Tusarliussat inngilitigoortut ullutsinnut tunngassuteqartut
’Guutip inngilini aallartippaa taassumuunakkullu assersuutitigut nalunaarlugit.’ — SARKÚMERSITAT 1:1, NV.
1. Oqaaseq saqqummersitat qanoq kukkusumik isumaqartinneqartarpa, Bibelilli atuagartai sarĸúmersitat siunissami piumaartussanik sunik takutitsippat?
SAQQUMMERSITAT. Inuit ilaasa oqaaseq taanna annilaarnartutut isigaat. Ilaasa atomip nukinga atorlugu sorsunnersuarmi uumassusillit tamarmik suujunnaarsinneqarnissaannut tunngassuteqarsorisarpaat. Bibelimili oqaaseq taanna taama isumaqartinneqanngilaq. Bibelip atuagartaani sarĸúmersitat-ni piumaartussat siulittuutitigut assersuusiornikkut qulaariartuaarneqarput, kingunerissallugillu ukiut nutaat inuiaat naassaanngitsumik pilluarfigisassaat. Jesusip apustiliata Johannesip sarĸúmersitat aallartippai uku oqaaseralugit: „Pilluarput siulittuutip matuma oqaasiinik atuaasorlu tusaasullu tamatumanilu allassimasunik maleruaasut, piffissaq aalajangersagaq qaneqimmat.“ — sarĸúmersitat 1:3, NV.
2, 3. Sooq silarsuup matuma inui taama aliasutsigaat, Jehovalu qanoq iliorumaarluni siunertaqarpa?
2 Ullumikkut silarsuarmiut pilluanngillat. Pilluannginnerannut pissutaasoq erinniukkami Mosesip ukiut 3460-it matuma siornagut erinniarisimasaani eqqartorneqarpoq: ’Taassumunnga aserorsaapput, [Guutip] qitornarinngilai, imminnut kanngusuutissaapput; eqqarleriit mumingasut killormoortullu tamassa.’ (5 Môrsase 32:5) Oqaatsit taakku kinguaariinnut maannakkut inuusunut, taama killormoortigisunik mumititaatigisunillu ileqqoqalersimasunut, naleqqulluangaaramik! Assersuutigalugu World Military and Social Expenditures 1987-88 (Silarsuarmi sakkutooqarnermut innuttaaqatigiinnullu 1987-88-imi aningaasartuutit)-ip siulequtaani toqqaannartumik ima allassimavoq: „Inuiaqatigiinni tamani innuttaaqatigiit inuunerat sakkussaliornikkut ingiarniunneq pissutigalugu ingerlanerliorpoq. USA-p Sovjetunionillu katillutik ullormut dollarit 1,5 milliardit sakkutooqarnermut atortarpaat. Inuiaqatigiinnili tamani naalungiarsuit akornanni toqusut qanoq amerlatiginerat eqqarsaatigalugu USA 18-iuvoq Sovjetunionilu 46-ulluni. Nunani siuarsarniakkani sakkussiornermut aningaasartuutit peqqinnissamut aningaasartuutit sisamariaataata missaanit amerlanerusut aningaasartuutigineqartarput. Nunalli taakkua inuisa ilaat hundredenik arlalinnik millionillit kaapput, meeqqallu 20 procentii tallimanik ukioqalertinnatik toqusarput.“
3 Pissutsit allat ajornartorsiutinut allisaataasut arlaliupput: ileqqussatigut ajortunngorluinnarsimaneq ilaqutariillu avittoqarnikkut avissaartitersimaneri, pinerlunnerit peqqarniisaarnerillu silarsuarmiittunik tamanik navianartorsiortitsisut, kinguaariit maannakkut inuusut asannissuseqannginnerat inatsisaatsuliornerallu. Ila pilluarnassusia Jehovap siunertarimmagu ’nunamik aseruisut aserorumaarlugit’! (sarĸúmersitat 11:18) sarĸúmersitat-ni takorruukkat 16-it annikitsualuttaat ilanngullugit allaaseralugit Jehovap qanoq taamaaliorumaarnissaa pissanganartumik nassuiarneqarpoq.
