In Moul Fwal Nu Ke Mwolela Lun Met Kristian Su Oasr Sukosok
“A yen ngun lun Jeova el on we, sukosok on we.”—2 KORINT 3:17.
MET LO LUN JEOVA elos lalalfongi la alu lalos fwa on ma patpat. Ke ma inge elos ngetuk nu ke pal fwasru in kulansap nu sin God “in ngun a paye” ma patpat. (Jon 4:23, 24) Oanu sie met su oasr sukosok in oru sulela, met Kristian inge elos oru sulela in mwolela moul lalos nu fon nu sin Jeova God a elos kaifweung in moul fwal nu ke mwolela lalos. Ke sripe se inge, elos filiye lalalfongi lalos ke Kas lun God a ngun mutal lal. Ke elos kaifweung ke insielos nu kemwa in fwasr fwal nu ke mwolela lalos oanu met Kristian se ke sukosok su God el sang nu selos, Met Lo nu kemwa elos akkalemye sunak ke kunokon lun guferment oanu “ku su fulat lukelos” a elos orekmakin kutena me sang lal a akmwuk fwal nu ke ma sap. (Rom 13:1; Jemes 1:25) Ke sie me pupulyuk, Met Lo elos orekmakin Watch Tower Society oanu kofwen orekma su fwal nu ke ma sap—sie pa inge ke kofwen orekma puspis ke kain in an puspis—tu elos in ku in akpayeye orekma lalos in kasru kutu met, yokna ke ma lun ngun. Tusruktu Met Lo nu kemwa elos mwoleyukla nu sin God, a tia nu sin kutena kofwen orekma fwal nu ke ma sap, a mwolela lalos nu sin Jeova fwa on nu tok ma patpat.
2 Oanu met kulansap su mwolela tari nu sin God, oasr kunokon lun Met Lo lun Jeova in akos ma Jisus el sapkin nu selos in “oru met in mutanfwal nu kemwa tu elos in met tumuk lutlut, baptaiselosla in En Papa, a Mwen, a ngun mutal, luti nu selos.” (Mattu 28:19, 20) Orekma se inge el tafwela nu ke saflaiyen akmwuk se inge, meyen Jisus el fwak: A mwosasu inge lun togusrai fwa sukakinelik fwin fwalu nu fon tu in ma lo nu sin mutanfwal nu kemwa, a na safla a fwa tuku.” (Mattu 24:3, 14) Ke kais sie yiu, nien orek buk lun Watch Tower Society a kutu kofwen orekma lal su fwal nu ke ma sap elos sang nu sin Met Lo lun Jeova million puspis ke Baibel, buk, buk srisrik, a magasin tu elos in ku in orekmakin ke orekma in luti fwin fwalu nu fon. Ke sripe se inge kofwen orekma inge su fwal nu ke ma sap arulanu yok sripe ke orekma in sang kasru nu sin met kulansap lun God su mwoleyukla tari tu elos in ku in moul fwal nu ke mwolela lalos nu sel.
3 Saap kutu met elos akukuin ke inkanek in sramsram lun Met Lo ke Watch Tower Society—ku “Society”—a akkalemye la elos tia sramsram mukena ke society oanu kofwen orekma su fwal nu ke ma sap. Ya elos tia nunku ou inge oanu ku safla su kol fwin ke akmwuk lun alu? Buk inge Jehovah’s Witnesses—Proclaimers of God’s Kingdom el akkalemye ma inge ke el aketeye: “Ke pal se ma The Watchtower [June 1, 1938] el sramsram ke ‘Society,’ el tia sramsram kofwen orekma su fwal nu ke ma sap, a el sramsram ke un met akmusrala Kristian su oakiye kofwen orekma su fwal nu ke ma sap inge a orekmakin ma inge.”a Ke ma inge, kas se inge el kalmekin “met kulansap oaru a lalmetmet.” (Mattu 24:45) Pa inge sripe efu Met Lo nu kemwa elos orekmakin kas se inge “Society.” Paye, kofwen orekma se inge su fwal nu ke ma sap a “met kulansap oaru a lalmetmet tia ku in oanu sie ke kutena pal. Director puspis lun Watch Tower Society elos vote ka, tusruktu Met Lo nu kemwa su wi ke ‘met kulansap oaru’ elos inge akmusrala ke ngun mutal lun God.
