‘Fwafwasyesr Ou Inge In Kraist’
“Ke ma inge, oanu komwos eis tari Leum Jisus Kraist, komwos in ouyepa fwafwasyesr ou inge in el.”—KOLOSSE 2:6.
YA oasr pal kom srike tari in liye sie tulik mokul el fwasr yurin papa tumal? Tulik srisrik el etawi inkanek in fwasr nu kemwa lun papa tumal, mutal arulanu engun na paye; papa tumal el kasrel, a ku in akilen ke mutal lungse a insemwomwo lal. Fwal nu ke pitse se inge, Jeova el orekma oanu ma pitse se inge el oru in akkalemye sie moul in kulansap nu sel ke oaru. Ke sie me pupulyuk Kas lun God el fwak la mokul oaru inge pangpang Inuk “el fwafwasryesr yurin God [paye].”—Genesis 5:24; 6:9.
2 Oanu sie papa kulang su akola in sang kasru nu sin tulik fwusr nutul su fwasr yurol, Jeova el akola in ase nu sesr me kasru yok emeet su kut enenu. El supwema Mwen kulu nutul fwin fwalu. Ke lusen moul lal nu fon fwin fwalu, Jisus Kraist el oru orekma na paye oanu Papa tumal in kosrao ke inkanek sumwosmwos. (Jon 14:9, 10; Hibru 1:3) Ke ma inge tu in fwasfwasyesr yurin God, kut enenu in fwafwasyesr yurin Jisus. Met sap Poul el simusla: “Ke ma inge, oanu komwos eis tari Leum Kraist Jisus, komwos in ouyepa fwafwasyesr ou inge in el, okala a musa in el, a ku in lalalfongi lomwos, aok, oanu komwos lutiyuk ka tari, a yokyokelik in sang kulo.”—Kolosse 2:6, 7.
3 Meyen elos lungse in fwafwasyesr yurin Kraist, paenang tulik lutlut fwokpap nu kemwa elos eis baptais. (Luk 3:21; Hibru 10:7-9) Fwin fwalu nu fon, ke yiu 1997 na, pus liki 375,000 met elos sulela in oru orekma saok inge—sie average su oasr ke 1,000 kutu met ke kais sie len. Kain in kapek se inge use me insemwomwo! Tusruktu kas lal Poul su simusyukla in Kolosse 2:6, 7 akkalemye la srakna oasr kutu ma enenu ke fwafwasryesr yurin Kraist sayen orekma in eis baptais. Kas Greek inge su orekmakin ke “fwafwasyesr ou nge” akkalemye sie orekma su tia tui. Sayen ma inge, Poul el aketeye la oasr ma enenu akosr ke fwafwasyesr yurin Kraist: Okala in Kraist, musa in el, ku in lalalfongi, a yokyokelik in sang kulo. Lela kut in tuni kais sie nu ke ma akosr inge a liye fuka ma akosr inge el kasru kut in tafwela in fwafwasyesr yurin Kraist.
Ya Kom ‘Okala In Kraist’?
4 Ma se meet, Poul el simusla, kut enenu in ‘okala in Kraist.’ (Srike liye Mattu 13:20, 21.) Fuka sie met el ku in orekma tu lan okala in Kraist? Aok, okan sak soko tia ku in liyeyuk, tusruktu ma inge arulanu yok sripe ke sak—el oru lan fukoko a kasrel ke ma enenu lal. In oupanu ou inge, me srikasrak a me luti lal Kraist ase nu sesr sie kasru su tia ku in liyeyuk, ma inge el sremla nu ke nunkesr a insiesr. Mutamwauk ke ma inge el akkeye a kasru kut. Kut fwin lela ma inge in kol nunuk lasr, orekma a sulela su kut oru, ma inge ku in mokle kut in mwolela moul lasr nu sin Jeova.—1 Piter 2:21.
