Akola In Topuk Ke Sripen Lalalfongi Lasr
“A komwos in akmutalye Kraist oanu Leum insiomwos, a komwos in akola pal nu kemwa in topuk nu sin met nu kemwa su siyuk sumwos sripen fwinsrak su on in komwos.”—1 PITER 3:15.
APKURUN AN NU KEMWA, elos akilen la Met Lo lun Jeova elos oaru, a nasnas ke oiyen moul lalos. Met puspis elos akilenyelos oanu sie met tulan mwo su tia purakak kutena me fos. Fwinne ou inge, met Kristian inge su lungse misla elos keok upa ke sripen kolyai—ke pal in meun a ke pal in misla. Elos tia lut ke me lain inge nu selos. Ke ma paye, elos etu tari la ma inge e fwa tuku na paye. Fwin met Kristian ke century se meet C.E. elos ekla “me srungeyuk,” na efu kut tia ku in fwak la met nu kemwa su kaifweung in fwasr tokin Kraist ke len inge elos ouyepa sun kain in ma upa inge? (Mattu 10:22) Sayen ma inge Baibel el fwak: “Aok, elos nu kemwa su lungse in moulkin moul mutal in Kraist Jisus, elos fwa keok ke kolyai.”—2 Timote 3:12.
2 Met Lo lun Jeova elos tia lungse kolyai, ku elos insemwomwo ke keok—in sang moli ke sripen ma elos oru, in muta ke nien kapur ku ke kut ena ma upa su tuku sin kutu met. Elos lungse ‘in okak a insraelak in moul lalos’ tu elos in ku in luti ke peng mwo lun Togusrai ke sukosok. (1 Timote 2:1, 2) Elos engunkin sukosok lalos ke alu in an puspis, a elos kaifweung in oru ke ellalos ma nu kemwa a ke ku nu kemwa tu in “oasr misla lalos yurin met nu kemwa,” wekunang met kol nu kemwa ke guferment lun met. (Rom 12:18; 13:1-7) Ke ma inge, efu elos ekla sie “me srungeyuk”?
3 Ke ma paye, Met Lo lun Jeova elos ekla me srungeyuk ke sripe siefwunnu su oru met Kristian ke century se meet in ouyepa sun kolyai. Ma se meet, Met Lo lun Jeova elos oru orekma fwal nu ke ma elos lalalfongi ke alu lalos, ma inge orelos in tia me purakak pwar nu sin kutu met. Ke sie me pupulyuk, elos moniyuk in luti ke peng mwo ke Togusrai lun God, tusruktu pal nu kemwa met puspis siena ma elos nunku ke moniyuk lalos, elos nunku la orekma in luti lalos oanu “orekma fukoko in ekulla alu lun met puspis tu in welulos.” (Srike liye Orekma 4:19, 20.) Elos ouyepa tia wi ke politic a meun lun mutanfwalu, paenang kutupal ma inge purakak nunuk tafongla nu sin met puspis a elos nunku la Met Lo lun Jeova elos suoaru ke mutanfwal lalos.—Maika 4:3, 4.
4 Ma se akluo, Met Lo lun Jeova elos sun pal nu kemwa kas kikiap lainelos—me sramsram kikiap a aketeye kikiap ke ma elos lalalfongi. Ke sripe se inge elos inge nunkeyuk ke kutu an oanu sie alu srisrik ye koko lun met su sang me sensen nu sin kutu met. Sayen ma inge, meyen elos sulela in orekmakin kutu ono in ayaola sra ke pal in mas, tu in akos nu ke ma sap lun Baibel inge ‘liyekomwosyung liki sra,’ paenang elos inge pangpang “met akmas lun tulik srisrik” a “sie alu srisrik ye koko lun met su lungse in sifwanu uniye.” (Orekma 15:29) Tusruktu, ke ma paye Met Lo lun Jeova elos arulanu akfulatye moul, a elos suk kain in ono mwo emeet su oasr tu in orekmakin nu selos sifwanu a nu sin tulik nutulos. Kas lun met puspis su akkalemye la pus sin tulik nutin Met Lo lun Jeova elos mise ke kais sie yiu ke sripen elos srunga in etuk sra arulanu sito. Wangin pise su elos ku in orekmakin ke ma inge. Meyen ma paye lun Baibel el tia me insemwomwo nu sin met nu kemwa in sou, paenang elos nunku la Met Lo lun Jeova elos kunausla sou. Tusruktu, elos nu kemwa su etu Met Lo lun Jeova elos akilen la elos arulanu akfulatye moul in sou a elos kaifweung in akos ma sap lun Baibel nu sin mokul a mutan in lungse a akfulatye sie sin sie a tulik nu kemwa elos enenu in akos papa a nine kielos elos fwinne met lalalfongi ku tia.—Efesus 5:21–6:3.
