Srungeyukla Ke Wangin Sripe

“Elos srune yu ke wangin sripe.”​—JON 15:25.

1, 2. (a) Efu ku kutu met elos lut ke pal se Met Kristian elos akkolukyeyuk ke kas koluk, tusruktu efu ku kut tia enenu in lut ke kain in kas inge? (b) Kalme fuka ke kas se inge “srunga” kut ku in aketeye ke me lutlut inge?

MET Lo lun Jeova elos kaifweang in moulkin moul fwal nu ke masap koneyukyak ke Kas lun God. Ke sripe se inge, elos engankin sie e mwomwo in an puspus. Tusruktu, kutu pal elos akkolukyeyuk. Nu ke me pupulyuk, oasr sie met fulat ke gufernment in siti lun St. Petersburg, Russia, el esamyuk: “Oasr met elos reporti nu sesr la Met Lo lun Jeova pa sie u ku alu srisrik su orekma in lukma a uniye tulik puspus a onelosi sifwana pa.” Tusruktu tokin el wi orekma yurin Met Lo lun Jeova ke sie toeni lulap pangpang international convention, met fulat se inge el fwak: “Inge nga liye met mwo, kulang . . . Elos inse misla a fwokpap, a elos arlana lungse sie sin sie.” El tafwela in fwak pa: “Nga tia na kalem ka la efu ku metu ku in fwak ma kikiap kelos.”​—1 Piter 3:16.

² Met kulansap nukemwa lun God elos tia insemwomwo ke met puspus elos fwak mu elos met orekma koluk, tusruktu elos tia lut ka fwin met puspus elos akkolukyelos. Jisus el fwak tari ke kas in sensen nu sin met tuma lutlut nukemwa lal: “Fwalu fwin srungekomwosla, komwos etu tu fwalu srunge yu meet liki komwos. . . . Tu kas se su simla in manu lalos fwa akpayeyuk, ‘Elos srunge yu ke wangin sripe.’ ”a (Jon 15:18-20, 25; Sam 35:19; 69:4) In pal meeta el fwakak tari nu sin met tuma lutlut puspus lal: “Elos fwin pangpang leum in loom sel Beelzebub, fuka yokeyen pangpang met in loom sel oinge?” (Mattu 10:25) Met Kristian nukemwa elos etu la in muteng ke kas in akkoluk puspus pa inge kutu ipen “sak in keok” su elos eis ke pal se elos ekla met tuma lutlut lun Kraist.​—Mattu 16:24.

3. Lupa ka me keok su met nukemwa su oru alu paye elos kolyaiyuk ka?

³ Me kolyai nu sin met puspus su oru alu paye sikyuk tari ke pal loeloes somla, mutamwauk in pal lal “Ebel met sumwosmwos.” (Mattu 23:34, 35) Ma inge tia sikyuk nu sin met su wi ke alu paye mukena. Jisus el fwak la met tuma lutlut lal fwa “srungeyuk sin met e nukemwa” ke el. (Mattu 10:22) Oayepa, met sap Poul el simusla la met kulansap nukemwa lun God​—wekunang kais sie sesr—​fwa kolyaiyuk. (2 Timote 3:12) Mea sripe lun ma inge

Sropon Srunga su Wangin Sripe

4. Baibel el akkalemye fuka sropon me srunga nukemwa su tia sumwos?

⁴ Kas lun God akkalemye la ke mutamwauk me, oasr sie met su tia liyeyuk el srunga met puspus su wi ke alu paye. Nunku ke orekma sullalel in uniye met se meet Ebel ke sripen lalalfongi. Baibel el akkalemye la mokul akmas se wiyel inge, pa Kein, el “ma lun el su koluk,” Setan su Devil. (1 Jon 3:12) Kein el akkalemye oiya lal Setan, a Devil el orekmakunal in akpayeye nien sun koluk lal. Baibel el akkalemye pa oiya lal Setan ke el orekma upa in akkolukyel Job a Jisus Kraist. (Job 1:12; 2:6, 7; Jon 8:37, 44; 13:27) Buk lun Fwakyuk el akkalemye ke sropon me kolyai lun met tuma lutlut nukemwa lun Jisus, el fwak: “Devil el fwa sisla kutu sumwos nu in prison tu lan srike komwos.” (Fwakyuk 2:10) Aok, Setan pa sropon me akkoluk su wangin sripe in lain met kulansap nukemwa lun God.