4 Meyen elos lungse in fwasr liki fos, paenang Met Lo lun Jeova elos arulanu taran fuka elos sramsram. Met Lo puspis elos tia orekmakin kas se inge, “oanu Society el luti,” a elos orekmakin kas inge, “Baibel el fwak” ku, “Nga kalem ke luti lun Baibel.” Ke inkanek se inge elos akkalemye sulela lun kais sie Met Lo su elos oru ke pal se ma elos eis luti lun Baibel, a elos ouyepa fwasr liki nunuk koluk lun met su nunku la Met Lo nu kemwa elos muta ye koko lun sie met kol lun alu srisrik. Paye, kas se su orekmakinyuk tia enenu in ekla sie me sramsram yok. Meyen kas se su orekmakinyuk, ku in yok sripe mukena tu in wangin me fos. Nunuk sumwos lun met Kristian eneneyuk. Baibel el kai kut in “tia akukuin ke kas.” (2 Timote 2:14, 15) Ma Simusla el ouyepa akkalemye akmwuk se inge: “Ou inge komwos, komwos fwin tia kaskas ke loa kas fwusesr in akkalemye, fuka eteyen ma komwos kaskas ka”?—1 Korint 14:9.
Ngun Mutal lun God El Aksrikye Enenu ke Ma Sap
5 “Ma nu kemwa tia oul; a ma nu kemwa tia fwal,” Met sap Poul el fwak. El tafwela: “Ma nu kemwa tia oal; a tia ma nu kemwa me musaiyuk.” (1 Korint 10:23) Arulanu kalem la Poul el tia lungse in akkalemye la sumwos in oru ma se su Kas lun God el tia lungse kut in oru. Kut fwin srikeye nu ke ma sap 600 su God el sang nu sin met Israel in pal meeta, na oasr ma sap ekasr na su fwal tari ke moul lun met Kristian. Ke ma inge, oasr ma puspis su filiyuki nu ke sulela lun ella lun sie met. Sie met su insemwomwo ke mwolela lal nu sin Jeova el arulanu sang kulo ke sukosok su tuku ke kolyuk lun ngun mutal lun God. Meyen el oru ma paye in ma lal, paenang sie met Kristian el fwasr tokin ella lal su pala ke Baibel a lalafongi ke kolyuk lun God ke inkanek lun ngun mutal. Ma inge sang kasru nu sin sie met Kristian su mwoleyukla in etu piye ma se su ku in “musaiyuk” a “fwal” nu selos sifwanu a nu sin kutu met. Elos akilen la sulela su el oru el orekma nu ke futoto lal nu sin God, El su mwoleyukla moul lal.
6 Sie Met Lo el akkalemye la el srukye ma paye ke el sang comment lal ke meeting lun met Kristian. Ke pal se meet, saap el kalweni na ma oasr ke me rid su elos orekmakin ke lutlut. Tusruktu, tok, el mutamwauk in kapkapek nu ke na el aketeye me luti lun Baibel ke kas lal sifwanu. Ke ma inge el mutamwauk in sang me akpayeye la el kapkapek ke nunuk, a tia kalweni na ma kutu met elos fwak. In orekmakin kas lal sifwanu ke ma el nunku a akkalemye kas lun ma paye su tuku ke insiel, ma inge ku in kasrel in insemwomwo a ma inge akkalemye la el lalalfongi na paye ke ma oasr ke nunuk lal.—Ekklisiastis 12:10; srike liye Rom 14:5b.
7 Met Lo lun Jeova elos mokleyuk ke lungse nu sin God a nu sin met tulan lalos. (Mattu 22:36-40) Paye, elos futoto sie sin sie oanu met lili fwin fwalu nu fon ke sripen me kapur lun lungse su oanu lungse lal Kraist. (Kolosse 3:14; 1 Piter 5:9) Tusruktu meyen oasr ku lalos in oru sulela, paenang kais sie selos oru sulela in fwakak peng mwo lun Togusrai lun God, in tia wi ke kutena mokuikui lun politic, liyelosyung liki sra, a fwasr liki kutena me akengun sufwal, a in moulkin moul fwal nu ke akmwuk lun Baibel. Ma inge nu kemwa elos oru ke sripen sulela lalos sifwanu a tia ke sripen sapsap. Sulela inge nu kemwa su elos oru fwal nu ke inkanek lun moul su met nu kemwa su akola in ekla Met Lo elos sulela meet liki elos mwolela moul lalos oanu sie met Kristian.
Oasr Kunokon Ke Sie Governing Body?
8 Baibel el akkalemye na paye la Met Kristian paye nu kemwa elos kulansap ke sripen lungse lalos sifwanu. El fwak: “Inge Jeova el ngun; a yen ngun lun Jeova el on we, sukosok on we.” (2 Korint 3:17) Tusruktu, fuka ma paye se inge el insese nu ke sie “met kulansap oaru a lalmetmet” wikin Governing Body lal?—Mattu 24:45-47.
