’Guuti mianerisiuk, taannalu naalannartissiuk’
’Guuti mianerisiuk, taannalu naalannartissiuk.’ — SARKÚMERSITAT 14:7.
1. Kikkut mianerisariaqarpavut, suullu ersigisariaqanngilavut?
KIKKUT ERSIGISARIAQARPAVUT? Kuukkooriaasarsuaq innertut aappalutsigisoq, Satan, taassumalu inngilipiluppassui ersigissanngivippavut! 1914-imi Naalagaaffiup pilersinneqarnerata kingornagut Kristus Jesusip taakku qilammit igippai. Guutip siunertarisai maangaannartinniaraluarlugit Satan allatut ilioriarfissaarutilerluni nunami peqatigiiffik suna sakkugisarigaa Saqqummersitani takorruukkani tulliusuni qulaarneqarpoq. Nersutit qaasuttut marluk aamma arnaq inuunerluttoq putumasoq — Babylon Angisooq — takorruukkani tamakkunani malunnarnersaapput. Taakkua ersiginissaannut pissutissaqarpa? Naamerluinnaq! Kisianni mianerisariaqarpavut Jehova Kristusinngortitaalu, taassuma naalagaaffia Satanip silarsuaanut ajortunngorluinnarsimasumut inaarutaasumik eqqartuussissamaalermat. — ússatit 1:7; Matîuse 10:28; sarĸúmersitat 12:9-12.
Nersutit Guutimut mitallersut
2. Takorruukkat arfineq- pingajussaanni nersut suna takkuppa, sumullu assersuutaalluni?
2 sarĸúmersitat-ni takorruukkat arfineq- pingajuanni nersut immamit aalajuaannartumit inuiaat piannit qaqisoq takkuppoq. Arfineq-marlunnik niaqoqarpoq nassummigullu quliusutigut qulinik niaqorutaasaqarluni, Satanimit kunngitut piginnaaneqartitaanerminut assersuutaasunik. Jehovamut mitallersuuvoq, leoparditullu, nannutullu liivertulluunniit illuni taassuma kiffaanik qajassuaalliorfiginnilluni; piginnaanerali ataavartuunngilaq, Satanimit nersutip assigilluinnagaanit pisuugami. Nunami naalakkersuisut politikki tunngavigalugu aqunneqartut siusinnerusukkut pruffiiti Danielip nersutitut allaatigisimavai, naalakkersuisullu namminneq inuiaassutsiminnut uumasut nujuartat ilisarnaatitut atortarpaat, soorlu liiveq tuluit ilisarnaatigigaat nattoralillu Amerikamiut ilisarnaatigalugu. (Dâniale 8:5-8, 20-22) Maannali takuarput nersut katitigaq, naalakkersuisunit politikki tunngavigalugu aqunneqartunit, Bibelip oqaluttuassartaani oqaluttuarineqartunit Guutip kiffaanik nunamiittunik naqisimannittartunit, katitigaasoq. Taakkua akornanni Ægypten, Assyria, Babylon, Medo- Persia, Grækenland, Roma kiisalu tuluit Amerikamiullu marluiusut naalagaaffissuat silarsuarmi pissaaneqangaartoq nuimanerullutik ’niaquupput’. — sarĸúmersitat 13:1, 2; 12:3, 7-9.
3. (a) Nersutip niaquisa ilaat qanoq ’panamik ikilerneqarsimava’? (b) Nersut marlunnik nassulik qanoq ililluni nersutip siulliup assinganik sanatitsiva? (c) Nersut siulleq sumik ateqarpa, aterlu taanna qanoq isumaqarpa?
