Suk Kahsruh luhn God nuh ke sie Pahyuck Wowo

Jeovaa God el oraclah pahyuck se emeet. Bible uh ahkkahlwemye nuh sesr lah el oraclah muhtwacn se emeet ac el “usacllah nuh yurin mukul sac.” Adam el arlacna engan pwacnacng el fahk: “Ma inge sri in srihk, ac ikoac in ikok.” (Genesis 2:22, 23, BMK) Jeova el srackna ke mwet pahyuck uh in insewowo.

Ke pacl se kom pahyuckyak uh, sahp kom ac nuhnkuh muh ma nuhkewa ac fahlac wo. Tuhsruhktuh, ke ma pwacye uh finne mukul ac muhtwacn se luhngse na pwacye sie sin sie eltahl ac fah oacyacpac sun ma upac. (Sie Corinth 7:28) Ke mwe rit se inge, kom ac fah konwacack kahs in kahsruh ma ac kuh in oruh moul in pahyuck ac moul in sucu lom an in insewowo, kom fin orekmakihn.​—Psalm 19:8-11.

1 ENGAN IN ORUH KUNOHKOHN MA JEOVA EL USOT NUH SUM

MA BIBLE UH FAHK KAC: Mukul pahyuck uh pa sifen sucu.​—Ephesus 5:23.

Kom fin sie mukul pahyuck, Jeova el ke kom in ahkkahlwemye kuhlwacng nuh sin muhtwacn kiyom an. (Sie Peter 3:7) El oracllah oacna sie mwe kahsruh nuh sum ac el ke kom in ahkkahlwemye nuh sel luhngse ac suhnak. (Genesis 2:18) Kom enenuh in luhngse na pwacye muhtwacn kiyom an ac nuhnkuh ke ma el enenuh an meet liki mwe enenuh lom.​—Ephesus 5:25-29.

Kom fin sie muhtwacn pahyuck, Jeova el luhngse kom in ahkkahlwemye suhnak yohk nuh sin mukul tuhmom an ac kahsrel in ahkfalye kunohkohn lal uh. (Sie Corinth 11:3; Ephesus 5:33) Sang kahsruh nuh ke sulaclah lal ac ahkkahlwemye insese lom nuh sel. (Colossae 3:18) Kom fin oruh ohinge, kom ac arlacna wo ye muhtuhn Jeova ac oacyacpac nuh sin mukul tuhmom an.​—Sie Peter 3:1-6.

MA KOM KUH IN ORUH:

• Siyuck sin mukul tuhmom kuh muhtwacn kiyom an lah fuhkah kom kuh in oacna sie mukul kuh muhtwacn pahyuck wo. Lohacng ahkwoyac, ac oruh ma kom kuh in oruh in sang ahkwoyelah an

• Mongfihsracsr. Enenuh pacl yohk nuh sumtacl kewa in etwaclah in ahkinsewowoye sie sin sie

2 NUNKUH YOHK KE PUHLAKIHN LUHN SIE SIN SIE

MA BIBLE UH FAHK KAC: Kom enenuh in lohacng meet nuh ke mwe enenuh luhn mukul tuhmom kuh muhtwacn kiyom an. (Philippi 2:3, 4) Ahkkahlwemye nuh sin mukul tuhmom kuh muhtwacn kiyom an lah el arulacna sacohk nuh sum, ac esam lah Jeova el siyuck sin mwet kuhlwacnsap lal uh in “kuhlwacng nuh sin mwet nuhkewa.” (2 Timothy 2:24) “Kahs fakfuck uh kuh in kantweyac sie mwet oacna cutlass, a kahs lahlmwetmwet uh kuh in unwelah.” Pwacnacng, sulaclah ahkwoyac kahs lom an. (Soakas 12:18) Kuh luhn Jeova ac fah kahsre kom in sramsram ke inkacnek ma ahkkahlwemye kuhlwacng ac luhngse.​—Galatia 5:22, 23; Colossae 4:6.

MA KOM KUH IN ORUH:

• Puhruhe ac siyuck ke kahsruh tuh kom in mislac na ac ahkkahlwemye nuhnak wo meet liki kom sramsramkihn ma upac nuh sin mukul tuhmom kuh muhtwacn kiyom an

• Nuhnkwaclah ahkwoyac ke ma kom ac fah fahk ac lah kom ac fahk ma inge fuhkah

3 TUKWENI AKACSRUHI

MA BIBLE UH FAHK KAC: Ke pacl se kom pahyuckyak uh, kom ac mukul tuhmom kuh muhtwacn kiyom an eklac “ma sefanna.” (Matthew 19:5) Tuhsruhktuh, komtacl srackna mwet luo ac nuhnak lomtacl an ac tiac oacna sie. Ke ma inge, komtacl enenuh in etwaclah in inse sefanna ke nuhnak ac puhlakihn lomtacl an. (Philippi 2:2) Arlacna yohk srihpac in ahkkahlwemye inse sefanna ke pacl ma komtacl oruh sulaclah lomtacl uh. Bible uh fahk: “Suk kahs in kahsruh wo, na ma kom oruh ac fah fahlac wo.” (Soakas 20:18) Lwelah kahs in kahsruh ke Bible uh in kol komtacl in tuhkweni oraclah sulaclah na yohk srihpac.​—Soakas 8:32, 33.

MA KOM KUH IN ORUH:

• Ahkkahlwemye nuh sin mukul tuhmom kuh muhtwacn kiyom an tiac ke nuhnak lom an muhkwena a oacyacpac ke ma kom puhla an

• Siyuck sin mukul tuhmom kuh muhtwacn kiyom an meet liki kom oraclah sulaclah lom an