Fwafwasryesr Yurin God—Ke Mutamweyen Moul Lom
“Komwos in kalukyung nu yurin God, a el e fwa kalukot nu yuromwos.”—JEMES 4:8.
MOKUL se inge el keok ke nien kapur ke lusen yiu puspis. Na sapkinyuk nu sel in tu ye mutun met kol lun an’u. Arulanu pisrpisr ma sikyuk. Na, met inge su muta ke nien kapur el sifwanu konaok ke sie orekma in kulansap nu sin met kol su fukoko emeet fwin fwalu in pal meeta. Met inge su muta in nien kapur meet pakiyuki nu ke sie kunokon lulap a mwal fulat. Josef—pa inge mokul su niel kapuri meet—ke pal inge el fwafwasyesr yurin sie togusra!—Genesis 41:14, 39-43; Sam 105:17, 18.
2 Ke len inge, met nu kemwa oasr pal mwo in oru kulansap nu sin sie met su fulat liki Fero lun an Ijipt. El Su Ku Liki Ku in kosrao a fwalu el suli kut in kulansap nu sel. Sie me sang na lulap na paye in oru orekma inge a in akkapye sie moul futoto nu sin Jeova, el su God ku liki ku! Ke Ma Simusla, ku sakuruk a mwolanu wekunang misla, kato a insemwomwo pal nu kemwa el kapsreni nu sel. (Ezekiel 1:26-28; Fwakyuk 4:1-3) Lungse ku in liyeyuk ke orekma lal nu kemwa. (1 Jon 4:8) El tia kikiap ke kutena pal. (Oekyuk 23:19) A Jeova el tia aksupwarye kutena met su oaru nu sel. (Sam 18:25) Kut fwin akfwalye moul lasr ke ma sap sumwosmwos lal, kut ku in pulakin sie kain in moul su oasr insemwomwo, oasr sripe, wikin fwinsrak ke moul ma patpat ke pal fwasru. (Jon 17:3) Wangin kutena met kol fwin fwalu su ku in wise nu sesr kain in me insemwomwo a me sang inge.
3 Ke yiu puspis somla met patriarch Noa el kaifweung in moul fwal nu ke ma lungse lun God. Fwin kel Noa, Baibel el fwak: “Noa el met mwo, a sumwosmwos in fwil lal. Noa el fwafwasyesr yurin God.” (Genesis 6:9) Paye, Noa el tia fwafwasryesr na paye in ikwe yurin Jeova, meyen wanginu met su “liyel God kutena pal.” (Jon 1:18) A Noa el fwafwsryesr yurin God meyen el oru ma nu kemwa God el sapkin nu sel lan oru. Meyen Noa el orekmakin moul lal nu fon in oru ma lungse lun Jeova paenang el engunkin sie moul insemwomwo a futoto nu sin God Ku Liki Ku. Oanu Noa, million puspis misinge elos ‘fwafwasyesr yurin God’ ke pal se elos moulkin moul fwal nu ke kas in kai a kas in luti lun Jeova. Fuka sie met el ku in mutamwauk ke kain in inkanek inge?
Etauk Sumwos Eneneyuk
4 Kut fwin lungse in fwafwasyesr yurin Jeova, kut enenu meet in etel. Met palu Isaia el palye: “A a fwa te oru in len safla, tu eol lun loom sin Jeova fwa oakiyuki fwin mangon eolu, a fulat liki toktoku; a mutanfwal nu kemwa fwa suror nu lu. A mutanfwal puspis fwa som a fwak: ‘Fwasru komwos, a lela kut in utyuk nu ke eol lun Jeova, nu ke loom sin God lal Jekob; a el fwa luti nu sesr ke inkanek lal, a kut fwa fwasr inkanek lal.’ Tu ma sap lal fwa illa liki Saion, a kas lun Jeova liki Jerusalem.” (Isaia 2:2, 3) Aok, kut ku in lalalfongi la Jeova el luti met nu kemwa su lungse in suk a fwasr ke inkanek lal. Jeova el ase nu sesr Kas lal, Baibel, a el kasru kut in kalem ka. Sie inkanek lal in oru ou inge pa ke “met kulansap oaru a lalmetmet.” (Mattu 24:45-47) Jeova el orekmakin ‘met kulansap oaru a lalmetmet’ in kitakut me mongo in ngun ke inkanek lun me rid su tuku ke Baibel, ke meeting lun met Kristian, a ke akmwuk lun Baibel study su wangin molo. God el ouyepa sang kasru nu sin met lal in kalem nu ke Kas lal ke inkanek lun ngun mutal.—1 Korint 2:10-16.