3 Silarsuaq tamakkerlugu sorsunnerup 1914-imiit 1918-imut pisimasup nalaani Tuluit Nunaat, silarsuarmi naalagaaffissuit arfineq- aappaat, ’panamik ikilerneqarsimavoq’ toqussutigisinnaasimasaraluaminik. USA-lli ikioriartorpaa. Taamanerniilli Tuluit Nunaat USA-lu suleqatigiillutik silarsuarmi naalagaaffissuupput, Johannesillu tamanna oqaluttuaraa oqarluni nersutaasoq marlunnik nassulik, ’nunamit’, innuttaaqatigiinnit aalajaatsunit, qaqisoq. Nersut marlunnik nassulik taanna aallarniilluni nersutip siulliup assinganik sanatitsivoq anersaartulersillugulu. Taamaaliornera pingaarnerusumik assersuutaavoq tuluit Amerikamiullu, marluiullutik naalagaaffissuaqartut, Folkeforbundimik kingoraartaanillu FN-imik uumassuseqalersitsisuunerannut. Nersut siulleq kisitsimmik ateqarpoq, tassa 666. Arfinillit kisitsisaavoq naammalluinnanngitsoq — arfineq- marluk, Bibelimi naammalluinnassusermut naligititaasoq, inorpaa — taamaammallu arfinillit pingasunngortitat assersuutaapput ullumikkut nunarsuarmi naalakkersuisut alianangaartumik naammalluinnanngitsuunerannut. Jehovap Nalunaajaasuisa naak naalakkersuisunut naalattuugaluarlutik nunallu najukkamik inatsisaanik maleruaanermikkut maligassiuilluaraluarlutik, tatitullutik ’nersut’ assingaluunniit pallorfigiumanngilaat. — sarĸúmersitat 13:3-18; Rûmamiut 13:1-7.
Suna pillugu Guuti mianerissavarput?
4. (a) Kikkut Zionip qaqqaani qilammiittumi qeqarlutik takuneqarpat, utoqqaanerillu 24-t Guutip issiavissaarsuata saaniittut kikkunnut assersuutaappat? (b) ’Erinniukkap nutaap’ tanitat atugaata ’erinniukkallu nutaap’ amerlangaartut atugaata suna assigiinngissutigaat?
4 Nersutit qimakkallartigik! Takorruukkat qulingiluaat nuannernerusumik sammisaqarpoq. Savaaraq Zionip qaqqaani 144.000-it, inunnit naaqqaatitut pisiani, ilagalugit qeqarpoq. Taakkua ilaat naak suli nunami kiffartorallaraluartut, anersaakkut isumalimmik 144.000-it tamarmik ’Zionip qaqqaa, Jerusalem qilammiittoq tikippaat’. (Eprîarit 12:22) Utoqqaanerit 24-usut aamma Guutip issiavissaarsuata saani takussaammata naleqqulluarpoq, taakkumi assersuutaapput tanitanut taakkuusunut, kisianni allatut isigalugit — tassa makissimallutik kunnginngortitatut palasinngortitatullu isigalugit. 144.000-it taakkua ’erinniugaq nutaaq’ atorpaat. Misigisimasartik asseqanngitsoq, tassa Naalagaaffimmi kingornusseqataalerlutik nunamit pisiarineqarnertik, erinarsuutigaat. Aammattaaq amerlangaartut ’Jehova erinalersorfigaat erinniukkamik nutaamik’, taakkuali erinniugaq alla atorpaat nunarsuarmi, Naalagaaffiup naalagaaffigisaani, inuunermik naassaanngitsumik neriugisaqarlutik erinarsoramik. — sarĸúmersitat 7:9; 14:1-5; Tussiaat 96:1-10; Matîuse 25:31-34.
5. (a) Inngilimit qilaap missaagut timmisumit tusagassaq suna tusarliunneqarpa, ittuinnartuuneralu qanoq paasisariaqarpa? (b) Peqqussut suna inngilip nipitoorsuarmik peqqussutigaa, sunalu pillugu maannakkut taama naleqqulluartigaa?