5 Jisus el lungse na paye etauk su tuku sin God. El pupulyukin ma inge ke me mongo. (Mattu 4:4) Aok, ke Sramsram lal Fwin Eol, el orekmakin buk alkosr ke Ma Simusla lun Hibru pal 21. In orekmakin me srikasrak lal, kut enenu in oru orekma fwal nu ke ma met sap Piter el kaifwe kut in oru—“in lungse” me mongo in ngun “oanu tulik tufwa isusla.” (1 Piter 2:2) Ke pal se ma tulik el tufwa isusla el lungse me mongo, el akkalemye na paye lungse yok lal inge. Fwin ke pal inge kut tianu pulakin kain in oiye se inge ke me mongo in ngun, kas lal Piter el kaifwe kut in “oru” kain in lungse se inge. Fuka in oru ou inge? Akmwuk su ku in konoiyukyuk in Sam 34:8 saap ku in kasru kut: “O pulakin a liye tu Jeova el mwo.” Kut fwin “pulakin” pal nu kemwa Kas lun Jeova, in Baibel, kut fwin ridi ma inge ke kais sie len, na kut ku in liye la ma inge me akkeye na paye ke ma lun ngun a arulanu mwo. Tia pat toko, lungse lasr ka el kapek na paye.
6 Tusruktu, arulanu yok sripe in akfwusesrye na paye me mongo su kut kangla. Ke ma inge kut enenu in kalweni ke nunuk lasr ma kut ridi tari. (Sam 77:11, 12) Ke sie me pupulyuk, ke kut ridi buk inge The Greatest Man Who Ever Lived, kais sie sapter arulanu yok sripe nu sesr kut fwin tui kitin pal a siyuk sesr sifwanu: ‘Kain in oiye mwo fuka lal Kraist Nga ku in liyeyuk nu ke me sramsram inge, a fuka Nga ku in orekmakin ma inge ke moul luk?’ In kalweni ma kut ridi ke inkanek inge ma inge sang kasru yok nu sesr tu kut in ku in orekmakin ma kut lotela tari. Na, fwin oasr pal la kut enenu in oru sulela, kut ku in siyuk sesr sifwanu ke ma Jisus el oru ke oiye se inge meet. Kut fwin oru sulela fwal nu ke ma el oru meet, na kut sang me akpayeye la kut okala na paye in Kraist.
7 Poul el ouyepa kaifwe kut in eis “mongo upa,” ma paye loal ke Kas lun God. (Hibru 5:14) Saap in ridi Baibel nu fon pa nien sun se meet lasr ke ma se inge. Na oasr kutu me sramsram su fwal nu ke lutlut lasr, oanu lango lal Kraist, mwoleaung puspis su Jeova el orala nu sin met kulansap lal, ku kutu nu ke kas palu in Baibel. Oasr me lutlut puspis su ku in kasru kut in eis a akfwusesrye me mongo upa in ngun. Mea nien sun lasr ke kut eis kain in etauk inge? Tia tu in oasr sripe lasr in akkalemye inse fulat, a kut lungse in musaiyuk lungse lasr nu sin Jeova a in futoto nu sel. (1 Korint 8:1; Jemes 4:8) Kut fwin oanu musrensral na paye in eisla etauk se inge, orekmakin ma inge ke moul lasr, a orekmakin ma inge in kasru kutu met, na kut etawi na paye Kraist. Ma inge ku in kasre kut in okala na paye in el.
Ya Kom ‘Musa in Kraist’
8 Fwin ke ma enenu akakosr ke fwafwasyesr yurin Kraist, Poul el pisrpisr in ekulla sramsram lal ke ma ku in liyeyuk nu ke siepa—mutamwak ke sak nu ke sie loom. Kut fwin nunku ke sie loom su met orekma elos srakna musa, kut nunku tia ke foundeson mukena a ouyepa ke loom su akola in tu ye mutun metu, ke inkanek lun orekma upa. In oupanu ou inge, kut enenu in oru orekma yok in musaiyuk orekma a oiye su oanu Kraist. Kain in orekma upa inge met puspis elos etu, oanu Poul el simusla nu sel Timote: ‘Lela kapkapek lom in kalem nu sin met e nu kemwa.’ (1 Timote 4:15; Mattu 5:16) Mea kutu nu ke orekma lun met Kristian su ku in musaikutla?