9 In topuk nu ke kusensiyuk inge, kut enenu srukye ke nunuk lasr akmwuk lun Baibel ke sifwe. (1 Korint 11:3) Efesus 5:21-24, el akkalemye la Kraist pa “sifwen congregation,” ma inge “akpusiselyeyuk” nu sel. Met Lo lun Jeova elos kalem ka la met kulansap oaru a lalmetmet pa ma wiel Kraist in ngun. (Hibru 2:10-13) Un met kulansap oaru inge pakiyuki in kite “me mongo in ngun ke pal fwal.” Ke len safla se inge, Kraist el pakiye met kulansap inge “fwin ma nu kemwa lal.” Ke ma inge mwal lalos fwal in akfulatyeyuk sin met nu kemwa su ekin Kristian.
10 Sripen akmwuk lun sifwe pa in kurunganang inse siefwunnu a in orala “ma nu kemwa in orek in oiye fwal, a in takla.” (1 Korint 14:40) Tu in oasr kain in akmwuk se inge ke century se meet, sie pise lun met akmusrala su tuku ke un met kulansap oaru a lalmetmet suleyukla in aoliyen u se inge. Oanu fwokin ma sikyuk puspis toko, orekma in liaung lun Governing Body se inge akkalemye la oasr insese a insemwomwo lun Jeova nu selos. Met Kristian ke century se meet elos engun in eis kain in akmwuk se inge. Aok, elos insese na paye a sang kulo ke fwako mwomwo su tuku ke akmwuk se inge.—Orekma 15:1-32.
11 Ma saok su tuku ke akmwuk se inge srakna oasr nu misinge. Ke len inge, oasr met akmusrala siengoul su wi ke Governing Body lun Met Lo lun Jeova, met inge nu kemwa oasr experience loelos tari ke orekma lun met Kristian. Elos kasru a kol ke ma lun ngun nu sin Met Lo lun Jeova, oanu ma governing body ke century se meet elos oru. (Orekma 16:4) Oanu met Kristian in pal meeta, Met Lo lun Jeova elos engun in ngetuk nu sin met lili wielos inge su matu in ngun a wi ke Governing Body ke orekma in kol a kasru fwin ke inkanek in alu lalos. Fwinne met nu kemwa su wi ke Governing Body elos met kulansap lun Jeova a lun Kraist, oanu met lili Kristian wielos, Baibel el kai kut: “Komwos in akos met kol lomwos, a akpusisilye komwos nu selos, tu elos sano nu ke ngunomwos oanu elos su fwa fwakak orekma lalos; tu elos fwa ku in fwakak ke engun, a tia ke asor, tu ma inge tia mwo nu sumwos.”—Hibru 13:17.
12 Ya mwal a orekma in liaung su Ma Simusla el pakiye nu sin Governing Body ku in kalmekin la kais sie Met Lo lun Jeova elos tu ye mutun Governing Body ke kutena orekma su elos oru? Mo, kut fwin tuni kas lal Poul nu sin met Kristian fwin an Rom: “A kom, efu kom ku nununku met lim? Ku kom, efu kom ku pilesru met lim? Tu kut nu kemwa fwa tu ye mutun tron in nununku lun God . . . Na ou inge kais sie sesr fwa fwakak kel sifwanu nu sin God.—Rom 14:10-12.
13 Tusruktu, ya tia paye la, kais sie Met Lo lun Jeova elos enenu in orala report ke orekma lun forfor lalos? Aok elos oru ou inge, tusruktu sripeu efu elos oru ou inge akkalemyeyuk ke sie Buk lun Met Lo, su fwak: Met tumal lutlut lal Jisus Kraist in pal meeta elos loang yok ke report ke kapek lun orekma in luti. (Mark 6:30) Ke elos liye la orekma arulanu kapkapek, report puspis ke kapek elos toeni nu fon wekunang me sramsram puspis lun met nu kemwa su wi ke orekma in luti ke peng mwo. . . . (Orekma 2:5-11, 41, 47; 6:7; 1:15; 4:4) . . . Fuka sie me akkeye na paye nu sin met Kristian oaru inge nu kemwa in long report ke kapkapek su orekla tari! . . . In oupanu, u lun Jeova ke len inge elos kaifweung in orala record sumwos ke orekma su elos oru in akpayeye ma simusla in Mattu 24:14.”