5 Ke ma sikyuk puspis, met inge su oasr kunokon lulap ke kolyai nu sin met kulansap lun Jeova pa met kol lun alu su lainelos, a orekmakin futoto lalos nu sin met kol lun guferment a met orek news in kutongye orekma lun Met Lo lun Jeova. Fuka kut nu kemwa, su Met Lo ku in topuk nu ke me lain inge—su sikyuk ke sripen lalafongi a orekma lasr ku ke sripen kas kikiap lain kut?
“Lela Met E Nu Kemwa in Etu Mongfwusesr Lomwos”
6 Ma se meet, kut enenu meet in srukye nunuk sumwos—ma Jeova el nunku—nu selos nu kemwa su tia wi ke moniyuk lasr ke alu. Meyen kut fwin tia oru ou inge, saap kut mutamwauk in purakak koskosrok ku kas in akkoluk nu sin kutu met. “Lela met e nu kemwa in etu mongfwusesr lomwos,” met sap Poul el simusla. (Filippai 4:5) Ke ma inge, Baibel el kaifwe kut srukye sie nunuk sumwos nu selos nu kemwa su muta likin congregation lun met Kristian.
7 Ke inkanek saye, Ma Simusla el arulanu kalem ke pal se ma el kaifwe kut “kurunginkomyung in tia oasr tunum ke fwalu.” (Jemes 1:27; 4:4) Kas se inge “fwalu” ke oanu fwalu su oasr ke fus puspis lun Baibel su kalmekin un met su tia wi ke Kristian paye. Kut moul misinge inmaslon un met inge; kut sunolos ke nien orekma, ke loom lutlut, a ke an sesr. (Jon 17:11, 15; 1 Korint 5:9, 10) Fwinne ou inge, kut arulanu kurunganang moul lasr tu in wangin tunesr ke fwalu ke kut fwasr liki kain in oiye, a kas su lain inkanek sumwosmwos lun God. Ouyepa arulanu yok sripe sesr in akilen me sensen su tuku ke asrouki ke fwalu se inge, yokna, nu selos nu kemwa su pilesru akmwuk fulat lun Jeova—Soakas 13:20.
8 Aok, kai se inge su akkalemye la kut enenu in kurunginkutyung in tia oasr tunesr ke fwalu tia sang sukosok nu sin kais sie sesr in pilesru met nu kemwa su tia wi Met Lo lun Jeova. (Soakas 8:13) Esam me srikasrak lun met kol lun alu lun met Ju, ke me lutlut somla. Akmwuk in alu su elos oakiye tia eis insemwomwo lun Jeova; ku alu lalos inge sang kasru tu in oasr futoto lalos nu sin met saye su tia met Ju. (Mattu 21:43, 45) Ye mutalos sifwanu su akkalemye la elos fulat, met Ju inge nu kemwa elos pilesru met Pegan. Kut tia srukye kain in nunuk koluk inge, oanu kut akkalemye srunga nu sin met su tia Met Lo. Oanu met sap Poul, kut lungse met nu kemwa su long kas paye lun Baibel in eis insemwomwo lun Jeova.—Orekma 26:29; 1 Timote 2:3, 4.
9 Sie nunuk sumwos, su tuku ke Ma Simusla enenu in orekma ke inkanek in sramsram lasr ke kutu met su tia Met Lo. Poul el kaifwe nu sel Taitus in akismakinye met Kristian nu kemwa su muta ke taka lun Crete in “tia kaskas koluk ke kutena met, in tia met akukuin, in okak, in fwakak fwokpap nu kemwa nu sin met nu kemwa.” (Taitus 3:2) Tuni kas inge su akkalemye la met Kristian nu kemwa elos in tia kaskas koluk ke “kutena met”—elos tia enenu in oru ou inge fwinne nu sin met fwin an Crete su tia Kristian, kutu sin met inge arulanu pengpeng ke kikiap lalos, kuinmongo, a alsrungesr. (Taitus 1:12) Ke ma inge kut kunausla ma simusla kut fwin kaskas koluk ke kutena met su tia wi ke lalalfongi lasr. Sie nunuk inse fulat oanu kut mwo lukeltal tia ku in purakak kutu met in wi ke alu lun Jeova. A, kut fwin nunku kutu met fwal nu ke akmwuk sumwos su tuku ke Kas lun Jeova, kut “yunala luti” lun God.—Taitus 2:10.
