Inuusuttut aperipput:

Atoqateqarsimannginnera pissusissamisuungila?

’Jane, suna ullumi nikallungassutigaajuk?’ nakorsaq inussiarnersoq aperaaq.

’Atuarfimmi,’ nangaalluni oqalulerpoq, ’niviarsiararpassuit p-pillit nukappiaqqanillu atoqateqarneq oqallisigisaqaat. Uanga taamaaliorneq ajorama ajoquteqarpunga?’ — What Shall We Tell the Kids? dr. Bennett Olshakerimit.

ATOQATEQARSIMANNGINNEQ siornatigut kusanartutut isigineqarsimagaluarpoq, ullumikkulli inuusuttorpassuit kanngunartutut, pissusissamisuunngitsutut, nappaatitut piaarnerpaamik katsorsarneqartariaqartutut, isigaat.

Tupinnanngitsumik inuusuttut amerliartuinnartut atoqatigiinnikkut pinaveersaartuujunnaajorarput. Tysklandimi 1983-imi apersuinermi paasinarsisimavoq inuusuttuaqqat 15-inik ukiullit akornanni niviarsiaqqat 9 procentiinnaat nukappiaqqallu 4 procentiinnaat atoqateqareersimasut. 1989-imi kisitsisit 25 aamma 20 procentimut qullarsimapput! Nunarsuup ilaani sumi tamaani taamatorluinnaq pisoqarpoq.

Sooruna atoqatigiinnikkut pinaveersaartuunissaq inuusuttut akornanni taama ornigineqanngitsigisoq? Inuusuttuaqqat inersimasunngoriartuaalernermi misigissutsit sakkortuut tamatigut malugisarsimavaat. Ullutsinnili inuusuttut silarsuarmi ileqqussatigut ikittuinnarnik najoqqutaqarfiusumi imaluunniit najoqqutaqanngilluinnarfiusumi alliartorsimapput. Utoqqaanertarpaaluit kristumiuusut nunami Europamiittumeersut ima allapput: „Nuna manna qallikkut upperisarsiorfiugaluarluni kanngunartuliorfioqaaq. Kinguaassiuutitigut kanngunartuliorneq ’inuttut sanngiissutitut’ akuersugaavoq. Meeqqat katissimanngitsunik angajoqqaaqarlutik alliartortarput. Silarsuarmi nunani killinnerniittunit allanit tamanit maani ussassaarutit atoqatigiinnermik pingaartitsineroqaat.“

Aammattaaq nunani ineriartortitani kulturikkut aningaasarsiornikkullu nukiit sakkortuut inuusuttut tamalikannissaannik kajumissaarisaqaat. Nunami Afrikamiittumi oqartoqartarpoq ’angut inuusuttoq atoqateqartanngikkuni timaa aseroriartulissasoq’. Aammattaaq isuma, ’niviarsiaqqap nukappiaqqamik atoqateqartinnani inuuneq ilikkarnavianngikkaa’, siammarsimaqaaq.

Suliffissaaleqinerujussuaq piitsuunerujussuarlu pissutigalugit immaqa niviarsissap sulisitsisumi qaninniarnera itigartikkuminaatsissavaa, ilinniartitsisorlu immaqa ilinniartitami soraarummeernermini angusitinnissaanut taartitut atoqatigiinnissamik piumasaqassaaq. Taamaattumik qaqutigoortuunngilaq niviarsiaqqat piitsut inuunermi pisariaqavissut — allaat qaqorsaataannaq — piniaannarlugit imminnut akigisarnerat! „Kinguaassiuutitigut atoqatigiinneq nerinertut imernertulluunniit isigineqarpoq,“ nunami ineriartortitami taama oqartoqarsimavoq.

Peqatit tatisinerat

Ilagisartakkanit tatineqarneq aammattaaq aalajangiisooqaaq. Niviarsiaraq suli atoqateqarsimanngitsoq qinngasaarneqarlunilu kanngusaarneqarsinnaavoq. Ingammik Jehovap nalunaajaasui inuusuttut eqqarsaatigaavut. Peqatit oqartarput atoqateqarsimanngikkaanni angutivinngortoqarsinnaanngitsoq imaluunniit arnavinngortoqarsinnaanngitsoq. Immaqa oqartarput katinnginnermi misilittagaqalaarnissaq ajoqutaanavianngitsoq. Imaluunniit atoqatigiinnikkut misigisimasatik pissusissamisuunngitsut oqaluttuareqattaartarpaat.