9 Jisus el pakiye kut in oru orekma in fwakak a luti ke peng mwo. (Mattu 24:14; 28:19, 20) El orala me srikasrak mwo, ke el orek lo ke pulaik a ku. Paye kut tia ku in oru orekma na paye oanu ma el oru meet. Tusruktu, met sap Piter el orala nien sun inge nu sesr: “A komwos in akmutalye Kraist oanu Leum insiomwos, a komwos in akola pal nu kemwa in topuk nu sin met nu kemwa su siyuk sumwos sripen fwinsrak se su on in komwos, a ke fulpap a sangeng.” (1 Piter 3:15) Kom fwin nunku la kom tia “akola pal nu kemwa in topuk,” na lela kom in tia asor. Oru nien sun mwo lom su ku in kasru kom in kais kutu srisrik in kapek ke oiye se inge. Akola ke pal sa meet liki pal in orekma lun forfor ku in kasru kom in akkalemye kain in me sramsram puspis ku orekmakin fus se ku luo ke me sramsram lom. Saap kom ku in orala nien sun lom in akpusye me rid su tuku ke Baibel su kom ku in kitakut, in oru return visit puspis, ku in mutamwauk sie Baibel study. Lela kut in tia nunku mukena ke pisen—aur, ke me rid su kut kitakut, ku ke Baibel study—a kut enenu in loang ke kapkapek mwo. In orala nien sun fwal a in kaifweung in sun ma inge ku in kasru kut in pulakin insemwomwo ke kut orekmakin moul lasr ke orekma lun forfor. Pa inge ma Jeova el lungse kut in oru—in kulansapal “ke engun.”—Sam 100:2; srike liye 2 Korint 9:7.
10 Oasr pa kutu orekma su kut oru in congregation su ku in musa in Kraist. Ma yok emeet pa in akkalemye lungse sie sin sie, meyen pa inge akul lun met Kristian paye. (Jon 13:34, 35) Ke pal se ma kut srakna lutlut, pus inmaslosr arulanu futoto nu sin met luti lasr, tia koluk pa inge. Tusruktu, ya kut ku in akos kas in kai lal Poul in “yokelik” ke kut kaifweung in etu kutu met in congregation? (2 Korint 6:13) Met elder nu kemwa elos ouyepa enenu lungse a insemwomwo lasr nu selos. Ke kut akesrui nu selos, ke kut loang a eis kai lalos su tuku ke Ma Simusla, kut oru orekma upa lalos in fwusesr. (Hibru 13:17) In pal se na, ma inge el sang kasru ke musa lasr in Kraist.
11 Baptais el sie pal in engun! Tusruktu, lela kut in tia nunku la tokin ma inge moul lasr insemwomwo na pal nu kemwa. Sie ip yok ke musa lasr in Kraist pa in “fwasr inkanek se inge, yen kut sun tari.” (Filippai 3:16) Ma inge tia oanu sie moul su oru sie met in tasek ka. A el ku in kalmekin fwasr nu meet ke sie inkanek sumwos—ke kas saye, musaiyuk sie oiye mwo ke ma lun ngun a srukye kain in oiye se inge len nu ke len, yiu nu ke yiu. Esam, “A el su muteng nu ke safla, el nu fwa moul.”—Mattu 24:13.
Ya Kom “Ku in Lalalfongi”?
