Bibeli inuusuttuaqqallu kinguaassiuutitigut ileqqui

„Atoqatigiinnermut tunngasunik sunniineq eqqarsaatigalugu silarsuaq ajornerpaaq inuusuttuaqqanit kingornunneqarsimannguatsiarpoq: Isiginnaagassiatigut, nipilersuutitigut, radiokkut tv-kkullu oqaluttuunneqartarput atoqatigiinneq nuannersuullunilu pissanganartuullunilu pikkunartuusoq . . . taamaattorli tamanna ilutigalugu inuusuttut ilisimatinneqartarput niviarsissat ileqqorissut naaggaartariaqartut.“ — Alan Guttmacher-instituttet.

ULLUMIKKUT inuusuttuusut ukiuni ileqqussanut tunngasunik paasinnittaatsit allanngorarfiini peroriartorsimapput. Bibelimili atoqatigiinnermi ileqqussanut tunngasunik ersarissunik, paatsuugassaanngitsunik unnersuussuteqarpoq. Atuarfinni atoqatigiinnermik ilinniartitsinermi qanoq ililluni naartulersoornissap pinngitsoorneqarsinnaanera sammineqarnerusartillugu, Bibelimi ersersinneqarpoq pinngitsoorneqartariaqartoq tassaasoq suli katitsinnani atoqateqarneq. „Qularutigissanngilluinnarparsi kinaluunniit kanngunartuliortoq [katitsinnani atoqateqarneq ilanngullugu] minguttorluunniit nalinginnarpassuarnilluunniit inuunerloqateqartoq . . . Guutip naalagaaffiani kingornussassaqanngimmat,“ Bibelimi allassimasoqarpoq. (Evfisumiut 5:5, The Jerusalem Bible) Ersarippoq kinguaassiuutitigut atoqatigiinneq taamaallaat katissimalluni aappariinnerup iluani pisussaasoq.

Taamaattumik qanoq ililluni naartunaveersaarnissamik ilinniartitsinerinnakkut inuusuttuaqqat naartulersoortarnerat aaqqinneqarsinnaanngilaq. Ileqqussatigut anersaakkullu unnersuussinissaq pisariaqarpoq. Kikkut taamatut unnersuussinissamut akisussaaffeqarnersut Bibelimi ersersinneqarpoq: „Ilissi ataatat, qitornasi narrutsatseqinasigik, perorsartuarlugilli Jehovap ileqqoreqqusai oqaaqqissaarutaalu malillugit.“ — Evfisumiut 6:4, NV.

Misissuinerit ilaanni inuusuttut apersorneqarsimapput atoqatigiinnermut tunngasunik angajoqqaatik imminnik oqaluttuussinissaminnut qanoq kakkatsiginersut, „naammaginanngilaq“-miit „naammaginaqaaq“-mut naliliisinnaatitaallutik. „Inuusuttuaqqat amerlanerit anaanatik naammaannartutut nalilerpaat. Ataatatilli naammaginanngilluinnarnerarpaat.“ Piviusorsiorneruali naatsorsuutigissallugu angajoqqaat atoqatigiinnermut tunngasunik meeqqaminnut unnersuussinissaat?

Qanoq ililluni inuusuttut ileqqussatigut unnersuunneqarsinnaasut

ússatit 4:1-4-mi kunngi Salomonip inuusuttut ima inappai: „Ernikka, ataataasup perorsaaneri tusarniarsigik . . . Uangattaarmi ataatannut ernerulluarsimavunga, anaanama aqassugaralungalu pisuarigaanga; ajoqersorpaangalu [ataatama] oqarfigalunga: ’Uummappit oqaatsikka aalajangiulligit.’“ (NV). Qularnanngitsumik Salomonip ataatani allaat kinguaassiuutinut tunngasunik oqaloqatigisinnaasarsimagaa, tassami ússatit-ni kingusinnerusukkut allaat kinguaassiuutitigut kanngunartuliorneq toqqaannavissumik Salomonip eqqartorpaa. — ússatit 5:1-19.

