Oiye Mwo Lun Lalalfongi Lom—Srifweyuk Ke Pal Inge
“Met lili luk, komwos in oekla oanu me akengun nu kemwa, ke me sruf puspis apinkomwosla, a komwos etu tu me akpayeye lalalfongi lomwos orekma fulpap.”—JEMES 1:2, 3.
MET Kristian paye elos tia lungse in keok, a wangin insemwomwo lalos ke ngal a me mwekin. Tusruktu, elos esam pal nu kemwa kas lung’a lun ma wiel Kraist pangpang Jemes. Kraist el akkalemye na paye nu sin met tumal lutlut lal la elos e sun kolyai a kutu ma upa ke sripen akos lalos ke ma sap lun God. (Mattu 10:34; 24:9-13; Jon 16:33) Fwinne ou inge, insemwomwo ku in tuku ke me srifwe se inge. Ke inkanek fuka?
2 Sie sripe yok efu kut ku in eis me insemwommwo fwinne kut sun kolyai ku me srifwe ke lalalfongi pa, meyen ma inge oswela fwako mwo. Oanu Jemes el fwak, muteng ye kolyai ku me srifwe “orekma fulpap.” Jemes el simusla: “A lela orekma lun fulpap in fwal, tu komwos fwa fwalna a fon a wangin ma komwos enenu.” (Jemes 1:4) Oasr ma fulpap el enenu in oru, sie “orekma.” Kunokon lal pa in oru kut nu kemwa in fwal in ma nu kemwa, el kasru kut in srukye nunuk sumwos a matu in ngun oanu sie met Kristian. Ke sripe se inge, kut fwin lela na me srifwe in aksafyela nien sun lal, a kut tia oru kutena ma in aksafyela ma inge ke pal sa ke inkanek su Kas lun God el tia lela, na lalalfongi lasr srifweyuk tusruktu akmwoyeyuk. Fwin srik mongfwusesr, pakoten, muteng, ku lungse lasr paenang kut nukin mea kut enenu in oru ke me srifwe ku nu sin kutu met, muteng el ku in kasru kut in akkapye oiyen Kristian nu kemwa. Aok, ma sikyuk na paye pa: Me srifwe el oswela mongfwusesr; mongfwusesr akkapye oiye mwo lun sie met Kristian; ma inge srupon insemwomwo.—1 Piter 4:14; 2 Piter 1:5-8.
3 Met sap Piter el ouyepa akkalemye efu kut tia enenu in sangeng ku fuleak ke me srifwe ke lalalfongi lasr. El simusla: “In ma inge komwos engunak ma lulap, fwinne inge, ke kutu srisrik pal, fwinne ou inge, komwos toasr ke me srifwe puspis, tu srike lalalfongi lomwos, su saok yok liki gold su wanginla fwinne srikeyuk ke e, fwa konoiyukyuk nu ke kaksak a mwolanu a akfulatyeyuk ke fwakyuk lun Jisus Kraist.” (1 Piter 1:6, 7) Kas se inge arulanu me purakak inse yokna ke pal inge meyen “ongoiye lulap”—pal in kaksak, mwolanu, akfulat, a molela—futoto liki ma kutu met elos nunku a fototo liki meet ke pal se ma kut tufwanu ekla met lalalfongi.—Mattu 24:21; Rom 13:11, 12.
4 Ke me lutlut tari’a, kut tuni me srifwe puspis su met lula akmusrala elos sun mutamwauk ke 1914 nu ke pal inge. Ya ma inge nu kemwa sropon me insemwomwo? A. H. Macmillan el akkalemye ma el nunku ke ma sikyuk inge meet: “Nga liye me srifwe puspis su tuku nu ke u a me srifwe ke lalalfongi lun met nu kemwa su wi ke u se inge. Ke kasru lun ngun mutal lun God el kutangla a tafwela in kapkapek. Nga liye lalmetmet su tuku ke orekma in sano Jeova ke mongfwusesr fuka el akkalemye ma kut tia etu ke Ma Simusla a in tia mulat ke sie ma sasu. . . . fwinne oasr ma kut enenu in ekulla ku aksumwosye ke nunuk lasr kais kutu pal, tusruktu ma inge el tia ekulla me sang kulang lun God ke lango a mwolela lun God ke moul ma patpat. Ke ma inge wangin sripe kut fwin lela lalalfongi lasr in munasla ke sripen ma kut sano el tianu tuku ku ke sripen oasr ma kut enenu in ekulla ke ma kut nunku.”—The Watchtower, August 15, 1966, sra 504.