5. Efu ku Setan el lain met nukemwa su oru alu paye?

⁵ Mea sripen srunga lal Setan ke met nukemwa su oru alu paye? Ke sie akwuk kutasrik lun insefulat upa, Setan el lain “Togusra se su kamwul su moul ma patpat,” Jeova God. (1 Timote 1:17; 3:6) El fwak mu wangin sukosok lun ma orekla nukemwa lun God ye kolyuk lal a wangin fwinne sie met el kulansapul ke lungse paye, metu oru orekma in kulansap lalos ke sripen rapku lun me insemwomwo su elos fwa eis. Setan el fwak mu fwin God el lela in srike met nukemwa, el ku in furokla kais sie selos in tia kulansap nu sin God. (Genesis 3:1-6; Job 1:6-12; 2:1-7) Ke kas in akkolukye oiya mwo lun Jeova el fwak mu el sie su sullalel, kikiap, a kuf, Setan el srike in oru kolyuk lal oana Jeova el oru in kol kosrao a fwalu nu fon. Paenang, mulat upa lal in lain met kulansap nukemwa lun God yokelik ke sripen kena lal nu sin met nukemwa in alu nu sel.​—Mattu 4:8, 9.

6. (a) Fuka kut akkalemye kut sifwana nu ke kusensiyuk ke sumwos lun God in kol? (b) Fuka etauk ke kusensiyuk inge kasre kut in sruokye oaru lasr? (Liye pok, iin sra 10.)

⁶ Ya kom liye me sramsram se inge kasre kom? In oana sie met kulansap lun Jeova, saap kom koneak la ke kom oru ma lungse lun God kaifweang paye eneneyuk, su yok me insemwomwo puspus tuku ka. Tusruktu, mea kom fwa oru fwin ma sikyuk nu ke moul lom paenang in upa, oasr pa me akkeok, ke kom tafwela in akos masap a me siyuk nukemwa lun Jeova? A fuka fwin wangin me insemwomwo kom ku in eis ke orekma in kulansap lom? Ya kom fwa fwak mu wangin sripe in tafwela in kulansap nu sin Jeova? Ku lungse lom nu sin Jeova a kaksak paye lom ke oiya sakuruk puspus lal mokle kom in tafwela fwafwasryesr lom ke inkanek nukemwa lal? (Duteronomi 10:12, 13) In lela Setan in akkolukye kut, Jeova el sang pal mwomwo nu sin kais sie sesr in orala me top lasr sifwana ke me sramsram in lain lal Setan.​—Soakas 27:11.

“Ke Met Akangonye Komwos”

7. Inkanek fuka Setan el orekmakin in srife kut in forla liki Jeova?

⁷ Lela kut in loang akmwoye nu ke inkanek in kutasrik su Setan el orekmakin ke kaifweang lal in sang akpayeye kas kikiap lal in lain Jeova a met kulansap nukemwa lal​—inkanek lal orekmakinyuk ke kas kikiap. Jisus el panglol Setan “papa tumun ma kikiap.” (Jon 8:44) Kas se inge Devil, el kalmekin nu ke “met kaskas kikiap,” akkalemye ke met su in ngun inge la el pa met se meet su kaskaskin kas kikiap in lain God, lain kas mwolana lal, a e mutal lal. Devil el orekmakin kas koluk ke inkanek tia sumwos, kas kikiap lain kutu met, a kas kikiap upa in lain sumwosmwos lun God in kol, a el orekmakin inkanek koluk inge nukemwa in sang akkkolukye pa met kulansap oaru nukemwa lun God. In kaskas kikiap sang lain Met Lo puspus inge, el oru me srike in upala pal nukemwa nu selos tu in upa elos in muteng.

