Fwufwasryesr oana Jisus Kraist el Fwufwasryesr
“El su fwak tu el muta in El [God], fwal nu sel tu lan fwafwasryesr, aok, oana El [Jisus] fwafwasryesr.”—1 JON 2:6.
1, 2. Mea enenu in weang nu ke inkanek in ngetak nu sin Jisus?
“LELA kut in moniyuk in kasrusr lun akutun, su filiyuki tari ye mutasr,” met sap Poul el simusla, “ngetak [mwo, NW] nu sin Jisus, Met Kol a Met Aksumwosye lalalfongi lasr.” (Hibru 12:1, 2) In akos inkanek in oaru kut enenu in ngetak nu sin Jisus Kraist.
2 Kas su orekmakinyuk in pal meeta nu ke “ngetak mwo,” su orekmakinyuk ke ma Simusla lun Grik, kalmekin “in loang mwo nu ke nunak lun sie met fwin wangin me akkoluk nu ka.” Oasr sie buk ku ma simusla su akkalemye ke ma inge: “Ke pal se met kasrusr ke akutun in an Grik ke sie stadium el fwin tia loang mwo nu ke inkanek su el kasrusr ka ke akutun lal a ke oiyen mui lun kasrusr lal, a el ngetla liye met puspus su liye akutun inge, oiyen mui lal ke kasrusr el munasla tila mui. Oiya se inge ku in sikyak pa nu sin met Kristian.” Me akkoluk puspus ku in kutongye kapkapek lasr in ngun. Kut enenu in ngetak akmwoye nu sin Jisus Kraist. A mea kut enenu in ngetak ka nu sin Met Kol? Kas Grik su lungasla nu ke kas inge “met kol” el kalmekin nu ke “sie met su oru me aksumwos a me kolyuk nu ke kutena ma a ke ma inge el oakiye me srikasrak.” In loang akmwoye nu sin Jisus enenu in fwasr tokin me srikasrak lal.
3, 4. (a) In fwufwasryesr oana Jisus Kraist el fwufwasryesr mea kut enenu in oru? (b) Kusensiyuk puspus fuka kut enenu in nunku yok ka?
3 “El su fwak tu el muta in El [God], fwal nu sel tu lan fwafwasryesr, aok, oana El [Jisus] fwafwasryesr,” Baibel el fwak. (1 Jon 2:6) Kut enenu in muta yurin God pal nukemwa ke kut liaung masap lun Jisus oana el liaung masap nukemwa lun Papa tumal.—Jon 15:10.
4 Ke ma inge, in fwufwasryesr oana Jisus el fwufwasryesr enenu kut in loang akmwoye nu sel oana Met Kol lasr a kut fwasr in fwalkel. Kusensiyuk yok sripe puspus su enenu in tuniyuk mwo ka pa: Fuka Kraist el kol kut ke pal inge? Fuka in etawi inkanek in fwufwasryesr lal ku in kasre kut? Me insemwomwo puspus fuka su tuku ke orekmakinyen me srikasrak su Jisus Kraist el oakiye?
Kraist El Kol Met Tuma Lutlut Lal Fuka
5. Meet liki el somwak nu in kosrao, mwulela fuka Jisus el orala nu sin met tuma lutlut lal?
5 Meet liki el somwak nu in kosrao, Jisus Kraist su akmoulyeyukyak el sikyuk nu sin met tuma lutlut lal a sang nu selos sie orekma yok sripe. El fwak: “Ke ma inge komwos som, a oru met in mutanfwal nu kemwa tu elos met tumal lutlut.” Ke pal sa Met Kol inge el mwulela pa ka la el fwa welulos ke elos akpayeye kunokon inge, fwakang: “Liye! Nga wi komwos pal e nu kemwa, nu ke saflaiyen akwuk lun fwal se inge.” (Mattu 28:19, 20) Ke inkanek fuka Jisus Kraist el wi met tuma lutlut lal nu ke saflaiyen akwuk lun fwal se inge?
6, 7. Fuka Jisus el kol kut ke inkanek lun ngun mutal?