5 Met Kristian akmusrala su kutangla liki me srifwe ke 1914-19 elos inge aksukosokyeyuk liki me purakak koluk lun fwalu a ke kain in orekma puspis ke alu lun Babulon Lulap. Met akmusrala elos fwasr nu meet oanu sie met nasnas a akmwoyeyuk, su insemwomwo in kisekin kas in kaksak nu sin God a elos lalalfongi la oanu sie met elos ku in akinsemwomwoyel. (Isaia 52:11; 2 Korint 6:14-18) Nununku el mutamwauk ke loom sin God, tusruktu ma inge el tia ku in safla na ke lusen sie pal. Orekma in srifwe a likliki el tafwela na yurin met lun God. Met nu kemwa su wi ipen “u lulap” su oasr fwinsrak in moula liki “ongoiye lulap” su apkurun in tuku, lalalfongi lalos enenu pa in srifweyuk. (Fwakyuk 7:9, 14) Ma inge ku in sikyuk nu selos ke kain in inkanek puspis oanu ma met akmusrala elos sun ku ke inkanek saye.
Fuka Kom Ku in Srifweyuk?
6 Met Kristian puspis elos nunku ke ma enenu in tu ku lain me srifwe su ku in liyeyuk a pula. Elos esam report se inge: “Elos [met kol lun alu lun met Ju] pangonmu met sap nu yurolos, elos srunglalos a fulak nu selos tu elos in tia kaskas ke en Jisus a fulelosla. Ke ma inge elos fwasr liki ye mutun met papu, a engun tu filiyuki elos fwal in keok ke e se inge.” (Orekma 5:40, 41) A me sramsram ke met lun God ke pal inge, yokna ke lusen Meun Lulap puspis, arulanu akkalemye la Met Lo lun Jeova puspis elos sun keok su tuku ke anwuk, ku upa liki, ke paon met su akkolukyelos.
7 Fwin ke kolyai nu sin met Kristian, fwalu se inge el tianu sulela inmaslon met akmusrala lula a u lulap lun “sip ngie.” (Jon 10:16) Ke lusen yiu puspis, met puspis ma wi ke u luo inge elos srifweyuk upa, som nu in kalbos a kutupal anwuki ke sripen lungse lalos nu sin God a lalalfongi lalos nu sel. (Srike liye The Watchtower, June 15, 1996, sra 31.) Ke lusen yiu 1930 a 1940 fwin an Nazi Germany, pus sin met kulansap lun Jeova, wekunang tulik srisrik, elos akkalemye lalafongi yok, a tia met na ekasr srifweyuk nu ke ku lalos nu kemwa. Ke lusen yiu ekasr na somla, Met lun Jeova elos sun me srifwe ke inkanek lun kolyai ke an puspis oanu an Burundi, Eritrea, Ethiopia, Malawi, Mozambique, Rwanda, Singapore, a an Zaire. Kain in me srifwe inge el tafwela na.
8 Tusruktu, oanu ma akkalemyeyuk tari, lalafongi lasr ouyepa srifweyuk ke inkanek se ma upa in akilen. Nunku fuka pulakin lom ke ma sikyuk inge. Sie brother fwin an Angola su oasr tulik siengoul nutul el muta ke sie congregation su ke sie pal tia eis muteta sin sie brother su oasr kunokon in oru ou inge ke sripen oasr ma ilya se. Tokin sie pal congregation se inge el eis muteta sin met lili. Na elos siyuk sin brother se inge fuka el sang ma enenu lun sou lal ke mongo. Luman upa nu sel in sang topuk, a ma el fwak na pa, arulanu upa na paye ma sikyuk nu sesr. Ya el ku in kite tulik nutul fwinne pal se ke len se? El topuk a fwak: “Paye, upa nu sik in oru ou inge. Kut lotela tari in moul fwal nu ke ma oasr yurosr.” Na, ke sie pusra su akkalemye lalalfongi yok, el fwak: “Ya tia pa inge ma kut nunku na paye in sikyuk ke len safla se inge?” Kain in lalalfongi inge sie ma sakuruk fwin fwalu se inge, tusruktu ma inge tia ma sasu inmaslon met Kristian oaru, su lalalfongi yok la mwolela ke Togusrai e fwa akpayeyuk na paye.
