Ya Paye la God El Karungin Tulik Srisrik?
OASR million puspus sin tulik srisrik elos tia karunginyuk, akkolukyeyuk, a akkeokyeyuk pal nukewa ke kais sie yea. Pukanten selos akkemkatuyeyuk ke inkanek in kulansap alukela ma fwal su orala akwuk nu ke me sensen yok. Kutu selos kapkapek ke moul upa a koluk wangin kasreya a elos sapkinyuk in som nu ke meun a kutu selos ekla nu ke moul in kosro in eis me kasru nu selos. Wanginla lulalfongi lun tulik puspus nu sin met puspus ke sripen kain in ma koluk upa a ke inkanek in aksangeng orek nu sin tulik.
Ke sripe inge, oasr met puspus su nunku yok kelos elos fosrnga ke ma sikyak nu sin tulik srisrik puspus. Aok elos fwak mu orekma koluk inge orek ke sripen oiyen rapku a ella fokfok lun met koluk puspus. Tusruktu srakna upa nu sin kutu metu in nunku la efu ku God lun lungse el lela nununku sesumwos inge in sikyak. Saap elos pula a nunku mu God el som liki tulik srisrik nukewa inge a el tia nunku a karunginelos. Ya ma inge paye? Ke sripen metu elos akkolukye tulik srisrik, ya ma inge akpayeye la God el tia nunku kelos? Mea Baibel el akkalemye ka?
God el Selngawi Met Nukewa su Lungse in Akkolukye Tulik Srisrik
Jeova God el tia orala akwuk in akkolukye tulik srisrik sin met matou puspus su wangin pakomuta lalos. Orekma in akkolukye tulik srisrik inge el sie sin fwako koluk nukewa lun orekma in lain lun met in imae lun Eden. Orekma lun met lain nukewa inge in pulesru kolyuk lun God el kol nu ke orekma koluk lun met puspus nu sin met tulan lalos.—Genesis 3:11-13, 16; Ekklisiastis 8:9.
God el koase met nukewa su lungse in akkolukyelos su munas a tia ku in loangelosla sifwana. Oasr mutanfwal puspus in pal meeta su tia kulansap nu sin Jeova elos kisekin tulik srisrik nu sin god kikiap. Tusruktu Jeova el fwak la ‘el tia sapkin ma inge a el tia nunku ka.’ (Jeremaia 7:31) God el sang kas in sensen nu sin met kulansap lal in pal meeta: “Kom fwin akasoryelos [tulik mukaimtal] in ma srisrik, a elos fwin tung kakasrisrik nu sik, paye Nga fwa long tung lalos; a mulat luk fwa fwolak.”—Exodus 22:22-24.
Jeova el Lungse Tulik Srisrik
Nunak mwomwo lun God ke tulik srisrik el arlana kalem ke masap su el sang nu sin papa a nine nukewa. Tulik srisrik su karunginyuk ke sie sou mwomwo su tia akkolukye tulik srisrik, elos matula mwo a oasr oiya mwomwo lalos. Ke ma inge, God el oakiye akwuk in payuk, la “sie met el fwa filiye papa tumal a nine kiel, a fwa fulyung nu sin mutan kiel, a eltal fwa ikwe siefwanna,” tia ke kitin pal a ke lusen moul lalos nufon. (Genesis 2:24) In Baibel, mokul a mutan payuk mukena ku in engankin fototo mwomwo lalos a kutena tulik srisrik su elos oswela ku in karunginyuk mwo.—Hibru 13:4.
Ma simusla el akkalemye pa la arlana yok sripe orekma lun papa a nine in sang akpa nu sin tulik nutulos. “Tulik me usru sin Jeova, a futen insie ma lane lal. Oana pus in poun sie met ku, ou inge tulik in pal elos fwusr,” Baibel el akkalemye. (Sam 127:3, 4) Tulik srisrik nukewa elos oana me sang saok sin God, a el lungse elos in kapkapek a matula mwo a insemwomwo. God el kaifwe papa a nine nukewa in sang me kasru mwomwo nu ke moul lun tulik srisrik, oana ke sie met meun el arlana taran in orekmakin me pus in paul. “Papa tuma, komwos in tia angon tulik nutumwos nu ke mulat; a komwos in oakoakelos in kai a kaiyuk lun Jeova,” Kas lun God el akkalemye.—Efesus 6:4.
Siepa inkanek su Jeova el akkalemye lungse lal nu sin tulik srisrik pa ke el luti papa a nine nukewa in sang me karungin a in loangela tulik natulos liki met koluk. In an Israel, Jeova el sapkin met nukewa a “tulik srisrik” elos in long ke Masap nukewa, wekunang masap ke oiya fwal a nunak sufwal ke oiyen moul nasnas lun sou. (Duteronomi 31:12; Livitikus 18:6-24) God el lungse papa a nine nukewa in karungin tulik srisrik nutulos ke ku lalos kewa liki kutena met su lungse in akkolukyelos.
Fwinsrak Mwomwo nu sin Tulik Srisrik
Lungse yok lun Jeova nu sin tulik srisrik in pal meeta nu ke pal inge el akkalemyeyuk mwo sin Jisus Kraist, su etawi oiya mwomwo lun Papa tumal ke inkanek yok. (Jon 5:19) Ke pal se met sap puspus lal, elos tafongla in nunku mu elos sang kasru nu sin Jisus, ke elos kosrala papa a nine puspus in wis tulik srisrik nutulos nu yurol, Jisus el aksumwosyelos. “Lela tulik fwusr in tuku nu yuruk,” el fwak. Tokin ma inge, “el sruklalosyuk in paul, a akinsemwomwoyelos.” (Mark 10:13-16) Aok tulik srisrik elos yok sripe na paye ye mutun Jeova God a Mwen nutul.
Aok, ke inkanek lun Togusra lal, Jisus Kraist, tia pat God el fwa molela tulik srisrik nukewa su akkolukyeyuk sin met puspus. Met koluk puspus lun fwal se inge su wangin pakomuta yuru fwa kunausyukla ma patpat. (Sam 37:10, 11) Nu sin met fwokpap nukewa su suk Jeova, Baibel el akkalemye: “A el fwa ela sroninmutalos nu kemwa, a a fwa wangin pa mise, a elos fwa tia sifwil asor, ku tung, ku ngal. Tu ma meeta wanginla.”—Fwakyuk 21:3, 4.
Ke pal inge, God el akkalemye lungse lal ke el sang kasru nu selos in akkeye lulalfongi lalos a in akkeyela nunak a pulakin lun met puspus su akkolukyeyuk tari. “Nga fwa suk ma tula, a fwa sifwil wise ma lusla, a fwa kapriye ma kaptelik, a fwa akkeye ma mas,” God el mwulela. (Ezikiel 34:16) Ke inkanek lun Kas lal, ke ngun mutal lal, a lun congregation lun met Kristian, Jeova el akkeye a akpwarye tulik srisrik nukewa su inse musalla a oasr ma eneneyuk lalos. Sie me insemwomwo yok in etu la ke pal inge, oana ke ma el fwa oru ke pal fwasru, “Papa tumun pakomuta a God lun parak nu kemwa . . . akparye kut in keok lasr nu kemwa.”—2 Korint 1:3, 4.
[Picture Credit Line on page 26]
© Mikkel Ostergaard/Panos Pictures