5 Takorruukkat maanna annertusilerput. Johannesip inngili alla qilaap missaagut timmisoq takuaa. Tusarliussaatalu ila nuanningaassusia! Tusagassaavoq nuannersoq ittuinnartoq, tassami inunnut inuiaqatigiissunit, naggueqatigiissunit, oqaasilinnit inuiaasunillu tamaneersunut, maanna Guutip eqqartuussinerani naalattunut naassaanngitsumik inuunissamik kinguneqassagami. Guuti asseqanngitsoq taanna pallorfigisassaavoq asasassaallunilu, nersutinit Johannesip aatsaannguaq allaatigisaanit allaalluinnarami. Taannaavoq qilammik nunamillu pinngortitsisoq. Ittunik tamanik, uumassusilinnik uumaatsunillu taanna pilersitsisuuvoq. Taamaammat pissutissaqarluarpoq inngilip nipitoorsuarmik ima peqqusineranut: ’GUUTI MIANERISIUK, TAANNALU NAALANNARTISSIUK’! Inngilip nipaa nunarsuaq kaajallallugu tusarneqarsinnaavoq, ilungersorlunilu qaaqqusissutaa Jehovap Nalunaajaasuisa inuiannut tamanut oqaatsit 200-nit amerlanerusut atorlugit uteqattaarpaat. — sarĸúmersitat 14:6, 7; Isaia 45:11, 12, 18.
Babylonip Angisuup uppinnera
6. Inngilip allap tusagassaq tupaallannartoq alla suna tusarliuppaa?
6 Suli inngilimik allamik takkuttoqarpoq. Taanna tupaallannartumik tusarliussassaqarpoq. ’Uppippoq, uppippoq Babylon angisooq, inuiaqatigiit tamaasa viinnimik kamaammik uersarnermi pianik immikkamigit.’ (sarĸúmersitat 14:8) Babylon Angisooq kinaava, inuiaqatigiinnik uersaannissinnaallunilu putumatitsisinnaasoq?
7. Babylon Angisooq sunaava, qanorlu ililluni pilersimava?
7 Babylon itsarsuaq piusoq eqqunngitsumik upperisarsiornerit tamarmik aallaavigaat. Eqqunngitsumik upperisarsiorneq nunarsuarmut tamarmut siammariartuaarsimavoq naalagaaffissuanngorlunilu inngilipilunnit aqutaq, naleqqulluartumillu taagorneqalersimalluni „Babylon Angisooq“. Ukiut ingerlatillugit upperisarsiornerup naalagaaffissuani Roma nuimanersaalersimavoq, tassami Roma qullersaralugu kristumiut tunussisut pileriartuaarsimammata. Silarsuarmi tamarmi upperisarsiornerit Babylonimeersut suli ullumikkut Roma qullersaqarfigaat. Tamanna erseqqissarneqarpoq 1986-imi paavip Romamiittup qaaqqusinera ilassillugu silarsuarmi tamarmi upperisarsiornerup tungaatigut pisortat Assisimi, Romap eqqannguaniittumi, katersoqatigiikkiartormata FN-ip Silarsuarmi Tamarmi Eqqissinermut Ukiorititaanik qinnussiartorlutik.
8. (a) Qanoq ililluni Babylon Angisooq upperujussuarsimava, qangalu tamanna malunnarsisimava? (b) Upperisarsiornerup tungaatigut pisortat eqqissinissamik qinnutaasa akineqannginnerat suup nalunarunnaarsippaa?