8. Fuka Setan el akkolukyel Job, a mea fwokin ma inge?

⁸ Nunku ke ma sikyuk nu sel Job, su kalmekin inel nu ke “Object of Hostility.” In wekunang nu ke tula lun ma saok lal Job, mise lun tulik natul nukemwa, mas upa su el sun, Setan el oru Job elan oana sie met koluk su kaiyuk sin God. Fwinne el sunakinyuk sin met puspus, tusruktu Job el akkolukyeyuk, sin sou lal a met kamwuk futoto lal. (Job 19:13-19; 29:1, 2, 7-11) Oayepa, ke inkanek lun met su purakak kaskas kikiap puspus, Setan el kaifweang in ‘kunausla Job ke kas puspus,’ ma se meet pa in fwakak mu el orala ma koluk upa a tokin ma inge elos nununkel oana met su oru ma koluk. (Job 4:6-9; 19:2; 22:5-10) Sie me akmunas upa nu sel Job!

9. Mea orek nu sel Jisus paenang el ekla oana met koluk?

⁹ In oana met se meet su akfulatye yok sumwosmwos lun God in kol, Mwen nutin God el ekla ma se meet in mulat upa lun Setan. Ke Jisus el tuku nu fwalu, Setan el kaifwe in akkolukyel ke inkanek nu ke ma lun ngun, oana ke el oru nu sel Job, in oru Jisus el an oana sie met koluk. (Isaia 53:2-4; Jon 9:24) Met puspus panglol oana sie met srui a kain mongo a elos fwak mu ‘oasr dimon yurol.’ (Mattu 11:18, 19; Jon 7:20; 8:48; 10:20) Elos kikiap in fwak mu el kaskaskou. (Mattu 9:2, 3; 26:63-66; Jon 10:33-36) Ma inge akasoryel Jisus, ke sripen el etu la ma inge ku in oru in me akkolukye Papa tumal. (Luk 22:41-44) Ke saflaiye, Jisus el anwuki oana sie met koluk su selngawiyuk. (Mattu 27:38-44) In sruokye oaru sumwosmwos, Jisus el arlana muteng ke “kolyai lun met koluk.”​—Hibru 12:2, 3.

10. Fuka met lula sin met akmusrala in elos pa sropon ma su Setan el lungse in akkolukye ke pal inge?

¹⁰ In pal inge, met lula sin met kulansap akmusrala lun Kraist elos sun pa mulat upa lun Setan. Setan el akkalemyeyuk oana “met tukakunak met lili nukemwa [lun Kraist]. . . , su tukakunalos ye mutun God len a fong.” (Fwakyuk 12:9, 10) Mutamwauk ke pal se el sisila liki in kosrao a tuku nu fwalu, Setan el kaifweang in akkeokye met lili nukemwa lun Kraist oana me srungeyuk su wangin eneneya. (1 Korint 4:13) In kutu mutanfwal, elos akkolukyeyuk in pangpang oana sie alu srisrik su sensenkinyuk, oana ma sikyuk nu sin met Kristian in century se meet. (Orekma 24:5, 14; 28:22) Oana ma akkalemyeyuk tari ke mutamweyen me lutlut inge, elos akkolukyeyuk ke kas kikiap. Fwinne oinge, “ke mwolana a akkolukye, ke pengpeng koluk a pengpeng mwo,“ met lili akmusrala lun Kraist, su eis kasru sin met puspus su welulos pangpang “sip ngie,” elos inse pusisel ke kaifweang lalos in ‘liaung masap lun God a sruokye lo lun Jisus.’​—2 Korint 6:8; Jon 10:16; Fwakyuk 12:17.

11, 12. (a) Sripe fuka ku in paenang kutu kas in akkoluk su Met Kristian elos sun? (b) Ke inkanek puspus fuka met Kristian elos ku in sun me keok su tia sumwos ke sripen lalalfongi lalos?