Jehovap Nalunaajaasuisa akornanni ilaqutariippassuaqarpoq meeqqaminnik ammasumik oqaloqatiginnittartunik — ajunngitsumik kingunilimmik! Atoqatigiinnerup tungaatigut meeqqatik inertiinnanngilaat, Bibelili ikiortigalugu oqaluttuuttarpaat katitsinnani atoqateqarnissaq sooq pinngitsoortariaqartoq. Salomonip oqaasii isumaliutigeqqeriakkit. Taassuma ússatit 5:3, 4-mi angutit inuusuttut kajumissaarpai arnat atortittartut ingalassimaqqullugit. ’Arnap taassuma allaasup [atortittartup] qarlui tungusunnitsuummik nutaamik kusermata, qilaalu uuliamit perrannerulluni.’ Aap, kanngunartuliornikkut atoqateqarnissaq ussernartorsiornartorujussuusinnaavoq. Salomonili ima mianersoqqusivoq: ’Kingornali naasutut sungarnitsutut sungarnitsigaaq, panatut illuttut kiinalittut ipitsigaluni.’

Kanngunartuliornikkut atoqatigiinnerup kinguneri pillugit angajoqqaat Salomonitut ilillutik meeqqatik oqaloqatigalugit tunngaveqarluartumik eqqarsalersinniarsinnaavaat. Ilerasunneq, kissaatiginngisamik naartulersoorneq, nappaatit kinguaassiuutitigut tunillaattartut, soorlu AIDS — tamakku tassaapput minuttialunnguani nuannisarnerup kingunerisartagaasa ilaat nuanniitsut. Salomonip nangilluni inuusuttut inappai ’usornaatigisartik allanut tunniuteqqunagu’. (ússatit 5:9) Angut inuusuttoq imaluunniit arnaq inuusuttoq katinnissamik soqutiginninngitsumut tunniukkaangami ersersittannginnerpaa imminut ataqqinermik amigaateqarluni? Nikanarsaataannginnerpa nammineq pilerissutsinik imaluunniit allap pilerissusiinik naammassinnittussaannartut imminut tunniukkaanni? Angajoqqaat meeqqaminnut tamanna paasitinniartariaqarpaat.

Inuit kanngunartuliortartut pillugit Salomon suli unnersuussuteqarpoq: ’Aqqutigisat taassumannga [imaluunniit taakkunannga] ungasilli, illuatalu paa qaninaarnaveeruk.’ (ússatit 5:8) Tamatumunnga assingusumik angajoqqaat meeqqatik ulluinnarni atorluarsinnaasunik siunnersorsinnaavaat qanoq ilillutik kanngunartuliornissamut ussernartorsiulersinnaaneq pinngitsoorsinnaagaat. Ilungersorlutik kajumissaarsinnaavaat inunnik kristumiunut najoqqutassianik maleruaanngitsunik peqateqartannginnissaannik. Katinnissamullu naammattumik utoqqaassuseqalerpata kajumissaarneqartariaqarput eqqunngitsumik iliortoornissartik pinngitsoorniarlugu ulluinnarni atorluarsinnaasaminnik aaqqissuussinissaannik. Assersuutigalugu, angutip arnallu asannilerfigisimasut isumagisinnaavaat naapissagaangamik inunnik allanik ilaqartarnissartik. Tassa itsangaq? Immaqa. Kisianni pitsaaneruvoq silatusaartumik piareersimassalluni Salomonip allaaserisaatut ingerlanerminngarnit: ’Naggatissakkut nimaassasutit, neqaarullutillu uineerukkuit, oqassasutillu: „Perorsaat uumigimmigakku. Ajoqersortima nipaat naalanngimmigakku.“’ — ússatit 5:9, 11-13.