’Inngilit’ aamma „assersuutit“
4. sarĸúmersitat-ni inngilit susarpat, inngilillu nuimanersaat takorruukkani qanoq taagorneqarpa?
4 Bibelimi siulittuut siulleq, Môrsasip agdlagai sujugdlît 3:15-imiittoq, sarĸúmersitat-ni nalunarunnaarsinneqarpoq, nassuiarneqarmat Satanip Guutillu peqatigiiffiisa arnamut assersuunneqartut, taakkualu ’kinguaassaasa’, akerariinnerata qanoq inerneqarumaarnissaa. Jehovap akeqqaminik aammattaaq asasiminik kisimilu oqartussaanerminut tapersersuisuusunik eqqartuussutai tassani oqaluttuarineqarput. Saqqummersitat inngili aqqutigalugu „assersuutitigut“ Johannesimut tunniunneqarput. Inngilit, imaluunniit aallartitat, allattaaq assersuutinik taakkuninnga nalunaarutiginneqataallutillu suliarinnipput. Inngilit nuimanersaat sarĸúmersitat 1:5-imi ilisaritinneqarpoq taaneqarlunilu ’Jesus Kristus nalunaajaasoq ilumoortoq, siulliulluni toqusunit erniusoq, nunap kunngiisa siulersortaat’. ’Assersuutini,’ imaluunniit takorruukkani, taagorneqarportaaq ’Liiveq’, ’Savaaraq’, ’Mikael’ arlaleriarlunilu inngilisut pissarsuartut eqqartorneqartarluni. — sarĸúmersitat 5:5, 13; 9:1, 11; 10:1; 12:7; 18:1.
5. sarĸúmersitat-ni takorruukkat siullersaanni suna takutinneqarpa, uagutsinnullu qanoq pingaaruteqarluni?
5 Takorruukkami siullermi, sarĸúmersitat 1:10–3:22-mi allaatigineqartumi, tusarliussat killinnartut Jesusip naalannarsisitaasup ilagiit arfineq- marluk Asiamiittut ’inngiliinut’, imaluunniit nakkutilliisortaannut, tunniussai oqaluttuarineqarput. Ilagiit taakku assersuutaapput „Naalakkap ullussaani“ (NV) Jehovap Nalunaajaasuisa ilagiissaannut nunarsuarmi tamarmi ittunut ataatsitut isigalugit. Taamaammat tusarliussat uagutsinnut ullumikkut inuusunut sammitinneqarput! ’Anersaap ilagiissoqatigiinnut oqaaserisai’ tusarnaaqqissaartariaqarpavut, mianersoqqussutitigummi oqaaqqissaarutitigullu kajumissaarneqarpugut aalajaatsooqqulluta — suliavut ’asannissuserpullu uppersuserpullu kiffartornivullu nikallujuissuserpullu’ tunngavigalugit akuerineqarsinnaassagatta. — sarĸúmersitat 1:10; 2:7, 10, 19.
6. Tusarliussat ilagiinnut arfineq- marluusunut Asiamiittunut tunngatinneqartut tamaasa immikkut uagut qanoq iluaqutiginiarsinnaavavut?
6 Ilagiit Efesusimiittut assigalugit immaqa ilumoorluta sulisimavugut immikkoorniartullu tunussisimasut suliaannik uumiginnilluta, asannissuserpulli arlaatigulluunniit nillertunngorsimappat, allamik isumataartariaqarpugut asannissuserpullu siulleq qiimmatsannermit kissartuusoq ateqqittariaqarlugu. Kristumiut anersaakkut pisuujusut Smyrnamiittut assigalugit ersisuilluta akissarsiassaq piniarsarisariaqarparput, pisariaqarpat ’toqumut allaat ilumoorluta’. Kristumiut Pergamumimiittut Satanimit usserneqartut assigalugit, guutipilussiorsimagaluarutta, kanngunartuliorsimagaluarutta imaluunniit upperisarsiornikkut immikkoornianik tapersersuisuusimagaluarutta allamik isumataartariaqarpugut. Kristumiut Tyatiramiittut aamma tamakkununnga assingusunut, ingammik inunnut Jesabelitut ittunut, mianersoqquneqarput. Uaguttaaq mianersortariaqarpugut! Kristumiutut Sardesimiittutut anersaakkut toqungasut suli piffissaqarallartillugu itertariaqarput. Kristumiutut Filadelfiamiittutut saatsinni isertarfeqarpoq annerusumik kiffartuuteqarnissamut ammasumik; taakkunatut usserneqarfissatsinni ajugaanissatsinnut nukissaqarisatoq! Ilavut Laodikeamiutut akunnattunngorsimagunik, tassa ilatsiinnartunngorsimagunik, anersaakkut tamaqanngitsuunertik paasilersariaqarpaat allamillu isumataartariaqarlutik. Jesus matup silataani qeqarpoq kasuttorlunilu. Tamatta ilassilluartigutoq ilagiissitsinnilu nunarsuarmi tamarmi 55.000-iusuni anersaakkut nereqatigisaannarlugu! — sarĸúmersitat 1:11; 2:7, 10, 11, 17, 29; 3:6, 13, 22.