Nge Sie Pal in Misla, Nge Sie Pal in Kaskas
10 Oasr “sie pal in misla, a sie pal in kaskas,” Ekklisiastis 3:7 el fwak. Ke ma inge, oasr ma upa ka, pa inge pal in sulela nge kom tia kaskas nu sin met su lain kom a nge kom ku in kaskas nu selos ke lalalfongi lasr? Oasr ma kut ku in lotela nu sin sie met su pal nu kemwa sumwosmwos in nunuk—Jisus. (1 Piter 2:21) El etu nge “sie pal in misla.” Ke sie me pupulyuk, ke pal se ma met tol fulat a met matu elos kaskas kikiap in lainul ye mutal Pailat Jisus el “tia topuk.” (Mattu 27:11-14) El tia lungse in kaskas ke kutena ma su saap ma inge ku in kutongye akmwuk lun God nu sel. A, el sulela in lela orekma lal in sang me akpayeye kel sifwanu. El etu la fwinne ma paye el tia ku in ekulla nunuk a inse fulat lalos. Ke ma inge el tia loang nu ke kas kikiap lalos el srunga in kunausla misla lal su oasr sripe.—Isaia 53:7.
11 Fwinne ou inge, Jisus el ouyepa etu nge “pal in kaskas.” Ke sie pal, el kaskas ye mutan met nu kemwa in sang topuk nu sin met su suk ma tafongla lal, el tukakin kas kikiap lalos. Ke sie me pupulyuk, ke pal se met sim a met Farisi elos srike in akkolukyel ye mutun met nu kemwa a fwak la el sisila demon ke inkanek lal Beelzebub, Jisus el sulela in tia lela kas kikiap inge in oasr na ke nunuk lun met. Ke sie topuk lalmetmet a me pupulyuk fukoko, el tukakin kas kikiap lalos. (Mark 3:20-30; ouyepa srike in liye Mattu 15:1-11; 22:17-21; Jon 18:37) In oupanu, tokin tukakinyukla Jisus a sroukilyel, elos wisela nu ye mutun Sanhedren, Met Tol Fulat Caiaphas el siyuk ke kutusrik: “Nga fulak nu sum ke God moul, tu kom in fwakak nu sesr kom fwin Kraist, Mwen nutin God, ku tia. A Jisus el fwak: Nga El.”—Mattu 26:63, 64; Mark 14:61, 62.
12 Ouyepa nunku ke me srikaskrak lal Poul a Barnabas. Orekma 14:1, 2 el fwak: “In Aikonium eltal tukeni utyuk nu in imwen lolngok lun met Ju, a ou inge kaskas laltal tu met puspis sin met Ju a met Grik elos lalalfongi. A met Ju silalalfongi elos purakak insien met Pegan, a oralos in nunuk koluk lain met lili.” Ke Baibel inge The New English Bible kut ku in rid: “Tusruktu met Ju su silalalfongi elos purakak insien met Pegan a furokla nunuk lalos lain met Kristian. Elos tia inse misla fwinne elos tia eis mwosasu, a met Ju inge su lainelos elos kaifweung in mutamwauk sie orekma koluk, elos srike in purakak nunuk srisri lun met Pegan lain met Kristian.a Yok na paye srunga lalos nu sin met Kristian! (Srike liye Orekma 10:28) Ke ma inge, Poul a Barnabas elos pulakin la, “sie pal in kaskas” meyen elos fwin tia kaskas met tumal lutlut sasu elos e munasla ke sripen kas in akkoluk lun met. “Ke ma inge eltal [Poul a Barnabas] muta we patna a kaskas pulaik ke ku lun Jeova,” su akkalemye insemwomwo lal ke pal se ma el kasrelos in oru orekma sakuruk puspis ke inkanek lun menmen. Ma inge kol nu ke kitakatelik “kutu wi met Ju, a kutu met sap.”—Orekma 14:3, 4.