9 U lulap elos ouyepa srifweyuk fwin ke akmwuk lun theocratic. Congregation nu kemwa lun met Kristian fwin fwalu nu fon elos muta ye akmwuk mutal a ke ma sap lun theocratic. Kalmen ma inge pa, ma se meet, elos enenu in akilen Jisus oanu Met Kol, el su pakiyuki oanu Sifwen congregation. (1 Korint 11:3) In pusisel nu sel ke insemwomwo a nu sin Papa tumal ku in akkalemyeyuk ke inkanek in lalalfongi lasr nu ke ma pakiyuki ke akmwuk lun theocratic a ke sulela su orek tu in oasr inse siefwunnu lasr in oru ma lungse lun Jeova. Sayen ma inge, ke kais sie congregation, oasr kutu mokul su pakiyuki in kol. Elos inge nu kemwa sesumwos, a saap kalem nu sesr ma tafongla lalos; fwinne ou inge, kut nu kemwa sapkinyuk in akfulatye met kol inge a in pusisel nu selos. (Hibru 13:7, 17) Ya oasr pal kom konaok la arulanu upa nu sum in oru ou inge? Ya ma inge oanu sie me srifwe nu sum? Fwin aok, ya oasr ma lane su kom ku in eis ke me srifwe se inge ke lalalfongi lom?
10 Kut nu kemwa ouyepa srifweyuk fwin ke me sang nu sesr a ma enenu in wi pal nu kemwa ke orekma lun forfor. Kut fwin lungse in kutangla nu ke me srifwe, kut enenu in akilen la sie met su akesrui na paye ke orekma lun forfor, el tia oru ou inge ke sripen pise ku kunokon na lal paenang el oru orekma in luti. Ya kom esam kas in insemwomwo lal Jisus nu sin mutan katinmas sikasrup se su sang ma nu kemwa lal? (Mark 12:41-44) Saap kut ku in siyuk sesr sifwanu, ‘Ya Nga sang na paye moul luk nu fon oanu el fwin ke orekma lun forfor?’ Kut nu kemwa Met Lo lun Jeova ke len nu kemwa, ke ma inge akola pal nu kemwa in lela kalem lasr in tolak.—Mattu 5:16.
11 Siepa me srifwe su kut ku in sun pa ke lupan insemwomwo su kut akkalemye ke kalem lun ma paye su oasr in Baibel su yokyokelik a ke kai su akkalemyeyuk nu sesr ke inkanek lun met kulansap oaru a lalmetmet. (Mattu 24:45) Kutupal kai inge el siyuk sesr in aksumwosye kutu oiye su kut oru, oanu ke pal se ma kalem tari la elos nu kemwa su orekmakin paip elos enenu in tui fwin elos lungse in muta na in congregation.a (2 Korint 7:1) Ku kutu nu ke me srifwe nu sesr pa in aksumwosye lungse lasr ke kutu on ku kutu me akengun.b Ya kut akola in sang alollo ke lalmetmet su tuku ke kai se inge? Ku kut lela ngun mutal lun God in purakak nunuk lasr a kasru kut in nukomang met sasu?—Efesus 4:20-24; 5:3-5.
12 Ke lusen yiu puspis somla, piselos su wi ke u lulap elos tafwela in kapek, a tokin baptais lalos elos tafwela in akmwoye futoto lalos nu sin Jeova. Oasr ma enenu sayen orekma in wi toeni lulap lun met Kristian, meeting in Kingdom Hall, ku kais kutu pal in wi ke orekma lun forfor. Ke sie me pupulyuk: Saap sie met el illa liki tari Babulon Lulap, su lumeyuk nu ke alu kikiap nu kemwa. Tusruktu ya el illa lukel na paye? Ya el srakna srukye kutu oiye su akkalemye ngunin Babulon Lulap—sie ngun su akkolukye akmwuk sumwosmwos lun God? Ya el nunku la oiyen moul nasnas a oaru nu sin mutan kie ku mokul tuma tianu arle yok sripe? Ya el akkalemye la ma lungse lal sifwanu a lungse ke ma lun fwalu yok liki ma lun ngun? Aok, ya el nasnas na ke me akfokfok nu kemwa lun fwalu se inge?—Jemes 1:27.