6 “A akmwoyauk, ngun mutal, su Papa El fwa supamu in ek,” Jisus el fwak, “el fwa luti nu sumwos ma nu kemwa, a akesmakinye komwos ke ma nu kemwa Nga fwak nu sumwos.” (Jon 14:26) Ngun mutal el supeyukme in en Jisus, in kol a akkeye kut misenge. Ma inge sang kalem yok nu sesr ke ma lun ngun a kasre kut in kalem ke “ma loal lun God.” (1 Korint 2:10) Sayen ma inge, oiya mwomwo lun God lun “lungse, engun, misla, mongfusesr, kulang, inse mwo, oaru, fwokpap, sifwana leum fwom” pa “fwako lun ngun mutal.” (Galetia 5:22, 23) Ke kasru lun ngun mutal, kut ku in akyokye oiya mwomwo puspus.
7 Ke kut lutlutkin ma Simusla a kafweang in orekmakin ma kut lotela, ngun mutal lun Jeova el kasre kut in akyokyelik lalmetmet, liyaten, kalem yok, etauk, nununku sumwos, a ku in nunak. (Soakas 2:1-11) Ngun mutal el ouyepa kasre kut in muteng ke me sruf ku me srife. (1 Korint 10:13; 2 Korint 4:7; Filippai 4:13) Met Kristian nukemwa elos kaifwe in ‘sifwana aknasnasyelos liki ma fokfok nukemwa in ikwe a ngun, a in akmwoye ma mutal.’ (2 Korint 7:1) Ya kut ku in moulkin sie moul fwal nu ke me siyuk lun God ke ma mutal, ku ma nasnas, fwin wangin kasru lun ngun mutal? Sie inkanek su Jisus el orekmakin in kol kut ke pal inge pa ngun mutal, su Jeova God el sang ku nu sin Mwen natul in orekmakin.—Mattu 28:18.
8, 9. Fuka Jisus el orekmakin “met kulansap oaru a lalmetmet” in sang me kolyuk?
8 Loang mwo nu ke siepa inkanek su Kraist el kol congregation ke pal inge. In sang comment ke oasr tari lal a saflaiyen akwuk lun fwal se inge, Jisus el fwak: “Na su sie met kulansap oaru a lalmetmet su leum lal fililye fwin met in loom sel, in kitalos in pal fwal? Insemwomwo met kulansap se, su leum lal, ke el tuku, fwa konoielak in oru oinge. Payenu Nga fwak nu sumwos, tu El fwa akfulatyel fwin ma nu kemwa lal.”—Mattu 24:3, 45-47.
9 “Leum” se inge pa Jisus Kraist. “Met kulansap” inge pa u lun met Kristian akmusrala fwin fwalu. U lun met kulansap elos eis kunokon in karungin ma puspus lun Jisus fwin fwalu a in akoela me mongo in ngun ke pal fwal. Sie u srisrik lun met liaung puspus su fwal nu ke orekma su tuku ke u lun “met kulansap oaru a lalmetmet” elos orala nu ke u lun Governing Body ku U lun met matou in ngun su oru me kolyuk, elos orekma oana met tutafpo lun met kulansap oaru a lalmetmet. Elos sang me kolyuk nu ke orekma in sulkakin peng mwo lun Togusrai a in orala me mongo mwomwo in ngun ke pal fwal. Ke ma inge Kraist el kol congregation ke inkanek lun “met kulansap oaru a lalmetmet” su akmusrala in ngun a sin Governing Body su tuku ke u se inge.
10. Oiya fuka kut enenu in akkalemye nu sin met elder nukemwa, a efu?
10 Sie pa inkanek su Jisus el akkalemye ke me kolyuk lal pa inkanek lun “me sang nu sin met”—elos pa met Kristian elder, ku met liyeang nukemwa. Met nukemwa inge itukyang nu ke congregation in sang kasru in “aksumwosye met mwo, nu ke orekma in kulansap nu ke musaiyuk monin Kraist.” (Efesus 4:8, 11, 12) In sramsramkinelos, Hibru 13:7 el akkalemye: “Komwos esam elos su met kol lomwos, su fwak nu sumwos kas lun God; a komwos etawi lalalfongi lalos, ke komwos liye sripen moul lalos.” Met elder nukemwa elos kol congregation. Ke sripen elos etawi Jisus Kraist, lulalfongi lalos fwal in etawiyuk. (1 Korint 11:1) Kut ku in akkalemye kulo lasr nu ke akwuk su met elder elos orala ke kut akos a pusisel nu sin “met sang nu sin met” inge.—Hibru 13:17.