5 Fwinne kut tianu moli ma paye ke Baibel, tusruktu el arulanu saok. Ke kut lutlut ke Kas lun God, kut ku in etu God—enel, oiye lal, akmwuk lal, a ke inkanek lal in futoto nu sin met. Kut ku in ouyepa lotela topuk puspis su ku in aksukosokye kut liki kusensiyuk saok puspis in moul: Efu kut muta inge? Efu God el lela ma koluk? Mea pal fwasru lasr? Efu kut kapek matu a mise? Ya oasr moul saye tokin sie met el mise? Sayen ma inge, kut ku in lotela ma lungse lun God sesr, fuka kut ku in fwafwasyesr tu kut in ku in akinsemwomwoyel na paye. Kut ku in lotela la ma el siyuk sesr arulanu mwo a arulanu yok sripe kut fwin moul fwal nu ka. Fwin wangin me luti lun God, kut tia ku in kalem na paye ke ma inge nu kemwa ke kutena pal.
6 Ma paye lun Baibel arulanu fukoko a el ku in mokle kut in ekula oiyen moul lasr. (Hibru 4:12) In pal meeta, meet liki kut eis etauk ke Ma Simusla, kut ku in fwafwasryesr na “tokin inkanek lun fwal se inge.” (Efesus 2:2) Tusruktu etauk sumwos lun Kas lun God el orala inkanek sasu ke mutasr tu kut in ku in “fwafwasyesr fwal nu sin Jeova nu ke akinsemwomwoyel nu kemwa.” [New World Translation] (Kolosse 1:10) Fuka sie me insewmomwo na paye in orala fwafwasyesr se meet yurin Jeova, el Su mwolanu emeet in kosrao a fwalu!—Luk 11:28.
Step Saok Luo—Mwolela a Baptais
7 Ke pal se etauk lasr ke Baibel el mutamwauk in kapkapek, kut mutamwauk in tuni mokuikui lun met a moul lasr sifwanu fwin fwal ku tia ke Kas lun God. Ke ma inge sie ma paye el mutamwauk in kalem. Ma paye se inge akkalemyeyuk sin met palu Jeremaia ke yiu puspis somla, el simusla: “O Jeova, Nga etu tu inkanek lun met tia on in el sifwanu. Tia ma lun met su fwasr in aksumwosye fwalkal.” (Jeremaia 10:23) Met nu kemwa—kut nu kemwa—kut enenu kolyuk lun God.
8 Kalem lasr ke ma inge su arulanu yok mokle kut in suk kolyuk su tuku sin Jeova. A lungse lasr nu sin God mokle kut in mwolela moul lasr nu sel. Kalmen mwolela nu sin God pa, in sunol ke inkanek lun pre a mwolela nu sel la kut akola in orekmakin moul lasr in kulansap nu sel a in fwafwasyesr ke inkanek lal ke oaru. Kut fwin oru ou inge, kut fwasr tokin me srikasrak lal Jisus, su akkalemyel sifwanu nu sin Jeova wikin kaifweung na paye in oru ma lungse mutal lal.—Hibru 10:7.
9 Jeova God el tia liksreni in purakak ke ku kutena met tu elos in mwolela moul lalos nu sel. (Srike liye 2 Korint 9:7.) Sayen ma inge, God el tia lungse kutena met in mwolela moul lalos nu Sel ke sripen sie kain in pulakin ke nunuk a inse su tokin sie pal ma el pula inge wanginla. Meet liki pal in baptais, sie met el enenu in ekla tari met tumal lutlut, a tu in ou inge, ma inge siyuk sel in kaifweung na paye in eis etauk. (Mattu 28:19, 20) Poul el kaifwe nu selos nu kemwa su baptais tari in ‘sang manolos me kise moul, mutal, me akinsemwomwoye God, pa inge orekma fwal nu ke ngun lalos.’ (Rom 12:1) In oupanu, ke kain in sulela ku lasr inge paenang kut oru mwolela lasr nu sin Jeova God. Tokin kut lotela mea ma enenu a kut tuni mwo ma inge, kut insemwomwo in mwolela moul lasr nu sin God.—Sam 110:3.