Ma Lane Su Tuku ke Lalalfongi Su Srifweyuk Tari
13 Kut fwin kaengla tari ke Babulon Lulap a kut ouyepa som liki tari fwalu se inge, na lela kut in tia sifwel tapulla ke ma kut likiye tari. Fwal nu ke akmwuk su ku in konoiyukyuk in Luk 9:62, kutena met inmaslosr su tapulla ku in kalmekin tula lun fwinsrak lal in ekla sie met ke Togusrai lun God. Jisus el fwak: “Wangin met fwal nu ke togusrai lun God, el fwin filiye paol nu ke plau, a tapulla.”
14 Aok kutu selos su ekla Kristian in pal meeta elos fwasr tokin akmwuk lun fwal se inge ke mutamwauk me. Elos tia lain na paye ngun lun fwalu se inge. (2 Piter 2:20-22) Me purakak lun fwalu se inge arulanu eisla pwar a pal lalos, ke sripe se inge kapek lalos arulanu munas. Elos tia filiye nunuk a insielos ke Togusrai lun God a ma sumwosmwos lal, elos tia filiye ma inge in yok emeet in moul lalos, a elos forla a kaifweung in suk meet ma lun fwalu. Elos fwin tia mokleyuk tu in akilen lalalfongi munas a luma fwosrfwosr lalos, a elos fwin tia ekulla oiyen moul lalos ke elos suk kai mutal, na elos muta ke me sensen yok in tula lukelos futoto saok lalos nu sin Jeova a ke u lal.—Fwakyuk 3:15-19.
15 Kut fwin lungse in konoiyukyuk ke inkanek sumwos a in wi selos su akola in moula liki ongoiye lulap su arulanu futotoeni, na kut enenu in nasnas pal nu kemwa a oru nuknuk lasr in ‘owola, a akfwosfwosrye in sran Lam.’ (Fwakyuk 7:9-14; 1 Korint 6:11) Kut fwin tia muta in nasnas, a sumwosmwos ye mutan God, na orekma mutal lasr tia akinsemwomwoyel. Paye, kais sie sesr enenu in akilen la lalalfongi na paye su srifweyuk a kutangla ku in kasru kut in muteng a oru orekma su akinsemwomwoye God.
16 Pal puspis, met ma orek news a met kol lun fwalu se inge elos kaskas koluk lain met kulansap lun God, elos sramsram tia paye ke lalalfongi a moul lasr oanu met Kristian. Ma inge tia enenu in aklutye kut, Meyen Jisus el akkalemye na paye la ‘fwalu srungekutla, meyen kut tia ma lun fwalu.’ (Jon 17:14) Ya kut lela met inge nu kemwa su Setan el akkunye nunuk in aksangengye kut a akmunasye kut a oru kut in mwekin ke mwosasu? Ya kut lela kas kikiap lain ma paye in kunausla pal mwo lasr in wi meeting a orekma lun forfor pal nu kemwa? Ku kut tu na ku a akkalemye pulaik a kaifweung in tafwela in fwakak ma paye kel Jeova a Togusrai lal piye ka?
17 Fwal nu ke kas palu su akpayeyuk tari, kut moul misinge ke pal safla lun len safla. Lalalfongi lasr ke sie fwalu sasu sumwosmwos su tuku ke Baibel e fwa akpayeye na paye. Meet liki pal inge tuku, lela kut nu kemwa in akkalemye lalalfongi fukoko ke Kas lun God a sang me akpayeye ke lalalfongi lasr ke kut tia tui ke orekma in sulkakin peng mwo lun Togusrai fwin fwalu nu fon. Nunku ke tausen puspis lun met tumal lutlut sasu su baptaisla ke wik nu kemwa. Ya ma inge tia sie sripe yok tu kut in engunkin mongfwusesr lun Jeova in oru nununku lal lain met koluk su kol nu ke molela lun met puspis. Ya kut tia insemwomwo ke pal se ma God el lela orekma in luti ke Togusrai su molela met in tafwela? Ya kut tia insemwomwo in liye million puspis sin met elos eis ma paye a akkalemye lalalfongi lalos?
18 Kut tia ku in fwak nge saflaiyen pal ke me srifwe se inge ke lalalfongi lasr. Tusruktu pa inge ma paye su kut ku in lalalfongi: Jeova el pakiye tari len lal in kunausla kosrao a fwalu koluk in len lasr. Meet liki pal inge, lela kut in kaifweung in etawi me srikasrak mwo ke lalalfongi su srifweyuk tari a kutangla su akkalemyeyuk sin Met Akmsumwosye Lalalfongi Lasr, Jisus. A lela kut in fwasr tokin me srikasrak lun met lula akmusrala su matuo tari a lun met puspis su kulansapu ke pulaik inmaslosr.
