisel akinsemwomwoye Jeova a fwakak ma mwomwo kesr. (Ridi Soakas 15:8.) Kut ku in siyuk sin met lili in pre kesr, oana ke ma met sap Poul el oru. El simusla: “Komwos in pre kasr, tu kut nunku tu oasr ella mwo yurosr, a kut kena tu orekma lasr in sumwos in ma nu kemwa.”—Hibru 13:18.
Ma Puspus Saye Su Pre Lasr Akkalemye Kesr
12. Mea ma yok sripe su kut enenu in akkalemye ke pre lasr?
12 Ya pre lasr el akkalemye la kut Met Lo lun Jeova su engan a moniyuk? Ya pre lasr el akkalemye la kut lungse in oru ma lungse lun God, a in sulkakin peng mwo lun Togusrai, in akfulatye kolyuk sumwosmwos lun God, a in akmutalye inel? Ma inge nukewa enenu in akkalemye yok ke pre lasr, oana ke ma fwakyuk ke pre su Jisus el akkalemye nu sesr. El fwak ouinge: “Papa tumasr su in kosrao, Em in akmutalyeyuk. Togusrai lom in tuku. Ma lungse lom in orek, oana in kosrao, ouinge fwin fwalu.”—Mattu 6:9, 10.
13, 14. Mea pre lasr el akkalemye kesr?
13 Pre lasr nu sin God akkalemye pa ke nunak lasr, ke lungse lasr, a ke kena lasr. Jeova el etu ke oiya a nunak paye lasr. Soakas 17:3 el akkalemye: “Pot in aknasnasye ma nu ke silfer, a fwunyu nu ke gold, a Jeova el srike inse.” God el ku in liye ma oan ke insiesr. (1 Samuel 16:7) El etu mea pulakin lasr ke meeting, orekma lasr in sulkakin peng mwo, a ke nunak lasr ke met lili wiyesr. Jeova el etu ke ma kut nunku ke ‘met lili’ wiyen Kraist. (Mattu 25:40) El etu fwin ma kut siyuk ke pre pa ma kut lungse a ma tuku ke insiesr, a tia kalweni na kas sana pal nukewa kut fwin pre. Jisus el fwak pa: “A ke komwos pre, nik komwos enutnut oana met pegan elos oru, tu elos nunku mu elos fwa longyuk ke kas puspus lalos.”—Mattu 6:7.
14 Ma kut akkalemye ke pre el fwakak pa ke lulalfongi yok lasr nu sin Jeova. Devid el fwak: “Kom [Jeova] sie nien molela nu sik, sie tauer ku liki met lokwalok. Nga fwa muta in loom sum ma patpat; nga fwa eis nien moul ye lulin po soksok lom.” (Sam 61:3, 4) Oana ke kas in pupulyuk inge, ke pal se God el ‘ikasla loom sel a suli kut in muta we,’ kut pulakin misla a me karungin lal nu sesr. (Fwakyuk 7:15) Aok kut eis me akkeye yok ke kut akfototoye kut nu sin Jeova ke inkanek lun pre wi lulalfongi yok lasr la el ‘wi kut’ ke pal se oasr me srufwe upa nu ke lulalfongi lasr!—Ridi Sam 118:5-9.
15, 16. Pre lasr ku in kasre kut in akilen ma fuka ke kena lasr in eis a oru kunokon mwomwo ke congregation?
15 Pre paye lasr nu sin Jeova ku in kasre kut in etu a akilen la mea oan na paye ke nunak a insiesr. Ke sie me pupulyuk, ya lungse lasr in oru kunokon lun met liaung ke congregation lun God pa ma kut kena in oru ke inse pusisel lasr, in sang kasru nu ke orekma in luti a ke congregation a oru ma inge ke ku lasr kewa? Ku, ya kut lungse in oru ma inge meyen kut lungse in “akfulatye” ku kut lungse in ‘leumi’ fwin met lili puspus? Tia pa inge kain in nunak inmasrlon met kulansap nukewa lun Jeova. (Ridi 3 Jon 9, 10; Luk 22:24-27.) Fwin oasr kain in nunak tia mwo yurosr, pre paye lasr nu sin Jeova God ku in akkalemye nunak tia mwo inge a ku in kasre kut in ekulla kain in nunak inge meet liki ma inge upala.
16 Mutan Kristian payuk nukewa elos lungse pa mokul tumalos in kulansap oana ministerial servant ku saap sie met liaung ku met elder. Mutan wiyesr nukewa inge elos in akfwalye pa nunak a pulakin lalos ke ma elos akkalemye ke pre lalos sifwana ke elos kafweang in oru me srikasrak mwo ke oiya a ellalos. Ma inge arlana yok sripe, meyen kas a orekma lun met nukewa ke sou lun sie mokul ku in sang kasru ku ku in akkolukye oiya mwo lal ke congregation.