8 Kisiannili Babylon Angisooq upperujussuarsimavoq! 1919-imiilli tamatuma malunnaatigaa eqqunngitsumik upperisarsiornerit silarsuarmi tamarmi tapersersorneqarnerata annikilliaartuaarsimanera. Kommunistiussutsip guutiitsup nunarsuup ilarujussua naalagaaffigilersimavaa. Ullumikkut inuusuttut pinngoriartorsimanermik, Guutip oqaasianut akerliusumik, ilinniartinneqartarput. Europami naaggaartut oqaluffiinut naalagiartartut ikiliartuinnarput, paavillu angalasartup ilungersoraluttuinnarluni naalagaaffigisani katuuliusut ataqatigiissinniarsarai. Guuterparujussuarnut silarsuarmiut upperfigisaannut qinnutit akineqarsimannginneri nalunanngilaq. Ruth L. Sivard ima allappoq: „1987-imi sorsunnerit 22-t ingerlasimapput — inuiaat oqaluttuarisaaneranni allagaasumi sorsunnerit ataatsikkut ingerlasut aatsaat taama amerlatigalutik. Sorsunnerni tamakkunani manna tikillugu 2.200.000-it toqutaapput — amerliartorasuarlutillu.“a Assisimi qinoqatigiilluni ataatsimiinneq sunniuteqarsimanngeqaaq! Taamaakkaluartoq 1987-imi ataatsimiinnerup tamatuma nalliuteqqiffia malunnartinniarlugu paavi saqqarmiuliortitsivoq saavani nammineq assiminik assitalimmik muminganilu qinoqatigiilluni ataatsimiinnermut ilisarnaat assiliartaalluni. Ima oqartoqartuarpoq: „’Eqqissineqarpoq! Eqqissineqarpoq!’ naak eqqissivissaqanngitsoq.“ — Jerimia 6:14, NV.
Babylonip inuunerluttuunera qulaarneqartoq
9. Babylonip Angisuup palasertaasa suna tusaamasaanerluutigaat?
9 sarĸúmersitat 14:8-mi takutinneqarpoq Babylon Angisooq kanngunartuliortuusoq. Palasertaasa kanngunartuliorlutik inooriaasertik tusaamasaanerluutigaat. Tv-kkut oqaluussisartut ’savaatitik’ dollarinik arlalinnik hundredenik millionilinnik aningaasaajarpaat, ingasattumik kanngunartuliortartillutik. Aammattaaq palasit katuuliusut isornartorsiorneqartarput soorlu The Beacon Journal, Philadelphiami, Pennsylvaniami, saqqummersartoq 3. januari 1988-imi ima allaaserisaqartoq: „USA-mi meeqqat arlalinnik hundredellit ukiut tallimat kingulliit ingerlaneranni palasinit katuuliusunit atornerlugaasut misigissutsimikkut annertuumik ajoquserneqarsimapput, taama oqarput angajoqqaavi, tarnip pissusiinik ilisimatuut, politiit eqqartuussissuserisullu taakkuninnga suliarinnittut.“ Babylonip Angisuup palasertaasa ilarpassuisa kinguaassiuutitigut kanngunartuliornertik oqaatigineqarnerluutigaat.
10. (a) Babylonip Angisuup ’uersarnera’ sarĸúmersitat 18:3-mi eqqartorneqartoq sunaava? (b) Suna pillugu allat toqunerannut Babylonip Angisuup palasertai pisooqataasorujussuuppat, soorlu sarĸúmersitat 18:24-mi eqqartorneqartoq?
10 Kisianni ’viinni kamaammik uersarnermi pia’ tassaaneruvoq eqqunngitsumik upperisarsiortut silarsuup naalakkersuisuinut iluareqqusaarnerat, qineqqusaarnerinik sorsuunnerinillu tapersersuisarnerat, nersutillu ilaasa inuiaassutsimik pingaartitsivallaarnerusut arlaat pallorfigeqqullugu inunnik pinngitsaaliisarnerat. Anguniakkaminnik anguniaanerminni politikerit upperisarsiorneq atorluarsinnaasamittut aapparisarpaat, soorlu Hitlerip 1933-mi Vatikan isumaqatigiissuteqarfigimmagu aammattaaq Spaniamiut imminnut sorsuunneranni 1936-39-mi pisimasumi taamaaliortoqarmat. Sorsunnersuup aappaata nalaani akerleriit tamarmik assigiillutik katuullit, naaggaartut, Buddhasiortut upperisarsioqatigiillu allat palasertaat inuiaassutsimik pingaartitsivallaarnermit sorsukkumatunerup pianit putumasutut iliorput. Taakku pisooqataasorujussuupput sorsunnerni 1914-imiilli pisarsimasuni sakkutuut sakkutuujunngitsullu millionillit toqunerannut. Palasit fascistinik nazistinillu tapersersuisuusut Jehovap Nalunaajaasui allallu naalakkersuinikkut akerlerisanut pillaavittut najugarititani toqunerannut aamma pisooqataapput. — Jerimia 2:34; sarĸúmersitat 18:3, 24.