Guutip issiavissaarsua, mappersakkat imusat apeqqullu
7. Takorruukkat aappaanni kina unnersiutigineqarpa, illillu tamanna qanoq isumaqarfigaajuk?
7 Takorruukkat aappaanni Jehovap naalannassusiata issiavissaarsua qilammiittoq Johannesip takuaa. Guuterput angingaartoq alutornangaartut asseqanngitsut akornanni takkuppoq, keerubinit sisamanit, inngilerpassuarnit upperluartunillu kristumiuusunit makissimasunit avatangerneqarsimalluni. Unnersiutiginnissut killinnartoq una erinarsuutigaat: ’Jehova Guuterput, ilinnut pigititassaapput naalannaat ataqqinaallu pissaanerlu, illit suut tamaasa pinngortikkakkit, illillu peqqusakkut ipput pinngortitaallutillu!’ Jehovap mappersakkat imusat mappiisussatuamut — Liivermut Judap naggueqatigiissortaanit pisumut, Savaaqqamut toqunneqartumut uagutsinnik Utertitsisunngorsimasumut — tunniuppai. Pinngortitat tamavimmik Jehova Savaararlu unnersiutigaat. — sarĸúmersitat 4:11; 5:2-5, 11-14.
8. sarĸúmersitat-ni takorruukkat pingajuanni suna takusaava, tamannalu ullutsinnut qanoq pingaaruteqarpa?
8 Takorruukkat pingajuanni Savaaqqap mappersakkat imusat naqissutaat arfineq- marluusut mapperpai. Suut takkuppat? Siullermik kunnginngorlaaq, Jesus, hesti qaqortoq qimusserfigalugu qilammi qimusserpoq, naapertuilluartumik sorsutsitsinerminut assersuutaalluni. Tulliullugu hestimi innertut aappalutsigisumi qimussertup nunarsuaq tamakkerlugu sorsunneq aallartippaa. Taassuma tulleraa hesti qernertoq kaannersuarmut assersuutaasoq, tulliullugulu hesti sungaarpalaartoq nappaalanersuarmut assersuutaasoq, qaaniittorlu toqumik ateqarpoq! Malitsigaat Hades, toqutanik millionilippassuarnik iisinissaminut piareeqqasoq. Tamakkua tamarmik aallaqqaatigaat ’eqqanaarnartut’ 1914-18-imi nunamiunik eqquisut utoqqaanertattalu eqqaamasaat. (Matîuse 24:3-8) Qimussertut taakku qimussertuarput! Naqissutillu tallimaat arfernallu mapperneqarmata pisoqartuarpoq ’Jehovap Savaaqqallu kamannerata ullorsuata’ tungaanut. Apeqqut imaappoq: ’Kina atasinnaassava?’ — sarĸúmersitat 6:1-17.