¹¹ Paye, tia kas in akkoluk nukemwa su sun kutu sin met kulansap lun God tia orek ke “ma sumwosmwos.” (Mattu 5:10) Kutu sin ma upa inge tuku ke oiya sesumwos lasr sifwana. Wangin me insemwomwo kut fwin “oru ma koluk a kut popo ka, [kut] mongfusesr ka.” Tusruktu, fwin sie met Kristian “ke sripen pulakin mwo nu sin God, mongfusesr ye me keok puspus a keok ke wangin sripe,“ ma inge mwo ye mutun God. (1 Piter 2:19, 20) Ke sripe fuka ma inge ku in sikyuk?

¹² Kutu sin met elos akkolukyeyuk ke sripen elos tia wi ke akwuk lun kutena kain in fasin orek nu ke funeral su tia fwal nu ke ma simusla. (Duteronomi 14:1) Met lo fwusr puspus elos akkolukyeyuk ke sripen elos sruokye ku masap sumwos lun Jeova ke oiya nasnas. (1 Piter 4:4) Kutu sin papa a nine su met Kristian elos nununkeyuk ke inkanek sito oana “seoaru” ku “sullalel” ke sripen elos siyuk ke sie inkanek in ono su wangin sra ka in orekmakin nu sin tulik natulos. (Orekma 15:29) Met Kristian puspus pilesreyuk sin sou a met tulan lalos ke sripen elos ekla met kulansap lun Jeova. (Mattu 10:34-37) Met nukemwa inge elos fwasr tokin me srikasrak su tuku sin met palu nukemwa a sin Jisus sifwana in sun me keok su tia mwo.​—Mattu 5:11, 12; Jemes 5:10; 1 Piter 2:21.

Muteng Ye Kaskaskou

13. Mea ku in kasre kut in sruokye oiya mwo lun ngun ke pal kut sun kas in akkoluk upa?

¹³ Kut fwin sun kas in akkoluk upa ke sripen lalalfongi lasr, saap kut munasla, oana met palu Jeremaia, a kut pula la kut tia ku in tafwela in oru kulansap lasr nu sin God. (Jeremaia 20:7-9) Mea ku in kasre kut in sruokye oiya mwo lasr in ngun? Kaifweang in liye ma puspus su fwal nu ke nunak lun Jeova. El liye elos su sruokye oaru lalos ye me keok oana met su eis kutangla, tia oana met su munasla fuleak. (Rom 8:37) Srike in pitsaela ke nunak lom met su kulansap nu sin God fwinne oasr ma upa puspus ku kas in akkoluk puspus Setan el oru nu selos​—oana Ebel, Job, Meri nine kiyel Jisus, a kutu pa met oaru in pal meeta, wekunang met lili puspus in pal inge. (Hibru 11:35-37; 12:1) Sifwilpa nunku ke oaru lalos. Pukunyeng lulap lun met oaru puspus paing kut in welulos usrui fwalu su akola nu selos su fwa kutangla fwalu ke lalalfongi lalos.​—1 Jon 5:4.

14. Fuka pre su tuku ke insiesr akkeye kut in sruokye oaru lasr?

¹⁴ Fwin ‘nunak puspus su akasorye puseni ke insiesr,’ kut ku in suk kasru nu sin Jeova ke pre, a el fwa ase me akpwar a akkeye kut. (Sam 50:15; 94:19) El fwa ase nu sesr lalmetmet su kut enenu in sang kosrala me srife a in kasre kut in nunku pal nukemwa ke me enenu yok sripe, in oana ke sumwosmwos lun Jeova in kol, su pa inge sripe yok paenang met kulansap nukemwa lal sun me keok ke sripen me lain su wangin sripe. (Jemes 1:5) Jeova el ku in ase pa nu sesr “misla lun God su alukela ma eteyuk nukemwa.” (Filippai 4:6, 7) Misla su tuku sin God kasre kut in orekmakin inse misla a ku ke pal in me akkoluk upa, a in tia oru kut in alolo ku sangeng. In orekmakin ngun mutal lal, Jeova el ku in kasre kut in tu ku ke kain in ma upa nukemwa su el lela nu fwesr.​—1 Korint 10:13.