„Sallyp peeqqanilu atoqatigiikkaangamik qanoq nuannertigisartoq oqaluttuareqattaartaqaa,“ niviarsiaraq inuusuttoq oqarpoq. „Isumaqalersippaanga inuunerup nuannernerpaartaasa ilaat arajutsigiga.“ Inuusuttuararpassuit naluaat „inuusuttuaqqat atoqatigiinnikkut misigisimasatik oqaluttuarigaangamikkik pingaakujuutigalugillu ingasattajaarlutillu salluliortartut“, taamaattumillu nakutitaasarlutik. (Coping With Teenage Depression, Kathleen McCoyimit) Arnaq inuusuttoq Mariamik atilik kanngunartulioqateqarsimasoq ima oqaluttuarpoq: „Misigigama tatineqarlunga, akuerineqarnissaralu kissaatigeqigakku. Nalunngikkaluarlugu kukkusuusoq allanit allaanerorusunnginnama — peerartaarusukkama.“

Taamatuttaaq inuusuttut millionilikkuutaat silarsuup sunniiniarneranit nakutitaasimapput, isumaqalersinneqarlutik atoqateqarsimannginneq pissusissamisuunngitsoq katissimananilu atoqateqartarneq ajoqutaanngilluinnartoq. Inuusuttut akornanni atoqateqarsimanngitsoqanngingajalluinnarpoq.

Guutip tamatumunnga isiginninnera

Immaqali peqatitit oqaluttuarinngitsuugaqarput. Maria ima oqaluttuarpoq: „Kingornatigut kanngusoqaanga. Imminut ajorisorujussuuvunga peeraralu uumigisorujussuullugu.“ Misigissutsit taama ittut nalinginnaaqaat, inuusuttulli amerlanersaasa nassuerutigiumaneq ajorpaat. Kammalaativit salluliuutaat ingasattajaarillutillu oqaluttuaat puiuinnakkit. Ilumoortoq oqaatigissagaanni aappariinnerup avataani atoqateqartarneq alianartunik nikanarsaataasunillu misigisaqarfiugappoq — nuanniitsunik kingunilinnik!

Tamanna tupaallaatigissanngilat. Naammi katissimanani atoqateqartarneq peqqinnartutut pissusissamisoortutullu silarsuarmi isigineqaraluartoq taamaattoq Guutip iluarinngilaa. Jesus Kristusip eqqaasippaatigut ’inunni [qutsissut] Guutimut maajunnartartut’. (Lúkarse 16:15) Qanoq ileqqoqartariaqarnissamut Guuti nammineq najoqqutassiaqarpoq. ’Tassaavoq Guutip peqqusaa,’ Bibelimi allassimavoq, ’iluarsissutissarsi, uersaaneq nigussagissi nungullusilu timisi pigisinnaassagisi iluarsiartortillusi ataqqinartillusilu . . . Guutip qaaqqunngimmatigut minguttooqqulluta, kisianni iluarsiartoqqulluta.’ — 1 Tásalûníkamiut 4:3-7.

Guutip atoqatigiinnermik pinaveersaarneq pissusissamisoortutuinnaanngitsoq aammali minguitsutut illernartutullu isigaa! Israelitoqqami atoqateqarsimanngitsut ataqqinartumik inissisimaffeqarsimapput. Atoqatigiinnikkut atornerlunneqarnermut Inatsisitigut illersugaapput. (5 Moses 22:19, 28, 29) Sulilu kristumiut ilumoortut akornanni atoqateqarsimannginneq imaluunniit attorneqarsimannginneq kusanartutut isigineqarpoq. Ilagiit kristumiut ilumoortut ileqqussatigut minguitsuunertik pissutigalugu ’niviarsiamut minguitsumut’ assersuunneqarput. — 2 Korintumiut 11:2; sarĸúmersitat 21:9.

Inuusuttut Bibelimi sumiluunniit kajumissaarneqanngillat atoqateqarsimannginnertik perloqqussutitut isigeqqullugu. Akerlianilli Paulus oqarsimavoq kinaluunniit ’uummammigut aalajangeruni . . . uummammigullu pilersaarutigiguniuk [niviarsiaassutsi attatiinnarumallugu, NV], [aappaninnginnermigut] taanna iluartumik iliorpoq. Tassa [niviarsiaassutsiminik aappariinnermut tunniussisoq, NV] iluartumik iliorpoq, [niviarsiaaginnartorli] iluarnerusumik iliorpoq.’a Katissimalluni aappariinnerup iluani kinguaassiuutitigut ileqqorissumik atoqatigiinneq Paulusip avoqqaarinngilaa. Ersersippaali kristumiu aappaninnginnermigut niviarsiaassutsiminik attassiinnartoq ’allamut saasarneqarani Naalakkamut kiffartorsinnaassasoq’. — 1 Korintumiut 7:25, 33-38.