Atasinnaasut
9. Takorruukkat sisamaanni mianernangaartoq suna takusaava?
9 Takorruukkat sisamaanni nalunarunnaarsinneqarpoq kikkut sunalu pillugu Guutip kamannerata ullorsuani aniguiumaartussaasut. Inngilit nunap anoraanik sisamanik aseruissutaasunik tigumiarput Israelip anersaakkut ittup — 144.000-iusut — naqissuserneqarnera naammassineqarsinnaaqqullugu. ’Kingorna’ Johannesip takorruugai mianernangaarlutik annertusipput: ’Ata, amerlangaartut kisinneqarsinnaanngitsut, inuiaqatigiit immikkullu naggueqatigiissut immikkullu inuiaasut immikkullu oqaasillit tamarmik ilaat, issiavissaarsuup saani Savaaqqallu saani qeqartut, takisuunik qaqortunik atisaqartut, palmillu avalequtaannik tigumiaqartut; nipituumillu torlulapput oqarlutik: „Annaassut Guutitta issiavissaarsuarmi issiasup Savaaqqallu pigaat.“’ (sarĸúmersitat 7:1-10) Illit taakkua akornanniippit?
10. (a) 1935-mi 1987-imilu Eqqaaniaanermut najuuttut amerlassusii imminnut naleqqiukkaanni, takorruukkat sisamaata eqquusimanera suna paasinarsiva? (b) Apeqqut suna uagutsinnut tamatsinnut immikkut sunniuteqarpa, sunalu pillugu?
10 1935-mi Jesusip toquneranik eqqaaniaanermut najuuttut 32.795-iupput. Taakkua ilaat 27.006-it assersuutinik ilangiillutik takutitsipput 144.000-inut qilammi inuunissamik neriugisaqartunut sinneruttuullutik. Ukioq tamanna kingusinnerusukkut amerlangaartunut ilaasut kikkuussusii erseqqissumik paasineqarpoq. Inuit qanilaartut nunami paratiisiusumi naassaanngitsumik inuunissamik neriugisaqartut aammattaaq Jesusip aava kuisaq upperfigaat; Jehovamut tunniulluinnarput, kuisipput Guutilu aallussilluarlutik kiffartuullugu ’annikilliornartussami angisuumi’ aniguiumaarnissaminnik neriugisaqarlutik. 1987-imi Eqqaaniaanermut 8.965.221-nik najuuttoqarpoq, 8808-innarnilli assersuutinik ilangiisoqarluni. Tamatuma takutitsiarpaa ullumikkut inuit millionilippassuit amerlangaartunut ilaasuusut imaluunniit taakkununnga ilaalerusuttut. Illit taakkununnga ilaasutut ’Jehovap Savaaqqallu kamannerata ullorsuani’ atasinnaassavit? Atasinnaanissannut ilungersuutitit inuunermik kinguneqarsinnaapput. — sarĸúmersitat 6:15-17; 7:14-17.
Guutip eqqartuussutai tusarliunneqartut
11. Takorruukkat tallimaanni eqqartuussutit suut qarlortaatigineqarpat, uagullu ullutsinnut sunik sunniuteqarlutik?
11 Naqissutit arfineq- aappaat mapperneqarpoq! sarĸúmersitat-ni takorruukkat tallimaat takkuppoq. Inngilit arfineq- marluk Guutip saani qeqarput. Qarlortaatinik arfineq- marlunnik tunineqarput, taakkulu atorlugit tusarliussanik tusarliipput 1922-imiilli Jehovap innuttaasa nunarsuarmi tamarmi uteqattaartarsimasaannik. Tusarliussat siulliit sisamat eqqartuussutaapput inuiaat ’aggornerisa pingajuannut’, tassaagunartunut kristumiuuneraqatigiit pigisaanni inuusunut. ’Qarlortarnerit’ taakkua takutitsiarpaat ’nuna’ kristumiuuneraqatigiit pigisaat (Satanip pissutsinik aaqqissuussaanera ataavartutut ittoq), ’imaq’ (inuiappassuit eqqissivissaqanngitsut) aammattaaq ’kuuit imermillu puilasut’ (kristumiuuneraqatigiit ajoqersuutaat itisuumillu eqqarsaatersuutaat) qaamaqqutaat taartunngorsimasut (palaseqatigiit anersaakkut ittumik qaamaneqanngitsut) ilanngullugit tamarmik Guutip kamanneranit eqqorneqarumaartut. ’Nattoralik’ timmisoq, inngilimut assersuutaasoq, tulliullugu qilaap missaagut takkuppoq nalunaarlunilu qarlortarnerit pingasut suli tutsiutinngitsut kingunerissagaat ’eqqanaq, eqqanaq, eqqanaq nunami ineqartunut’. — sarĸúmersitat 8:1-13.