10 Tokin kut osun nu sin God ke pre in akkalemye kaifweung lasr in fwasr ke inkanek lal, kut oru step se toko. Kut oru mwolela lasr in kalem ye mutun met nu kemwa ke kut insese ke baptais ke kof. Pa inge oiyen sulela lasr su kut akkalemye ye mutun met nu kemwa la kut akola in oru ma lungse lun God. Ke mutamweyen orekma lun forfor lal fwin fwalu, Jisus el baptaisla sel Jon, ke ma inge el wise nu sesr me sriksrak. (Mattu 3:13-17) Tok, Jisus el sang kunokon nu sin met tumal lutlut lal in orala met tumal lutlut lal a in baptaiselosla. Ke ma inge, mwolela a baptais elos inge step saok nu sin kutena met su sulela in fwafwasryesr yurin God.
11 In ekla sie met tumal lutlut lal Jisus Kraist su mwolela, a baptais tari apkurun in oanu sie ke oiyen moul lun seanyen se su akola in payuk. In an puspis, meet liki len in payuk oasr step puspis su enenu meet in orek. Sie mokul a sie mutan elos osun meet, aitai sie sin sie, a pulakin lungse sie sin sie. Tok elos insese tari sie sin sie a akola in payuk. Ke len in payuk, pa inge pal in akkalemye nu sin met nu kemwa ma mutan a mokul elos insese in oru ke pal fwasru su elos mukena etu—pa inge in sroang nu ke moul payuk a tokin payuk elos fwa tukeni muta oanu sie mukol tuma a sie mutan kie. Pal in payuk pa pal in akkalemye ye mutun met nu kemwa mutamweyen futoto lun mutan a mokul se. Len inge pa mutamweyen moul in payuk lun seanyen se. In oupanu ou inge, baptais lun sie met el mutamweyen sie moul su mwolela tari tu in fwafwasyesr futoto yurin Jeova.
12 Tuni siepa ma sikyuk su oanu ma inge. Tokin len in payuk lalos, lungse inmaslon mutan a mokul enenu in yokelik a kapek. Tu in futoto sie sin sie yok liki meet, kais sie selos enenu in kaifweung ke kulang in akkeye moul in payuk lalos. Kut fwinne tia ilyuk nu ke sie moul su oanu ku payuk nu sin God, tusruktu tokin baptais lasr kut enenu in kaifweung in akkeye futoto lasr nu sin Jeova. El liye a el insemwomwo ke kaifweung lasr in oru ma lungse lal paenang el oru in futoto nu sesr. “Kalukyung nu yurin God, a el e fwa kalukot nu yuromwos.”—Jemes 4:8.
Fwasr Tokin Me Srikasrk lal Jisus
13 Kut fwin lungse in fwafwasryesr yurin Jeova kut enenu in fwasr tokin me srikasrak lal Jisus Kraist. Met sap Piter el simusla: “Tu pangonyuk kut nu ke ma inge, tu Kraist el ouyepa keok keyumwos, a likiye nu sumwos sie srikasrak, tu komwos fwasr in fwalkel.” (1 Piter 2:21) Ke sripen Jisus el met sumwosmwos a kut sesumwos, paenang kut tia ku in fwasr sumwosmwos na paye ke me srikasrak su el likiye. Fwinne ou inge, Jeova el lungse kut in oru ma nu kemwa ke ku lasr. Lela kut in tuni ma limekosr ke moul a orekma lun forfor lal Jisus su met Kristian nu kemwa su mwolela tari moul lalos enenu in etawi.
14 Oasr etauk sumwos a etauk yok lal Jisus ke Kas lun God. Ke lusen pal in orekma lun forfor lal, Jisus el orekmakin pal nu kemwa Ma Simusla lun Hibru. (Luk 4:4, 8) Paye, met kol koluk lun alu in len lal elos ouyepa orekmakin Ma Simusla. (Mattu 22:23, 24) Ma tia oanu sie inmaslolos pa, Jisus el kalem ke ma Baibel el lungse in aketeye, a el orekmakin ma inge ke moul lal. El etu na paye tia ma simusla mukena in Ma Sap a el etu pa ngunin ma inge. Ke kut fwasr tokin me srikasrak lal Kraist, kut enenu pa in kaifweung in kalem ke Kas lun God, in etu ma el lungse in akkalemye, ku ngunin ma inge. Kut fwin oru ou inge, saap kut fwa ekla sie met orekma fwal ye mutun God su ku in ‘orekmakin sumwosna kas lun God.’—2 Timote 2:15.