12 Ke kas aktulo lal su aketeye fwafwasryesr lasr in Kraist, Poul el kaifwe kut in “ku in lalalfongi.” Ke kutu version kut ku in rid, “in ku fwin ke lalalfongi,” meyen kas Greek su Poul el orekmakin ku in kalmekin “in ku, in sang me akpayeye, a oru in tia ku in ekulla fwal nu ke ma sap.” Ke kut kapek ke etauk, kut nu kemwa eis sripe puspis in liye la lalalfongi lasr nu sin Jeova God arulanu fukoko a oakiyuki na paye. Fwokin ma inge pa yokelik lun ku lasr. Ma inge oru in arulanu upa ke fwalu lal Setan inge in keapekutla. Ma inge akismakinye kut ke kas in kaifwe lal Poul in “akmwot nu ke sumwosmwoslanu.” (Hibru 6:1) Matu in ngun a ku eltal tukeni fwasr.
13 Met Kristian ke century se meet fwin an Kolosse elos sun me sensen na upa ke ku lalos. Poul el sang kas in sensen inge: “Komwos in liyekomwosyung tu wangin met in eis insiomwos ke luti in lalmetmet lal a kutusrik lusrongten, oanu sramsram matu lun met, oanu srumtauk lun fwalu, a tia oanu Kraist.” (Kolosse 2:8) Poul el tia lungse met Kolosse, su ekla tari met su “filiyuki nu in togusrai lun Mwen kulu nutin [God],” in sifwil forla liki, ku som liki moul lalos in ngun su akinsemwomwoyeyuk tari. (Kolosse 1:13) Keapeyukla ke inkanek fuka? Poul el srusrngiye “luti in lalmetmet lun met,” pal seifwunnu kas se inge sikyuk in Baibel. Ya el sramsram ke met Greek lalmetmet, oanu Plato a Socrates? Fwinne ma inge sang me sensen nu sin met Kristian paye, tusruktu in len ingo kas se inge “lalmetmet lun met” oasr kalme yok. Pal nu kemwa el sramsram ke un met a loom lutlut—wekunang ma ke alu. Ke sie me pupulyuk, met Ju ke century se meet ingo oanu Philo elos pangon alu lalos sifwanu oanu sie lalmetmet lun met—saap tu in akmwoyel sifwanu.
14 Kutu nu ke me luti lun met su akfosyel Poul pa ke alu. Tok, ke sapter senpanu inge ke leta lal nu sin met Kolosse, el sramsram nu selos su luti ke, “nik komtel kal, ku ema, ku srukye,” ma inge nu kemwa el sramsram ke Ma Sap lal Moses su mise lal Kraist el aksafyela tari. (Rom 10:4) Sayen lalmetmet lun met Pegan, oasr pa kutu me purakak nunuk su sang me sensen yok ke ku lun ngun lun congregation. (Kolosse 2:20-22) Poul el sang kas in sensen lain lalmetmet lun met su ipen “srumtauk lun fwalu.” Kain in luti kikiap inge tuku sin met.
15 Sie orekma in akkeye luti a nunuk lun met su tia tuku ke Kas lun God ku in sang me sensen ke ku lun congregation. Kut nu kemwa enenu in taran ke kain in me sensen inge. Met sap Jon el kaifwe nu sesr: “Met kulu, komwos in tia lalafongi ngun nu kemwa, a akpayeye ngun, elos fwin ma sin God me, ku tia.” (1 Jon 4:1) Ke ma inge fwin tulik lutlut su wi kom ke loom lutlut elos kaifwe nu sum in lalalfongi la sie moul fwal nu ke akmwuk lun Baibel tia fwal nu ke pal lasr, ku fwin met tulan lasr el lungse in purakak nunuk lasr in lungse ma lun fwalu, ku fwin sie met orekma wi kom el mokle kom in lain ela lom su pula ke Baibel, ku fwin sie met lili wiom in lalalfongi el akkalemye la el lungse in suk ma tafongla lun kutu met, ku lungse in oru nununku lain kutu met in congregation fwal nu ke nunuk lal, na lela kom in tia sa in eis ma elos fwak. Tuni ma se ma tia fwal nu ke Kas lun God. Ke kut oru ou inge, kut ku in srukye ku lasr ke kut fwafwasyesr in Kraist.