15. Mea ku in kasre kut in fwasr liki mulat ku toasr kut fwin sun me keok?

¹⁵ Mea ku in kasre kut in tia toasr ku mulat nu selos su srunge kut ke wangin sripe? Esam la met lokwalok se meet lal pa Setan a dimon puspus lal. (Efesus 6:12) Fwinne kutu met elos sifwana lungse in oru me kolyai nu sesr, pus sin met su lain met kulansap lun God elos oru oinge ke sripen nunikin ku ke me purakak lun met puspus. (Daniel 6:4-16; 1 Timote 1:12, 13) Jeova el lungse tu “met e nukemwa” in oasr pal mwo lalos in “moliyukla a tuku in etu ma paye.” (1 Timote 2:4) Ke ma inge, met puspus su lain kut in pal meeta elos ekla met Kristian wiyesr in pal inge ke sripen elos liye orekma a oiya mwo lasr su wangin meta. (1 Piter 2:12) In wekunang ma inge, kut ku in lotela pa me srikasrak lal Josef wen natul Jekob. Fwinne Josef el sun me keok upa su orekla sin tumulel wiyel ke tulik natul Jekob sin nine saye, el tia toasr selos. Efu ku el tia? Meyen el etu la Jeova el wi pa ke ma sikyuk inge, el lela ma inge in sikyuk a sang kasru lal nu ka in akpayeye akwuk Lal. (Genesis 45:4-8) Me keok su tia sumwos su kut sun Jeova el lela ma inge in sang mwolana nu ke inel.​—1 Piter 4:16.

16, 17. Efu ku kut tia enenu in nunkula yok ke kaifweang lun met puspus su lain in kutongye orekma in luti peng mwo?

¹⁶ Kut tia enenu in nunku yok fwin oasr pal met su lain kut elos kutongye kapkapek lun peng mwo. Jeova ke pal inge el mokle mutanfwal nukemwa ke inkanek in sang ma lo su orek fwin fwalu nu fon, a ma saok puspus elos mutamwauk in sikyuk. (Haggeai 2:7) Jisus Kraist, Met Seperd Mwomwo, el fwak: “Sip nutik elos long pusrek, a Nga etelos, a elos fwasr tukuk. A Nga sang nu selos moul ma patpat, . . . a wangin sie fwa tulakunalosla liki in pouk.” (Jon 10:27-29) Lipufon elos wi pa ke orekma in kosrani lun ngun yok sripe se inge. (Mattu 13:39, 41; Fwakyuk 14:6, 7) Ke sripe inge, wangin kutena orekma tuku sin met nukemwa su lain ku in kutongye akwuk lun God.​—Isaia 54:17; Orekma 5:38, 39.

¹⁷ Pal puspus, orekma lun met lain oasr fwako su tia fwal nu ke ma elos tupan ka. In sie an fwin an Africa, kaskas kikiap upa ke Met Lo lun Jeova sulkakinyukelik, wekunang kas kikiap su fwak mu elos alu nu sin Devil. Ke sripe inge, pal nukemwa Met Lo elos oru muteta lalos, Grace el kasrusr nu in loom sel a el wukwuk ke elos som. Oasr sie len pastu ke alu lal el eis sie me rid lasr a fwak nu sin met nukemwa su oasr we in tia ridi ma inge meyen ma inge oralos in som liki lalalfongi lalos. Ma inge oru Grace el an nunku yok ka. Ke kutu pal tok Met Lo elos oru orekma lalos, el tia mwukla a el sramsram nu selos a el eis copy natul sifwana ke me rid inge. Oasr sie lutlut ke Baibel mutamwauk in orek, a in yea 1996 el baptaisla. Ke pal inge Grace el orekmakin pal lal in suk kutu pa met su saap eis pa etauk tia sumwos ke Met Lo lun Jeova.