14 Governing Body el sie me sang ke kulang a elos me srikasrak ke lalalfongi mwo su kut nu kemwa enenu in etawi. (Filippai 3:17; Hibru 13:7) Ke kaifweung a etawi lalos nu sel Kraist oanu me srikasrak lalos, elos ku in ouyepa fwak kas lal Poul: “Tiu tu kut leum fwin lalalfongi lomwos, a kut met kasru in engun lomwos, tu ke lalalfongi komwos tu ku.” (2 Korint 1:24) Ke elos liye ma metu elos pala in oru, Governing Body el purakak nunuk lun met ke ma lane su tuku ke akos lalos ke Baibel, elos sang kas in kasru fuka in orekmakin ma sap lun Baibel a akmwuk lal, elos sang kas in sensen ke me sensen su tia liyeyuk, a elos sang kasru nu sin “met orekma wielos” ke inkanek lun kas in akkeye su elos eneneyuk. Elos ekla met kulansap lun met Kristian paye, elos kasrelos in srukye insemwomwo lalos, a akkeyelos in lalalfongi tu elos in ku in tu ku.—1 Korint 4:1, 2; Taitus 1:7-9.
15 Fwin sie Met Lo el oru sulela fwal nu ke kai lun Baibel su Governing Body el kaifwe nu sel in oru, el oru ou inge ke lungse lal sifwanu meyen lutlut lal ke Baibel el kasrel in lalalfongi la pa inge inkanek sumwos. Kais sie Met Lo mokleyuk ke Kas lun God in orekmakin kai mwomowo su tuku ke Baibel su Governing Body el kaifwe nu selos, a elos akilen la kutena sulela su elos oru ma inge el orekma nu ke futoto lalos sifwanu nu sin God, el su eis mwolela lalos.—1 Tessalonika 2:13.
Tulik Lutlut a Met Solse
16 Tusruktu fwin sulela lun kais sie met in oru orekma lal su el lungse in oru, na efu kutu sin Met Lo lun Jeova elos sisila? Wangin kutena met su ku in fwak piye ke ma koluk su met se el ku in oru tu lan fwal in sisila liki. A, akmwuk in sisila su tuku ke Baibel eneneyuk mukena fwin sie met in congregation su oru ma koluk upa el srunga in auliyuk, oanu orekma su akkalemyeyuk in sapter 5 lun Korint Se Meet. Ke ma inge, saap fwinne sie met Kristian el sisila liki ke sripen orekma lun kosro, tusruktu ma inge el ku in sikyuk mukena fwin sie met el srunga in eis kasru in ngun su tuku sin met seperd kulang. Tia Met Lo lun Jeova mukena orekmakin kain in akmwuk se inge. The Encyclopedia of Religion el fwak: “Kutena met ke sie an elos akkalemye sumwos lalos in kurunganang moul lalos sifwanu lain kutena met tulan laltal su srunga in fwasr tokin akmwuk lun an’u a filiye ke me sensen insemwomwo lun met nu kemwa in an selos. Fwin ke alu, akmwuk se inge pal nu kemwa akkeyeyuk ke lalalfongi la [akmwuk ke sisila] el orekma yok ke moul lun sie met ye mutun God.”
17 Met Lo lun Jeova nu kemwa elos met lutlut ke Baibel. (Josua 1:8; Sam 1:2; Orekma 17:11) Program ke lutlut Baibel su Governing Body elos orala ku in pupulyukin nu ke lutlut ke loom lutlut su board lun education el oakiye. Fwinne tia board pa sropon me lutlut su enenu, tusruktu el pa oakiye akmwuk su enenu in orek ke lutlut, el sulela inkanek in lutlut, a sang me kasru su eneneyuk. Fwin oasr kutena met su srunga in moul fwal nu ke akmwuk lun loom lutlut, sang ma upa nu sin kutu tulik lutlut, ku sang me mwekin ke loom lutlut, met inge su oru ou inge ku in sisila liki. Oasr sumwos lun met kol ke loom lutlut in orekma ke insemwomwo lun tulik lutlut nu kemwa.