11. (a) Tanitat amerlangaartullu suna pallorfigiumanngilaat? (b) Nuanningaartunik sunik neriugisaqaratta pissutissaqarluarpugut Guuti mianerissallugu taannalu naalannartissallugu?
11 Ukiut 74-it kingulliit ingerlaneranni kristumiut tanitaasut aalajaatsut, amerlangaartunullu ilaasut amerliartuinnartut ilanngullugit, unissanatik GUUTI MIANERAAT, TAANNALU NAALANNARTIPPAAT. Nersutip ilaanik inuiaassutsimik pingaartitsivallarnerusumik sumilluunniit pallorfiginnikkumannginnertik aalajangiussimalluinnarpaat. Nersutip assinga — Folkeforbundi FN-ilu — unnersiutigiumasimanngilarput, nalunnginnatsigu ’naalagaaffik Naalakkatta [Jehovap] Kristusillu piat’ kisimi eqqissinermik piviusumik isumannaassusermillu pilersitsisinnaasoq. Aalajangersimavugut ’Guutip inassutaanik Jesusimullu uppernermik’ aalajangiussilluinnaqqajuassalluta. Taamatut aalajaatsuuneq akissarsiaqarnarpoq! Kristumiut tanitat ’Naalakkami toqusut’ pilluarnerarneqarput, ’suliaasami malippaat’. Malersugaaneq, nappaatit ajunaarnerilluunniit pissutigalugit amerlangaartunut ilaasuni toqusoqaraluaruni, taamaattoq Guutimik ikinngutiginninniarsimagamik qularnaatsumik neriuutissaqarput ’nunap nutaassap’ innuttaaqatigiissortaanut makikkasuarnissaminnik. Taama nuannertigisumik neriugisaqaramik pissutissaqarluarput GUUTI MIANERISSALLUGU, TAANNALU NAALANNARTISSALLUGU. — sarĸúmersitat 11:15, 17; 12:10; 14:9-13; 21:1.
12. Suut katersorneqassappat, qaqugulu?
12 Eqqartuussineq ingerlatillugu katersuinerit marluk inngilinit nalunaarutigineqarput. Katersuisoq siulleq nalunanngitsumik tassaavoq Jesus, 1914-imiilli Naalagaaffiup naalannassusiatigut issiavissaarsuarmi issiasoq, tassami nuissap qaani issiagami, niaqoruteqarluni ’inuullu erneratut asseqarluni’. Maanna, Naalakkap ulluani, nuna katersuiffigaa, siullermik kristumiunut tanitanut sinneruttut taavalu amerlangaartut millionilippassuusut katersorlugit. (Naleqqiuguk Matîuse 25:31-34; Juánase 15:1, 5, 16.) Katersuinerulli aappaani ’nunap viinnequtaa’ katersuiffigineqarpoq, taannalu ’tunguiaaffissuarmut Guutip kamannerata pianut’ iginneqarpoq. Tamanna assersuutaavoq eqqartuussummut Harmagedonimi naammassineqartussaasumut, innuttaaqatigiit guutiitsut ilassimasullu manngui ilanngullugit nutsunneqarpata inerititaallu toqunartut sequmisinneqarpata. Nunarsuup viinneqummik toqunartumik taassuminnga piiaaffigineqarnissaagut Jehova unnersiutigineqarili! — sarĸúmersitat 14:14-20; 16:14, 16.
’Iluarput ilumoorlutillu aqqutigisatit’
13. (a) Takorruukkat qulinganni tanitat makittut erinniugaq suna atorpaat, erinniukkallu suut oqaasertarai? (b) Takorruukkami tassani Guutip eqqartuussutaasa naapertuilluartuunerat qanoq ersersinneqarpa?
