ចូររៀនពីលោកយេស៊ូ
«អ្នកនឹងឮសូរសង្គ្រាម»
អ្នកផ្សាយព័ត៌មានម្នាក់ឈ្មោះចន ស៊ីមសុន បានប្រាប់ថា៖‹តាំងពីឆ្នាំ១៩៦០ ខ្ញុំបានផ្សាយព័ត៌មានអំពីសង្គ្រាមជាង៤០នៅទូទាំងពិភពលោក។ ឧទាហរណ៍ ខ្ញុំធ្លាប់ឃើញសង្គ្រាមត្រជាក់ឈានទៅដល់កម្រិតខ្លាំងបំផុត តែសង្គ្រាមនោះស្រាប់តែស្ងប់បាត់ទៅភ្លាមមួយរំពេច។ ទោះជាយ៉ាងនោះក៏ដោយ សង្គ្រាមនោះមិនធ្វើឲ្យខ្ញុំព្រួយបារម្ភខ្លាំង ដូចសង្គ្រាមនៅឆ្នាំ២០២៥ទេ។ មូលហេតុមួយ គឺដោយសារនៅឆ្នាំ២០២៥មានសង្គ្រាមធំៗមួយចំនួន ហើយសង្គ្រាមទាំងនោះបន្តមានរហូតដល់សព្វថ្ងៃ។ មូលហេតុមួយទៀត គឺដោយសារប្រទេសជាច្រើនអាចរងផលប៉ះពាល់ពីសង្គ្រាមទាំងនោះ›(BBC world affairs editor)។
សព្វថ្ងៃនេះ មនុស្សកំពុងព្រួយបារម្ភអំពីសង្គ្រាមដែលមានកាន់តែច្រើនឡើងៗនៅទូទាំងពិភពលោក។ ដូច្នេះ មនុស្សជាច្រើនឆ្ងល់ថាតើសង្គ្រាមនឹងមានរហូតឬ? តើលោកយេស៊ូបង្រៀនយ៉ាងណា?
អ្វីដែលលោកយេស៊ូបង្រៀន
លោកបានប្រកាសទុកជាមុនអំពីស្ថានភាពដែលយើងឃើញនៅសព្វថ្ងៃនេះ។ លោកបានព្រមានពួកអ្នកកាន់តាមលោកថា៖«អ្នកនឹងឮសូរសង្គ្រាម ហើយនឹងឮគេនិយាយអំពីសង្គ្រាម»។—ម៉ាថាយ ២៤:៦
យើងពិបាកចិត្តណាស់ពេលឃើញសង្គ្រាមនិងជម្លោះប្រដាប់អាវុធនៅសព្វថ្ងៃនេះ។ ទោះជាយ៉ាងនោះក៏ដោយ យើងមានហេតុឲ្យមានសេចក្ដីសង្ឃឹម។ ហេតុអ្វី? ព្រោះលោកយេស៊ូបានប្រាប់ថាសង្គ្រាម រួមទាំងព្រឹត្តិការណ៍ឯទៀត និងចិត្តគំនិតរបស់មនុស្ស គឺជា«សញ្ញាសម្គាល់»ដែលបញ្ជាក់ថាយើងកំពុងរស់នៅ«គ្រាចុងបញ្ចប់នៃរបៀបរបបពិភពលោក»នេះ។ (ម៉ាថាយ ២៤:៣; លូកា ២១:៧) នេះមានន័យថានៅថ្ងៃអនាគតលោកយេស៊ូនឹងបំបាត់ចោលសង្គ្រាមឲ្យលែងមានទៀត។ តើតាមរបៀបណា?
អ្វីដែលលោកយេស៊ូនឹងធ្វើ
នៅថ្ងៃអនាគតឆាប់ៗខាងមុខនេះ ក្នុងនាមជាស្ដេចនៃរាជាណាចក្រព្រះ លោកយេស៊ូ«នឹងធ្វើឲ្យផែនដីទាំងមូលលែងមានសង្គ្រាមទៀត»។—ចម្រៀងសរសើរព្រះ ៤៦:៩
ដើម្បីស្វែងយល់ថែមទៀតអំពីអនាគតដ៏សុខសាន្តនេះថានឹងមានតាមរបៀបណា ហើយផ្ដល់ប្រយោជន៍អ្វីខ្លះដល់លោកអ្នក សូមអានអត្ថបទដែលមានចំណងជើងថា«របៀបដែលសង្គ្រាមនិងជម្លោះហិង្សានឹងត្រូវបំបាត់ចោល»។