12. Kia puilasuliaasaq itinersuup pia mapperpaa, ukiunilu nutaanerusuni ’pillertat’ qanoq ilillutik palaseqatigiinnik kapisisarpat?
12 Inngilit tallimaat qarlortarpoq. Ata! ’Ullorissap’ — Naalakkap Jesusip — puilasuliaasaq itinersuup pia putsumik ulikkaartoq ammarpaa. Pillertat saqqummerput. Tamanna assersuutaavoq Jesusip 1919-imi Guutip nalunaajaasuinik tanitaasunik sulisuunnginnerannit aniguisitsineranut. Guutimit piginnaatitaallutik taakkua palaseqatigiit akisussaaffigisaat asiutippaat ajoqersuinerluutaat ilumoortuusaarniarnerilu qulaarlugit. ’Qaammatini tallimani’ — pillertat inuuffigisartagaasut sivisutigisumi — taamaaliortuarnerat uppernarsaataavoq ullumikkut kinguaariit pillertatut ittut Jehovap Kristusillu inuiaqatigiinnik eqqartuussinerat naammassitinnagu ’nungussanngitsut’. Manna tikillugu katersat pillertatut ittut atuakkat atuagassiallu Bibelilersaarutaasut arlalinnik milliardillit inunnut agguaassimavaat. Taakkua imaraat tusarliussat eqqartuussutaasut ikualasutut ittut skorpionit pamiuisut kapisisartut. Johannes oqarpoq: ’Eqqanaarnartoq siulleq qaangiuppoq; ata, eqqanaarnartut marluk suli nalliuttussaapput.’ — sarĸúmersitat 9:1-12; Matîuse 24:34; 25:31-33.
13. (a) Inngilit sisamat Eufratip kuussuata eqqaanit aniguisinneqartut kikkunnut assersuutaappat, sunalu suliassaraat? (b) Qimussersorparujussuit kikkuuppat, qanorlu paasisariaqarpa ’qanermikkut pamiumikkullu piginnaassuseqartut’?
13 Qarlortaatit arfernat tutsiuppoq, ’eqqanaarnartut’ aappaat aallartillugu. Inngilit sisamat Eufratip kuussuata eqqaani qilerussaarneqarnerat assersuutaavoq Guutip nalunaajaasuisa tanitaasut 1919-imi Babylonimi tigusaaqqanerminnit aniguisinneqarnerannut. Kristumiuuneraqatigiit palaseqatigiissortaasa Jehovap isaanit toqungasuunerannik nalunaarutiginninnermikkut ’inuit aggornerisa pingajuisa toqunnissaannut’ piginnaanngorsarsimapput. Nalunaajaanerulli tamatuma annertusarnissaanut ikiortariaqarput, Jehovalu ikiorsiivoq suleqataasussanik amerlangaartunik katersuinermigut. Nalunaajaasut tanitaasut ikiortaallu saassussiartoqatigiipput qimussertutut kisissaanngitsutut, ’qulinik tuusintillit qulinik tuusintileriakkat marloriarlugit’. ’Qanermikkut piginnaassuseqarput’ Jehovap eqqartuussutiminik tusarliuteqqusai inuit illuini oqaluutigisaramikkik, aamma ’pamiumikkut piginnaassuseqarput’ anigaangamik qimattaramikkik atuagassat Bibelilersaarutaasut Guutip ullussaanik akiniaaffiusunik qanilliartorasuartumik tusarliussamik imaqartut. — sarĸúmersitat 9:13-21; apustilit suliait 20:20, 21.
14. (a) Takorruukkat arfernanni ’inngili pissarsuaq’ kinaava, sua qanorlu oqarluni? (b) Mappersagannguit ’tungusunnitsuutitut tungusunnittuunerat’ ’nasserinarnerallu’ qanoq paasisariaqarpa?