13 sarĸúmersitat-ni takorruukkat qulinganni qilammi Guutip issiavissaarsuata saani pisunik takusaqaqqippugut. Najugaani tipaatsunneq angingaarami! Makissimasut — GUUTI MIANERALUGULU NAALANNARTIKKAMIKKU ajugaasimasut — ’erninniugaq Mosesip pia Savaaqqallu pia’ atorpaat: ’Angeqaat tupinnaqalutillu suliatit, Jehova Guuti ajugaqanngitsutit; iluarput ilumoorlutillu aqqutigisatit, inuiaqatigiit kunngiat-aa. Kia mianerissannginneraatit, Jehova, aqqillu unnersiutiginagu? Kisivit illernartorsuugavit. Inuiaqatigiimmi tamarmik aggerumaarput kiinnavit saani pallorlutik, peqqussutitit iluartut ersermata.’ Soorlu takorruukkakkut tamatumuunakkut erseqqilluinnartumik ersersinneqartartoq, Guutip eqqartuussutai ilumut iluarput ilumoorlutillu! Inngilit puuguttat arfineq- marluk Guutip kamannerata pii kuivaat, tamatumalu kinguneranik inuiaqatigiit tamarmik Har–Magedonimut katersorneqarput eqqaasitsissutigineqarporlu ’Babylon Angisooq Guutip saani eqqaaneqarmat’. Oqaaqqissaarut GUUTI MIANEREQQULLUGU, TAANNALU NAALANNARTEQQULLUGU piffissaalluartukkut tutsiuppoq. — sarĸúmersitat 15:1–16:21.
14. Takorruukkat aqqarnanni aqqaneq-aappaannilu Babylon Angisooq qanoq nuimanerusumik pineqartarpa, sunalu pillugu illoqarfimmit taassumannga aninissamut piffissaarutilerpa?
14 Babylon Angisooq sarĸúmersitat-ni eqqartorneqaqattaarpoq. Takorruukkat aqqarnanni aqqaneq- aappaannilu nuimanerulluni taanna takussaavoq. ’Imerpassuarnik issiaviginnittuuvoq,’ inuiannik aqutsilluni ajoqersuutiminillu salluusunit toqunartuusunillu putumatitsisarluni. Malersuisitsinermigut toqutami ’iluartut aavinit’ nammineq putumavoq, ’nunamilu toqutaasut tamarmik’ toqunerannut ajoqusiiumatuulluni sorsutsitsisarsimanini pissutigalugu pisooqataavoq. Niuertarfiutilissuarnik suleqatiginninnini inunnillu aningaasatigut sualuppallaartumik iluanaarniapiluffiginninnini peqquserluttumik pisoorsuannguutigingaarpai. Assuarnarnerpaarli tassaavoq politikki tunngavigalugu aqutsiniarnermut akuliussimanera, allaallu nuimaneruniarluni nersut eqqissinissamik isumannaassusissamillu pilersitsiniartuusaartuusoq — FN — qimusserfigigamiuk. Nersutilli taassumarpiaap nassuisa sakkutooqarnermik pingaartitsisuusut ungasinngitsukkut Babylon Angisooq suerullugu piiarumaarpaat suujunnaarsissallugulu. Taamaattumik GUUTIMIK MIANERINNITTUT TAASSUMINNGALU NAALANNARTITSISUT tamarmik taassumannga aninissaat piffissaarutilerpoq, taassumami ’ajortai qilammut apissipput, iluaatsuliornerilu Guutip eqqaavai’. — sarĸúmersitat 17:1–18:24.
15. Arnap inuunerluttorsuup aserornerata kingornagut unnersiutiginnissut suna tutsiuppa, tamatumalu kingornagut pisoq nuannersoq suna nalliuppa?