15 Jisus Kraist el sramsdram nu sin kutu met ke Papa tumal in kosrao. Jisus el tia sromwos ke etauk lal ke Kas lun God su oasr yurol. Met lokwalok lal elos pangnol “met luti,” meyen an nu kemwa el som nu we el sramsram nu sin kutu met ke Jeova a ke akmwuk lal. (Mattu 12:38) Jisus el luti ye mutun met nu kemwa ke tempel, ke immwen lolngok, mura nu ke mura. (Mark 1:39; Luk 8:1; Jon 18:20) El luti ke pakoten a kulang, a el akkalemye lungse nu sin met nu kemwa su eis kasru lal. (Mattu 4:23) Elos nu kemwa su fwasr tokin me srikasrak lal Jisus elos ouyepa suk an a inkanek puspis tu elos in ku in luti kutu met ke Jeova a ke akmwuk mwolanu lal.
16 Jisus el pulakin futoto nu sin kutu met su alu nu sin Jeova. Sie pal Jisus el sramsram ke un met puspis, na nine kiel a ma wiel nu kemwa su tia lalalfongel elos tuku nu yurol in kaskas nu sel. Me sramsram ke Baibel el fwak: “A sie met fwak nu sel: ‘Liye! Nine kiom a met lim elos tu likinumu, a suk in kaskas nu sum.’ A el topuk a fwak nu sel: ‘Su nine kiuk? A su met lik? A el asroela paul nu sin met tumal lutlut, a fwak: ‘Liye! Nine kiuk a met lik! Tu el su fwa oru ma lungse lun Papa tumuk su in kosrao, el met lik, a ma louk, a nine kiuk.’ ” (Mattu 12:47-50) Ma sikyuk inge tia kalme la Jisus el srunga sou lal, meyen ma sikyuk puspis toko akkalemye la el lungse sou lal. (Jon 19:25-27) Tusruktu, me sramsram inge el akkalemye lungse lal Jisus nu sin met lili wiel in lalalfongi. Oupanu misinge, elos nu kemwa su fwafwasyesr yurin God elos suk asrouki lun met kulansap lun Jeova a elos akkapye lungse lalos nu selos.—1 Piter 4:8.
17 Ke pal se el oru ma lungse mutal, Jisus el akkalemye lungse lal nu sin Papa tumal in kosrao. Jisus el akos Jeova in ma nu kemwa. El fwak: “Me mongo nak in oru ma lungse lal su supeyume, a in aksafyela orekma lal.” (Jon 4:34) Kraist el ouyepa fwak: “Tu Nga oru pal e nu kemwa ma in akinsemwomwoyel [God].” (Jon 8:29) Jisus el arulanu lungse Papa tumal paenang “el sifwanu akpusiselyel, a el akos nu ke mise, aok mise ke sak soko.” [NW] (Filippai 2:9-11) Oanu Jisus, kut akkalemye lungse lasr nu sin God ke kut akos ma sap lal a oru ma lungse lal.—1 Jon 5:3.
18 Jisus el sie met su lungse in pre. El pre ke pal in baptais lal. (Luk 3:21) Meet liki el sulela met sap 12 lal, el orekmakin fong fon se in pre. (Luk 6:12, 13) Jisus el luti met tumal lutlut lal fuka in pre. (Luk 11:1-4) Ke fong se meet liki el mise, el pre ke met tumal lutlut lal a elos tukeni pre. (Jon 17:1-26) Pre el sie ip saok ke moul lal Jisus, oupanu ke moul lasr, meyen kut met tumal lutlut lal. Sie me sang yok na paye sesr in sramsram nu sin El Su Ku Liki Ku ke inkanek lun pre! Sayen ma inge, Jeova el topuk ke pre, Jon el simusla: “A pa inge pulaik lasr nu sel, tu kut fwin siyuk ke kutena ma su fwal nu ke ma lungse lal, el long kut. A kut fwin etu tu el long kut ke kutena ma su kut siyuk sel, kut etu tu kut eis ma kut siyuk sel ka.”—1 Jon 5:14, 15.
19 Oasr ma puspis su kut ku in etu kut fwin tuni mwo moul a orekma lal Jisus Kraist fwin fwalu! Nunku ke oiye mwo su el akkalemye: lungse, pakoten, kulang, ku, nunuk sumwos, fwusesr in siyukyuk, fwokpap, pulaik, a tia rapku. Kut fwin lutlut yok kel Jisus, na yokelik pa kena lasr in ekla met tumal lutlut oaru lal. Etauk kel Jisus ku in ouyepa kasru kut in futoto nu sin Jeova. Paye pa inge, meyen Jisus el oanu pitse sumwosmwos na paye lun Papa tumal in kosrao. El oanu Papa tumal na paye paenang el ku in fwak: “El su nuna liye yu el nu liyel Papa.”—Jon 14:9.