“Yokyokelik in Lalalfongi in Sang Kulo”
16 Ma enenu akakosr ke fwafwasryesr lasr in Kraist su Poul el akkalemye pa “yokyokelik in lalalfongi in sang kulo.” (Kolosse 2:7) Kas se inge “yokyokelik” akismakinye kut ke infwal soko sronoti afunla siske nu kemwa. Ma inge el akkalemye nu sesr la oanu sie met Kristian, orekma in sang kulo lasr enenu in wangin tui a kut in pala ka. Kais sie sesr ku in siyuk sesr sifwanu, ‘Ya Nga lungse in sang kulo?’
17 Paye, kut nu kemwa oasr sripe puspis in sang kulo nu sin Jeova ke len nu kemwa. Fwinne ke pal in ma upa, saap oasr ma se ku kutu ma sikyuk su ase nu sesr pal in mongle ke kitin pal. Ke sie me pupulyuk, sie kamwuk lasr el akkalemye pakomuta oanu el pula pa ma kut pula. Sie met su kut lungse el ase nu sesr kas a orekma in akkeye kut. Sie fong in mongle mwo ku in sifwil akkeye kut. Sie mongo eueu el aksafyela pulakin musrensral lasr. Sie on lun mwon se, isrusr lun tulik srisrik, yen engyengu su arulanu folfol, engyeng srik su wise mongle—ma inge nu kemwa a kutupa ku in tuku nu yurosr ke len siefwunnu. Arulanu fwusesr in pilesru me sang inge nu kemwa. Ya ma inge nu kemwa tia fwal nu ke kulo lasr? Ma inge nu kemwa tuku sin Jeova, el su Srupon “me kite mwo nu kemwa a kite fwal.” (Jemes 1:17) A el ase nu sesr me sang su yok liki me sang inge nu kemwa—ke sie me pupulyuk, moul lasr sifwanu. (Sam 36:9) Sayen ma inge, el akola in ase nu sesr pal mwo in moul ma patpat. Tu lan ku in ase nu sesr me sang inge, Jeova el orala me kise yok emeet ke pal se ma el supwema Mwen siefwunnu isusla nutul, “el su engun pal e nu kemwa ye mutal.”—Soakas 8:30; Jon 3:16.
18 Ke ma inge, fuka yokiyen paye lun kas lun met sim lun Sam: “Ma mwo in sang kulo nu sin Jeova.” (Sam 92:1) Ke ma inge, Poul el akismakinye met Kristian fwin an Tessalonika: “Komwos in sang kulo in ma nu kemwa.” (1 Tessalonika 5:18; Efesus 5:20; Kolosse 3:15) Kais sie sesr enenu in kaifweung in akyokye kulo lasr. Pre lasr tia enenu in siyuk na pal nu kemwa ke ma enenu lasr nu sin God. Tia koluk in oru ou inge. Tusruktu lela kom in nunku ke sie kamwuk lom su lungse na in sramsram sum fwin oasr ma enenu lal nu sum! Ke ma inge efu kom tia pre nu sin God in sang kulo a in kaksakunal? Fuka pre se inge arulanu akinsemwomwoyel el fwin ngeti nu ke fwalu se inge su nukin in sang kulo! Ma lane akluo su tuku ka pa, pre se inge el kasru kut in filiye nunuk lasr nu ke ma mwo, ma inge akismakinye kut fuka kut nu kemwa akinsemwomwoyeyuk na paye.