Akkeye Lalalfongi Lom ke Pal Inge

18. Efu kut enenu in akkeye lalalfongi lasr meet liki me srife upa sikyuk, a fuka kut ku in oru oinge?

¹⁸ Ke sripen Setan el ku in oru kolyai ke inkanek lun me lain su tia sumwos ke pal nukemwa, paenang arulanu yok sripe in akkeye lalalfongi lasr ingena. Fuka kut ku in oru ma inge? Sie report tuku ke sie mutanfwal su Met Lo lun Jeova elos kolyaiyuk we el fwak: “Oasr sie ma kalem na paye: Elos su oasr oiya mwo lun ngun a oasr lungse paye ke ma paye lun Baibel tia upa nu selos in tu ku ke me srife puspus sikyuk. Tusruktu elos su tia wi ke meeting pal puspus ‘ke pal mwo,’ tia wi pal nukemwa ke orekma lun forfor, a tia tu ku ke ma srisrik a fusresr in fuleak fwin sun ‘me srike upa.” (2 Timote 4:2) Kom fwin akilen an su kom enenu in akmwoye, kom kaifweang in aksumwosye ma inge ke pal sa a tia patla.​—Sam 119:60.

19. Fuka oaru lun met kulansap lun God akpayeyuk ye me lain upa su tia sumwos?

¹⁹ Oaru lun met nukemwa su alu nu sin God ke inkanek paye ye me keok ke sripen me lain upa lun Setan pa me akpayeye nu ke ku, fwal, a sumwos lun kolyuk lun Jeova. Oaru lalos oru insien God in engan. Fwinne met puspus elos kaskas koluk nu selos, tusruktu el su mwolana lal fulat liki fwalu a kosrao “el tia mwekin kelos, tu elos pangnol God lalos.” Aok, ke met oaru nukemwa inge, fwal in fwak: “Fwalu kupansumwol kalos.”​—Hibru 11:16, 38.

[Footnotes]

Ya Kom Ku In Aketeye?

• Mea sripen me lain tia sumwos su orek nu sin met nukemwa su oru alu paye?

• Fuka Setan el orekmakin kas in akkoluk in sang kunausla oaru lal Job a Jisus?

• Fuka Jeova el akkeye kut in tu ku ke kut sun me lain upa lun Setan?

[Box/Picture on page 10]

Elos Kalem ke Kusensiyuk Paye

Sie sin Met Lo lun Jeova fwin an Ukraine, sie an su orekma in luti peng mwo lun Togusrai tia fulfulla we ke lusen pal loes liki yea 50, el fwak: “Ma sikyuk nu sin Met Lo lun Jeova tia enenu in tuniyuk mukena ke ma kutu met elos oru nu sesr. . . . Met kol puspus lun anu elos oru orekma lalos. Fwin sie gufernment el wanginla a siepa gufernment el oru kolyuk lal, met kol puspus elos ekulla oaru lalos nu ka, tusruktu kut tia na ekla. Kut akilen la sripe paye lun me keok lasr akkalemyeyuk tari in Baibel.

“Kut tia nunku kesr sifwana la kut met ninukin su akkolukyeyuk sin met sullalel. Me kasru yok nu sesr in muteng tuku ke kalem mwomwo su oasr ke kusensiyuk su siyukyuk ke imae Eden​—su siyuk ke sumwosmwos lun God in kol. . . . Kut tu ku ke kusensiyuk su kupasr tia nu ke me insemwomwo mukena lun metu a nu ke me insemwomwo pa lun el su Fulatlanu lun kosrao a fwalu. Oasr etauk yok lasr ke kusensiyuk su oasr ka. Ma inge akkeye kut a kasre kut in sruokye oaru lasr fwinne ma sikyuk el upalanu.”

[Picture]

Victor Popovych, el kapuri in 1970

[Picture on page 7]

Su sang kas in kasru nu ke orekma ku kas in akkoluk su Jisus el sun?

[Picture on page 9]

Job, Meri, a met kulansap puspus lun God in pal inge, oana Stanley Jones, elos akpayeye sumwos lun God in kol