15 Babylonip Angisuup aserornissaa Jehovap naapertuilluarluni eqqartuussinerata kinguneraa. Tamanna pingaartinneqarluni siullermik qilammi taavalu nunami hallelujaartortaqattaarnikkut Jehova unnersiutigineqarpoq, annaassut, naalannaat pissaanerlu Jehovamut pigitillugit. „Jah unnersiutigisiuk!“-p uteqattaarneqarneratigut arnap inuunerluttorsuup naassaanngitsumik suujunnaarsinneqarneranik nuannaarutiginningaarneq ersersinneqarpoq. Taassuma piuneerunneqarnerata qilammi pisimasumit pilluarnangaartumit — Savaaqqap, Kristus Jesusip, nuliassaatalu, ajugaasut aalajaatsut 144.000-iusut, katinnerannit — ila allaalluinnassusia! ’Jehova Guuterput Ajugaqanngitsoq’ nipitoorujussuarmik unnersiutigineqarpoq, aap, ’tipaatsullutalu qiimasutta taannalu naalannartillugu; Savaaqqap katernaaffissaa nalliummat, nuliassaalu piareersareermat’. — sarĸúmersitat 19:1-10.
16. Takorruukkat tretteniat naapertorlugu apeqqut akerleriissutaasoq suna inaarutaasumik naammassineqassava, qanorlu?
16 Qilammi katinnerup siornagulli takorruukkat trettenianni takutinneqarpoq Jehovap kisimi oqartussaanera pillugu apeqqutip akerleriissutaasup qanoq inerneqarnissaa. Kunngit Kunngiat naalakkallu Naalagaat taassuma ivertitaa, Jesus, inngilerpassuit ilagalugit ’eqqartuussinermigullu sorsunnermigullu naapertuilluarpoq’, viinnimut tunguiaaffik Guutip ajugaqanngitsup kamannerata katsungaatsup pianut atortoq tummarlugu. Satanip nunami aaqqissuussaanerata sinneri tamavimmik sequmisinneqarluinnassapput! (sarĸúmersitat 19:11-21) Ajugaanissaq qanilliartorasuartoq tamanna sarĸúmersitat-ni takorruukkat aqqutigalugit qimerloortillugu pissutissaqarluarpugut GUUTI MIANERISSALLUGU, TAANNALU NAALANNARTISSALLUGU!
Guuti naassaanngilluinnartumik naalannartinneqassaaq
17. Takorruukkat fjortenianni femteniannilu Guutimik mianerinnittut taassuminngalu naalannartitsisut tamarmik qanoq pineqarumaarnissaat takutinneqarpa?
17 sarĸúmersitat-ni takorruukkat fjortenianni femteniannilu GUUTIMIK MIANERINNITTUNUT TAASSUMINNGALU NAALANNARTITSISUNUT tamanut kinguneri takutinneqarput. Satan inngilipiluilu ukiut tuusintillit itinersuarmiititaassammata, Savaaqqap nuliassaatalu qilammi katinnerat naammassineqarpoq, kunngillu palasillu 144.001-iusut ukiut tuusintit naalakkersuissapput inuiaat naammalluinnartunngoriartuaartissallugit. Naggataarutaasumik misilinneqareersullu GUUTIMIK MIANERINNITTUARTUT TAASSUMINNGALU NAALANNARTITSIUARTUT ajugaassapput naassaanngitsumillu inuunissaminnut akuerineqassallutik. Taakkununnga ilaassapput toqusut makissimasut milliardillit ’mikisut angisuullu’, aqqi mappersakkanut inuunerup piinut allanneqarnissamut qinngaqqunnanngitsut. ’Qilak nutaaq nunalu nutaaq’ aqqutigalugit inuiaat naassaanngitsumik pilluaqqusaajumaarput, pilluaqqussutillu tamakku pinngitsoorsinnaanngillat, ’sunimmi tamanik nutaanngortitsisutut’ Jehova ima nalunaarpoq: ’Allagit, oqaatsit tamakku sallusuillutillu ilumoormata.’ — sarĸúmersitat 20:1–21:8.
