Oaru Nuh Sin Sie Sin Sie

Jeova el luhngse kuht in mwet “oaru.” (Psalm 31:23) Yohk na ke moul in pahyuck lom an, mweyen fin sie sumtacl tiac oaru, na komtacl ac tiac pac kuh in luhlahlfongi sie sin sie. Arlacna yohk srihpac in oasr luhlahlfongi inmahsrlon siacnyacn se tuhfah luhngse laltahl uh kuh in yohkwelihk.

Ke pacl inge, oaru luhn siacnyacn pucspucs nuh sin sie sin sie oasr ke mwe sensen. In karuhnguhnwacng moul in pahyuck lom an, kom enenuh in kwacfeacng in oruh ma luo inge:

1 LOHACNG AHKWOYE NUH KE MOUL IN PAHYUCK LOM

MA BIBLE UH FAHK KAC: “Akihlen ma suc arlacna wo” ac yohk srihpac uh. (Philippi 1:10) Moul in pahyuck lom an pa sie sin ma yohk srihpac emeet ke moul lom uh. Pa inge ma se kom enenuh in lohacng ahkwoye nuh kac emeet uh.

Jeova el ke kom in lohacng nuh sin mukul tuhmom kuh muhtwacn kiyom an ac komtacl in tuhkweni “engankihn moul.” (Ecclesiastes 9:9) El fahk arlac kahlwem lah wacngihn sie pacl kom enenuh in pihlesruh mukul tuhmom kuh muhtwacn kiyom an, a pacl nuhkewa kom enenuh in suk inkacnek ma komtacl ac kuh in ahkenganye sie sin sie. (Sie Corinth 10:24) Oruh mukul tuhmom kuh muhtwacn kiyom an in puhla lah kom enenwacl ac kom ahksacohkyacl.

MA KOM KUH IN ORUH:

• Kwacfeacng in oraclah pacl in tuhkweni, ac lohacng nuh sin sie sin sie

• Ke pacl se kom srackna lolacp uh, sulaclah nuhkewa lom an ma nuh sum sifacna. Tuhsruhktuh, tukun kom pahyuckyak uh, esam mukul tuhmom kuh muhtwacn kiyom an pacl nuhkewa ke kom oruh sulaclah lom uh

2 KARUHNGUHNWACNG INSIOM

MA BIBLE UH FAHK KAC: “Kuhtwena mwet suc ngwetacng nuh sin sie muhtwacn ac oasr nuhnak in kena lal sel, el orek kosro nuh sel tari in nuhnak luhn insiacl.” (Matthew 5:28) Mwet se fin sikaleni in nuhnkuh ke siena mwet suc el tiac pahyuck nuh se ke inkacnek luhn kosro, ma inge ac oacpacna elan tiac oaru nuh sin mukul tuhmwacl kuh muhtwacn kiyacl uh.

Jeova el fahk muh kom enenuh in “arlacna karuhnguhnwacng nuhnak lom an.” (Soakas 4:23; Jeremiah 17:9) In oruh ma inge, kom enenuh in taran ke ma kom liye uh. (Matthew 5:29, 30) Etahi mwe srihkasrak lal Job ke el oraclah sie wuhlelah ke muhtahl tuh el in tiac na ngwet nuh sin sie pacna muhtwacn ac in oasr kena lal. (Job 31:1) Tu na kuh kom in tiac liyeyuck petsac fohkfohk. Ac taran kom in tiac orek pwacr kuh in luhngse sie mwet sahyacn mwet se kom pahyuck nuh se an.

MA KOM KUH IN ORUH:

• Oruh in kahlwem nuh sin mwet sahyac uh lah kom arlacna oaru nuh sin mukul tuhmom kuh muhtwacn kiyom an

• Nuhnkuh ke puhlakihn luhn mukul tuhmom kuh muhtwacn kiyom an ac tulokihnyac kuhtwena fototo lom nuh sin mwet sahyac ma ac kuh in ahkngalye insiacn mukul tuhmom kuh muhtwacn kiyom an