14 Maanna takorruukkat arfernat saqqummerpoq. Takuarput ’inngili pissarsuaq’, tassaagunartoq Naalagaq Jesus immikkut suliassaqartitaasoq. Tigumiarai mappersagannguit. Nipit kallerillu tusarsaalerput, taava inngili Pinngortitsisorsuarput naqqissigalugu uppernarsaavoq oqarluni: ’Kingorna piffissaqassanngilaq; kisianni ulluni inngilit arfineq- aappaata nipeqarfissaani, taanna qarlortassappat, taava anngigisaq [illernartoq, NV] Guutip pia naammassineqarsimassaaq.’ Johannes peqquneqarpoq mappersagannguit tigoqqullugit nereqqullugillu. Qarnani tungusunnitsuutitut tungusunnipput, soorluttaaq ullumikkut Naalagaaffik pillugu tusarliussaq, ’qilammi nutaami nunamilu nutaami’ pilluaqqussutissat neriorsuutigisaasut ilanngullugit, katersat tanitaasut Johannesitut ittut suleqataasalu nuannaarutigigaat. Akerlianilli ’immikkut inuiaasut inuiaqatigiillu immikkullu oqaasillit kunngillu amerlasuut pillugit’ Guutip ullussaa akiniaaffik nalunaarutiginissaa merseralugu inuit ilaasa ’nasserissutigaat’. Tatitusaarilli! Upperilluaruk Jehovap pisariaqartumik pissatsittassagaatit ullussaata akiniaaffiup nalunaarutiginissaanut. — sarĸúmersitat 10:1-11; 21:1, 4; 1 Juánase 5:4; Isaia 40:29-31; 61:1, 2.
Qarlortarnerit arfineq-aappaat eqqanaarnartullu pingajuat
15. (a) Eqqanaarnartut pingajuat nalunaarutigineqarmat inngilillu arfineq- aappaat qarlortarmat susoqarpa? (b) Naalagaaffimmik tusarliineq sooq eqqanartutut issinnaava?
15 Akeqqat 1918-imi Guutip nalunaajaasuinik ’toqutsi’niaraluarnerat siulittuutigereerlugu, silarsuarlu tamakkerlugu nalunaajaasinnaanissaannut 1919-imi ’anersaap inuussutaasup Guutimit pisup’ taakkuninnga tupinnartumik uummarsaanissaa allaatigereerlugu, Johannes ima allappoq: ’Eqqanaarnartup aappaa qaangiuppoq; ata, eqqanaarnartut pingajuat nalliunasuassaaq.’ Taava qanoq pisoqassava? Nangilluni allappoq: ’Inngilillu arfineq- aappaat qarlortarpoq.’ Eqqanaarnartut pingajuat qarlortarnerit naggataannut atassuteqarpoq. ’Nipit angingaartut qilammi tusarsaalerput oqartut: „Silamiut naalagaaffiat Naalakkatta [Jehovap] tanitaatalu pigilerpaat, taannalu kunngiussaaq naassaanngilluinnartumik.“’ Tassaavoq Guutip naalagaaffia Kristus Jesus aqutsisoralugu, taassumalu kingornusseqatini 144.000-iusut peqatigalugit „anngigisaq illernartoq Guutip pia“ (NV) naammassiumaarpaa, Jehova Guutip, Ajugaqanngitsup, naassaanngitsumik kisimi oqartussaanera qutsissisillugu. Naalagaaffimmik tusarliineq tamanna eqqanaarnartuua? Aap, iluaatsunut taamaappoq, tassuunami nalunarunnaarsinneqarpoq Guutip ’nunamik aseruisut aserorumaarai’. — sarĸúmersitat 11:1-19.
16. Takorruukkat arfineq- aappaanni ilungersornartut suut qulaarneqarpat?
16 Maanna takorruukkat arfineq- aappaat takkutilerpoq! Tassani takuneqarsinnaapput Guutip peqatigiissortai qilammiittut pisussaassutsiminnik pingaartitsisut, „arnaq“ Guutip pia. Naartuvoq ernisulerlunilu nilliavoq. sarĸúmersitat-ni siullerpaamik — naggataarnanili — kuukkooriaasarsuaq innertut aappalutsigisoq, ’pulateriaarsutoqaq Diaavulumik Satanimillu taaneqartoq, inuit najugaanni nunalinnik tamanik tammartitsiniartoq’, takkuppoq, inoorlaaq iiumallugu piareersimalluni. ’Pulateriaarsuup arnallu akerariinnerannik’ siulittuutigisaq sakkortuseruttorpoq! Arnaq ’ernivoq ernertaarluni’, taannalu Guutip issiavissaarsuanut aallarunneqarasuarpoq. — sarĸúmersitat 12:1-6, 9; 1 Môrsase 3:15; Dâniale 2:44; 7:13, 14.