11. Ke inkanek fuka Jisus el kol met tumal lutlut nukemwa ke pal inge, a me eneneyuk in fwasr oana ma el oru?
11 Aok, Jisus Kraist el kol met tumal lutlut nukemwa ke pal inge ke inkanek lun ngun mutal, “met kulansap oaru a lalmetmet,” a met elder nukemwa lun congregation. Tu in fwasr oana ma Jisus el oru kut enenu in etu a kalem ke inkanek lal in kol a in akpusiselye nu ka. Kut enenu pa in etawi inkanek lal in fwasr. Piter el simusla, “Tu pangonyuk kut nu ke ma inge, tu Kraist el oayepa keok keyumwos, a likiye nu sumwos sie srikasrak, tu komwos in fwasr in fwalkel.” (1 Piter 2:21) Ke inkanek fuka orekma lasr in fwasr tokin me srikasrak sumwosmwos lun Kraist ku in kasre kut?
Akkalemye Oiye Mwomwo Ke Orekmakinyen Ku
12. Kain in me srikasrak fuka lun Kraist met elder nukemwa ke congregation elos enenu in etawi?
12 Jisus el eis ku su arulanu yok sin Papa tumal, ne oinge ke el orekmakin ku lal inge el akkalemye nunak a oiya mwomwo. Met nukemwa ke congregation, yokna met liyeang nukemwa—elos enenu in lela “nunak a oiye mwo lalos in eteyuk sin met nukemwa.” (Filippai 4:5, NW; 1 Timote 3:2, 3) Ke sripen oasr pa ku lun met elder nukemwa ke congregation, arulanu yok sripe elos in fwasr in fwalken Kraist ke elos orekmakin ku lalos inge.
13, 14. Ke inkanek fuka met elder elos ku in etawi Kraist ke elos akkeye met puspus in kulansapu God?
13 Jisus el etu a el nunku pa ka la oasr ma puspus su met tuma lutlut lal elos tia ku in oru. El tia siyuk selos ma yok liki ma su elos ku in sang a ku in oru. (Jon 16:12) El tia patkolos, a Jisus el akkeye met tuma lutlut nukemwa lal in “kafweang” in oru ma lungse lun God. (Luk 13:24) El oru ma inge ke el kololos a mokle ku akkeye insielos. Ke inkanek oinge, met Kristian elder nukemwa ke pal inge elos tia enenu in aksangengye met puspus in kulansap nu sin God ke inkanek in akmwekin. A, elos akkeyelos in kulansapu Jeova ke sripen oasr lungse lalos nu sel a nu sin Jisus, a nu sin met tulan lalos.—Mattu 22:37-39.
14 Jisus el tia orekmakin alukela ma fwal ku su itukyang nu sel ke inkanek su ku in oru in wanginla sukosok lun metu in oru orekma puspus su elos lungse in oru ke moul lalos. El tia pa oakiye akwuk puspus su tia ku in akpayeyuk sin met ku el oakiye masap puspus. Inkanek lal pa in akkeye met puspus in sun insiyelos ke inkanek lun akwuk puspus su oasr ke masap su itukyang nu sel Moses. (Mattu 5:27, 28) In etawi Jisus, met elder elos fwasr liki in orala masap ku akwuk puspus su fwal nu ke ma lungse lalos sifwana ku elos kafweang yok tu met puspus in akos nunak lalos sifwana. Ke nuknuk a me yun ku me akengan, met elder elos enenu in srike sang kasru in sun insiyen met ke elos akuteye akwuk mwomwo su oasr ke kas lun God, oana ke akwuk mwo su simusyukla in Maika 6:8; 1 Korint 10:31-33; 1 Timote 2:9, 10.
Akkalemye la Kut Pula pa Pulakin lun Met Lili Puspus a Kut Lungse in Sang Nunak Munas
15. Oiya fuka Jisus el akkalemye nu ke ma tafongla lun met tuma lutlut puspus lal?
15 Kraist el likiye sie me srikasrak nu sesr kut in etawi ke oiya su el akkalemye nu ke ma tafongla a ma sito lun met tuma lutlut puspus lal. Nunku ke ma luo su sikyak ke fong safla lal oana sie met fwin fwalu. Tokin el tuku nu in an Getsemane, Jisus el “esal Piter a Jemes a Jon oelul” a fwak nu selos in kafweang in “sano.” Tokin ma inge, “El fwasr kutu nu meet, a fwaksifwe, a pre.” Ke el foloko nu yurolos, “el liyelos la elos motul.” Oiya fuka Jisus el akkalemye nu selos? El fwak: “Paye ngun lungse, a ikwe munas.” (Mark 14:32-38) El tia aksumwosyel Piter, Jemes, a Jon ke pusren mulat, a el akkalemye la el etu ke pulakin lun munas lalos! Ke fong sepana inge, Piter el lafwekunal Jisus pal tolu. (Mark 14:66-72) Oiya fuka Jisus el akkalemye nu sel Piter tokin ma inge? “Leum El moulyuk, a sikme nu sel Saimon [Piter].” (Luk 24:34) “El sikme nu sel Sifas,” Baibel el fwak, “na nu sin siengoul luo.” (1 Korint 15:5) El tia akkalemye la el toasr, a Jisus el sang nunak munas nu sin met sap inge su auliyuk a akkeyel. Tok kutu, Jisus el sang nu sel Piter kunokon yok puspus.—Orekma 2:14; 8:14-17; 10:44, 45.
