IP AHKLIHMEKOHSR
Kom Ac Orek Mislac Fuhkah Inmahsrlon Mwet In Sucu Lom An
“Kowos enenuh in moulkihn . . . kuhlwacng, inse puhsisacl, mongfihsracsr, ac muhtweng.”—Colossae 3:12
Pahyuck se oraclah sie sucu sasuc. Pwacye lah kom luhngse ac suhnakihn pahpah ac ninac kiyom an pacl nuhkewa, tuhsruhktuh mukul tuhmom kuh muhtwacn kiyom an pa mwet se ma yohk srihpac emeet nuh sum. Sahp ac upac nuh sin mwet in sucu lom an in kahlwem kac. Tuhsruhktuh, kahs in kahsruh ke Bible uh ac kuh in kahsre kom in oruh wo tuh kom in sruokyac na ohiyen mislac inmahsrlon sucu lomtacl an ke kom kwacfeacng in muhsaheack fototo lom nuh sin sucu sasuc se lom ingacn.
1 SRUOKYAC NA NUHNAK WO LOM NUH SIN MWET IN SUCU LOM AN
MA BIBLE UH FAHK KAC: “Ahkfuhlwactye pahpah tuhmom ac ninac kiyom.” (Ephesus 6:2) Kom finne yac ekahsr, kom enenuh in ahkfuhlwactye ac suhnakihn pahpah ac ninac kiyom an pacl nuhkewa. Nuhnkuh ke mukul tuhmom kuh muhtwacn kiyom an lah oasr pac pahpah ac ninac kiyacl suc el enenuh in lohacng nuh se. “Luhngse el tiac sok,” pwacnacng nik kom nuhnak kuluk ke oasr fototo luhn mukul tuhmom kuh muhtwacn kiyom nuh seltahl an.—Sie Corinth 13:4; Galatia 5:26.
MA KOM KUH IN ORUH:
Srihke kom in tiac fahk kain in kahs inge, oacna: “Pacl nuhkewa sucu lom an luhngse ahkkulukyeyuc” kuh “Ninac kiyom an tiac wi insese ke ma nga oruh uh”
Srihke kom in ahkkahlwemye luhngse ac suhnak nuh sin pahpah ac ninac kiyacn mukul tuhmom kuh muhtwacn kiyom an in oacpacna ke el oruh uh
2 TU NA KUH KE PACL MA ENENWEYUCK
MA BIBLE UH FAHK KAC: “Sie mukul el som liki pahpah tuhmwacl ac ninac kiyacl, ac fulyang nuh sin muhtwacn kiyacl, ac eltahl ma sefannalac.” (Genesis 2:24) Ke pacl se kom pahyuckyak uh, sahp pahpah ac ninac kiyom an ac puhla muh srackna ma kunacltahl in karihngihn kom ac sahp eltahl ac ke eisacltahlwacng nuh ke moul in pahyuck lom an suc ma tiac arlac enenweyuck.
Ma kunom ac mukul tuhmom kuh muhtwacn kiyom an in inseselac ke ma ma fal ac ma tiac fal eltahl in eisacltahlwacng nuh kac uh. Na kom ahkkahlwemye nuh seltahl ke inkacnek kuhlwacng. Kom kuh in fahk in arlac kahlwem ac tiac kohu kuh muhlat. (Soakas 15:1) Inse puhsisacl, kuhlwacng ac mongfihsracsr uh ac kuh in kahsre kom in muhsaheack fototo wo inmahsrlon mwet in sucu lom an ac tahfwelah na in “ahkkahlwemye luhngse lowos nuh sin sie sin sie.”—Ephesus 4:2.
MA KOM KUH IN ORUH:
Kom fin puhla muh sucu lomtacl an arlacna eisacltahlwacng nuh ke moul lomtacl an, sramsramkihn nuh sin mukul tuhmom kuh muhtwacn kiyom an ke sie pacl fal
Tuhkweni inseselac lah komtacl ac ahkwoye fuhkah ma upac lomtacl an