17. (a) Mikael kinaava, qanorlu ililluni 1914-imiilli atini najoqqutaralugu iliuuseqarpa? (b) ’Eqqanartut pingasut’ aammalu ’nunamut eqqanartorneq’ sarĸúmersitat 12:12-imi eqqartorneqartoq assigiinngissusiisigut nassuiakkit.
17 Meeraq ernertaarisaa tassaavoq Naalagaaffik ukiumi pingaartunik pisimasoqarfiusumi, 1914-imi, qilammi pilersinneqarsimasoq. Kunngia, Jesus Kristus, taaneqarportaaq „Mikael“ isumalik „Kia Guuti assigaa?“ Apeqqut taanna akinasuarpaa Satan sorsuffigigamiuk kuukkooriaasarsuatoqarlu taanna inngilipilui ilanngullugit nunamut igillugit. 1914-imiilli nunamut immamullu eqqanaarnartut tamakkua kingunerai ’Diaavulu taakkununnga aqqarmat kamattorsuulluni, piffissakissutsi nalunnginnamiuk’. Eqqanaarnartut ullumikkut inuiaat pissusiini alianangaartuni malunnartuusut ’eqqanaarnartunit pingasunit’ Jehovap guutiitsunik eqqartuussinermigut taakkununnga nalliutitaanit allaapput. — sarĸúmersitat 12:7-12.
18. (a) Sorsunnersuup aappaata siornagut nalaanilu Jehovap kiffaanik aalajaatsuusunik Satan Diaavulu qanoq eqqanartorsiortitsiniarsaraa? (b) Diaavulu qanoq iliorumaarluni suli aalajangersimava, takorruukkallu kingulliit suna qulaassavaat?
18 Aammattaaq Jehovap kiffai aalajaatsut nunamiittut Diaavulup eqqanartorsiortinniarsarivai. Sorsunnersuup aappaata siornagut nalaanilu annertoorujussuarmik malersuisitsivoq ’kuussuarmut’ ittumik Guutip peqatigiissortaasa ’amiakkui’ — 144.000-inut sinneruttut nunamiut akornanni kiffartorallartut — suliaat taamaatitsinniarsaralugu. Nunap, tassa Satanip nammineq pissutsinik aaqqissuussaanerata, kuussuarmik iisinera Jehovap pitippaa. Taamaakkaluartorli Satanip kamattorsuusup suli Jehovap Nalunaajaasui sorsuffigiuarusoqai. (sarĸúmersitat 12:13-17) Naggataatigut suna kingunerissavaa? Takorruugassat suli qulingiluaapput, taakkunuunatigullu inernissaa paasiumaarparput! — Hâpakuk 2:3. (wD 15/12 88)
UTEQQIINEQ
□ sarĸúmersitat allanneqarnerisigut Jehovap inngilit qanoq sakkugai?
□ Jesusip ilagiinnut arfineq- marluusunut tusarliussai uagutsinnut qanoq sunniuteqassappat?
□ Qarlortarnerit arfineq- marluk kingunerisigut susoqarsimava?
□ Pillertat qimussersorpassuillu sunut assersuutaappat?
□ Suna pillugu Guutip naalagaaffiata pilersinneqarnera ’eqqanaarnartut pingajuannut’ atassuteqarpa?