16. Fuka kut ku in fwasr oana ke oiya su Jisus el fwasr fwin met lili wiyesr elos aktoasrye kut ku tia akkalemye oiya mwo nu sesr ke kutu inkanek?
16 Ke pal se met lili wiyesr el aktoasrye kut ku akkalemye oiya koluk nu sesr ke kutu inkanek ke sripen oiyen sesumwos lalos, ya kut tia akkalemye pa la kut pula pa pulakin lalos a sang nunak munas nu selos oana Jisus el oru? Piter el kaifwe met lili puspus wiyel: “Komwos nu kemwa in nunak sefwanna, komwos in pakoten sie sin sie, lungse oana met lili, fusrasr inse, fulpap in nunak, tia atopuki ke ma koluk, ku atopuki ke kas kou; a komwos in akinsemwomwoyelos.” (1 Piter 3:8, 9) Na fuka fwin sie met el tia akkalemye oiye mwomwo oana ma Jisus el oru, a el srunga in akkalemye oiya mwo ku nunak munas? Fwinne ma inge sikyak kut enenu in srike in etawi Jisus a akkalemye oiya oana ma el akkalemye.—1 Jon 3:16.
Oru Ma lun Togusrai Meet
17. Ma puspus fuka akkalemye la orekma in oru ma lungse lun God pa ma yok sripe se emeet ke moul lun Jisus?
17 Ke siepa, inkanek, kut enenu in fwasr oana ke Jisus el fwasr in pal meeta. Orekma in sulkakin peng mwo lun Togusrai lun God pa orekma yok sripe se emeet ke moul lun Jisus. Tokin el sulkakin peng mwo nu sin mutan Samaria se su apkurun nu ke siti lun Sikar in an Samaria, Jisus el fwak nu sin met tuma lutlut puspus lal: “Me mongo nak in oru ma lungse lal Su supeyume, a in aksafyela orekma lal.” (Jon 4:34) In oru ma lungse lun Papa tumal kasrel Jisus; orekma inge oasr me akkeye, a me insemwomwo nu sel oana me mongo. Ya in etawi Jisus ke kut loang mwo pal nukemwa in oru ma lungse lun God fwa kol nu ke moul su wangin kalme yok a tia insemwomwo?
18. Me insemwomwo puspus fuka tuku ke orekma in akkeye tulik in wi ke orekma in kulansap oana sie pioneer?
18 Ke pal se papa a nine elos akkeye tulik natulos in wi ke orekma in kulansapu God pal nukemwa, elos a tulik natulos pa ku in eis me insemwomwo puspus. Oasr sie papa su oasr tulik mokul luo su fak natul el akkeyelos in oasr niyen sun lalos nu ke orekma lun pioneer mutamwauk ke pal se elos tulik srisrik me. Tokin elos srola ke lutlut lalos ke loom lutlut, fak se inge elos wi ke orekma lun pioneer. Ke el nunku ke me insemwomwo su el pulakin ka, papa se inge el simusla: “Tulik mokul luo nutusr inge tia aktoasrye kut. Ke me insemwomwo kut ku in fwak, ‘Tulik me usru sin Jeova.’” (Sam 127:3) A fuka tulik elos ku in eis ma lane fwin elos kafweang in oru orekma lun pioneer pal nukemwa? Oasr sie nine su oasr tulik limekosr natul el fwak: “Orekma lun pioneer kasru tulik nukemwa nutik in akkeye futoto lalos nu sin Jeova, elos akmwoye orekma lalos in oru lutlut lalos sifwana, a kasrelos in orekmakin mwo pal lalos, a kasrelos in lotela in oru ma lun ngun meet ke moul lalos. Fwinne elos nukemwa enenu in oru me aksumwos puspus, wangin sie selos auli ke inkanek lun moul su elos sulela in fwasr ka.”