18 Sayen met lutlut, Met Lo lun Jeova nu kemwa elos met solse lal Jisus Kraist, sapkinyuk in “meuni meun mwo lun lalalfongi.” (1 Timote 6:12; 2 Timote 2:3) Aok, sie oiye su tia fwal nu sin met solse Kristian ku in kol nu ke mulat lun God. Oanu sie met su oasr sukosok in oru sulela, sie solse Kristian el ku in oru sulela fwal nu ke lungse lal, tusruktu el enenu in eis kunokon ke kutena sulela su el oru. Poul el fwak: “Wangin sie met su met meun el sifwanu loella ke ma lun fwalu; tu el fwa ku in akengunye el su sulella tu lan sie met meun. Kutena met fwin sritel in akutun, tusruktu el tia eis tefuro in kutangla, el fwin tia sritel fwal nu ke ma sap.” (2 Timote 2:4, 5) Met Kristian su matu in ngun, wekunang elos nu kemwa su wi ke Governing Body, elos kaifweung na in akmwesasyelos na paye nu sin met kol lalos, Jisus Kraist, elos “sritel fwal nu ke ma sap” tu elos in ku in eis tefuro lun moul ma patpat.—Jon 17:3; Fwakyuk 2:10.
19 Ya tia me akpayeye pa akkalemye la Met Lo lun Jeova elos met kulansap lun God a tia met kulansap lun met? Oanu met Kristian su mwolela tari moul a engunkin sukosok su Kraist el sang nu selos, elos lela ngun mutal a Kas lal in kol moul lalos ke elos kulansap ke inse siefwunnu wikin met lili wielos ke congregation lun God. (Sam 133:1) Me akpayeye puspis ke ma inge el ouyepa ela kutena alollo ke sropon ku lalos. Wikin met on, elos ku in on: “Jeova el ku luk, a me loeyuk luk. Insiuk nuna lalalfongel, a Nga kasreyuk, ke ma inge insiuk engunlanu a Nga fwa kaksakunal ke on luk.”—Sam 28:7.
[Footnote]
a Orekla ke 1993 sin Watchtower Bible and Tract Society of New York, Inc.
Fuka Kom Topuk?
◻ Fuka Watch Tower Society a kutu kofwen orekma su fwal nu ke ma sap elos sang kasru nu sin Met Lo lun Jeova?
◻ Fuka met Kristian elos eis ma lane ke kunokon lun Governing Body lun Met Lo lun Jeova?
◻ Efu met lun God elos orala report lalos ke orekma lun forfor?
◻ Ye ma sikyuk puspis fuka oru sisila lun sie met Kristian su mwolela ku in fwal?
[Study Questions]
1. Met Lo lun Jeova elos mwolela moul lalos nu sin su, a efu elos orekmakin kofwen orekma puspis su fwal nu ke ma sap?
2. Efu Watch Tower Society a kutupa kofwen orekma fwal nu ke ma sap arulanu engunkinyuk sin Met Lo lun Jeova?
3. Ke kalme fuka Met Lo lun Jeova elos orekmakin kas se inge “Society” in pal meeta?
4. (a) Fuka Met Lo puspis elos kaskas tu elos in fwasr liki fos? (b) Efu kut enenu in srukye nunuk sumwos fwin ke kas su orekmakinyuk?
5. Mea kalem sumwos lasr su kut enenu in oru ke 1 Korint 10:23?
6. Ke meeting lun met Kristian, fuka kut ku in akkalemye la kut oru ma paye in oasr yurosr?
7. Kain in sulela puspis fuka met kulansap lun God elos oru ke sukosok?
8. Kain in kusensiyuk fuka enenu in akkalemyeyuk?
9, 10. (a) Fuka akmwuk ke sifwe ku in orekmakin nu ke congregation lun met Kristian? (b) Mea akos ke akmwuk lun sifwe el oru nu sin congregation lun met Kristian ke century se meet?
11. Nunuk fuka enenu in akkalemye nu sin Governing Body ke len lasr?
12. Nu sin su kais sie met enenu in oasr kunokon?
13. Efu Met Lo lun Jeova elos orala report ke orekma lun forfor lalos?
14, 15. (a) Fuka 2 Korint 1:24 ku in orekmakin nu ke Governing Body? (b) Kais sie met Kristian elos oru sulela lalos fwal nu ke mea, a elos akilen kain in ma paye fuka?
16. Fwinne sulela ke oiye su enenu in akkalemye ma lun kais sie met, tusruktu efu kutu sin Met Lo elos sisila?
17, 18. Me pupulyuk fuka akkalemyeyuk ke sumwos in sisila fwin ke (a) akmwuk lun loom lutlut? (b) u lun met solse?
19. Tokin kut tuni me akpayeye nu fon ke mwolela lun met Kristian, nu ke mea kut ku in lalalfongi na paye?
[Picture on page 16]
Governing body ke century se meet elos kurunganang inse siefwunnu ke me lutlut
[Picture on page 20]
Fwin fwalu nu fon, Met Lo lun Jeova elos engunkin sukosok su Kraist el sang nu selos