Sucu Lom An In Tuhkweni Alu nuh sin Jeova

In oacna ma kom lotwelah ke mwe rit se inge, puhs kahs in kahsruh ke Bible nuh sum ac nuh sin sucu lom an. Jeova el ke kom in engan. El wuhlelah lah kom fin fihliyac alu lom nuh sel uh meet liki ma nuhkewa, “el ac fah acsot ma inge nuhkewa nuh suwos.” (Matthew 6:33) Ahkfototoye inmahsrlom nuh sin God pacl nuhkewa. El arlacna ke kom in kawuck nuh sel. Pa inge ma se ma sacohk emeet, ma sie mwet el ac kuh in engankihn.​—Matthew 22:37, 38.

1 AHKFOTOTOYE INMAHSRLOM NUH SIN JEOVA

MA BIBLE UH FAHK KAC: “‘Nga ac fah pahpah tomowos, ac kowos ac fah wen ac acn nuhtihk,’ Leum God Kuhlacna El fahk.” (Luo Corinth 6:18) God el ke kom in sie kawuck na fototo nuh sel. Sie inkacnek kom kuh in oruh ma inge pa ke kom puhruhe nuh sel. Jeova el siyuck sum in “puhruhe pacl nuhkewa.” (Sie Thessalonica 5:17) El arlacna ke lohng ma kom nuhnkuh ac fosrngah kac uh. (Philippi 4:6) Mwet in sucu lom an ac kuh in akihlen luhpan luhlahlfongi lom nuh sin God ke pacl se kom puhruhe ac eltahl wi lohng uh.

Kom enenuh in sramsram nuh sin God ac oacyacpac porongo ma el fahk uh. Kom kuh in oruh ma inge ke kom lutlutkihn Kahs lal ac mwe rit pucspucs ma fal nuh ke Bible. (Psalm 1:1, 2) Nuhnkuh yohk ke ma kom lotwelah uh. (Psalm 77:11, 12) Kom fin porongo God, kalmac pa kom wi nuh ke toeni nuhkewa luhn congregation.​—Psalm 122:1-4.

Sie pac inkacnek in ahkfototoye inmahsrlom nuh sin Jeova uh pa ke kom sramsramkuhnuhl nuh sin mwet sahyac. Pacl nuhkewa kom oruh ma inge, kom ac puhla lah fototoeni inmahsrlomtacl liki na meet ah.​—Matthew 28:19, 20.

MA KOM KUH IN ORUH:

• Ke kais sie lwen, oraclah pacl lom in rit Bible ac puhruhe

• Ke sucu lom an, oruh orekma in kuhlwacnsap lom nuh sin Jeova meet liki pacl in pwacr ac monglac

2 ENGANKIHN PACL IN LUTLUT LUHN SUCU LOM

MA BIBLE UH FAHK KAC: “Kaluckyang nuh yurin God, ac El ac fah apkuhranwot nuh yuruwos.” (James 4:8) Kom enenuh in oakiyac ac fahsr fal nuh ke oakwuck in lutlut luhn sucu lom an.a (Genesis 18:19) Tuhsruhktuh, oasr pac ma kom enenuh in oruh sahyac. Kom enenuh in fihliyac God ke moul lom lwen nuhkewa. Ahkfototoye inmahsrlon sucu lom an nuh sin God ke kom sramsramkuhnuhl ke “pacl kom oasr in lohm sum, pacl kom fuhfahsryucsr, pacl kom monglac ac pacl kom orekma.” (Deuteronomy 6:6, 7) Oruh nien sun kuh finsrak lom an in oacna Joshua ke el fahk: “Fuhnuh nga ac mwet in lohm sihk, kuht ac fah kuhlwacnsuhpuh LEUM GOD.”​—Joshua 24:15.

MA KOM KUH IN ORUH:

• Oraclah sie oakwuck wo in sang ahkpah nuh sin mwet in sucu lom an ma fal nuh ke mwe enenuh luhn kais sie mwet