13 Ke ma inge, oiye fuka kut akkalemye elos fwin akkolukye kut? Luma a ma sikyuk nu kemwa tia oanu sie. Kutu luma el siyuk sesr in orekmakin akmwuk lun Baibel su fwak “sie pal in misla.” Yokna fwin met su lain kut elos lungse kut in sroang nu ke akukuin lulap su wangin sripe. Lela kut in tia mulkunla la kutu sin met elos tia lungse in etu ma paye. (2 Tessalonika 2:9-12) Kaifweung in sramsram nu selos su inse fulat a oakiyuki tari ke insielos in tia lalalfongi kol nu ke ma wangin sripe. Yok liki ma inge, kut fwin akola in sramsram a akukuin nu selos nu kemwa su lain kut a kaskas kikiap nu sesr, na kut mutamwauk in sisla sie orekma su saok liki a oswela fwako mwo—pa inge in kasru met fwokpap su lungse na paye in lutlut ke ma paye lun Baibel. Ke ma inge, kut fwin osun nu sin met lain su lungse in kaskas ma kikiap lain kut, kai lun Baibel pa: “Forla lukelos.”—Rom 16:17, 18; Mattu 7:6.
14 Ma inge, tia kalme la kut tia akola in sang topuk ke sripen lalalfongi su on in kut. Meyen kut etu la oasr pa “pal in kaskas.” Kut nunku yok met fwokpap puspis su long kaskas koluk lain kut. Kut insemwomwo in sang aketeye kalem ke ma kut lalalfongi ke insiesr nu sin kutu met; paye, kut lungse pal mwo nu kemwa in oru ou inge. Piter el simusla: “A komwos in akmutalye Kraist oanu Leum insiomwos, a komwos in akola pal nu kemwa in topuk nu sin met nu kemwa su siyuk sumwos sripen fwinsrak se su on in komwos, a ke fwulpap a sangeng.” (1 Piter 3:15) Fwin sie met su pwar in lutlut el siyuk ke me akpayeye ke lalalfongi su kut arulanu aksaokye, elos fwin siyuk ke kas kikiap lun met su lain kut, oasr kunokon lasr in sang topuk sripen lalalfongi lasr, aketeye nu selos topuk lun Baibel. In toeni nu ke ma inge, oiye sumwos lasr sie me akpayeye yok. Oanu met lalmetmet puspis su tia srisri elos liye tari, la kut kaifweung na paye in moul fwal nu ke akmwuk sumwos lun God, paenang elos etu la kas nu kemwa su sromunyuk lain kut elos inge kikiap.—1 Piter 2:12-15.
Fuka Kas Kikiap Ma Tuku ke News?
15 Oasr pal, Met Lo lun Jeova elos akkolukyeyuk ke me sramsram sesumwos ke news. Ke sie me pupulyuk, sie newspaper fwin an Russia ke August 1, 1997 el sromun sie me sramsram koluk su akkalemye la, Met Lo lun Jeova elos siyuk sin met laltal in ‘sisla mutan kielos, mokul tumalos, a papa a nine kielos elos fwin tia kalem a srunga in wi ke lalalfongi lalos.’ Kutena met su etu na paye Met Lo lun Jeova elos akilen la me sramsram inge sito. Baibel el akkalemye la met Kristian nu kemwa elos enenu in akkalemye lungse a akfulat nu sin sou lalos su tia lalalfongi, a Met Lo lun Jeova elos kaifweung in fwasr tokin ma sap inge. (1 Korint 7:12-16; 1 Piter 3:1-4) Fwinne elos oru ou inge, me sramsram inge ke newspaper elos orekla a kitakutla, paenang met rid puspis elos ridi ma sito. Fuka kut ku in sang topuk in aketeye lalalfongi lasr kut fwin sun kas kikiap inge lain kut?
16 Sulpa, ke me sramsram inge, oasr “pal in misla a oasr pal in kaskas.” Ke sie pal The Watchtower el aketeye ke inkanek inge: Sulela lasr in misla ku sang topuk ke sripen lalalfongi lasr oakiyuki nu ke luma a ma sikyuk, ke srupon kas in akkoluk, a ke nien sun lal.” Ke kutu ma sikyuk, saap arulanu mwo kut fwin misla na ke kutu report koluk, meyen ke inkanek inge kut tia akyokye me sramsram kikiap lalos ye mutun metu.