Inuusuttut ikiukkit Jehovamik mianerinnileqqullugit

Missiliuunneqartarpoq USA-mi inuusuttut millioninit aqqaneq-marlunnit amerlanerusut atoqateqartartuusut. Allaat nappaassuup AIDS-ip atugaanerata kanngunartuliorneq tamanna annikillisissinnaasimanngilaa. AIDS-imut ersiginninnermit imaluunniit naartulersoornissamut annilaanngatiginninnermit itinerusumik Jehovap Nalunaajaasuisa meeqqatik peqalersinniarsaraat, tassalu Jehova Guutimik mianerinninnermik peqqinnartumik. ússatit 5:21-mi Salomonip inuusuttut ima eqqaasippai: ’Inuup aqqutigisai Jehovap isaasa saanniipput, ingerlaviilu tamaasa taassuma misilittarpai.’ Taamaattumik John, Jehovap Nalunaajaasuisa ilaat sisamanillu meeralik, ima siunnersuivoq: ’Meeqqat Jehovamut asanninnertik mianerinninnertillu iluaqutigaat. Namminissarsiortumik pisoqaraangat Jehovap aliasuttarneranik meeqqavit paasitinnissaa nangaassutigissanngilat.’ — Naleqqiuguk ússatit 27:11.

Guutimik mianerinninnertik pissutigalugu inuusuttut kanngunartuliorneq pinngitsuussagunikku Guuti piviusutut isigisariaqarpaat. (Naleqqiuguk Eprîarit 11:27.) Angajoqqaat meeqqatik nassuiaassinnaavaat aalajangersimasumik akuttunngitsumik Bibelimik atuaqqissaartarnikkut, ullormut arlaleriarluni Guutimut qinunikkut saaffiginnittarnikkut maleruaqqusaanillu ulluinnarni maleruaanikkut Guutimut qanimut attaveqartoqarsinnaasoq. Inuusuttut paasigunikku Guutip ’isumassoraatik’ taava Guutip iluarinngisaanik iliorumassanngillat. — 1 Pîtruse 5:7.

Soqutiginartuuvoq pisariaqartitat inuusuttut allat pisinnaanngisaat inuusuttunit Guutimut qanimut attaveqartunit pineqarsinnaammata. Paasisimasallit ilaat oqartarput inuusuttut ’soriarsinnaannginnermik’ misigisimanerminnut imaluunniit imminut ataqqinnginnermik misigisimanerminnut taarserartunik atoqateqartarnermikkut akiuunniartarnerat nalinginnaasuusoq. Guutimilli ikinngutiginnittut misigissutsinik taama ittunik naalliuuteqarneq pinngitsoorsinnaavaat! Taakku ima oqarsinnaapput: „Guuti ikiortigaara, [Jehova] najummisigaara.“ — Tussiaat 54:6.

Atoqatigiinnermut aappariinnermullu oqimaaqatigiissumik isiginninneq

Soorunami angajoqqaat kissaatiginngilaat meeqqamik atoqatigiinnermut tunngasunik ingasaassisumik ajorinnilernissaat. Tassami naak Bibelimi kanngunartuliorneq avoqqaarineqaraluarluni taamaattoq aamma ersersinneqarpoq kinguaassiuutitigut atoqatigiinnerup nuannersuusinnaanera — soorunami aappariinnerup iluani piguni. Taallatut ilillugu Salomon ima ilanngussivoq: „Puilasuutit pilluaqqunarsili, inuusunnernilu nuliarilikkat tipaatsuutiguuk. . . . Taassuma iviangii putussutigisaannakkit. Taassuma asannissusia qiimmatsaatigittuinnaruk.“ — ússatit 5:18, 19, NV.

Aappariittut inooqatigiinnermut angajoqqaat taamatut ataqqinartumik isiginnittaaseqarunik tamakkununnga tunngasunik oqaloqatiginninnissaminnut ittoornissaminnut pissutissaqanngillat. Siuliani eqqartorneqartoq, John, ima oqarpoq: „Meeqqavut tamatigut ammasumik unneqqarissumillu oqaloqatigisarpavut; kinguaassiuutinut tunngasut eqqartornissaannut kisinneq ajorpugut. Erseqqissartarparput tamanna Pinngortitsisumit, Jehovamit, tunissutaammat, uiusup nuliaasullu akornanni taamaallaat pisussaq.“ Ataataq marlunnik inuusuttuaqqanik ernilik ima oqarpoq: „Mikisunnguuneranniilli ammasumik kinguaassiuutinut tunngasunik oqaloqatigisarpavut. Asanninnermut kinguaassiuutitigullu atoqatigiinnermut ataqqinnittumik isiginnittaaseqalersinniarsarisimavavut. Suli tamakku pillugit oqaloqatigisarpavut.“ Malugisariaqarpoq tamatuma kingunerisaanik meerai tamarmik ileqqussatigut ipiitsuummata.