[Qupp. 12-mi ungalusaq]
TAKORRUUKKAT TAMARMIK IMMIKKUT ALLASSIMAFFII:
□ TAKORRUUKKAT 1-IAT 1:10–3:22
□ TAKORRUUKKAT 2-AT 4:1–5:14
□ TAKORRUUKKAT 3-AT 6:1-17
□ TAKORRUUKKAT 4-AT 7:1-17
□ TAKORRUUKKAT 5-IAT 8:1–9:21
□ TAKORRUUKKAT 6-IAT 10:1–11:19
□ TAKORRUUKKAT 7-IAT 12:1-17
□ TAKORRUUKKAT 8-AT 13:1-18
□ TAKORRUUKKAT 9-AT 14:1-20
□ TAKORRUUKKAT 10-AT 15:1–16:21
□ TAKORRUUKKAT 11-AT 17:1-18
□ TAKORRUUKKAT 12-IAT 18:1–19:10
□ TAKORRUUKKAT 13-IAT 19:11-21
□ TAKORRUUKKAT 14-IAT 20:1-10
□ TAKORRUUKKAT 15-IAT 20:11–21:8
□ TAKORRUUKKAT 16-IAT 21:9–22:5
[Qupp. 13-16 ungalusaq/assiliartat]
TAKORRUUKKAT SAQQUMMERSITAT 16-IT PINGAARNERSIUGAASUT
1 Naneruuserfiit imaluunniit ilagiit arfineq- marluk akornanni qeqarluni Jesus ullorissat, tassa nakkutilliisut tanitaasut, arfineq-marluk aqqutigalugit asassutaasumik tusarliivoq
2 Jehovap issiavissaarsuata qilammiittup saaniilluni Savaaraq ajugaasoq mappersakkanik tusarliussassanik eqqartuussutaasunik imalinnik tunineqarpoq
3 Kristus Jesus ajugaassalluni qimusserpoq, qimussersullu allat inuiannik naalliutsitsipput Guutillu kamannerata ullussaa qanillivoq
4 Inngilit annikilliornartussaq angisooq aallartitsaaligaat, 144.000-it amerlangaartullu katersorneqarneri naammassiartorpoq
5 Inngilit eqqartuussutit qarlortaatigaat, Jehovap Nalunaajaasuilu pillertatut illutik takkupput eqqunngitsumik upperisarsiornerit qulaarumallugit
6 Qarlortarnerit arfineq- aappaat tutsiummat Guutip ’nalunaajaasui’ uummarsarneqarput Jehovap Tanitaatalu naalagaaffissaat nalunaajaassutigisinnaaqqullugu
7 Naalagaaffiup 1914-imi pilersinneqareerneragut Kristusip Satan inngilipiluilu nunamut igippai
8 Nersutit marluk takkupput, nersutillu naalakkersuisunut assersuutaasut aappaata siulliup assinga, FN-imi peqatigiit, uummarsarpaa
9 Inuit ’Guutimik mianerinnittut naalannartitsisullu’ naassaanngitsumik inuunissaminnut, allalli aserornissaminnut, katersorneqarput
10 Puuguttat arfineq- marluk Guutip kamannerata piisa kuineqarnerisa kinguneraat ’silaannarmit’ Satanip mingutsitaanit sunnertissimasut tamarmik toqunneqarnerat
11 Arnaq inuunerluttorsuaq, eqqunngitsumik upperisarsiornerit tamarmik, ’nersummit’ naalakkersuisunut assersuutaasumit iginneqarpoq suujunnaarsinneqarlunilu
12 Babylonip Angisuup suujunnaarsinneqarnerata kingornagut Savaaqqap nuliassaatalu, 144.000-it, katinnissaat piareersarneqarpoq
13 Arnaq inuunerluttorsuaq suujunnaarsinneqareersoq qilammiorpassuit Jesus siulersortigalugu Satanip aaqqissuussinerata sinnera nunamiittoq aseroriartorpaat
14 Satanip itinersuarmut iginneqareermat Kristusip nuliassaatalu, 144.000-it, ukiuni tuusintini naalagaaffissaat aallartissinnaanngorpoq
15 Kristus Jesus nuliassaalu ’nutaamik qilagalugit’ innuttaaqatigiit nutaat, ’nunatut nutaatut’ illutik, Jehovamit takorluugassaanngitsumik pilluaqqusaajumaarput
16 Inuiaat ajorunnaarsinneqarnissaannut inuunissaannullu Guutip periarfissiai Jerusalem nutaaq alutornangaartoq aqqutigalugu piuassapput