19. Akwuk fuka nu ke pal fwasru met fwusr elos enenu in nunku ka?
19 Met fwusr, mea plan lomwos nu ke pal fwasru? Ya kom suk inkanek lom in arulanu mwo a sumat ke orekma lom? Ku ya kom kafweang in sun sie orekma in kulansap oana pioneer ke pal nukemwa? “Ke ma inge, komwos in arulanu liaung oiyen fwufwasryesr lomwos, tia oana met nukin, a oana met lalmetmet,” pa inge me kaifwe lal Poul, “molela pal tu len koluk.” El fwak pa: “Tu oinge, komwos in tia lalfon, a komwos in etu mea lungse lun Leum [Jeova, NW].”—Efesus 5:15-17.
Akkalemye Oaru
20, 21. Ke inkanek fuka Jisus el oaru, a fuka kut ku in etawi oiyen oaru lal?
20 In fwasr oana ma Jisus el oru, kut enenu in etawi oaru a paye lal. In sramsramkin oaru lal Jisus, Baibel el akkalemye: “Ke El muta in luman God, tia nunku tu ma lal oana God sie ma in sukok. A El sifwana akpusiselyel, a nukomang luman sie met kulansap, tu el orekla in luman met. A ke konoiyukyak El oana sie met, El sifwana akpusiselyel, a El akos nu ke mise, aok, mise lun sak soko.” Jisus el oaru a paye in akfulatye ku lun Jeova ke el akpusiselyel sifwana nu ke ma lungse lun God nu sel. El akkalemye akosten lal nu ke el mise ke sak soko. Lela “nunak se inge in on in kut” a kut akkalemye oaru lasr in akpusiselye kut in oru ma lungse lun God.—Filippai 2:5-8.
21 Jisus el oayepa akkalemye oaru nu sin met sap oaru nukemwa lal. Fwin oasr me munas a oiyen sesumwos lalos, Jisus el akkalemye lungse nu selos “nu ke safla.” (Jon 13:1) Ke inkanek oinge, kut tia enenu in lela oiyen sesumwos lun met lili wiyesr in oru kut in akkalemye sie oiya su lungse in akkolukyelos ku in torkaskas lainelos.
Fwasr ke Me Srikasrak su Jisus el Oakiye
22, 23. Ma lane puspus fuka tuku ke orekma in fwasr pal nukemwa ke me srikasrak su Jisus el oakiye.
22 Paye la, kut met sesumwos, paenang kut tia ku in fwasr sumwos in fwalken Me Srikasrak mwo emeet lasr. Tusruktu, kut ku in kafweang in fwasr in fwalkel ke inkanek mwo. In oru ma inge enenu kut in kalem a akpusiselye kut ke inkanek lun Kraist in kol kut a in sruokye me srikasrak su el oakiye.
23 Orekma lasr in etawi Kraist kol nu ke me insemwomwo puspus. E fwa oasr kalme yok lun moul lasr a oasr me insemwomwo ka meyen kut loang yok nu ke ma lungse lun God a tia in oru ma lungse lasr sifwana. (Jon 5:30; 6:38) Oasr pa pulakin ku conscience mwomwo lasr. Oiyen fufwasryesr el ekla me srikasrak mwomwo pa. Jisus el suli met nukemwa su orekma a fwuni in tuku nu yurol a eis mongla nu in ngunalos. (Mattu 11:28-30) Ke kut fwasr tokin me srikasrak lun Jisus, kut ku in akkeye pa met puspus ke inkanek lun asrouki lasr. Ke ma inge, lela kut in fwasr oana ke inkanek mwo su Jisus el fwasr ka.
Ya Kom Esam?
• Ke inkanek fuka Kraist el kol met tuma lutlut nukemwa lal ke pal inge?
• Fuka met elder elos ku in fwasr tokin me kolyuk lun Kraist in orekmakin ku lalos su itukyang nu selos sin God?
• Fuka kut ku in fwasr tokin me srikasrak lal Jisus ke kut muteng nu ke ma tafongla lun met puspus?
• Fuka met fwusr elos ku in oru meet ma lun Togusrai?
[Picture on page 21]
Met Kristian elder nukemwa elos kasre kut in fwasr tokin me kolyuk lun Kraist
[Pictures on page 22, 23]
Met fwusr, akwuk fuka komwos orala in engankin moul lun sie met Kristian su oasr me insemwomwo puspus ka?