Qanoq ilillutik inuusuttut ’annannissamut ilisimalersinnaasut’

’Inuit ajortut salloqittaapiluttullu ajoriartorsinnararaat,’ apustili Paulus taama siulittuivoq. (2 Timûtiuse 3:13) Taamaattumik ileqqussatigut najoqqutassat ajorsiartuinnassapput. Inuusuttuaqqat akornanni taarserartunik atoqateqartarnerit naartulersoortarnerillu suli ajornartorsiutaajuassapput.

Angajoqqaat guutimut-tunniusimasut Bibeli ikiortigalugu meeqqatik ’annannissamut ilisimasunngortissinnaavaat’. (2 Timûtiuse 3:15) Misigiguit Bibelimi ajoqersuutinik suli paasisaqarnerorusullutit taava tikilluaqqusaavutit Jehovap Nalunaajaasuinik saaffiginninnissannut atuagassiamik matuminnga saqqummersitsisut allakkatigut saaffiginerisigut. Taakku nuannaarlutik isumagissavaat akeqanngitsumik ilinniartinneqarnissat. Jehovap Nalunaajaasuisa aammattaaq atuakkamik Hvordan du får det bedste ud af din ungdom-imika (Qanoq ilillutit inuusuttuunerit pitsaanerpaamik pissarsiffigisinnaagit) pissarsissussinnaassavaatsit. Atuagaq taanna Bibelimi unnersuussutinik imaqarpoq inuusuttut tuusintilippassuit kanngunartuliornermut nakkarnaveersaarnerminni ikiuutigisimasaannik.

Niviarsissammi aappariinnerup avataani meerartaareersimasut qanoq iliussappat? Neriuutaarulluinnaqqanngilluinnarput. Iliuuserisimasaminik peqqissimissutiginningaartoq Guutip isumakkeerfigingaassavaa. (Isaia 55:7) Kisimiilluni meeqqanik perorsaaneq oqitsuunngilaq, Bibelimili najoqqutassiat atoraanni iluatsissinnaavoq. Arnaq inuusuttoq kristumiunngunnginnermini aappariinnerup avataani pingasunik meerartaarsimasoq taama pisimavoq. Ilaquttamini Guutip oqaasia ilungersuullugu atorniarpaa. Jehovap Nalunaajaasuisa ilagiivisa ilaannut attaveqarnermigut ikiorneqarlunilu tapersersorneqarsimaqaaq. Taanna ima oqarpoq: „Guuti isumakkeerfiginningaartoq kiffartuullugu aamma angutinik arnanillu paasinnittuusunik qatannguteqarluni asseqanngilaq. Inuuleramali aatsaat misigivunga timikkut anersaakkullu ipiillunga peqqillungalu.“

Pitsaanerpaavorli katitsinnani kinguaassiuutitigut atoqatigiinneq pinngitsoorluinnaraanni — ullumikkullu inuusuttut tuusintilippassuit taamaaliorput Bibelimi najoqqutassiat naassaanngitsumik atortussaasut maleruaramikkik. (wD 15/4 88)

[Quppernerup ataani ilanngussaq]

[Qupp. 5-mi issuagaq]

AIDS-imut ersiginninnermit imaluunniit naartulersoornissamut annilaanngatiginninnermit itinerusumik Jehovap Nalunaajaasuisa meeqqatik pigisaqalersinniarsaraat, tassa Jehova Guutimik mianerinninnermik peqqinnartumik

[Qupp. 5-mi issuagaq]

Missiliuunneqartarpoq USA-mi inuusuttut millioninit aqqaneq-marlunnit amerlanerusut atoqateqartartuusut.

[Qupp. 4-mi assiliartaq]

Kinguaassiuutinut tunngasut pillugit angajoqqaat meeqqaminnik oqaloqatiginnittarnertik attatiinnarsinnaavaat

[Qupp. 6-mi assiliartaq]

Guutimut attaveqarnerminnut ajoqusiisinnaasumik ileqqoqarnissartik kristumiut inuusuttut pinngitsoortariaqarpaat