Atoqateqarsimannginneq imaluunniit ileqqussatigut minguitsuuneq kristumiunut inuusuttunut kanngunartuunngilaq, akerlianilli assuarnaalluni Guutimut kiffartornermut ersiutaavoq. Minguitsuunissarli ajornaatsuinnaanngilaq; imminut naalakkersinnaaneq annertooq pisariaqarpoq. Bibelimili neriorsoqqissaarneqarpugut Guutip inassutai ’artornanngitsut’. (1 Juánase 5:3) Tussiaasiortorlu ima allassimavoq: „[Jehovap] maleruagassiai naapertuilluartuupput, uummammik nuannaartitsisarput. [Jehovap] peqqussutai sukuluipput, isinik qaamaneqalersitsisarput.“ (Tussiaat 19:9) Guutip piumasaanik iliorneq tamatigut peqqinnartuullunilu iluaqutaasarpoq.

’Nammineq timimut ajortuliorneq’

Korintumiunut agdlagkat sujugdlît 6:18-imi Bibelimi ima allassimavoq: ’Uersaasoq [kanngunartuliortoq] nammineq timiminut ajortulioraraaq.’ Naak nalinginnaasumik isumaqartoqaraluartoq atoqateqartannginneq timimut peqqinnanngitsoq, taamaattoq tamatumunnga uppernarsaatissaqanngilaq. Tamatumali akerlianik iliorneq navianarsinnaavoq! Nakorsaq nuimasoq ima oqarpoq: „Pinaveersimatitsiniarnernik sunniuteqarluarsinnaasunik pilersitsisoqanngippat kinguaassiuutitigut nappaatit siaruaakkaluttuinnassapput. Kinguaassiuutitigut nappaatit annertusiartuinnarnerat inuusuttut akornanni atoqatigiinnermik aallussinerujartuinnarnermik ilaatigut pissuteqarpoq.“ — Current Controversies in Marriage and Family.

Inuusuttut akornanni tamalikanneq aammattaaq inuusuttuaqqat amerliartuinnartut naartulertarnerannik kinguneqarpoq. USA-mi inuusuttuaqqat akornanni naartunerit tamarmik affaat nammineersumik imaluunniit naartuersinnikkut kipitinneqartarput. Taavalu kinguaassiuutitigut kanngunartuliorneq misigissutsikkut artorsaateqarnermik kinguneqartarpoq. „Piumasani pereeramiuk,“ Diana oqaluttuarpoq, „qimappaanga.“ Paulus ilumoorpoq. Katissimanani atoqateqarneq ’nammineq timimut ajortuliorneruvoq’.

Kanngunartuliorneq aammattaaq ’allanik peqqusersiorfiginninnerullunilu innarliineruvoq’. (1 Tásalûníkamiut 4:6) Inuup allap ileqqussatigut minguilluni aappaqalersinnaanermik periarfissaa akorserneqartarpoq. Aappaalerumaartorlu attorneqarsimanngitsumik aappaninnissaminut pisinnaatitaaffimminik arsaarneqartarpoq.

Atuakkami Why Wait Till Marriage?-mi manna silatuumik qularnaallisinneqarpoq: „Atoqateqaqqaarnerpit kingorna niviarsiaajunnaassaatit. . . . Ataasiaannarlutit qinersisussaavutit.“ Taamaattumik eqqortumik qinersigit! Bibelimi najoqqutassiat aalajangiusimagakkit ajoquteqartutit silarsuup isumaqalersitsiniaaneranit nakutitaaqinak. Atoqateqarsimannginneq pissusissamisuunnginngilaq. Akerlianilli. Kinguaassiuutitigut kanngunartuliorneq pissusissamisuunngitsutut taaneqartariaqarpoq, nikanarsaataallunilu kanngunarsaataallunilu ajoqutaasarmat. Ileqqussatigut minguitsuujuarnikkut peqqissutsit, misigissutsitit, pingaarnerpaamillu, Guutimut attaveqarnerit sernissussavatit.

Inuusuttut ileqqussatigut qanoq ilillutik imminnut minguitsuutissinnaanerat ilanngutassiani tulliuttuni sammineqassaaq. (gD 22/3 92)

[Quppernerup ataani ilanngussaq]

[Qupp. 20-mi assiliartaq]

Inuusuttorpassuit atoqateqarnikkut misigisimasatik pingaakujuutigalugillu salluliuutigisarpaat.