17 Ke kutu ma sikyuk, saap “pal in kaskas” eneneyuk. Saap sie met orek news su oaru el eis sie me sramsram kikiap sin kutu met ke Met Lo lun Jeova a saap el engun in etu me sramsram paye kasr. (Srike liye pok inge “Inkanek in Aksumwosye Me Sramsram Tafongla.”) Fwin report sesumwos ke news purakak nunuk koluk su ku in kutongye orekma in luti lasr, na kutu met su aoliyen ofus lun Watch Tower Society elos ku in sulela in sang topuk ke sripen ma paye ke kutu inkanek fwal.b Ke sie me pupulyuk, sie met elder fwal el ku in akkalemye ma paye, oanu ke sie program lun TV, meyen elos fwin tia oru ou inge, saap elos e nunku la wangin topuk lun Met Lo ke me sramsram sa. Sie inkanek lalmetmet nu sin kai sie Met Lo in akesrui ke kolyuk lun Watch Tower Society a ke met nu kemwa su el pakiye in sang topuk ke me sramsram sa.—Hibru 13:17.
Aksumwosye a in Akkeye Mwosasu
18 Sumwos lasr in luti ke peng mwo lun Togusrai lun God tuku kosrao me. Jisus, su wise kunokon inge nu sesr, el eis tari ‘ku e nu kemwa in kosrao a fwalu.’ (Mattu 28:18-20; Filippai 2:9-11) Ke ma inge, kut tia enenu fulela lun guferment tu kut in luti. Fwinne ou inge, kut nu kemwa akilen la sukosok lasr ke alu sie me kasru yok ke orekma in sulkakin Togusrai. Ke an puspis su oasr sukosok lasr in alu, kut orekmakin akmwuk nu kemwa fwal nu ke ma sap in kurunganang ma inge. Ke kutu an su tia sang sukosok lasr, kut kaifweung in eis ma inge fwal nu ke ma sap. Tia nien lasr in ekulla ku aksasuye akmwuk lun an’u, a kut lungse in “aksumwosye a in akkeye mwosasu.”c—Filippai 1:7.
19 Oanu Met Lo lun Jeova, kut akilen la Jeova el Kol Kosrao a Fwalu. Ma sap lal fulat liki nu kemwa. Kut akos guferment lun met fwal nu ke ella lasr, ke ma inge kut ‘sang nu sel Sisar ma lun Sisar.’ Tusruktu kut tia lela kutena ma in kutongye kunokon lasr su yok liki nu kemwa—‘in sang nu sin God ma lun God.’ (Mattu 22:21) Kut nu kemwa etu la in oru ou inge, kut sifwanu oru “me srungeyuk” ke mutanfwal puspis, tusruktu kut eis ma inge oanu ipen me mol su met tumal lutlut enenu in moli. Record ke court lun Met Lo lun Jeova ke century ak20 inge sie me akpayeye ke kaifweung lasr in kurunganang lalafongi lasr. Ke kasru a ke kolyuk lun Jeova kut fwa tafwela a “tia tari in luti a fwakulak peng mwo.”—Orekma 5:42.
[Footnotes]
a Matthew Henry’s Commentary on the Whole Bible el aketeye la met Ju nu kemwa su lain “elos som forfor na paye nu sin met inge [met Pegan] su elos asrouki nu sa meet, a fwakak nu selos ma elos nunku ku nunuk koluk su elos sifwanu kineuk, tu in filiye ke nunuk lalos tia srunga mukena, a ouyepa nunuk koluk nu sin met Kristian.”
b Tokin me sramsram kikiap inge akkalemyeyuk ke sie newspaper fwin an Russia (srumonyuk ke paragraph 15), Met Lo lun Jeova elos siyuk sin Presidential Judicial Chamber for Informational Disputes of the Russian Federation in kalweni a tuni kas kikiap inge ke newspaper. Ke pal futoto somla court inge el oru sulela lal in sang kai upa ke newspaper inge meyen el orala sie news sito.—Srike liye Awake!, November 22, 1998, sra 26-7.
c Srike liye me lutlut inge “Aksumwosye a in Akkeye Mwosasu” ke sra 19-22.
Ya Kom Esam?
◻ Efu Met Lo Lun Jeova elos ekla “me srungeyuk”?