18. Takorruukkat seksteniat naapertorlugu sarĸúmersitat suna pingaarnerusortaraat?
18 Takorruukkat sekstenianni sarĸúmersitat pingaarnerusortaat takutinneqarpoq. Suna? Takorruugaq tassaavoq illoqarfik. Illoqarfik taanna, Jerusalem Nutaaq, inuit nunami illoqarfiliarisimasaannit tamanit allaanerulluinnarpoq — Babylonimit Angisuumit, illoqarfimmik taassuminnga tunussinermigut, ileqqorlunnermigut naalakkersuisunillu kanngunartuliorfiginninnermigut Guutimik sualuttumik ataqqinartaajaasuusumit, allaanerulluinnarluni. Illoqarfik illernartoq minguitsuuvoq, alianaappoq erlinnartuullunilu. Tassaavoq Savaaqqap nuliassaa, inuiannik naassaanngitsumik inuuneqalersitsinermini ikiortigisassaa. (Juánase 3:16) Tupinnanngilaq taava nipitoorssuarmik erseqqarissumillu torlulaatigineqarmat illoqarfimmit salloqittaataasumit, Babylon Angisuumit, aneqqulluta! — sarĸúmersitat 18:4; 21:9–22:5.
19. (a) Katersat nuliassaasut aqqutigalugit qaaqqusissut suna tutsiuttarpa, qanilaartullu qanoq qisuariassappat? (b) ’Guuti mianerigutsigu taannalu naalannartikkutsigu’ suna pissavarput?
19 Jehovap anersaavata sunniisinnaassuseqarluartup katersat nuliassaasut aqqutigalugit qaaqqusissut kimittooq una tutsiutsippaa: ’Aggerna!’ Aap, qanilaartusi tamassi nunarsuaq tamakkerlugu paratiisimi inuunermik naassaanngitsumik perusuttusi ukorsii, ’kuussuarmut inuunartumik imilimmut’ aggeritsi, inuunermik naassaanngitsumik angusinissatsinnut Kristus nuliassaalu aqqutigalugit Jehovap periarfissiai tamaasa ilassisigik! Ila pissanganassusissaa — inuttut naammalluinnartutut nunami paratiisiusumi naassaanngitsumik inuussalluni! Tamanna akissarsiassaavoq peqqussummik uuminnga naalattunut amerlasuunut: ’GUUTI MIANERISIUK, TAANNALU NAALANNARTISSIUK’! — sarĸúmersitat 22:6-21. (wD 15/12 88)
[Quppernerup ataani ilanngussaq]
a World Military and Social Expenditures 1987-88.
ILLIT QANOQ AKISSAVIT?
□ Nersutit marluk takorruugaanerat maanna pisariaqartitatsinnik sumik ilinniarfigisinnaavarput?
□ Inngilip qilaap missaagut timmisup tusarliinera qisuarfigissavarput?
□ Babylonip Angisuup uersarnera qanoq paasisariaqarpa, Guutimillu mianerinnittut tamanna qanoq isumaqarfigaat?
□ Naalakkap ulluani nuna qanoq katersuiffigineqarpa?
□ Pisut pilluarnartut suut sarĸúmersitat naggasiutigaat, Guutillu innuttaasa qanoq iliorunik peqataaffigisinnaassavaat?
[Qupp. 22-mi assiliartaq]
Saqqarmioq kanngussaasamit sanaaq una Assisimi ataatsimiinnerup eqqissinissamik qinoqatigiiffiusup ullormi nalliuteqqiffiani, 1987-imi oktoberimi, sananeqarpoq. Saqqaaniippoq ’ataatap iluartup’ assinga oqaatsinit „Johannes Paul II Pontifex Maximus“-imit aammalu pisimasup ulluanit avatangerneqarsimalluni. Muminganiippoq „Iluartuutitaq Francis“ Assisimi qinoqatigiinnermi „eqqissinissamik, Guutip tunissutaanik“ qinusoq