Aoliyen Met Puspus in Pre Ke Pal in Meeting
17. Efu ku arlana mwo kut in pre ke pal se kut mukelana muta?
17 Ke pal puspus Jisus el som liki un met puspus tu elan ku in pre nu sin Papa tumal ke el mukelana muta. (Mattu 14:13; Luk 5:16; 6:12) Oasr pa ma eneneyuk nu sesr in pre ke kut mukelana muta. Ke kut pre ke sie an su misla, kut ku in oru sulela mwomwo puspus su ku in akinsemwomwoye Jeova a kasre kut in fokoko pal nukewa ke orekma lasr nu sel. Tusruktu, oasr pa pal ke Jisus el oru ye mutun met puspus, a mwo kut in lutlutkin la fuka kut ku in oru pa ma inge ke inkanek fwal a mwo.
18. Mea kutu ma su met lili mokul elos enenu in esam fwin elos aoliyen congregation in pre?
18 Ke pal in meeting lasr, brother puspus su oaru nu sin God el aoliyen congregation ke pal in pre. (1 Timote 2:8) Met lili elos ku in fwak pa “amen,” su kalmen kas se inge pa “lela ma inge in orek,” ke saflaiyen pre inge. Tusruktu, tu elos in ku in oru ma inge, elos enenu in insese ke ma fwakyuk ke pre. Wangin kutena kas tia mwo ke pre lun Jisus su ku in oru met elos in arlana lut ka. (Luk 11:2-4) Sayen ma inge, el tia fwakak ma nukewa ke ma enenu ku ma upa nukewa lun kais sie met su longol. Ma upa a ma enenu lun kais sie met el fwal in akkalemye ke pal se sie met el mukelana muta a tia ye mutun met puspus. A ke pal se sie met el aoliyen sie u in pre, el tia enenu in akkalemye ma lun met su tia fwal a sumwos in akkalemyeyuk.
19. Oiya fuka kut enenu in akkalemye ke pal in pre ke congregation?
19 Kut fwin kol in pre ye mutun met puspus, kut enenu in akkalemye ‘sangeng mwo sin God.’ (1 Piter 2:17) Oasr kutu orekma su mwo a sumwos in oru ke pal a an saye a tia fwal in oru ke pal in meeting lun congregation. (Ekklisiastis 3:1) Ke sie me pupulyuk, fwin oasr sie met lili su nunku mu met puspus su apkuran nu sin sie sin sie enenu na in sruokye paolos ke pal in pre. Kain in oiya inge ku in aktukulkulye kutu met, wekunang met muteta su tia wi ke lulalfongi lasr. Kutu sin siyanyen Kristian elos ku in sruokye paun sie sin sie, tusruktu fwin elos kafusak sie sin sie ke pal in pre ke congregation, met nukewa su ku in liye ma inge ku in aktukulkulyeyuk ka. Elos ku in nunku mu siyanyen se elos nunku na ke fototo lalos nu sin sie sin sie a elos tia akkalemye sunak mwo nu sin Jeova. In akkalemye me akfulat yok nu sin God, ke ma inge lela kut in “oru ma nukewa nu ke mwolana lun God” a kut in tia oru kutena oiya su ku in akkolukye, aktukulkulye kutena met.—1 Korint 10:31, 32; 2 Korint 6:3.
Pre ke Mea?
20. Kom fwa akuteye fuka Rom 8:26, 27?
20 Oasr pal, kut tia etu la mea kut fwa fwak ke kut sifwana pre. Poul el simusla: “Tu kut tia etu fuka mwo kut in pre, a ngun [mutal] sifwana kaifwe kasr ke sasao su koflana kaskas ka. A [God] el su suiye inse el etu nunak lun ngun.” (Rom 8:26, 27) Jeova el orala akwuk tu pre lun met kulansap puspus lal in pal meeta simusyukla in Baibel. El long pa ke me siyuk nukewa inge oana ke kas inge ma lasr sifwana, a el topuk ma inge. God el ete kut a ke kalmeyen ma puspus ke el orekmakin ku lal in kasru met sim puspus lun Baibel in kaskas. Ke kasru lun ngun mutal, kut ku in esam ke ma kut fwa fwak ke pre lasr, a Jeova el topuk me siyuk nukewa. A ke kut eis etauk yok ke Kas lun God, ma kut enenu in pre ka ku in sikyak na paye ke nunak lasr.
21. Mea kut fwa lutlutkin yok ke me lutlut toko?
21 Oana ke ma kut akkalemye tari, pre lasr el akkalemye ma puspus kesr. Ke sie me pupulyuk, pre lasr ku in akkalemye ke fototo mwomwo lasr nu sin Jeova a la fuka yokiyen etauk lasr ke Kas lal. (Jemes 4:8) Ke me lutlut toko, kut fwa lutlutkin yok ke kain in pre puspus su simusyukla in Baibel. Orekma lasr inge in lutlut yok ke ma Simusla ku in sang kasru fuka nu ke pre lasr nu sin God?
Kom E Topuk Fuka?
• Oiya fuka kut enenu in akkalemye ke kut pre nu sin Jeova?
• Efu ku kut enenu in pre ke met lili puspus wiyesr?
• Mea pre lasr el akkalemye kesr a ke nunak lasr?
• Oiya fuka kut enenu in akkalemye ke pal in pre ke congregation?
[Picture on page 10]
Ya kom sang kaksak a kulo nu sin Jeova pal nukewa?
[Picture on page 12]
Oiya su kut akkalemye ke pal in pre ke congregation enenu in akfulatye Jeova pal nukewa