Lalalfongi God La El e Kasru Kom
20 Fwin tulik srisrik el tufwanu mutamwauk in fwasr, inkanek in fwasr lal sonna arle fukoko. Fuka elos ku in fwasr ke ku? Ke inkanek lun akpa a kaifweung. Aok, elos nu kemwa su fwafwasyesr yurin Jeova elos kaifweung in fwasr ke ku, tia tui. Enenu pa kaifweung a pal in oru ou inge. Poul el akkalemye ma saok su tuku ke kaifweung ke fwafwasyesr yurin God ke pal se ma el simusla: “A ma tok, met lili, kut kaifwe a siyuk sumwos in Leum Jisus, tu, oanu komwos eis tari sesr fuka fwal nu sumwos in fwafwasyesr a in akisemomwoye God, aok oanu komwos fwafwasyesr, tu komwos in yokyokelik nu ka.”—1 Tessalonika 4:1.
21 Kut fwin mwolela na paye moul lasr nu sin God, el kasru kut in tafwela in fwafwasyesr yurol. (Isaia 40:29-31) Wangin kutena ma fwalu se inge el ku in ase nu sesr su kut ku in srikeye nu ke me insemwomwo su el akola in sang nu selos nu kemwa su fwasr ke inkanek lal. El pa ‘luti kut ke ma su kut fwa insemwomwo ka, Su kol kut ke inkanek su fwal tu kut in fwasr we. Ke kut in nu porongo ma sap lal, na misla lasr oanu sie infwal, a sumwosmwos lasr oanu nua in mwea.’ (Isaia 48:17, 18) Kut fwin eis me solsol sesr in fwafwasyesr yurin God a in oaru in oru ou inge, na kut ku in engunkin misla yurol ma patpat.
Fuka Kom Ku In Topuk?
◻ Efu ku sie me akfulat na paye in fwafwasyesr yurin God paye?
◻ Efu lutlut, mwolela, a baptais pa inge step se meet ke fwafwasyesr yurin Jeova?
◻ Fuka kut ku in fwasr tokin me sriaksrak lal Jisus?
◻ Fuka kut ku in etu la Jeova el kasru kut ke kut fwafwasyesr yurol?
[Study Questions]
1, 2. Efu kom ku in fwak la sie me sang yok na paye in kulansap nu sin Jeova?
3. Ke inkanek fuka Noa ‘el fwafwasryesr yurin God paye’?
4. Fuka Jeova el luti met kulansap lal?
5. Efu ma paye su tuku ke Ma Simusla arulanu yok sripe a saok?
6. Etauk sumwos ke Baibel el mokle kut in suk kain in inkanek fuka?
7. Ke kut lutlut Kas lun God, ma paye fuka kut ku in akilen fwin ke oiyen kolyuk lun met?
8. (a) Mea ma inge su mokle met in mwolela moul lalos nu sin God? (b) Mea kalmen mwolela lun met Kristian?
9. Efu kais sie met elos mwolela moul lalos nu sin Jeova?
10. Fuka mwolela ku in kapsreni nu ke baptais?
11, 12. (a) Fuka kut ku in srikeye baptais nu ke pal in payuk? (b) Mea ma oanu sie su kut ku in liye inmaslon futoto lasr nu sin Jeova a futoto lun mokul tuma a mutan kie.?
13. Ke fwafwasyesr lasr yurin God, kut ku in fwasr tokin me srikasrak lun su?
14. Mea kut ku in toeni nu ke lutlut ke Kas lun God?
15. Fuka Jisus el sang me srikasrak ke sramsram lal nu sin God?
16. Fuka lupan futoto lal Jisus nu sin met lili wiel in lalalfongi nu sin Jeova?
17. Mea pulakin lal Jisus ke orekma lal in oru ma lungse lun Papa tumal, a fuka ma inge el mokle kut?
18. Ke inkanek fuka Jisus el oakiye me srikasrak fwin ke pre?
19. (a) Mea oiye mwo puspis lal Jisus su kut enenu in etawi? (b) Ke inkanek puspis fuka kut ku in eis ma lane ke lutlut lasr ke moul a orekma lun forfor lal Jisus?
20. Fuka kut ku in eis ku ke fwafwasyesr lasr yurin Jeova?
21. Ke kut fwasfwasryesr yurin Jeova, kain in me insemwomwo fuka kut ku in eis?
[Pictures on page 11]
Lutlut, mwolela, a baptais pa step se meet ke fwafwasyesr yurin God