19 Kut enenu in tia tui a kaifweung in sulkakin peng mwo ma patpat in mutanfwal nu kemwa, sruf, loa, a metu ke kut akesrui nu ke orekma lun lipufon su soksok yen engyengu. Lela elos in long kas lun lipufon inge: “Komwos in sangeng sin God, a sang mwolanu nu sel, tu aur in nununku summa.” (Fwakyuk 14:6, 7) Fwin nununku mutal inge el tuku, mea fwokin orekma lun lalalfongi lasr su srifweyuk tari a kutangla? Ya tia sie kutangla ke mwolanu—molela liki akmwuk koluk se inge a som nu ke fwalu sasu sumwosmwos lun God? Ke kut muteng nu ke me srifwe lun lalalfongi lasr, na kut ku in fwak, oanu met sap Jon el oru: “Pa inge kutangla se su kutangla fwalu, lalalfongi lasr.”—1 Jon 5:4.
[Footnotes]
a Srike liye The Watchtower lun June 1, 1973, sra 336-43, a July 1, 1973, sra 409-11.
b Srike liye The Watchtower lun July 15, 1983, sra 27-31.
Ya Kom Esam?
◻ Ke inkanek fuka me srifwe ke lalalfongi lasr ku in kol nu ke insemwomwo?
◻ Mea kutu nu ke me srifwe ke lalalfongi lasr su upa nu sesr in akilen?
◻ Fuka kut ku in eis ma lane kut fwin mongfwusesr in kutangla liki me srifwe ke lalalfongi lasr?
[Study Questions]
1. Efu met Kristian elos ku in lalalfongi ke me srifwe su e fwa tuku ke lalalfongi lalos?
2. (a) Fuka me srifwe ke lalalfongi lasr ku in kol nu ke insemwomwo? (b) Fuka mongfwusesr el oru orekma lal ke ma sikyuk nu sesr?
3. Efu kut tia enenu in fuleak ke sripen sangeng ke me srifwe ke lalalfongi lasr?
4. Mea pulakin lun sie brother ke me srifwe su el a kutu sin met akmusrala Kristian elos sun?
5. (a) Ma lane fuka tuku ke me srifwe su met akmusrala elos sun? (b) Efu ku me srifwe su sikyuk ke pal inge arulanu purakak insiesr?
6. Mea sie nu ke me srifwe upa su met puspis elos sun?
7. Mea lupan orekma ke lalalfongi su kutu sin met Kristian ke len lasr elos akkalemye?
8. Fuka sramsram lun sie brother fwin an Africa akkalemye la oasr me srifwe saye ke lalalfongi lasr a tia ke inkanek in kolyai ku anwuk mukena?
9. Fuka kut nu kemwa srifweyuk fwal nu ke ma simusla in 1 Korint 11:3?
10. Kain in me srifwe fuka kut sun fwin ke orekma lun forfor?
11. Fuka ma ekla sasu ke kalem lasr ke ma se ku ke kai ma inge sie me srifwe?
12. Mea ma enenu tu in akkeye lalalfongi tokin baptais?
13, 14. Mea kutu met elos oru tokin elos mutamwauk in fwasr ke inkanek lun alu paye?
15. Mea ma enenu tu in muta na ke insemwomwo lun God?
16. Ke inkanek fuka kas kikiap saap oanu me srifwe ke lalalfongi lasr?
17. Mea me akpayeye se inge su ku in purakak insiesr in tafwela in akkalemye lalalfongi?
18. Mea kom nunku in oru fwin ke orekma lom in kulansap nu sin Jeova?
19. Mea ma se su kom nunku mu ku in kutangla liki fwalu se inge?
[Pictures on page 17]
A. H. Macmillan (liyen lese ke line se meet) ke pal se ma el a kutu sin met liaung lun Watch Tower Society apkurun in som nu ke nien kapur ke sripen nununku sesumwos
El sie sin met su wi ke toeni lulap fwin an Detroit, Michigan, 1928
Ke yiu ekasr lula meet liki el mise, Brother Macmillan el srakna akkalemye lalalfongi
[Picture on page 18]
Oanu sou se inge, met Kristian puspis fwin an Africa elos akkalemye sie kain in lalalfongi su srifweyuk a kutangla