IP AHKTOLU
Kom Ac Ahkwoyelah Fuhkah Ma Upac Lom uh
“Kowos in luhngse sie sin sie ke inse pwacye, mweyen elos suc luhngse elos ahkolah pacl nuhkewa in nuhnak munas ke ma koluk mwet uh oruh nuh selos.”—Sie Peter 4:8
Ke kom ac mukul tuhmom kuh muhtwacn kiyom an muhtwacwacack ke moul in pahyuck lomtacl an, kain in ma upac ac kuh in sikyak. Ac kuh in ma ke srihpen tiac oacna sie ma komtacl nuhnkuh ac puhla kuh liye lomtacl ke kais sie ma. Ma upac lomtacl an ac kuh pac in ma ke srihpen mwet sahyac kuh ma tiac motkoeyuck muh ac sikyak uh sikyak.
Ke pacl se ma siacnyacn se sun ma upac, kuhtuh seltahl som suk kahsruh nuh ke ma upac laltahl uh sin mwet ke sucu laltahl uh. Wo in suk kahsruh sin mwet mahtuh uh. Tuhsruhktuh, kuht fin eis kahsruh ke Bible uh, moul in pahyuck lasr uh ac fokoko na finne ke pacl upac. (Matthew 5:23, 24) Kom ac mukul tuhmom kuh muhtwacn kiyom an fin ukwe kahs in kahsruh ke Bible uh, komtacl ac kuh in lahlmwetmwet in ahkwoyelah ma upac lomtacl an.
1 TUHKWENI SRAMSRAMKUHNLAH MA UPAC LOMTACL AN
MA BIBLE UH FAHK KAC: “Oasr pacl in kahskahs.” (Ecclesiastes 3:1, 7) Oraclah pacl komtacl in tuhkweni sramsramkuhnlah ma upac lomtacl an. Fahk na pwacye ma kom puhla an ac nuhnak lom ke ma se komtacl sruhmuhn ingacn. “Kahskahs pwacye” nuh sin mukul tuhmom kuh muhtwacn kiyom an pacl nuhkewa. (Ephesus 4:25) Kom finne puhla toasrlah yohk ke insiom, srihke in kutongkowi sifacna in tiac akuhkuhin. Sie top mislac ac kuh in oruh sramsram lomtacl an in tiac eklac nuh ke sie mweun.—Soakas 15:4; 26:20.
Kom finne tiac insese, kwacfeacng na kom in kuhlwacng ac nik kom muhlkuhnlah in ahkkahlwemye luhngse ac suhnak nuh sin mukul tuhmom kuh muhtwacn kiyom an. (Colossae 4:6) Kwacfeacng kom in ahkwoyelah ma upac sacn ke pacl na sa ac nik kom mislac na.—Ephesus 4:26.
MA KOM KUH IN ORUH:
Oakiyac sie pacl wo in tuhkweni sramsram ke ma upac lomtacl an
Fin pacl lom in lohng, kwacfeacng kom in tiac ahkkulukye sramsram lal an. Ac fah oasr pacl fal lom in sramsram
2 LOHNG AC KAHLWEM KAC
MA BIBLE UH FAHK KAC: “Kowos in arlacna luhngse sie sin sie oacna mwet lili ac lucluc in Christ, ac kowos in engan in ahkfuhlwactye sie sin sie.” (Rome 12:10) Arlacna yohk srihpac ke pacl se kom porongo uh. Kwacfeacng tuh kom in kahlwem ke nuhnak luhn mukul tuhmom kuh muhtwacn kiyom an ke ma “elos puhlakihn . . . ac inse puhsisacl.” (1 Peter 3:8; James 1:19) Nik kom orek atac muh kom lohng. Fin kuh, fihliyac ma kom oruh an ac lohacng nuh sin mukul tuhmom kuh muhtwacn kiyom an. Kuh siyuck sel lah komtacl ac kuh in fah sramsramkihn tok. Kom fin nuhnkuh ke mukul tuhmom kuh muhtwacn kiyom uh oacna sie kawuck ac tiac mwet lokoalok se lom, kom ac tiac “sa in muhlat.”—Ecclesiastes 7:9.
MA KOM KUH IN ORUH:
Kom finne tiac engan ke ma kom lohng an, tuhsruhk kwacfeacng na in lohng ac srihke kom in kahlwem ke ma el fahk an
Lohng lah meac el srihke in fahk an. Lohacng pac nuh ke luhmahl ac kihsen sramsram lal an
3 FAHSR FAL NUH KE PWACPA LOMTACL AN
MA BIBLE UH FAHK KAC: “Orekma, na kom fah eis woiyac. Kom fin muhtana sramsram, kom ac suhkahsruhp.” (Soakas 14:23) Suhfal komtacl in inseselac muhkwena ke ma ac wo in orek uh. Kom ac enenuh in orekmakihn ac fahsr fal nuh ke ma komtacl kewa otwelah uh. Sahp ac oasr ma kom enenuh in kwacfeacng kuh orekma upac nuh kac, tuhsruhktuh ac oasr srihpac. (Soakas 10:4) Komtacl fin tuhkweni orekma, komtacl ac fah eis woiyen orekma upac lomtacl an.—Ecclesiastes 4:9.
MA KOM KUH IN ORUH:
Tuhkweni sramsramkihn lah meac kuhtuh ma kais sie sumtacl ac enenuh in oruh tuh in ahkwoyelah ma upac lomtacl an
Ke kais kuhtuh pacl, tuhkweni muhta sramsramkihn lah fuhkah kapkapack lomtacl an