19 Ya tia sakuruk na paye lupan me kasru su kut ku in eis ke me sramsram siefwunnu ke Kas lun God? Kais sie sesr enenu in porongo kai lal Poul ke tafwela in fwafwasyesr in Kraist. Lela kut nu kemwa in kaifweung in ‘okala in el,’ ‘ku in lalalfongi,’ a ‘yokyokelik in sang kulo.’ Kain in kai se inge arulanu yok sripe nu sin met su tufwanu baptais. Tusruktu fwal pa nu sesr kemwa. Nunku fuka okan sak soko el kapek na paye a fuka sie loom su met orekma elos oru orekma ka el tafwela in musaiyuk. Ke ma inge fwafwasyesr lasr yurin Kraist el tianu tui. Kais sie sesr enenu in kapek in ngun ke ip nu kemwa lun moul lasr. Jeova el kasru kut a akinsemwomwoye kut, el lungse kut in fwafwasyesr Yurol a fwafwasryesr yurin Mwen kulu nutul.
Fuka Kom Topuk?
◻ Mea kutu orekma su ku in toeni nu ke fwafwasryesr in Kraist?
◻ Mea kalmen ‘okala in Kraist’?
◻ Fuka kut nu kemwa ku in ‘musa in Kraist’?
◻ Efu arulanu yok sripe in “ku in lalalfongi”?
◻ Mea sripe puspis su oasr yurosr tu kut in ‘yokyokelik in sang kulo’?
[Study Questions]
1, 2. (a) Fuka Baibel el akkalemye moul oaru in kulansap lal Inuk nu sin God? (b) Fuka Jeova el kasru kut in fwafwasryesr yurol, oanu Kolosse 2:6, 7 el akkalemye?
3. Fwal nu ke Kolosse 2:6, 7, efu kut ku in fwak la oasr ma puspis su enenu in orek sayen baptais ke fwafwasyesr in Kraist?
4. Mea kalmen in ‘okala in Kraist’?
5. Fuka kut ku in akkapye “lungse” ke me mongo in ngun?
6. Efu arulanu yok sripe in kalweni ke nunuk lasr ma kut ridi?
7. Nunuk fuka kut enenu in akkalemye ke me kasru su tuku ke me mongo upa?
8. Mea kalmen in ‘musa in Kraist’?
9. (a) In etawi Kraist ke orekma lun forfor lasr, mea kutu nu ke nien sun su kut ku in orala? (b) Fuka kut ku in etu la Jeova el lungse kut in pulakin insemwomwo ke orekma lun forfor lasr?
10. Mea kutu nu ke orekma lun met Kristian su kut nu kemwa enenu in oru, a fuka ma inge nu kemwa kasru kut?
11. Kain in nunuk sumwos fuka kut enenu in srukye fwin ke baptais?
12. Mea kalmen “ku in lalalfongi”?
13, 14. (a) Met Kristian ke century se meet fwin an Kolosse elos sun kain in me sensen fuka ke ku lalos? (b) Mea ma inge su akfosrye met sap Poul?
15. Fuka kut ku in taran tu in tia akkolukyeyuk nunuk lasr ke kain in nunuk su wangin in Baibel su pal nu kemwa sun kut?
16. Mea ma enenu akakosr ke fwafwasyesr in Kraist, a kain in kusensiyuk fuka saap kut ku in siyuk?
17. (a) Efu kut ku in fwak la oasr sripe puspis lasr tu kut in sang kulo, fwinne ke pal in ma upa? (b) Mea kutu nu ke me sang su tuku sin Jeova su kom pulakin yok in sang kulo?
18. Fuka kut ku in akkalemye la kut lungse in sang kulo nu sin Jeova?
19. Fuka kas lal Poul in Kolosse 2:6, 7 el kaifwe nu sesr kemwa in tafwela in fwafwasyesr in Kraist?
[Picture on page 22]
Okan sak soko saap kut tia ku in liye, tusruktu ma inge el kasrel ke ma enenu lal a el kasrel lan ku a tia ikori