◻ Nunuk fuka kut akkalemye nu selos nu kemwa su tia wi kut ke lalalfongi lasr?
◻ Ke pal se kut osun nu sin met su lain kut, kain in me srikasrak mwo fuka Jisus el likiye nu sesr?
◻ Fwin met elos akkolukye kut, fuka kut ku in orekmakin kas in kai su akkalemye la oasr “sie pal in misla a sie pal in kaskas”?
[Study Questions]
1, 2. Efu Met Lo lun Jeova elos tia lut ke me lain, tusruktu kena fuka oasr yurolos?
3. Mea sripe se paenang Met Lo lun Jeova elos sun srunga sesumwos lun met?
4, 5. (a) Efu Met Lo lun Jeova elos sun me sramsram kikiap lun Met? (b) Su pal nu kemwa oasr kunokon yok ke kolyai su sun met kulansap lun Jeova?
6. Efu arulanu yok sripe in srukye nunuk sumwos nu sin met nu kemwa su muta likin congregation?
7. Mea kut ku in toeni nu ke orekma in kurunganang moul lasr tu in “wangin tunesr ke fwalu”?
8. Efu kai se inge su sapkin nu sesr in kurungin kut sifwanu tu in wangin tunesr ke fwalu tia sang sukosok nu sesr in pilesru kutu met?
9. Sie nunuk sumwos, su fwal nu ke Ma Simusla el mokle kut in sramsram ke inkanek fuka nu selos nu kemwa su tia wi kut ke lalalfongi lasr
10, 11. Fuka Jisus el akkalemye la el etu fwin (a) “sie pal in misla”? (b) “sie pal in kaskas”?
12. Mea luma a ma sikyuk su purakak Poul a Barnabas in sramsram ke pulaik fwin an Iconium?
13. Ke pal se ma kut osun nu ke kas in akkoluk, pal nu kemwa nge “pal in misla”?
14. Ke inkanek puspis saap kut ku in akkeye lalalfongi lasr nu sin kutu met?
15. Mea sie me srikasrak su akkalemye fuka Met Lo lun Jeova elos sun me sramsram sito ke news?
16, 17, a ke pok ke sra 16. (a) Mea The Watchtower el fwak ke sie pal fwin ke akmwuk in sang topuk ke me sramsram kikiap ke news? (b) Ye luma a ma sikyuk fuka Met Lo lun Jeova elos ku in sang topuk ke me sramsram sito ke news?
18. (a) Efu kut tia enenu fulela lun guferment lun met ke orekma in luti lasr? (b) Mea inkanek su kut oru elos fwin etukla liki kut sukosok lasr in luti?
19. (a) Mea sikyuk kut fwin ‘sang nu sin Sisar ma lun Sisar a sang nu sin God ma lun God’? (b) Mea kut nu kemwa kaifweung in oru
[Box on page 28]
INKANEK IN AKSUMWOSYE SIE ME SRAMSRAM SITO
“Ke sie mura pangpang Yacuiba fwin an Bolivia, sie un alu pangpang evangelical el orala akmwuk ke sie TV station in akkalemye ke TV sie pitse su met luti kikiap el orala. Ke sripen me purakak koluk su pitse se inge el akkalemye nu sin met, paenang met elder elos sulela in muteta ke TV station luo a moli aur meyen elos lungse TV station inge in akkalemye nu sin met video cassette inge su oasr sifwe Jehovah’s Witnesses—The Organization Behind the Name a The Bible—A Book of Fact and Prophecy. Tokin el liye cassette lun Society, sie met su oasr radio station el mulat ke sripen ma kikiap puspis su akkalemyeyuk ke program lun met luti kikiap paenang el sang nu sin Met Lo lun Jeova sie pal in sulkakin ke radio station lal toeni lulap lalos su apkurun in tuku ke wangin molo. Met ma wi ke toeni lulap arulanu pukanten, a met fwokpap puspis elos mutamwauk in siyuk kusensiyuk oaru ke pal se ma Met Lo lun Jeova elos sunolos ke pal in forfor sie loom nu ke sie loom.”—1997 Yearbook of Jehovah’s Witnesses, sra 61-2.
[Picture on page 29]
Ke kutu pal, Jisus el sang topuk ye mutun met nu kemwa in aksumwosye sramsram kikiap lun met su lainul